نئی دہلی، 26/ اپریل 2022 ۔ وزیر اعظم جناب نریندر مودی 28 اپریل 2022 کو آسام کا دورہ کریں گے۔ وہ کاربی آنگ لونگ ضلع میں دیپھو کے مقام پر تقریباً گیارہ بجے صبح ’امن، اتحاد و ترقی ریلی‘ سے خطاب کریں گے۔ پروگرام کے دوران وہ تعلیمی شعبے سے متعلق متعدد پروجیکٹوں کا سنگ بنیاد بھی رکھیں گے۔ اس کے بعد دوپہر میں تقریباً 1:45 بجے وزیر اعظم ڈبروگڑھ میں واقع آسام میڈیکل کالج پہنچیں گے اور ڈبرو گڑھ کینسر ہاسپیٹل کو قوم کے نام وقف کریں گے۔ بعد میں سہ پہر تین بجے وہ ڈبروگڑھ میں کھانیکر گراؤنڈ میں منعقد ہونے والی ایک عوامی تقریب میں شرکت کریں گے، جہاں وہ مزید چھ کینسر اسپتالوں کو قوم کے نام وقف کریں گے اور سات نئے کینسر اسپتالوں کا سنگ بنیاد رکھیں گے
وزیر اعظم کاربی آنگ لونگ کے دیپھو میں
خطہ میں امن اور ترقی کے تئیں وزیر اعظم کی غیر متزلزل عہد بستگی کو اس وقت مزید تقویت حاصل ہوئی جب حال ہی میں حکومت ہند اور حکومت آسام نے چھ کاربی ملیٹینٹ جماعتوں کے ساتھ میمورنڈم آف سیٹلمنٹ (ایم او ایس) پر دستخط کئے۔ میمورنڈم آف سیٹلمنٹ نے خطے میں امن کے ایک نئے عہد کا آغاز کیا ہے۔ امن، اتحاد و ترقی کے موضوع پر وزیر اعظم کے خطاب سے پورے خطے میں امن سے متعلق اقدامات کو زبردست تقویت ملے گی۔
وزیر اعظم ویٹرنری کالج (دیپھو)، ڈگری کالج (مغربی کاربی آنگ لونگ) اور ایگریکلچرل کالج (کولونگا، مغربی کاربی آنگ لونگ) کا سنگ بنیاد بھی رکھیں گے۔ 500 کروڑ روپئے سے زیادہ کے یہ پروجیکٹ خطے میں ہنرمندی کے فروغ اور روزگار کے نئے مواقع پیدا کریں گے۔
پروگرام کے دوران وزیر اعظم 2950 سے زیادہ امرت سروور پروجیکٹوں کا سنگ بنیاد بھی رکھیں گے۔ ریاستی حکومت تقریباً 1150 کروڑ روپئے کی مجموعی لاگت سے ان امرت سرووروں کو ترقی دینے کا کام کرے گی۔
وزیر اعظم ڈبروگڑھ میں
آسام کینسر کیئر فاؤنڈیشن، جو کہ حکومت آسام اور ٹاٹا ٹرسٹ کی ایک مشترکہ کمپنی ہے، پوری ریاست میں 17 کینسر کیئر ہاسپٹلس کی تعمیر کا کام کررہی ہے۔ اس پروجیکٹ کے نفاذ کا مقصد جنوبی ایشیا کے سب سے بڑے اور سستے کینسر کیئر نیٹ ورک کی تعمیر کرنا ہے۔ پروجیکٹ کے پہلے مرحلے کے تحت، 10 اسپتالوں میں سے 7 اسپتالوں کی تعمیر کا کام مکمل ہوچکا ہے، جبکہ تین اسپتالوں کی تعمیر مختلف مراحل میں ہے۔ پروجیکٹ کے دوسرے مرحلے میں سات نئے کینسر اسپتالوں کی تعمیر کی جائے گی۔
وزیر اعظم پروجیکٹ کے پہلے مرحلے کے تحت مکمل ہوچکے 7 کینسر اسپتالوں کو قوم کے نام وقف کریں گے۔ یہ کینسر اسپتال ڈبروگڑھ، کوکراجھار، بارپیٹا، دارنگ، تیزپور، لکھیم پور اور جورہاٹ میں تعمیر کئے گئے ہیں۔ وزیر اعظم پروجیکٹ کے دوسرے مرحلے کے تحت ڈھبری، نلباری، گولپارا، ناگاؤن، سیوساگر، تنسکیا اور گولاگھاٹ میں تعمیر ہونے والے سات نئے کینسر اسپتالوں کا سنگ بنیاد بھی رکھیں گے۔
