ଆଫଗାନିସ୍ତାନର ବୈଦେଶିକ ବ୍ୟାପାର ମନ୍ତ୍ରୀ ମିଷ୍ଟର ସଲାହୁଦ୍ଦିନ ରବ୍ବାନୀ ଆଜି ଅପରାହ୍ନରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି ।
ଆଫଗାନିସ୍ତାନ ସହ ଦ୍ୱିପାକ୍ଷିକ ସମ୍ପର୍କକୁ ଭାରତ ସର୍ବୋଚ୍ଚ ପ୍ରାଥମିକତା ଦିଏ ବୋଲି ପ୍ରଧାନମନ୍ତ୍ରୀ କହିଥିଲେ । ଆତଙ୍କବାଦ ବିରୋଧି ସଂଗ୍ରାମରେ ଆଫଗାନିସ୍ତାନ ଏବଂ ଏହାର ଲୋକମାନଙ୍କୁ ଭାରତ ପୂର୍ଣ୍ଣ ସମର୍ଥନ ଦେଇ ଚାଲିବ ବୋଲି ପ୍ରଧାନମନ୍ତ୍ରୀ ଏହି ଅବସରରେ ଦୋହରାଇଥିଲେ । ସେହିପରି ଏକ ଶାନ୍ତିପୂର୍ଣ୍ଣ, ଐକ୍ୟବଦ୍ଧ, ଗଣତାନ୍ତ୍ରୀକ ଏବଂ ସମୃଦ୍ଧ ଆଫଗାନିସ୍ତାନ ଗଠନ ଦିଗରେ ଭାରତ ସମସ୍ତ ପ୍ରକାର ମାନବୀୟ ଓ ବିକାଶମୂଳକ ସହାୟତା ଜାରି ରଖିବ ।
ଆଲୋଚନା କାଳରେ ବୈଦେଶିକ ମନ୍ତ୍ରୀ ରବ୍ବାନୀ ଆଫଗାନିସ୍ତାନର ସାମ୍ପ୍ରତିକ ପରିସ୍ଥିତି ନେଇ ପ୍ରଧାନମନ୍ତ୍ରୀଙ୍କୁ ଅବଗତ କରାଇଥିଲେ । ଦୁଇ ନେତା ଆଫଗାନିସ୍ତାନରେ ଶାନ୍ତି ପ୍ରତିଷ୍ଠା ଲାଗି ଚାଲିଥିବା ପ୍ରୟାସ ନିଶ୍ଚିତ ରୂପେ ଆଫଗାନ-ନେତୃତ୍ୱ, ଆଫଗାନ-ଅଧିକୃତ ଏବଂ ଆଫଗାନ-ପରିଚାଳିତ ହେବା ଆବଶ୍ୟକ ବୋଲି ସହମତି ପ୍ରକାଶ କରିଥିଲେ ।
ନୂଆଦିଲ୍ଲୀରେ ଅନୁଷ୍ଠିତ ହେଉଥିବା ଭାରତ-ଆଫଗାନିସ୍ତାନ ରଣନୀତିକ ସହଭାଗୀତା ପରିଷଦର ଦ୍ୱିତୀୟ ବୈଠକରେ ଭାରତର ବୈଦେଶିକ ମନ୍ତ୍ରୀଙ୍କ ସହ ମିଷ୍ଟର ରବ୍ବାନୀ ମିଳିତଭାବେ ଅଧ୍ୟକ୍ଷତା କରିବେ ।
