نئی دہلی، 26/جون۔ متحدہ عرب امارات کے وزیر خارجہ و بین الاقوامی تعاون عزت مآب شیخ عبداللہ بن زائد النہیان نے آج وزیراعظم جناب نریندر مودی سے ملاقات کی۔
اس ملاقات کے دوران جناب شیخ زائد عبداللہ بن زائد النہیان نے وزیراعظم جناب مودی کو متحدہ عرب امارات کے ولی عہد کی جانب سے مبارکباد پیش کی۔ جناب نریندر مودی نے انتہائی گرم جوشی کے ساتھ نیک خواہشات پیش کرتے ہوئے اس مبارک باد کا جواب دیا۔
دونوں لیڈروں نے اپنی گفتگو کے دوران تجارت و سرمایہ کاری، دفاع اور عوام سے عوام کے رابطوں سمیت متعدد شعبوں میں باہمی تعاون پر گفتگو کی۔ وزیر موصوف نے ہندوستان میں توانائی، مکان سازی (ہاؤسنگ)، غذائی اشیاء کی افزودگی (فوڈ پروسیسنگ) اور ڈھانچہ جاتی سہولیات جیسے شعبوں میں ہندوستان میں سرمایہ کاری کی متحدہ عرب امارات کی خواہش کا اظہار کیا۔ وزیراعظم جناب نریندر مودی نے اس موقع پر 44 ارب امریکی ڈالر کی لاگت سے تیار ہونے والی ایم ایم ٹی پی اے گرین فیلڈ ریفائنری میں سرمایہ کاری کے اے ڈی این او سی کے فیصلے کا خیرمقدم کیا۔ اس میگا ریفائنری میں پیٹرو کیمیکل کمپلیکس بھی شامل ہے۔ یہ میگا ریفائنری ہندوستان میں تعمیر کی جارہی ہے۔
وزیراعظم موصوف نے اس سلسلے میں ایک مفاہمتی عرض داشت پر دونوں ملکوں کے ذریعے دستخط کئے جانے کا خیرمقدم کیا۔ بعد ازاں متحدہ عرب امارات کے مہمان وزیر موصوف نے متحدہ عرب امارات میں آباد ہندوستانی برادری کی خدمات کا اعتراف کرتے ہوئے کہا کہ ملک کی معیشت اور خوش حالی میں اس برادری کا کردار اہم رہا ہے۔
