ରୁଷ ରାଷ୍ଟ୍ରପତି ମିଷ୍ଟର ଭ୍ଲାଦିମିର ପୁତିନଙ୍କ ସହ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଟେଲିଫୋନ ଯୋଗେ ବାର୍ତ୍ତାଳାପ କରିଛନ୍ତି ।
ରୁଷରେ ପରମ୍ପରା ଅନୁଯାୟୀ ଖ୍ରୀଷ୍ଟମାସ ପର୍ବ ପାଳନ କରାଯିବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ରାଷ୍ଟ୍ରପତି ପୁତିନ ଏବଂ ବନ୍ଧୁ ଭାବାପନ୍ନ ରୁଷବାସୀଙ୍କୁ ଶୁଭେଚ୍ଛା ଜଣାଇଥିଲେ । ରାଷ୍ଟ୍ରପତି ପୁତିନ ଏହି ଶୁଭେଚ୍ଛାକୁ ସାଦରେ ଗ୍ରହଣ କରିବା ସହିତ ପ୍ରଧାନମନ୍ତ୍ରୀ ମୋଦୀ ଏବଂ ଭାରତବାସୀଙ୍କ ସମୃଦ୍ଧି, ପ୍ରଗତି, ଶାନ୍ତି ଓ ସୁଖ କାମନା କରିଥିଲେ ।
ଦୁଇ ଦେଶ ମଧ୍ୟରେ ନିକଟ ଅତୀତ, ବିଶେଷକରି 2019ରେ ସ୍ଵତନ୍ତ୍ର ସହଯୋଗୀ ରଣନୈତିକ ଭାଗିଦାରୀରେ ହୋଇଥିବା ଗୁରୁତ୍ଵପୂର୍ଣ୍ଣ ଉପଲବ୍ଧିକୁ ନେଇ ଉଭୟ ନେତା ସନ୍ତୋଷ ପ୍ରକାଶ କରିଥିଲେ । 2020 ବର୍ଷରେ ଭାରତ-ରୁଷ ସଂପର୍କକୁ ସମସ୍ତ କ୍ଷେତ୍ରରେ ଆହୁରି ଅଧିକ ସୁଦୃଢ କରିବା ଲାଗି ମିଳିତ ଭାବେ କାର୍ଯ୍ୟ କରିବା ନିମନ୍ତେ ସେମାନେ ସହମତ ହୋଇଥିଲେ ।
2020 ବର୍ଷ ରୁଷ ପାଇଁ ବିଶେଷ ଗୁରୁତ୍ଵବହନ କରୁଥିବା ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ଏଥିସହିତ ଚଳିତ ବର୍ଷ ମେ’ ମାସରେ ମସ୍କୋଠାରେ ଆୟୋଜିତ ହେବାକୁଥିବା 75ତମ ଭିକ୍ଟରୀ ଡେ ସମାରୋହ ପାଇଁ ରାଷ୍ଟ୍ରପତି ପୁତିନଙ୍କ ନିମନ୍ତ୍ରଣ ଲାଗି କୃତଜ୍ଞତା ବ୍ୟକ୍ତ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, ସେ ଚଳିତ ବର୍ଷ ରୁଷରେ ସାଙ୍ଘାଇ ସହଯୋଗ ସଂଗଠନ ଓ ବ୍ରିକ୍ସ ରାଷ୍ଟ୍ର ବୈଠକରେ ଅଂଶଗ୍ରହଣ କରିବା ଲାଗି ଆଗ୍ରହ ସହ ଅପେକ୍ଷା କରି ରହିଛନ୍ତି । ଏଥିସହିତ ରାଷ୍ଟ୍ରପତି ପୁତିନଙ୍କୁ ଏକବିଂଶତମ ବାର୍ଷିକ ଦ୍ଵିପାକ୍ଷିକ ସମ୍ମିଳନୀ ପାଇଁ ଭାରତରେ ସ୍ଵାଗତ କରିବା ଲାଗି ଉତ୍ସୁକତାର ସହ ଅପେକ୍ଷା କରିଛନ୍ତି ।
ଦୁଇ ନେତା କ୍ଷେତ୍ରୀୟ ଏବଂ ବୈଶ୍ଵିକ ପ୍ରସଙ୍ଗରେ ମତ ବିନିମୟ କରିଥିଲେ । ଏଥିସହିତ ବିଶ୍ଵ ଓ କ୍ଷେତ୍ରୀୟ ଶାନ୍ତି, ନିରପତ୍ତା ଓ ସ୍ଥିରତା ଲାଗି ଭାରତ ଓ ରୁଷର ଦୃଷ୍ଟିକୋଣରେ ଥିବା ସମାନତା ଉପରେ ଆଲୋକପାତ କରିଥିଲେ ।
