ମହାମହିମ ରୁଷ ରାଷ୍ଟ୍ରପତି ଓ ଆଜି ଆମ ସଭାର ଅଧ୍ୟକ୍ଷ,
ମହାମହିମଗଣ, ମୋର ପ୍ରିୟ ବନ୍ଧୁଗଣ,
ସର୍ବପ୍ରଥମେ, ମୁଁ ଏସସିଓର ଦକ୍ଷ ନେତୃତ୍ୱ ଲାଗି ଏବଂ କୋଭିଡ-19 ମହାମାରୀର ଆହ୍ୱାନ ଓ ବାଧା ସତ୍ତ୍ୱେ ଏହି ବୈଠକର ଆୟୋଜନ ଲାଗି ରାଷ୍ଟ୍ରପତି ପୁତିନଙ୍କୁ ଅଭିନନ୍ଦନ ଜ୍ଞାପନ କରିବାକୁ ଚାହୁଁଛି । ମୁଁ ଆନନ୍ଦିତ ଯେ ଆମେ ଏହି କଠିନ ପରିସ୍ଥିତି ସତ୍ତ୍ୱେ ଏସସିଓ ଅନ୍ତର୍ଗତ ସହଯୋଗ ଏବଂ ସମନ୍ୱୟର ଏକ ବ୍ୟାପକ ଓ ପ୍ରଗତିଶୀଳ ଲକ୍ଷ୍ୟକୁ ଆଗକୁ ବଢ଼ାଇପାରିଛୁ ।
ମହାମହିମଗଣ,
ଏସସିଓରେ ଭାରତ ଲାଗି ଏହା ଏକ ଗୁରୁତ୍ୱପୂର୍ଣ୍ଣ ବର୍ଷ । ଆମେ ପ୍ରଥମ ଥର ଲାଗି ଏକ ସମ୍ମିଳନୀସ୍ତରୀୟ ବୈଠକ ଏସସିଓ କାଉନସିଲ ଅଫ ହେଡ୍ସ ଅଫ ଗଭର୍ଣ୍ଣମେଣ୍ଟ ଆୟୋଜନ କରିବାକୁ ଯାଉଛୁ । ଏହି ବୈଠକ ଲାଗି ଏକ ବ୍ୟାପକ ଏଜେଣ୍ଡା ପ୍ରସ୍ତୁତ କରାଯାଇଛି, ଯେଉଁଥିରେ ଆର୍ଥିକ ସହଯୋଗ ପ୍ରସଙ୍ଗ ଉପରେ ବିଶେଷ ଧ୍ୟାନ ଦିଆଯାଇଛି । ଆମେ ଷ୍ଟାର୍ଟଅପ ଇକୋସିଷ୍ଟମରେ ଆମର ସମୃଦ୍ଧ ଅଭିଜ୍ଞତାକୁ ବାଣ୍ଟିବା ଲାଗି ଇନୋଭେସନ ଓ ଷ୍ଟାର୍ଟଅପ ଉପରେ ଏକ ସ୍ୱତନ୍ତ୍ର କାର୍ଯ୍ୟ ଗୋଷ୍ଠୀ ଗଠନ କରିବା ଲାଗି ପ୍ରସ୍ତାବ ରଖିଛୁ । ଆମେ ପାରମ୍ପରିକ ଔଷଧ ଉପରେ କାର୍ଯ୍ୟଗୋଷ୍ଠୀ ଗଠନ ଲାଗି ମଧ୍ୟ ପ୍ରସ୍ତାବ ରଖିଛୁ, ଯାହାଦ୍ୱାରା ଏସସିଓ ଦେଶଗୁଡ଼ିକରେ ପାରମ୍ପରିକ ଓ ପ୍ରାଚୀନ ଚିକିତ୍ସା ଜ୍ଞାନ ଓ ସମକାଳୀନ ଚିକିତ୍ସାରେ ହେଉଥିବା ପ୍ରଗତି ପରସ୍ପରର ଅନୁପୂରକ ହୋଇପାରିବ ।
ମହାମହିମଗଣ,
ଭାରତର ଦୃଢ଼ ବିଶ୍ୱାସ ରହିଛି ଯେ ଅର୍ଥନୈତିକ ବହୁପକ୍ଷବାଦ ଏବଂ ଜାତୀୟ ସାମର୍ଥ୍ୟ ବିକାଶର ସମ୍ମିଶ୍ରଣ ଫଳରେ ଏସସିଓ ଦେଶଗୁଡ଼ିକ ମହାମାରୀ କାରଣରୁ ହୋଇଥିବା ଆର୍ଥôକ କ୍ଷତିର ସଂକଟରୁ ମୁକୁଳିପାରିବେ । ଆମେ ମହାମାରୀ ପରବର୍ତ୍ତୀ ବିଶ୍ୱରେ “ଆତ୍ମନିର୍ଭର ଭାରତ”ର ଦୃଷ୍ଟିକୋଣ ସହିତ ଆଗକୁ ବଢ଼ୁଅଛୁ । ମୋର ବିଶ୍ୱାସ ରହିଛି ଯେ “ଆତ୍ମନିର୍ଭର ଭାରତ” ବୈଶ୍ୱିକ ଅର୍ଥବ୍ୟବସ୍ଥା ଲାଗି ଏକ ‘ତ୍ୱରାନ୍ୱିତକାରୀ ଶକ୍ତି’ ସାବ୍ୟସ୍ତ ହେବ ଏବଂ ଏସସିଓ କ୍ଷେତ୍ରର ଆର୍ଥିକ ପ୍ରଗତିକୁ ଗତି ପ୍ରଦାନ କରିବ ।
ମହାମହିମଗଣ,
ଏସସିଓ କ୍ଷେତ୍ର ସହ ଭାରତର ଘନିଷ୍ଠ ସାଂସ୍କୃତିକ ଓ ଐତିହାସିକ ସମ୍ପର୍କ ରହିଛି । ଆମର ପୂର୍ବପୁରୁଷମାନେ ଏହି ସହଭାଗୀ ଐତିହାସିକ ଓ ସାଂସ୍କୃତିକ ଐତିହ୍ୟକୁ ନିଜର ଆପ୍ରାଣ ଓ ନିରନ୍ତର ସମ୍ପର୍କ ଜରିଆରେ ଜୀବନ୍ତ ରଖିଛନ୍ତି । ଅନ୍ତର୍ଜାତୀୟ ଉତ୍ତର ଦକ୍ଷିଣ ପରିବହନ କରିଡର, ଚାବହାର ବନ୍ଦର, ଅଶଗାବାତ ବୁଝାମଣା, ଭଳି ପଦକ୍ଷେପ ଯୋଗାଯୋଗ ପ୍ରତି ଭାରତର ଦୃଢ଼ ସଂକଳ୍ପକୁ ଦର୍ଶାଉଛି । ଭାରତ ବିଶ୍ୱାସ କରିଥାଏ ଯେ ଯୋଗାଯୋଗକୁ ଆହୁରି ଅଧିକ ସୁଦୃଢ଼ କରିବା ଲାଗି ପାରସ୍ପରିକ ସାର୍ବଭୌମତ୍ୱ ଓ କ୍ଷେତ୍ରୀୟ ଅଖଣ୍ଡତାକୁ ସମ୍ମାନ ଜଣାଇବାର ମୂଳ ସିଦ୍ଧାନ୍ତ ସହିତ ଆଗକୁ ବଢ଼ିବାର ଆବଶ୍ୟକତା ରହିଛି ।
ମହାମହିମଗଣ,
ମିଳିତ ଜାତିସଂଘ ନିଜର 75 ବର୍ଷ ପୂରଣ କରିଛି । କିନ୍ତୁ ଅନେକ ସଫଳତା ପରେ ମଧ୍ୟ ମିଳିତ ଜାତିସଂଘର ମୂଳ ଉଦ୍ଦେଶ୍ୟ ଏବେ ସୁଦ୍ଧା ଅଧୁରା ରହିଛି । ମହାମାରୀର ଆର୍ଥିକ ଓ ସାମାଜିକ ପୀଡ଼ା ସହ ସଂଘର୍ଷ କରୁଥିବା ବିଶ୍ୱ ଆଶା କରୁଛି ଯେ ମିଳିତ ଜାତିସଂଘର ବ୍ୟବସ୍ଥାରେ ଆମୂଳଚୁଳ ପରିବର୍ତ୍ତନ ଆସୁ ।
ଆମ ଏଠାରେ ଶାସ୍ତ୍ରରେ କୁହାଯାଇଛି “ପରିବର୍ତ୍ତନମେବ ସ୍ଥିରମସ୍ତି”-ପରିବର୍ତ୍ତନ ହିଁ ଏକମାତ୍ର ସ୍ଥିରତା। ଭାରତ, 2021 ଠାରୁ ମିଳିତ ଜାତିସଂଘ ସୁରକ୍ଷା ପରିଷଦରେ ଏକ ଅଣ-ସ୍ଥାୟୀ ସଦସ୍ୟ ଭାବେ ସାମିଲ ହେବ । ଆମର ଧ୍ୟାନ ବୈଶ୍ୱିକ ଶାସନ-ବ୍ୟବସ୍ଥାରେ ସମ୍ଭାବ୍ୟ ପରିବର୍ତ୍ତନ ଉପରେ କେନ୍ଦ୍ରିତ ରହିବ ।
ଆଜିର ବୈଶ୍ୱିକ ବାସ୍ତବିକତାକୁ ଦର୍ଶାଉଥିବା ଏକ “ସଂସ୍କାରିତ ବହୁପକ୍ଷବାଦ”, ଅଂଶୀଦାରମାନଙ୍କର ଆଶାଆକାଂକ୍ଷା, ସମକାଳୀନ ଆହ୍ୱାନ ଏବଂ ମାନବ କଲ୍ୟାଣ ଭଳି ବିଷୟ ଉପରେ ଆଧାରିତ ପ୍ରସଙ୍ଗ ଉପରେ ଚର୍ଚ୍ଚା ହେବା ଆବଶ୍ୟକ । ଏହି ପ୍ରୟାସରେ ଆମକୁ ଏସସିଓ ସଦସ୍ୟ ରାଷ୍ଟ୍ରଗୁଡ଼ିକର ସମ୍ପୂର୍ଣ୍ଣ ସମର୍ଥନ ମିଳିବ ବୋଲି ଆଶା କରାଯାଉଛି ।
ମହାମହିମଗଣ,
ସର୍ବେ ଭବନ୍ତୁ ସୁଖିନଃ, ସର୍ବେ ସନ୍ତୁ ନିରାମୟାଃ ।
ସମସ୍ତେ ସୁଖୀ ଏବଂ ସମସ୍ତେ ରୋଗମୁକ୍ତ ରୁହନ୍ତୁ । ଏହି ଶାନ୍ତି ମନ୍ତ୍ର ସମଗ୍ର ମାନବଜାତିର କଲ୍ୟାଣ ଲାଗି ଭାରତର ଆସ୍ଥାର ପ୍ରତୀକ ଅଟେ । ଅଭୂତପୂର୍ବ ମହାମାରୀର ଏହି ଅତ୍ୟନ୍ତ କଠିନ ସମୟରେ ଭାରତର ଫାର୍ମା ଉଦ୍ୟୋଗ 150ରୁ ଅଧିକ ଦେଶକୁ ଜରୁରି ଔଷଧ ପଠାଇଛି । ବିଶ୍ୱର ସବୁଠୁ ବଡ଼ ଟୀକା ଉତ୍ପାଦକ ଦେଶ ଭାବେ ଭାରତ ନିଜର ଟୀକା ଉତ୍ପାଦନ ଓ ବିତରଣ କ୍ଷମତାର ଉପଯୋଗ କରି ଏହି ସଙ୍କଟର ମୁକାବିଲା କରିବା ଲାଗି ସମ୍ପୂର୍ଣ୍ଣ ମାନବଜାତିକୁ ସହାୟତା କରିବ ।
ମହାମହିମଗଣ,
ଭାରତର ଶାନ୍ତି, ସୁରକ୍ଷା ଓ ସମୃଦ୍ଧି ଉପରେ ଦୃଢ଼ ବିଶ୍ୱାସ ରହିଛି । ଆମେ ସବୁବେଳେ ଆତଙ୍କବାଦ, ଅବୈଧ ଅସ୍ତ୍ରଶସ୍ତ୍ର କାରବାର, ଡ୍ରଗ୍ସ ଏବଂ ବେଆଇନ ଅର୍ଥକାରବାର ବିରୋଧରେ ସ୍ୱର ଉତ୍ତୋଳନ କରିଛୁ । ଏସସିଓ ଚାର୍ଟରରେ ନିର୍ଦ୍ଧାରିତ ସିଦ୍ଧାନ୍ତ ଅନୁଯାୟୀ ଏସସିଓ ଅଧୀନରେ କାମ କରିବା ଲାଗି ନିଜର ପ୍ରତିବଦ୍ଧତା ପ୍ରତି ଭାରତ ଦୃଢ଼ ରହିଛି । କିନ୍ତୁ ଦୁଃଖର ବିଷୟ ହେଉଛି ଏସସିଓ ଏଜେଣ୍ଡାରେ ବାରମ୍ବାର ଅନାବଶ୍ୟକ ଭାବେ ଦ୍ୱିପାକ୍ଷିକ ସମ୍ପର୍କକୁ ଆଣିବା ଲାଗି ପ୍ରୟାସ କରାଯାଉଛି, ଯାହାକି ଏସସିଓ ଚାର୍ଟର ଓ ଶାଙ୍ଘାଇ ଭାବନାର ଉଲ୍ଲଙ୍ଘନ କରୁଛି । ଏପରି ପ୍ରୟାସ ଏସସିଓକୁ ପରିଭାଷିତ କରୁଥିବା ସର୍ବସମ୍ମତି ଓ ସହଯୋଗ ଭାବନାର ବିପରୀତ ଅଟେ ।
ମହାମହିମଗଣ,
ମୁଁ 2021 ବର୍ଷରେ ଏସସିଓର ବିଂଶତମ ବର୍ଷ ପୂର୍ତ୍ତି ଅବସରରେ “ଏସସିଓ ସଂସ୍କୃତି ବର୍ଷ” ପାଳନକୁ ସମ୍ପୂର୍ଣ୍ଣ ସମର୍ଥନ କରୁଛି । ଭାରତର ରାଷ୍ଟ୍ରୀୟ ସଂଗ୍ରହାଳୟ ଚଳିତ ବର୍ଷ ଆମର ସହଭାଗୀ ବୌଦ୍ଧିକ ଐତିହ୍ୟ ଉପରେ ପ୍ରଥମ ଥର ଏସସିଓ ପ୍ରଦର୍ଶନୀ ଆୟୋଜନ କରିବାର ପ୍ରକ୍ରିୟାରେ ରହିଛି। ଭାରତର ସାହିତ୍ୟ ଏକାଡେମୀ ରୁଷ ଓ ଚୀନ ଭାଷାରେ ଦଶଟି ଭାରତୀୟ ସାହିତ୍ୟିକ କୃତିର ଅନୁବାଦ କାମ ପୂରଣ କରିଛି ।
ମୋର ବିଶ୍ୱାସ ରହିଛି ଯେ ଆସନ୍ତା ବର୍ଷ ଭାରତ ମହାମାରୀ-ମୁକ୍ତ ବାତାବରଣରେ ଏସସିଓ ଫୁଡ ଫେଷ୍ଟିଭାଲର ଆୟୋଜନ କରିବ। ସମସ୍ତ ଏସସିଓ ଦେଶର ଅଧିକାରୀ ଓ କୂଟନୀତିଜ୍ଞମାନେ ନିକଟରେ ବେଜିଂରେ ଏସସିଓ ସଚିବାଳୟର ସହଯୋଗରେ ଆୟୋଜିତ ଯୋଗ କାର୍ଯ୍ୟକ୍ରମରେ ଉତ୍ସାହର ସହିତ ଅଂଶଗ୍ରହଣ କରିବା ଆନନ୍ଦର କଥା।
ମହାମହିମଗଣ,
ମୁଁ ପୁଣିଥରେ ରାଷ୍ଟ୍ରପତି ପୁତିନଙ୍କୁ ତାଙ୍କର ଦକ୍ଷ ଓ ସଫଳ ନେତୃତ୍ୱ ପାଇଁ ଅଭିନନ୍ଦନ ଜଣାଉଛି। ଏହି ବୈଠକ ପାଇଁ ତାଙ୍କୁ ଧନ୍ୟବାଦ ଜଣାଉଛି। ମୁଁ ରାଷ୍ଟ୍ରପତି ଇମୋମଲି ରହମୋନଙ୍କୁ ଆସନ୍ତାବର୍ଷ ଏସସିଓର ଅଧ୍ୟକ୍ଷତା କରିବା ଲାଗି ଅଭିନନ୍ଦନ ଓ ଶୁଭକାମନା ଦେବାକୁ ଚାହୁଁଛି।
ଆହୁରି ତାଜିକିସ୍ତାନର ସଫଳ ଅଧ୍ୟକ୍ଷତା ଲାଗି ଭାରତର ପୂର୍ଣ୍ଣ ସହଯୋଗ ପାଇଁ ଆଶ୍ୱାସନା ମଧ୍ୟ ଦେଉଛି ।
ବହୁତ ବହୁତ ଧନ୍ୟବାଦ !!!
