খুরুমজরি!
চীফ জস্তিস এন.ভি. রমন্নাজী, জস্তিস য়ু.য়ু. ললীৎজী, লো মন্ত্রী শ্রী কিরন রিজিজুজী, জস্তিস দি.ৱাই. চন্দ্রুচরজী, এতোর্নী জেনরেল কে.কে. বেনুগোপালজী, সুপ্রীম কোর্ত বার এসোশিএসনগী প্রসিদেন্ত শ্রী বিকাস সিংজী, অমসুং লৈবাক অসিগী জুদিসিএল সিস্তেমগা মরী লৈনবা ইবুংঙো অমদি ইবেম্মশিং!
ঙসি অয়ুক লেজিসলেচর অমসুং এগজিক্যুতিবকী মরূপশিংগা লোইনখি। অমসুং হৌজিক জুদিসিএরীগী মরী লৈনবা অদোম অখঙ-অহৈশিংগা মরক্তা লৈজরে। ঐখোয় পুম্নমক্কী তোঙান তোঙানবা থৌদাং, তোঙান তোঙানবা থবক তৌবগী মওং-মতৌ লৈজৈ, অদুবু ঐখোয়গী থাজবা, লাইনীং অমসুং পাঙ্গলগী হৌরকফমদি অমখক্তনি – ঐখোয়গী সংবিধান! ঐহাক নুংঙাইবা পোকই মদুদি ঙসি ঐখোয়গী অপুনবা ৱাখল্লোন অসিনা সংবিধানগী নুমিত্তা থৌরম অসিগী থোংদা ফোংদোক্লি, ঐখোয়গী সংবিধানগী ওইবা ৱারেপশিং অদু চেৎশিলহল্লি। থৌরম অসিগা মরী লৈনরিবা পুম্নমক, ইকাই খুম্নবদা মতিক চারবশিংনি।
ইকাই খুমনজরিবশিং,
নীং-খা তম্বগীদমক্তা হিংবা চংবা খঙদনা চেনবীখিবশিং অদুনা মঙলম্বা মঙলানশিং অদুগী মশেক-মঙালদা, অদুগা চহি লিশিং কয়াগী ভারতকী অচৌবা চৎনবী অসিবু য়োকখৎলদুনা, ঐখোয়গী সংবিধান শেম্বীরম্বশিংনা ঐখোয়দা সংবিধান পীনবীখি। চহি কয়াগী মীনাই নাইথাংনা, ভারতপু অৱাবা কয়াদা লংশিনবীখি। মতম অমদা সনাগী উচেক হায়না কৌনরম্বী ভারত, লাইরবা-চাকনিবা অমসুং অনা-অয়েক্তনা থল্লম্মি। ফিভম অসিদা, লৈবাক অসিবু মাংদা পুখৎপদা সংবিধান্না মতম পুম্নমক্তা ঐখোয়গী ইতেং পাংদুনা লাকখি। অদুবু ঙসিদি মালেমগী অতৈ লৈবাকশিংগা য়েংনরুরবদি, ভারতকা চাউরাক্না নীং খা তম্বা ফংমিন্নখিবা লৈবাকশিং অদু ঙসিদি ঐখোয়দগী ফনা য়াম্না মাং থাখ্রে। হায়বদি হৌজিক ময়াম অমা তৌগদবা ৱাৎলি হায়বনি, ঐখোয় পুন্না পান্দম অদু য়ৌমিন্নগদবনি। ঐখোয় পুম্নমক্না খঙই, ঐখোয়গী সংবিধান্দা ইনক্লুজন্দা কয়াদা শাফু পীরিবা। অদুবু মসিসু অচুম্বনি মদুদি নীং খা তম্বগী চহি তরাগী খুজিং কয়াগী মতুংদসু মশিংনা লৈবাক অসিগী মীয়াম্না ইনক্লুজন অসি মায়োক্ননবা শাফু পীরি। অদুগুম্বা ময়ুমদা অমাংশঙ ফাওবা লৈতবা মীওই করোর কয়া, মৈ ফংদবনা মরম ওইদুনা অমম্বদা মপুন্সি লেনখিবা অদুগুম্বা মীওই করোর কয়া, মখোয়গী পুন্সিগীদমক্তা খ্বাইদগী চাউবা লানফম, য়ুমগীদমক্তা ঈশিং খজিক্তং থিগদবা, অদুগুম্বা মীওই করোর কয়াগী অৱাবা খঙজদুনা, মখোয়গী পুন্সি মহিং লাইথোকহন্নবা মশাবু কৎথোকচবা, ঐনা সংবিধানগী অশেংবা ইকাই খুম্নবা ওইনা লৌজৈ। অমসুং মরম অসিনা, ঙসি ঐহাক অপেনবা পোকচৈ মদুদি লৈবাক অসিদা, সংবিধানগী মরুওইবা ৱাখল্লোন অসিগী মতুং ইন্না, এক্সক্লুজনবু ইনক্লুজন্দা ওন্থোক্নবগী অহৌবা খোঙজং খোঙজেল য়াংনা চংশিল্লি। অমসুং মসিগী খ্বাইদগী চাউবা কান্নবা করি ফংলে হায়বসিসু ঐখোয়না খঙগদবনি। করোর ২দগী হেনবা লাইরবশিং অদু ঙসিদি মশাগী পক্কাগী য়ুম ফংলে, করোর ৮দগী হেনবা লাইরবা ইমুংনা উজ্জ্বালা য়োজনাগী মখাদা লেম্না গ্যাস কনেক্সন ফংলে, করোর ৫০দগী হেনবা লাইরবশিংবু খ্বাইদগী চাউবা হোস্পিতালশিংদা লুপা লাখ ৫ ফাওবগী লেম্না লায়েংবা ফংহল্লে, অহানবা ওইনা ইন্স্যুরেন্স অমসুং পেন্সনগুম্বা বেসিক ফেসিলিতীশিং ফংলবা লাইরবা করোর কয়া অদুগী পুন্সিগী য়াম্না চাউবা অৱাবা কোক্লে, স্কিমশিং অসি মখোয়গীদমক্তা অচৌবা থৌনা অমা ওইরি। কোরোনাগী মতম অসিদা হৌখিবা থা কয়াদগী মীওই করোর ৮০দগী হেনবদা লেম্না চেং ফংহল্লে। প্রধান মন্ত্রী গরীব কল্যান অন্ন য়োজনাদা সরকারনা লুপা করোর লাখ ২ লিশিং ৬০দগী হেনবা শেনফম চাদিং তৌদুনা লাইরবশিংদা লেম্না চেং ফংহল্লি। ঙরাং মক্তদা ঐখোয়না স্কিম অসি মথংগী চহি মার্চ ফাওবা শাংদোকহনখ্রে। ঐখোয়গী দিরেক্তিব প্রিন্সিপল্সনা হায়রি – “সিতিজেন্স, মেন এন্দ ৱুমেন ইক্বুএল্লী, হেব দ রাইৎ তু এন এদিক্বেৎ মীন্স ওফ লাইলিহুদ” মসি ৱাখল্লোন অসিমক্কী মমিনি। অদোম পুম্নমক মসি য়াবীগনি মদুদি লৈবাক্কী মীচম মীয়াম্না, লৈবাক্কী লাইরবশিংনা, চাউখৎপগী মরুওইবা ইচেল অদুগা পুল্লবদি, মতম অদুদা মখোয় ইক্বেলিতী অমসুং ইক্বেল ওপর্চুনিতী ফংই, অদুনা মখোয়গী তাইবঙ অদু মপুং ফানা হোদোকই।
খঙ হৈরবশিং,
সবকা সাথ-সবকা বিকাস, সবকা বিশ্বাস-সবকা প্রয়াস, মসি সংবিধানগী ৱাখল্লোনগী খ্বাইদগী অচেৎপা থৌওংনি। সংবিধানগীদমক্তা কৎথোক্লবা সরকার, চাউখৎ-থৌরাংদা খেন্নবা থমদে অমসুং মসি ঐখোয়না তৌদুনা উৎলে। করিগুম্বা মতম অমদা ইনাক-কৈরাক খুল্লবা মীওই খক্তনা ফংলম্বা ক্বালিতী ইনফ্রাস্ত্রকচর অদু ফাওবা এক্সেস ঙসিদি খ্বাইদগী লাইরববুসু ফংহল্লে। ঙসি লদ্দাখ, অন্দমান অমসুং নিকোবর, নোর্থ ইস্তকী চাউখৎ-থৌরাংদসু লৈবাক অসিনা দিল্লী অমসুং মুম্বৈগুম্বা মেত্রো শহরশিংদা চংবা মিৎয়েং অদুমক চংলি। অদুবু পুম্নমক অসিগী মরক্তা, ঐহাক অতোপ্পা ৱাফম অমগী মায়কৈদা অদোমগী পুক্নীং চিংশিঞ্জগে। অদোম্নসু শোইদনা থেংনবীরমগনি মদুদি সরকারনা অখন্নবা কাংলুপ অমগীদমক, অখন্নবা অপীকপা শরুক অমগীদমক করিগুম্বা খরা তৌরবদি, মদু লিবরেল ওই হায়বী, মদুগীদমক য়াম্না থাগৎপী। হৌখিবা চহি তরেৎ অসিদা ঐখোয়না খেন্নবা অমত্তা থমদনা, মীংচং-শঙ্গ নাইদনা, চাউখৎ-থৌরাং অসি মীপুং খুদিংমক্তা, কাংলুপ খুদিংমক্তা, অমসুং লৈবাক্কী কাচিন-কোয়া পুম্নমক্তা য়ৌহন্নবা হৌৎনখি। চহি অসিগী ওগস্ত ১৫দা ঐনা লাইরবগী য়াইফ-থৌরাংগা মরী লৈনবা স্কিমশিংগী সেচুরেসনগী ৱাফং পনখি অমসুং মসিগীদমক্তা ঐখোয় মিশন মোদতা থবকসু পায়খৎখি। সর্বজন হিতায়, সর্বজন সুখায়, মন্ত্র অসি শোন্দুনা থবক তৌনবা ঐখোয়না হোৎনখি। ঙসি মসিদগী লৈবাক্কী শক্তম করম্না হোংলিবা মসি ঐখোয় হন্দক্কী নেস্নেল ফেমিলী হেল্থ সর্ভে রিপোর্ত্তসু উবা ফংলে। ঝেন্দর ইক্বেলিতীগী ৱাফম পল্লগদি হৌজিক নুপাগা য়েংনবদা ইচানুপীশিংগী মশিং হেনগৎলক্লি। মীরোনবী নুপীশিংনা হোস্পিতালদা দিলিবরী তৌবগী হেন্না খুদোংচাবা ফংলে। মরম অসিদগী মমা শিবগী চাং, অঙাং শিবগী চাং হন্থরক্লি। মসিদা ঐখোয়না লৈবাক অমা ওইনা য়াম্না ফনা তৌবগী ইন্দিকেতর্স ময়াম অমসু লৈরি। হায়রিবা ইন্দিকেতর্স পুম্নমক অসিদা পরসেন্তেজ পোইন্ত খুদিংমক্কী হেনগৎলকপা অদু শুপ্নগী মশক অদুতা নত্তে। মসি ভারত মচা করোর কয়ানা ফংলিবা মদুগী প্রমান অমনি। মসি য়াম্না মথৌ তাই মদুদি, মীয়ামগী য়াইফ-থৌরাংগা মরী লৈনবা স্কিমশিংগী মপুং ফানা কান্নবা মীয়াম্না ফংবা, ইনফ্রাস্ত্রকচরকা মরী লৈনবা প্রোজেক্তশিং মতম চানা লোইশিনবা। মরম অমা হেক্তদগী ওইরকপা মথৌ তাদবা থেংথবনা মীয়াম্বু মখোয়গী হক ফংহন্দে। ঐহাক গুজরাত্তা লৈজবনি অদুনা ঐ সরদার সরোবর দামগী খুদম পীবা পাম্মি। সরদার পতেলনা ইমা নর্মদাদা অসিগুম্বা মখলগী দাম অমগী মঙলান মঙজখি। পন্দিৎ নেহরুনা মদুগী উরেপ-উয়ুং তমখি। অদুবু প্রোজেক্ত অসি চহি তরাগী খুজিং কয়া পন্দুনা লৈখি। ইভাইরনমেন্তকী মিংদা চৎথবা খোঙজংগী মিংদা পন্দুনা লৈখি। কোর্ত ফাওবনা মসিগী মতাংদা ৱারেপ লৌবদা নীংজানখি। ৱর্ল্দ বেঙ্কনসু মসিগীদমক্তা শেল থাদবদা অথিংবা থম্লকখি। অদুবু নর্মদা অদুগী ঈশিংদগী কচ্ছদা ওইরিবা চাউখৎপা অদুনা, চাউখৎ-থৌরাংগী থবক অদুনা, ঙসি হিন্দুস্তানগী খোঙজেল য়াংনা মাংদা চংখৎলিবা দিস্ত্রিকশিংগী মনুংদা কচ্ছ জিলাসু অমা ওইহল্লে। অমরোমদা কচছদি লৈকংলাগুম্বা লমদম অমনি, খোঙজেল য়াংনা চাউখৎলক্লিবা লমদমদা মসিগী মফম য়াওখ্রে। করিগুম্বদা লৈঙোই লম অমা ওইনা খঙনরম্বা কচ্ছ, মফম অদুবু থাদোক্তুনা চৎনরম্বগীদমক খঙনরম্বা কচ্ছ, ঙসি এগ্রো-এক্সপোর্তকী মরমদগী মশাগী শক্তাক ওইররে। মসিদগী হেন্না চাউবা গ্রীন এৱার্দ করি অমুক ওইগনি?
ইকাই খুমনজরিবশিং,
ভারতকীদমক্তা, অমসুং মালেমগী লৈবাক কয়াগীদমক্তা, ঐখোয়গী মীরোল কয়াগীদমক্তা, লোইলমগী লাংদা লৌশিন্দুনা হিংবা তারম্মি। ভারতকী নীং খা তম্বগী মতমদগী, মালেম অপুনবা অসিদা পোস্ত-কোলোনিএলগী মতম অমা হৌখি, লৈবাক কয়া মনীং মখা তমখি। ঙসিদি অতোপ্পা লৈবাক্কী লোইলম ওইনা হকথেংননা এগজিস্ত তৌবা কনাগুম্বা লৈবাক অমত্তা লৈত্রে। অদুবু মসি লোইলমগী ৱাখল্লোন, কোলোনিএল মাইন্দসেৎ লোইখ্রে হায়বদি নত্তে। ঐখোয়না উরি মদুদি ৱাখল্লোন্না মশক কয়া পোকহল্লি। মসিগী খ্বাইদগী ময়েক শেংবা খুদম ঐখোয়না চাউখৎলক্লিবা লৈবাকশিংগী চাউখৎ-থৌরাংগী খোংচৎতা লাক্লিবা অপনবশিং অসিদা উবা ফংই। অদুগুম্বা পাম্বৈশিং অদুনা, অদুগুম্বা লম্বীশিং অদুদা চৎতুনা, চাউখৎলবা মালেম অসি ঙসিগী থাক অসিদা য়ৌরক্লিবা, ঙসি পাম্বৈ অদুমক, লম্বী অদুমক, চাউখৎলক্লিবা লৈবাকশিংগীদমক থিংজিন্নবা হোৎনরি। হৌখিবা চহি তরাগী খুজিং কয়াদা মসিগীদমক তোঙান তোঙানবা মখলগী ৱাহৈশিংগী লাং থাক্লি। অদুবু পান্দমদি অমখক্তমক ওইরি – চাউখৎলক্লিবা লৈবাকশিংগী চাউখৎ-থৌরাং থিংজিনবা। ঙসি-ঙরাং ঐখোয়না উরে মদুদি অকোইবগী ফিভমগী হিরমদসু থবক অসিগীদমক্তা হাইজেক তৌনবা হোৎনরি। চয়োল খরগী মমাংদা ঐখোয়না সি.ও.পি.-২৬ সমিৎতা মসিগী অচংবা খুদম উখ্রে। করিগুম্বা এবসোলুৎ কম্যুলেতিব ইমিসন্সকী মতাংদা পল্লবদি, চাউখৎলবা লৈবাকশিংনা অমত্তা ওইনা পুন্সিন্দুনা ১৮৫০দগী হৌজিক ফাওবা, ভারত্তগী শরুক ১৫ ইমিসন তৌখ্রে। করিগুম্বা ঐখোয়না পার কেপিতেল বেসিসকী মতাংদা পল্লবসু চাউখৎলবা লৈবাকশিংনা ভারতকা য়েংনরুবদা শরুক ১৫ হেন্না ইমিসন তৌই। অমেরিকা অমসুং য়ুরোপিয়ন য়ুনিয়ন্না অমত্তা ওইনা পুন্দুনা ভারতকা য়েংনবদা শরুক ১১ হেন্না এবসোলুৎ কম্যুলেতিব ইমিসন তৌই। মসিদসু পার কেপিতা বেসিস অসিদা য়ুম্ফম ওইরবদি অমেরিকা অমসুং য়ুরোপিয়ন য়ুনিয়ন্না ভারতকা য়েংনবদা শরুক ২০ হেন্না ইমিসন তৌই। অদুমওইনমক, ঙসি ঐখোয় চাউথোকচরি মদুদি ভারত অসি মসিগী সিবিলাইজেসন অমসুং চৎনবী-নাৎ মক্তদা মহৌশাগা লোইননা হিংবগী চৎনবী লৈজৈ, মফম অসিদা নুঙশিংদা, উপালশিংদা, অমসুং মহৌশাগী শরুক খুদিংমক্তা, মফম অসিদা নুঙবু লাই ওইনা লাৎলি, মদুগী মশক উবা ফংই, মফম অসিদা লৈবাকপু ইমা ওইনা খুরুমনৈ, অদুগুম্বা ভারত্তা অকোইবগী ফিভম ঙাক-শেনবগী মতাংদা পাউতাক পীরি। অমসুং ঐখোয়গীদমক্তদি মগুনশিং অসি লাইরিক খক্তা নত্তে, লাইরিক্তা ইবা ৱাফম খক্তা নত্তে। ঙসি ভারত্তা লাইওন, তাইগর, দোলফিন্নচিংবগী মশিং, অমসুং মখল কয়াগী বাইওদাইবর্সিতীগী থাকশিংদা লেপ্তনা ফগৎলক্লি। কোলোনিএল মাইন্দসেৎ অসিগী মরমদগী, ভারতকুম্বা লৈবাক্তা, চাউখৎনবগীদমক হোৎনরিবা লৈবাকশিংদা, আশা কয়া কাইরি, অপামবা কয়া থুংদ্রি। নীং খা তম্বগী খোঙজংদা ফাওখিবা ৱারেপ লৌবগী থৌনা অদু হেন্না মপাঙ্গল কলহনবদা কোলোনিএল মাইন্দসেৎ অসি য়াম্না চাউবা পলনি। ঐখোয়না মসি লাপথোকহনখিগদবনি। মসিগীদমক্তা, ঐখোয়গী খ্বাইদগী চাউবা পাঙ্গল, ঐখোয়গী খ্বাইদগী চাউবা ইথিলগী হৌরকফম, ঐখোয়গী সংবিধান্নি।
ইকাই খুমনজরিবশিং,
সরকার অমসুং জুদিসিএরী, অনিমক সংবিধান্দগী পোকখিবনি। মরম অসিনা, অনিমক ফাইবোক্নি। সংবিধানগী মরমদগী অনি অসি থোরকখিবনি। মরম অসিনা, পাক চাউনা য়েংলুরগদি তোঙান তোঙান ওইজরবসু অনিমক অমনা অমগী মখা পোন্নৈ।
ঐখোয়গী অসিদা শাস্ত্রশিংদসু হায়রি -
এক্যম বলম সমাজস্য, তৎ অভাবে স দুর্বলঃ।
তস্মাৎ এক্যম প্রশান্তি, বৃধম রাস্ত্র হিতৈশিনঃ॥
হায়বদি, কনাগুম্বা খুন্নাইগী, লৈবাক্কী পাঙ্গল মদুগী অপুনবা অমসুং অমত্তা ওইবা অদু হোৎনবশিংদা লৈ। মরম অসিনা, অকনবা লৈবাক অমা পাম্বশিং অদু অপুনববু থাজৈ, মদুদা শাফু পী। লৈবাক্কী কান্নববু মরুওইনা থমদুনা অমত্তা ওইবা অসি লৈবাক অসিগী লুপ পুম্নমক্কী হোৎনবশিং অদুদা য়াওহনগদবনি। ঙসি লৈবাক অসিগী অমৃতকাল অসিদা মশাগীদমক্তা তোপ তোপ্পা পান্দম লেপচরিবা অসিদা, চহি তরাগী খুজিং কয়া লিরবা সমস্যাশিংগী পাম্বৈ থিদোক্তুনা অনৌবা তুংলমচৎগীদমক্তা ৱারেপ লৌরি। মরম অসিনা, লৈবাক অসিনা লাক্কদৌরিবা চহি ২৫গীদমক্তা লৈবাক অসিনা নীং খা তম্বগী ২৫শুবা চহি চা পাংথোরক্কনি অমসুং মরম অসিনা ‘সবকা প্রয়াস’ অসি লৈবাক অসিনা লাওথোক্লি। তশেংনমক খোল্লাও অসিদা অচৌবা থৌদাং অমদি জুদিসিএরীনা লৌরি।
ইবোংঙোশিং,
ঐখোয়না ৱারী শানবা অসিদা কাওথোকপা লৈতনা ৱাফম অমা লেপ্তনা তাদুনা লাক্লি, হন্না হন্না মসি পল্লি – সেপরেসন ওফ পাৱর। সেপরেসন ওফ পাৱরগী ৱাফম, জুদিসিএরী ওইরো, এগজিক্যুতিব নত্ত্রগা লেজিসলেচরবু ওইরো, মশানা অদুম্মক মরুওইবা ওইদুনা লাক্লি। মসিগা লোইননা, নীং খা তম্বগী অমৃতকী মতম অসিদা, ভারতকী নীং খা তম্বগী চহি ১০০ মপুং ফারকপা ফাওবা, মসিগী অমৃতকী মতম অসি, সংবিধানগী ৱাখল্লোনগী মতুং ইন্না, কলেক্তিব রিজোল্ব উৎপগী মথৌ তাই। ঙসি লৈবাক অসিগী মীচম মীয়ামগী মফমদা লৈরিবা পুম্নমক অসিদগী হেন্না ফংনীংঙাই হক লৈ। ঐখোয়না নীং খা তম্বগী চহি চাম্মশুবা থৌরম পাংথোকপদা, মতম অদুগী ভারত করি ওইগনি, মসিগীদমক্তা ঙসিমক থবক তৌগদবনি। মরম অসিনা, লৈবাক অসিগী অনীংবা অপাম্বশিং অদু মপুং ফাহন্নবগী কলেক্তিব রেস্পোন্সিবিলিতীগী লম্বী লেপথোক্কদবনি, রোদমেপ শেমগদবনি পান্দম লেপথোক্তুনা পন্থুং অদু ফাওবা লৈবাক অসি য়ৌহনগদবনি।
ইকাই খুমনজরিবশিং,
কোরোনাগী মতমনা জস্তিস দেলিবরীদা তেক্নোলোজী শিজিন্নবগী মতাংদা অনৌবা থাজবা পোকহল্লে। দিজিতেল ইন্দিয়াগী মেগা মিশন্দা জুদিসিএরীনা শরুক য়ারি। লিশিং ১৮ হেনবা কোর্তপু কম্প্যুতরাইজ তৌবা, কোর্ত কম্প্লেক্স চাদা ৯৮গী ৱাইদ এরিয়া নেতৱর্ক্কা শম্বা, রিয়েল তাইমদা জুদিসিএল দেতাগী ত্রান্সমিশনগীদমক্তা নেস্নেল জুদিসিএল দেতা গ্রিদ ফঙ্কস্নেল তৌবা, ই-কোর্ত প্লেৎফোর্ম মীওই লাখ কয়াদা য়ৌহনবা, মসিনা তাক্লি মদুদি ঙসি তেক্নোলোজী অসি ঐখোয়গী জস্তিস সিস্তেমগী অচৌবা পাঙ্গল ওইখ্রে, অমসুং লাক্কদৌরিবা মতম অসিদা ঐখোয় এদভান্স জুদিসিএরী অমনা থবক তৌবা উরগনি। মতম অসি হোংবা নাই, মালেম অসি হোংদুনতা লৈ, অদুবু অহোংবা অসি মীওইবগীদমক্তা ইবোলুসনগী মরা ওইরি। মসি মরম অসিদগীনি মদুদি মীওইবনা অসিগুম্বা অহোংবা পুম্নমক অসি লৌশিল্লি। ঐখোয়গী পান্দম মান্নরসি, ঐখোয়গী পুক্নীং মান্নরসি অমসুং অমত্তা ওইনা পুন্না পান্দম অসি ফংহল্লসি। ৱাখল্লোন অসিগা লোইননা ঙসি ঐনা সংবিধান নুমিৎকী শেংলবা থৌরম অসিদা অদোম পুম্নমকপু, ইরৈচাশিংবুসু য়াইফ-পাউজেল পীজরদুনা ঐগী ৱাহৈ লোইশিঞ্জরি। অমুক্কা হন্না অদোম পুম্নমকপু থাগৎচরি।
হন্না হন্না থাগৎচরি!
