ଆସନ୍ତାକାଲି ଗାନ୍ଧୀ ଜୟନ୍ତୀ ସମାରୋହରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରମୁଖ କାର୍ଯ୍ୟକ୍ରମ ଭିତରେ ପରିମଳ ଏବଂ ଅକ୍ଷୟଶକ୍ତି ସଂକ୍ରାନ୍ତ କାର୍ଯ୍ୟକ୍ରମ ସ୍ଥାନ ପାଇବ ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଅକ୍ଟୋବର 2 ତାରିଖ, 2018ରେ ରାଜଘାଟଠାରେ ମହାତ୍ମା ଗାନ୍ଧୀଙ୍କ ସମାଧିସ୍ଥଳରେ ଶ୍ରଦ୍ଧାଞ୍ଜଳି ଅର୍ପଣ କରିବେ- ଏହି ଦିବସଠାରୁ ମହାତ୍ମା ଗାନ୍ଧୀଙ୍କ ଜୟନ୍ତୀର 150ତମ ବର୍ଷ ପୂର୍ତ୍ତି କାର୍ଯ୍ୟକ୍ରମର ଶୁଭାରମ୍ଭ ହେବ । ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୂର ଶାସ୍ତ୍ରୀଙ୍କୁ ତାଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଅର୍ପଣ କରିବା ଲାଗି ପ୍ରଧାନମନ୍ତ୍ରୀ ମଧ୍ୟ ବିଜୟଘାଟ ଗସ୍ତ କରିବେ ।
ରାଷ୍ଟ୍ରପତି ଭବନ ସାଂସ୍କୃତିକ କେନ୍ଦ୍ରଠାରେ ମହାତ୍ମା ଗାନ୍ଧୀ ଅନ୍ତର୍ଜାତୀୟ ପରିମଳ ସମ୍ମେଳନ (ଏମଜିଆଇଏସସି)ର ଉଦଯାପନୀ ସମାରୋହରେ ସେ ଯୋଗ ଦେବେ । ଚାରି ଦିନ ଧରି ଚାଲିଥିବା ଏମଜିଆଇଏସସି କାର୍ଯ୍ୟକ୍ରମ ଏକ ଅନ୍ତର୍ଜାତୀୟ ସମ୍ମେଳନ ହୋଇଥିବା ବେଳେ ସାରା ବିଶ୍ୱରୁ ଏଥିରେ ୱାଶ (ଜଳ, ପରିମଳ ଏବଂ ସ୍ୱଚ୍ଛତା) ମନ୍ତ୍ରୀ ଏବଂ ନେତାମାନେ ଯୋଗ ଦେଇଛନ୍ତି । ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଏକ ଛୋଟ ଡିଜିଟାଲ ପ୍ରଦର୍ଶନୀ ପରିଦର୍ଶନ କରିବେ । ତାଙ୍କ ସହିତ ମିଳିତ ଜାତିଂସଘର ମହାସଚିବ ମିଃ ଆଣ୍ଟୋନୀଓ ଗୁଟ୍ଟେର୍ସ ଯୋଗ ଦେବେ । ମଂଚରୁ ବିଶିଷ୍ଟ ଅତିଥିମାନେ ମହାତ୍ମା ଗାନ୍ଧୀଙ୍କ ଉପରେ ଏକ ସ୍ମାରକୀ ଡାକ ଟିକେଟ ଉନ୍ମୋଚନ କରିବେ ଏବଂ ମହାତ୍ମା ଗାନ୍ଧୀଙ୍କ ପ୍ରିୟ ଭଜନ “ବୈଷ୍ଣବ ଜନ” ଉପରେ ଏକ ସିଡି ଉନ୍ମୋଚନ କରିବେ । ସ୍ୱଚ୍ଛ ଭାରତ ପୁରସ୍କାର ଏହି ଅବସରରେ ପ୍ରଦାନ କରାଯିବ । ପ୍ରଧାନମନ୍ତ୍ରୀ ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରିବେ ।
ଦିବସର ପରବର୍ତ୍ତୀ ପର୍ଯ୍ୟାୟରେ ପ୍ରଧାନମନ୍ତ୍ରୀ ବିଜ୍ଞାନ ଭବନଠାରେ ଅନ୍ତର୍ଜାତୀୟ ସୌର ସଂଗଠନର ପ୍ରଥମ ଅଧିବେଶନକୁ ଉଦଘାଟନ କରିବେ । ଏହି କାର୍ଯ୍ୟକ୍ରମରେ ସେ ମଧ୍ୟ ଦ୍ୱିତୀୟ ଆଇଓଆରଏ ଅକ୍ଷୟଶକ୍ତି ମନ୍ତ୍ରୀସ୍ତରୀୟ ବୈଠକ ଏବଂ ଦ୍ୱିତୀୟ ବିଶ୍ୱ ଆରଇ-ନିବେଶ (ଅକ୍ଷୟଶକ୍ତି ନିବେଶ ବୈଠକ ଏବଂ ପ୍ରଦର୍ଶନୀ) ର ଉଦଘାଟନ କରିବେ । ଏହି କାର୍ଯ୍ୟକ୍ରମରେ ମିଳିତ ଜାତିସଂଘର ମହାସଚିବ ମିଃ ଆଣ୍ଟୋନୀଓ ଗୁଟ୍ଟେର୍ସ ମଧ୍ୟ ଉପସ୍ଥିତ ରହିବେ ଏବଂ ପ୍ରଧାନମନ୍ତ୍ରୀ ଉଦବୋଧନ ଦେବେ ।
