ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଗୌହାଟୀଠାରେ ଏଡଭାଣ୍ଟେଜ ଆସାମ – ଗ୍ଲୋବାଲ ଇନଭେଷ୍ଟର ଶିଖର ସମ୍ମିଳନୀ 2018ର ଉଦ୍ଘାଟନୀ ଅଧିବେଶନକୁ ସମ୍ବୋଧିତ କରିବେ ।
ଆସାମ ସରକାରଙ୍କ ପକ୍ଷରୁ ଏହି ଦୁଇଦିନିଆ ସମ୍ମିଳନୀ ଆୟୋଜନ କରାଯାଉଛି । ପୂର୍ବରୁ ଏଭଳି ବୃହତ ଆକାରର ପୁଞ୍ଜିନିବେଶକାରୀ ସମ୍ମିଳନୀ ଆୟୋଜିତ ହୋଇ ନଥିଲା । ଆସାମରେ ପୁଞ୍ଜିନିବେଶକାରୀମାନଙ୍କୁ ଉପଲବ୍ଧ ହେଉଥିବା ରଣନୀତିକ ସୁବିଧାଗୁଡିକୁ ବ୍ୟାପକ ରୂପେ ପ୍ରଦର୍ଶିତ କରିବା ହେଲା ଏହି ସମ୍ମିଳନୀର ଲକ୍ଷ୍ୟ । ରାଜ୍ୟର ବିନିର୍ମାଣ ଭିତ୍ତିଭୂମି ସୁବିଧା ଏବଂ ଏହି ଉଦ୍ୟୋଗ ପାଇଁ ରହିଥିବା ସୁଯୋଗଗୁଡିକୁ ପ୍ରସ୍ତାବିତ ସମ୍ମିଳନୀ ଜରିଆରେ ପରିବ୍ୟାପ୍ତ କରାଯିବ । ଦକ୍ଷିଣ ଓ ଦକ୍ଷିଣ-ପୂର୍ବ ଏସିଆର କ୍ରମବର୍ଦ୍ଧିଷ୍ଣୁ ଅର୍ଥବ୍ୟବସ୍ଥାଗୁଡିକୁ ରପ୍ତାନିଭିତ୍ତିକ ସେବା ଓ ବିନିର୍ମାଣ ସୁଯୋଗ ପ୍ରଦାନ ଲାଗି ଆସାମରେ ଯେଉଁ ରଣନୀତିକ ସୁବିଧା ରହିଛି, ତାକୁ ପୁଞ୍ଜି ବିନିଯୋଗକାରୀମାନଙ୍କ ସମ୍ମୁଖରେ ଉପସ୍ଥାପନ କରାଯିବ ।
ବିଶେଷକରି ଶକ୍ତି ଉତ୍ପାଦନ, କୃଷି ଓ ଖାଦ୍ୟ ପ୍ରକ୍ରିୟାକରଣ, ଆଇଟି ଓ ଆଇଟି ଆଧାରିତ ସେବା, ନଦୀ ବାରିବାହନ ଓ ବନ୍ଦରଭିତ୍ତିକ ସହରାଞ୍ଚଳ, ପ୍ଲାଷ୍ଟିକ ଓ ପେଟ୍ରୋକେମିକାଲ, ଫାର୍ମାସିଉଟିକାଲ ଓ ମେଡିକାଲ ସରଞ୍ଜାମ, ହସ୍ତତନ୍ତ, ବୟନ ଓ ହସ୍ତଶିଳ୍ପ, ପର୍ଯ୍ୟଟନ, ଆତିଥ୍ୟ ଓ ଚିକିତ୍ସା ସୁବିଧା, ବେସାମରିକ ବିମାନ ଚଳାଚଳ ଓ ପେଟ୍ରୋଲିୟମ ତଥା ପ୍ରାକୃତିକ ବାଷ୍ପ ଭଳି କ୍ଷେତ୍ରଗୁଡ଼ିକରେ ବ୍ୟାପକ ପୁଞ୍ଜି ନିବେଶର ସୁଯୋଗ ରହିଛି । ଏସବୁକୁ ପୁଞ୍ଜି ବିନିଯୋଗକାରୀଙ୍କ ସମ୍ମୁଖରେ ସକାରାତ୍ମକ ଭାବେ ଉପସ୍ଥାପିତ କରାଯିବ ।
