ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀଠାରେ ଜର୍ମାନ ଚାନ୍ସେଲର ଡ. ଆଞ୍ଜେଲା ମର୍କେଲଙ୍କ ସହିତ ଗାନ୍ଧୀ ସ୍ମୃତି ପରିର୍ଶନ କରିଥିଲେ ।
ବିଶିଷ୍ଟ ଶିଳ୍ପୀ ପଦ୍ମଭୂଷଣ ଶ୍ରୀ ରାମ ସୂତାରଙ୍କ ଦ୍ୱାରା ନିର୍ମିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ସମ୍ମୁଖରେ ଜର୍ମାନ ଚାନ୍ସେଲରଙ୍କୁ ପ୍ରଧାନମନ୍ତ୍ରୀ ସ୍ୱାଗତ କରିଥିଲେ ।
ଗାନ୍ଧୀ ସ୍ମୃତିର ଗୁରୁତ୍ୱ ବିଷୟରେ ଡ. ମର୍କେଲଙ୍କୁ ସୂଚନା ଦେଇ ପ୍ରଧାନମନ୍ତ୍ରୀ କହିଥିଲେ ଯେ ମହାତ୍ମା ଗାନ୍ଧୀ ଜାନୁଆରୀ 30, 1948ରେ ହତ୍ୟାର ଶିକାର ହେବା ପର୍ଯ୍ୟନ୍ତ ତାଙ୍କ ଜୀବନର ଶେଷ ସମୟ ଏହି ସ୍ଥାନରେ ଅତିବାହିତ କରିଥିଲେ ।
ଏହାପରେ ଦୁଇ ନେତା ସଂଗ୍ରହାଳୟ ପରିଦର୍ଶନ କରିଥିଲେ ଏବଂ ବିଶିଷ୍ଟ ଶିଳ୍ପୀ ଶ୍ରୀ ଉପେନ୍ଦ୍ର ମହାରଥୀ ଓ ଶାନ୍ତି ନିକେତନସ୍ଥିତ ଶ୍ରୀ ନନ୍ଦଲାଲ ବୋଷଙ୍କ ଜଣେ ଛାତ୍ର ଇଣ୍ଡୋ-ହଙ୍ଗେରୀୟ ଚିତ୍ରକର ଏଲିଜାବେଥ ବ୍ରନରଙ୍କ ଦ୍ୱାରା ପ୍ରସ୍ତୁତ ଚିତ୍ରଗୁଡ଼ିକୁ ବୁଲି ଦେଖିଥିଲେ । ଶ୍ରୀ ବିରାଦ ରାଜାରାମ ୟାଜ୍ଞିକଙ୍କ ଦ୍ୱାରା ପ୍ରସ୍ତୁତ ଅହିଂସା ଓ ସତ୍ୟାଗ୍ରହର ଦ୍ୱୈତ ବିଷୟବସ୍ତୁ ଉପରେ ଆଧାରିତ ଡିଜିଟାଲ ଗ୍ୟାଲେରୀ ମଧ୍ୟ ସେମାନେ ପରିଦର୍ଶନ କରିଥିଲେ ।
ଏହାପରେ ଦୁଇ ନେତା ସଂଗ୍ରହାଳୟର ବିଭିନ୍ନ ଡିଜିଟାଲ ପ୍ରସ୍ତୁତିକୁ ବୁଲି ଦେଖିଥିଲେ । ଏଥିରେ ମହାତ୍ମା ଗାନ୍ଧୀଙ୍କ ଉଦ୍ଦେଶ୍ୟରେ ଆଲବର୍ଟ ଆଇନଷ୍ଟାଇନଙ୍କ ବାର୍ତ୍ତାର ଅଡିଓ ଏବଂ 107ଟି ଦେଶର ଗାୟକଙ୍କ ଦ୍ୱାରା ଗାନ କରାଯାଇଥିବା ‘ବୈଷ୍ଣବ ଜନ ତୋ’ ଭଜନ ମଧ୍ୟ ପ୍ରଦର୍ଶିତ ହୋଇଥିଲା ।
ସହିଦ ସ୍ତମ୍ଭଠାରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ଜର୍ମାନ ଚାନ୍ସେଲର ଡ. ଆଞ୍ଜେଲା ମର୍କେଲ ମହାତ୍ମା ଗାନ୍ଧୀଙ୍କୁ ପୁଷ୍ପମାଲ୍ୟ ଅର୍ପଣ ପୂର୍ବକ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
