ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସ ଜରିଆରେ ସୌରାଷ୍ଟ୍ର ପଟେଲ ସାଂସ୍କୃତିକ ସମାଜର ଅନ୍ତର୍ଜାତୀୟ ସମ୍ମେଳନକୁ ସମ୍ବୋଧିତ କରିଥିଲେ । ଚଳିତ ବର୍ଷ ଆମେରିକାର କାଲିଫର୍ଣ୍ଣିଆଠାରେ ସୌରାଷ୍ଟ୍ର ପଟେଲ ସାଂସ୍କୃତିକ ସମାଜର ଅନ୍ତର୍ଜାତୀୟ ସମ୍ମେଳନ ଆୟୋଜନ କରାଯାଉଛି ।
ପ୍ରବାସୀ ଭାରତୀୟ, ବିଶେଷ କରି ସୌରାଷ୍ଟ୍ର ପଟେଲ ସମୁଦାୟର ପ୍ରୟାସକୁ ପ୍ରଶଂସା କରି ପ୍ରଧାନମନ୍ତ୍ରୀ କହିଥିଲେ ଯେ, ପ୍ରବାସୀ ଭାରତୀୟମାନେ ସବୁବେଳେ ଭାରତକୁ ଗର୍ବିତ କରିଆସିଛନ୍ତି । ସେ ଆହୁରି ଉଲ୍ଲେଖ କରିଥିଲେ ଯେ ସେମାନଙ୍କ ପ୍ରୟାସ ବିଭିନ୍ନ ସ୍ଥାନରେ ଭାରତୀୟ ପାସପୋର୍ଟକୁ ସମ୍ମାନ ପ୍ରଦାନ କରିଛି ।
ପ୍ରଧାନମନ୍ତ୍ରୀ କହିଥିଲେ ସରକାରଙ୍କ ବିଭିନ୍ନ ଯୋଜନା ଯେପରିକି ସ୍ୱଚ୍ଛ ଭାରତ ଦେଶରେ ପର୍ଯ୍ୟଟନ କ୍ଷେତ୍ରକୁ ପ୍ରୋତ୍ସାହନ ଯୋଗାଇଛି । ପ୍ରତ୍ୟେକ ପ୍ରବାସୀ ଭାରତୀୟ ହାରାହାରି 5ଟି ବିଦେଶୀ ପରିବାରକୁ ପ୍ରତି ବର୍ଷ ଭାରତଦର୍ଶନ ନିମନ୍ତେ ଭାରତ ଆସିବା ଲାଗି ପ୍ରଭାବିତ କରନ୍ତୁ ବୋଲି ପ୍ରଧାନମନ୍ତ୍ରୀ ପ୍ରବାସୀ ଭାରତୀୟମାନଙ୍କୁ ଆହ୍ୱାନ କରିଥିଲେ । ଏହା ଏକ ଭାରତ, ଶ୍ରେଷ୍ଠ ଭାରତ ଉଦ୍ଦେଶ୍ୟକୁ ସାଧିତ କରିପାରିବ ଏବଂ ଏହା ଭାରତରେ ପର୍ଯ୍ୟଟନ ବିକାଶକୁ ବ୍ୟାପକ ପ୍ରୋତ୍ସାହନ ଯୋଗାଇଦେବ । ମହାତ୍ମା ଗାନ୍ଧୀଙ୍କ ସ୍ୱପ୍ନ – ସ୍ୱଚ୍ଛ ଭାରତର ସଫଳତା ପାଇଁ କିପରି ପ୍ରବାସୀ ଭାରତୀୟମାନେ ଯୋଗଦାନ କରିପାରିବେ ସେ ସମ୍ପର୍କରେ ପ୍ରଧାନମନ୍ତ୍ରୀ ଆଲୋଚନା କରିଥିଲେ । ଅକ୍ଟୋବର 2 ତାରିଖଠାରୁ ଆରମ୍ଭ ହେଉଥିବା ମହାତ୍ମା ଗାନ୍ଧୀଙ୍କ 150ତମ ଜନ୍ମ ବାର୍ଷିକୀ ସମାରୋହକୁ ଭାରତ ପାଳନ କରିବ । ସେ ଆହୁରି ଉଲ୍ଲେଖ କରିଥିଲେ ଯେ ଭାରତର ଲୌହମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କର ଏକ ବିଶାଳ ମୂର୍ତ୍ତି ନର୍ମଦା ନଦୀ ଉପରେ ନିର୍ମାଣ କରାଯାଉଛି । ଏହା 31 ଅକ୍ଟୋବର 2018ରେ ସମ୍ପୂର୍ଣ୍ଣ ହେବ । ଥରେ ଏହି ମୂର୍ତ୍ତି ସମ୍ପୂର୍ଣ୍ଣ ହେବା ପରେ ଏହି ଏକତାର ପ୍ରତିମୂର୍ତ୍ତି ବିଶ୍ୱର ସର୍ବୋଚ୍ଚ ମୂର୍ତ୍ତି ହୋଇପାରିବ ।
ଉପସ୍ଥିତ ଲୋକମାନଙ୍କୁ ନରେନ୍ଦ୍ର ମୋଦୀ କହିଥିଲେ ଯେ ସାରା ବିଶ୍ୱରେ ଭାରତ ବର୍ତ୍ତମାନ ଉଜ୍ଜ୍ୱଳ ତାରକା ଭାବେ ପ୍ରତୀୟମାନ ହେଉଛି । ସେ ଉଲ୍ଲେଖ କରିଥିଲେ ଯେ ଆଜି ଭାରତ ଅର୍ଥନୈତିକ ଅଭିବୃଦ୍ଧି ଏବଂ ସ୍ୱଚ୍ଛ, ପାରଦର୍ଶୀ ପ୍ରଶାସନ ସହାୟତାରେ ଆଗେଇ ଯାଉଛି । ଜିଏସଟି ଏବଂ ଦୁର୍ନୀତି ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଭଳି ପଦକ୍ଷେପ ଯୋଗୁ ଲୋକମାନେ ସଚ୍ଚୋଟତାର ସହ ବ୍ୟବସାୟ କରୁଛନ୍ତି । ଫଳରେ ଭାରତ ଗତ 4 ବର୍ଷ ମଧ୍ୟରେ ବ୍ୟବସାୟିକ ସୁଗମତା ମାନ୍ୟତାରେ 42ଟି ସ୍ଥାନ ଉପରକୁ ଉଠିଛି ।
ନୂତନ ଭାରତର ସ୍ୱପ୍ନ ନିର୍ମାଣ କରିବା ଦିଗରେ କାର୍ଯ୍ୟ କରିବା ଲାଗି ପ୍ରଧାନମନ୍ତ୍ରୀ ପ୍ରବାସୀ ଭାରତୀୟ ସମୁଦାୟମାନଙ୍କୁ ଆହ୍ୱାନ କରିଥିଲେ ।
