Our government is working tirelessly to ensure no family remains without a LPG connection: PM Modi
The growing number of women entrepreneurs is a blessing for our society: PM Modi in AurangabadOur government is committed to further encourage more women to become entrepreneurs and provide them all the support they need: PM Modiଭାରତ ମାତା କୀ-ଜୟ
ଭାରତ ମାତା କୀ-ଜୟ
ମଞ୍ଚରେ ଉପସ୍ଥିତ ସମସ୍ତ ମହାନୁଭବ ଏବଂ ଦୂର-ଦୂରାନ୍ତରରୁ ଏଠାକୁ ଆସିଥିବା ମାଆମାନେ, ଭଉଣୀମାନେ ଏବଂ ସାଥୀଗଣ । ମୁଁ ସେଠାରେ ଦେଖୁଛି, ଅନେକ ଦୂର ପର୍ଯ୍ୟନ୍ତ ଭଉଣୀମାନେ ଠିଆ ହୋଇଛନ୍ତି, ବୋଧହୁଏ ସେମାନଙ୍କୁ କିଛି ଦେଖା ଯାଉ ନଥିବ ମଧ୍ୟ । କିନ୍ତୁ ଏହା ପରେ ମଧ୍ୟ ଏତେ ଅଧିକ ସଂଖ୍ୟାରେ ଆପଣମାନଙ୍କର ଆସି ପହଞ୍ଚିବା, ଆମ ସମସ୍ତଙ୍କୁ ଆଶୀର୍ବାଦ ପ୍ରଦାନ କରିବା, ମୁଁ ହୃଦୟ ସହିତ ଆପଣମାନଙ୍କୁ ବହୁତ ବହୁତ ଶୁଭେଚ୍ଛା ଜଣାଉଛି ।
ଆପଣମାନେ ସମସ୍ତେ ଦେଶର ବିକାଶରେ ଆମର ଗାଁ, ଗଣ୍ଡାକୁ, ନିଜର ପରିବାରକୁ ଆର୍ଥିକ ଭାବେ ସଶକ୍ତ କରିବା ପାଇଁ ବହୁତ ବଡ଼ ଭୂମିକା ତୁଲାଉଛନ୍ତି । ସ୍ୱୟଂ ସହାୟକ ଗୋଷ୍ଠୀ ମାଧ୍ୟମରେ ଦେଶକୁ ସଶକ୍ତ କରୁଥିବା ନୂତନ ଭାରତ ନିର୍ମାଣରେ ଲାଗି ପଡ଼ିଥିବା ଆପଣ ସମସ୍ତ ଭଉଣୀମାନଙ୍କୁ ମୁଁ ପ୍ରଣାମ କରୁଛି ଆଉ ଭଉଣୀ ପଙ୍କଜାଙ୍କୁ ବିଶେଷ ଭାବେ ଶୁଭେଚ୍ଛା ଜଣାଉଛି ।
ସାଥୀଗଣ, ଆଜି ଔରାଙ୍ଗାବାଦର ବିକାଶ ସହିତ ଜଡ଼ିତ ଏକ ପ୍ରମୁଖ ଭବନର ଉଦଘାଟନ କିଛି ସମୟ ପୂବରୁ କରାଯାଇଛି । ଔରାଙ୍ଗାବାଦର ଉଦ୍ୟୋଗ ସହରର ସାଂକେତିକ ଭବନ ଏବେ ସେବା ପାଇଁ ପ୍ରସ୍ତୁତ ରହିଛି । ନୂତନ ଔରାଙ୍ଗାବାଦର ଏହି ଉଦ୍ୟୋଗ ନଗରର ଏହା ଏକ ଗୁରୁତ୍ୱପୂର୍ଣ୍ଣ ଭବନ ହେବ । ଏହି ପ୍ରାସାଦରୁ ସପୂର୍ଣ୍ଣ ଶିଳ୍ପ ସହରର ଅନେକ ବ୍ୟବସ୍ଥାଗୁଡ଼ିକର ସଞ୍ଚାଳନ ହେବ ।
ସାଥୀଗଣ, ଔରାଙ୍ଗାବାଦ ନୂତନ ସ୍ମାର୍ଟ ସିଟି ହେବାକୁ ଯାଉଛି । ଦେଶର ଔଦ୍ୟୋଗିକ ଗତିବିଧିର ମଧ୍ୟ ବଡ଼ କେନ୍ଦ୍ର ହେବାକୁ ଯାଉଛି । ଦିଲ୍ଲୀ–ମୁମ୍ବାଇ ଶିଳ୍ପାଞ୍ଚଳ କରିଡରର ମଧ୍ୟ ଏହା ହେଉଛି ଏକ ପ୍ରମୁଖ ଅଂଶ । ଅନେକ ବଡ଼ ବଡ଼ କମ୍ପାନୀ ଏଠାରେ କାର୍ଯ୍ୟ କରିବା ଆରମ୍ଭ କରି ସାରିଛନ୍ତି । ଆଗାମୀ ଦିନରେ ଆହୁରି ମଧ୍ୟ କମ୍ପାନୀ ସବୁ ଆସିବେ । ଏହିସବୁ କମ୍ପାନୀଗୁଡ଼ିକ ଏଠାକାର ଲକ୍ଷ ଲକ୍ଷ ଲୋକମାନଙ୍କୁ ରୋଜଗାରର ନୂତନ ସୁଯୋଗ ଦେବ ।
ସାଥୀଗଣ, ଔରାଙ୍ଗାବାଦ ଆଜି ଆହୁରି ଏକ ବହୁତ ବଡ଼ ସିଦ୍ଧିର ସାକ୍ଷୀ ହେବାକୁ ଯାଉଛି । ଏହି ସିଦ୍ଧି ହେଉଛି ଆପଣମାନଙ୍କର, ଦେଶର କୋଟି କୋଟି ଭଉଣୀଙ୍କର ।
ଉଜ୍ଜ୍ୱଳା ଯୋଜନା ମାଧ୍ୟମରେ 8 କୋଟି ମାଗଣା ଗ୍ୟାସ ସଂଯୋଗ ଦେବାର ଯେଉଁ ସଂକଳ୍ପ ଆମେ ନେଇଥିଲୁ, ତାହା ଆଜି ଏହି ମଞ୍ଚରେ ଏହି ଲକ୍ଷ ଲକ୍ଷ ଭଉଣୀଙ୍କ ଉପସ୍ଥିତିରେ ହେଉଛି । କେବଳ ସିଦ୍ଧି ହିଁ ହୋଇନାହିଁ ବରଂ ନର୍ଦ୍ଧାରିତ ସମୟର 7 ମାସ ପୂର୍ବରୁ ହିଁ ଏହି ଲକ୍ଷ୍ୟକୁ ଆମେ ହାସଲ କରିପାରିଛୁ ।
ଏହି 8 କୋଟି ସଂଯୋଗ ମଧ୍ୟରୁ ପ୍ରାୟ 44 ଲକ୍ଷ, କେବଳ ମହାରାଷ୍ଟ୍ରରେ ଦିଆଯାଇଛି । ଏହି ଉପଲବ୍ଧି ପାଇଁ ମୁଁ ଆପଣମାନଙ୍କୁ ସମସ୍ତଙ୍କୁ, ଦେଶର ସେହି ପ୍ରତ୍ୟେକ ଭଉଣୀଙ୍କୁ, ଯାହାଙ୍କୁ ଧୂଆଁ କବଳରୁ ମୁକ୍ତି ମିଳିଛି, ବହୁତ-ବହୁତ ଶୁଭେଚ୍ଛା ଜଣାଉଛି, ଶୁଭକାମନା ଜଣାଉଛି । ମୁଁ ସମଗ୍ର ଦେଶର ସେହି ସାଥୀମାନଙ୍କୁ ମଧ୍ୟ ପ୍ରଣାମ ଜଣାଉଛି ଯେଉଁମାନେ ଏହି ଯୋଜନାକୁ ସଫଳ କରାଇବାରେ ବହୁତ ପରିଶ୍ରମ କରିଛନ୍ତି, ସାହାଯ୍ୟ କରିଛନ୍ତି ।
ସାଥୀଗଣ, ଧୂଆଁରେ ରୁନ୍ଧି ହେଉଥିବା ନିଜର ଗରିବ ଭଉଣୀମାନଙ୍କୁ ସହାୟତା କରିବା ପାଇଁ ପ୍ରଥମ ପାଞ୍ଚ କୋଟି ଗ୍ୟାସ ସଂଯୋଗ ମାଗଣାରେ ଦେବା ପାଇଁ ଲକ୍ଷ୍ୟ ରଖାଯାଇଥିଲା । ଗତ ବର୍ଷ ମାର୍ଚ୍ଚ ମାସରେ ଏହି ଲକ୍ଷ୍ୟକୁ ସଂମ୍ପ୍ରସାରଣ କରି ଆଠ କୋଟି କରି ଦିଆଗଲା । ନିର୍ବାଚନ ସମୟରେ ମୁଁ ଯେତେବେଳେ ମଧ୍ୟ ଆପଣ ମାନଙ୍କ ଗହଣକୁ ଆସିଥିଲି, ତ ଏହି ଲକ୍ଷ୍ୟକୁ ହାସଲ କରାଯିବା କଥା କହିଥିଲି । ମୋତେ ଆତ୍ମସନ୍ତୋଷ ମିଳୁଛି କି ସରକାର ଗଠନ ହେବାର 100 ଦିନ ଭିତରେ ହିଁ ଏହି କାର୍ଯ୍ୟ ସଂପୂର୍ଣ୍ଣ ହୋଇ ଯାଇଛି ।
ସାଥୀଗଣ, ଏହି କାର୍ଯ୍ୟ କେବଳ ଗ୍ୟାସ ସଂଯୋଗ ଦେବାରେ ହିଁ ସୀମିତ ନଥିଲା । ଏଥିପାଇଁ ଆହୁରି ମଧ୍ୟ ବ୍ୟାପକ ବ୍ୟବସ୍ଥା କରାଗଲା, ସାମୁହିକ ଭାବରେ କାର୍ଯ୍ୟ କରାଗଲା । ଏଥିପାଇଁ ଏକ ବହୁତ ବଡ଼ ଭିତ୍ତିଭୂମିର ଆବଶ୍ୟକତା ଥିଲା, ଯାହାକୁ କି ବହୁତ ହିଁ କମ୍ ସମୟ ମଧ୍ୟରେ ପ୍ରସ୍ତୁତ କରାଗଲା । ଏଥିପାଇଁ ଯେଉଁ 10 ହଜାର ନୂତନ ଏଲପିଜି ବଟଲିଂ ପ୍ଲାଣ୍ଟ ନିର୍ମାଣ କରାଗଲା ଯାହା ଫଳରେ ଗ୍ୟାସ ସିଲିଣ୍ଡରର ଅଭାବ ନରହୁ । ସରକାର ବନ୍ଦରଗୁଡ଼ିକର ଆଖପାଖରେ ଟର୍ମିନାଲର କ୍ଷମତା ବୃଦ୍ଧି କରିବା ସହିତ ହିଁ ଗ୍ୟାସ ପାଇପ୍ ଲାଇନ ନେଟୱର୍କର ସଂପ୍ରସାରଣ ମଧ୍ୟ କଲେ ।
ସାଥୀଗଣ, ଆମର ପ୍ରୟାସ ରହିଛି କି ଏବେ ଦେଶରେ ଗୋଟିଏ ମଧ୍ୟ ଏଭଳି ପରିବାର ନ ରହୁ ଯେଉମାନଙ୍କ ପାଖରେ ଏଲ୍ପିଜି ସଂଯୋଗ ପହଞ୍ଚି ପାରିନଥିବ । ଏହା ସହିତ ଏହି ଯୋଜନାକୁ ଆହୁରି ସୁବିଧାଜନକ କରିବା ପାଇଁ 5 କିଲୋଗ୍ରାମର ସିଲିଣ୍ଡରକୁ ମଧ୍ୟ ପ୍ରୋତ୍ସାହନ ଦିଆଯାଉଛି । ଦେଶର ଅନେକ ଅଞ୍ଚଳରେ ପାଇପ୍ ମାଧ୍ୟମରେ ଗ୍ୟାସ ପହଞ୍ଚାଇବାର କାର୍ଯ୍ୟ ମଧ୍ୟ ଦ୍ରୁତ ଗତିରେ ଚାଲୁ ରହିଛି ।
ଭାଇ ଓ ଭଉଣୀମାନେ, ଏବେ ଏକ ବହୁତ ବଡ଼ ଲକ୍ଷ୍ୟକୁ ନେଇ ଆମେ ଆଗେଇ ଚାଲିଛୁ, ଯାହାର ସିଧାସଳଖ ସମ୍ପର୍କ ଆପଣମାନଙ୍କ ସହିତ ରହିଛି, ଦେଶର କୋଟି କୋଟି ଭଉଣୀମାନଙ୍କ ସହିତ ରହିଛି । ଆପଣମାନଙ୍କୁ ସମସ୍ତ ଭଉଣୀଙ୍କୁ ପାଣି ପାଇଁ କେତେ ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ, ଏହାର ଅନୁଭବ ମୋତେ ଭଲ ଭାବେ ଜଣାଅଛି । ଦେଶର ପ୍ରତ୍ୟେକ ଭଉଣୀଙ୍କୁ ଏହି ଅସୁବିଧାରୁ ମୁକ୍ତି ପ୍ରଦାନ କରିବା ପାଇଁ ହିଁ ‘ଜଳ ଜୀବନ ମିଶନ’ର ଶୁଭାରମ୍ଭ କରାଯାଇଛି । ଏହି ମିଶନ ମାଧ୍ୟମରେ, ଜଳ ସଂରକ୍ଷଣ କରିବା ପାଇଁ, ପ୍ରତ୍ୟେକ ଘରକୁ ଜଳ ଯୋଗାଇ ଦେବା ପାଇଁ ସମଗ୍ର ଦେଶ ସଂକଳ୍ପବଦ୍ଧ ହୋଇଛି । ଏହା ସ୍ଥିର କରାଯାଇଛି କି ଆଗାମୀ 5 ବର୍ଷ ମଧ୍ୟରେ ପ୍ରାୟ ସାଢ଼େ 3 ଲକ୍ଷ କୋଟି ଟଙ୍କା ଏହି ଜଳ ଜୀବନ ଅଭିଯାନରେ ଖର୍ଚ୍ଚ କରାଯିବ ।
ଆପଣମାନେ ବୋଧହୁଏ ଶୁଣିଥିବେ ସମାଜବାଦୀ ନେତା ମନୋହର ଲୋହିୟା ମହୋଦୟ 60-70 ଦଶକରେ ସଂସଦରେ ଏକ ଭାଷଣ ଦେଇଥିଲେ । ସେ କହିଥିଲେ କି ହିନ୍ଦୁସ୍ଥାନର ମହିଳା ମାନଙ୍କର ଦୁଇଗୋଟି ପ୍ରମୁଖ ସମସ୍ୟା ରହିଛି । ତାହାର ସମାଧାନ ଆମକୁ ତତ୍କାଳ କାର୍ଯ୍ୟ କରିବା ଦରକାର । ଏହି କଥା 60-70 ଦଶକରେ କୁହାଯାଇଥିଲା, ଏହା ହେଉଛି ଲୋହିୟା ମହାଶୟଙ୍କ ଦ୍ୱାରା କୁହା ଯାଇଥିବା କଥା । କେଉଁ ଦୁଇଟି ସମସ୍ୟା କହିଥିଲେ ସେ, ସେ କହିଥିଲେ ହିନ୍ଦୁସ୍ଥାନର ମହିଳାମାନଙ୍କର ପ୍ରମୁଖ ଦୁଇଗୋଟି ସମସ୍ୟା ରହିଛି, ଗୋଟିଏ ହେଉଛି ଶୌଚାଳୟ ଏବଂ ଅନ୍ୟଟି ପାଣି । ଅର୍ଥାତ ମହିଳାମାନଙ୍କ ପାଇଁ ଶୌଚାଳୟ ନାହିଁ, ଆଉ ମହିଳାମାନେ ଘର ଚଳାଇବା ପାଇଁ ପାଣି ଉପଲବ୍ଧ ହେଉନାହିଁ । ଯଦି ଏହି ଦୁଇଟି ସମସ୍ୟାର ସମାଧାନ କରିଦେବା ତ ଏହି ଦେଶର ମହିଳାମାନେ ଦେଶର ସମସ୍ୟାଗୁଡ଼ିକୁ ସମାଧାନ କରିବା ପାଇଁ ଶକ୍ତି ଭାବେ ବାହାରିବେ । ଲୋହିୟା ମହାଶୟ ତ ଚାଲିଗଲେ, ଅନେକ ସରକାର ଆସିଲେ ଏବଂ ଚାଲିଗଲେ, ନେତାମାନେ ମଧ୍ୟ ଆସିଲେ ଏବଂ ଚାଲିଗଲେ, ଆମେ ହିଁ ହେଉଛୁ ଜଣେ ସେଭଳି ଯିଏ ନିଷ୍ପତ୍ତି ନେଲୁ କି ପ୍ରତ୍ୟେକ ଘରେ ଶୌଚାଳୟ ମଧ୍ୟ ହେବ ଏବଂ ପ୍ରତ୍ୟେକ ଘରେ ପାଣି ମଧ୍ୟ ହେବ ।
ମରାଠାୱାଡ଼ାର ଏହି କ୍ଷେତ୍ର ତ, ଏମିତି ମଧ୍ୟ ଏହାର ବଡ଼ ଲାଭାର୍ଥୀ ହେବାକୁ ଯାଉଛି ଏବଂ ଆପଣମାନେ ସମସ୍ତେ ଦେବେନ୍ଦ୍ର ମହାଶୟଙ୍କ ସରକାର ସହିତ ମିଳିମିଶି ଯେଉଁ ପ୍ରୟାସ କରିଛନ୍ତି ତାହା ସ୍ୱାଗତଯୋଗ୍ୟ । ଏବେ ଦେବେନ୍ଦ୍ର ମହାଶୟ ବିସ୍ତୃତ ଭାବେ, ତାଙ୍କ ମନରେ କ’ଣ ସ୍ୱପ୍ନ ରହିଛି ଏହି କ୍ଷେତ୍ରରେ ଜଳ ପହଞ୍ଚାଇବା ପାଇଁ, ଏହାର ବିସ୍ତୃତ ଭାବେ ବର୍ଣ୍ଣନା ଆପଣଙ୍କ ସମ୍ମୁଖରେ କରିଛନ୍ତି । ମରାଠାୱାଡ଼ାରେ ଯେଉଁ ପ୍ରଥମ ୱାଟର ଗ୍ରୀଡ଼ ନିର୍ମାଣ କରାଯାଉଛି, ସେହି ଚେଷ୍ଟା ହେଉଛି ପ୍ରଶଂସନୀୟ । ଏହି ଗ୍ରୀଡ଼୍ ଯେତେବେଳେ ନିର୍ମାଣ ହୋଇ ପ୍ରସ୍ତୁତ ହୋଇଯିବ ତ ଏହି କ୍ଷେତ୍ରରେ ଜଳର ଉପଲବ୍ଧି ବୃଦ୍ଧି ପାଇବ । ପ୍ରତ୍ୟେକ ଗାଁକୁ ପାନୀୟ ଜଳ ଯୋଗାଣ, ପ୍ରତ୍ୟେକ କୃଷି କ୍ଷେତକୁ ଜଳ ପହଞ୍ଚାଇବାରେ ଏହାଦ୍ୱାରା ସାହାଯ୍ୟ ମିଳିବ ।
ସାଥୀଗଣ, କୃଷକମାନଙ୍କୁ ଜଳସେଚନର ସୁବିଧା ଦେବାଠାରୁ ନେଇ ଅନେକ ପଦକ୍ଷେପ କେନ୍ଦ୍ର ଏବଂ ରାଜ୍ୟର ସରକାର ଉଠାଉଛନ୍ତି । ପ୍ରତ୍ୟେକ କୃଷକ ପରିବାରଙ୍କ ବ୍ୟାଙ୍କ ଖାତାରେ ସିଧାସଳଖ ସହାୟତା, 60 ବର୍ଷର ବୟସ ପରେ କୃଷକଙ୍କୁ ପେନସନର ସୁବିଧା, ପଶୁଧନକୁ ସୁସ୍ଥ ରଖିବା ପାଇଁ ଟୀକାକରଣ ଅଭିଯାନ, ଏଭଳି ଅନେକ ପ୍ରୟାସ କରାଯାଉଛି ।
ଭାଇ ଓ ଭଉଣୀମାନେ, ଗାଁର ଆର୍ଥିକ ସ୍ଥିତି ସୁଦୃଢ଼ କରିବାରେ ଆପଣମାନଙ୍କ ଯୋଗଦାନ ହେଉଛି ବହୁତ ପ୍ରଶଂସନୀୟ । ସ୍ୱୟଂ ସହାୟକ ଗୋଷ୍ଠୀ, ମହିଳା ସଞ୍ଚୟ ଦଳ ଭାବେ ଆପଣମାନେ ଯେଉଁ କାର୍ଯ୍ୟ କରୁଛନ୍ତି, ତାହାଦ୍ୱାରା ଆପଣମାନଙ୍କର ସଶକ୍ତୀକରଣ, ଆର୍ଥିକ ସଶକ୍ତୀକରଣ ତ ହେଉଛି ହିଁ, ପରିବାରର ସ୍ଥିତି ମଧ୍ୟ ସୁଧୁରୁଛି । ଯେତେବେଳେ ପରିବାର ଆର୍ଥିକ ରୂପରେ ସଶକ୍ତ ହୋଇଥାଏ, ତ ଦେଶର ଶକ୍ତି ନିଜକୁ ନିଜେ ବୃଦ୍ଧି ପାଇଥାଏ ।
ସାଥୀଗଣ, ଦେଶର ବିକାଶରେ ଆପଣମାନଙ୍କର ଏହି ଭୂମିକାକୁ ଲକ୍ଷ୍ୟକରି ବିଗତ ପାଞ୍ଚ ବର୍ଷରେ ଏହି ଆନ୍ଦୋଳନକୁ ସଂପ୍ରସାରଣ, ଆହୁରି ଅଧିକ ସଂପ୍ରସାରଣ କରିବା ପାଇଁ ବିଶେଷ ପ୍ରୟାସ କରାଯାଇଛି । ଦୀନ ଦୟାଲ ଉପାଧ୍ୟାୟ ଗ୍ରାମୀଣ ଆଜୀବିକା ମିଶନ ମାଧ୍ୟମରେ ମହିଳାଙ୍କ ପାଇଁ ଉଦ୍ୟମଶୀଳତାର ନୂତନ ସୁଯୋଗ ସୃଷ୍ଟି କରାଯାଉଛି । ନୂତନ ଭାରତରେ ଆମେ ମହିଳା କଲ୍ୟାଣରୁ କିଛି ଆଗକୁ ବାହାରି ଯାଇ ମହିଳାଙ୍କ ନେତୃତ୍ୱରେ ରାଷ୍ଟ୍ର କଲ୍ୟାଣ ବିଷୟରେ ଚିନ୍ତା କରି ଆଗକୁ ବଢ଼ୁଛୁ ।
ଏହା ହେଉଛି କାରଣ କି ଏ ବର୍ଷ ବଜେଟରେ ସ୍ୱୟଂ ସହାୟକ ସମୂହଙ୍କ ପାଇଁ ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଛି । ମହିଳା ସ୍ୱୟଂ ସହାୟକ ସମୂହଙ୍କ ପାଇଁ ସୁଧ ଉପରେ ଯେଉଁ ରିହାତି ମିଳୁଥିଲା, ଏହାକୁ ଏବେ ସମଗ୍ର ଦେଶରେ ଲାଗୁ କରାଯାଉଛି । ଏଭଳି ସମୁଦାୟ ଯାହା ପାଖରେ ଜନ-ଧନ ବ୍ୟାଙ୍କ ଖାତା ରହିଛି, ସେମାନଙ୍କୁ 5 ହଜାର ପର୍ଯ୍ୟନ୍ତ ଓଭର ଡ୍ରାଫ୍ଟର ଅତିରିକ୍ତ ସୁବିଧା ମିଳିବ । ଏବେ କୌଣସି ସାହୁକାରଙ୍କଠାରୁ ଅଧିକ ସୁଧରେ ଋଣ ଆଣିବାକୁ ପଡ଼ିବ ନାହିଁ । ଅର୍ଥ ଏହା ଯେ ଯଦି ଆପଣଙ୍କ ଖାତାରେ ଗୋଟିଏ ହେଲେ ମଧ୍ୟ ଟଙ୍କା ଜମା ନାହିଁ, ତେବେ ମଧ୍ୟ ଆପଣ 5 ହଜାର ଟଙ୍କା ନିଜର ଆବଶ୍ୟକତା ପାଇଁ ସେଥିରୁ କାଢି ପାରିବେ । ଏହା ହେଉଛି ଏକ ପ୍ରକାରର ସହଜ ଋଣ, ଯାହାର ସୁବିଧା ଜନ-ଧନ ବ୍ୟାଙ୍କ ଖାତା ଥିଲେ ଆପଣଙ୍କୁ ମିଳିପାରିବ ।
ସେହିଭଳି ଭାବେ ମୁଦ୍ରା ଯୋଜନା ମାଧ୍ୟମରେ ମଧ୍ୟ ପ୍ରତ୍ୟେକ ସ୍ୱୟଂ ସହାୟକ ସମୁହର ଜଣେ ସଦସ୍ୟଙ୍କୁ 1 ଲକ୍ଷ ପର୍ଯ୍ୟନ୍ତ ଋଣ ମିଳିବ । ଏହାଦ୍ୱାରା ଆପଣଙ୍କୁ ଆପଣଙ୍କର ବ୍ୟବସାୟ ଆରମ୍ଭ କରିବା କିମ୍ବା ତାହାକୁ ବଢ଼ାଇବାରେ ସାହାଯ୍ୟ ମିଳିପାରିବ ।
ସାଥୀଗଣ, ମୁଦ୍ରା ଯୋଜନା ଭଉଣୀମାନଙ୍କୁ ଉଦ୍ୟମୀ ଭାବେ ଗଢ଼ି ତୋଳିବାରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଛି । ଏହି ଯୋଜନା ମାଧ୍ୟମରେ ଏ ପର୍ଯ୍ୟନ୍ତ ସମଗ୍ର ଦେଶରେ ପ୍ରାୟ 20 କୋଟି ଋଣ ବଣ୍ଟା ଯାଇସାରିଛି । ଏଥିମଧ୍ୟରୁ ପ୍ରାୟ 14 କୋଟି ଋଣ ଆମର ଭଉଣୀ ଓ ଝିଅଙ୍କ ହାତକୁ ଯାଇଛି । ମହାରାଷ୍ଟ୍ରରେ ମଧ୍ୟ ମୁଦ୍ରା ଯୋଜନା ମାଧ୍ୟମରେ ଥିବା ଦେଢ଼ କୋଟି ହିତାଧିକାରୀଙ୍କ ମଧ୍ୟରୁ ଶହେ ପଚିଶ କୋଟି ହିତାଧିକାରୀ ହେଉଛନ୍ତି ଆମ ମାଆ ଓ ଭଉଣୀମାନେ । ମହିଳା ଉଦ୍ୟମଶୀଳତା କ୍ଷେତ୍ରରେ ଆସୁଥିବା ଏହି ପରିବର୍ତ୍ତନକୁ ଆମକୁ ଆହୁରି ଦ୍ରୁତତର କରିବାକୁ ହେବ, ଆହୁରି ସୁଦୃଢ଼ କରିବାକୁ ହେବ । ଏଥିପାଇଁ ସରକାରୀ ସ୍ତରରେ ଯେଉଁ କିଛି ପଦକ୍ଷେପ ଗ୍ରହଣ କରିବାକୁ ପଡ଼ିବ ନିଶ୍ଚିତ ଭାବେ ସେହି ପଦକ୍ଷେପ ଗ୍ରହଣ କରାଯିବ ।
ସାଥୀଗଣ, ସ୍ୱୟଂ ସହାୟତା ସମୂହ ରୂପରେ ଆପଣ ଆର୍ଥିକ ସଶକ୍ତୀକରଣର ସୁଦୃଢ଼ ମାଧ୍ୟମ ତ ଅଟନ୍ତି, ଆପଣମାନେ ମଧ୍ୟ ହେଉଛନ୍ତି ସାମାଜିକ ପରିବର୍ତ୍ତନର ପ୍ରମୁଖ ପ୍ରହରୀ । ଝିଅମାନଙ୍କର ଜୀବନ ବଞ୍ଚାଇବାଠାରୁ ନେଇ, ତାଙ୍କର ପାଠପଢ଼ା ଏବଂ ସେମାନଙ୍କ ପାଇଁ ସୁରକ୍ଷିତ ବାତାବରଣ ସୃଷ୍ଟି କରିବା ପାଇଁ ସରକାର ଅନେକ ପଦକ୍ଷେପ ଉଠାଇଛନ୍ତି । ଏଠାରେ ଦେବେନ୍ଦ୍ର ମହାଶୟଙ୍କ ସରକାର ଏ ଦିଗରେ ପ୍ରଶଂସନୀୟ କାର୍ଯ୍ୟ କରିଛନ୍ତି । କିନ୍ତୁ କେବଳ ସରକାରୀ ଯୋଜନା ଏବଂ ଆଇନ ହିଁ ଏଥିପାଇଁ ପର୍ଯ୍ୟାପ୍ତ ନୁହେଁ । ଆମମାନଙ୍କୁ ଝିଅମାନଙ୍କ ପ୍ରତି ସମାଜର ଚିନ୍ତାଧାରାରେ ବ୍ୟାପକ ପରିବର୍ତ୍ତନ ଆଣିବାର ଆବଶ୍ୟକତା ରହିଛି । ଏଥିରେ ଆପଣ ଭଉଣୀ ଏବଂ ଝିଅମାନଙ୍କର ଭୂମିକା ମଧ୍ୟ ହେଉଛି ଗୁରୁତ୍ୱପୂର୍ଣ୍ଣ ।
ନିକଟରେ ଆପଣ ଦେଖିଛନ୍ତି କି ମୁସଲମାନ ଭଉଣୀମାନଙ୍କୁ ତିନି ତଲାକର କୁପ୍ରଥାରୁ ମୁକ୍ତି ଦେବା ପାଇଁ ଏକ କଡ଼ା ଆଇନ ତିଆରି କରାଯାଇଛି । ଏବେ ଆପଣମାନଙ୍କୁ ସମାଜ ଭିତରେ ଏହି ଆଇନକୁ ନେଇ ଜାଗରଣ ସୃଷ୍ଟି କରିବାକୁ ହେବ ।
ସାଥୀଗଣ, ସମୟ ପୂର୍ବରୁ ଆମେ ଯେତେବେଳେ ଲକ୍ଷ୍ୟ ହାସଲ କରି ନେଇଥାଉ ତ ବଡ଼ ବଡ଼ ସଂକଳ୍ପକୁ ସିଦ୍ଧ କରିବାର ସାହସ ଆପେ ଆପେ ବୃଦ୍ଧି ପାଇଥାଏ । ଯେତେବେଳେ ବିଶ୍ୱାସନୀୟତା ସହିତ କାର୍ଯ୍ୟ କରାଯାଇଥାଏ, ଯେତେବେଳେ ସ୍ପଷ୍ଟ ଉଦ୍ଦେଶ୍ୟ ରଖି କାର୍ଯ୍ୟ କରାଯାଇଥାଏ, ତ ପ୍ରୟାସରେ ମଧ୍ୟ କୌଣସି ଊଣା ରହି ନଥାଏ । ଏବେ ଚନ୍ଦ୍ରଯାନକୁ ନେଇ ଯାହା କିଛି ମଧ୍ୟ ହେଲା ଆପଣମାନେ ସେ କଥା ସହିତ ପରିଚିତ ଥିବେ ।
ଆମ ବୈଜ୍ଞାନିକମାନେ ଏକ ବଡ଼ ଲକ୍ଷ୍ୟ ହାସଲ କରିବାର ପ୍ରୟାସ କରିଥିଲେ, କିନ୍ତୁ ସେଥିରେ ଏକ ବାଧା ଆସିଗଲା । ଏହି ମିଶନ ପାଇଁ ବୈଜ୍ଞାନିକମାନେ ବହୁ ସମୟ ଧରି ପରିଶ୍ରମ କରୁଥିଲେ ।
ଭାଇ ଓ ଭଉଣୀମାନେ, କାଲି ରାତିରେ ଏବଂ ଆଜି ସକାଳେ ମୁଁ ସେମାନଙ୍କ ଗହଣରେ ଥିଲି । ସେମାନେ ଭାବବିହ୍ୱଳ ହୋଇ ପଡ଼ୁଥିଲେ, କିନ୍ତୁ ଏହା ସହିତ ମଧ୍ୟ ଦୃଢ଼ ସାହସରେ ଭରି ରହିଥିଲେ କି ଏବେ ଆହୁରି ଦ୍ରୁତ ଗତିରେ କାର୍ଯ୍ୟ କରିବାକୁ ହେବ, ଯାହା ହେଲା ସେଥିରୁ ଶିକ୍ଷା ଗ୍ରହଣ କରି ଆଗକୁ ବଢ଼ିବାକୁ ହେବ । ଇସ୍ରୋ ଭଳି ପ୍ରତିବଦ୍ଧତା ସହିତ ହିଁ ଦେଶକୁ ଆଗକୁ ବଢ଼ାଇ ନିଆ ଯାଇପାରେ, ଲୋକମାନଙ୍କର ଜୀବନକୁ ସହଜ କରାଯାଇପାରେ ।
ସାଥୀଗଣ, ଭିନ୍ନ ଭିନ୍ନ କ୍ଷେତ୍ରରେ ଏହିଭଳି ଭାବେ ହିଁ ଦୃଢନିଶ୍ଚୟ ଲୋକଙ୍କର ପ୍ରତିବଦ୍ଧତା ରହିଥିବାରୁ ଦେଶର ପ୍ରତ୍ୟେକ ଗାଁ ପର୍ଯ୍ୟନ୍ତ ବିଜୁଳି ପହଞ୍ଚାଇବା, 8 କୋଟି ଲୋକଙ୍କୁ ଗ୍ୟାସ ସଂଯୋଗ ଦେବା, ଏଭଳି ଅନେକ କାର୍ଯ୍ୟ ସମୟ ପୂର୍ବରୁ ପୂରଣ କରାଯାଇଛି । ଏବେ ଖୁବ ଶୀଘ୍ର ସମଗ୍ର ଦେଶ ନିଜକୁ ଖୋଲାରେ ମଳ ମୁକ୍ତ ଘୋଷଣା କରିବା ଆଡ଼କୁ ଗତି କରୁଛି ।
ମୋର ବିଶ୍ୱାସ ରହିଛି କି 2022ରେ, ଯେତେବେଳେ ଆମେ ସ୍ୱାଧୀନତାର 75 ବର୍ଷ ପର୍ବ ପାଳନ କରୁଥିବା, ସେତେବେଳ ପାଇଁ ଆମେ ଯେଉଁ ସବୁ ସଂକଳ୍ପ ଗ୍ରହଣ କରିଛେ, ସେସବୁ ନିଶ୍ଚିତ ଭାବେ ପୂରଣ ହେବ ।
ଭାଇ ଓ ଭଉଣୀମାନେ, 2022 ପର୍ଯ୍ୟନ୍ତ ପ୍ରତ୍ୟେକ ଗରିବଙ୍କୁ ପକ୍କା ଘର ଦେବା ଲକ୍ଷ୍ୟ ଆଡ଼କୁ ଆମେ ଦ୍ରୁତ ଗତିରେ ଆଗକୁ ବଢ଼ୁଛୁ । ଏ ପର୍ଯ୍ୟନ୍ତ ଦେଶର ଗାଁ ଏବଂ ସହରରେ ପ୍ରାୟ 1 କୋଟି 80 ଲକ୍ଷ ଘର ନିର୍ମାଣ ହୋଇସାରିଛି । ହିତାଧିକାରୀ ସେଥିରେ ରହିବା ପାଇଁ ଚାଲିଗଲେଣି । କେତେ ଲୋକ ଆମକୁ ପଚାରନ୍ତି କି ଗରିବଙ୍କ ପାଇଁ ଗୃହ ଯୋଜନା ତ ଆଗରୁ ମଧ୍ୟ ଚାଲି ଆସୁଥିଲା, କିନ୍ତୁ ଆପଣ ଏଥିରେ ଅଲଗା କ’ଣ କରିଛନ୍ତି ?
ସର୍ବ ପ୍ରଥମେ ତ ମୁଁ ଏହା ଜଣାଇବାକୁ ଚାହୁଁଛି କି ଆମେ ଏହି କଥାକୁ ବୁଝିଥିଲୁ କି ଆମେ ଗୃହ ନୁହେଁ, ବରଂ ଘରର ନିର୍ମାଣ କରିବା, ଚାରି କାନ୍ଥରେ ଘେରା ହୋଇଥିବା ଗୃହ ନୁହେଁ, ଆପଣଙ୍କ ସ୍ୱପ୍ନର ଘର ତିଆରି କରିବୁ । ଆମେ ଏପରି ଘର ତିଆରି କରିବାକୁ ଚାହିଁଛୁ ଯେଉଁଠାରେ ସମସ୍ତ ସୁବିଧା ମଧ୍ୟ ଉପଲବ୍ଧ ହୋଇଥିବ । ଅର୍ଥାତ ଘର ନାମରେ କେବଳ ଚାରି କାନ୍ଥ ଠିଆ କରିବାର ଉପାୟରୁ ଭିନ୍ନ କିଛି ଉନ୍ନତ ଧରଣର କାର୍ଯ୍ୟ ଆମକୁ କରିବାର ଆବଶ୍ୟକତା ଥିଲା । ଆମର ଚେଷ୍ଟା କମରୁ ଅତି କମ୍ ସମୟ ମଧ୍ୟରେ, ଅତି ଅଧିକ ବ୍ୟୟ ନ କରି ଅଧିକରୁ ଅଧିକ ସୁବିଧା ମାନ ଦେବା, ଏହା ଆମର ଉଦ୍ଦେଶ୍ୟ ଥିଲା ।
ସାଥୀଗଣ, ଆମ ସରକାର ଯେଉଁ ଘର ନିର୍ମାଣ କରିଛନ୍ତି, ସେଥିପାଇଁ କୌଣସି ସ୍ଥିରୀକୃତ ମାଧ୍ୟମ ଆପଣେଇ ନାହୁଁ କି ଯାହାକୁ ଆମେ କାଗଜ ଉପରେ ନକ୍ସା ଅଙ୍କନ କରି ଦେଲୁ, ସେହିଭଳି ଘର ସମଗ୍ର ଦେଶରେ ନିର୍ମାଣ ହେବା ଦରକାର । ଆଜ୍ଞା ନୁହେଁ, ବରଂ ଏହା ବଦଳରେ ଆମେ ଘର ନିର୍ମାଣ ବେଳେ ସ୍ଥାନୀୟ ଲୋକମାନଙ୍କର ଆବଶ୍ୟକତା ଏବଂ ସେଠାକାର ଲୋକଙ୍କର ଇଚ୍ଛାକୁ ମଧ୍ୟ କେନ୍ଦ୍ରରେ ରଖିଲୁ, ତାହାକୁ ଧ୍ୟାନରେ ରଖି ଗୃହ ନିର୍ମାଣ କରିବାର ଯୋଜନା ପ୍ରସ୍ତୁତ କଲୁ । ଘରେ ସବୁ ପ୍ରକାରର ମୌଳିକ ସୁବିଧା ଉପଲବ୍ଧ ହେଉ, ଏଥିପାଇଁ ଆମେ ବିଭିନ୍ନ ସରକାରୀ ଯୋଜନାଗୁଡ଼ିକୁ ଏହା ସହିତ ଯୋଡ଼ିଦେଲୁ । ଫଳରେ ସେହି ଘରଗୁଡ଼ିକରେ ବିଜୁଳି, ଗ୍ୟାସ ସଂଯୋଗ, ଶୌଚାଳୟ ଏବଂ ଏଭଳି ସମସ୍ତ ସୁବିଧାମାନ ମଧ୍ୟ ଏହା ସହିତ ମିଳିପାରିବ ।
ଏସବୁ ଘର ଲୋକମାନଙ୍କର ଆଶା ଆକାଂକ୍ଷା ଅନୁସାରେ ନିର୍ମାଣ ହୋଇପାରୁ ଏଥିପାଇଁ ଆମେ ଆପଣମାନଙ୍କ ଆବଶ୍ୟକତାକୁ ଶୁଣିଲୁ । ଏହା ପରେ ନା କେବଳ ଘରର ଆୟତନକୁ ବଢ଼ାଗଲା ବରଂ ନିର୍ମାଣ ରାଶିରେ ମଧ୍ୟ ବୃଦ୍ଧି କରାଗଲା । ଏହି ପ୍ରକ୍ରିୟାରେ ସ୍ଥାନୀୟ କାରିଗର ଏବଂ ଶ୍ରମିକମାନଙ୍କୁ ସାମିଲ କରାଗଲା, ଯେପରି ଅନେକ ମହିଳା, ଆଜି ଯେପରି ଝାଡ଼ଖଣ୍ଡ ଯିବେ ତ ରାଣୀମିସ୍ତ୍ରୀ ଶବ୍ଦ ଆପଣଙ୍କୁ ଶୁଭିବ । ଅନ୍ୟ କୌଣସି ଅତିରିକ୍ତ ବ୍ୟୟ ବିନା, କମରୁ ଅତି କମ୍ ସମୟ ମଧ୍ୟରେ ଘରର ହସ୍ତାନ୍ତର ହେଉ, ଏହା ଉପରେ ମଧ୍ୟ ଆମେ ଧ୍ୟାନ ଦେଲୁ । ଏଥିପାଇଁ, ଏଥିପାଇଁ ଟେକ୍ନୋଲୋଜିକୁ ଏକ ଗୁରୁତ୍ୱପୂର୍ଣ୍ଣ ଅଂଶ ଭାବେ ଆପଣାଇବାକୁ ହେଲା ।
ଭାଇ ଓ ଭଉଣୀମାନେ, ଆମେ ସେହି ଲୋକମାନଙ୍କର ସ୍ୱପ୍ନକୁ ମଧ୍ୟ ବଳ ପ୍ରଦାନ କରିବାକୁ ଚେଷ୍ଟା କରିଛୁ, ଯେଉଁମାନେ ନିଜେ ନିଜର ଘର କିଣିବା ପାଇଁ ଇଚ୍ଛା କରୁଛନ୍ତି । ଶସ୍ତା ଗୃହକୁ ଆହୁରି ଅଧିକ ପ୍ରୋତ୍ସାହନ ଦେବା ପାଇଁ ସରକାର ଗୃହ ଋଣ ଉପରେ ଦେଢ଼ ଲକ୍ଷ ସୁଧ ଉପରେ ଆୟକରରେ ଅତିରିକ୍ତ ଛାଡ଼ ଦେବାର ବ୍ୟବସ୍ଥା କଲେ, ଫଳରେ ମଧ୍ୟମ ବର୍ଗର ଲୋକ ନିଜର ଘର ନିର୍ମାଣ କରି ପାରନ୍ତୁ ।
ସାଥୀଗଣ, ଆମର ଗୁରୁତ୍ୱ ପାରଦର୍ଶିତା ଉପରେ ମଧ୍ୟ ରହିଲା । ଗୃହ ନିର୍ମାଣର ଭିନ୍ନ ଭିନ୍ନ ସ୍ତରର ଛବିଗୁଡ଼ିକୁ ଅନ ଲାଇନ ଅପଲୋଡ଼୍ କରାଗଲା । ପାରଦର୍ଶି ଉପାୟରେ ପ୍ରଶାସନକୁ ସଠିକ ବିବରଣୀ ପ୍ରଦାନ କରାଗଲା । କେବଳ ଏତିକି ନୁହେଁ, ରିୟଲ ଇଷ୍ଟେଟ୍ କ୍ଷେତ୍ରରେ ପାରଦର୍ଶିତାର ଖୁବ୍ ଅଭାବ ଥିଲା । ଏହା ଫଳରେ ଘର କିଣୁଥିବା ଲୋକଙ୍କୁ ଖୁବ୍ ଅସୁବିଧାର ସମ୍ମୁଖୀନ ହେବାକୁ ପଡ଼ୁଥଲା । ସରକାର ରେରା ଆଇନ ଆଣି ଘର କିଣୁଥିବା ଲୋକଙ୍କ ମନରେ ବିଶ୍ୱାସ ଜନ୍ମାଇବାର କାର୍ଯ୍ୟ କରିଛନ୍ତି । ଆଜି ଅଧିକାଂଶ ରାଜ୍ୟରେ ରେରା ଆଇନ ବିଜ୍ଞପ୍ତି (ନୋଟିଫାଏ) ଜାରି କରାଯାଇସାରିଛି । ଟ୍ରିବ୍ୟୁନାଲ ମଧ୍ୟ କାର୍ଯ୍ୟ କରୁଛି । ଏହି ପ୍ରକଳ୍ପ ମାଧ୍ୟମରେ ଲକ୍ଷ ଲକ୍ଷ ନୂତନ ଫ୍ଲାଟର ନିର୍ମାଣ କରାଯାଉଛି ।
ମୋଟାମୋଟି ଭାବେ କହିବାକୁ ଗଲେ ଦେଖିବା ତ ଗୃହକୁ ନେଇ ଆମେ ସାମଗ୍ରିକ ଅଭିବ୍ୟକ୍ତି ଦ୍ୱାରା କାର୍ଯ୍ୟ କରିଛୁ । ଯଦି ଆମେ ଭିନ୍ନ ଭିନ୍ନ ଯୋଜନା ମାଧ୍ୟମରେ ଗୋଟିଏ ଗୋଟିଏ ଯୋଜନା ସହିତ ସାମ୍ନାକୁ ଆସିଥାନ୍ତେ, ତ ଏତେ ବଡ଼ ସଫଳତା ମିଳିବା କଷ୍ଟକର ହୋଇ ପଡ଼ିଥାଆନ୍ତା । ବୃହତ ଆକାରରେ ସମାଧାନ ସେତେବେଳେ ହିଁ ସମ୍ଭବ ଯେତେବେଳେ ସମସ୍ତ ବିଭାଗ, ସମସ୍ତ ନିଷ୍ପତ୍ତି, ଏକ ବୃହତ ଲକ୍ଷ୍ୟକୁ ଚିନ୍ତାକରି କରାଯିବ । ସମସ୍ତ ମନ୍ତ୍ରଣାଳୟ ଏବଂ ସମସ୍ତ ଯୋଜନା ମିଶି ଗୋଟିଏ ଧାରରେ କାର୍ଯ୍ୟ କରିବେ । ଏହା ହିଁ ଆମ ସରକାରଙ୍କର କାର୍ଯ୍ୟକଳାପର ପରିଚୟ ଭାବେ ରହିଛି, ଖଣ୍ଡ ଖଣ୍ଡ ଭାବେ ନୁହେଁ ସାମଗ୍ରିକ ଭାବେ ଚିନ୍ତା କରନ୍ତୁ ଆଉ ସମସ୍ତଙ୍କୁ ଏକାଠି କରି କାର୍ଯ୍ୟ କରନ୍ତୁ ।
ସାଥୀଗଣ, ବିଗତ 5 ବର୍ଷରେ ସ୍ୱଚ୍ଛତାରୁ ନେଇ ବ୍ୟାଙ୍କରେ କାରବାର ପର୍ଯ୍ୟନ୍ତ, ସମାଜର ବ୍ୟବହାରରେ ପରିବର୍ତ୍ତନକୁ ନେଇ ଯେତେ ମଧ୍ୟ ଜନ ଆନ୍ଦୋଳନ ହୋଇଛି, ସେଥିରେ ଆପଣମାନେ ସମସ୍ତେ ଖୁବ୍ ଭଲ ଭାବେ ଯୋଗଦାନ କରିଛନ୍ତି । ଏହା ହେଉଛି କାରଣ କି ଆଗାମୀ 5 ବର୍ଷ ପାଇଁ ମଧ୍ୟ ଯେଉଁ ସଂକଳ୍ପ ନିଆଯାଇଛି, ସେଗୁଡ଼ିକର ସିଦ୍ଧି ପାଇଁ ଆପଣମାନଙ୍କ ଉପରେ ମୋର ବହୁତ ବିଶ୍ୱାସ ରହିଛି । ଏହି ବିଶ୍ୱାସ ନିରନ୍ତର ସୁଦୃଢ଼ ହେବ, ଏହି କାମନା ସହିତ ଆପଣମାନଙ୍କୁ ବହୁତ ବହୁତ ଧନ୍ୟବାଦ ।
ଧନ୍ୟବାଦ ଏବଂ ଏତେ ଅଧିକ ସଂଖ୍ୟାରେ ପର୍ବ ଦିନମାନଙ୍କରେ ମାଆ ଭଉଣୀମାନଙ୍କୁ ଆମକୁ ଆଶୀର୍ବାଦ ଦେବା ପାଇଁ ଆସିବା, ଏହା ହେଉଛି ଆମ ପାଇଁ ନିଜକୁ ନିଜ ମଧ୍ୟରେ ଏକ ଶକ୍ତିର ଅନୁଭୂତି । ଏହି ମାତୃଶକ୍ତିକୁ ପ୍ରଣାମ କରି ମୁଁ ମୋର ବକ୍ତବ୍ୟକୁ ସମାପ୍ତ କରୁଛି । ମୋ ସହିତ ନିଜର ଦୁଇ ହାତକୁ ଉପରକୁ ଉଠାଇ ସଂପୂର୍ଣ୍ଣ ଶକ୍ତିର ସହିତ କୁହନ୍ତୁ-
ଭାରତ ମାତା କୀ-ଜୟ
ଭାରତ ମାତା କୀ-ଜୟ
ଭାରତ ମାତା କୀ-ଜୟ
ଭାରତ ମାତା କୀ-ଜୟ
