పశుపోషకులకు తోడ్పాటు దిశగా పశువులకు సోకే గాలికుంటు, బ్రూసెలోసిస్ వ్యాధుల నియంత్రణ ప్రతిపాదనకు మంత్రిమండలి ఆమోదం

లోక్‘సభ ఎన్నికల అనంతరం ప్రధానమంత్రి నరేంద్ర మోదీ అధ్యక్షతన నేడు కేంద్ర మంత్రిమండలి తొలిసారి సమావేశమైంది. ఈ సందర్భంగా దేశంలోని కోట్లాది రైతులకు లబ్ధి చేకూర్చడంతోపాటు పశుసంపద ఆరోగ్యం మెరుగు దిశగా వినూత్న చర్యల ప్రతిపాదనకు ఆమోదం తెలిపింది. ఆ మేరకు పశుపోషకులకు తోడ్పాటునిస్తూ- పశువులకు సోకే ‘‘గాలికుంటు (కాలు-నోరు సంబంధిత వ్యాధి-FMD), బ్రూసెలోసిస్’’ (పశువుల నుంచి మానవులకు వ్యాపించే సూక్ష్మజీవి) వ్యాధి నియంత్రణకు ప్రభుత్వం చర్యలు తీసుకుంటుంది. ఈ వ్యాధుల నియంత్రణతోపాటు వాటి నిర్మూలనద్వారా దేశంలోని పశుసంపదను రక్షించడం కోసం రాబోయే ఐదేళ్లలో రూ.13,343 కోట్లు వ్యయం చేసే ప్రతిపాదను కూడా మంత్రిమండలి ఆమోదించింది. ఈ భూగోళంలో విలువైన భాగంగా ఉన్న మూగజీవులపై ప్రభుత్వానికిగల కరుణా స్ఫూర్తికి ఈ నిర్ణయం అద్దం పడుతోంది.
గాలికుంటు, బ్రూసెలోసిస్ వ్యాధులతో ముప్పు:

ఆవులు, ఎద్దులు, గేదెలు, గొర్రెలు, మేకలు, పందులు తదితర జంతువులకు ఈ వ్యాధులు సర్వసాధారణంగా సోకుతుంటాయి. ఆవు లేదా గేదె గాలికుంటు వ్యాధికి గురైనప్పుడు 4 నుంచి 6 నెలలపాటు పాల దిగుబడి 100 శాతందాకా నష్టపోవాల్సి వస్తుంది. అదేవిధంగా బ్రూసెలోసిస్ వ్యాధి సోకినట్లయితే ఆయా జంతువుల జీవితకాలంపాటు పాల దిగుబడి 30 శాతం మేర పడిపోతుంది. అలాగే ఈ వ్యాధి బారినపడిన జంతువులలో ప్రత్యుత్పత్తి సామర్థ్యం నశించి వంధ్యత్వం సంభవించడమేగాక ఆయా జంతువుల యజమానులు, వాటితో పొలం పనులు చేసే కూలీలకు కూడా బ్రూసెలోసిస్ వ్యాధి సంక్రమిస్తుంది. ఈ రెండు వ్యాధుల కారణంగా పాలు, ఇతర పశుసంబంధ ఉత్పత్తుల వ్యాపారంపై ప్రత్యక్ష ప్రతికూల ప్రభావం పడుతుంది. ఈ నేపథ్యంలో దేశంలోని కోట్లాది రైతులకు.. ముఖ్యంగా పశుపోషకులకు మేలు చేసే నిర్ణయం తీసుకోవడంద్వారా ఎన్నికల సందర్భంగా ఇచ్చిన హామీని కేంద్ర మంత్రిమండలి నెరవేర్చింది.

పశుసంపదపై కరుణ, సంరక్షణ:

గాలికుంటు వ్యాధి విషయంలో- దేశంలోని 30 కోట్ల పశువులకు (ఆవులు, ఎద్దులు, గేదెల) ఆరు నెలలకు ఒకసారి వంతున టీకాలతోపాటు దూడలకు ప్రాథమిక టీకాలు వేయాలని ఈ పథకం నిర్దేశిస్తోంది. అదేవిధంగా 20 కోట్ల గొర్రెలు/మేకలు, కోటి పందులకు కూడా టీకాలు వేయాలి. ఇక బ్రూసెలోసిస్ వ్యాధి నియంత్రణ విషయానికొస్తే- 3.6 కోట్ల పెయ్య (ఆడ) దూడలకు 100 శాతం టీకాల కార్యక్రమాన్ని అమలు చేయాల్సి ఉంటుంది.

ఈ కార్యక్రమం ఇప్పటిదాకా కేంద్ర-రాష్ట్ర ప్రభుత్వాల మధ్య వ్యయ భాగస్వామ్యం ప్రాతిపదికన సాగుతూ వచ్చింది. అయితే, ఈ రెండు వ్యాధుల సంపూర్ణ నిర్మూలన, తద్వారా పశుపోషణ చేపట్టిన రైతులకు మెరుగైన జీవనోపాధి అవకాశాలు కల్పించాలని కేంద్రం నిర్ణయించింది. ఆ మేరకు ఎన్నడూ లేనిరీతిలో ఈ కార్యక్రమ వ్యయం మొత్తాన్నీ తానే భరించేలా కేంద్ర ప్రభుత్వం నిర్ణయం తీసుకుంది.