ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ମୁମ୍ବାଇରେ ବ୍ୟବସାୟ ନେତୃମଣ୍ଡଳୀ ସହ ସାକ୍ଷାତ ଆଲୋଚନା କରିଥିଲେ । ଆଲୋଚନା ବେଳେ ଭାରତୀୟ ଉଦ୍ୟୋଗ ଜଗତର ବିଭିନ୍ନ କ୍ଷେତ୍ରରୁ ପ୍ରତିନିଧିତ୍ୱ କରୁଥିବା 41 ଜଣ ବିଶିଷ୍ଟ ଶିଳ୍ପଦ୍ୟୋଗୀ ଉପସ୍ଥିତ ଥିଲେ ।
ଦୁଇ ଘଣ୍ଟା ଧରି ଚାଲିଥିବା ଏହି ଆଲୋଚନାରେ ଗତ 4 ବର୍ଷ ମଧ୍ୟରେ କେନ୍ଦ୍ର ସରକାରଙ୍କ ଦ୍ୱାରା କାର୍ଯ୍ୟକାରୀ କରାଯାଇଥିବା ନୀତିଗତ ସଂସ୍କାର ଏବଂ ଯୋଜନା ବିଷୟରେ ବିସ୍ତୃତ ଆଲୋଚନା କରାଯାଇଥିଲା । ଦେଶର ଅର୍ଥନୈତିକ ଅଭିବୃଦ୍ଧି ଏବଂ ବିକାଶରେ ଉଦ୍ୟୋଗ ଜଗତର ଯୋଗଦାନ ବିଷୟରେ ମଧ୍ୟ ଆଲୋଚନା କରାଯାଇଥିଲା ।
ଦେଶରେ ବ୍ୟବସାୟ ପରିବେଶରେ ଆସିଥିବା ଉନ୍ନତିକୁ ବହୁ ଶିଳ୍ପ ପ୍ରତିନିଧି ସ୍ୱାଗତ କରିଥିଲେ ଏବଂ କହିଥିଲେ ଏହା ଭାରତର ଅଭିବୃଦ୍ଧି ସମ୍ଭାବନାକୁ ବାସ୍ତବ ରୂପ ଦେବାରେ ସଫଳ ହେବ । ସେମାନେ ପ୍ରଧାନମନ୍ତ୍ରୀଙ୍କ ନୂତନ ଭାରତର ସଂକଳ୍ପକୁ ପ୍ରଶଂସା କରିଥିଲେ ।
ଷ୍ଟାର୍ଟଅପ ଏବଂ ଉଦ୍ୟୋଗୀମାନଙ୍କ ସହିତ ନିକଟରେ କରିଥିବା ନିଜର ଆଲୋଚନା ବିଷୟରେ ପ୍ରଧାନମନ୍ତ୍ରୀ କହିଥିଲେ । ସେ କହିଥିଲେ, ଦେଶରେ ବର୍ତ୍ତମାନ ସକାରାତ୍ମକ ଚିନ୍ତାଧାରା ଏବଂ “କରିପାରିବାର” ଉତ୍ସାହ ଦେଖିବାକୁ ମିଳୁଛି । ବ୍ୟାପକ ନିବେଶ, ବିଶେଷ କରି କୃଷି କ୍ଷେତ୍ରରେ, କରିବା ଲାଗି ସେ କର୍ପୋରେଟ ଜଗତକୁ ଆହ୍ୱାନ କରିଥିଲେ ।
ଘରୋଇ ଉତ୍ପାଦନକୁ ପ୍ରୋତ୍ସାହନ ଦେବାର ଆବଶ୍ୟକତା ଉପରେ ଗୁରୁତ୍ୱାରୋପ କରି ସେ କହିଥିଲେ ଯେ ମେଡ଼ିକାଲ ସେବା, ଇଲେକଟ୍ରୋନିକ୍ସ ଏବଂ ପ୍ରତିରକ୍ଷା ସରଞ୍ଜାମ ନିର୍ମାଣ କ୍ଷେତ୍ରରେ ଉତ୍ପାଦନ ବୃଦ୍ଧି କରିବାର ଆବଶ୍ୟକତା ରହିଛି ।
ପୂର୍ବରୁ ଅର୍ଥମନ୍ତ୍ରୀ ଶ୍ରୀ ପୀୟୂଷ ଗୋଏଲ ଭାରତୀୟ ଅର୍ଥବ୍ୟବସ୍ଥାର ଉଚ୍ଚ ଅଭିବୃଦ୍ଧି ଲାଗି ବିଗତ 4 ବର୍ଷ ମଧ୍ୟରେ କେନ୍ଦ୍ର ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ପଦକ୍ଷେପ ଉପରେ ଆଲୋକପାତ କରିଥିଲେ । ସେ ନୀତିଗତ ପଦକ୍ଷେପ, ବିକାଶ ପ୍ରତି ସାମୂହିକ ଆଭିମୁଖ୍ୟ ଏବଂ ଉଦ୍ଭାବନ ଓ ପ୍ରଯୁକ୍ତି ପ୍ରତି ଉତ୍ସାହ ବିଷୟରେ କହିଥିଲେ ।
