ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ହାଜୀରାଠାରେ ଏଲ ଏଣ୍ଡ ଟି ଆର୍ମର୍ଡ ସିଷ୍ଟମ କମ୍ପ୍ଲେକ୍ସକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି । ସେ ମଧ୍ୟ କମ୍ପ୍ଲେକ୍ସ ପରିଦର୍ଶନ କରିଥିଲେ ଏବଂ ଏହି ପ୍ରକଳ୍ପ ପଛରେ ରହିଥିବା ଅଭିନବ ଉତ୍ସାହ ପ୍ରତି ଗଭୀର ଆଗ୍ରହ ପ୍ରକଟ କରିଥିଲେ । ପ୍ରଧାନମନ୍ତ୍ରୀ ମଧ୍ୟ ନଭସାରୀରେ ନିରାଲୀ କ୍ୟାନସର ହସପିଟାଲ ପାଇଁ ଶିଳାନ୍ୟାସ କରିଥିଲେ । ଏହା ଏହି ଅଂଚଳର ଲୋକମାନଙ୍କୁ କର୍କଟର ନିରାକରଣଯୋଗ୍ୟ ଓ ନିଦାନ ଯୋଗ୍ୟ ଚିକିତ୍ସା ମିଳିପାରିବ ।
ଏହା ସହିତ, ପ୍ରଧାନମନ୍ତ୍ରୀ ସିଲଭାସା ସହିତ ତାଙ୍କର ଗୁଜରାଟ ଗସ୍ତ ଶେଷ କରିଛନ୍ତି ଏବଂ ତାଙ୍କ ତିନିଦିନିଆ ଯାତ୍ରାର ପରବର୍ତ୍ତୀ ଗନ୍ତବ୍ୟ ମୁମ୍ବାଇ ଅଭିମୁଖେ ପ୍ରସ୍ଥାନ କରିଛନ୍ତି ।
ଗୁଜରାଟ ଗସ୍ତର ପ୍ରଥମ ଦିନରେ ପ୍ରଧାନମନ୍ତ୍ରୀ ଭାଏବ୍ରାଣ୍ଟ ଗୁଜରାଟ ସମ୍ମିଳନୀ ପୂର୍ବରୁ ପ୍ରଦର୍ଶନୀ କେନ୍ଦ୍ରଠାରେ ଫ୍ଲାଗଶିପ ବିଶ୍ୱ ବାଣିଜ୍ୟ ପ୍ରଦର୍ଶନୀର ଉଦଘାଟନ କରିଥିଲେ । ଅହମ୍ମଦାବାଦଠାରେ ଅତ୍ୟାଧୁନିକ ସୁପର ସ୍ପେଶାଲିଟି ସରକାରୀ ହସପିଟାଲ-ସର୍ଦ୍ଦାର ବଲ୍ଲଭ ଭାଇ ପଟେଲ ଇନଷ୍ଟିଟ୍ୟୁଟ ଅଫ ମେଡ଼ିକାଲ ସାଇନ୍ସେସ ଏଣ୍ଡ ରିସର୍ଚ୍ଚର ଉନ୍ମୋଚନ କରିଥିଲେ । ଏହି ଅବସରରେ ଉଦବୋଧନ ଦେଇ ସେ କହିଥିଲେ ଯେ ବିକାଶ ଲାଗି ଏବଂ ସମସ୍ତଙ୍କ ପାଇଁ ସମାନ ସୁଯୋଗର ପ୍ରତିବଦ୍ଧତାକୁ ବଜାୟ ରଖି-ନୂତନ ଭାରତ ପାଇଁ ସବକା ସାଥ, ସବକା ବିକାଶ ହିଁ ଏକମାତ୍ର ମାର୍ଗ ବୋଲି ଆମେ ବିଶ୍ୱାସ କରୁ ।
ସାବରମତୀ ନଦୀକୂଳରେ ପ୍ରଧାନମନ୍ତ୍ରୀଙ୍କ ଦ୍ୱାରା ଅହମ୍ମଦାବାଦ ଶପିଂ ଫେଷ୍ଟିଭାଲ 2019ର ଉଦଘାଟନ ଆଉ ଏକ ଆକର୍ଷଣ ଥିଲା । ଏହି ଅବସରରେ ଉଦବୋଧନ ଦେଇ ସେ କହିଥିଲେ, ସରକାର ଦେଶରେ ବ୍ୟବସାୟ ପାଇଁ ଅନୁକୂଳ ପରିବେଶ ସୃଷ୍ଟି କରିବା ଲାଗି ନିରନ୍ତର କାର୍ଯ୍ୟ କରୁଛନ୍ତି ।
ପ୍ରଧାନମନ୍ତ୍ରୀଙ୍କ ଗସ୍ତର ଦ୍ୱିତୀୟ ଦିନରେ ତିନିଦିନିଆ ଭାଏବ୍ରାଣ୍ଟ ଗୁଜରାଟ ସମ୍ମିଳନୀ ଆରମ୍ଭ ହୋଇଥିଲା । ଗାନ୍ଧୀ ନଗରସ୍ଥିତ ମହାତ୍ମା ମନ୍ଦିର ପ୍ରଦର୍ଶନୀ ତଥା ସମ୍ମିଳନୀ କେନ୍ଦ୍ରଠାରେ ସମ୍ମିଳନୀର ନବମ ସଂସ୍କରଣକୁ ପ୍ରଧାନମନ୍ତ୍ରୀ ମୋଦୀ ଉଦଘାଟନ କରିଥିଲେ । ଏହି ଅବସରରେ ଉପସ୍ଥିତ ଜନସଭାକୁ ସମ୍ବୋଧିତ କରି ସେ କହିଥିଲେ, ଭାରତ ସହିତ ବ୍ୟବସାୟ କରିବା ଏକ ବଡ଼ ସୁଯୋଗ ।
ଏହି ସମୟରେ 18 ଜାନୁଆରୀ 2019ରେ ଉଜବେକୀସ୍ତାନର ରାଷ୍ଟ୍ରପତି ଶ୍ୱକତ ମିର୍ଜିୟୋୟେଭ, ଚେକ ଗଣତନ୍ତ୍ରର ପ୍ରଧାନମନ୍ତ୍ରୀ ମିଃ ଆନ୍ଦ୍ରେଜ ବାବିସ, ମାଲଟାର ପ୍ରଧାନମନ୍ତ୍ରୀ ଡ. ଯୋଶେଫ ମସ୍କଟ ଏବଂ ଡେନମାର୍କର ପ୍ରଧାନମନ୍ତ୍ରୀ ଲାର୍ସ ଲୋକେ ରାସମୁସେନ ଆକର୍ଷଣର କେନ୍ଦ୍ରରେ ଥିଲା । ଏହାପରେ ଗୁଜରାଟର ଗାନ୍ଧୀନଗରସ୍ଥିତ ଦାଣ୍ଡିକୁଟୀରଠାରେ ଥ୍ରୀଡି ଲେଜର ଶୋ ପ୍ରଦର୍ଶିତ ହୋଇଥିଲା ।
ଶିଳ୍ପ ନେତୃବର୍ଗ ଭାଏବ୍ରାଣ୍ଟ ଗୁଜରାଟ ସମ୍ମିଳନୀ ଅବସରରେ ଏକାଧିକ ନିବେଶ ପ୍ରକଳ୍ପ ସମ୍ପର୍କରେ ଘୋଷଣା କରିଥିଲେ ।
