ଓଡ଼ିଶା ପର୍ବରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

Delighted to take part in the Odisha Parba in Delhi, the state plays a pivotal role in India's growth and is blessed with cultural heritage admired across the country and the world: PM

The culture of Odisha has greatly strengthened the spirit of 'Ek Bharat Shreshtha Bharat', in which the sons and daughters of the state have made huge contributions: PM

We can see many examples of the contribution of Oriya literature to the cultural prosperity of India: PM

Odisha's cultural richness, architecture and science have always been special, We have to constantly take innovative steps to take every identity of this place to the world: PM

We are working fast in every sector for the development of Odisha,it has immense possibilities of port based industrial development: PM

Odisha is India's mining and metal powerhouse making it’s position very strong in the steel, aluminium and energy sectors: PM

Our government is committed to promote ease of doing business in Odisha: PM

Today Odisha has its own vision and roadmap, now investment will be encouraged and new employment opportunities will be created: PM

ଜୟ ଜଗନ୍ନାଥ !

ଜୟ ଜଗନ୍ନାଥ !

କେନ୍ଦ୍ର କ୍ୟାବିନେଟରେ ମୋର ସହଯୋଗୀ ଶ୍ରୀ ଧର୍ମେନ୍ଦ୍ର ପ୍ରଧାନ ଜୀ, ଅଶ୍ୱିନୀ ବୈଷ୍ଣବ ଜୀ, ଓଡ଼ିଆ ସମାଜ ଅନୁଷ୍ଠାନର ସଭାପତି ଶ୍ରୀ ସିଦ୍ଧାର୍ଥ ପ୍ରଧାନ ଜୀ, ଓଡ଼ିଆ ସମାଜର ଅନ୍ୟ କର୍ମକର୍ତ୍ତା, ଓଡିଶାର ସମସ୍ତ କଳାକାର, ଅନ୍ୟ ମାନ୍ୟଗଣ୍ୟ ବ୍ୟକ୍ତି, ଭଦ୍ର ମହିଳା ଓ ଭଦ୍ରବ୍ୟକ୍ତିଗଣ ।

ଓଡ଼ିଶାର ସମସ୍ତ ଭାଇ ଓ ଭଉଣୀମାନଙ୍କୁ ମୋର ନମସ୍କାର, ଏବଂ ଜୁହାର। ଓଡ଼ିଆ ସଂସ୍କୃତିର ମହାକୁମ୍ଭ 'ଓଡ଼ିଶା ପର୍ବ ୨୦୨୪' କୁ ଆସି ମୁଁ ଗର୍ବିତ। ଆପଣମାନଙ୍କୁ ଭେଟି ମୁଁ ବହୁତ ଖୁସି ।

ଓଡ଼ିଶା ପର୍ବ ଅବସରରେ ମୁଁ ଆପଣ ସମସ୍ତଙ୍କୁ ଏବଂ ଓଡ଼ିଶାବାସୀଙ୍କୁ ଶୁଭେଚ୍ଛା ଜଣାଉଛି। ଚଳିତ ବର୍ଷ କବି ଗଙ୍ଗାଧର ମେହେରଙ୍କ ଶ୍ରାଦ୍ଧ ବାର୍ଷିକୀର ଶ​‌ହେ ବର୍ଷ ପୂରଣ ​‌ହେଉଛି। ଏହି ଅବସରରେ ମୁଁ ତାଙ୍କୁ ସ୍ମରଣ କରୁଛି ଏବଂ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି । ଭକ୍ତ ଦାସିଆ ବାଉରୀ ଜୀ, ଭକ୍ତ ସାଲବେଗ ଜୀ ଏବଂ ଓଡ଼ିଆ ଭାଗବତର ରଚୟିତା ଶ୍ରୀଜଗନ୍ନାଥ ଦାସଜୀଙ୍କୁ ମଧ୍ୟ ମୁଁ ସମ୍ମାନର ସହ ପ୍ରଣାମ କରୁଛି ।

ନିଜର ସାଂସ୍କୃତିକ ବିବିଧତା ମାଧ୍ୟମରେ ଭାରତକୁ ବଞ୍ଚାଇ ରଖିବାରେ ଓଡ଼ିଶାର ବଡ଼ ଭୂମିକା ରହିଛି।

ବନ୍ଧୁଗଣ,

ଓଡ଼ିଶା ସବୁବେଳେ ସାଧୁ ସନ୍ଥ ଓ ବିଦ୍ଵାନ ମାନଙ୍କର ଭୂମି ଭାବେ ଜଣାଶୁଣା । ସାରଳା ମହାଭାରତ, ଓଡ଼ିଆ ଭାଗବତ...ଏଠାକାର ବିଦ୍ଵାନମାନେ ଯେପରି ସ୍ଥାନୀୟ ଭାଷାରେ ଆମ ଧର୍ମଗ୍ରନ୍ଥଗୁଡ଼ିକ ଘରେ ଘରେ ପହଞ୍ଚାଇଥିଲେ, ଋଷିମାନଙ୍କ ଚିନ୍ତାଧାରା ସହିତ ଲୋକମାନଙ୍କୁ ଯେପରି ଯୋଡ଼ିଥିଲେ...ଭାରତର ସାଂସ୍କୃତିକ ସମୃଦ୍ଧିରେ ସେମାନଙ୍କର ଏକ ବଡ଼ ଭୂମିକା ରହିଛି । ଓଡ଼ିଆ ଭାଷାରେ ମହାପ୍ରଭୁ ଶ୍ରୀଜଗନ୍ନାଥଙ୍କ ସହ ଜଡ଼ିତ ଅନେକ ସାହିତ୍ୟ ରହିଛି। ମୁଁ ମଧ୍ୟ ତାଙ୍କର ଗୋଟିଏ କାହାଣୀ ସବୁବେଳେ ମନେ ରଖିଥାଏ । ମହାପ୍ରଭୁ ତାଙ୍କ ଶ୍ରୀ ମନ୍ଦିରରୁ ବାହାରି ନିଜେ ଯୁଦ୍ଧର ନେତୃତ୍ୱ ନେଇଥିଲେ। ତା'ପରେ ଯୁଦ୍ଧ କ୍ଷେତ୍ରକୁ ଯିବା ସମୟରେ ମହାପ୍ରଭୁ ଶ୍ରୀଜଗନ୍ନାଥ ତାଙ୍କ ଭକ୍ତ 'ମାଣିକ ଗଉଡୁଣୀ'ଙ୍କ ହାତରୁ ଦହି ଖାଇଥିଲେ। ଏହି କାହାଣୀ ଆମକୁ ବହୁତ କିଛି ଶିଖାଏ । ଏହା ଆମକୁ ଶିକ୍ଷା ଦିଏ ଯେ , ଯଦି ଆମେ ଭଲ ଉଦ୍ଦେଶ୍ୟରେ କାମ କରୁ, ତେବେ ଭଗବାନ ନିଜେ ସେହି କାମର ନେତୃତ୍ୱ ନିଅନ୍ତି । ସର୍ବଦା, ସବୁବେଳେ, ପ୍ରତ୍ୟେକ ପରିସ୍ଥିତିରେ, ଆମେ ଏକା ବୋଲି ଭାବିବାର କୌଣସି ଆବଶ୍ୟକତା ନାହିଁ, ଆମେ ସର୍ବଦା 'ପ୍ଲସ୍ ୱାନ୍', ଭଗବାନ ସର୍ବଦା ଆମ ସହିତ ଅଛନ୍ତି, ଈଶ୍ଵର ସର୍ବଦା ଆମ ସହିତ ରହିଛନ୍ତି।

|

ବନ୍ଧୁଗଣ,

ଓଡ଼ିଶାର ସନ୍ଥ କବି ଭୀମ ଭୋଇ କହିଥିଲେ- ମୋ ଜୀବନ ପଚେ ନର୍କେ ପଡିଥାଉ, ଜଗତ ଉଦ୍ଧାର ହେଉ। ଏହାର ଭାବାର୍ଥ ହେଉଛି ଯେ ମୋତେ ଯେତେ ଯନ୍ତ୍ରଣା ସହିବାକୁ ପଡ଼ୁ ପଛେ...କିନ୍ତୁ ଦୁନିଆକୁ ରକ୍ଷା କରାଯାଉ। ଏହା ମଧ୍ୟ ଓଡ଼ିଶାର ସଂସ୍କୃତି। ଓଡ଼ିଶା ସମଗ୍ର ଦେଶ ତଥା ସମଗ୍ର ମାନବ ସମାଜର ସେବା କରୁଛି। ଏଠାରେ ପୁରୀ ଧାମ 'ଏକ ଭାରତ ଶ୍ରେଷ୍ଠ ଭାରତ'ର ଭାବନାକୁ ଦୃଢ଼ କରିଛି । ସ୍ବାଧୀନତା ସଂଗ୍ରାମରେ ଓଡ଼ିଶାର ବୀର ସନ୍ତାନମାନେ ଦେଶକୁ ଦିଗ ଦେଖାଇଥିଲେ । ପାଇକ ବିଦ୍ରୋହର ସହିଦଙ୍କ ଋଣ ଆମେ କେବେ ପରିଶୋଧ କରିପାରିବୁ ନାହିଁ । ମୋ ସରକାର ଭାଗ୍ୟବାନ ଯେ ପାଇକ ବିପ୍ଲବ ଉପରେ ଏକ ସ୍ମାରକୀ ଡାକ ଟିକଟ ଏବଂ ମୁଦ୍ରା ଉନ୍ମୋଚନ କରିବାର ସୁଯୋଗ ପାଇଛି ।

ସାଥୀଗଣ,

ଏହି ସମୟରେ ଉତ୍କଳ କେଶରୀ ହରେକୃଷ୍ଣ ମହତାବଙ୍କ ଅବଦାନକୁ ସମଗ୍ର ଦେଶ ମନେ ପକାଉଛି । ଆମେ ତାଙ୍କର ୧୨୫ତମ ଜୟନ୍ତୀକୁ ବଡ଼ ଧରଣରେ ପାଳନ କରୁଛୁ। ଅତୀତରୁ ଆଜି ପର୍ଯ୍ୟନ୍ତ ଓଡ଼ିଶା ରାଜ୍ୟ ଦେଶକୁ କେତେ ଦକ୍ଷ ନେତୃତ୍ୱ ଦେଇଛି ତାହା ମଧ୍ୟ ଆମ ସାମ୍ନାରେ ରହିଛି। ଆଜି ଓଡ଼ିଶାର ଝିଅ...ଆଦିବାସୀ ସମ୍ପ୍ରଦାୟର ଦ୍ରୌପଦୀ ମୁର୍ମୁ ଜୀ ଭାରତର ରାଷ୍ଟ୍ରପତି । ଏହା ଆମ ସମସ୍ତଙ୍କ ପାଇଁ ଗର୍ବର ବିଷୟ। ତାଙ୍କ ପ୍ରେରଣାରେ ଭାରତରେ ଆଦିବାସୀ କଲ୍ୟାଣ ପାଇଁ ହଜାର ହଜାର କୋଟି ଟଙ୍କାର ଯୋଜନା ଆରମ୍ଭ ହୋଇଛି ଏବଂ ଏହି ଯୋଜନାଗୁଡ଼ିକ କେବଳ ଓଡ଼ିଶା ନୁହେଁ ବରଂ ସମଗ୍ର ଭାରତର ଆଦିବାସୀ ସମାଜକୁ ଉପକୃତ କରୁଛି ।

ସାଥୀଗଣ,

ଓଡ଼ିଶା ହେଉଛି ମାତା ସୂଭଦ୍ରାଙ୍କ ରୂପରେ ନାରୀ ଶକ୍ତି ଏବଂ ସେମାନଙ୍କ ସାମର୍ଥ୍ୟର ଭୂମି । ଓଡ଼ିଶାର ମହିଳାମାନେ ଆଗକୁ ବଢ଼ିଲେ ହିଁ ଓଡ଼ିଶା ଆଗକୁ ବଢ଼ିବ। ସେଥିପାଇଁ କିଛି ଦିନ ତଳେ ମୁଁ ଓଡ଼ିଶାର ମୋ ମା' ଭଉଣୀମାନଙ୍କ ପାଇଁ ସୁଭଦ୍ରା ଯୋଜନା ଆରମ୍ଭ କରିଥିଲି। ଏହା ଦ୍ୱାରା ଓଡ଼ିଶାର ମହିଳାମାନେ ବେଶ୍ ଉପକୃତ ହେବେ। ଉତ୍କଳର ମହାନ ପୁତ୍ରମାନଙ୍କ ବିଷୟରେ ଦେଶ ଜାଣୁ, ସେମାନର ଜୀବନରୁ ପ୍ରେରଣା ନେଉ, ସେଥିପାଇଁ ଏଭଳି ଆୟୋଜନର ବହୁତ ଗୁରୁତ୍ୱ ଅଛି ।

|

ସାଥୀଗଣ,

ଏହି ଉତ୍କଳ ଭାରତର ସାମୁଦ୍ରିକ ଶକ୍ତିକୁ ଏକ ନୂଆ ଦିଗ ଦେଇଥିଲା । ଗତକାଲି ଓଡ଼ିଶାରେ ବାଲିଯାତ୍ରା ଶେଷ ହୋଇଛି। ଏଥର ମଧ୍ୟ ନଭେମ୍ବର ୧୫ ତାରିଖ କାର୍ତ୍ତିକ ପୂର୍ଣ୍ଣିମା ଦିନ କଟକ ମହାନଦୀ କୂଳରେ ଏକ ଭବ୍ୟ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ବାଲିଯାତ୍ରା ହେଉଛି ଭାରତ ଓ ଓଡ଼ିଶାର ସାମୁଦ୍ରିକ ସମ୍ଭାବନାର ପ୍ରତୀକ । ଶହ ଶହ ବର୍ଷ ପୂର୍ବେ ଯେତେବେଳେ ଆଜି ଭଳି କୌଣସି ଜ୍ଞାନକୌଶଳ ନଥିଲା, ସେତେବେଳେ ଏଠାକାର ନାବିକମାନେ ସମୁଦ୍ର ପାର ହେବାକୁ ସାହସ ଦେଖାଇଥିଲେ। ଇଣ୍ଡୋନେସିଆର ବାଲି, ସୁମାତ୍ରା, ଜାଭା ଭଳି ସ୍ଥାନକୁ ଆମର ବ୍ୟବସାୟୀମାନେ ବୋଇତ ଯୋଗେ ଯାତାୟାତ କରୁଥିଲେ। ଏହି ଯାତ୍ରା ମାଧ୍ୟମରେ ବାଣିଜ୍ୟ ଓ ସଂସ୍କୃତି ମଧ୍ୟ ଗୋଟିଏ ସ୍ଥାନରୁ ଅନ୍ୟ ସ୍ଥାନରେ ପହଞ୍ଚିଥିଲା । ଆଜି ବିକଶିତ ଭାରତର ସଂକଳ୍ପ ହାସଲ କରିବାରେ ଓଡ଼ିଶାର ସାମୁଦ୍ରିକ ଶକ୍ତି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।

ସାଥୀଗଣ,

ଓଡ଼ିଶାକୁ ନୂଆ ଉଚ୍ଚତାରେ ପହଞ୍ଚାଇବା ପାଇଁ ୧୦ ବର୍ଷ ହେଲା ନିରନ୍ତର ପ୍ରୟାସ ଚାଲିଛି।ଆଜି ଓଡ଼ିଶା ପାଇଁ ଏକ ନୂଆ ଭବିଷ୍ୟତର ଆଶା ସୃଷ୍ଟି ହୋଇଛି। ୨୦୨୪ରେ ଓଡ଼ିଶାବାସୀଙ୍କ ଅଭୂତପୂର୍ବ ଆଶୀର୍ବାଦ ଏହି ଆଶାକୁ ନୂଆ ରୂପ ଦେଇଛି। ଆମର ବଡ଼ ସ୍ୱପ୍ନ ଅଛି, ବଡ଼ ଲକ୍ଷ୍ୟ ରହିଛି। ୨୦୩୬ରେ ଓଡ଼ିଶା ରାଜ୍ୟ ଗଠନର ଶତବାର୍ଷିକୀ ପାଳନ କରିବ। ଓଡ଼ିଶାକୁ ଦେଶର ଶକ୍ତିଶାଳୀ, ସମୃଦ୍ଧ ଓ ଦ୍ରୁତ ଅଭିବୃଦ୍ଧିଶୀଳ ରାଜ୍ୟ ମଧ୍ୟରେ ଗଣାଯିବା ଆମର ପ୍ରୟାସ।

ବନ୍ଧୁଗଣ,

ଏକ ସମୟ ଥିଲା ଯେତେବେଳେ ଭାରତର ପୂର୍ବ ଭାଗ ...ଓଡ଼ିଶା ଭଳି ରାଜ୍ୟକୁ ପଛୁଆ କୁହାଯାଉଥିଲା। କିନ୍ତୁ ମୁଁ ଭାରତର ପୂର୍ବ ଭାଗକୁ ଦେଶର ଅଭିବୃଦ୍ଧି ଇଞ୍ଜିନ୍ ଭାବରେ ବିବେଚନା କରେ | ସେଥିପାଇଁ ପୂର୍ବ ଭାରତର ବିକାଶକୁ ଆମେ ପ୍ରାଥମିକତା ଦେଇଛୁ। ଆଜି ସମଗ୍ର ପୂର୍ବ ଭାରତରେ ଯୋଗାଯୋଗ, ସ୍ୱାସ୍ଥ୍ୟ ଓ ଶିକ୍ଷାର କାର୍ଯ୍ୟକୁ ତ୍ୱରାନ୍ୱିତ କରାଯାଇଛି । ୧୦ ବର୍ଷ ପୂର୍ବେ କେନ୍ଦ୍ର ସରକାର ଯେତିକି ବଜେଟ୍ ଦେଉଥିଲେ, ତା'ଠାରୁ ଓଡ଼ିଶାକୁ ୩ ଗୁଣ ଅଧିକ ବଜେଟ୍ ମିଳୁଛି। ଗତବର୍ଷ ତୁଳନାରେ ଚଳିତ ବର୍ଷ ଓଡ଼ିଶାର ବିକାଶ ପାଇଁ ୩୦ ପ୍ରତିଶତ ଅଧିକ ବଜେଟ୍ ଦିଆଯାଇଛି। ଓଡ଼ିଶାର ବିକାଶ ପାଇଁ ଆମେ ପ୍ରତ୍ୟେକ କ୍ଷେତ୍ରରେ ଦ୍ରୁତ ଗତିରେ କାର୍ଯ୍ୟ କରୁଛୁ।

ବନ୍ଧୁଗଣ,

ବନ୍ଦର ଭିତ୍ତିକ ଶିଳ୍ପ ବିକାଶ ପାଇଁ ଓଡ଼ିଶାରେ ପ୍ରଚୁର ସମ୍ଭାବନା ରହିଛି। ତେଣୁ ଧାମରା, ଗୋପାଳପୁର, ଅସ୍ତରଙ୍ଗ, ପାଲୁର ଓ ସୁବର୍ଣ୍ଣରେଖା ବନ୍ଦରର ବିକାଶ କରି ଏଠାରେ ବ୍ୟବସାୟକୁ ପ୍ରୋତ୍ସାହିତ କରାଯିବ। ଓଡ଼ିଶା ମଧ୍ୟ ଭାରତର ଖଣି ଓ ଧାତବ ଶକ୍ତି କେନ୍ଦ୍ର। ଏହା ଇସ୍ପାତ, ଆଲୁମିନିୟମ ଓ ଶକ୍ତି କ୍ଷେତ୍ରରେ ଓଡ଼ିଶାର ସ୍ଥିତିକୁ ସୁଦୃଢ଼ କରିଥାଏ । ଏହି ସବୁ କ୍ଷେତ୍ର ଉପରେ ଧ୍ୟାନ ଦେଲେ ଓଡ଼ିଶାରେ ସମୃଦ୍ଧିର ନୂଆ ଦ୍ୱାର ଖୋଲାଯାଇପାରିବ।

ବନ୍ଧୁଗଣ,

ଓଡ଼ିଶା ମାଟିରେ କାଜୁ, ଝୋଟ, କପା, ହଳଦୀ ଓ ତୈଳବୀଜ ପ୍ରଚୁର ପରିମାଣରେ ଚାଷ କରାଯାଏ । ଆମର ପ୍ରୟାସ ହେଉଛି ଏହି ଉତ୍ପାଦଗୁଡିକ ଯେପରି ଅଧିକ ବଜାରରେ ପହଞ୍ଚିବ ଏବଂ ଆମର କୃଷକ ଭାଇ ଭଉଣୀମାନେ ଏହାର ଲାଭ ପାଇବେ । ଓଡ଼ିଶାର ସାମୁଦ୍ରିକ ଖାଦ୍ୟ ପ୍ରକ୍ରିୟାକରଣ ଶିଳ୍ପରେ ମଧ୍ୟ ସମ୍ପ୍ରସାରଣର ଯଥେଷ୍ଟ ସମ୍ଭାବନା ରହିଛି। ଓଡ଼ିଶା ସାମୁଦ୍ରିକ ଖାଦ୍ୟକୁ ଏକ ବ୍ରାଣ୍ଡରେ ପରିଣତ କରିବା ପାଇଁ ଆମର ପ୍ରୟାସ ରହିଛି, ଯାହାର ବିଶ୍ୱ ବଜାରରେ ଚାହିଦା ରହିଛି ।

ସାଥୀଗଣ,

ଓଡ଼ିଶାକୁ ନିବେଶକଙ୍କ ପ୍ରିୟ ସ୍ଥାନରେ ପରିଣତ କରିବା ପାଇଁ ଆମର ପ୍ରୟାସ ରହିଛି। ଆମ ସରକାର ଓଡ଼ିଶାରେ ଇଜ୍ ଅଫ୍ ଡୁଇଙ୍ଗ ବିଜନେସକୁ ପ୍ରୋତ୍ସାହିତ କରିବାକୁ ପ୍ରତିବଦ୍ଧ। ଉତ୍କର୍ଷ ଉତ୍କଳ ମାଧ୍ୟମରେ ପୁଞ୍ଜିନିବେଶ ବୃଦ୍ଧି କରାଯାଉଛି। ଓଡ଼ିଶାରେ ନୂଆ ସରକାର ଗଠନ ହେବା ମାତ୍ରେ ପ୍ରଥମ ୧୦୦ ଦିନ ମଧ୍ୟରେ ୪୫ ହଜାର କୋଟି ଟଙ୍କାର ପୁଞ୍ଜିନିବେଶକୁ ମଞ୍ଜୁରି ମିଳିଛି। ଆଜି ଓଡ଼ିଶାର ନିଜସ୍ବ ଦୃଷ୍ଟିକୋଣ ଓ ରୋଡ୍ ମ୍ୟାପ୍ ରହିଛି। ଏବେ ଏଠାରେ ପୁଞ୍ଜିନିବେଶକୁ ପ୍ରୋତ୍ସାହିତ କରାଯିବା ସହ ନୂତନ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହେବ। ଏହି ପ୍ରୟାସ ପାଇଁ ମୁଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ତାଙ୍କ ଟିମ୍କୁ ଅଭିନନ୍ଦନ ଜଣାଉଛି।

|

ସାଥୀଗଣ,

ଓଡ଼ିଶାର ସାମର୍ଥ୍ୟକୁ ସଠିକ ଦିଗରେ ଉପଯୋଗ କରି ଏହାକୁ ବିକାଶର ନୂତନ ଉଚ୍ଚତାରେ ପହଞ୍ଚାଇ ହେବ। ମୋର ବିଶ୍ୱାସ ଯେ ଓଡ଼ିଶା ଏହାର ରଣନୈତିକ ସ୍ଥିତିର ଏକ ବଡ଼ ଫାଇଦା ପାଇପାରିବ । ଏଠାରୁ ଘରୋଇ ଓ ଅନ୍ତର୍ଜାତୀୟ ବଜାରରେ ପହଞ୍ଚିବା ସହଜ। ପୂର୍ବ ଓ ଦକ୍ଷିଣ-ପୂର୍ବ ଏସିଆ ପାଇଁ ଓଡ଼ିଶା ବାଣିଜ୍ୟର ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର । ଆଗାମୀ ଦିନରେ ବିଶ୍ୱ ମୂଲ୍ୟ ଶୃଙ୍ଖଳାରେ ଓଡିଶାର ଗୁରୁତ୍ୱ ଆହୁରି ବୃଦ୍ଧି ପାଇବ । ଆମ ସରକାର ମଧ୍ୟ ରାଜ୍ୟରୁ ରପ୍ତାନି ବୃଦ୍ଧି ଲକ୍ଷ୍ୟ ଉପରେ କାର୍ଯ୍ୟ କରୁଛନ୍ତି।

ବନ୍ଧୁଗଣ, ଓଡ଼ିଶାରେ ସହରୀକରଣକୁ ପ୍ରୋତ୍ସାହିତ କରିବାର ପ୍ରଚୁର ସମ୍ଭାବନା ରହିଛି । ଆମ ସରକାର ଏ ଦିଗରେ ଠୋସ୍ ପଦକ୍ଷେପ ନେଉଛନ୍ତି। ଅଧିକ ସଂଖ୍ୟକ ଗତିଶୀଳ ଏବଂ ସୁସଂଯୋଜିତ ସହର ନିର୍ମାଣ ପାଇଁ ଆମେ ପ୍ରତିବଦ୍ଧ । ଓଡ଼ିଶାର ଦ୍ବିତୀୟ ସ୍ତରର ସହରଗୁଡ଼ିକରେ ମଧ୍ୟ ନୂଆ ସମ୍ଭାବନା ସୃଷ୍ଟି କରିବାକୁ ଆମେ ଯଥାସମ୍ଭବ ଚେଷ୍ଟା କରୁଛୁ। ବିଶେଷ କରି ପଶ୍ଚିମ ଓଡ଼ିଶାର ଜିଲ୍ଲା ଗୁଡ଼ିକରେ ନୂତନ ଭିତ୍ତିଭୂମି ନୂଆ ସୁଯୋଗ ସୃଷ୍ଟି ହେବ।

ସାଥୀଗଣ,

ଉଚ୍ଚଶିକ୍ଷା କ୍ଷେତ୍ରରେ ଓଡ଼ିଶା ସାରା ଦେଶର ଛାତ୍ରଛାତ୍ରୀଙ୍କ ପାଇଁ ଏକ ନୂଆ ଆଶା ଭଳି। ଅନେକ ଜାତୀୟ ଓ ଅନ୍ତର୍ଜାତୀୟ ଅନୁଷ୍ଠାନ ରହିଛି, ଯାହା ଶିକ୍ଷା କ୍ଷେତ୍ରରେ ରାଜ୍ୟକୁ ଅଗ୍ରଣୀ ହେବାକୁ ପ୍ରେରଣା ଦେଇଥାଏ। ଏହି ପ୍ରୟାସ ରାଜ୍ୟରେ ଷ୍ଟାର୍ଟଅପ୍ ଇକୋସିଷ୍ଟମକୁ ମଧ୍ୟ ପ୍ରୋତ୍ସାହନ ଦେଉଛି।

|

ସାଥୀଗଣ,

ସାଂସ୍କୃତିକ ସମୃଦ୍ଧି ପାଇଁ ଓଡ଼ିଶା ସବୁବେଳେ ସ୍ୱତନ୍ତ୍ର ରହିଆସିଛି । ଓଡ଼ିଶାର ଶୈଳୀ ସମସ୍ତଙ୍କୁ ଆକର୍ଷିତ କରିଥାଏ, ସମସ୍ତଙ୍କୁ ପ୍ରେରଣା ଦେଇଥାଏ। ଏଠାରେ ଓଡ଼ିଶୀ ନୃତ୍ୟ ହେଉ...ଓଡ଼ିଶାର ଚିତ୍ରକଳା...ପଟ୍ଟଚିତ୍ରରେ ଏଠାରେ ଯେଉଁ ଉଜ୍ଜ୍ୱଳତା ଦେଖିବାକୁ ମିଳୁଛି...ଆମ ଆଦିବାସୀ କଳାର ପ୍ରତୀକ ସୌରା ଚିତ୍ରକଳା ମଧ୍ୟ ସେତିକି ଅତୁଳନୀୟ। ଓଡ଼ିଶାର ସମ୍ବଲପୁରୀ, ବୋମକାଇ ଓ କୋଟପାଡ଼ ବୁଣାକାରଙ୍କ କାରିଗରୀ ମଧ୍ୟ ଦେଖିବାକୁ ମିଳୁଛି। ଆମେ ଏହି କଳା ଓ କାରିଗରୀକୁ ଯେତେ ପ୍ରସାର କରିବୁ, ଏହି କଳାକୁ ସଂରକ୍ଷିତ ରଖିଥିବା ଓଡ଼ିଆ ଲୋକମାନେ ସେତେ ଅଧିକ ସମ୍ମାନ ପାଇବେ।

ବନ୍ଧୁଗଣ, ଆମ ଓଡ଼ିଶା​‌ରେ ମଧ୍ୟ ସ୍ଥାପତ୍ୟ ଓ ବିଜ୍ଞାନର ଏତେ ବଡ଼ ଐତିହ୍ୟ ରହିଛି। କୋଣାର୍କର ସୂର୍ଯ୍ୟ ମନ୍ଦିର... ଏହାର ବିଶାଳତା, ଏହାର ବିଜ୍ଞାନ...ଲିଙ୍ଗରାଜ ଓ ମୁକ୍ତେଶ୍ୱର ଭଳି ପ୍ରାଚୀନ ମନ୍ଦିରର ସ୍ଥାପତ୍ୟ .....ଏହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଆଜି ଯେତେବେଳେ ଲୋକମାନେ ସେସବୁକୁ ଦେଖୁଛନ୍ତି...ତେଣୁ ଆମେ ଭାବିବାକୁ ବାଧ୍ୟ ହେଉଛୁ ଯେ ଶହ ଶହ ବର୍ଷ ପୂର୍ବେ ମଧ୍ୟ ଓଡ଼ିଶାବାସୀ ବିଜ୍ଞାନରେ ଏତେ ଆଗରେ ଥିଲେ।

ସାଥୀଗଣ,

ପର୍ଯ୍ୟଟନ ଦୃଷ୍ଟିକୋଣରୁ ଓଡ଼ିଶା ଏକ ବିପୁଳ ସମ୍ଭାବନାର ରାଜ୍ୟ। ଏହି ସମ୍ଭାବନାଗୁଡ଼ିକୁ ସାକାର କରିବା ପାଇଁ ଆମକୁ ଅନେକ ଦିଗରେ କାମ କରିବାକୁ ପଡିବ | ଆପଣ ଦେଖିପାରିବେ ଯେ ଆଜି ଓଡ଼ିଶା ତଥା ଦେଶରେ ଓଡ଼ିଶାର ଐତିହ୍ୟ ଓ ପରିଚୟକୁ ସମ୍ମାନ ଦେଉଥିବା ସରକାର ରହିଛି। ଆପଣ ଦେଖିଥିବେ ଯେ ଗତବର୍ଷ ଜି-୨୦ ଶିଖର ସମ୍ମିଳନୀ ହୋଇଥିଲା। ଜି-୨୦ ସମୟରେ ଆମେ ଅନେକ ରାଷ୍ଟ୍ରମୁଖ୍ୟ ଓ କୂଟନୀତିଜ୍ଞଙ୍କ ସହ ସାକ୍ଷାତ କରିଛୁ। ସୂର୍ଯ୍ୟ ମନ୍ଦିରର ଏକ ଭବ୍ୟ ଚିତ୍ର ଉପସ୍ଥାପନ କରାଯାଇଥିଲା। ମହାପ୍ରଭୁ ଜଗନ୍ନାଥଙ୍କ ମନ୍ଦିର ପରିସରର ୪ଟି ଯାକ ଦ୍ୱାର ଖୋଲାଯାଇଥିବାରୁ ମୁଁ ଖୁସି । ମନ୍ଦିରର ରତ୍ନ ଭଣ୍ଡାର ମଧ୍ୟ ଖୋଲାଯାଇଛି।

ବନ୍ଧୁଗଣ,

ଓଡ଼ିଶାର ପ୍ରତ୍ୟେକ ପରିଚୟ ବିଷୟରେ ବିଶ୍ୱକୁ ଜଣାଇବା ପାଇଁ ଆମକୁ ଅଧିକ ଅଭିନବ ପଦକ୍ଷେପ ନେବାକୁ ପଡ଼ିବ। ଯେମିତି...ବାଲିଯାତ୍ରାକୁ ଅଧିକ ଲୋକପ୍ରିୟ କରିବା, ଅନ୍ତର୍ଜାତୀୟ ପ୍ଲାଟଫର୍ମରେ ପ୍ରଚାର ପ୍ରସାର କରିବା ପାଇଁ ଆମେ ବାଲିଯାତ୍ରା ଦିବସ ଘୋଷଣା କରିପାରିବା। ଓଡ଼ିଶୀ ନୃତ୍ୟ ଭଳି କଳା ପାଇଁ ଆମେ ଓଡ଼ିଶୀ ଦିବସ ପାଳନ କରିବା ଆରମ୍ଭ କରିପାରିବା । ବିଭିନ୍ନ ଆଦିବାସୀ ଐତିହ୍ୟକୁ ପାଳନ କରିବା ପାଇଁ ନୂଆ ପରମ୍ପରା ମଧ୍ୟ ଆରମ୍ଭ କରାଯାଇପାରେ । ଏଥିପାଇଁ ସ୍କୁଲ ଓ କଲେଜରେ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଇପାରିବ। ଏହାଦ୍ୱାରା ଲୋକଙ୍କ ମଧ୍ୟରେ ସଚେତନତା ସୃଷ୍ଟି ହେବ, ଏଠାରେ ପର୍ଯ୍ୟଟନ ଓ କ୍ଷୁଦ୍ର ଶିଳ୍ପ ସମ୍ବନ୍ଧୀୟ ସୁଯୋଗ ବୃଦ୍ଧି ପାଇବ। ଏହାର କିଛି ଦିନ ପରେ ଏଥର ସାରା ବିଶ୍ୱର ଲୋକଙ୍କୁ ନେଇ ଭୁବନେଶ୍ୱର ଓ ଓଡ଼ିଶାରେ ପ୍ରବାସୀ ଭାରତୀୟ ସମ୍ମିଳନୀ ଅନୁଷ୍ଠିତ ହେବ। ଓଡ଼ିଶାରେ ପ୍ରଥମ ଥର ପାଇଁ ପ୍ରବାସୀ ଭାରତୀୟ ଦିବସ ପାଳନ କରାଯାଉଛି। ଏହି ସମ୍ମିଳନୀ ମଧ୍ୟ ଓଡ଼ିଶା ପାଇଁ ଏକ ବଡ଼ ସୁଯୋଗ ହେବାକୁ ଯାଉଛି।

ପରିବର୍ତ୍ତିତ ସମୟ ସହିତ ଲୋକମାନେ ନିଜ ମାତୃଭାଷା ଓ ସଂସ୍କୃତିକୁ ମଧ୍ୟ ଭୁଲି ଯାଉଛନ୍ତି। କିନ୍ତୁ ମୁଁ ଦେଖିଛି...ଓଡିଆ ସମାଜ, ଯାହା ବି ହେଉ ନା କାହିଁକି, ଏହାର ସଂସ୍କୃତି ଅଛି, ଏହାର ଭାଷା...ମୁଁ ସବୁବେଳେ ମୋର ପର୍ବପର୍ବାଣୀକୁ ନେଇ ବହୁତ ଉତ୍ସାହିତ ଅଛି | ମାତୃଭାଷା ଓ ସଂସ୍କୃତିର ଶକ୍ତି କିପରି ଆମକୁ ଆମ ମାଟି ସହ ଯୋଡ଼ି ରଖିଥାଏ...ମୁଁ କିଛି ଦିନ ତଳେ ଦକ୍ଷିଣ ଆମେରିକାର ଏକ ଦେଶ ଗୁୟାନାରେ ଏହା ଦେଖିଥିଲି । ପାଖାପାଖି ୨୦୦ ବର୍ଷ ତଳେ ଶହ ଶହ ଶ୍ରମିକ ଭାରତ ଛାଡ଼ି ଚାଲିଯାଇଥିଲେ। କିନ୍ତୁ ସେ ରାମଚରିତମାନସକୁ ସାଙ୍ଗରେ ନେଇଥିଲେ । ସେମାନେ ରାମଙ୍କ ନାମ ନେଇଥିଲେ...ଆଜି ବି ଭାରତ ମାଟି ସହ ତାଙ୍କର ସମ୍ପର୍କ ଯୋଡ଼ି ହୋଇ ରହିଛି। ବିକାଶ ହେଲେ ଆମ ଐତିହ୍ୟକୁ ଏମିତି ରଖିବା...ତେଣୁ ଏହାର ଫାଇଦା ସମସ୍ତଙ୍କ ପାଖରେ ପହଂଚିଥାଏ । ସେହିଭଳି ଆମେ ଓଡ଼ିଶାକୁ ନୂଆ ଉଚ୍ଚତାରେ ପହଞ୍ଚାଇ ପାରିବା।

ସାଥୀଗଣ,

ଆଜିର ଆଧୁନିକ ଯୁଗରେ ଆମକୁ ମଧ୍ୟ ଆଧୁନିକ ପରିବର୍ତ୍ତନକୁ ଗ୍ରହଣ କରିବାକୁ ପଡିବ ଏବଂ ଆମର ମୂଳକୁ ମଧ୍ୟ ସୁଦୃଢ଼ କରିବାକୁ ପଡିବ । ଓଡ଼ିଶା ମହୋତ୍ସବ ଭଳି କାର୍ଯ୍ୟକ୍ରମ ଏଥିପାଇଁ ଏକ ମାଧ୍ୟମ ହୋଇପାରିବ। ମୁଁ ଚାହୁଁଛି ଯେ ଆଗାମୀ ବର୍ଷଗୁଡ଼ିକରେ ଏହି କାର୍ଯ୍ୟକ୍ରମ ଆହୁରି ବିସ୍ତାରିତ ହେଉ ଯେପରି ଏହି ପର୍ବ କେବଳ ଦିଲ୍ଲୀରେ ସୀମିତ ନ ରହିବ । ଏଥିରେ ଯେପରି ଅଧିକରୁ ଅଧିକ ଲୋକ ସାମିଲ ହୁଅନ୍ତି, ସ୍କୁଲ ଓ କଲେଜର ଅଂଶଗ୍ରହଣ ମଧ୍ୟ ବୃଦ୍ଧି ପାଇବ ସେଥିପାଇଁ ପ୍ରୟାସ କରିବା ଦରକାର। ଅନ୍ୟ ରାଜ୍ୟର ଲୋକମାନେ ମଧ୍ୟ ଦିଲ୍ଲୀଆସି ଓଡ଼ିଶାକୁ ଅଧିକ ନିକଟରୁ ଜାଣିବା ଜରୁରୀ। ଆଗାମୀ ଦିନରେ ଏହି ମହୋତ୍ସବର ରଙ୍ଗ ଓଡ଼ିଶା ଓ ଦେଶର କୋଣ ଅନୁକୋଣରେ ପହଞ୍ଚିବ, ଏହା ଜନଭାଗିଦାରୀ ପାଇଁ ଏକ ପ୍ରଭାବଶାଳୀ ମଞ୍ଚରେ ପରିଣତ ହେବ ବୋଲି ମୋର ବିଶ୍ୱାସ ରହିଛି । ଏହି ଭାବନାରେ ମୁଁ ପୁଣି ଥରେ ଆପଣ ସମସ୍ତଙ୍କୁ ଅଭିନନ୍ଦନ ଜଣାଉଛି ।

ଆପଣଙ୍କୁ ବହୁତ ଧନ୍ୟବାଦ ।

ଜୟ ଜଗନ୍ନାଥ !