For ages, conservation of wildlife and habitats has been a part of the cultural ethos of India, which encourages compassion and co-existence: PM Modi
India is one of the few countries whose actions are compliant with the Paris Agreement goal of keeping rise in temperature to below 2 degree Celsius: PMମୋର ପ୍ରିୟ ବନ୍ଧୁଗଣ!
ମହାତ୍ମା ଗାନ୍ଧୀଙ୍କ ଜନ୍ମସ୍ଥାନରେ ପ୍ରବାସୀ ପ୍ରଜାତିର ତ୍ରୟୋଦଶ ସିଓପି ସମ୍ମିଳନୀକୁ ଆପଣ ସମସ୍ତଙ୍କୁ ସ୍ଵାଗତ କରି ମୁଁ ଆନନ୍ଦ ଅନୁଭବ କରୁଛି ।
ଭାରତ ବିଶ୍ଵର ସର୍ବାଧିକ ବିବିଧତାପୂର୍ଣ୍ଣ ଦେଶ ମଧ୍ୟରୁ ଅନ୍ୟତମ । ବିଶ୍ଵର 2.4 ପ୍ରତିଶତ ଭୌଗଳିକ କ୍ଷେତ୍ରଧାରୀ ଭାରତ ବିଶ୍ଵ ଜୈବବିବିଧତାରେ ପ୍ରାୟ 8 ପ୍ରତିଶତର ଯୋଗଦାନ ରଖିଛି । ଭାରତ ବିବିଧ ପରିବେଶ ସମ୍ବନ୍ଧୀୟ ବାସସ୍ଥଳୀରେ ସମୃଦ୍ଧ ଏବଂ ଏଠାରେ ଜୈବବିବିଧତାର 4ଟି ପ୍ରମୁଖ କ୍ଷେତ୍ର ରହିଛି । ଏଗୁଡିକ ହେଲା ପୂର୍ବ ହିମାଳୟ, ପଶ୍ଚିମ ଘାଟ, ଭାରତ-ମିଆଁମାର ଭୂଭାଗ ଓ ଆଣ୍ଡାମାନ ଓ ନିକୋବାର ଦୀପ ସମୂହ । ଏହାବ୍ୟତୀତ ସାରା ବିଶ୍ୱରୁ ଆସୁଥିବା ପାଖାପାଖି 500 ପ୍ରଜାତିର ପକ୍ଷୀଙ୍କ ବାସସ୍ଥଳୀ ହେଉଛି ଭାରତ ।
ଭାଇ ଓ ଭଉଣୀମାନେ,
ପ୍ରାଚୀନ କାଳରୁ ବନ୍ୟପ୍ରାଣୀ ଓ ସେମାନଙ୍କ ବାସସ୍ଥଳୀର ସଂରକ୍ଷଣ ଭାରତର ସାଂସ୍କୃତିକ ଚଳଣିର ଅଂଶବିଶେଷ ହୋଇ ରହିଆସିଛି, ଯାହା କରୁଣା ଏବଂ ସହାବସ୍ଥାନକୁ ପ୍ରୋତ୍ସାହିତ କରିଥାଏ । ଆମ ବେଦରେ ବନ୍ୟପ୍ରାଣୀଙ୍କ ସଂରକ୍ଷଣ କଥା କୁହାଯାଇଛି । ଜଙ୍ଗଲ ସୁରକ୍ଷା ଓ ବନ୍ୟପ୍ରାଣୀଙ୍କ ହତ୍ୟା ଉପରେ ଅଙ୍କୁଶ ଲଗାଇବା ଲାଗି ସମ୍ରାଟ ଅଶୋକ ଜୋର ଦେଇଥିଲେ । “ଗାନ୍ଧୀଜୀଙ୍କ ଠାରୁ ପ୍ରେରଣା ଲାଭ କରି ଅହିଂସା ତଥା ଜୀବ ପ୍ରକୃତିର ସଂରକ୍ଷଣ ସିଦ୍ଧାନ୍ତକୁ ଦେଶର ସମ୍ବିଧାନରେ ଉପଯୁକ୍ତ ସ୍ଥାନ ଦିଆଯାଇଛି, ଯାହା ଅନେକ ଆଇନ ଓ ବିଧାନରେ ପରିଲକ୍ଷିତ ହୋଇଛି” ।
ଅନେକ ବର୍ଷ ଧରି ହୋଇଥିବା ନିରନ୍ତର ପ୍ରୟାସର ଉତ୍ସାହପୂର୍ଣ୍ଣ ଫଳାଫଳ ମିଳିଛି । ସଂରକ୍ଷିତ ଅଞ୍ଚଳ ସଂଖ୍ୟା 2014ରେ 745ରୁ ବୃଦ୍ଧି ପାଇ 2019ରେ 870ରେ ପହଞ୍ଚିଯାଇଛି । ଏହାର ପରିଧି ପାଖାପାଖି 1 ଲକ୍ଷ 70 ହଜାର ବର୍ଗକିଲୋମିଟର ପର୍ଯ୍ୟନ୍ତ ବ୍ୟାପିଯାଇଛି । ଭାରତରେ ଘନ ଜଙ୍ଗଲ କ୍ଷେତ୍ର ମଧ୍ୟ ବୃଦ୍ଧି ପାଇଛି । ଏହାର ପରିଧି ଦେଶର ମୋଟ ଭୌଗଳିକ କ୍ଷେତ୍ରର 1.67 ପ୍ରତିଶତ ହୋଇସାରିଛି ।
ସଂରକ୍ଷଣ, ସ୍ଥାୟୀ ଜୀବନ ଶୈଳୀ ଏବଂ ସବୁଜ ବିକାଶ ମଡେଲ ଆଧାରରେ ଭାରତ ଜଳବାୟୁ ଅଭିଯାନର ନେତୃତ୍ଵ ନେଉଛି । ଏ ଦିଗରେ ଆମ ପକ୍ଷରୁ କରାଯାଉଥିବା ପ୍ରୟାସରେ 450 ମେଗାୱାଟ ଅକ୍ଷୟ ଶକ୍ତି ବିକାଶ ଲକ୍ଷ୍ୟ ହାସଲ କରିବା, ବିଦ୍ୟୁତ ଚାଳିତ ଯାନକୁ ପ୍ରୋତ୍ସାହନ, ସ୍ମାର୍ଟ ସହର ନିର୍ମାଣ ଓ ଜଳ ସଂରକ୍ଷଣ ଆଦି ସାମିଲ ରହିଛି ।
ଅନ୍ତର୍ଜାତୀୟ ସୌର ଶକ୍ତି ମେଣ୍ଟ, ବିପର୍ଯୟ ପ୍ରଶମନକାରୀ ଭିତ୍ତିଭୂମି ସଂଘ ଓ ସ୍ଵିଡେନ ସହିତ ଔଦ୍ୟୋଗିକ ପରିବର୍ତ୍ତନ ଲାଗି ନେତୃତ୍ଵ ଭଳି କାର୍ଯ୍ୟରେ ବ୍ୟାପକ ମାତ୍ରାରେ ବିଭିନ୍ନ ଦେଶ ପକ୍ଷରୁ ଉତ୍ସାହଜନକ ଭାଗିଦାରୀ ଦେଖିବାକୁ ମିଳିଛି । ଭାରତ ସେ ସବୁ ହାତଗଣତି ଦେଶ ମଧ୍ୟରେ ସାମିଲ ରହିଛି, ଯେଉଁଠି ତାପମାତ୍ରା ବୃଦ୍ଧି ପରିମାଣକୁ 2 ଡିଗ୍ରୀ ସେଲସିୟସ ତଳେ ରଖିବା ଲାଗି ପ୍ୟାରିସ ରାଜିନାମାର ଲକ୍ଷ୍ୟ ଅନୁରୂପ କାର୍ଯ୍ୟ କରାଯାଉଛି ।
ବନ୍ଧୁଗଣ,
ଭାରତ ପ୍ରଜାତି ସଂରକ୍ଷଣ ପ୍ରକଳ୍ପ / କାର୍ଯ୍ୟକ୍ରମ ଉପରେ ଧ୍ୟାନ ଦେବା ଆରମ୍ଭ କରିଦେଇଛି । ଏହାର ଉନ୍ନତ ଫଳାଫଳ ବାହାରିଛି । ପ୍ରାରମ୍ଭିକ ପର୍ଯ୍ୟାୟରେ ବ୍ୟାଘ୍ର ଅଭୟାରଣ୍ୟଗୁଡିକର ସଂଖ୍ୟା 9ରୁ ବୃଦ୍ଧି ପାଇ 50 ପର୍ଯ୍ୟନ୍ତ ପହଞ୍ଚିପାରିଛି । ବର୍ତ୍ତମାନ ଭାରତରେ 2970 ବାଘ ରହିଛନ୍ତି । 2022 ସୁଦ୍ଧା ବାଘଙ୍କ ସଂଖ୍ୟା ଦ୍ଵିଗୁଣିତ କରିବା ଲାଗି ଭାରତ ନିଜର ଲକ୍ଷ୍ୟ 2 ବର୍ଷ ପୂର୍ବରୁ ହାସଲ କରିସାରିଛି । ମୁଁ ଏଠାରେ ଉପସ୍ଥିତ ବାଘ ଶୃଙ୍ଖଳା ରାଷ୍ଟ୍ର ଓ ଅନ୍ୟ ଲୋକମାନଙ୍କୁ ଆହ୍ଵାନ କରୁଛି ଯେ ସେମାନେ ନିଜର ଅଭୂତପୂର୍ବ ପ୍ରୟାସ ବିନିମୟ କରିବା ଜରିଆରେ ବାଘ ସଂରକ୍ଷଣ ଦିଗରେ ମିଳିତଭାବେ ଆଗେଇ ଆସନ୍ତୁ ।
ବିଶ୍ଵସ୍ତରରେ ଏସୀୟ ହାତୀଙ୍କ ସଂଖ୍ୟାର 60 ପ୍ରତିଶତରୁ ଅଧିକ ଭାଗକୁ ଭାରତ ସମର୍ଥନ କରୁଅଛି । ଆମ ରାଜ୍ୟଗୁଡିକ 30ଟି ହାତୀ ଅଭୟାରଣ୍ୟକୁ ଚିହ୍ନଟ କରିଛନ୍ତି । ଭାରତ ଏସୀୟ ହାତୀଙ୍କ ସଂରକ୍ଷଣ ଲାଗି ମାନକ ପ୍ରତିଷ୍ଠା କରିଛି ଓ ଅନେକ ପଦକ୍ଷେପ ଗ୍ରହଣ କରିଛି ।
ଆମେ ଉଚ୍ଚ ହିମାଳୟ କ୍ଷେତ୍ରର ଚିତା ବାଘ ଏବଂ ଏହାର ପ୍ରାକୃତିକ ବାସସ୍ଥଳୀର ସଂରକ୍ଷଣ ଲାଗି ବରଫ ଚିତା ପ୍ରକଳ୍ପ (ପ୍ରୋଜେକ୍ଟ ସ୍ନୋ ଲିଓପାଡ)ର ଆରମ୍ଭ କରିଛୁ । ଭାରତ ନିକଟରେ 12ଟି ଦେଶକୁ ନେଇ ବୈଶ୍ଵିକ ବରଫ ଚିତା ବାଘ ପ୍ରାକୃତିକ ଆବାସସ୍ଥଳୀ ପରିଚାଳନା ସମିତିର ଆୟୋଜନ କରିଥିଲା । ଏହି ଅବସରରେ ନୂଆଦିଲ୍ଲୀ ଘୋଷଣା ପତ୍ର ଜାରି କରାଯାଇଥିଲା, ଯେଉଁଥିରେ ବରଫ ଚିତା ବାଘର ସଂରକ୍ଷଣ ଲାଗି ବିଭିନ୍ନ ଦେଶ ମଧ୍ୟରେ ଦେଶ ଆଧାରିତ ଫ୍ରେମ ୱାର୍କ ବିକାଶ ବିଷୟରେ ଉଲ୍ଲେଖ କରାଯାଇଥିଲା । ମୁଁ ଖୁସିର ସହ ଏହା କହିବାକୁ ଚାହେଁ ଯେ, ଭାରତ ଜନଭାଗିଦାରୀ ଜରିଆରେ ପାର୍ବତ୍ୟ ପ୍ରାକୃତିକ ପରିସଂସ୍ଥାନର ସଂରକ୍ଷଣ ସହିତ ସବୁଜ ଅର୍ଥବ୍ୟବସ୍ଥାକୁ ପ୍ରୋତ୍ସାହନ ଦେବାରେ ଅଗ୍ରଣୀ ଭୂମିକା ଗ୍ରହଣ କରୁଛି ।
ବନ୍ଧୁଗଣ,
ଗୁଜରାଟର ଗିର କ୍ଷେତ୍ର ହେଉଛି ଏସୀୟ ସିଂହଙ୍କ ଏକମାତ୍ର ବାସସ୍ଥଳୀ । ଏଗୁଡିକ ଆମ ଦେଶର ଗୌରବ । ଆମେ ଏସୀୟ ସିଂହଙ୍କ ସଂରକ୍ଷଣ ଲାଗି 2019 ଠାରୁ ଏସୀୟ ସିଂହ ସଂରକ୍ଷଣ ପ୍ରକଳ୍ପ କାର୍ଯ୍ୟକାରୀ କରୁଛୁ । ମୁଁ ଆନନ୍ଦର ସହିତ ଏହି ସୂଚନା ଦେବାକୁ ଚାହେଁ ଯେ, ଆଜି ଏସୀୟ ସିଂହଙ୍କ ସଂଖ୍ୟା 523 ହୋଇଯାଇଛି ।
ଭାରତର ଆସାମ, ଉତ୍ତରପ୍ରଦେଶ ଓ ପଶ୍ଚିମବଙ୍ଗରେ ଏକ ଶିଙ୍ଘ ବିଶିଷ୍ଟ ଗଣ୍ଡା ଦେଖିବାକୁ ମିଳନ୍ତି । ଭାରତ ସରକାର 2019ରେ “ଭାରତୀୟ ଏକ ଶିଙ୍ଘ ଗଣ୍ଡାଙ୍କ ପାଇଁ ଜାତୀୟ ସଂରକ୍ଷଣ ରଣନୀତି” ଆରମ୍ଭ କରିଛନ୍ତି ।
ଲୁପ୍ତପ୍ରାୟ ପକ୍ଷୀ “ଗ୍ରେଟ ଇଣ୍ଡିଆନ ବଷ୍ଟର୍ଡ”କୁ ଗୁରୁତ୍ଵ ଦେଇ “ଜିଆଇବିଆଇ – ଦ ଗ୍ରେଟ” ଶୁଭଙ୍କରର ସୃଷ୍ଟି କରିଛନ୍ତି ।
ବନ୍ଧୁଗଣ,
ପ୍ରବାସୀ ପ୍ରଜାତିଙ୍କ ଉପରେ ଗାନ୍ଧୀନଗରଠାରେ ମିଳିତ ଜାତିସଂଘ ବୁଝାମଣାର ଅଂଶୀଦାରମାନଙ୍କ ତ୍ରୟୋଦଶ ସମ୍ମିଳନୀ ଆୟୋଜନ କରିବାର ସୁଯୋଗ ପାଇ ଭାରତ ସମ୍ମାନିତ ହୋଇଛି ।
ଆପଣମାନେ ଦେଖିଥିବେ ଯେ, ସିଏମଏସ ସିଓପି-13ର ଲୋଗୋ ଦକ୍ଷିଣ ଭାରତର ପାରମ୍ପରିକ “କୋଲମ” ଦ୍ଵାରା ଅନୁପ୍ରାଣିତ ପ୍ରକୃତି ସହିତ ସାମଞ୍ଜସ୍ୟ ରକ୍ଷା କରି ରହିବାରେ ଏହାର ବିଶେଷ ଗୁରୁତ୍ଵ ରହିଛି ।
ବନ୍ଧୁଗଣ,
ଆମେ ପାରମ୍ପରିକ ଢଙ୍ଗରେ “ଅତିଥି ଦେବୋ ଭବ” ମନ୍ତ୍ରକୁ ବ୍ୟବହାର କରିଥାଉ । ଏହା ସିଏମଏସ ସିଓପି-13ର ବାର୍ତ୍ତା ଓ ବିଷୟବସ୍ତୁରେ ପ୍ରତିଫଳିତ ପ୍ରବାସୀ ପ୍ରଜାତିଗୁଡିକ ପୃଥିବୀକୁ ଯୋଡିଥାନ୍ତି ଏବଂ ଏକ ସଙ୍ଗେ ଘରକୁ ଆସିବା ସମୟରେ ଆମେ ସେମାନଙ୍କୁ ସ୍ଵାଗତ କରିଥାଉ । ଏହି ପ୍ରଜାତିଗୁଡିକ ବିନା ପାସପୋର୍ଟ ଓ ଭିସାରେ ବିଭିନ୍ନ ଦେଶ ବୁଲିଥାନ୍ତି । ଏହି ପ୍ରଜାତିଗୁଡିକ ଶାନ୍ତି ଓ ସମୃଦ୍ଧିର ସନ୍ଦେଶବାହକ ହୋଇଥିବାରୁ ଏଗୁଡ଼ିକର ରକ୍ଷା କରିବା ଆମର ଦାଇତ୍ଵ ।
ଭାଇ ଓ ଭଉଣୀମାନେ,
ଭାରତ ଆସନ୍ତା 3 ବର୍ଷ ଲାଗି ଏହି ବୁଝାମଣାର ଅଧ୍ୟକ୍ଷତା କରିବ । ନିଜର କାର୍ଯ୍ୟକାଳ ସମୟରେ ଭାରତ ଦ୍ରୁତଗତିରେ ନିମ୍ନଲିଖିତ କ୍ଷେତ୍ରରେ କାର୍ଯ୍ୟ କରିବ ।
ପ୍ରବାସୀ ପକ୍ଷୀଙ୍କ ଲାଗି ଭାରତ ହେଉଛି ମଧ୍ୟ ଏସୀୟ ଉଡାଣ ମାର୍ଗର ଅଂଶବିଶେଷ । ମଧ୍ୟ ଏସୀୟ ଉଡାଣ ମାର୍ଗ ଓ ପକ୍ଷୀଙ୍କ ବାସସ୍ଥଳୀର ସୁରକ୍ଷା ଲାଗି ଭାରତ ପକ୍ଷରୁ ମଧ୍ୟ ଏସିଆ ଉଡାଣ ମାର୍ଗରେ ପ୍ରବାସୀ ପକ୍ଷୀଙ୍କ ସଂରକ୍ଷଣ ଲାଗି ଜାତୀୟ କାର୍ଯ୍ୟ ଯୋଜନା ପ୍ରସ୍ତୁତ କରିଛି । ଭାରତ ଏ ସଙ୍କ୍ରାନ୍ତରେ ଅନ୍ୟ ଦେଶଗୁଡ଼ିକର କାର୍ଯ୍ୟ ଯୋଜନା ପ୍ରସ୍ତୁତିରେ ସହଯୋଗ କରିବା ଲାଗି ଆନନ୍ଦର ସହିତ ଆଗ୍ରହୀ ହେବ । ସମସ୍ତ ଏସୀୟ ଉଡାଣ ମାର୍ଗ କ୍ଷେତ୍ର ଦେଶଗୁଡ଼ିକର ସକ୍ରିୟ ସହଯୋଗ ମାଧ୍ୟମରେ ପ୍ରବାସୀ ପକ୍ଷୀଙ୍କ ସଂରକ୍ଷଣକୁ ନୂତନ ସ୍ୱରୂପ ପ୍ରଦାନ କରିବା ଲାଗି ଆମେ ଇଚ୍ଛୁକ । ମୁଁ ଏକ ସହଭାଗୀ ମଞ୍ଚ ପ୍ରସ୍ତୁତ କରି ଗବେଷଣା, ଅଧ୍ୟୟନ, ମୂଲ୍ୟାଙ୍କନ, କ୍ଷମତା, ବିକାଶ ଓ ସଂରକ୍ଷଣ କାର୍ଯ୍ୟକ୍ରମ ଚଳାଇବା ଲାଗି ସଂସ୍ଥାଗତ ବ୍ୟବସ୍ଥା କରିବା ଲାଗି ମଧ୍ୟ ଚାହୁଁଛି ।
ବନ୍ଧୁଗଣ,
ଭାରତର ସମୁଦ୍ର ଉପକୂଳ 7500 କିଲୋମିଟର ଏବଂ ଭାରତର ସାମୁଦ୍ରିକ ଜଳ ଜୈବବିବିଧତା ସମ୍ପନ୍ନ । ଏଥିରେ ଅସଂଖ୍ୟ ପ୍ରଜାତି ବାସ କରନ୍ତି । ଆସିଆନ ଓ ଅନ୍ୟ ପୂର୍ବ ଏସିଆ ସମ୍ମିଳନୀର ଦେଶଗୁଡିକ ସହିତ ସହଯୋଗକୁ ସୁଦୃଢ କରିବା ଲାଗି ଭାରତ ପ୍ରସ୍ତାବ ଦେଉଛି । ଏହା ଭାରତ ପ୍ରଶାନ୍ତ ମହାସାଗରୀୟ ସାମୁଦ୍ରିକ ପ୍ରୟାସ (ଆଇପିଓଆଇ) ଅନୁରୂପ ହେବ, ଯେଉଁଥିରେ ଭାରତ ଅଗ୍ରଣୀ ଭୂମିକା ଗ୍ରହଣ କରିବ । 2020 ସୁଦ୍ଧା ଭାରତ ସାମୁଦ୍ରିକ କଇଁଚ ନୀତି ଓ ସାମୁଦ୍ରିକ ପରିଚାଳନା ନୀତିର ଶୁଭାରମ୍ଭ କରିବ । ଏହାଫଳରେ ମାଇକ୍ରୋ ପ୍ଲାଷ୍ଟିକରୁ ଉତ୍ପନ୍ନ ପ୍ରଦୂଷଣ ସମସ୍ୟାର ମଧ୍ୟ ମୁକାବିଲା କରାଯାଇପାରିବ । ଏକକ ଉପଯୋଗୀ ପ୍ଲାଷ୍ଟିକ ପରିବେଶ ସଂରକ୍ଷଣ ପାଇଁ ଆହ୍ଵାନ । ତେଣୁ ଭାରତ ଏହାର ଉପଯୋଗ ହ୍ରାସ କରିବା ଲାଗି ମିଶନ ମୋଡରେ କାମ କରୁଛି ।
ବନ୍ଧୁଗଣ,
ଭାରତରେ ଅନେକ ସଂରକ୍ଷିତ କ୍ଷେତ୍ରର ସୀମା ଓ ପଡୋଶୀ ଦେଶର ସଂରକ୍ଷିତ କ୍ଷେତ୍ର ସୀମା ପରସ୍ପର ସହ ଯୋଡି ହୋଇ ରହିଛି । “ସୀମାପାର ସଂରକ୍ଷିତ କ୍ଷେତ୍ର” ପ୍ରତିଷ୍ଠା ଜରିଆରେ ବନ୍ୟାପ୍ରାଣୀଙ୍କ ସଂରକ୍ଷଣରେ ସହଯୋଗ ଫଳରେ ଅନେକ ସକାରାତ୍ମକ ପରିଣାମ ମିଳିବ ।
ବନ୍ଧୁଗଣ,
ମୋ ସରକାର ସ୍ଥାୟୀ ବିକାଶ ମାର୍ଗରେ ଦୃଢ ଭାବେ ଭରସା କରିଥାଏ । ଆମେ ଏହା ସୁନିଶ୍ଚିତ କରୁଛୁ ଯେ, ପରିବେଶକୁ କ୍ଷତି ନ ଘଟାଇ ବିକାଶ ହେଉ । ଆମେ ପରିସଂସ୍ଥାନ ଦୃଷ୍ଟିରୁ ଦୁର୍ବଳ କ୍ଷେତ୍ରରେ ବିକାଶ ସୁନିଶ୍ଚିତ କରିବା ଲାଗି ରେଖାକାର ଭିତ୍ତିଭୂମି ନୀତି ସହ ଜଡିତ ଦିଶା ନିର୍ଦ୍ଦେଶ ଜାରି କରିଛୁ ।
ପରବର୍ତ୍ତୀ ପିଢି ପାଇଁ ପ୍ରାକୃତିକ ସମ୍ବଳର ସଂରକ୍ଷଣ ଲାଗି ଲୋକମାନଙ୍କୁ ଗୁରୁତ୍ୱପୂର୍ଣ୍ଣ ଅଂଶୀଦାର କରାଯାଉଛି । ମୋ ସରକାର “ସବକା ସାଥ, ସବକା ବିକାଶ, ସବକା ବିଶ୍ଵାସ” ସହିତ ଆଗକୁ ବଢୁଅଛି । ଦେଶରେ ଜଙ୍ଗଲ ନିକଟବର୍ତ୍ତୀ ଅଞ୍ଚଳର ଲୋକମାନଙ୍କୁ ଏବେ ଯୁଗ୍ମ ବନୀକରଣ ପରିଚାଳନା ସମିତି ଏବଂ ପରିସଂସ୍ଥାନ ବିକାଶ ସମିତି ସହ ଯୋଡାଯାଉଛି । ସେମାନଙ୍କୁ ବନ୍ୟ ଜୀବ ସଂରକ୍ଷଣରେ ସାମିଲ କରାଯାଉଛି ।
ବନ୍ଧୁଗଣ,
ମୋର ସଂପୂର୍ଣ୍ଣ ଭରସା ରହିଛି ଯେ, ଏହି ସମ୍ମିଳନୀ ପ୍ରଜାତି ଏବଂ ପ୍ରାକୃତିକ ବାସସ୍ଥଳୀ ସଂରକ୍ଷଣ କ୍ଷେତ୍ରରେ ଅଭିଜ୍ଞତା ବିନିମୟ କରିବା ଓ କ୍ଷମତା ନିର୍ମାଣ ଲାଗି ଉତ୍କୃଷ୍ଟ ମଞ୍ଚ ଉପଲବ୍ଧ କରାଇବ । ମୋର ବିଶ୍ଵାସ ଅଛି ଯେ, ଆପଣମାନଙ୍କୁ ଭାରତର ଆତିଥେୟ ଏବଂ ସମୃଦ୍ଧ ବିବିଧତାର ଅଦ୍ଭୁତ ଅନୁଭବ ଲାଭ କରିବାର ସମୟ ମିଳିବ ।
ଧନ୍ୟବାଦ ।
ଆପଣମାନଙ୍କୁ ବହୁତ ବହୁତ ଧନ୍ୟବାଦ ।
