କେଏସଆର ବେଙ୍ଗାଲୁରୁ ଏବଂ ମହୀଶୂର ରେଳ ଲାଇନର ବିଦ୍ୟୁତକରଣକୁ ଆଜି ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ । ମହୀଶୂର ରେଳ ଷ୍ଟେସନରେ ଆୟୋଜିତ ଏକ କାର୍ଯ୍ୟକ୍ରମରେ ସେ ମଧ୍ୟ ମହୀଶୂର ଏବଂ ଉଦୟପୁର ମଧ୍ୟରେ ଚଳାଚଳ କରିଥିବା ପେଲେସ କୁଇନ ହମସଫର ଏକ୍ସପ୍ରେସକୁ ପତାକା ଦେଖାଇ ଶୁଭାରମ୍ଭ କରିଥିଲେ ।
ଏଥିପୂର୍ବରୁ ପ୍ରଧାନମନ୍ତ୍ରୀ ବାହୁବଳୀ ମହାମସ୍ତକାଭିଷେକ ମହୋତ୍ସବ 2018 ଯୋଗ ଦେବା ପାଇଁ ଶ୍ରବଣବେଲାଗୋଲା ଗସ୍ତ କରିଥିଲେ । ସେ ଏଏସଆଇ ଦ୍ୱାରା ବିନ୍ଧ୍ୟଗିରି ପର୍ବତରେ ଖନନ ହୋଇଥିବା ପାହାଚକୁ ଉଦ୍ଘାଟନ କରିଥିଲେ । ସେ ମଧ୍ୟ ବାହୁବଳୀ ଜେନେରାଲ ହସପିଟାଲର ଉଦ୍ଘାଟନ କରିଥିଲେ ।
ଶ୍ରବଣବେଲାଗୋଲାରେ ସମବେତ ଜନସଭାରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଆମ ଦେଶର ଋଷିମୁନିମାନେ ସବୁବେଳେ ସମାଜ କଲ୍ୟାଣ ପାଇଁ କାର୍ଯ୍ୟ କରି ସକାରାତ୍ମକ ପରିବର୍ତ୍ତନ ଆଣିଛନ୍ତି । ଆମ ସମାଜର ସବୁଠୁ ବଡ଼ ସାମର୍ଥ୍ୟ ହେଉଛି ଆମେ ସବୁବେଳେ ସମୟ ସହିତ ତାଳ ଦେଇ ପରିବର୍ତ୍ତିତ ହୋଇଛୁ ଏବଂ ନୂଆ ଚିନ୍ତାଧାରାକୁ ଭଲ ଭାବେ ଗ୍ରହଣ କରିନେଇଛୁ । ଗରିବମାନଙ୍କୁ ଉତ୍ତମ ମାନର ସୁଲଭ ସ୍ୱାସ୍ଥ୍ୟ ସେବା ଯୋଗାଇ ଦେବା ଆମର କର୍ତ୍ତବ୍ୟ ବୋଲି ସେ ଉଲ୍ଲେଖ କରିଥିଲେ ।
