କୁଏତରେ ବାସ କରୁଥିବା ପ୍ରବାସୀ ଛାତ୍ର ମାଷ୍ଟର ରିଦ୍ଧିରାଜ କୁମାର ସେନା କଲ୍ୟାଣ ପାଣ୍ଠିକୁ 18 ହଜାର ଟଙ୍କାର ଏକ ଚେକ ପ୍ରଦାନ କରିଛନ୍ତି । ଆଜି ମାଷ୍ଟର ରିଦ୍ଧିରାଜ ନୂଆଦିଲ୍ଲୀଠାରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରି ଏହି ଚେକ ପ୍ରଦାନ କରିଛନ୍ତି । ଅଷ୍ଟ୍ରେଲିଆ ଶିକ୍ଷା ଗବେଷଣା ପରିଷଦ (ACER) ପକ୍ଷରୁ ଆୟୋଜିତ ଆନ୍ତର୍ଜାତିକ ବେଞ୍ଚ ମାର୍କ ପରୀକ୍ଷାରେ କୃତକାର୍ଯ୍ୟ ହୋଇ ଶ୍ରୀମାନ ରିଦ୍ଧିରାଜ 80 କୁଏତି ଦିନାର (18 ହଜାର ଟଙ୍କା) ପୁରସ୍କାର ଆକାରରେ ଜିଣିଛନ୍ତି । ଏହି ଅର୍ଥକୁ ସେ ସେନା କଲ୍ୟାଣ ପାଣ୍ଠିକୁ ପ୍ରଦାନ କରିଛନ୍ତି । ଆଜି ସେ ନିଜ ମାଆ’ଙ୍କ ସହ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ।
ଅଷ୍ଟ୍ରେଲିଆ ଶିକ୍ଷା ଗବେଷଣା ପରିଷଦ ପକ୍ଷରୁ ମଧ୍ୟପ୍ରାଚ୍ୟ ଆଞ୍ଚଳ ପାଇଁ ଅନୁଷ୍ଠିତ ଆନ୍ତର୍ଜାତିକ ପରୀକ୍ଷାରେ ମାଷ୍ଟର ରିଦ୍ଧିରାଜ ଗଣିତ ଓ ବିଜ୍ଞାନରେ ଉତ୍କର୍ଷ ପ୍ରତିପାଦନ କରି 80 କୁଏତ ଦିନାର ପୁରସ୍କାର ଲାଭ କରିଥିଲେ ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ଏହି ଶିକ୍ଷାଗତ ସଫଳତା ଏବଂ ଭାରତୀୟ ସେନାର କଲ୍ୟାଣ ପାଇଁ ତାଙ୍କର ବଦାନ୍ୟତାକୁ ପ୍ରଶଂସା କରିଛନ୍ତି । ମାଷ୍ଟର ରିଦ୍ଧିରାଜ କେବଳ ପାଠରେ ନୁହନ୍ତି, ବରଂ ଅନେକ ସୃଜନାତ୍ମକ ପ୍ରକଳ୍ପ ପ୍ରସ୍ତୁତ କରିଥିବା ପ୍ରଧାନମନ୍ତ୍ରୀ ଜାଣିବାକୁ ପାଇଛନ୍ତି ।
ଛାତ୍ରଙ୍କ ମା ଶ୍ରୀମତୀ କୃପା ଭଟ୍ଟ ସାକ୍ଷାତ କାଳରେ ପ୍ରଧାନମନ୍ତ୍ରୀଙ୍କୁ କହିଛନ୍ତି ଯେ, ସେ “Every child is Genius Project” ଆରମ୍ଭ କରିଛନ୍ତି ଏବଂ ଏହି ପ୍ରକଳ୍ପ ଅଧୀନରେ ଭାରତରେ ଶିକ୍ଷକମାନଙ୍କ ପାଇଁ ମାଗଣା ପାଠଚକ୍ରମାନ ଆୟୋଜନ କରୁଛନ୍ତି । ପ୍ରତିଭାଶାଳୀ ଛାତ୍ର ଚିହ୍ନଟ କରିବା ହେଉଛି ଏଭଳି ପାଠଚକ୍ର ଆୟୋଜନର ଉଦ୍ଦେଶ୍ୟ । ଏପ୍ରକାର ସୃଜନାତ୍ମକ ଶିକ୍ଷଣ ପ୍ରକଳ୍ପର ପରିପ୍ରସାର ଦିଗରେ ଶ୍ରୀମତୀ ଭଟ୍ଟଙ୍କ ପ୍ରୟାସ ଓ ପ୍ରତିବଦ୍ଧତାକୁ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଥିଲେ ।
