ମହାମହିମ, ରାଷ୍ଟ୍ରପତି ରାମାଫୋସା
ଦକ୍ଷିଣ ଆଫ୍ରିକାରୁ ଏଠାକୁ ଆସିଥିବା ସମସ୍ତ ବିଶିଷ୍ଟ ଅତିଥିଗଣ,
ବନ୍ଧୁଗଣ,
ଆମ ପାଇଁ ଅତ୍ୟନ୍ତ ଆନନ୍ଦର ବିଷୟ ଯେ ଭାରତର ଅଭିନ୍ନ ବନ୍ଦୁ, ରାଷ୍ଟ୍ରପତି ରାମାଫୋସା ଆଜି ଆମ ଗହଣରେ ଉପସ୍ଥିତ ରହିଛନ୍ତି । ତାଙ୍କ ପାଇଁ ଭାରତ ନୂଆ ନୁହେଁ, କିନ୍ତୁ ରାଷ୍ଟ୍ରପତି ଭାବେ ଏହା ତାଙ୍କର ପ୍ରଥମ ଭାରତ ଗସ୍ତ । ଆହୁରି ତାଙ୍କର ଏହି ଭାରତ ଗସ୍ତ ଆମ ସମ୍ପର୍କର ଏକ ସ୍ୱତନ୍ତ୍ର ପର୍ଯ୍ୟାୟରେ ହେଉଛି । ଚଳିତ ବର୍ଷ ମହାତ୍ମା ଗାନ୍ଧୀଜୀଙ୍କର 150ତମ ଜନ୍ମବାର୍ଷିକୀ ପାଳିତ ହେଉଛି । ଗତବର୍ଷ ନେଲସନ ମାଣ୍ଡେଲାଙ୍କ ଜନ୍ମଶତବାର୍ଷିକୀ ବର୍ଷ ଥିଲା । ଏବଂ ଗତ ବର୍ଷ ଆମ ରାଜନୈତିକ ସମ୍ପର୍କର ରୌପ୍ୟ ଜୟନ୍ତୀ ମଧ୍ୟ ଥିଲା । ମୁଁ ଅତ୍ୟନ୍ତ ଆନନ୍ଦିତ ଯେ ଏହି ବିଶେଷ ମୁହୂର୍ତ୍ତରେ ରାଷ୍ଟ୍ରପତି ରାମାଫୋସା ଭାରତ ଆସିଛନ୍ତି । ଏବଂ ତାଙ୍କର ଏହି ଭାରତ ଗସ୍ତ ଆମ ପାଇଁ ଆହୁରି ଅଧିକ ଗୁରୁତ୍ୱ ରଖୁଛି, କାରଣ ଆସନ୍ତାକାଲି ସେ ଭାରତୀୟ ସାଧାରଣତନ୍ତ୍ର ଦିବସ ସମାରୋହରେ ମୁଖ୍ୟ ଅତିଥି ଭାବେ ସାମିଲ ହେବେ । ଏହି ସମ୍ମାନ ଏବଂ ଗୌରବ ସେ ଆମକୁ ଦେଇଥିବାରୁ, ସେଥିପାଇଁ ସମସ୍ତ ଭାରତ ତାଙ୍କ ନିକଟରେ କୃତଜ୍ଞ ।
ବନ୍ଧୁଗଣ,
2016ରେ ଯେତେବେଳେ ମୁଁ ଦକ୍ଷିଣ ଆଫ୍ରିକା ଯାଇଥିଲି, ସେ ସମୟରେ ମୋର ରାଷ୍ଟ୍ରପତି ରାମାଫୋସାଙ୍କ ସହିତ ପ୍ରଥମ ସାକ୍ଷାତ ହୋଇଥିଲା । ସେତେବେଳେ ସେ ଉପରାଷ୍ଟ୍ରପତି ଥିଲେ । ଏବଂ ଆମର ସେହି ପ୍ରଥମ ସାକ୍ଷାତରେ ହିଁ, ମୁଁ ଭାରତ ପ୍ରତି ତାଙ୍କର ଉତ୍ସାହ ଏବଂ ସ୍ନେହକୁ ଅନୁଭବ କରିପାରିଥିଲି । ଗତ ବର୍ଷ ଦକ୍ଷିଣ ଆଫ୍ରିକାରେ ବ୍ରିକ୍ସ ଶିଖର ସମ୍ମିଳନୀ ସମୟରେ ମୁଁ ତାଙ୍କର ଚମକ୍ରାର ଅତିଥି ସକ୍ରାରକୁ ଅନୁଭବ କରିଥିଲି । ତେବେ ଦିଲ୍ଲୀରେ ଶୀତଋତୁ ଚାଲିଛି, କିନ୍ତୁ ମୋର ବିଶ୍ୱାସ ଯେ ଏହି ଗସ୍ତରେ ରାଷ୍ଟ୍ରପତି ରାମାଫୋସା ମଧ୍ୟ ଭାରତର ଉଦାରପୂର୍ଣ୍ଣ ସ୍ୱାଗତକୁ ଅନୁଭବ କରିବେ । ମୁଁ ରାଷ୍ଟ୍ରପତି ରାମାଫୋସା, ଏବଂ ତାଙ୍କ ପ୍ରତିନିଧିମାନଙ୍କୁ, ଭାରତରେ ହାର୍ଦ୍ଦିକ ସ୍ୱାଗତ କରୁଛି ।
ବନ୍ଧୁଗଣ,
ଆଜି ରାଷ୍ଟ୍ରପତି ମହୋଦୟଙ୍କ ସହିତ ବାର୍ତ୍ତାଳାପରେ ଆମେ ନିଜ ସମ୍ପର୍କର ସବୁ ଦିନର ସମୀକ୍ଷା କଲୁ । ଆମ ଭିତରେ ବାଣିଜ୍ୟ ଏବଂ ନିବେଶର ସମ୍ପର୍କ ଆହୁରି ଅଧିକ ପ୍ରଗାଢ଼ ହେଉଛି । ଆମର ଦ୍ୱିପାକ୍ଷିକ ବାଣିଜ୍ୟ 10 ବିଲିୟନ ଡଲାରରୁ ମଧ୍ୟ ଅଧିକ । ଚଳିତ ବର୍ଷ ଭାଏବ୍ରାଣ୍ଟ ଗୁଜରାଟରେ ଦକ୍ଷିଣ ଆଫ୍ରିକା ସହଯୋଗୀ ଦେଶ ଭାବେ ଭାଗ ନେଇଛି । ଆହୁରି ଦକ୍ଷିଣ ଆଫ୍ରିକାରେ ନିବେଶକୁ ବଢ଼ାଇବା ଲାଗି ରାଷ୍ଟ୍ରପତି ରାମାଫୋସାଙ୍କ ପ୍ରୟାସରେ ଭାରତୀୟ କମ୍ପାନୀ ଆଗଭର ହୋଇ ଭାଗ ନେଉଛନ୍ତି । ଦକ୍ଷିଣ ଆଫ୍ରିକାର ଦକ୍ଷତା ବିକାଶ ପ୍ରୟାସରେ ମଧ୍ୟ ଆମେ ଭାଗୀଦାର । ପ୍ରିଟୋରିଆରେ ଖୁବଶୀଘ୍ର ଗାନ୍ଧୀ-ମାଣ୍ଡେଲା ସ୍କିଲ୍ସ ଇନଷ୍ଟିଟ୍ୟୁଟ ପ୍ରତିଷ୍ଠା ହେବାକୁ ଯାଉଛି । ଆହୁରି ଆମେ ଦୁହେଁ ଏହି ସମ୍ପର୍କକୁ ଏକ ନୂଆସ୍ତରକୁ ନେଇଯିବା ଲାଗି ପ୍ରତିବଦ୍ଧ । ସେଥିଲାଗି, ଆଜି କିଛି ସମୟ ପରେ ଆମେ ଦୁହେଁ ଦେଶର ପ୍ରମୁଖ ବ୍ୟବସାୟୀ ନେତୃବର୍ଗଙ୍କ ସହିତ ସାକ୍ଷାତ କରିବୁ ।
ବନ୍ଧୁଗଣ,
ବିଶ୍ୱର ମାନଚିତ୍ରକୁ ଦେଖିଲେ ଏହା ସ୍ପଷ୍ଟ ଯେ ଭାରତ ଏବଂ ଦକ୍ଷିଣ ଆଫ୍ରିକା, ଉଭୟ ଭାରତ ମହାସାଗରରେ ଅତି ଗୁରୁତ୍ୱପୂର୍ଣ୍ଣ ସ୍ଥାନରେ ରହିଛନ୍ତି । ଆମେ ଦୁହେଁ ବିବିଧତାରେ ପରିପୂର୍ଣ୍ଣ ଗଣତାନ୍ତ୍ରିତ ଦେଶ । ମହାତ୍ମା ଗାନ୍ଦୀ ଏବଂ ନେଲସନ ମଣ୍ଡେଲାଙ୍କ ପରମ୍ପରାର ଉତ୍ତରାଧିକାରୀ । ତେଣୁ ସେଥିପାଇଁ, ଆମ ଉଭୟଙ୍କ ବ୍ୟାପକ ବୈଶ୍ୱିକ ଦୃଷ୍ଟିକୋଣ ପରସ୍ପର ସହ ବେଶ ମେଳ ଖାଉଛି । ବ୍ରିକ୍ସ, ଜି-20, ଭାରତ ମହାସାଗର ରିମ ଆସୋସିଏସନ, ଇବ୍ସା ଭଳି ଅନେକ ମଂଚରେ ଆମର ଆପୋସ ସହଯୋଗ ଏବଂ ସମନ୍ୱୟ ଅତି ସୁଦୃଢ଼ । ମିଳିତ ଜାତିସଂଘ ସୁରକ୍ଷା ପରିଷଦର ସଂସ୍କାର ଉପରେ ମଧ୍ୟ ଆମେ ସାଥୀ ହୋଇ କାର୍ଯ୍ୟ କରିଆସୁଛୁ ।
ରାଷ୍ଟ୍ରପତି ମହୋଦୟଙ୍କ ଏହି ଭାରତ ଗସ୍ତ କାର୍ଯ୍ୟକ୍ରମର ଏକ ବିଶେଷ ଅଙ୍ଗ ଆଜି ଆୟୋଜିତ ହେଉଥିବା ପ୍ରଥମ“ଗାନ୍ଧୀ-ମଣ୍ଡେଲା ସ୍ୱାଧୀନତା ବକ୍ତୃତା” ହେବ । କେବଳ ମୁଁ ନୁହେଁ, ସାରା ଭାରତ, ଓ ସମଗ୍ର ଦକ୍ଷିଣ ଆଫ୍ରିକା,ରାଷ୍ଟ୍ରପତି ମହୋଦୟଙ୍କ ବିଚାର ଶୁଣିବା ଲାଗି ଉତ୍ସୁକ ହୋଇ ରହିଛୁ ।
ବନ୍ଧୁଗଣ,
ଆସନ୍ତାକାଲି ଗଣତନ୍ତ୍ର ଦିବସରରେ ରାଷ୍ଟ୍ରପତି ରାମାଫୋସାଙ୍କ ଉପସ୍ଥିତି ଏବଂ ମୁଖ୍ୟ ଅତିଥି ଭାବେ ଅଂଶଗ୍ରହଣ,ଆମ ସମ୍ପର୍କକୁ ଆହୁରି ଅଧିକ ସୁଦୃଢ଼ କରିବା ଦିଗରେ ଆମର ସହଭାଗୀ ପ୍ରତିବଦ୍ଧତାର ପ୍ରତୀକ । ମୁଁ ପୁଣିଥରେ ରାଷ୍ଟ୍ରପତିଙ୍କୁ ହାର୍ଦ୍ଦିକ ସ୍ୱାଗତ କରୁଛି ।
ଧନ୍ୟବାଦ!
