"ଆଗ୍ରା ସହରକୁ ଉତ୍ତମ ଓ ନିଶ୍ଚିତ ଜଳ ଯୋଗାଣ ପାଇଁ ଗଙ୍ଗାଜଳ ପ୍ରକଳ୍ପର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ "
ପ୍ରଧାନମନ୍ତ୍ରୀ ଆଗ୍ରାରେ ଏକ ଜନ ସମାଗମକୁ ସମ୍ବୋଧିତ କରିବେପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଜାନୁୟାରୀ 09, 2019ରେ ଉତ୍ତର ପ୍ରଦେଶର ଆଗ୍ରା ଗସ୍ତ କରିବେ । ସେଠାରେ ସେ ଗଙ୍ଗାଜଳ ଏବଂ ବିଭିନ୍ନ ଉନ୍ନୟନ ପ୍ରକଳ୍ପର ଶୁଭାରମ୍ଭ କରିବେ । ଆଗ୍ରା ସ୍ମାର୍ଟ ସିଟି ପାଇଁ ସମନ୍ଵିତ ନିର୍ଦ୍ଦେଶ ଓ ନିୟନ୍ତ୍ରଣ କେନ୍ଦ୍ର ସହିତ ଏସ.ଏନ ମେଡିକାଲ କଲେଜର ଉନ୍ନତିକାରଣ ପ୍ରକଳ୍ପର ସେ ଆଧାରଶିଳା ରଖିବେ ।
ଗଙ୍ଗାଜଳ ପ୍ରକଳ୍ପ 2,880 କୋଟି ଟଙ୍କା ବ୍ୟୟରେ ନିର୍ମିତ ହୋଇଛି । ଏହା ଆଗ୍ରା ସହରକୁ ଉତ୍ତମ ଓ ନିଶ୍ଚିତ ଜଳ ଯୋଗାଣ କରିବ । ଏହି ପ୍ରକଳ୍ପ ସହରବାସୀ ତଥା ପର୍ଯ୍ୟଟକଙ୍କ ପାଇଁ ଲାଭଦାୟକ ହେବ ।
ଆଗ୍ରା ଏସ.ଏନ ମେଡିକାଲ କଲେଜର ଉନ୍ନତିକାରଣ ଦିଗରେ 200 କୋଟି ଟଙ୍କା ବ୍ୟୟ ହେବ, ଯେଉଁଥିରେ କି ମହିଳା ଓ ମାତୃତ୍ଵକାଳୀନ ଚିକିତ୍ସା ପାଇଁ 100 ଶଯ୍ୟା ବିଶିଷ୍ଟ ବ୍ୟବସ୍ଥା ଅନ୍ତର୍ଭୁକ୍ତ । ସମାଜର ଗରିବ ଶ୍ରେଣୀର ଲୋକଙ୍କୁ ଉତ୍ତମ ସ୍ୱାସ୍ଥ୍ୟ ଓ ମାତୃତ୍ଵ ଯତ୍ନରେ ଏହା ସହାୟକ ହେବ । ଆଗ୍ରା ସ୍ମାର୍ଟ ସିଟି ପାଇଁ ସମନ୍ଵିତ ନିର୍ଦ୍ଦେଶ ଓ ନିୟନ୍ତ୍ରଣ କେନ୍ଦ୍ର 285 କୋଟି ଟଙ୍କାରେ ନିର୍ମିତ କରାଯିବ । ଏହା ଆଗ୍ରା ସହରକୁ ବିଶ୍ଵସ୍ତରୀୟ ଆଧୁନିକ ସ୍ମାର୍ଟ ସିଟିରେ ପରିଣତ କରିବା ସହିତ ଉପଯୁକ୍ତ ମୂଲ୍ୟର ପର୍ଯ୍ୟଟକସ୍ଥଳୀ ରୂପେ ପରିଗଣିତ ହେବାରେ ସହାୟକ ହେବ ।
ଏହି ଅବସରରେ ପ୍ରଧାନମନ୍ତ୍ରୀ ଆଗ୍ରାର କୋଠି ମୀନା ବଜାରଠାରେ ସମବେତ ଜନତାଙ୍କୁ ସମ୍ବୋଧନ କରିବାର କାର୍ଯ୍ୟକ୍ରମ ରହିଛି ।
ଆଗ୍ରା ସହରକୁ ପ୍ରଧାନମନ୍ତ୍ରୀଙ୍କ ଏହା ଦ୍ଵିତୀୟ ଗସ୍ତ । ନଭେମ୍ବର 20, 2016ରେ ତାଙ୍କ ପୂର୍ବ ଗସ୍ତ ସମୟରେ ସେ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ)ର ଶୁଭାରମ୍ଭ କରିଥିଲେ । ଏହି ଯୋଜନା ଅଧୀନରେ ଆଜି ତାରିଖ ସୁଦ୍ଧା ଉତ୍ତର ପ୍ରଦେଶରେ 65 ଲକ୍ଷ ଘର ନିର୍ମାଣ କରାଯାଇଛି । ସେ ଆଗ୍ରା ଅଞ୍ଚଳ ଲାଗି ରେଳ ଭିତ୍ତିଭୂମି ଏବଂ ସେବାର ଶୁଭାରମ୍ଭ କରିଥିଲେ ।
