ప్రపంచ పర్యావరణ దినోత్సవం సందర్భంగా 2021 జూన్‌ 5న నిర్వహించే కార్యక్రమంలో ఉదయం 11 గంటలకు ప్రధానమంత్రి శ్రీ నరేంద్ర మోదీ వీడియో కాన్ఫరెన్స్‌ సదుపాయం ద్వారా పాల్గొంటారు. ఈ ఏడాది “మెరుగైన పర్యావరణ కోసం జీవ ఇంధనాలకు ప్రోత్సాహం” ఇతివృత్తంగా కేంద్ర పర్యావరణ-అటవీ-వాతావరణ మార్పు మంత్రిత్వశాఖ, పెట్రోలియం-సహజ వాయువుల మంత్రిత్వశాఖ ఈ కార్యక్రమాన్ని సంయుక్తంగా నిర్వహిస్తున్నాయి.
ఈ కార్యక్రమంలో భాగంగా “భారతదేశంలో ఇథనాల్ సమ్మిశ్రమం కోసం మార్గ ప్రణాళిక 2020-2025పై నిపుణుల కమిటీ నివేదిక”ను ప్రధానమంత్రి ఆవిష్కరిస్తారు. ప్రపంచ పర్యావరణ దినోత్సవ నిర్వహణ దిశగా ఇథనాల్ కలిపిన పెట్రోలు విక్రయించాల్సిందిగా చమురు కంపెనీలను ఆదేశిస్తూ ‘ఈ-20 నోటిఫికేషన్‌’ను కేంద్ర ప్రభుత్వం విడుదల చేయనుంది. ఈ మేరకు 2023 ఏప్రిల్‌ 1 నుంచి పెట్రోలులో 20 శాతం ఇథనాల్ కలిపి విక్రయించాలని సూచించనుంది. అదేవిధంగా అధిక మోతాదులో ‘ఇ12, ఇ15’ ఇథనాల్ మిశ్రమానికి సంబంధించి ‘బీఐఎస్‌’ ప్రమాణాలను ప్రకటించనుంది. ఈ చర్యలతో ఇథనాల్ అదనపు డిస్టిల్లరీ సామర్థ్యంగల ప్లాంట్ల ఏర్పాటుకు వీలు కలగడమేగాక దేశవ్యాప్తంగా మిశ్రమ ఇంధన లభ్యతకు నిర్ణీత వ్యవధి లభిస్తుంది. ఇథనాల్ ఉత్పాదక రాష్ట్రాలు, సమీప ప్రాంతాల్లో 2025కు ముందే ఇథనాల్ వినియోగం పెరగడానికి కూడా ఈ చర్యలు తోడ్పడతాయి.
పుణే నగరంలోని మూడు ప్రాంతాల్లో ప్రయోగాత్మక పథకం కింద ‘ఇ100’ ఇంధన విక్రయ స్టేషన్లను ప్రధానమంత్రి ఈ సందర్భంగా ప్రారంభిస్తారు. దీంతోపాటు ఇథనాల్ మిశ్రమ పెట్రోలు, పీడనసహిత బయోగ్యాస్ కార్యక్రమాల కింద మద్దతు పొందిన రైతుల తొలి అనుభవాలను వారినుంచి తెలుసుకునే దిశగా ప్రధాని వారితో ముచ్చటిస్తారు.
