হর হর মহাদেব। হর হর মহাদেব। নম পার্বতী পতয়ে, হর হর মহাদেব। ইমা অন্নপুর্ননা য়াইফরে। গঙ্গা ইমানা য়াইফরে। পুৱারী ওইহৌরগদবা থৌরম অসিদা শরুক য়াবীরিবা উত্তর প্রদেশকী রাজ্যপাল শ্রীমতী আনন্দী বেন পতেলজী, উত্তর প্রদেশকী মুখ্য মন্ত্রী কর্ময়োগী শ্রী য়োগী আদিত্যনাথজী, ভারতীয় জনতা পার্তীগী নেস্নেল প্রসিদেন্ত, ঐখোয় পুম্নমকপু লমজিংবীরিবা শ্রী জে.পি. নদ্দাজী, উপ মুখ্য মন্ত্রী ভাই কেশব প্রসাদ মোর্য়াজী, দিনেশ শর্মাজী, কেন্দ্রী মন্ত্রী পরিসদতা ঐহাক্কী মরুপ ওইরিবা মহেন্দ্র নাথ পান্দেজী, উত্তর প্রদেশকী বারতীয় জনতা পার্তীগী প্রসিদেন্ত স্বতন্ত্রদেব সিংহজী, মফম অসিদা মন্ত্রী ওইরিবা শ্রী নীলকান্থ তিৱারীজী, লৈবাক অসিগী কাচিন-কোয়াদগী লেংবীরক্লিবা ইকাই খুম্নরবা সন্তশিং, অমসুং ঐহাক্কী নুংশিরবা কাশীগী মীয়াম অমসুং লৈবাক অসিগী অমদি মপালদগী য়াইফবা থৌরম অসিবু মীৎয়েং তাবীরিবা মীওই পুম্নমক! কাশীগী ইচিল-ইনাও পুম্নমক্কা লোয়ননা ঐখোয়না বাবা বিশ্বনাথকী খুয়া খাদা ইকোক নোন্না থৌনিজরি। ইমা অন্নপুর্নগী খুয়া খাদা হন্না-হন্না চংজরি। হৌজিক ঐহাক বাবাগা লোয়ননা নগর কোতৱাল কালভৈরবজী খুরুমলুরবা মতুংদা লাকচবনি, ইরৈবাকচাশিংগীদমক মহাক্কী থৌজালশিং পুদুনা লাক্লি। কাশীদা করিগুম্বা অখন্নবা অমা লৈরবা, অনৌবা অমা হেক্তা লৈবা মতমদা মঙোন্দা হঙবা মথৌ তাই। ঐহাক্না কাশীগী কোতৱালগী খুয়া খাদাসু খুরুমজরি। ঐহাক্না কাশীগী কোতৱালগী খুয়া খাদা থৌনিজখি। গঙ্গা তরঙ্গ রমনীয় জতা-কলাপম, গৌরী নিরন্তর বিভুসিত বাম –ভাগম্নারায়ন প্রিয়-মনঙ্গ-মদাপ-হারম, বারানসী পুর-পতিম ভজ বিশ্বনাথম। ঐহাক্না বাবা বিশ্বনাথকী দরবারদগী মসিগী কত্থোকপা অথোইবা থৌরম অসি মখোয়গী মশাগী ময়ুমশিংদগী মীৎয়েং তারিবা লৈবাক অসিগী অমদি মালেম মীওই খুদিংমক্তা ইকোক নোন্না খুরুমজরি। ঐহাক্না য়াইফরবা মীকুপ অসি ওইথোকহল্লিবা কাশীগী মীয়াম পুম্নমকপু ইকাই খুম্নবা উৎচরি। মীওই খুদিংমক্কী থমোয় অসি হরাও-নুংঙাইবনা থল্লি। ময়াম পুম্নমকপু হন্না-হন্না থাগৎপা ফোঙদোকচরি।
মরুপশিং,
ঐখোয়গী পুরানশিংদা অসুম্না হায়বীরম্মি মদুদি কনাগুম্বা মনা কাশীদা চংলকপা মতমদা তুরৈ-ইরৈ চেল্লবা পুম্নমক অদু কোকই। ভগৱাব বিশ্বেশ্বরগী থৌজালনা, ঈশ্বরগী ওইবা শক্তি অমনা মফম অসিদা লাকপগা ঐখোয়গী নুংগী ওইবা আত্মা অসি য়কাইহল্লি। অমসুং ঙসি, ঙসি অসি তাইবংপালবু শেম্বীরিবা চৈতন্য কাশীগী অকোইবদা ওইরিবা মীফম অসিদা তোখাইবা মওং অমা উবা ফংই! ঙসি আদী কাশীগী মহৌশাগী কাংলোন্দা তোখাইবা মওং মতৌ অমা উবা ফংই! ঙসি বনারসতা ৱাখল্লোন্দা তোখাইবা শক্তি অমা উবা ফংই! ঐখোয়না শাস্ত্রশিংদা তাই মদুদি করিগুম্বা য়াইফরবা থৌরম অমা পাঙথোকপা মতমদা তীর্থ পুম্নমক, ঈশ্বরগী শক্তি পুম্নমক বনারসকীতা বাবাদা লৈ। ঙসি ঐহাক্না বাবাগী সরবারদা লাকপদা মসিগী মান্নবা এক্সপরিয়েন্স অমা ফংলি। মসি ঐখোয়গী অকোইবদা লৈরিবা অপুনবা তাইবংপাল অসিগা শম্নবা মাল্লি। অদুম ওইনমক বাবা খক্তনা মহাক্কী মায়াগী অকুপ্পা মরোল খঙগনি, অদুবু ঐখোয় মীওইবনা উবা ঙম্বদা মালেম পুম্বা অসি মীকুপ অসিদা মসিগী ‘বিশ্বনাথ ধাম’গী শেংলবা থৌরম অসিনা শম্নহল্লি।
মরুপশিং,
ঙসি অসি ভগৱান শিবনা পামজবা নুমিৎ, নীংথৌকাবনি, ঙসি বিক্রম সমৱত লিশিং অনিগা হুমফুতরা নিপান, মার্গশীর্স শুক্লপক্ষ, দশামী তিথিগী অনৌবা পুৱারী অমা শেম্লি। অমসুং নুমিৎ অসি উবা ফংজবা ঐখোয়গী লাইবক ফবনি। ঙসি বিশ্বনাথ ধাম অসি ৱাখলনা লাম্বা ফংবদা-লোইনাইদ্রবা শক্তিনা থল্লি। মসিগী মগুন অসি হেনগৎলক্লি। মসিগী অখন্নবা গুন অতিয়া পক্না য়ৌরি। মফম অসিদগী মাংখ্রবা অরিবা লাইশঙ কয়া অমুক হন্না শেমগৎখি। বাবানা চহিচা কয়া মহাক্কী ভক্তাশিংগী শেবদা অপেনবা পোকই অদুনা মহাক্না ঐখোয় পুম্নমকপু ঙসিগী নুমিৎ অসিদা থৌজানবীরি। বিশ্বনাথ ধামগী অনৌবা কম্প্লেক্স অসি শুপ্নগী অনৌবা দলন খক্তা নত্তে, মসি ভারতকী সনাতন ধর্মগী খুদম অমনি! মসি ঐখোয়গী লাইনিংগী ওইবা থৱায় অদুগী খুদম অমনি! মসি ভারতকী অরিবা মতম, চৎনবীশিংগী খুদম অমনি! ভারতকী থৌনা লিংজেল অমসুং খুমাং চাউশিল্লিবা অসিগী খুদম অমনি! ভারতকী থৌনা লিংজেল অমসুং খুমাং চাউশিল্লিবা অসিগী খুদম অমনি। অদোম্না মফম অসিদা লাকপা মতমদা লাইনীং-লাইশোনগী ওইবা থাজবা খক্তা উরোই। অদোম্না মফম অসিদা হৌখিবা মতমগী নীংথিজবা অদুসু ফংওগনি। অরিবা মতম অমসুং অনৌবা অসি করম্না পুনশিন্নবগে, অরিবা মতমগী ইথিলশিং অদুনা তুংলমচৎকী মাইকৈ করম্না তাকপগে, ঐখোয়না বিশ্বনাথ ধাম কম্প্লেক্সতা মসিগী হকথেংননা উবা ফংলি।
মরুপশিং,
অৱাং তম্না চেল্লুরবা মতুংদা বাবাগী চরনবু চামথোক্নবা কাশীদা চেল্লিবা ইমা গঙ্গা অসি ঙসি য়াম্না হরাওরমগনি। হৌজিক ভগৱান বিশ্বনাথকী খুয়া খাদা কোক নোন্দুনা থৌনিবদা অমসুং ধ্যান তৌবা মতমদা ইমা গঙ্গাদগী হুমলকপা নুংশিৎনা ঐখোয়দা থৌজাল পীনগনি। অমসুং ইমা গঙ্গানা মনী তম্লবা মতমদা, হরাওরবা মতমদা বাবাগী ধ্যান তৌবা অসিদসু ঐখোয়না ‘গঙ্গাগী ইথকশিংদা মুরুম-মুরুম শোনবগী’ খোঞ্জেল তাবা ফংগনি। বাবা বিশ্বনাথ অসি মীপুম খুদিংমক্কীনি, ইমা গঙ্গা অসি মীপুম খুদিংমক্কীনি। মহাক্কী থৌজাল অসি ঐখোয় পুম্নমক্কীনি। অদুবু ফীভম অমদি মতমনা মরম ওইরগা বাবা অমসুং ইমা গঙ্গাগী শেবা ফংজবা অসি অৱাবা ওই, মীওই খুদিংমক্না মফম অসিদা লাক্নীংই। অদুবু লম্বী অমসুং মতম লৈখিদে। অহল ওইরবশিং, মীমান্নদ্রবশিংগী ওইনা মফম অসিদা লাকপা য়াম্না অৱাবা ওই। অদুবু হৌজিক্তি ‘বিশ্বনাথ ধাম প্রোজেক্ত’ লোইশিনখিবগা লোয়ননা মীপুম খুদিংমক্না মফম অসিদা লাকপদা লাইরগনি। ঐখোয়গী মীমান্নদ্রবা ইচিল-ইনাওশিং, অহল ওইরবা ইমা-ইপাশিংনা হীদগী জেতীদা হকথেংননা লাকপা য়ারগনি। জেতী অসি তম্না এস্কলেতর শেমদুনা থম্লে। মফম অসিদগী অদোম্না লাইশঙদা অদুমক য়ৌরগনি। মমাংদা অখুবা লম্বেলশিং ওইবনা কনাগুম্বা অমনা পুং কয়া ঙাইবা মথৌ তারম্মি। মতম অদুদা থেংনখিবা সমস্য কয়া ঙসিদি হন্থহনখ্রে। মমাংদা লাইশঙ অসিগী লম অসি স্ক্যের ফুৎ লিশিং অহুম খক্তা ওইরমখি হায়রিবা অসি হৌজিক্তি স্ক্যের ফুৎ লাখ ৫রোম চাউথোকহনখ্রে। হৌজিক ভক্তা লিশিং ৫০দগী ৭৫না লাইশঙ অসিদা অমসুং লাইশঙনা কোল্লিবা মফম অসিদা লাকপা য়ারগনি। হায়বদি অহানবদা ইমা গঙ্গাগী দর্শন-স্নান, অমসুং মদুদগী বিশ্বনাথ ধাম তম্না চৎকনি। অমুক হন্না হান্না লৈরম্বা মওং অদুদা মাইপাক্না শেমগৎপা ঙমজরে। হর হর মহাদেব!
মরুপশিং,
ঐহাক্না বনারসতা লাকপদা ঐঙোন্দা থাজবা অমগা লোয়ননা লাকখি। ঐহাক্না ইশাদগী হেন্না বনারসকী মীয়ামদা থাজবা থম্মি। ঙসি অসি মদু নীংশিংবগী মতমদি নত্তে অদুবু মীওই খরনা মতম অদুদা বনারসকী মীয়ামগী শক্তিদা চীংনবা পোকপা য়াওখিবা অদু ঐহাক্না নীংশিংলি। মখোয়না অসুম্না হায়খি “মসি করম্না ওইথোক্কনি… মসি ওইথোক্লোই..মসিগী মোদীজী অসি মশানা মশাবু য়াম্না চাউনা খঞ্জৈ!” বনারসকী মরমদা অসিগুম্বা ৱাখল্লোন অসি মখোয়গী ৱাখলশিংদা করম্না পোক্লিবনো খনবদা ঐহাক্না অঙকপা পোকই। অসুম্না ৱাখল্লোনশিং ফোঙদোক্নরকখি! মসিগী ইথিল অসি বনারসতগী নত্তে! মসিদা রাজনিতীগী খুৎ চংখি, মসিদা লনাইগী ওইবা কান্নবা য়াওখি অদুনা বনারসতা মরাল শীজনখি। অদুবু কাশীদি কাশীনি! মসি মুৎপা নাইরোই। কাশীদা সরকার অমা খক্তা লৈ, মখুত্তা দমরু পাইবা মীওইশিং অদুনা মখোয়গী সরকারনি। গঙ্গানা মশাগী ইচেল হৌদোক্তুনা চেনবা ঙম্বা মফম ওইরিবা, কাশীবু কনানা থিংবা ঙমগনি? কাশীখন্দদা লেপ্তুনা ভগৱান শঙ্কর মশা মক্না অসুম্না হায়রমখি - “বিনা মমপ্রসাদম বৈ, ক: কাশী প্রি-ওধ্যতে”। হায়বরি ঐহাক্কী অয়াবা য়াওদনা কনানা কাশীদা লাকপা ঙমগনি, কনানা খুদুম চনবা ঙমগনি? মহাদেবকী অয়াবা য়াওদনা কনা অমত্তনা কাশীদা লাক্তে, মহাক্কী অয়াবা য়াওদনা মফম অসিদা করিগুম্বা অমত্তা পাঙথোকপা ঙমদে। মফম অসিদা পাঙথোক্লিবা খুদিমক, পুম্নমক মহাদেবকী অয়াবা, মহাক্কী থৌজালশিং য়াওরগা পাঙথোকই। মফম অসিদা থোক্লিবা পুম্নমক মহাদেবনা থোকহনবনি। মসিগী বিশ্বনাথ ধাম অসি বাবাগী থৌজালগা লোয়ননা মহাক্না শাহনবনু। মহাক্কী অয়াবা য়াওদনা উনা ফাওবা লেংবা ঙমদে? মহাক্না মনা চাউরবসু মহাক মশাগী য়ুমদা অদুমক লৈগনি, কৌরবসু মহাক খক্তনা মফম অসিদা লাকপা ঙম্মি, মহাক্না পুম্নমক তৌবা ঙম্মি।
মরুপশিং,
করিগুম্বা কনাগুম্বনা বাবাদা য়োগতান তৌরবদি মহাক অদু বাবাগী কাংলুপ্তা চল্লি। বাবাগী কাংলুপ হায়বগী ৱাহন্থোক্তি মহাদেব মশামক্কী শক্লোন লৌরিবা ঐখোয়গী কাশীৱাসী পুম্নমক অসিনি। বাবানা মহাক্কী শক্তি অসি উৎথোক্নবা হোৎনবা মতমদা মহাক্না কাশীগী মীয়ামগী খুত্থাংদা উৎলি। মদু কাশীনা পাঙথোকই অমসুং মালেমনা উবা ফংই। “ইদম শিবায়, ইদম ন মম”
ইচিল-ইনাওশিং,
ঙসি ঐখোয়না অচৌবা কম্প্লেক্স অসি শাবদা হুমাং তানা হোৎনখিবা শিন্মী ইচিল-ইনাও খুদিংমক্তা ঐহাক্না তৌবীমল খঙবা উৎচরি। কোরোনাগী মতমদসু মখোয়না মফম অসিদা থবক শুবা লেপখিদে। ঐহাক্না শিন্মীশিং অদুগা উন্নবগী অমদি মখোয়দা তৌবীমল খঙবা উৎচনবা খুদোংচাবা ফংজখি। ঐখোয়গী আর্তিসেনশিং, ঐখোয়গী সিভিল ইঞ্জিনীয়রিংগী মরী লৈনবা মীওইশিং, এদমিনিস্ত্রেসনগী মীওইশিং, মফম অসিদা মখোয়গী ময়ুমশিং লৈরিবা ইমুং-মনুংশিংদা ঐহাক্না থাগৎপা ফোঙদোকচরি। পুম্নমক অসিগা লোয়ননা ঐহাক্না য়ু.পি. সরকার, কাশী বিশ্বনাথ ধাম প্রোজেক্ত অসি লোইশিন্নবা চোকথবা লৈতনা হোৎনখিবা মুখ্য মন্ত্রী শ্রী য়োগী আদিত্যনাথপুসু থাগৎপা ফোঙদোকচরি।
মরুপশিং,
ঐখোয়গী বারানসী চহিচা খরা হিংলক্লে, অমাং অমতা থোকখিবগী পুৱারী থেংনরকখি, মতম কয়া লাক্তুনা হৌখ্রে! নীংথৌ পানবা লৈবাক কয়া শেমখি অমসুং লৈরোল নুংদা তিনখ্রে অদুবু বানারসতী হোংবা নাইদনা অদুমক লৈহৌরি, মহাক্কী মগুন মালেম শিনবা থুংবদা খঙহল্লি। বাবাগী লমদম অসি মুৎনাইদবা খক্তা নত্তনা মসিগী নীংথিজবা অসি মতম চুপ্পদা অঙকপা ওই অমসুং মালেমগী মীৎয়েং চংশিল্লি। মহৌশানা কোইশিন্দুনা লৈবা নীংথিজরবা কাশী অসিগী মতাংদা ঐখোয়গী পুরানশিংদা ইদুনা থম্লম্মি। করিগুম্বা ঐখোয়না স্ক্রিপচরশিংদা য়েংলুরবদি, শাস্ত্রশিং য়েংলুরবদি পুৱারী শেম্লম্বশিংনসু কাশী অসি উমং, পাৎ, পুখ্রিশিংনা কোইশিন্দুনা অঙকপা ফংনা নীংথিজরবা মহৌশাগী ওইবা মফম অমনি হায়নসু শন্দোক্না তাকলমখি। অদুবু মতম অসি লেংদনা লৈবা নত্তে। ইনভেন্দরশিংনা শহর অসিদা লান্দারকখি, মসিবু মঙহন্নবা হোৎনখি! ওরঙ্গজেবকী মীওৎ-মীনৈ অমসুং মহাক্কী তমথিবা পুৱারী অদু থেংনখি। মহাক্না থাং শীজিন্নদুনা সভ্যতা হোংদোক্নবা হোৎনখি, চৎনবীবু ফনাতিসিজমনা নমথনবা হোৎনখি! অদুবু লৈবাক অসিগী লৈপাক্তি মালেমগী অতোপ্পা মফমশিংগা খেন্নৈ। করিগুম্বা ওরঙ্গজেব মফম অসিদা লাক্লবদি শিবাজীসু থোক্কনি! করিগুম্বা সালার মসুদ লাক্লবদি নিংথৌ সুহেলদেবগুম্বা থৌনা ফবা লান্মীশিংনা ভারতকী অপুনবগী শক্তি অদু মশক তাক্কনি। অমসুং ব্রিতিশকী মতমদা ফাওবা কাশীগী মীয়াম্না হেস্তিঙ্গসদা করি তৌখি হায়বা কাশীগী মীয়াম্না তোইনা শোন্নৈ অমসুং কাশীশিংগী মচিলদগী মসি তাখি।
মরুপশিং,
ঙসি মতমগী খোঙজেল অসি য়েংবীয়ু, অকি অখং অসি পুৱারীগী অমম্বা তাঙ্কক্কী ইরোল নুংদা লৈখ্রে! অমসুং ঐখোয়গী কাশী অসি মাংদা চংশিল্লি, মখোয়গী মতিক ময়াইদা অনৌবা মঙাল অমা পীরি।
মরুপশিং,
কাশীগী মতাংদা ঐহাক্না হেন্না ঙাংবদা, হেন্না খুপথনা নৈনবদা ঐহাক হেন্না পুক্নিং নুশিরকই। কাশী অসি শুপ্নগী ৱাহৈ খরা খক্তগী ৱাফম নত্তে মসি সেন্সেসন পোকহল্লিবা ক্রিএসন অমনি। কাশী অসি – পুন্সিবু য়কাইহল্লিবা মফমনি। কাশী অসি – শীবা অসিসু কুহ্মৈ অমা ওইরিবা মফম অমনি। কাশী অসি – অচুম্বা অদুনা ধর্ম ওইরিবা মফমনি। কাশি অসি - নুংশিবনা চৎনবী ওইবা মফমনি।
ইচিল ইনাও,
ঐখোয়গী শাস্ত্রশিংদা কাশীগী মতিক ময়াইবু শৈথাদুনা ঈশৈ শকআ মতমদা ‘নেতি-নেতি’ হায়নসু হায়। হায়বদি মসিদা ফোঙদোক্লিবা অসি খক্তা নত্তে মসিদগী হেনবা কয়া লৈরি! ঐখোয়গী শাস্ত্রনা হায়রম্মি – “শিবম জ্ঞানম ইতি ব্রয়ু:, শিব শব্দার্থ চিন্তকা:” হায়বদি, শিববু নীংজবা মীওইশিংনা শিবগী মতাংদা লৌশিং ফংই। মরম অসিনা কাশী অসি শিবময়ীনি, কাশী অসি জ্ঞানময়ীনি। অমসুং মরম অসিনা লৌশিং, জ্ঞান অসি কাশী অমসুং ভারতকী মহৌশাগী ওইবা মগুন ওইরি। ভগৱান শিব মশামক্না হায়রমখি – “সর্ব ক্ষেত্রেসু ভু পৃস্থে, কাশী ক্ষেত্রম চ মে বপু:”। হায়বদি কাশী অসি পৃথিবীদা লৈরিবা লমদম পুম্নমক্কী ওইনা কাশী অসি ঐহাক্কী হকচাংনি। মরম অসিনা মফম অসিগী নুং, মফম অসিগী নুং খুদিংমক্তা শঙ্কর কাইদোংলি। অদুনা ঐখোয়না ঐখোয়গী কাশী অসি হিংই হায়না লৌই অমসুং ৱাখল্লোন অসিগা লোয়ননা ঐখোয়গী লৈবাক্কী পোৎশক খুদিংমক্তা ইমাং অমগী ৱাখল্লোন অদু পোকই। ঐখোয়গী শাস্ত্রশিংদা য়াওরিবা ৱাহৈ পরেং – “দৃশ্যতে সবর্গ সর্বৈ:, কাশ্বাম বিশ্বেশ্বর: তথা”।। হায়বদি কাশীগী মফ খুদিংমক্তা ভগৱান বিশ্বেশ্বরনা জিবা পানবা খুদিংমক্তা কাইদোংই। মরম অসিনা কাশীগী জিবশিং অসি শিবত্বকা মরী লৈ। ঐখোয়গী ঋসিশিংনা অসুম্না হায়রমখি মদুদি – “বিশ্বেশম শর্নম, য়ায়না, সমে বুদ্বি প্রদাস্যতি”। হায়বদি ভগৱান বিশ্বেশরগী খুয়া খাদা চংলজপদা লৌশিং হেনগৎলকই। বারানসী অসি জগদগুরু সঙ্করচর্য়্যনা শ্রী দোম রাজাজীগী অশেংবা মগুন অদুদগী ইথিল লৌখিবা শহর অদুনি, মহাক অসি লৈবাক অসিবু অপুনবা শক্তম্না অমত্তা ওইনা পুনশিন্নবা ফিরেপ লৌখি। মফম অসি গোস্বামী তুলসিদাসনা ভগৱান শঙ্করদগী ইথিল লৌবগা লোয়ননা রামচরিতমানসকুম্বা লাইরৈবাক্কী ওইবা তাংবলপাল অমা শেমখিবা অদুনি। ভগৱান বুদ্ধনা মফম অসিগী সরনাথতা মালেমদা মহাক মঙাল ফংলে হায়না খঙহনখি। খুন্নাইগী য়াইফনবা কবিরদাসগুম্বা মুনি মফম অসিদা পোকখি। করিগুম্বা খুন্নাই অসি পুনশিনবা মথৌ তারবদি কাশী অসি সন্ত রৈদাসজীগী কত্থোকপগী শক্তি অসি হৌরকফম ওইগনি। কাশী অসি অহিংশা অমসুং ইচম চম্বগী তুংনফম ওইরিবা জেন তীর্থকর মরিগী লমদমনি। নিংথৌ হরিশচন্দ্রগী ইন্তিগ্রিতীদগী বল্লভাচার্য়, রামানন্দজীগী লৌশিং ফাওবা। চৈতন্য মহাপ্রভু, সমর্থ গুরু রামদাসতগী স্বামী বিবেকানন্দ, মদন মোহন মালবীয় ফাওবা। কাশীগী শেংলবা লমদম অসি মশিং থিঙমদ্রবা ঋসিশিং, আচার্য়শিংগী হৌরকফম ওইরি। ছত্রপতি শিবাজী মহারাজ মফম অসিদা লাকলমখি। রানী লক্ষ্মী বাইদগী চন্দ্রসেখর আজাদ ফাওবা কাশী অসি লান্মীশিংগী কর্মভুমি ওইরি। ভারতেন্দু হরিশচন্দ্র, জয়শঙ্গকর প্রসাদ, মুন্সি প্রেমচন্দ, পন্দিৎ রবি শঙ্কর, অমসুং বিস্মিল্লাহ খানগুম্বা তেলেন্তশিং অসি শহর অসিদগী হায়না মহাক্না ফোঙদোকখি। নীংশিংলুনদা মসি কয়াম শাংগনি! ৱারীনা পীক থল্লি। কাশী অসি লোইবা নাইদবা অদুগুম্না কাশিনা শরুক তমখিবা অসিসু লোইবা নাইদে। কাশীগী চাউখৎ-থৌরাংদা মমল য়াম্লবা থৱায়শিং অদুগী মপাল নাইদ্রবা ইথিল অদু য়াওরি। ভারতকী মপাল নাইদ্রবা চৎনবীশিংগী লেগেসী য়াওরি। মরম অসিনা কাংলুপ খুদিংমক্কী মীওইশিং, লোলগী কাংলুপ খুদিংমক্কী মীওইশিং মফম অসিদা লাক্লি অমসুং মফম অসিগী মরী লৈনৈ হায়না ফাওরি।
মরুপশিং,
কাশী অসি ঐখোয়গী ভারকী কলচরেল স্পিরিচ্যুএল কেপিতেল অমা ওইবতা নত্তনা মসি ভারতকী থৱায়গী হিংলিবা মশক অমসু ওইরি। অদোম্না য়েংবীসু কাশী অসি য়ু.পি.দা লৈ অমদি মসিনা নোংপোক অমসুং অৱাংবু শম্নহল্লি, মফম অসিদা বিশ্বনাথ লাইশঙ থুগাইখি, লাইশঙ অসি মাতা অহিম্যাবাই হোল্করনা অমুক হন্না শেমগৎখি। মহাক্কী পোক্নফমদি মহারাস্ত্রনি মহাক্কী কর্মভুমিনা ইন্দোর-মহেশ্বর অমসুং অতোপ্পা মফম কয়াদনি। ঙসি অসিগুম্বা থৌরম অসিদা মাধা অহিল্যাবাই হোল্করদা ইকোক নোন্না খুরুমজরি। চহি চনি অমসুং চনি য়াঙ্খাইগী মমাংদা মহাক্না কাশীগীদমক থবক কয়া তৌবীরমখি। মতম অদুদগী হৌনা হৌজিক ফাওবা কাশীগী থবক কয়া পাইখৎলি।
মরুপশিং,
বাবা বিশ্বনাথ লাইশঙ অসিগী মতিক-মগুন হেনগৎহন্নবা পঞ্জাবকী মহারাজ রঞ্জিৎ সিংহনা মতোলদা হাপ্নবা গোল্দ প্লেতেদ ওইবা মিতর ২৩ কৎপীরকখি। পঞ্জবাকী ইকাই খুম্নরবা গুরু নানক দেবজীসু কাশীদা লাকলমখি। অতোপ্পা সিখ গুরুশিংগসু কাশীগা অখন্নবা মরী অমা লৈনৈ। পঞ্জাবকী মীয়াম্না কাশী শাবদা পুকচেল শেংনা দান তৌবীরকখি। নোংপোক্তা বেঙ্গলগী মহারানি ভৱানীনা বনারস চাউখৎহন্নবা অঙম্বা পুম্নমক তান তৌরকখি। মৈসুর অমসুং অতোপ্পা খা ভারতকী নীংথৌশিংনসু বনারসতা চাউনা দান তৌরকখি। মসিগী শহর অসিদা অৱাং, খা, নেপালি মওং খুদিংমক্কী লাইশঙশিং লৈ। বিশ্বনাথ লাইশঙ অসিনস ঈশ্বরগী ওইবা ৱাখল্লোন অদুগী হৌরকফম ওইরি অমসুং হৌজিক অচৌবা বিশ্বনাথ ধাম কম্প্লেক্স অসিনা ৱাখল্লোন অসিদা হেন্না ইনোৎ হাপ্লগনি।
মরুপশিং,
ঐখোয় পুম্নমক্না খা ভারতকী মীয়াম্না কাশীদা থম্বা থাজবা, কাশীদা খা ভারতনা পীবা ইথিল অমসুং কাশীনা খা ভারত্তা পীবা ইথিল মুন্নআ খঙই। মসি লাইরিক অমদা ইরমখি – তেনো পয়াথেন কদা-চনাত, বারানসিম পাপ-নিবারসন। আবাদী বানী বলিনাহ, স্বশিস্যন, বিলোক্য লীলা-বাসরে, বলিপ্তান। মসি কন্নদা মরোলদা হায়রম্বনি, মদুদি জগদগুরু মাধবাচার্য়জীনা মহাক্কী শত্রশিংগা চৎপদা মহাক্না হায়খি কাশীগী বিশ্বনাথনা পাপশিং কোকপী। মহাক্কী শত্রশিংদা মহাক্না কাশিগী মতিক ময়াই অমসুং মগুন অদু শন্দোক্না তাকলমখি।
মরুপশিং,
মসিগী ৱাখল্লোন অসি চহিচা কয়াগী মমাংদগী লেপ্তনা চত্থরক্লি। মহাকবি সুব্রমন্যা চারতী অসি কাশীদা চৎলুরবা মতুংদা মহাক্কী পুন্সিদা অহোংবা লাকখি, মহাক্না তামিলদা অসুম্না ইরমখি – “কাশী নগর পুলৱর পেসুম উরৈ দান, কাঞ্জিইল কে-পদকোর্র, খরুবি সেবোম” হায়বদি “কাশী নগরগী সন্তকবিগী ৱারোল অদু কাঞ্চীপুরদা তান্নবা পাম্বৈ অমা থীগনি”। কাশীদগী শন্দোরকপা পাউজেল অসিদা পুম্নমক শুন্না কোনশিল্লি মসিনা লৈবাক অসিদা অওনবা পুরকখি। ঐহাক্না মমাংদা থেংনখিবা অমদগী ৱাফম অমগা হায়জগে। ঐখোয়গী ঘাতশিংদা লৈরিবা বনারসকী ইচিল ইনাও কয়া অমসুং হী হোল্লিবশিংনা নুমিদাংগী মতমদা তমিল, কন্নদা, তেলুগূ, মলয়ালম অদুক্কী মতিক নীংথিনা ঙাংবনা কেরলা-তমিল নাদু নত্ত্রগা কর্নাতক মফম অসিদা লাক্লবা মাল্লি! ওন্থোক্না নীংথিনা ঙাংখ্রে!
মরুপশিং,
ভারতকী মগুন অসি অসুম্না চহি লিশিং কয়া য়োকখৎতুন থমলকখি। তোঙান-তোঙানবা মফমশিং, লমদমশিংবু অমত্তা ওইবা মরীনা পুনশিন্নদুনা থম্বা মতমদা ‘এক ভারত, শ্রেস্থ ভারত” শাফোংলকই। মরম অসিদা ঐখোয়দা নুমিৎ খুদিংগী ‘সৌরাস্ত্র শোমনাথম’ দগী ‘অয়োধ্যা মথুরা মায়া, কাশী কাঞ্চী অভন্তিকা’ নীংশিংনবা তাকপীখি। ঐখোয়গী লৈবাক অসিদা জ্যোতিলিঙ্গম তরানিথোই নীংশিংবগী কান্নবশিং অসুম্না হায়বীরম্মি – “তসছ তস্য ফল প্রাপ্তি:, ভবিশ্যতি ন শংশয়:”।। হায়বরি সোমনাথতগী বিশ্বনাথ ফাওবা জ্যোতিলিঙ্গম তরানিথোই নীংশিংবনা ফিরেপ খুদিংমক থুংহনবা ঙম্মি। অমসুং ভারতকী অমত্তা ওইবগী ৱাখল্লোন অসি পোক্লবা মতমদা চীংনবা অমত্তা লৈতে, ওইথোকপা ঙম্লোই হায়না ফোঙদোক্নবা অমত্তা লৈরোই?
মরুপশিং,
কাশীনা করিগুম্বা অমা পাঙথোকপদা, অনৌবা করিগুম্বা অম তৌবদা লৈবাক অসিগী লাইবক্তা অহোংবা অমা লাকই হায়বা অসি শুপ্নগী চান্নরুবা খক্তা নত্তে। চহি তরেৎ কাশিদা চাউখৎ-থৌরাংগী মহাজ্ঞন চত্থরকখিবা অসিনা ঙসি অনৌবা ইনোৎ অমা ফংবা ঙম্লে। কাশী বিশ্বনাথ ধাম কত্থোকপা অসিনা ভারতপু পুক্নিং লেপ্পা ঙম্বা মাইকৈ অমদা পুরগনি অমসুং আশা লৈবা তুংলমচৎ অমা তম্না পুরগনি। মসিগী কম্প্লেক্স অসি ঐখোয়গী তৌবা ঙম্বা অমসুং ঐখোয়গী থৌদাংগী মীৎনা উবা শাখি অমা ওইরি। অচেৎপা অনীংবা অমসুং অপুনবা ৱাখল্লোনগা লোয়ননা ওইথোকপা ঙমদবা অমত্তা লৈতে। ভারত মচাশিংদা থৌনা লাম্বা ফংদবা অদু ওইথোকহনবগী শক্তি লৈ। ঐখোয়না তপস্যা খঙই, অরানবা থবক তোরুবগী নীংঙমদবা খঙই অমসুং ঐখোয়না লৈবাক অসিগীদমক করম্না অয়ুক অমদি নুমিদাং লেনখি হায়বা খঙই। শীংনবা অদু ফনা চাউরবসু ভারত মচা ঐখোয়না মদু পুন্না মাইথিবা পীবা ঙমগনি। অমাং অতা থোকহনখিবা মীওইশিংগী শক্তি অদুনা ভারতকী শক্তি অমসুং ভারতকী কত্থোকপগী শক্তি অসিদগী কৈদৌনুংদা হেনবা ঙম্লোই। নীংশিংবীয়ু, ঐখোয়না ইশাবু উজরিবা মওং অদুগা চপ মান্ননা মালেমনা ঐখোয়বু উগনি। চহিচা কয়া মীনাই-নাইথং ওইদুনা ঐখোয়না লৈরকখিবা ইশানা হন্থনা খনজবগী ৱাখল্লোন্না ভারত্তা থল্লম্বা অদু ঙসিদি মাংখ্রে। ঙসি ভারতনা সোমনাথ লাইশঙবু মগুম হাপ্পা খক্তনা নত্তনা সমুদ্রদা ওপ্তিকেল ফাইবর কিলোমিতর লিশিং কয়া তিংবা ঙম্লে। ঙসি ভারতনা বাবা কেদর্নাথ লাইশঙ শেমজিন শাজিনবা তৌবা খক্তা নত্তনা ভারত মচাশিংবু শুন্দ্রংদা থাগৎনবা হোৎনরি। ঙসি ভারতনা অয়োধ্যাদা ভগৱান শ্রী রামগী লাইশঙ অমা শাবা খক্তা নত্তনা লৈবাক অসিগী জিলা খুদিংমক্তা মেদিকেল কোলেজশিং হাংদোক্লি। ঙসি ভারতনা বাবা বিশ্বনাথ ধামদা মতিক ময়াই হাপ্পা খক্তা নত্তনা লায়রবশিংগীদমক চেক্কী য়ুম করোর কয়া শারি।
মরুপশিং,
অনৌবা ভারতনা মাগী কলচর অসিদা চাউথোকপচা পোকই অমসুং মানা তৌবা ঙম্বদা চপ চান্না থাজবা থম্লি। অনৌবা ভারত অসিগী হেরিতেজ লৈ লোয়ননা চাউখৎলি। য়েংবীয়ু অয়োধ্যাদগী জনকপুর ফাওবা চৎথোক চৎশিন তৌবা খুদোংচানবা রাম-জানকী মার্গ শেমখি। ঙসি বগৱান রামগা মরী লৈনবা মফম অসি রামায়ন সর্কিতকা শম্নহল্লি অমসুং রামায়ন ত্রেন চেলহল্লি। ভুদ্ধ সর্কিত্তা থবক পাইখৎলি লোয়ননা কুশীনগরদা ইন্তর্নেস্নেল হেয়রপোর্ত অমা শাখি। অমরোমদা করতারপুর সাহিব কোরিদোর শাখি, হেমকুন্দ সাহিবজীদা লাইনা চৎপা য়ান্নবা রোপৱে শেমখ্রে। উত্তরাখন্দদা চারধাম রোদ প্রোজেক্ত খোঙজেল য়াংনা পাইখৎলি। ভগৱান বিথ্থলগী ভক্তা করোর কয়াগী থৌজালশিংগা লোয়ননা শ্রীসন্ত জ্ঞানেশ্বর মহারাজ পালখী মার্গ অমসুং সন্ত তুকারাম মার্গকী থবকসু চয়োল খরগী মমাংদা পাইখৎপা হৌখ্রে।
মরুপশিং,
কেরলাগী গুরুবায়ুর মন্দির নত্ত্রগা তামিল নাদুগী কাঞ্চীপুরম-বেলন্কানী ওইরবদু, তেঙ্গানাগী জোগুলাম্বা দেবী মন্দির নত্ত্রগা বেঙ্গলগী বেলুর মথ ওইরবসু, গুজরাতকী দ্বারকাজী নত্ত্রগা অরুনাচল প্রদেশকী পরুশুরাম কুন্দ ওইরবসু লৈবাক অসিগী তোঙান-তোঙান রাজ্যশিংদা ঐখোয়গী থাজবা অমসুং কলচরগী ওইবা থবক অসি মপুং ফানা পাইখৎলি।
ইচিল-ইনাওশিং,
ঙসিদি ভারতনা মহাক্কী মাংখ্রবা লন অদু অমুক হিংগৎহল্লি। কাশী অসিদা ইমা অন্নপুর্ন মশামক কাইদোংবীরি। কাশীদগী হুরানখিবা ইমা অন্নপুর্নগী মীতম অদু হৌজিক চহি চা অমা ঙাইরবা মতুংদা কাশীদা অমুক হন্না থম্বা ঙমখিবদা ঐহাক্না নুংঙাইবা পোকই। ইমা অন্নপর্নগী থৌজালদগী কোরোনাগী ৱারবা মতমগী মনুংদা লৈবাক অসিনা লায়রবা অমত্তা চারা হেল্লগা তুমহল্লোই হায়না মহাক্কী পুকৈদগী লেম্না রাসন য়েন্দুনা মখোয়বু য়েংশিনবীখি।
মরুপশিং,
ঐখোয়না ঈশ্বর খুরুম্বা খুদিং, লাইশঙদা চৎলি, করিগুম্বা মতমদা ঈশ্বরদগী করিগুম্বা খরা নীজৈ, ৱারেপ খরা লৌরগা লাকই। ঐহাক্কী ওইনদি মীয়াম অসি ঈশ্বরগী শক্লোন্নি। ঐহাক্কী ওইনদি ভারতমচা খুদিংমক ঈশ্বরগী শরুক অমনি। মসিগী মীয়াম অসিনা ঈশ্বরদা থৌনিজবা অদুগুম্না ঐহাক্না পুম্নমকপু ঈশ্বরনি হায়না খঞ্জদুনা, মীয়াম্বু ঈশ্বরগী শক্লোন্নি হায়না খঞ্জদুনা, ঐহাক্না অদোমগী করিগুম্বা খরা নীজবা পাম্বী, ঐহাক্না করিগুম্বা খরা নীজরি। ঐহাক্না অদোমদগী ৱারেপ অহুম পামজৈ, মসি ঐহাক্কী নত্তে, ঐখোয়গী লৈবাক পুম্বগী ৱারেপ অহুম পামজৈ, কাওবীগনু, ৱারেপ অহুম পামজৈ অমসুং বাবাগী শেংলবা মফম অসিদগী নীজরি- অহানবদা লু-নানবা, অনিশুবদা শেমগৎ শাগৎপা অমসুং অহুমশুবদা মরোমদোম লেপ্পা ভারত অমা ওইনবা লেপ্পা লৈতা হোৎনবা। লু-নানবা হায়বসি পুন্সি মহিং অমনি, লু-নানবা হায়বসি দিসিপ্লিন অমনি। মসিনা পাক চাওরবা থৌদাং কয়া অমগা লোয়নৈ। ভারতনা কয়ামুক চাউখৎলবসি, করিগুম্বা লু-নাননা লৈত্রবদি ঐখোয়না মাংলোমদা চংশিনবদা অৱাবা অমা ওইগনি। ঐখোয়না লম অসিদা থবক কয়ামরুম পাইখৎলে অদুবু ঐখোয়না হোৎনরিবশিং অদু খোঙজেল য়াংখৎহনবা মথৌ তারি। ইশাগী ইথৌদাং মশক খংবা খোঙথাং অমনা লৈয়াক অসিদা কান্নবা কবামরুম পীগদৌরিবনি। বানারস অসিদসু, শহরশিংদা, ঘাতশিংদা ঐখোয়না লু-নানবা অসি থাক অমদা পুখৎকদবনি। গঙ্গাজীবু লু-নাননা থম্নবা উত্তরাখন্দগী বেঙ্গল ফাওবা থবক কয়ামরুম পাইখৎলি। নমামি গঙ্গে কেম্পেন মাই পাক্নবা ঐখোয়না লেপ্পা লৈতনা থবক পাইখৎকদবনি।
মরুপশিং,
মতম শাংনা মীনাই-নাইথাং ওইদুনা লৈরকপনা ঐখোয়গী ইশানা শেমজবদা ঐখোয়না থাজবা মাংলকপগী মওং অমদা ঐখোয় ভারত মচাশিংনা ইশাদা থাজবা থম্বা ঙমখিদে। ঙসিদি মসিগী চহি লিশিং কয়া শুরবা কাশী অসিদগী ঐহাক্না ইরৈবাকচা খুদিংমক্তা হায়জরি – ইশাদা মপুং ফানা থজবা থম্লগা শেম্মু, ইনোবেত তৌবীয়ু, ইনোবেতিব ওইবা মওং অমদা মদু পাঙথোকউ। কোরোনাগী ৱারবা মতম অসিদা ভারতকী নহাশিংনা স্তার্ত অপা চা কয়া শেমগৎপা ঙম্লিবা, অৱাবা কয়া মায়োক্নরিবা চৈরক অসিদা, য়ুনিকোর্ন ৪০গী মথক্তা শেমগৎপা ঙম্লিবা অসিনা মখোয়না তৌবা ঙমদবা লৈতে হায়বদু উৎলি। খন্দুনা য়েংবীয়ু য়ুনিকোর্ন অমা হায়বদি স্তার্ত অপ হায়বসি চাউরাক্না লুপা করোর তরেৎ-তরেৎতগী হেল্লিবনি অমসুং অসিগুম্বা তেল্লবা মতম হায়বদি হৌখিবা চহি অমা মখায় অসিদা শেমখি। মসি মমাংদা অমুক্তা থোকখ্রিদ্রিবা অমনি। মফম অমহেক্তদগী, শিনফম অমহেক্তদা লৈবা ভারত মচা খুদিংমক্না লৈবাক অসিগী করিগুম্বা খরা নৌনা পুথোক্নবা হোৎনরবা মতমদতা অনৌবা লম্বেলশিং ফংবা ঙমগনি, অনৌবা লম্বেলশিং শেমগদবনি অমসুং অনৌবা পন্থুং খুদিংমক ফংবা ঙমগনি।
ইচিল-ইনাওশিং,
ঙসি ঐখোয়না লৌগদবা অহুমশুবা ৱারেপ অদুদি মরোমদোম লেপ্পা ঙম্বা ভারত অমা ওইনবা ঐখোয়গী ইথৌদাং হেনগৎহনবনি। মসি ‘অমৃত কাল’নি। ঐখোয়না নীংখা তম্বগী চহি ৭৫ শুবগী চহি অদুদা লৈরি। ভারতনা নীংখা তম্বগী চহি চামা শুবগী হরাউ তয়াম্বা ফোঙদোকপা অদুদা ভারতপু ওইহন্নীংবা মওং অদুগীদমক ঐখোয়না হৌজিক্তগী হোৎনগদবনি। অদুগা মসিগীদমক ঐখোয় মরোমদোম লেপ্পা ঙম্বা মথৌ তাই। ঐখোয়না লৈবাক অসিদা পোৎচৈ শাবা ঙম্বদা চাওথোকচবা ঙম্লবা মতমদা, ঐখোয়না ভোকেল ফোর লোকেল ওইরবা মতমদা, ভারতমচাগী হুমাংমলনা শাজবা পোৎ-চৈ লৈবা ঙম্লবা মতমদতা ঐখোয়না মসিগী কেম্পেন অসিগী মতেং পাংবা ঙমদগৌরিবনি। অমৃত কাল অসিদা ভারত মচা করোর ১৩০না হোৎনবদগী ভারত অসি মাংলোমদা চংশিল্লি। মহাদেবকী থৌজালদগী, ভারত মচা খুদিংমক্কী হোৎনজমন্দগী মরোরম লেপ্পা ঙম্বা ভারত অমগী মংলান অদু মংফাওনবা ঙম্লগনি। মসিগী থাজবা অসিগা লোয়ননা বাবা বিশ্বনাথ, মাতা অন্নপুর্ন, কাশী-কোতৱাল অমসুং লাই খুদিংমক্কী খুজা খাদা অমুক্কা হন্না খুরুমজরি। মমিং লৈরবা লম্বোইবা-মহাত্মশিং অসি লৈবাক অসিগী মফম কয়াদগী মশিং য়াম্না থোকরোকখিবা অসি ঐহাক্কুম্বা মীয়াম কয়ামরুমগী লাইবক ফবনি। ঐহাক্না মমিং লৈরবা লম্বোইবা অমসুং মহাত্মশিংগী মফমদা ইকোক নোন্না খুরুমজরি। ঙসি ঐহাক্না কাশীগী মীয়াম, লৈবাক মীয়াম খুদিংমকপু অমুক্কা হন্না থাগৎপা ফোঙদোকচরি, ঐহাক্না পুম্নমকপু য়াইফ মঙ্গোল পীজরি। হর হর মহাদেব।
