ପ୍ରଣାମ ଆମ୍ମା
ମଞ୍ଚରେ ଉପସ୍ଥିତ ସମସ୍ତ ସମ୍ମାନୀତ ଅତିଥି ବୃନ୍ଦ
ନମସ୍କାର !
ଏହି ଧର୍ମନିଷ୍ଠ ଏବଂ ପବିତ୍ର ଅବସରରେ, ମୁଁ ଆମ୍ମାଙ୍କୁ ମୋର ଗଭୀର ସମ୍ମାନ ଜଣାଉଛି । ତାଙ୍କର ସୁସ୍ଥ ଏବଂ ଦୀର୍ଘ ଜୀବନ ପାଇଁ ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି । ସେ ହେଉଛନ୍ତି ନିୟୁତ ନିୟୁତ ଭକ୍ତଙ୍କ ପାଇଁ ମାର୍ଗଦର୍ଶନର ଆଲୋକ । କେବଳ ତାହା ନୁହେଁ, ସେ ଅନେକ ଭକ୍ତଙ୍କ ପାଇଁ ଜୀବନର ପର୍ଯ୍ୟାୟ । ବାସ୍ତବ ମା’ ପରି, ସେ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ନିଜ ଭକ୍ତମାନଙ୍କର ଲାଳନ ପାଳନ କରିଥାଆନ୍ତି ।
ମୁଁ ବହୁତ ଭାଗ୍ୟବାନ ଯେ ଅନ୍ୟମାନଙ୍କ ପରି ଆମ୍ମାଙ୍କର ଆଶୀର୍ବାଦ ଏବଂ ନିଃସ୍ୱାର୍ଥପର ଭଲପାଇବା ପ୍ରାପ୍ତ କରିପାରିଛି । ତିନି ବର୍ଷ ପୂର୍ବେ ଆମ୍ମାଙ୍କର 60ତମ ଜନ୍ମ ଦିବସ ପାଳନ ଅବସରରେ ଅମ୍ରିତାପୁରୀ ଯିବା ପାଇଁ ମୋତେ ସୁଯୋଗ ମିଳିଥିଲା । ଆଜି ମୁଁ ବ୍ୟକ୍ତିଗତ ଭାବେ ଏହି ଦିବସରେ ଉପସ୍ଥିତ ରହିବାର ସୌଭାଗ୍ୟ ପାଇ ନଥିଲେ ମଧ୍ୟ ପ୍ରଯୁକ୍ତିବିଦ୍ୟା ମାଧ୍ୟମରେ ତାଙ୍କୁ ସମ୍ମାନ ଜଣାଇଥିବାରୁ ଅତ୍ୟନ୍ତ ଖୁସି ଅନୁଭବ କରୁଛି । ମୁଁ କେରଳରୁ ଏବେ ଫେରିଛି ଏବଂ କେରଳର ଜନସାଧାରଣଙ୍କ ସ୍ନେହ ଏବଂ ଅମାପ ଭଲପାଇବା ମୋର ଦୃଦୟକୁ ଖୁସିରେ ଭରି ଦେଇଛି ।
ଭାରତ ଏହିଭଳି ଅନେକ ସାଧୁ ସନ୍ଥଙ୍କ ଦେଶ ଯେଉଁଠାରେ ସବୁ ଦୃଶ୍ୟମାନ ବସ୍ତୁରେ ଭଗବାନଙ୍କୁ ଦେଖନ୍ତି । ମାନବ ଜାତି ସେମାନଙ୍କ ମଧ୍ୟରେ ପ୍ରମୁଖ ।
ସେଥିପାଇଁ ମାନବ ସେବା ତାଙ୍କ ପାଇଁ ମୁଖ୍ୟ ଆଦର୍ଶ ବାକ୍ୟ ହୋଇଛି । ମୁଁ ଏହା ମଧ୍ୟ ଜାଣିବାକୁ ପାଇଛି ଯେ ଆମ୍ମା ବାଲ୍ୟକାଳରେ ନିଜ ଖାଦ୍ୟ ଅନ୍ୟକୁ ବାଣ୍ଟିବାରେ ସନ୍ତୋଷ ଲାଭ କରୁଥିଲେ । ବୃଦ୍ଧ, ବୟସ୍କ ଏବଂ ଅଭାବୀ ଲୋକମାନଙ୍କୁ ସାହାଯ୍ୟ କରିବା ତାଙ୍କର ବାଲ୍ୟକାଳରୁ ଆବେଗ ରହିଆସିଛି । ଏହାଛଡା, ସେ ବାଲ୍ୟକାଳରେ ଭଗବାନ କୃଷ୍ଣଙ୍କର ପୂଜାର୍ଚ୍ଚନା କରୁଥିଲେ । ଏହି ଦୁଇଟି ଗୁଣ ହେଉଛି ତାଙ୍କର ଶକ୍ତି । ଭଗବାନଙ୍କ ପ୍ରତି ଅନୁରାଗ ଏବଂ ଗରିବଙ୍କ ପ୍ରତି ସମର୍ପଣ ଭାବନାର ବାର୍ତ୍ତା ମୁଁ ବ୍ୟକ୍ତିଗତ ଭାବେ ତାଙ୍କଠାରୁ ଶିଖିବାକୁ ପାଇଛି । ନିୟୁତ ନିୟୁତ ଭକ୍ତ ମଧ୍ୟ ଏହି ବାର୍ତ୍ତାରେ ବିଶ୍ୱାସ ଓ ସମର୍ଥନ କରନ୍ତି ।
ଆମ୍ମାଙ୍କ ଦ୍ୱାରା ବିଭିନ୍ନ ସାମାଜିକ ଏବଂ ବଦାନ୍ୟ ସଂସ୍ଥାଗୁଡିକ ଜରିଆରେ କରାଯାଉଥିବା କାର୍ଯ୍ୟକ୍ରମଗୁଡିକ ବିଷୟରେ ମୁଁ ଅବଗତ ଅଛି । ଖାଦ୍ୟ, ଗୃହ, ସ୍ୱାସ୍ଥ୍ୟ, ଶିକ୍ଷା ଏବଂ ଜୀବିକା ଉପାର୍ଜନ ପ୍ରମୁଖ ପାଞ୍ଚଟି ମୁଖ୍ୟ ଆବଶ୍ୟକତା ବିଶ୍ୱର ଗରିବଙ୍କର ରହିଛି ଏବଂ ଏ କ୍ଷେତ୍ରରେ ଆମ୍ମା ସର୍ବଦା ସହାୟକ ହୋଇଥାଆନ୍ତି ।
ମୁଁ ବିଶେଷ ଭାବେ ସ୍ୱଚ୍ଛତା, ଜଳ, ଗୃହ, ଶିକ୍ଷା ଏବଂ ସ୍ୱାସ୍ଥ୍ୟ କ୍ଷେତ୍ରରେ କରାଯାଇଥିବା କାର୍ଯ୍ୟ ବା ଦାନ ଉପରେ ଆଲୋକପାତ କରିବାକୁ ଚାହିଁବି । ମୁଁ ଭାବୁଛି ଯେ ଏହି ସାହାଯ୍ୟପ୍ରାପ୍ତ କରିଥିବା ହିତାଧିକାରୀମାନଙ୍କ ମଧ୍ୟରୁ କିଛି ଜଣଙ୍କୁ ଆଜି ପ୍ରମାଣ ପତ୍ର ପ୍ରଦାନ କରାଯିବ । ଖାସକରି, ସ୍ୱଚ୍ଛ ଭାରତ ଅଭିଯାନରେ ଶୌଚାଳୟ ନିର୍ମାଣରେ ଆମ୍ମାଙ୍କର ସହଯୋଗ ଅତ୍ୟନ୍ତ ସହାୟକ ହୋଇଥିଲା । କେରଳରେ ସ୍ୱଚ୍ଛତା କ୍ଷେତ୍ରରେ ଶହେ କୋଟି ଟଙ୍କା ଆମ୍ମା ପ୍ରଦାନ କରିବେ ବୋଲି ପ୍ରତିଶୃତି ଦେଇଛନ୍ତି । ଏହା ଦ୍ୱାରା 15 ହଜାର ଆର୍ଥିକ ଅନଗ୍ରସରଙ୍କ ପାଇଁ ଶୌଚାଳୟ ନିର୍ମାଣ କରାଯାଇପାରିବ । ଆଜି, ମୋତେ ସୂଚିତ କରାଯାଇଛି ଯେ ରାଜ୍ୟର ବିଭିନ୍ନ ସ୍ଥାନରେ ଥିବା ଆମ୍ମାଙ୍କ ଆଶ୍ରମରେ ଦୁଇ ହଜାର ଶୌଚାଳୟ ନିର୍ମାଣ କାର୍ଯ୍ୟ ସଂପୂର୍ଣ୍ଣ ହୋଇସାରିଛି ।
ମୁଁ ଜାଣିଛି ଯେ ପରିବେଶ ସଂରକ୍ଷଣ ଏବଂ ସ୍ଥିରତା କ୍ଷେତ୍ରରେ କରାଯାଉଥିବା ବିଭିନ୍ନ କାର୍ଯ୍ୟ ମଧ୍ୟରୁ ଏହା ମାତ୍ର ଗୋଟିଏ ଉଦାହରଣ । ଏକ ବର୍ଷ ପୂର୍ବେ ଆମ୍ମା ଉଦାରତାର ସହିତ ନମାମୀ ଗଙ୍ଗେ କାର୍ଯ୍ୟକ୍ରମ ପାଇଁ ଶହେ କୋଟି ଟଙ୍କା ଦାନ କରିଥିଲେ । ବିଭିନ୍ନ ସ୍ଥାନରେ ହେଉଥିବା ପ୍ରାକୃତିକ ବିପର୍ଯ୍ୟୟରେ କ୍ଷତିଗ୍ରସ୍ତମାନଙ୍କୁ ଆମ୍ମାଙ୍କ ସାହାଯ୍ୟ ଓ ସହଯୋଗ ବିଷୟରେ ମୁଁ ଅବଗତ ଅଛି । ଏହା ମଧ୍ୟ ଆମେ ସମସ୍ତେ ଜାଣିବା ଦରକାର ଯେ ଅମୃତା ବିଶ୍ୱବିଦ୍ୟାଳୟରେ ଗବେଷକମାନେ ବିଶ୍ୱର ସବୁଠାରୁ ପ୍ରମୁଖ ସମସ୍ୟାର ସମାଧାନ ପାଇଁ ନୂତନ ଉପାୟ ଉପରେ ଗବେଷଣା କରୁଛନ୍ତି ।
ଶେଷରେ, ମୋତେ ସମାରୋହରେ ସାମିଲ କରିଥିବାରୁ ମୁଁ ଅଶେଷ ଧନ୍ୟବାଦ ଜଣାଉଛି ।
ପୁନର୍ବାର ଆମ୍ମାଙ୍କୁ ମୁଁ ମୋର ଗଭୀର ଶ୍ରଦ୍ଧା ଜଣାଉଛି ।
