ଆଜି ରାଷ୍ଟ୍ରକୁ ସମ୍ବୋଧିତ କରିବାର ଠିକ୍ ପରେ, ପ୍ରଧାନମନ୍ତ୍ରୀ ଭିଡିଓ କନଫରେନ୍ସ ଜରିଆରେ ମିଶନ ଶକ୍ତିର ସଫଳ ସମ୍ପାଦନ ସହ ଜଡ଼ିତ ବୈଜ୍ଞାନିକମାନଙ୍କ ସହିତ ବାର୍ତ୍ତାଳାପ କରିଥିଲେ ।
ଆଜି ମିଶନ ଶକ୍ତିର ସଫଳତା ପରେ ଭାରତ ବିଶ୍ୱର ଚତୁର୍ଥ ରାଷ୍ଟ୍ର ହୋଇପାରିଛି, ଯାହାପାଖରେ ଉପଗ୍ରହ ନିରୋଧୀ କ୍ଷେପଣାସ୍ତ୍ର (ଆଣ୍ଟି ସାଟେଲାଇଟ ମିସାଇଲ) ଜରିଆରେ ସଫଳତା ପୂର୍ବକ ସାଟେଲାଇଟକୁ ଲକ୍ଷ୍ୟଭେଦ କରିବାର ସାମର୍ଥ୍ୟ ରହିଛି ।
ସେମାନଙ୍କୁ ଏହି ସଫଳତା ପାଇଁ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ କହିଥିଲେ ଯେ ସାରା ଦେଶ ଆମ ବୈଜ୍ଞାନିକମାନଙ୍କୁ ନେଇ ଗର୍ବିତ, ସେମାନେ ଯାହା ହାସଲ କରିବାକୁ ଲକ୍ଷ୍ୟ ରଖିଥାନ୍ତି ସେଥିରେ ଭଲ ସଫଳତା ହାସଲ କରିଥାନ୍ତି ।
ସେ କହିଥିଲେ ଯେ “ମେକ ଇନ ଇଣ୍ଡିଆ”ର ଧାରାରେ ଯାଇ ଆମର ବୈଜ୍ଞାନିକମାନେ ସାରା ବିଶ୍ୱକୁ ଏହି ବାର୍ତ୍ତା ଦେଇଛନ୍ତି ଯେ ଆମେ କାହା ଠାରୁ କମ୍ ନୋହୁଁ ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ବସୁଧୈବ କୁଟୁମ୍ବକମ-ସାରା ବିଶ୍ୱ ଗୋଟିଏ ପରିବାର- ଦର୍ଶନରେ ବିଶ୍ୱାସ କରିଥାଏ । ତେବେ ସେ, ଗୁରୁତ୍ୱାରୋପ କରି କହିଥିଲେ ଯେ ଶାନ୍ତି ଏବଂ ସଦଭାବ ପାଇଁ କାର୍ଯ୍ୟ କରୁଥିବା ଶକ୍ତିଗୁଡ଼ିକ ଶାନ୍ତି ହାସଲ ଲାଗି ସବୁବେଳେ ଶକ୍ତିଶାଳୀ ହୋଇ ରହିବା ଆବଶ୍ୟକ ।
ପ୍ରଧାନମନ୍ତ୍ରୀ ଏଥିପ୍ରତି ଗୁରୁତ୍ୱାରୋପ କରିଥିଲେ ଯେ ବିଶ୍ୱ ଏବଂ କ୍ଷେତ୍ରୀୟ ଶାନ୍ତି ପାଇଁ ଭାରତ ସମର୍ଥ ଏବଂ ଶକ୍ତିଶାଳୀ ରହିବା ଆବଶ୍ୟକ । ସେ କହିଥିଲେ ଯେ ବୈଜ୍ଞାନିକମାନେ ଏହି ପ୍ରୟାସରେ ସମର୍ପିତ ଯୋଗଦାନ କରିଛନ୍ତି । ସେ ମଧ୍ୟ ବୈଜ୍ଞାନିକମାନଙ୍କୁ ସମ୍ପୂର୍ଣ୍ଣ କେନ୍ଦ୍ର କ୍ୟାବିନେଟ ପକ୍ଷରୁ ଅଭିନନ୍ଦନ ଜଣାଇଥିଲେ ।
ସେମାନଙ୍କର ଦକ୍ଷତା ପ୍ରମାଣ କରିବା ଲାଗି ସୁଯୋଗ ଦେଇଥିବାରୁ ବୈଜ୍ଞାନିକମାନେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ ।
