ବାର୍ଷିକ ଶିଖର ସମ୍ମିଳନୀ ପାଇଁ ନଭେମ୍ବର ୧୦ରୁ ୧୨ତାରିଖ ପର୍ଯ୍ୟନ୍ତ ମୁଁ ଜାପାନ ଗସ୍ତରେ ଯିବି । ପ୍ରଧାନମନ୍ତ୍ରୀ ଭାବେ ଜାପାନକୁ ଏହା ମୋ’ର ଦ୍ୱିତୀୟ ଗସ୍ତ ।
ଜାପାନ ସହ ଆମର ଭାଗିଦାରୀ ଏକ ସ୍ୱତନ୍ତ୍ର ରଣନୀତି ଓ ଆନ୍ତର୍ଜାତିକ ସହଭାଗିତା ଭାବେ ବିଶେଷତ୍ୱ ବହନ କରେ । ବୌଦ୍ଧ ଐତିହ୍ୟ, ଗଣତାନ୍ତ୍ରିକ ମୂଲ୍ୟବୋଧ ସହ ଉନ୍ମୁକ୍ତ,ସାମଗ୍ରିକ ଓ ନୀତି-ଆଧାରିତ ବିଶ୍ୱ ପାଇଁ ପ୍ରତିବଦ୍ଧତା ନିମନ୍ତେ ଭାରତ ଓ ଜାପାନ ପରସ୍ପରକୁ ଗୋଟିଏ ନଜରରେ ଦେଖିଥାନ୍ତି ।
ଏବେ, ଭାରତରେ ଶୀର୍ଷ ପୁଞ୍ଜି ନିବେଶକଙ୍କ ମଧ୍ୟରୁ ଜାପାନ ଏକ । କିନ୍ତୁ ବହୁ ଜାପାନୀ କମ୍ପାନୀ ଯାହାକି ଭାରତରେ ଘରେ ଘରେ ପରିଚିତ, ସେସବୁ ଅନେକ ଦଶନ୍ଧି ଧରି ଭାରତୀୟ ଅର୍ଥବ୍ୟବସ୍ଥାର କ୍ଷମତା ବୃଦ୍ଧି ଦିଗରେ ପ୍ରତିଶ୍ରୁତିବଦ୍ଧ । ଟୋକିଓରେ ମୁଁ ଭାରତ ଓ ଜାପାନର ଶୀର୍ଷ ବ୍ୟବସାୟୀଙ୍କ ସହ ବିସ୍ତୃତ ଆଲୋଚନା କରିବି । ଆମର ବାଣିଜ୍ୟ ଓ ନିବେଶ ସମ୍ପର୍କକୁ ଅଧିକ ସୁଦୃଢ଼ କରିବା ଦିଗରେ ପଦକ୍ଷେପ ନେବି ।
ଗସ୍ତ ସମୟରେ ମହାମାନ୍ୟ ସମ୍ରାଟଙ୍କୁ ସାକ୍ଷାତ କରିବାର ମଧ୍ୟ ମୋତେ ସୁଯୋଗ ମିଳିଛି । ଟୋକିଓରେ ନଭେମ୍ବର ୧୧ ତାରିଖରେ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କୁ ସାକ୍ଷାତ କରିବା ସମୟରେ ଆମର ଦ୍ୱିପାକ୍ଷିକ ସହଯୋଗର ସମସ୍ତ ଦିଗକୁ ସମୀକ୍ଷା କରିବୁ ।
ନଭେମ୍ବର ୧୨ତାରିଖରେ ପ୍ରଧାନମନ୍ତ୍ରୀ ଆବେ ଓ ମୁଁ ପ୍ରସିଦ୍ଧ ସିଙ୍କୋସେନ(ଜାପାନୀ ବୁଲେଟ୍ ଟ୍ରେନ୍)ରେ କୋବେ ଗସ୍ତ କରିବୁ । ସିଙ୍କୋସନ୍ ଜ୍ଞାନକୌଶଳକୁ ପ୍ରସ୍ତାବିତ ମୁମ୍ବାଇ-ଅହମ୍ମଦାବାଦ ଦୃତ ରେଳପଥ ସେବା ପାଇଁ ଉପଯୋଗ କରାଯିବ । ଆମେ ଉଭୟ ମଧ୍ୟ କୋବେରେ ଥିବା କାୱାସାକି ବୃହତ ଶିଳ୍ପ ପ୍ରକଳ୍ପକୁ ଗସ୍ତ କରିବୁ । ସେଠାରେ ଦ୍ରୁତ ରେଳବାଇ ଉପକରଣ ନିର୍ମାଣ କରାଯାଉଛି ।
ଭାରତ ଓ ଜାପାନ ମଧ୍ୟରେ ଦୃତ ରେଳସେବା ସହଯୋଗ ଆମ ସହଯୋଗର ଏକ ଉଜ୍ୱଳ ଉଦାହରଣ । ଏହା କେବଳ ଆମର ବାଣିଜ୍ୟ ଓ ନିବେଶ ସମ୍ପର୍କକୁ ପ୍ରୋତ୍ସାହିତ କରିବ ନାହିଁ ବରଂ ଭାରତରେ ଦକ୍ଷ ନିଯୁକ୍ତି ସୁଯୋଗ ସୃଷ୍ଟି କରିବ । ଏହା ଆମର ‘ମେକ୍ ଇନ୍ ଇଣ୍ଡିଆ’ ମିଶନକୁ ପ୍ରୋତ୍ସାହନ ଓ ଭିତ୍ତିଭୂମିକୁ ବଳ ଦେବ ।
