ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଳ ପୁରସ୍କାର 2019 ବିଜେତାମାନଙ୍କ ସହ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭାବ ବିନିମୟ କରିଛନ୍ତି ।
ପିଲାମାନେ ସେମାନଙ୍କର ବିଶେଷ ସଫଳତା ବାବଦରେ ପୁଙ୍ଖାନୁପୁଙ୍ଖ ଭାବେ ବର୍ଣ୍ଣନା କରିବା ସହ ସେମାନଙ୍କ ପ୍ରେରଣାଦାୟକ କାହାଣୀ ବର୍ଣ୍ଣନା କରିଥିଲେ ।
ପ୍ରଧାନମନ୍ତ୍ରୀ ପୁରସ୍କାର ବିଜେତାମାନଙ୍କୁ ସେମାନଙ୍କ ସଫଳତା ପାଇଁ ପ୍ରଶଂସା କରିବା ସହ ଅଭିନନ୍ଦନ ଜଣାଇଥିଲେ ।
ସେ କହିଲେ ଯେ ପ୍ରତିଭାବାନ ପିଲାମାନଙ୍କୁ ସ୍ୱୀକୃତି ପ୍ରଦାନ କରିବା ପାଇଁ ଏହି ପୁରସ୍କାରଗୁଡ଼ିକ ଏକ ସୁଯୋଗ ପ୍ରଦାନ କରିଥା’ନ୍ତି ଏବଂ ଏହା ସେମାନଙ୍କ ପରି ଅନ୍ୟମାନଙ୍କ ପାଇଁ ପ୍ରେରଣା ଭଳି କାର୍ଯ୍ୟ କରେ ।
ପ୍ରକୃତି ସହିତ ସଂଯୁକ୍ତ ରହିବା ପାଇଁ ପ୍ରଧାନମନ୍ତ୍ରୀ ଏହି ଅସାଧାରଣ ପ୍ରତିଭାଧାରୀ ପିଲାମାନଙ୍କୁ ପ୍ରେରିତ କରିଥିଲେ ।
ସେ ଏହି ପିଲାମାନଙ୍କ ସହ କିଛି ସମୟ ହାଲକା ଏବଂ ଅନୌପଚାରିକ ଭାବେ କଟାଇଥିଲେ ଏବଂ ପିଲାମାନେ ତାଙ୍କୁ ଅଟୋଗ୍ରାଫ ପାଇଁ ଅନୁରୋଧ କରିଥିଲେ ।
ଭିତ୍ତିଭୂମି
ରାଷ୍ଟ୍ରୀୟ ବାଳ ପୁରସ୍କାର ଦୁଇଟି ବର୍ଗରେ ପ୍ରଦାନ କରାଯାଇଥାଏ: ବ୍ୟକ୍ତିଗତ ଭାବେ ବାଳ ଶକ୍ତି ପୁରସ୍କାର; ଏବଂ ଅନୁଷ୍ଠାନ/ ପିଲାମାନଙ୍କ ପାଇଁ କାର୍ଯ୍ୟକରୁଥିବା ବ୍ୟକ୍ତିବିଶେଷମାନଙ୍କୁ ବାଳ କଲ୍ୟାଣ ପୁରସ୍କାର ।
ଚଳିତ ବର୍ଷ ବାଳ ଶକ୍ତି ପୁରସ୍କାର ପାଇଁ ମୋଟରେ 783ଟି ଆବେଦନ ପତ୍ର ଆସିଥିଲା ।
ଅଭିନବତା, ବିଦ୍ୱତା, କ୍ରୀଡ଼ା, କଳା ଏବଂ ସଂସ୍କୃତି, ସମାଜ ସେବା ଓ ସାହସିକତା ଆଦି ବର୍ଗରେ ମହିଳା ଏବଂ ବାଳ ବିକାଶ ମନ୍ତ୍ରଣାଳୟ ବାଳ ଶକ୍ତି ପୁରସ୍କାର ପାଇଁ 26ଜଣଙ୍କୁ ଚୟନ କରିଥିଲା ।
ବାଳ କଲ୍ୟାଣ ପୁରସ୍କାର ପାଇଁ ଜାତୀୟ ଚୟନ କମିଟି ମଧ୍ୟ 2 ଜଣ ବ୍ୟକ୍ତିବିଶେଷ ଏବଂ 3ଟି ଅନୁଷ୍ଠାନକୁ ଚୟନ କରିଥିଲେ ।
