ସିଙ୍ଗାପୁରର ବରିଷ୍ଠ ସାମାଜିକ ନୀତି ସମନ୍ଵୟ ମନ୍ତ୍ରୀ ଶ୍ରୀ ଥରମନ ଶନମୁଗରତ୍ନମ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି ।
ଭାରତରେ ଶ୍ରୀ ଶନମୁଗରତ୍ନମଙ୍କୁ ପ୍ରଧାନମନ୍ତ୍ରୀ ସ୍ଵାଗତ କରିବା ସହିତ ନୂତନ ବର୍ଷର ଅଭିନନ୍ଦନ ଜଣାଇଥିଲେ । ଏହା ସହିତ ତାଙ୍କ ଜରିଆରେ ସିଙ୍ଗାପୁର ପ୍ରଧାନମନ୍ତ୍ରୀ ଶ୍ରୀ ଲି ହେସିଏନ ଲୁଙ୍ଗଙ୍କୁ ନୂତନ ବର୍ଷର ଅଭିନନ୍ଦନ ମଧ୍ୟ ଜଣାଇଥିଲେ ।
ଦ୍ଵିପାକ୍ଷିକ ସମ୍ପର୍କର ଅଗ୍ରଗତି ନେଇ ଉଭୟ ପ୍ରଧାନମନ୍ତ୍ରୀ ଏବଂ ଶ୍ରୀ ଶନମୁଗରତ୍ନମ ସନ୍ତୋଷ ବ୍ୟକ୍ତ କରିଥିଲେ । ଭିତ୍ତିଭୂମି, ଦକ୍ଷତା ବିକାଶ, ଭାରତ-ସିଙ୍ଗାପୁର ମଧ୍ୟରେ ବ୍ୟାପକ ଆର୍ଥିକ ସହଯୋଗ ରାଜିନାମା (ସିଇସିଏ) ଏବଂ ଡିଜିଟାଲ ଅର୍ଥବ୍ୟବସ୍ଥା ଭଳି ବିଭିନ୍ନ ଦିଗରେ ଉଭୟ ନେତା ଆଲୋଚନା କରିଥିଲେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ଵରେ ଭାରତର ସାମାଜିକ ରୂପାନ୍ତରଣ ଏବଂ ଡିଜିଟାଲ ଅର୍ଥବ୍ୟବସ୍ଥାରେ ଆଶାଜନକ ବୃଦ୍ଧିକୁ ପ୍ରଶଂସା କରିଥିଲେ ।
ଭିତ୍ତିଭୂମି, ପର୍ଯ୍ୟଟନ, ଡିଜିଟାଲ ପେମେଣ୍ଟ, ନବସୃଜନ ଏବଂ ପ୍ରଶାସନ କ୍ଷେତ୍ରରେ ଭାରତ-ସିଙ୍ଗାପୁର ମଧ୍ୟରେ ସହଯୋଗକୁ ଆହୁରି ମଜବୁତ କରିବା ଲାଗି ପ୍ରଧାନମନ୍ତ୍ରୀ ତାଙ୍କ ଇଚ୍ଛା ବ୍ୟକ୍ତ କରିଥିଲେ ।
