PM Modi reviews progress towards beginning of GST to be rolled out on July 1
GST is a turning point for the economy, unprecedented in history: PM ModiThe creation of One Nation; One Market; One Tax would greatly benefit the common man: Prime Minister Modi- GST ନେଟୱାର୍କର ସାଇବର ସୁରକ୍ଷା ଉପରେ ଗୁରୁତ୍ୱ ଦେବାକୁ ପରାମର୍ଶ
- “ଏକ ରାଷ୍ଟ୍ର, ଏକ ବଜାର, ଏକ ଟିକସ” ପ୍ରଣାଳୀର ସୁଫଳ ସାଧାରଣ ଲୋକଙ୍କ ପାଖରେ ପହଂଚାଇବାକୁ ବିଭିନ୍ନ ବିଭାଗକୁ ନିର୍ଦ୍ଦେଶ
- ଜିଏସଟି ସୂଚନା ପାଇଁ ଆରମ୍ଭ ହେଲା ଟ୍ୱିଟର ହେଣ୍ଡଲ - @askGst_GOI, ନିଃଶୁଳ୍କ ଟେଲିଫୋନ ସେବା – 1800-1200-232
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ବସ୍ତୁ ଓ ସେବା କର (GST) ପ୍ରଚଳନ ବ୍ୟବସ୍ଥାର ଅଗ୍ରଗତି ନେଇ ସମୀକ୍ଷା କରିଛନ୍ତି । ଆଜି ନୂଆଦିଲ୍ଲୀଠାରେ ପ୍ରଧାନମନ୍ତ୍ରୀଙ୍କ ଦ୍ୱାରା ଆହୁତ ଏହି ଉଚ୍ଚସ୍ତରୀୟ ବୈଠକରୁ ମିଳିଥିବା ସୂଚନା ଅନୁଯାୟୀ ଜୁଲାଇ ପହିଲାରୁ ସମଗ୍ର ଦେଶରେ GST ଟିକସ ବ୍ୟବସ୍ଥା ପ୍ରଚଳନ କରାଯିବ । ପ୍ରାୟ ଅଢ଼େଇ ଘଂଟା ଧରି ଚାଲିଥିବା ଏହି ସମୀକ୍ଷା ବୈଠକରେ କେନ୍ଦ୍ର ଅର୍ଥ ଓ ଔଦ୍ୟୋଗିକ ବ୍ୟାପାର ମନ୍ତ୍ରୀ ଶ୍ରୀ ଅରୁଣ ଜେଟଲୀ, କ୍ୟାବିନେଟ ସଚିବ, ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ତଥା ଅର୍ଥ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ ।
ବୈଠକ କାଳରେ ପ୍ରଧାନମନ୍ତ୍ରୀ GST ବ୍ୟବସ୍ଥାର କେତେକ ନିର୍ଦ୍ଦିଷ୍ଟ ଦିଗ ଉପରେ ଆଲୋକପାତ କରି ସମୀକ୍ଷା କରିଥିଲେ । ବିଶେଷ ଭାବେ GST ନେଟୱାର୍କ ତଥା ଆଇଟି ବ୍ୟବସ୍ଥାର ପ୍ରସ୍ତୁତି, ଏହି ବ୍ୟବସ୍ଥାରେ ନିୟୋଜିତ ହେବାକୁ ଥିବା ମାନବ ସମ୍ବଳକୁ ତାଲିମ ପ୍ରଦାନ ଏବଂ ଅନ୍ୟାନ୍ୟ ସମ୍ପୃକ୍ତ ବିଭାଗଗୁଡିକର ଅଧିକାରୀ ଓ କର୍ମଚାରୀଙ୍କୁ ପ୍ରଶିକ୍ଷଣ, GST ସମ୍ପର୍କିତ ବିଭିନ୍ନ ସାଧାରଣ ସମସ୍ୟା ଜଡିତ ପ୍ରଶ୍ନର ସରଳ ଉତ୍ତର ଓ ସୂଚନା ପ୍ରଦାନ ଏବଂ ତଦାରଖ ବ୍ୟବସ୍ଥା ନେଇ ପ୍ରଧାନମନ୍ତ୍ରୀ ବିଚାର ବିମର୍ଶ କରିଥିଲେ । ବ୍ୟାଙ୍କ ସହ GST ନେଟୱାର୍କର ସମ୍ମିଶ୍ରଣ, ଟିକସଦାତାମାନଙ୍କର ଅର୍ନ୍ତଭୁକ୍ତିକରଣ, ଆଇଟି ବ୍ୟବସ୍ଥାର ସମନ୍ୱୟ ରକ୍ଷା ଏବଂ GST ନେଟୱାର୍କର ସୁରକ୍ଷା ସମ୍ପର୍କିତ ବିଷୟଗୁଡିକ ଉପରେ ବ୍ୟାପକ ଭାବେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଥିଲା ।
GST ଓ ଏହାର ନେଟୱାର୍କ ବ୍ୟବସ୍ଥା ସମ୍ପର୍କିତ ବିଭିନ୍ନ ପ୍ରଶ୍ନର ତତ୍କାଳ ଉତ୍ତର ପ୍ରଦାନ ଲାଗି ଏବେ କେନ୍ଦ୍ର ସରକାର ଏକ ନୂତନ ଟ୍ୱିଟର ହେଣ୍ଡଲ ସୃଷ୍ଟି କରିଛନ୍ତି । ଏହା ହେଲା – @askGst_GOI । ଏହି ନୂତନ ଟ୍ୱିଟର ହେଣ୍ଡଲକୁ ଚାଲୁ କରାଯାଇଥିବା ବେଳେ ଆଉ ଏକ ଟୋଲ ଫ୍ରି ନମ୍ବର ମଧ୍ୟ ପ୍ରତିଷ୍ଠା କରାଯାଇଛି । ଏହି ନିଃଶୁଳ୍କ ଫୋନ ନମ୍ବର ହେଲା – 1800-1200-232 ।
ପ୍ରଧାନମନ୍ତ୍ରୀ କହିଥିଲେ ଯେ, ବସ୍ତୁ ଓ ସେବା କର ବ୍ୟବସ୍ଥା କାର୍ଯ୍ୟକାରୀ କରିବା ଦିଗରେ ସବୁ ରାଜନୈତିକ ଦଳ, ଶିଳ୍ପ ଓ ବାଣିଜ୍ୟ ସଂଗଠନ ଏବଂ ଅନ୍ୟାନ୍ୟ ଭାଗିଦାରମାନଙ୍କର ସମନ୍ୱିତ ପ୍ରୟାସ ସରକାରଙ୍କୁ ସାହାଯ୍ୟ କରିଛି । ଭାରତର ଅର୍ଥ ବ୍ୟବସ୍ଥା କ୍ଷେତ୍ରରେ ତଥା ଟିକସ ସଂସ୍କାର ଦିଗରେ ଏହା ଏକ ଐତିହାସିକ ପଦକ୍ଷେପ ଯାହାକି ଆମର ଅର୍ଥନୀତିକୁ ନୂତନ ଦିଗଦର୍ଶନ ଦେବ ।
GST ବ୍ୟବସ୍ଥାରେ ଯେପରି ଦେଶର ସାଧାରଣ ଲୋକଙ୍କୁ ସୁଫଳ ଓ ଉପକାର ମିଳିବ ସେ ଦିଗରେ ସରକାରୀ ଅଧିକାରୀ ଓ କର୍ମଚାରୀମାନେ କାର୍ଯ୍ୟ କରିବାକୁ ପଡିବ । “ଏକ ରାଷ୍ଟ୍ର, ଏକ ବଜାର, ଏକ ଟିକସ” ପ୍ରଣାଳୀ କାର୍ଯ୍ୟକାରୀ କରିବା କ୍ଷେତ୍ରରେ ଯେପରି କୌଣସି ବାଧା ବନ୍ଧନ ନ ରହେ ସେ ଦିଗରେ ଶତତ ଯତ୍ନଶୀଳ ହେବାକୁ ପ୍ରଧାନମନ୍ତ୍ରୀ ସମସ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ, ସାଇବର ସୁରକ୍ଷା ଏବେ ଏକ ବଡ ପ୍ରଶ୍ନ ହୋଇଛି । GST ନେଟୱାର୍କ କାର୍ଯ୍ୟକାରୀ କରାଯିବା ବେଳେ ସାଇବର ସୁରକ୍ଷାର ବିଭିନ୍ନ ଦିଗ ପ୍ରତି ମଧ୍ୟ ବିଶେଷ ଭାବେ ଧ୍ୟାନ ଦେବାକୁ ପ୍ରଧାନମନ୍ତ୍ରୀ ମୋଦୀ ସବୁ ବିଭାଗ ଓ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।
