نئی دہلی:18،مارچ، 2021:یوں تو وزیراعظم نریندر مودی کے روز مرہ کا معمول کافی مشغول رہتا ہےمگر کم ہی لوگوں کو یہ پتہ ہوگا کہ انہیں جب بھی موقع ملتا ہے وہ اپنی مشغولیت سے وقت نکال کر لوگوں کے خطوط اور ان کے پیغامات کا جواب دینے سے چوکتے نہیں ہیں۔ ایسا ہی ایک خط ملا ہے نینی تال، اتراکھنڈ کے کھیمانند کو جنہوں نے نریندر مودی ایپ (نمو ایپ) پی ایم کو پیغام بھیج کر پردھان منتری فصل بیمہ یوجنا کے پانچ کامیاب برس پورے ہونے اور حکومت کی دیگر کوششوں کیلئے مبارکباد دی تھی۔ اب وزیراعظم نے کھیمانند کو خط لکھ کر انہیں ان کے بیش قیمتی خیالات مشترک کرنے کیلئے ان کا شکریہ ادا کیا ہے۔
وزیراعظم نے خط میں لکھا ہے ‘‘زراعت سمیت مختلف شعبوں میں اصلاحات اور ملک کو ترقی کی نئی بلندیوں پر لے جانے کیلئے حکومت کے ذریعے کی جارہی پائیدار کوششوں پر اپنے بیش قیمت خیالات ساجھا کرنے کیلئے آپ کا شکریہ۔ ایسے پیغامات مجھے ملک کی خدمت میں جی جان سے جٹے رہنے کی نئی توانائی دیتے ہیں’’۔
پردھان منتری فصل بیمہ یوجنا کی کامیابی کا ذکر کرتے ہوئے وزیراعظم نے بتایا ‘‘پردھان منتری فصل بیمہ یوجنا موسم کی غیریقینی کیفیت سے جڑے جوکھم کو کم کرکے محنتی کسان بھائیو اور بہنوں کے اقتصادی مفادات کا تحفظ کرنے میں لگاتار اہم کردار نبھارہی ہے۔ کسان موافق بیمہ یوجنا کا فائدہ آج کروڑوں کسان لے رہے ہیں’’۔
زراعت اور کسانوں کی بہبود کے تئیں عہد بند سرکار کی کوششوں کا ذکر کرتے ہوئے وزیراعظم مودی نے آگے خط میں لکھا ہے پچھلے برسوں میں وسیع کووریج اور شفافیت کے ساتھ دعوے کے نپٹارے کے عمل کے ذریعے یہ یوجنا کسانوں کی فلاح وبہبود کو پوری طرح وقف ہماری عہد بند کوششوں اور پکے ارادوں کی ایک اہم مثال بن کر اُبھری ہے۔ آج بیج سے لیکر بازار تک کسان بھائی بہنوں کی ہر چھوٹی بڑی دقتوں کو دور کرنے اور انّ داتا کی خوشحالی اور زراعت کی ترقی یقینی بنانے کیلئے مسلسل کوششیں کی جارہی ہیں۔
اس کے ساتھ ہی وزیراعظم نے ملک کی ترقی میں ہم وطنوں کے تعاون اور ان کے رول کی ستائش کرتے ہوئے لکھا ‘‘آج ملک ہمہ جہت ترقی کے وِژن کے ساتھ ایک مضبوط، خوشحال اور خودکفیل بھارت بنانے کیلئے تیزی سے آگے بڑھ رہا ہے۔ تمام شہریوں کے اعتماد سے توانائی حاصل کرکے ملک قومی اہداف کو حاصل کرنے کیلئے عہد بند ہے اور مجھے پورا یقین ہے کہ ملک کو عالمی اسٹیج پر نئی بلندیوں پر لے جانے کی ہماری کوششیں آگے اور تیز ہوں گی’’۔
اس سے پہلے کھیما نند نے وزیراعظم مودی کو اپنے پیغام میں فصل بیمہ یوجنا کے پانچ کامیاب برس مکمل ہونے پر مبارکباد دی تھی۔ ساتھ ہی کھیمانند نے کہا تھا حکومت وزیراعظم کی قیادت میں مختلف فلاحی اسکیموں کے ذریعے شہریوں اور ملک کی ترقی کیلئے مسلسل کوشش کررہی ہے۔
