ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ସକାଳେ ବାରଣାସୀଠାରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକରୋଂଙ୍କୁ ସ୍ଵାଗତ କରିବେ ।
ଉଭୟ ନେତା ଏହାପରେ ମିର୍ଜାପୁର ଅଭିମୁଖେ ଯାତ୍ରା କରିବେ । ବାରଣାସୀ ଫେରିବା ପୂର୍ବରୁ ସେଠାରେ ସେମାନେ ଏକ ସୌରଶକ୍ତି କେନ୍ଦ୍ର ଉଦ୍ଘାଟନ କରିବେ ।
ବାରଣାସୀଠାରେ ଉଭୟ ନେତା ଦୀନ ଦୟାଲ ହସ୍ତକଳା ସଙ୍କୁଳ ପରିଦର୍ଶନ କରିବେ । ସେଠାରେ ସେମାନେ ଶିଳ୍ପୀମାନଙ୍କ ସହ ମତ ବିନିମୟ କରିବେ ଏବଂ ସେମାନଙ୍କ କଳାକୃତି ଦେଖିବେ ।
ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ମାକରୋଂ ଏହାପରେ ବାରଣାସୀର ପ୍ରସିଦ୍ଧ ଅଶୀ ଘାଟ ଯିବେ । ସେଠାରୁ ସେମାନେ ଏକ ନୌକା ଯୋଗେ ଗଙ୍ଗାବିହାର କରି ଐତିହାସିକ ଦଶାଶ୍ଵମେଧ ଘାଟଠାରେ ପହଞ୍ଚିବେ ।
ପ୍ରଧାନମନ୍ତ୍ରୀ ମୋଦୀ ଏହାପରେ ଫ୍ରାନ୍ସ ରାଷ୍ଟ୍ରପତିଙ୍କ ସମ୍ମାନାର୍ଥେ ଏକ ଭୋଜି ସଭାର ଆୟୋଜନ କରିବାର କାର୍ଯ୍ୟକ୍ରମ ରହିଛି ।
ଅପରାହ୍ନରେ ବାରଣାସୀର ମଦୁଆଦିହ ରେଳଷ୍ଟେସନଠାରୁ ପାଟନା ପର୍ଯ୍ୟନ୍ତ ଯାତ୍ରା କରିବାକୁ ଥିବା ଏକ ଟ୍ରେନର ଶୁଭାରମ୍ଭ କରିବେ । ଏହାପରେ ସେ କେତେକ ବିକାଶମୂଳକ ପ୍ରକଳ୍ପର ଶୁଭାରମ୍ଭ କରିବା ସହ ବାରଣାସୀର ଡିଏଲଡବ୍ଲ୍ୟୁ ମଇଦାନଠାରେ ଏକ ଜନସଭାକୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି ।
