ଆଜି ନୂଆଦିଲ୍ଲୀସ୍ଥିତ 7 ଲୋକ କଲ୍ୟାଣ ମାର୍ଗଠାରେ ଭାରତ ଆମେରିକା ରଣନୈତିକ ମଞ୍ଚ (ୟୁଏସଆଇଏସପିଏଫ)ର ସଦସ୍ୟମାନେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି । ୟୁଏସଆଇଏସପିଏଫର ଅଧ୍ୟକ୍ଷ ଶ୍ରୀ ଜନ ଚାମ୍ବର୍ସ ପ୍ରତିନିଧି ଦଳର ନେତୃତ୍ୱ ନେଇଥିଲେ ।
ଭାରତୀୟ ଅର୍ଥବ୍ୟବସ୍ଥା ଉପରେ ଆସ୍ଥା ପ୍ରକଟ କରିଥିବାରୁ ପ୍ରଧାନମନ୍ତ୍ରୀ ଏହି ପ୍ରତିନିଧି ଦଳକୁ ଧନ୍ୟବାଦ ଜଣାଇଥିଲେ । ସେ ଦେଶରେ ଉଦୀୟମାନ ଷ୍ଟାର୍ଟଅପ ପରିସଂସ୍ଥାନ ବିଷୟରେ ଉଲ୍ଲେଖ କରିଥିଲେ । ଏଥିସହିତ ଉଦ୍ୟମିତା କ୍ଷେତ୍ରରେ ଭାରତୀୟ ଯୁବବର୍ଗଙ୍କ ସାହସ ଓ ସାମର୍ଥ୍ୟ ସମ୍ପର୍କରେ କହିଥିଲେ । ନବୋନ୍ମେଷ ସମ୍ଭାବନାକୁ ପ୍ରୋତ୍ସାହନ ଦେବା ଏବଂ ପ୍ରଯୁକ୍ତି ଉପଯୋଗ କରି ସମସ୍ୟା ସମାଧାନ କରିବା ଉଦ୍ଦେଶ୍ୟରେ ଅଟଳ ଟିଙ୍କରିଂ ଲ୍ୟାବ ଓ ହ୍ୟାକାଥନ ଆୟୋଜନ ଆଦି ସରକାରଙ୍କ ପଦକ୍ଷେପ ଉପରେ ସେ ରେଖାପାତ କରିଥିଲେ ।
ବ୍ୟବସାୟିକ ସୁଗମତାକୁ ସୁନିଶ୍ଚିତ କରିବା ଲାଗି କର୍ପୋରେଟ ଟିକସ ହ୍ରାସ ଓ ଶ୍ରମ ସଂସ୍କାର ଭଳି ପଦକ୍ଷେପ ସମ୍ପର୍କରେ ପ୍ରଧାନମନ୍ତ୍ରୀ ଆଲୋଚନା କରିଥିଲେ । ସହଜ ଜୀବନ ଧାରଣ ସୁନିଶ୍ଚିତ କରିବା ସରକାରଙ୍କ ଲକ୍ଷ୍ୟ ବୋଲି ସେ ଉଲ୍ଲେଖ କରିଥିଲେ । ଭାରତ ପାଖରେ ଥ୍ରୀ ଡି’- ଡେମୋକ୍ରାସି (ଗଣତନ୍ତ୍ର), ଡେମୋଗ୍ରାଫି (ଜନସାଂଖିକୀ ବିବିଧତା) ଓ ‘ଦିମାଗ’ (ବୁଦ୍ଧିମତା)ର ଅଭିନବ ସାମର୍ଥ୍ୟ ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ ।
ଦେଶ ପାଇଁ ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ପ୍ରତି ଏହି ପ୍ରତିନିଧି ଦଳ ଆସ୍ଥା ପ୍ରକଟ କରି କହିଥିଲେ ଯେ ଭାରତର ଆଗାମୀ ପାଞ୍ଚ ବର୍ଷ, ବିଶ୍ୱର ଆସନ୍ତା 25 ବର୍ଷର ଭବିଷ୍ୟତ ନିର୍ଦ୍ଧାରଣ କରିବ ।
ୟୁଏସଆଇଏସପିଏଫ ସମ୍ପର୍କରେ
ଭାରତ ଆମେରିକା ରଣନୈତିକ ମଞ୍ଚ (ୟୁଏସଆଇଏସପିଏଫ) ହେଉଛି ଏକ ଅଣଲାଭକାରୀ ସଂଗଠନ । ଏହାର ପ୍ରମୁଖ ଲକ୍ଷ୍ୟ ହେଉଛି ଅର୍ଥନୈତିକ ଅଭିବୃଦ୍ଧି, ଉଦ୍ୟମିତା, ନିଯୁକ୍ତି ସୁଯୋଗ ସୃଷ୍ଟି ଏବଂ ନବୋନ୍ମେଷ କ୍ଷେତ୍ରରେ ନୀତିଗତ ପରାମର୍ଶ ଜରିଆରେ ଭାରତ-ଆମେରିକା ଦ୍ୱିପାକ୍ଷିକ ଏବଂ ରଣନୈତିକ ଭାଗିଦାରୀକୁ ସୁଦୃଢ଼ କରିବା ।
