ప్రధానమంత్రి శ్రీ నరేంద్ర మోదీతో కువైట్ విదేశాంగ మంత్రి శ్రీ అబ్దుల్లా అలీ అల్ - యాహ్యా ఈ రోజు సమావేశమయ్యారు.
ఈ సందర్భంగా కువైట్ యువరాజు శ్రీ షేఖ్ సబాహ్ ఖలీద్ అల్-హమద్ అల్-సబాహ్తో సెప్టెంబరులో న్యూయార్క్లో తాను భేటీ అయిన సంగతిని ప్రధాని గుర్తుకు తెచ్చుకొన్నారు. ద్వైపాక్షిక సంబంధాల్లో పురోగతి జోరందుకొంటున్నందుకు ప్రధాని హర్షం వ్యక్తం చేశారు.
వ్యాపారం, పెట్టుబడి, ఇంధనం, టెక్నాలజీ, సంస్కృతి, రెండు దేశాల ప్రజల మధ్య దృఢ సంబంధాల్లో సహకారాన్ని మరింతగా పెంచుకొనేందుకు తీసుకోదగిన చర్యలపై ప్రధాని, కువైట్ విదేశాంగ మంత్రి చర్చించారు.
కువైట్లో నివసిస్తున్న పది లక్షల మంది భారతీయుల సంరక్షణ విషయంలో కువైట్ నాయకత్వం శ్రద్ధ వహిస్తున్నందుకు ప్రధానమంత్రి ధన్యవాదాలు తెలిపారు.
జీసీసీకి ప్రస్తుతం కువైట్ అధ్యక్ష బాధ్యతలను నిర్వహిస్తున్న నేపథ్యంలో భారతదేశానికి, గల్ఫ్ సహకార సమాఖ్యకు మధ్య ఇప్పుడున్న సన్నిహిత సహకారం మరింత పటిష్టం కాగలదన్న విశ్వాసాన్ని ప్రధాని వ్యక్తం చేశారు. పశ్చిమ ఆసియాలో నెలకొన్న స్థితిపై ఇరువురు నేతలు పరస్పరం అభిప్రాయాలను పంచుకున్నారు. ఆ ప్రాంతంలో శాంతి, భద్రత, స్థిరత్వం సాధ్యమైనంత త్వరగా తిరిగి నెలకొనాలని కోరుకున్నారు.
సాధ్యమైనంత త్వరలో కువైట్ కు రావాలంటూ కువైట్ నాయకత్వం అందించిన ఆహ్వానాన్ని ప్రధానమంత్రి అంగీకరించారు.
Glad to receive Foreign Minister of Kuwait H.E. Abdullah Ali Al-Yahya. I thank the Kuwaiti leadership for the welfare of the Indian nationals. India is committed to advance our deep-rooted and historical ties for the benefit of our people and the region. pic.twitter.com/hR5URxPyt5
— Narendra Modi (@narendramodi) December 4, 2024
