ঐগী নুংশিরবা ইরৈচাশিং,
নীংতম্বগী অমৃত মহোতসব, ৭৫শুবা নীংতম্বা নুমিৎসিদা ময়াম পুম্নমকপু অমদি মালেম পুম্বদা লৈরিবা ভারতপু নুংশিজবা মীয়াম, মীয়ামগী লৈঙাকপু নুংশিজবা মীয়ামগী মফমদা য়াইফ পাউজেল পীজরি।
ঙসি নীংতম্বগী অমৃত মহোতসবকী য়াইফরবা পুংফমসিদা লৈবাকসিনা মাগী নীংতম লান্মীশিংবু, লৈবাক ঙাক শেন্নববগীদমক অহিং নুংথিল খায়দনা হোৎনরিবা, মথ্বায় কৎখিবা অথৌবা অথৌবীশিংবু ঙসি লৈবাকসিনা কোক নোঞ্জরি। নীংতম্বগী মীয়ামগী ইহৌ হৌখিবা ইকায় খুম্নরবা বাপু ওইরবসু, নৎত্রগা নীংতম্নবগীদমক মশাগী লৈজবা পুম্বা কত্থোক্লমবা নেতাজী সুভাস চন্দ্র বোস, ভগত শিং, চন্দ্রসেখর অজাদ, বিস্মিল অমসুং অসফাক উল্লা খান্নচিংবা অথোইবা লালহৌবশিং ওইরবসু, ঝান্সিগী রানী লক্সমিবাই, চিত্তুরগী রানি চেন্নম্মা ওইরবসু নৎত্রগা রানী গাইদিনলিউ ওইরবসু, নৎত্রগা অসামগী মাতঙ্গিনী হাজরাকী থৌনা ওইরবসু, লৈবাক্কী অহানবা প্রধান মন্ত্রী নেহরু জী ওইরবসু, লৈবাকসিবু অপুনবা লৈবাক অমা ওইনা শেম্লমবা সরদার বল্লভ ভাই পতেল ওইরবসু, ভারতকী তুংগী মায়কৈ তাক্লমবা, লম্বী পীরম্বা বাবা সাহব অম্বেদকর য়াওনা লৈবাকসিনা মীপুম খুদিংমকপু, মীওই খুদিংমকপু ঙসি নীংশিংলি। লৈবাকসিনা হায়রিবা অথোইবা মীওইশিং অসিগী লমন তোনশিল্লবনি।
ভারততি মনি মুক্তা কয়ানা লৈতেংলবা লৈবাক্নি। ঙসি ভারতকী কাচিন কোয়া শিনবা থুংনা মচি মচিদা পুৱারীগী তারিখতা মমিং ফাওবা পন্নখিদ্রবা লৈবাকসিবুসু শেমগৎলকখিবা, মাঙদসু পুখৎলকখিবা মীওই কয়াবুসু ঙসি ঐনা পুম্নমক কোনশিন্দুনা ইকোক নোঞ্জরি।
ভারতনা চহিচা কয়া ইমা লৈবাক্কীদমক, নাৎ অমসুং নীংতম্বগীদমক থেংনদুনা লাকখি। মীখা পোনবগী চৈনা, নীংতম্বগী ইখৌ লাংবা লৈবাকসিনা চহিচা কয়া খাঙদুনা লাকখি। মায় পাকপা মায়থিবা কয়া লৈখি অদুবু থম্মোয়নুংদা লৈরিবা নীংতম্বগী ইখৌ লাংবদুদি কৈদৌঙৈদসু মাঙহনখিদে। অদুগুম্লবা হোৎনখিবা ময়াম, চহিচা কয়া খাঙদুনা লৈরকখিবা ময়ামদু ঙসি খুরুমজবগী মতম লাক্লে অমদি ইকোক নোনফমসু থোকই।
মালেমগী লাইচৎ কোরোনা মতমসিদা ঐখোয়গী দোক্তর, নর্স, পেরামেদিকেল স্তাফ, শিৎ-শেংলিবা শিন্মীশিং, ভেক্সিন পুথোক্নবগীদমক পুক্নিং লুপ্লিবা কাঙলোনলোয়শিং, কোরোনাগী মতমসিদা মীৎকুপ কাঙদনা মীয়ামগী থৌগল তৌরিবা লৈবাক মীয়াম করোর কয়াসু ঐখোয়না ইকোক নোনফম থোকই।
ঙসিসু লৈবাকসিগী মফম খরদা ঈচাও, চাক তাঙবা থোক্লি। থম্মোয় শোক্নিংঙাই ওইবা পাউশিংসু অদুম্মক লাকই। লম কয়াদা মীয়াম্না অৱাবা মায়োক্নবা হেনগৎলক্লি। অসিগুম্বা মতমসিদা কেন্দ্র লৈঙাক ওইরবসু স্তেত লৈঙাক ওইরবসু পুম্নমক্না মখোয়গীদমক খোঙফম চেৎনা লেপ্লি। ঙসিগী থৌরমসিদা ওলিম্পিক্তা ভারতকী মীংচৎ পুরকখিবা নহারোলশিংসু, ঐখোয়গী শান্নরোয়শিংসু ঙসি ঐখোয়গী ইরকসিদা শরুক য়ারি।
খরনা মফমসিদা লৈরি, খরনা মাঙদা ফম্লি। ঙসি ঐনা লৈবাক মীয়ামদা, মফমসিদা শরুক য়ারিবশিংদসু অমদি ভারতকী কাচিন কোয়াদগী থৌরমসিদা শরুক য়ারিবা ময়ামগী মফমদা হায়জনিংবদি ঐখোয়গী শান্নরোয়শিংবু পুক্নিং থৌগৎপা ওইনা ইকায়খুম্নবা ওইনা মীৎকুপ অমত্তং খুবাক খুমিন্নসি।
ভারতকী শান্ন-খোৎনববু ইকায় খুম্নসি, ভারতকী নহারোলশিংবু ইকায় খুম্নসি, ভারতকী মায় পুরক্লিবা নহাশিংবু ইকায় খুম্নসি। লৈবাক মীয়াম করোর কয়াগী খুবাক্কী ইনিলগা লোয়ননা ঐখোয়গী নহাশিং, লৈবাক্কী মীংচৎ পুরক্লিবা নহারোলশিংবু ইকায় খুম্নসি। শান্নরোয়শিংনা মরুওইনা… মখোয়না ঐখোয়গী থম্মোয়বু শুমহৎপা খক্তা নত্তনা লাক্কদৌরিবা মীরোলশিং, ভারতকী নহারোলশিংবু পুক্নিং থৌগৎনবগী অচৌবা থবক অমা পায়খৎলবনি হায়না চাউথোকচবগা লোয়ননা হায়নিংই।
ঐগী নুংশিরবা ইরৈচাশিং,
ঐখোয়না নীংতম্বগী হরাউ তয়াম্বা ফোঙদোক্লি অদুবু শেত্তোক্নখিবগী চৈনাসু ঙসি ভারতকী পুক্নিং ৱাখলদা তাশোন্না থিনবগুম তৌরি। মসি হৌখিবা চহিচাসিগী খ্বাইদগী চাউবা লাংফমগী থৌদোকশিংগী মনুংদা অমনি। নীংতম্লবা মতুংদা মীওইশিং অসিবু ঐখোয়না থুনা কাউথোক্নখি। ঙরাংদি ভারতনা পুক্নিং নুংশিনিংঙাই ওইরবা ফিরেপ অমা লৌখি। হৌজিক্তগী হৌনা চহি খুদিংগী ওগস্ত ১৪বু ‘শেত্তোক্নখিবগী অকিবা থৌদোকশিং নীংশিং নুমিৎ’ হায়না পাঙথোক্লগনি। শেত্তোক্নখিবা মতমদা অৱা-অনা কয়া খাঙখিবা, মীওৎ মীনৈ থেংনখিবা, ইকায় খুম্নবগা লোয়ননা অরোইবা মথৌ মঙম ফাওবা পাঙথোকপিবা ফংখিদ্রবা, মখোয়শিংদু ঐখোয়গী নীংশিং খুভমশিংদা হিংহন্দুনা থম্বা তশেংনমক মথৌ তাই। ৭৫শুবা নীংতম নুমিৎসিদা শেত্তোক্নখিবগী অকিবা থৌদোকশিং নীংশিং নুমিৎকী ফিরেপ লৌবগা লোয়ননা হায়রিবা মীওইশিংদুগী মফমদা ভারত মচা পুম্নমক্কী মফমদগী ইকায় খুম্নবগা লোয়ননা শ্রদ্ধাঞ্জলি কৎচরি।
ঐগী নুংশিরবা ইরৈচাশিং,
চাউখৎ লমজেলদা মাঙজিল থানা চেনখৎলক্লিবা ইরৈবাকসিগী মাঙদা অমদি মালেম পুম্বগী মীওইবা খুন্নাইগী মাঙদা কোরোনাগী লাংফম্না অচৌবা শিংনবা অমা ওইদুনা লাক্লি। ভারত মচাশিংনা ইচং থৌনা অমদি থৌনা ফনা লান্ফম অসিবু মায়োক্নরি। লান্ফম অসিদা ঐখোয়গী মাঙদা শিংনবা কয়া লাকখি। অদুবু লম খুদিংবা ইরৈচা পুম্নমক্না হান্নগা মান্নদবা খোঙজেল অমদা থবক তৌখি। ঐখোয়গী কাঙলোনলোয়শিংনা, ঐখোয়গী ইন্দস্ত্রীশিংগী পাঙ্গলগী মহৈনা ভারতনা ভেক্সিনগীদমক কনাগুম্বা অমদা, কনাগুম্বা লৈবাক অমদা তাংজহন্দ্রে। অদোমসু খন্থবিয়ু, মীৎকুপ অমত্তং খন্থবিয়ু, করিগুম্বা ভারতকী মফমদা ভেক্সিন লৈরমদ্রবদি করি ওইরমগনি হায়বদু। পোলিওগী ভেক্সিন ফংনবা হোৎনবদা ঐখোয়না চহি কয়া চঙখি।
অসুক চাউখ্রবা লাংফম অসিদা, মালেম পুম্বদা লাইচৎ অসিনা লাকশিনখ্রবদা ঐখোয়না কমদৌনা ভেক্সিন ফংলমগদৌরিবনো। ভারতনা ফংলমগদরা ফংলমলোইদরা নৎত্রগা ফংলগনা করমবা মতমদা ফংলমগনি। অদুবু ঙসিদি মালেমগী খ্বাইদগী চাউবা ভেক্সিনেসনগী থৌরম ইরৈবাকসিদা পায়খৎলি হায়না ঐখোয়না ইখৌ পোঙনা লাউবা ঙম্লি। মীওই করোর ৫৪ হেনবদা ভেক্সিন দোজ কাপখ্রে। কোৱিনগুম্বা ওনলাইনগী থৌরাং, দিজিতেল সর্তিফিকেত পীননবগী থৌরাং অসিনা ঙসি মালেম পুম্ববু ঙকহল্লি। লাইচৎকী মতমসিদা ভারতনা মীওই করোর ৮০দা থা কয়া লেম্না চেঙ-হৱাই পীদুনা লায়রবা ইমুংশিংগী চাকখুম মৈ মুৎহনখিদবা অসিসু মালেম্না ঙক্নরিবনি অমদি শোন্নরিবনি। লৈবাক অতৈগা চাংদম্নবদা ভারত্তা লাইচৎসিনা শোকহনবা মী য়ামদে অমদি মালেমগী মীশিংগা চাংদম্নবদা ভারতনা মশিং খ্বাইদগী হেন্না মশাগী মীয়ামবু লায়নাসিদগী ঙাকথোক্লি হায়বসি অচুম্বনি, অদুম ওইনমক মসি ঐখোয়গীদমক্তদি ইখৌ পোঙনা লাউনবগী মরম ওইদে। অপেনবা পোক্তুনা নিংঙাইদনা লৈথোক্নবগী ৱাফম ওইদে। শিংনবা অমত্তা লৈখিদে হায়না হায়রবসি মদুনা ঐখোয়গী চাউখৎ লম্বী থিংনবগী ৱাফম ওইরক্কনি।
মালেমগী লৈরিবা লৈবাকশিংগী চাংদম্নবদা ঐখোয়গী ফীভম ৱাৎনা লৈখি, মালেমগী মফমদা লৈখিবা লৈবাক কয়াগী মফমদা লৈখিবা ঐখোয়দা লৈরমখিদে। মসি ময়ামসি ওইদুনসু… অদুগা নাকল অমরোমদনা ঐখোয়গী মীশিং য়াম্না লৈ। মালেমগী মীশিংগা চাংদম্নবদা ঐখোয়গী মীশিং য়াম্মি, ঐখোয়গী পুন্সি মহিংসু তোঙাল্লি। ফনা কন্না হোৎনদুনসু ঐখোয়না পুন্সি কয়া অমদি কনবা ঙমখিদে। অঙাঙ কয়াগী কোকথক্তগী মিনুংশিগী খুৎ নান্থবিগদবা কয়া মুনবিখ্রে। মখোয়বু থেমজিনবিগদবা, মখোয়নী নিংঙাই থেমবিগদবা কয়া চৎখ্রে। অসিগুম্বা পাম্বৈ লৈতবা ফীভম অমদি অৱাবগী ফীভম মতম পুম্বগী ওইনা লৈহৌরগদবনি।
ঐগী নুংশিরবা ইরৈচাশিং,
লৈবাক পুম্নমক্কী চাউখৎ খোঙচত্তা লৈবাক অদুবু অনৌবা খোঙফম অমদা শক্তাক্নবা হোৎনবগী তাঙ্কক অমা হেক হেক লাকই। অনৌবা ফিরেপ কয়াগা লোয়ননা মাঙদা চঙশিল্লি। ভারতকী চাউখৎ খোঙচত্তসু অদুগুম্বা তাঞ্জা অদু ঙসিদি লাক্লে। নীংতম্বগী ৭৫শুবা চহিগী থৌরম অসি শুপ্নতগী থৌরম অমখক্তা লোইশিল্লোয়দবনি। ঐখোয়না অনৌবা ফিরেপ লৌবা তাই। অনৌবা ফিরেপশিংগা লোয়ননা চঙশিনবা তাই। মীৎকুপসিদগী হৌরগা মথংগী চহি ২৫গী খোঙচৎ, ঐখোয়না নীংতম্বগী চহিচাগী থৌরম পাঙথোকপা মতমদা, অনৌবা ভারতকী মতোল লোমবগী মতম অদুদা, ঐখোয়গী ফিরেপশিংগী মহৈশিং ঐখোয়গী নীংতম্বগী চহিচা ফাওবা পুদুনা চৎকদবনি। পুক্নিংদা চাউথোকচবগা লোয়ননা পুদুনা চৎকদবনি।
অমৃতগী মতমদুগী পান্দমদি ভারত অমসুং ভারত মচাশিংগী হোৎনবগী অনৌবা খোঙফমশিংদুনি। অমৃতগী মতমদুগী পান্দমদি খুদোংচাবা ফংবদা খুঙ্গঙ অমসুং ময়োল্লমগী মরক্তা খেন্নবা লৈতবা ফীভমদুনি। অমৃতগী মতমদুগী পান্দমদি মীয়ামগী পুন্সিদা লৈঙাক্না মরম লৈতনা খুৎ থিংজিন্দবা ভারত অমা শেম্বদুনি। অমৃতগী মতমদুগী পান্দমদি মালেমগী মতমগা চুনবা মচাক মথুম পুম্নমক লৈবা ভারত অমা শেম্বদুনি।
ঐখোয় কনাদগীসু তাদে। মসি ইরৈচা করোর কয়াগী ৱাখল্লোন্নি। অদুবু ৱাখল্লোন অসি হোৎনবা অমদি থবক ওইনা পাঙথোকত্রিবমখৈ মপুং ফারোই। মরম অসিনা ঐখোয়না ঐখোয়গী ৱাখল্লোন পুম্নমক থবক ওইনা পাঙথোক্তুনা, কন্না হোৎনদুনা মঙফাওনহনবা তাই অমদি মঙলান অসি, ৱাখল্লোন অসি ঐখোয়গী ঙমখৈগী ৱাংমদসু শন্দোক্তুনা লৈবাক কয়াদসু পুক্নিং থৌগৎনবা থৌদাং লৌগদবনি।
অমৃতগী মতম অসি চহি ২৫গী মতম্নি। অদুবু ঐখোয়না পান্দম ফংনবগীদমক অসুক শাংলবা মতমসি ঙাইবগী মথৌ তাদে। ঐখোয়না হৌজিক্তগী হৌনা হোৎনবা তাই। ঐখোয়দা লেম্না মাঙহন্নবা মতম অমত্তা লৈতে। হৌজিক মতমদু য়ৌরবনি হৌজিক চপ চারবা মতম্নি। লৈবাকসিদা অহোংবা পুরকপা তাই অমদি লৈবাক মচা অমা ওইনা ঐখোয় ইশাদসু অহোংবা পুরকপা তাই। পুম্নমক্কা লোয়ননা পুম্নক্কী চাউখৎপা, পুম্নমক্কী থাজবা হায়বা খোল্লাউসিগা লোয়ননা ঐখোয় পুনশিন্নরে। অদুবু ঙসি অঙাঙবা লানবনগী মথকসিদগী হায়রিবসিনি, পুম্নমক্কা লোয়ননা পুম্নমক্কী চাউখৎপা, পুম্নমক্কী থাজবা অমদি হৌজিক্না পুম্নমক্কী হোৎনজমন ঐখোয়গী পান্দমশিংবু ফংনবগীদমক য়াম্না মরুওই। হৌখিবা চহি তরেৎসিদা হৌদোরকখিবা য়াম্লবা থৌরাংশিংগী কান্নবা লায়রবা মীওই করোর কয়াগী য়ুমদা য়ৌহল্লি। উজ্জ্বলাদগী হৌরগা আয়ুস্মান ভারতকী মপাঙ্গল ঙসি লৈবাকসিগী লায়রবা পুম্নমক্না খঙলে। ঙসিদি লৈঙাক্কী থৌরাংশিংগী খোঙজেল য়াঙখৎলে। মখোয়গী থমখিবা পান্দমশিং ফংবা ঙম্লে। হান্নগা চাংদম্নবদা ঐখোয়না য়াম্না থুনা য়াঙনা মাঙদা চঙশিনবা ঙম্লে। অদুম ওইনমক মসিনা অরোয়বা নত্তে। হৌজিক ঐখোয় মতোল লোম্না, মপুং ফানা চঙশিনবা তাই। খুঙ্গঙশিংদা চাদা চাম্ম লম্বী থোঙ ফগৎহনবা, য়ুমথোঙ চাদা চাম্মদা বেঙ্ক একাউন্ত হাংহনবা, কান্নবা ফংবা য়ারবা মীওই চাদা চাম্মদা আয়ুস্মান ভারতকী কার্দ ফংহনবা, ফংফম থোকপা মীওই চাদা চাম্মদা উজ্জ্বলা য়োজনাগী গ্যাস কন্নেক্সন ফংহনবা তাই। লৈঙাক্কী লাইফ ইন্সুরেন্স ওইরবসু, পেন্সনগী থৌরাং ওইরবসু, য়ুম-কৈগী থৌরাং ওইরবসু ময়ামসিগী কান্নবা ফংবা য়ারবা মীওই খুদিংমক কোনশিনবা মথৌ তাই। চাদা চাম্ম থবক পাঙথোকপা হায়বা ৱাখল্লোনসিদা চৎকদবনি। ঙসি ফাওবা ঐখোয়না লম্বীগী চিদাইদা পোৎফম ফম্লিবা মীওইশিংগী মরমদা খন্নরুদে। লম্বীগী চিদাইদা ফমদুনা, খোঙ লম্বীদা ফমদুনা পোৎ য়োল্লিবা, থেলা ইল্লিবা মীওইশিংবু ঐখোয়না স্বানিধি য়োজনাগী মতেংনা বেঙ্কিং সিস্তেমদু পুশিল্লক্লি।
ঐখোয়না য়ুমথোঙ খুদিংদা মৈ ফংহনবগুম, ঐখোয়নে য়ুমথোঙ খুদিংদা খোঙহাম-খুৎহাম্ফম থম্নবগী থৌরাং পায়খৎপগুম, হৌজিক ঐখোয়না থৌরাংশিং মতোন লোম্না পায়খৎনবা পান্দমগা লোয়ননা মাঙদা চঙশিনবা তাই অ্রমদি মসি ফংনবগীদমক ঐখোয়না মতম অমদি পনখৈ য়াম্না লাপ্না থম্লোইদবনি। ঐখোয়না চহি খরদা ঐখোয়গী মঙলান মঙফাওনহনগদবনি।
লৈবাকসিনা ঙসি য়ুমথোঙ খুদিংদা ঈশিং পীননবা মিসনগী থবক খোঙজেল য়াঙনা পায়খৎলি। জল জীবন মিসনগী শুপ্নতগী চহি অনিগী মনুংদা ইমুং করোর মরি মখায় হেনবদা তোতি ঈশিং ফংবা হৌখিবসিদা… পাইপতগী ঈশিং ফংবা হৌবসিদা ঐ নুংঙাইবা ফাওই। ইমা, ইচল-ইচে করোর কয়াগী থৌজালদুনি ঐখোয়না পামজরিবা। অসুম্না চাদা চাম্মগী পান্দম অসিগী খ্বাইদগী চাউনা কান্নবা হায়রগদি মীয়াম্না লৈঙাক্কৌ থৌরাংশিংগী কান্নবা ফংদবা হায়বদু লৈররোই। খুন্নাইগী অরোইবা লৈইদা লেপ্লিবা মীওইদু য়ৌননবা লৈঙাক্না থবক লৌখৎলকপা মতমদা খেন্নবা ৱাখল্লোনগী মফম লৈরোই অমদি শেঞ্জা থুমজাগী মফমসু লৈরোই।
ঐগী নুংশিরবা ইরৈচাশিং,
লৈবাক্কী লায়রবা খুদিংমক, মীপুম খুদিংমক্তা মচি ওইবা চীঞ্জাক ফংহনবা হায়বসিসু লৈঙাক্কী মরুওইবা থৌরাং অমনি। লায়রবা নুপীশিং, লায়রবা অঙাঙশিংদা মচি ওইবা চীঞ্জাক অমদি মচলশিং ৱাৎপনা মখোয়গী পুন্সিদা অচৌবা পল অমা ওইহল্লি। মসিদা মীৎয়েং থমদুনা লৈঙাক্না তোঙান তোঙানবা থৌরাংশিংগী মখাদা লায়রবশিংদা পীরিবা চেঙশিং অসি ফোর্তিফাই তৌনবা ফিরেপ লৌরে। লায়রবশিংদা মচি ওইবা চেঙ পীরগনি। চেঙ-হৱাইগী দুকানদা ফংবা চেঙ ওইরবসু, মিদ-দে মীলদা অঙাঙশিংদা পীবা চাক ওইরবসু ইং ২০২৪ ফাওবদা থৌরাং খুদিংমক্কী মখাদা পীরিবা চেঙশিং ফোর্তিফাই তৌরগনি।
ঐগী নুংশিরবা ইরৈচাশিং,
ঙসি লৈবাক্কী লায়রবা মীপুম খুদিংদা হেন্না ফবা হকশেলগী ফীভম ফংহন্নবা থৌরাংসু খোঙজেল য়াঙনা পায়খৎলি। মসিগীদমক্তা মেদিকেল এজুকেসন্দা মথৌ তাবা অচৌ-অচৌবা শেমদোক শেমজিন কয়া পুরকখ্রে। প্রিভেন্তি হেল্থকেয়রদসু চপ চানা মীৎয়েঙ থম্লে। মসিগা লোয়ননা মেদিকেল সিত মশিংসু য়াম্না হেনগৎহল্লে। আয়ুস্মান ভারত য়োজনাগী মখাদা লৈবাকসিগী খুঙ্গঙশিংদা মতিং লৈবা হকশেলগী সর্ভিসশিং য়ৌহল্লি। জন ঔসধি য়োজনাগী খুত্থাঙদা লায়রবশিংদা, ময়ায় থাক্কী মীওইশিংদা অহোংবা মমলদা হিদাক ফংহল্লি। হৌজিক ফাওবদা হেল্থ এন্দ ৱেলনেস সেন্তর লিশিং ৭৫গী মথক্তা লিংখৎখ্রে। হৌজিক ব্লোক্কী থাক্তা অফবা লায়েংশঙ অমসুং মতমগা চুনবা লেবকী নেতৱর্ক শেমগৎনবা অখন্নবা মীৎয়েং চঙদুনা থবকা পায়খৎলি। অথুবা মতমদা লৈবাকসিগী লায়েংশঙ লিশিং কয়াদা মখোয় মশাগী ওক্সিজেন প্লান্ত লৈরগনি।
ঐগী নুংশিরবা ইরৈচাশিং,
২১শুবা চহিচাসিদা ভারতপু অনৌবা পন্দোল লোমহন্নবগীদমক ভারতকী মতিংবু মওং চুম্না শীজিন্নবা… মপুং ফানা শীজিন্ননবগী মথৌ তাবদু লাক্লে, য়াম্না মরু ওইরে।
মসিগীদমক্তা শোত্থহৌরবা ফুরুপ, লমশিং খুৎ পায়দুনা পুখৎলকপা মথৌ তাই। তঙায় ফদনা মথৌ তাবা পোৎলমশিংগী নুংনাংবগা লোয়ননা দলিত, শোত্থহৌরবা কাঙলুপ, ত্রাইবেল অমসুং জেনেরেল কাঙলুপকী লায়রবশিং রিজর্বেসন খাক্তুনা থম্লি। হন্দক্তসু মেদিকেল এজুকেসনগী লমদসু ভারত পুম্বগী কোতাদা ও.বি.সি. কাঙলুপগী রিজর্বেসন থমখ্রে। পার্লিয়রমেন্ততা আইন শেমদুনা ও.বি.সি.গা মরী লৈননা লিস্ত শেম্নবা মঙম স্তেতশিংদা পীখ্রে।
ঐগী নুংশিরবা ইরৈচাশিং,
খুন্নাইগী চাউখৎ খোঙচত্তা মীওই অমত্তা, কাঙলুপ অমত্তা তুংদা লৈহৌদনবা থৌরাং তৌরিবসিগুম লৈবাকসিগী মফম অমত্তা, লৈবাকসিগী কাচিন কোয়া অমত্তসু খোঙচৎ অসিদগী পন্থহৌদনবা হোৎনগদবনি। চাউখৎপা হায়বসি পুম্নমক কোনশিনগদবনি, পুম্নমক শুপকদবনি, অৱাৎপা লৈহল্লোইদবনি। লৈবাক্কী লম খুদিংমক মাঙদা পুখৎলক্নবগীদমক হৌখিবা চহি তরেৎসিদা লৌখৎখিবা থৌরাংশিং হৌজিক্তি অহেনবা খোঙজেল হাপ্নবা মায়কৈদা চঙশিল্লক্লি। ঐখোয়গঈ নোংপোক ভারত, অৱাং-নোংপোক, জম্মু-কাস্মির, লদাখ য়াওনা অপুনবা হিমালয় লমদমশিং, ঐখোয়গী সমুদ্র খোঙবাল পরিং নৎত্রগা ঐখোয়গী ত্রাইবেলগী লমদমশিং ওইরবসু, মখোয়শিংসু তুংদা ভারতকী চাউখৎপগী, ভারতকী চাউখৎ খোঙচৎকী য়াম্না মরুওইবা য়ুম্ফম ওইরক্কদৌরিবনি।
ঙসি অৱাং-নোংপোক্তা লম্বী থোংগী অনৌবা পুৱারী ইরি। লম্বী থোং অসি থম্মোয়নুংগীসুনি অমদি মচাক মথুমগীসুনি। অথুবা মতমদা অৱাং-নোংপোক্কী স্তেত পুম্নমক্কী কোনুংশিংবু রেল সর্ভিসনা শমজিন্নবগী থবক মপুং ফারগনি। এক্ত ইস্ত পোলিসীগী মখাদা বঙ্গলাদেশ, ম্যান্মার অমসুং খা-নোংপোক এসিয়াগাসু শম্নরক্লি। হৌখিবা চহিশিংদা হোৎনখিবশিংগী মহৈনা হৌজিক্তি অৱাং-নোংপোক্তা ইং চিকপা পুরক্নবগী, অপুনবা ভারত শেমগৎনবগী থৌনা শরুক কয়া হেনগৎলে।
অৱাং-নোংপোক্তা… মফমদুদা তুরিজম, এদভেঞ্চর স্পোর্তস, ওর্গানিক ফার্মিং, হর্বলগী হিদাক, থাউগী পম্পগী মতিং য়াম্না লৈ। ঐখোয়না হায়রিবা মতিং অসিবু মপুং ফানা লোকপা তাই, লৈবাক্কী চাউখৎ খোঙচৎকী শরুক ওইহনবা তাই। অদুগা হায়রিবা থবকসি ঐখোয়না অমৃতকী মতমগী চহি তরা খরগী মনুংদা মপুং ফানা পায়খৎপা তাই। পুম্নমক্কী তৌবা মতিকপু চুনবা খুদোংচাবা পীবা হায়বসিনা মীয়ামগী লৈঙাক্কী তশেং তশেংবা ৱাখল্লোন্নি। জম্মু ওইরবসু কাস্মির ওইরবসু, চাউখৎপগী খল ঙসিদি উবা ফংলে।
জম্মু-কাস্মিরদা দিলিমিতেসন কমিসনগী শেমগৎখ্রে অমদি তুংগী বিধান সভা মীখলগী থৌরাংসু পায়খৎলি। লদাখতসু চাউখৎপগী মশাগী ওইবা পরিংদা চঙশিন্নবগী মায়কৈদা চৎলি। নাকল অমদনা লদাখতা মতমগা চুনবা মচাক মথুমশিং শেমগৎপগী ফীভম উবা ফংলি, অমরোমদনা সিঙ্ঘু সেন্ত্রেল য়ুনিভর্সিতীনা লদাখকী অৱাংবা থাক্কী মফম অমা ওইরক্লি।
২১শুবা চহিচাগী চহি খরসিদা ভারতনা ব্লু ইকনমিগী হোৎনরিবশিং খোঙজেল য়াঙখৎহল্লগনি। ঐখোয়না এক্বাকলচরগা লোয়ননা সীৱীদ থাবদা কান্নবা ফংনবগী মতিং উরিবা অসিগী কান্নবা মপুং ফানা লৌগদবনি। দীপ ওসীন মিসন অসি সমুদ্রগী ইরোলনুংগী মতিংশিংবসু থীজিন্নবগী ঐখোয়না য়াম্না মরুওইবা থৌরাংগী মহৈনি। সমুদ্রদা লোত্তুনা লৈরিবা খনিগী পোত্থোকশিং, সমুদ্রগী ঈশিংদা লৈরিবা থর্মেল ইনর্জীগী মতিং কয়াসিনা লৈবাক্কী চাউখৎ লমজেলদা অনৌবা থৌনা পীবা ঙমগনি।
শোত্থহৌরবা দিস্ত্রিক্তশিংনি হায়না খন্নরিবশিংগী মতিংবুসু ঐখোয়না হৌদোক্লি। লৈবাকসিগী অসিগুম্বা মতিং লৈবা দিস্ত্রিক্ত ১১০দা মহৈ মশিং, হকশেল, মচি ওইবা চীঞ্জাক, লম্বী-থোং, শবক পীবগা মরী লৈনবা থৌরাংশিংদা অহেনবা মীৎয়েঙ থম্লি। মসিগী মনুংদা দিস্ত্রিক্ত কয়াদি ঐখোয়গী ত্রাইবেল লমদা লৈ। ঐখোয়না হায়রিবা দিস্ত্রিক্তশিংসিগী মরক্তা চাউখৎপগী ইচঙ থৌরবা থৌনা অমা পোকহল্লি। হায়রিবা মতিং লৈবা দিস্ত্রিক্তশিং অসি ভারতকী অতৈ দিস্ত্রিক্তশিংগুম্না চাউখৎপা পুরক্নবা থৌরাং খোঙজাল য়াঙনা চঙশিল্লি।
ঐগী নুংশিরবা ইরৈচাশিং,
শেন্মিৎলোনগী তাইবঙদা কেপিতেলিজম অমসুং সোসিএলিজমগী ৱাফম কয়া খন্নরি, অদুবু ভারতনা পুন্না হোৎনমিন্নবা হায়বসিদসু মীৎয়েঙ থম্মি। তেংবাংমিন্নবা হায়বসি ঐখোয়গী নাৎনি, ঐখোয়গী চৎনবীগী শরুক অমনি। তেংবাংমিন্নবা হায়বসিদা য়াওরিবা মীয়াম অপুনবগী পাঙ্গল অসিনা শেন্মিৎলোনবু থৌদুনা পুরগা গ্রাসরুতকী থাক্তা লৈরিবা শেন্মিৎলোনগী মরুওইবা হীরম অমা ওইরিবনি। কো-ওপরেতিব হায়বসি শুপ্নতগী আইনগী ওইবা ৱাফম অমখক নত্তে, মসি ৱাখল্লোন্নি, চৎনবীনি, পুন্না চৎমিন্নবগী ৱাখল ইথিলদুনি। মসি মপাঙ্গল কনখৎহন্নবা ঐখোয়না তোঙানবা মন্ত্রালয় অমা লিংখত্তুনা মায়কৈ অসিদা খোঙথাঙ কয়া লৌখৎলি অমদি স্তেতশিংগী মখাদা লৈরিবা কো-ওপরেতিবকী হীরমশিংদা হেক য়ারিবমখৈ মপাঙ্গল হাপ্নবা থবকসু ঐখোয়না লৌখৎলি।
ঐগী নুংশিরবা ইরৈচাশিং,
চৎলিবা চহি তরাসিদা ঐখোয় খুঙ্গঙশিংদা অনৌবা শেন্মিৎলোনগী ফীভম পুরক্নবা অঙম্বা থাক্তা হোৎনবা তাই। ঙসিদি ঐখোয়গী খুঙ্গঙশিংদা থুনা য়াঙনা অওনবা লাকপা উরি। হৌখিবা চহি খরসিদা, খুঙ্গঙশিংদা লম্বী থোং অমসুং মৈগী খুদোংচাবা য়ৌহন্নবা হোৎনখি। অদুগা হৌজিক্না হায়রিবা খুঙ্গঙশিং অসিদা ওপ্তিকেল ফাইবর নেতৱর্ক য়ৌহন্নবা, ইন্তরনেত য়ৌহন্নবা থবক পায়খৎলি। খুঙ্গঙশিংদা দিজিতেল ওন্ত্রপ্রিন্যুর শেমগৎলি। খুঙ্গঙগী সেল্ফ হেল্প গ্রুপশিংগা শম্নরিবা ইচল ইচে করোরী ৮ হেনবনা পোত্থোক কয়া পুথোক্লি। মখোয়গী পোত্থোকশিং লৈবাকসিদা অমদি মীরমদা অচৌবা কৈথেল ফংনবগীদমক লৈঙাক্না ই-কম্মর্স প্লেতফোর্ম শেমগৎলি।
ঙসি লৈবাকসিনা ভোকেল ফোর লোকেল হায়বা লাইৱাসিগা লোয়ননা মাঙদা চঙশিনবা মতমদা দিজিতেল ফম্পাক অসিনা নুপী সেল্ফ হেল্প গ্রুপশিংগী পোত্থোকশিংবু লৈবাক্কী কাচিন কোয়া শিনবা থুংনা অমদি মীরমগী মীয়ামদসু য়ৌহল্লবদি মদুগী কান্নবা য়াম্না লৈগনি। কোরোনাগী মতমদা লৈবাকসিনা তেক্নোলোজীগী থৌনা, ঐখোয়না কাঙলোনলোয়শিংগী হোৎনজমল অমদি মখোয়গী ফিদম ঐখোয়না উখ্রে। হীরম খুদিংদা ঐখোয়গী কাঙলোনলোয়শিংনা তাথোক তাশিন তৌদুনা থবক পায়খৎলি। হৌজক্তি ঐখোয়গী লৌউ শিংউগী লমদা কাঙলোনলোয়শিংগী তৌবা ঙম্বা অমদি মখোয়না পুথোকপা পাম্বৈশিং ঐখোয়গী লৌউ-শিংউগী সেক্তরগা শমজিন্নবা মতম ওইরে। হৌজিক ঐখোয় মখা তানা ঙাইররোই অমদি মসিগী কান্নবসু মপুং ফানা লৌখৎপা তাই। মসিনা লৈবাকসিগী চীঞ্জাক্কী সিক্যুরিতী পীবগা লোয়ননা মনা মশিং অমসুং মহৈ মরোং পুথোকপগী চাং হেনগৎহনবদা চাউনা কান্নবা পীগনি অমদি মালেমগী মাঙজিল থানবগীদমক ঐখোয় ইশাবু মপাঙ্গল কলহনবা মথৌ তাই।
অসুম্না হোৎনবগা লোয়ননা লৌউ-শিংউ সেক্তরগী অচৌবা শিংনবা অমদসু মীৎয়েঙ চঙবা তাই। শিংনবা অদুদি খুঙ্গঙগী মীয়ামদা লম য়াম্না লৈজদে, মীশিং য়ামখৎলকপগা লোয়ননা… ইমুং মনুংদা লম য়েন্থোক্নখিবগা মরম্না লৌমীশিংগী লম অসুম অসুম পীকশিল্লক্লি। লৈবাকসিগী লৌমীগী চাদা ৮০দি মখোয়গী লম হেক্তর অনিদগী হন্থনা লৈবা ঙাক্তা ওইরে। ১০০গী মনুংদা ৮০দি মশাগী লম হেক্তর অনি য়ৌদনা লৈজৈ হায়বদি লৈবাকসিগী লৌমীশিং অসি অপীকপা লৌমী ঙাক্তনি। হান্না চৎনরম্বা চৎন-পথাপশিংদা অসিগুম্বা অপীকপা লৌমীশিংদা মরুওইবা মীৎয়েঙ থম্লমদে। অদুগা হৌজিক্তি লৈবাকসিগী অসিগুম্বা অপীকপা লৌমীশিংদা মীৎয়েঙ থমদুনা লৌউ-শিংউগী চৎন-পথাপ্তা অহোংবা পুরক্লি, ফিরেপশিং লৌরি।
ফসল বীমা য়োজনাদা অওনবা পুরকপা ওইরবসু, এম.এস.পি.বু শরুক অমা মখায় হেনগৎহনবগী ৱারেপ ওইরবসু, অ্রপীকপা লৌমীশিংদা কিসান ক্রেদিত কার্দতগী অপীকপা শেন্দোয়দা বেঙ্কশিংদগী শেল পুবগী থৌরাং ওইরবসু, সোলার পৱারগা মরী লৈনবা থৌরাংশিং লৌবুক্তা য়ৌহনবা ওইরবসু, ফার্মর্স প্রদ্যুসর্স কম্পেনী ওইরবসু… থৌরাং পুম্নমকসিনা অপীকপা লৌমীশিংগী মপাঙ্গল কনখৎহনগদৌরিবনি। তুংদা ব্লোক্কী থাক্তা পোৎথম্ফম শেমগৎনবগী থৌরাংসু পায়খৎলকখিগনি। অপীকপা লৌমীশিংগী চাদিং মচা মচাদা মীৎয়েং থম্লগা পি.এম. কিসান সম্মান নিধি য়োজনা চৎনহল্লি। লৌমীগী ইমুং করোর তরা হেনবগী বেঙ্ক একাউন্তশিংদা হৌজিক ফাওবদা লুপা করোর লাখ অমা মখায় হেনবগী শেন্ফম হাপচিনখ্রে। অপীকপা লৌমীশিং হৌজিক্তি ঐখোয়গী থৱাই, ঐখোয়গী পান্দম ওইরবনি। অপীকপা লৌমীশিংনা লৈবাক্কী মিংচৎ ওইহনবা… অপীকপা লৌমীশিংনা লৈবাক্কী মিংচৎ ওইহনবা হায়বসিনা ঐখোয়গী মঙলান্নি। লাক্কদৌরিবা চহিশিংদা ঐখোয়না লৈবাক্কী অপীকপা লৌমীশিংগী মপাঙ্গল কনখৎহনবা তাই। অনৌবা খুদোংচাবশিং পীবা তাই। ঙসি লৈবাকসিগী রেল লম্বী ৭০ হেনবদা কিসান রেল চেল্লি।
কিসান রেলনা অপীকপা লৌমীশিংদা মখোয়গী পোত্থোকশিং মমল তানা, পুথোক পুশিনগী চাদিং হন্থনা, অরাপ্পা মফমশিংদা মতমগী ওইবা খুদোংচাবশিংগা লোয়ননা মখোয়গী পোত্থোকশিং য়ৌহনবদা মতেং ওইরি। কমলম ওইরবসু, শাহী লীচী ওইরবসু, উ মোরোক ওইরবসু নৎত্রগা চাকহাউ ওইরবসু, নৎত্রগা য়াইঙং ওইরবসু তোঙান তোঙানবা পোত্থোকশিং মালেমগী তোঙান তোঙানবা লৈবাকশিংদা থারি। ভারতকী লৈহাউদা পুথোকপা পোত্থোকশিংগী মনম মালেমগী তোঙান তোঙানবা লৈবাকশিংদা য়ৌবদা ঙসি লৈবাকসিনা নুংঙাইবা ফাওরি। ভারতকী লৌফমশিংদগী পুথোরকপা মনা মশিং অমসুং মহৈ মরোংনা ঙসি মালেমদা মহাও পীরি।
ঐগী নুংশিরবা ইরৈচাশিং,
ঙসি কমদৌনা খুঙ্গঙশিংগী মতিং শেমগৎলি হায়বসিগী খুদম অমা হায়রগদি স্বামিত্ব য়োজনানি। খুঙ্গঙশিংদা লমগী মমলগী করি ফীভম লৈবগে হায়বা ঐখোয় পুম্নমক খঙই। মখোয়না লমগী মপু ওইজরবসু লমদুনা বেঙ্কতগী লোন অমত্তা লৌবা ঙমদে। মরমদি খুঙ্গঙশিংদা লমগী চে-চাং চহি কয়া কয়া থবক পায়খত্তনা লৈরম্মি। মীয়ামগীম মফমদা মসিগী ফীভম লৈতে। ফীভম অসিদা অহোংবা পুরক্নবা স্বামিত্ব য়োজনানা থবক তৌরি। ঙসিদি খুঙ্গঙশিংদা য়ুম খুদিং, লম খুদিং দ্রোন শীজিন্নদুনা মেপিং তৌরি। খুঙ্গঙগী লমগী দেতা অমসুং লন-থুমগী চে-চাং ওনলাইন্দা অপলোদ তৌরি। মসিনা খুঙ্গঙশিংদা লমগা মরী লৈননা য়েৎনবা লোইশিনবতা নত্তনা খুঙ্গঙগী মীওইশিংনা লায়না বেঙ্কতগী লোন লৌবা য়াবগী ফীভমসু পুরক্লি। খুঙ্গঙগী লায়রবশিংগী লম য়েৎননবা নত্তে, চাউখৎপগী য়ুম্ফম ওইহনগদবনি হায়বা মায়কৈসিদা ঙসি লৈবাকসিনা চঙশিল্লি।
ঐগী নুংশিরবা ইরৈচাশিং,
স্বামী বিবেকানন্দ জীনা ভারতকী তুংগী ৱাফম ফোঙদোকপা মতমদা মহাক্কী মীৎমাঙদা ইমা ভারতকী তুংগী ফীভম উরকপা মতমদা মহাক্না হায়রম্মি – হেক ঙম্লিবমখৈ হৌখ্রবগী মায়কৈদা য়েংউ। মদুদা মতম পুম্নমক্তা নৌদুনতা লৈবা ঈশিং চাইথরক্লিবা অদু থক্লবা মতুংদা, য়েংবিয়ু স্বামী বিবেকানন্দ জীগী তোপ-তোপ্পা ৱাখল্লোন, মদুংগী মতুংদা মাঙদা য়েংউ। মাঙদা চঙশিল্লু অমদি ভারতপু হান্নদগী য়াম্না হেন্না তরং তরংবা, অথোইবা, অফবা ওইহল্লু। নীংতম্বগী ৭৫শুবা চহিসিদা ঐখোয়গী থৌদাংদি লৈবাক্কী লোইবা নাইদ্রবা মতিংদা থাজবা থমদুনা মাঙদা চঙশিনবনি। অনৌবা মীরোলগী মচাক মথুমগীদমক ঐখোয় পুনশিন্নদুনা থবক তৌমিন্নবা তাই, মালেমগী থাক্কী পোত্থোক পুথোক্নবগীদমক ঐখোয় পুন্না থবক তৌমিন্নবা তাই, কত্তিং এদ্জ ইনোভেসনগীদমক ঐখোয় পুন্না থবক তৌমিন্নবা তাই, অনৌবা মতমগী তেক্নোলোজীগীদমক ঐখোয় পুন্না থবক তৌমিন্নবা তাই।
ঐগী নুংশিরবা ইরৈচাশিং,
অনৌবা হীরমশিংদা চাউখৎপগী য়ুম্ফম অনৌবা মচাক মথুমনা ওই। ঐখোয়না ময়ায় ওইবা থাক্কী মথৌ তাবশিং, মঙলানশিং ফংহন্নবসু হোৎনরি। মচাক মথুম নোপ্পনা চাউখৎ লমজেলদা চাউনা মাঙহল্লি। ময়োল্লমগী ময়ায় ওইবা থাক্কী মীওইশিংদসু মাঙহল্লি।
ঐগী নুংশিরবা ইরৈচাশিং,
ৱাফমসিদা মীৎয়েং থমদুনা লৈবাকসিনা ঈশিং, কংফাল অমসুং অতিয়াগী লমশিংদা হান্নগা মান্নদবা খোঙজেল অমসুং পাক চাউবগী চাংদা থবক তৌদুনা উৎলি। অনৌবা ঈশিং লম্বী ওইরবসু, অনৌ-অনৌবা মফমশিংবু সী প্লেন্না শমজিন্নবা ওইরবসু লৈবাকসিদা খোঙজেল য়াঙনা থবক চঙশিল্লি। ভারতিয় রেলৱেসু অনৌবা শক্লোন্দা চঙশিল্লি। লৈবাকসিনা ফিরেপ লৌরি মদুদি নীংতম্বগী অমৃত মহোতসববু, অদোমসু খঙবিরমগনি ঐখোয়না নীংতম্বগী অমৃত মহোতসব চয়োল ৭৫ চুপ্না পাঙথোক্নবা ফিরেপ লৌরি। মার্চ ১২দগী হৌখিবনি অদুগা ২০২৩গী ওগস্ত ১৫ ফাওবা চত্থগদবনি, থৌনাগা লোয়ননা মাঙদা চঙশিনগদৌরিবনি। মরম অসিনা লৈবাকসিনা য়াম্না মরুওইবা ৱারেপ অমা লৌরে। নীংতম্বগী অমৃত মহোতসবকী চয়োল ৭৫সিদা বন্দে ভারত ত্রেন ৭৫না লৈবাক্কী কোচিন কোয়া শিনবা থুংনা শমজিন্ননবা ৱারেপ লৌরে। ঙসি খোঙজেল য়াঙনা লৈবাকসিদা অনৌবা এয়রপোর্ত শেমৎলিবসিগুম, উরান য়োজনানা অরাপ-অরাপ্পা মফমশিং শমজিন্নবগুম, মসিসু য়াম্না মরুওই। হেন্না ফবা নোংথক্কী লম্বী থম্বনা মীয়ামগী মঙলানশিংবু কমদৌনা নৌনা মঙফাওনহনবগে হায়বা ঙসি ঐখোয়না উরি।
ঐগী নুংশিরবা ইরৈচাশিং,
ভারতনা অনৌবা মচাক মথুমগা লোয়ননা মচাক মথুম শেমগৎপগী পুম্নমক কোনশিল্লবা, পুম্নমক শুপচিল্লবা থৌওং অমা লৌবা মথৌ য়াম্না তাই। মতম খরগী মতুংদা ঐখোয়না ইরৈচা করোর কয়াগী মঙলানশিংবু মঙফাওনহনগদবা অচৌবা থৌশিল অমা, প্রধানমন্ত্রী গতিশক্তিগী নেসনেল মাস্তর প্লান লৈবাক মীয়ামগী মাঙদা পুথোক্কদৌরি। লুপা করো লাখ ১০০ হেনবগী থৌরাং অসিনা নহা লাখ কয়গীদমক থবক পীননবগী অনৌবা খুদোংচাবা পুদুনা লাক্কদৌরিবনি। গতিশক্তি পুম্নমক কোনশিল্লবা মচাক মথুমগী লমদা মীৎয়েঙ থম্বা লৈবাকসিগী নেসনেল ইনফ্রাস্ত্রকচর মাস্তর প্লান ওইগদৌরিবনি। ঐখোয়গী শেন্মিৎলোনগী পুনশিল্লবা অমদি পুম্নমক কোনশিল্লবা লম্বী অমা পীগনি। হৌজিক ঐখোয়গী ত্রান্সপোর্তকী সিস্তেমদা অমগা অমগা চুশিন্নদবা মওং মতৌ ঐখোয়না উরি। গতিশক্তিনা পল কয়া নমখাইগনি। তুংগী লম্বীদা অপনবা লৈরক্কদবশিং লৌথোক্কনি। মসিনা মীচম মীয়ামগী চত্থোক চৎশিনগী মতম হন্থহন্দুনা ঐখোয়গী ইন্দস্ত্রীগী পোত্থোক পুথোকপগী চাং হেনগৎহনগনি। গতিশক্তিনা ঐখোয়গী লমদমসিগী পোত্থোক পুথোক্লিবশিংবু মালেমগী ওইনা চাংদম্নবদা মতেং য়াম্না ওইগনি অমদি মসিনা তুংগী ইকনমিক জোনশিং শেমগৎনবগী অনৌবা ৱাখল্লোনশিংসু পোকহনগনি। অমৃত মতমগী চহি তরাসিদা গতিগী শক্তিনা ভারতকী চাউখৎ লমজেলগী য়ুম্ফম ওইগনি।
ঐগী নুংশিরবা ইরৈচাশিং,
চাউখৎপগী লম্বীদা মাঙদা চঙশিন্দুনা ভারতনা মাগী পোত্থোক পুথোকপগী অমদি মপান্দা থাদোকপগী থৌওং অনিমক হেনগৎহনবা তাই। নুমিৎ খরগী মমাঙদা ভারতনা মশাগী অহানবা লমদমসিদা শাজবা এয়রক্রাফ্ত কেরিয়র আই.এন.এস. বিক্রান্ত সমুদ্রগী চাংয়েংগীদমক পুথোকখিবা অদোম্না উবিরমগনি। ভারতনা ঙসি মশাগী ফাইতর প্লেন শাজরি, মশাগী সবমেরিন শাজরি। স্পেসসিপসু তরংদা ভারতকী ফিরাল পাইহন্নবা শেম শারি। মসি লমদমসিদা পোত্থোক পুথোকপগী লমদা ঐখোয়গী মতিং উৎলিবশিংনি।
কোরোনাগী মতুংদা লাক্লিবা অনৌবা শেন্মিৎলোনগী ফীভমসিদা মেক ইন ইন্দিয়াগী মফম শেমগৎনবগীদমক লৈবাকসিনা প্রদক্সন লিঙ্ক ইন্সেন্তিবকী থৌরাংসু লাউথোকখ্রে। স্কিম অসিনা পুরক্লিবা অহোংবগী খুদমদি ইলেক্ত্রোনিক মেনুফেকচরিং সেক্তরদা উরি। চহি তরেৎকী মমাঙদা ঐখোয়না দোলর বিলিয়ন নিপানগী মোবাইল ফোন মপান্দগী পুশিল্লক্লম্মি। হৌজিক্তি মপামন্দগী পুশিল্লকপা য়াম্না হন্থরে অদুগা হৌজিক্তি ঐখোয়না দ,লর বিলিয়ন অহুমগী মোবাইল ফোন মপান্দা থাদোক্লি।
ঙসি ঐখোয়গী পোত্থোক পুথোকপগী সেক্তরদা ফংলিবা খোঙজেল অসিদা ঐখোয়না পুক্নিং চঙগদবা ৱাফমদি ভারত্তা পুথোক্লিবা পোত্থোকশিং অসি খ্বাইদগী ফবা মতিক্কা লোয়ননা মালেমগী হিদান্নবা অসিদা য়াওশিন্দুনা ঙম্লবদি মাঙদা খোঙফম অমা চৎখৎপা ঙম্নবা শেম শাগদবনি অমদি মালেমগী কৈথেলবু ঐখোয়না পান্দম থমগদবনি। লৈবাক্কী পোত্থোক পুথোক্লিবা পুম্নমক্তা ঐনা হায়জনিংবদি ঐখোয়গী পোত্থোক পুথোক্লিবশিংনা মপান্দা য়োল্লিবা পোৎলমশিং অদু অদোমগী কম্পেনীখক্তগী নত্তে, মদুদা ভারতকী মমিংসু পক্লিবনি, ভারতকী মিংচৎ য়াওরিবনি, ভারতকী শক্তম য়াওরিবনি, ভারতকী মীওই করোর কয়াগী থাজবসু য়াওরিবনি হায়বা ৱাফমসি কৈদৌঙৈদা কাউবিগনু।
ঐগী নুংশিরবা ইরৈচাশিং,
মরম অসিনা ঐনা পোত্থোক পুথোক্লিবশিংদা হায়জরি, অদোমগী পোত্থোক খুদিংমক ভারতকী ব্রান্দ এম্বেসেদরনি। পোৎলমশিং অদু শীজিন্নরিবমখৈ মদুবু লৈরিবা মীওইশিংনা মদুবু ভারত্তা শাবনি হায়না মখৌ পোঙনা হায়হনগদবা ফীভমদু ওইহনবা পাম্মি। অদোমগী পুক্নিংদা মালেমগী কৈথেলদা শন্দোকখিনবা মঙলান লৈহনবা মথৌ তাই। মঙলান অসিবু মঙফাওনহন্নবগীদমক লৈঙাক্না হীরম খুদিংদা অদোমগীদমক লেপ্লি।
ঐগী নুংশিরবা ইরৈচাশিং,
ঙসি লৈবাকসিগী তোঙান তোঙানবা সেক্তরশিংদা, অপীকপা ময়োল্লমশিংদসু, তিয়র ২, তিয়র ৩ ময়োল্লমশিংদসু অনৌ অনৌবা স্তার্ত-অপশিং থোরক্লি। মখোয়দা, ভারতকী পোত্থোকশিংবু মালেমগী কৈথেলদা য়ৌহন্নবগী মরুওইবা থৌদাং লৈ। লৈঙাক্না হায়রিবা স্তার্ত-অপশিং অসিগা লোয়ননা থৌনা ফনা লেপ্লি। মখোয়গী শেলগী তেংবাঙ পীবা ওইরবসু, খাজনা কোকহনবগী ওইরবসু মখোয়গী চৎন-কাঙলোনশিং লায়থোকহনবদা ওইরবসু তৌবা য়াবা পুম্নমক তৌরি। কোরোনাগী অসিগুম্লবা লাংফম অসিদা অনৌবা স্তার্ত-অপ লিশিং কয়া থোরক্লি। মায় পাক্না মখোয়না মাঙদা চেনখৎলক্লি। ঙরাংগী স্তার্তঅপনা ঙসিগী য়ুনিকোর্ন ওইরি। মখোয়গী মার্কেত ভেল্যু লুপা করোর লিশিং কয়া য়ৌখ্রে।
মখোয়গী লৈবাকসিগী অনৌবা মখলগী লন শেমগৎপশিংনি। মখোয়না মখোয়গী তোপ তোপ্পা ৱাখল্লোনশিংগী পাঙ্গলনা মরোমদোম লেপচদুনা মাঙদা চেনখৎলক্লি অমদি মালেম শিনবা থুংনা শন্দোকখিনবা মঙলান পুদুনা চৎলি। চৎলিবা চহি তরাসিদা ভারতকী স্তার্তঅপশিং, ভারতকী স্তার্তঅপ ইকোসিস্তেম, মালেম পুম্বদা খ্বাইদগী অথোইবা ওইহন্নবা মায়কৈদা ঐখোয়না লেপ্পা নাইদনা চঙশিনবা তাই।
ঐগী নুংশিরবা ইরৈচাশিং,
চাউনা অহোংবা পুরক্নবগীদমক, চাউনা অওনবা পুরক্নবগীদমক রাজনিতিগী ওইবা ফিরেপ, মথৌ তাই। ভারত্তা রাজনিতিগী ফিরেপকী অৱাৎপা অমত্তা লৈতে হায়না ঙসি মালেম্না খঙলি। অওনবা পুরক্নবগীদমক অফবা অমদি মওং চুম্বা লৈঙাক্লোন মথৌ তাই। কমদৌনা ভারতনা লৈঙাক্লোনগী অনৌবা পন্দুপ অমা শেম্লিবগে হায়বসু মালেম্না উরি। অমৃত মতমগী চৎলিবা চহি তরাসিদা ঐখোয়না মথংগী মীরোলগী অওনবা পুরকপা হায়বসিদা ঐখোয়না অহেনবা মীৎয়েঙ চঙলি, মীয়াম্না ফংফম থোকপা, সর্ভিস দেলিভরীশিং অরোইবা পনখৈ ফাওবা, খ্বাইগী মমৈদা লৈরিবা মীওইদু ফাওবা অয়েৎপা অপনবা লৈতনা য়ৌহনগদবনি। লৈবাক্কী অপুনবা চাউখৎনবগীদমক মীয়ামগী পুন্সিদা লৈঙাক্না অমদি লৈঙাক্কী এজেন্সীশিংনা মরম চাদনা খুৎ থিংজিনবগী থৌওং লেপহনবা তাই।
হান্নদি লৈঙাকনা দ্রাইভিং সিত্তা ফম্লম্মি। মসি মতমদুগী মথৌ তাবা ওইরম্বদি য়াই। অদুবু হৌজিক্তি মতমসু হোংলে। হৌখিবা চহি তরেৎসিদা লৈবাকসিদা মথৌ তাদবা আইনগী লাংদগী, মথৌ তাদবা থৌওংশিংদগী ঈনীং তমহন্নবগীদমক হোৎনদুনা লাক্লি। হৌজিক ফাওবদা লৈবাকসিগী অরিবা আইন চা কয়া মুত্থৎখ্রে। কোরোনাগী লাংফম মরকসিদসু লৈঙাক্না কম্প্লাইএন্স লিশিং ১৫ হেন্না মুত্থৎখ্রে। অপীকপা লৈঙাক্কী থবক অমা ওইরবসু, চে-চাং কয়া অমা, হঞ্জিন-হঞ্জিন চৎনবগী মওং অমা লৈরম্বা অদোমসু খঙবিরমগনি। কম্প্লাইএন্স লিশিং ১৫ ঐখোয়না মুত্থৎখিবনি।
খুদম অমা পীজগে, চহি ২০০গী মমাঙদা মফমসিদা আইন অমা চৎরম্মি… চহি ২০০ হায়বদি ১৮৫৭গী মমাঙদগী লৈরম্বা আইন অসিনা মরম ওইরগা লৈবাক্কী মীচম অমনা মেপ শেমবগী নীংতমবা লৈরমদে। হৌজিক ৱাখল খন্থবিয়ু, ১৮৫৭দগী চৎনদুনা লাক্লিবা মেপ শেমগে হায়রবদি লৈঙাক্তা হংবিয়ু, লাইরিক্তা নমগে হায়রবদি লৈঙাক্তা হংবিয়ু হায়রম্মি, মেপ মাঙখিবদসু ফাবগী চিংনবা লৈরম্মি। হৌজিক্তি ফোন খুদিংদা মেপকী এপ য়াওরে। সেত্তলাইতকী মপাঙ্গল অসুক য়াম্না কল্লবা মতমসিদা অসিগুম্বা আইনগী পোৎলুম পুদুনা অসুম চৎখিগদরা? কম্প্লাইএন্সকী পোৎলুম অসি থাংথবা মথৌ তাই। মেপ্পিংগী ৱা ওইরবসু স্পেসকী ৱাফম ওইরবসু, ইনফোর্মেসন তেক্নোলোজীগী ৱাফম ওইরবসু, সেক্তর কয়াদা লৈরম্বা অসিগুম্বা রিগুলেসন কয়া ঐখোয়না মুত্থৎখ্রে।
ঐগী নুংশিরবা ইরৈচাশিং,
মরম চাদবা চৎন-পথাপকী অফা-অপুনদগী নীংতমদুনা ইজ ওফ দুইংগা লোয়ননা ইজ ওফ বিজিনেস অনিমক য়াম্না মরু ওই। লৈবাক অসিগী ইন্দস্ত্রী অমসুং লল্লোন ইতিকশিংদা ঙসি অহোংবা অসিগী মমি তারি।
ঙসিদি লেবর লো দজন কয়া শুপ্নতগী কোদ ৪ খক্তদা পুনশিনখ্রে। তেক্সকা মরী লৈনবা ফীভমশিংসু হৌজিক্তি লায়হল্লে অমদি ফেসলেস ওইহল্লে। অসিগুম্বা অওনবা অসি লৈঙাকখক্তদা নত্তনা গ্রাম পঞ্চায়ত, নগর পঞ্চায়ত অমসুং ম্যুনিসিপাল কাউন্সিল ফাওবা য়ৌননবা পুম্নমক পুনশিন্দুনা থবক তৌমিন্নবা চঙই। ঙসি ঐনা হায়রিবসিনি, কেন্দ্র নৎত্রগা স্তেত লৈঙাক্কী লোয়শঙ পুম্নমক্তা হায়জরিবসিনি। অদোমসু চৎন-পথাপ অমসুং থৌওংশিং লায়থোকহনবিয়ু। লৈবাক মীয়ামদা পোৎলুম ওইহনগদবা, অপনবা পীগদবা চৎন-পথাপ অমদি থৌওং খুদিংমক লৌথোক্নবা হোৎনবিয়ু। চহি ৭০-৭৫ চঙনা মরা তাশিনখ্রবশিংদু নোংমদা নৎত্রগা চহি অমদা হেক্তা লৌথোকপা লুগনি হায়বা ঐ খঙই। অদুবু পুক্নিংদা চপ য়ুংনা লেপ্তুনা থবক পায়খৎলবদি ঐখোয় শোয়দনা তৌবা ঙমগনি।
ঙসিদি লেবর লো দজন কয়া শুপ্নতগী কোদ ৪ খক্তদা পুনশিনখ্রে। তেক্সকা মরী লৈনবা ফীভমশিংসু হৌজিক্তি লায়হল্লে অমদি ফেসলেস ওইহল্লে। অসিগুম্বা অওনবা অসি লৈঙাকখক্তদা নত্তনা গ্রাম পঞ্চায়ত, নগর পঞ্চায়ত অমসুং ম্যুনিসিপাল কাউন্সিল ফাওবা য়ৌননবা পুম্নমক পুনশিন্দুনা থবক তৌমিন্নবা চঙই। ঙসি ঐনা হায়রিবসিনি, কেন্দ্র নৎত্রগা স্তেত লৈঙাক্কী লোয়শঙ পুম্নমক্তা হায়জরিবসিনি। অদোমসু চৎন-পথাপ অমসুং থৌওংশিং লায়থোকহনবিয়ু। লৈবাক মীয়ামদা পোৎলুম ওইহনগদবা, অপনবা পীগদবা চৎন-পথাপ অমদি থৌওং খুদিংমক লৌথোক্নবা হোৎনবিয়ু। চহি ৭০-৭৫ চঙনা মরা তাশিনখ্রবশিংদু নোংমদা নৎত্রগা চহি অমদা হেক্তা লৌথোকপা লুগনি হায়বা ঐ খঙই। অদুবু পুক্নিংদা চপ য়ুংনা লেপ্তুনা থবক পায়খৎলবদি ঐখোয় শোয়দনা তৌবা ঙমগনি।
ঐগী নুংশিরবা ইরৈচাশিং,
ৱাখল্লোন অসিগা লোয়ননা লৈঙাক্না ব্যুরেক্রোসীদা মীয়ামদা য়ুম্ফম ওইবা থৌওং হেনগৎহন্নবা, ইফিসিএন্সী হেনগৎহন্নবা লৈঙাক্না মিসন কর্ময়োগী অমসুং কেপাসিতী বিল্দিং কম্মিসনসু হৌদোকখিবনি।
ঐগী নুংশিরবা ইরৈচাশিং,
হৈ শিংবা অমদি তৌবা ঙম্বনা থল্লবা লমদমসিগীদমক করিগুম্বা খরা তৌরম্নবগী ৱাখল্লোন্না থল্লবা নহাশিংবু শেমগৎনবগী থৌদাং… কনাদা লৈ… মসিগী থৌদাং মহৈ মশিংদা লৈ, ঐখোয়গী মহৈ মশিংগী ফীভম, ঐখোয়গী মহৈ মশিংগী চৎনবীদা লৈ। ঙসিদি ২১শুবা চহিচাগী মথৌ তাবশিং ফংহনবা ঙমগদবা লৈবাক্কী ওইবা মহৈ মশিংগী চৎন-পথাপ ঐখোয়গী লৈরে। হৌজিক্তি ঐখোয়গী অঙাঙশিং হৈ-শিংবা ৱাৎপনা মরম ওইরগা পন্থবা লৈররোই অমদি লোলনা পলসু ওইররোই। লাইবক থিবদগী লৈবাকসিদা লোলনা মরম ওইরগা খাইবুং খাইবুং তানবা ফীভম অমা লৈরি। লোলনা মরম ওইরগা ঐখোয়না লৈবাক্কী খ্বাইদগী চাউরবা তেলেন্তপু পোন মনুংদা পুন্দুনা থম্লি। ইমালোলদা পুকচেল শেংবা মীওইশিং ফংগনি। মমালোলদা মহৈ মশিং তম্লকপা মীওইশিংনা মাঙদা চৎখৎলক্লবদি মখোয়না মশাদা থাজবা হেনগৎলক্কনি। লায়রবা ইমুংগী অঙাঙশিংনা মমালোলদা তম্লগা প্রোফেসনেল ওইরক্লবদি মখোয়গী তৌবা ঙম্বশিংদা অচুম্বা ৱায়েল পীবগা মান্নগনি।
অনৌবা মহৈ মশিংগী চৎন-পথাপ অসিদা লায়রবগী মায়োক্তা লান্থেংনবগী পাম্বৈদি লোলনা ওইরি হায়না ঐনা খল্লি। অনৌবা মহৈ মশিংগী চৎন-পথাপ অসিনা মওং অমদা লায়রবা মুত্থৎনবগী লান্থেংদা অচৌবা খুৎলায় অমা ওইরক্কদৌরিবনি। লায়রবা মুত্থৎপগী লান্থেংদা মায় পাক্নবগী পাম্বৈ মমালোলদা মহৈ মশিং তম্বা, মমালোলবু য়োকখৎপা, মমালোলদা মরুওইবা মীৎয়েং থম্বনা ওইগদৌরিবনি। শান্নবুংদা লৈবাকসিনা উখ্রে… ঐখোয়না খঙখ্রে মদুদি লোলনা পল অমা ওইখিদে অমদি মদুগী মহৈনা ঐখোয়না নহরোলশিং মশক থোক্না লিখৎলকখি, শান্নখি। হৌজিক্তি ফীভমসি পুন্সিগী শান্নবুং অতৈদসু ফংলগনি।
অনৌবা মহৈ মশিংগী চৎন-পথাপসিদা তোপ তোপ্পা ৱাফম অমসু য়াওরি, মসিদা শান্ন-খোৎনববু এক্সত্রা-করিকুলরগী মহুত্তা মেনস্ত্রীম মহৈ মশিংগী শরুক অমা ওইহল্লে। পুন্সিবু মাঙদা পুখৎপদা কান্নবা পাম্বৈশিংগী মরক্তা শান্ন-খোৎনবসু অমনি। পুন্সি মপুং ফানবগীদমক শান্ন-খোৎনবা হায়বসি য়াম্না মরুওই। শান্ন-খোৎনববু মরুওইনা লৌনরমদবা মতম অমা লৈরম্মি। মমা মপাশিংনসু মচাশিংদা শান্নদুনতা লৈরবদি পুন্সি মাঙলনি হায়না চৈনরম্মি। হৌজিক্তি লৈবাকসিদা মশা মউ ফবা অমদি শান্ন-খোৎনবগী লমদা অনৌবা য়াওল অমা লাক্লে। হন্দক্কী ওলিম্পিক্তসু ঐখোয়না উখ্রে, ঐখোয়না খঙখ্রে। অওনবা অসি লৈবাকসিগী য়াম্না চাউবা য়াওল অমনি। মরম অসিনা ঙসি লৈবাকসিদা শান্ন-খোৎনবগী হৈশিংবা, তেক্নোলোজী অমসুং প্রোফেসনেলিজম পুরক্নবগীদমক পায়খৎলিবা থৌশিল অসিবু চৎলিবা চহি তরাসিদা হেন্না খোঙজেল য়াঙ্খহন্দুনা হেন্না মপাঙ্গল কনখৎহনবা তাই।
মহৈ মশিং নৎত্রগা শান্ন-খোৎনবা ওইরবসু, ঙমখৈ নৎত্রগা ওলিম্পিক্কী শান্নবুংদা ওইরবসু ঐখোয়গী ইচানুপীশিংনা ঙসিদি মশক থোক্না মখোয়গী মতিং উৎলিবসিদা লৈবাকসিনা চাউথোকচবা ফাওরি। ঙসিদি ভারতকী মচানুপীশিংনা মখোয়গী মফম কন্নবগীদমক কন্না হোৎনরি। করিয়র খুদিংদা অমদি থবক মফম খুদিংদা নুপীশিংগী মফম মপুং ফানা ফংহন্নবা ঐখোয়না ফিরেপ লৌমিন্নগদবনি। লম্বীদগী হৌরগা থবক মফম ফাওবা মফম খুদিং নুপীশিংগী শাফবা মফম ওইহন্নবা ঐখোয়না হোৎনমিন্নবা চঙই। মখোয়বু ইকায়খুম্নবা ফংহন্নবা লৈবাকসিগী লৈঙাকলোন্দা, পুলিস অমসুং আইন ঙাকপগী ফীভমসু, মীয়াম্নসু মখোয়গী থৌদাং চাদা চাম্মা য়াগদবনি। পান্দম অসি ঐখোয়না নীংতম্বগী ৭৫শুবা চহিগী পান্দম ওইহনগদবনি।
ঙসি ঐনা নুংঙাইরবা ৱাফম অমা ইরৈচা পুম্নমক্কী মফমদা পাউদমজরি। ঐঙোন্দা ইচানুপী লাখ কয়ানা মখোয়সু সৈনিক স্কুলদা তমনিংই হায়না পাউজেল চেল্লকই। মখোয়গীদমক্তা সৈনিক স্কুলগী থোঙ হাংদোকপা তাই। চহি অনি-অনি মখায়গী মমাঙদা মিজোরমগী সৈনিক স্কুলদা অহানবা ওইনা নুপীশিং মহৈ তমহনবা ফংহন্নবা চাংয়েং অমা ঐখোয়না হৌদোকখি। হৌজিক্তি লৈবাকসিগী সৈনিক স্কুল পুম্নমক্তা নুপীমচাশিংসু তমহন্নবা ফিরেপ লৈঙাক্না লৌরে। লৈবাকসিগী সৈনিক স্কুম পুম্নমক্তা হৌজিক্তি নুপীমচাশিংসু মহৈ তমহল্লগনি।
মালেমগী ওইনা নেসনেল সিক্যুরিতী য়াম্না মরু ওইরিবসিগুম এনভাইরন্মেন্তেল সিক্যুরিতীদসু অহেনবা মীৎয়েঙ চঙবা হৌনরক্লে। ভারত ঙসিদি এনভাইরন্মেন্তেল সিক্যুরিতীগী মরুওইবা খোঞ্জেল অমা ওইরে। ঙসিদি বাইওদাইভর্সিতী নৎত্রগা লেন্ত ন্যুত্রেলিতী, ক্লাইমেত চেঞ্জ নৎত্রগা ৱেস্ত রিসাইক্লিং, ওর্গানিক ফার্মিং, বাইওগ্যাস, ইনর্জী কঞ্জার্বেসন নৎত্রগা ক্লীন ইনর্জী ত্রাঞ্জিসন ওইরবসু মহৌশাগী ঈশিং নুংশিৎ অকোইবগী ফীভমগী লমদম ভারতনা হোৎনরিবশিংগী মহৈ ফংবা হৌরক্লি। ভারতনা উমংগী মফমবু ওইরবসু নৎত্রগা নেসনেল পার্ক মশিং, কৈ মশিং অমদি এসিয়াতিক লাইয়ন মশিং হেনগৎহনবনচিংবা কয়াসিনা ইরৈচাশিংগী নুংঙাইরবা ৱাফম অমা ওইরি।
ঐগী নুংশিরবা ইরৈচাশিং,
ভারতকী অসিগুম্বা মায় পাকপশিংগী মরক্তা অচুম্বা ৱাফম অমসু ঐখোয়না খঙজিনবা তাই। ভারত ঙসি ইনর্জীগী লমদা নীংতম্বা ওইদ্রি। ভারতনা ঙসি ইনর্জী পুশিল্লক্নবগীদমক চহি খুদিংগী লুপা করোর লাখ ১২ হেন্না চাদিং তৌরি। ভারতনা চাউখৎনবগীদমক মরোমদোম লেপচবা ভারত শেমগৎনবগীদমক ভারতনা ইনর্জীগী লমদা নীংতম্বা পুরকপা হায়বসি মতমসিগী তঙাই ফদবা ওইরে, মথৌ তারে। মরম অসিনা ঙসি ভারতনা নীংতম্বগী ১০০শুবা চহি য়ৌদ্রিঙৈদা ইনর্জীগী লমদা নীংতম্বা ফংনবা খোঙফম অমা লেপ্পা চঙই অমদি মসিগীদমক্তা ঐখোয়গী লম্পী পরিং য়াম্না ময়েক শেংলি। গ্যাস বেজ ইকনমি নৎত্রগা লৈবাক পুম্বদা সি.এন.জি., পি.এন.জি.গী নেতৱর্ক নৎত্রগা চাদা ২০ ইথানোল ব্লেন্দিংগী পান্দম ওইরবসু ভারতনা লেপ্লিবা পান্দমগা লোয়ননা মাঙদা চঙশিনবা তাই। ভারতনা ইলেক্ত্রিক মোবিলিতীগী লমদসু মাঙদা চঙশিল্লি অমদি রেলৱেবু চাদা চাম্মা ইলেক্ত্রিফিকেসন তৌননবা থবকসু খোঙজেল য়াঙনা চঙশিল্লি। ভারতকী রেলৱেনা ২০৩০ ফাওবদা নেত জিরো কার্বোন ইমিত্তর ওইননবা পান্দম থম্লি। হায়রিবা থৌরাং কয়াসিগা লোয়ননা লৈবাকসিনা মিসন সর্কুলর ইকনমীদসু অহেনবা মীৎয়েঙ চঙলি। ঐখোয়গী ভেহিকল স্ক্রেপ পোলিসী মসিগী অচৌবা খুদম অমনি। ঙসি জি-২০ লৈবাকশিংগী লূপ্তা মশাগী ক্লাইমেত গোলশিং ফংনবা মায়কৈদা খোঙজেল য়াঙনা চঙশিল্লিবা লৈবাক হায়রগদি ভারতখক্তনি।
ভারতনা চৎলিবা চহি তরাসি লোইশিল্লকপদা রিনিউএবল ইনর্জী গিগাৱাৎ ৪৫০ পুথোক্নবা পান্দম থম্লি। ২০৩০ ফাওবদা গিগাৱাত ৪৫০ পুথোক্নবা। মসিদা গিগাৱাত ১০০গী পান্দমদি থমখিবা মতমদগী ঙনখৎনা ফংবা ঙমখ্রে। ঐখোয়না হোৎনরিবসিনা মালেমদসু থাজবা অমা পীরি। মালেমগী থাক্তা ইন্তরনেসনেল সোলার এলাইএন্স মসিগী অচৌবা খুদম অমনি। ভারতনা ঙসিসু থবক পায়খৎলি। মসিদা ভারতগী ক্লাইমেতগী লমদা খ্বাইদগী চাউনা ক্বান্তম জম্প পীগদবা থৌশিল অমা হায়রগদি গ্রীন হাইদ্রোজেনগী লম অসিনি। গ্রীন হাইদ্রোজেনগী লমদা থম্লিবা পান্দম ফংনবগীদমক ঙসি মচু অহুমগী ফিরালনা শাখি ওইদুনা নেসনেল হাইদ্রোজেন মিসন লাউথোক্লি। অমৃতকী মতমসিদা ঐখোয়না ভারতপু গ্রীন হাইদ্রোজেন পুথোকপগী অমদি মপান্দ থাদোকপগী মালেমগী মকোন ওইহন্নবা হোৎনগদবনি। হায়রিবা ইনর্জীগী লম অসিনা ভারতপু চাউখৎপগী লমদা মরোমদোম লেপচবা ঙমহনগনি অমদি মালেম পুম্বদা ক্লীন ইনর্জী ত্রাঞ্জিসনগী অনৌবা থাজবা অমা পীগনি। গ্রীন গ্রোথনা গ্রীন জোবকী অনৌবা খুদোংচাবা কয়া ঐখোয়গী নহাশিংগী ঐখোয়গী স্তার্তঅপশিংগী থোঙদা থিল্লরি।
ঐগী নুংশিরবা ইরৈচাশিং,
২১শুবা চহিচাগী ঙসিগী ভারত অচৌবা পান্দম থম্নবা অমদি মদুবু ফংনবগী মতিং লৈরে। ঙসিদি ভারতনা চহিচা কয়া পাম্বৈ থিনরকপা ৱাফমশিংগী পাম্বৈ পুথোক্নবগী মতিংসু লৈরে। আর্তিকল ৩৭০ শেমদোক্নবগী অচৌবা ফিরেপ ওইরবসু, লৈবাকসিগী খাজনাগী লাংদগী নীংতমহনগদবা থৌরাং জি.এস.তি. ওইরবসু, ঐখোয়গী লান্মী মরুপশিংগী ‘ৱন রেঙ্ক-ৱন পেন্সন’গী ফিরেপ ওইরবসু, রাম জন্মভুমি অমদি লৈবাকসিদা ইং চিকপা পুরকপগী ৱাফম ওইরবসু ঐখোয়না হৌখিবা চহি খরসিদা থবক ওইনা ওন্থোক্তুনা উৎলি।
ত্রিপুরাদা চহি কয়াগী মতুংদা ব্রু-রিয়াংগী য়াশিন্নবা পুরকখিবা, ও.বি.সি. কম্মিসনবু কন্সতিত্যুসন্না শকখঙখিবা নৎত্রগা জম্মু-কাস্মিরদা নীংতম্বা মতুংদা অহানবা ওইনা বি.দি.সি. অমসুং দি.দি.সি. মীখল পাঙথোকখিবা ওইরবসু ভারতনা পান্দম ফংনবগী মতিং লেপ্পা লৈতনা উৎলি।
ঙসি কোরোনাগী মতমসিদা ভারত্তা রেকোর্দ ওইনা মপান লম্বী কম্পেনীশিং চঙশিল্লক্লি। ভারতকী ওইনা মপান্গী কম্পেনীশিং চঙশিল্লকপগী চাং হৌজিক ফাওবগী ওইনা খ্বাইদগী ৱাংবা ওইরি। সর্জিকেল স্ত্রাইক অমসুং এয়র স্ত্রাইক তৌদুনা ভারতনা লৈবাক্কী য়েক্নবশিংবু ভারতকী মতিং উত্থোক্লি। ভারত হোংলক্লি, ভারতনা অহোংবা পুরকপা ঙম্মি, ভারতনা লুবদগী লুরবা ফিরেপ লৌবা ঙম্মি অমদি কনবদগী কল্লবা ফিরেপ লৌবদা ভারতনা করিসু নাচুংদে, নীংহন্নবা লৈতে হায়বা ঐখোয়না ঊৎলি
ঐগী নুংশিরবা ইরৈচাশিং,
অনিসুবা মালেমগী লাঞ্জাও মতুংদা, মালেমগী ওইবা মরীগী মওংসু হোংখ্রে। কোরোনাগী মতুংদসু কোরোনা মতুংগী ৱর্ল্দ ওর্দরগী ওইথোকপা লৈ। কোরোনাগী মতমদা মালেম্না ভারতকী হোৎনখিবা উখ্রে অমদি খঙখ্রে। ঙসিদি মালেমসিনা ভারতপু অনৌবা মীৎয়েঙ অমদা য়েংলি। মীৎয়েং অসিগী মরুওইবা মচিন অনি লৈ – অমনা তেরোরিজম অমনা লম শন্দোকপগী মচৎনি। ভারতনা হায়রিবা শিংনবা অনিমক্কা থেংনরি অমদি ইচঙ থৌনা পাউখুমসু পীরি। ভারতনা ঐখোয়গী থৌদাং মওং চুম্না য়ানবগীদমক ঐখোয়গী ঙাকশেলগী থৌরাংশিংসু মপাঙ্গল ফনা থম্বা তাই। ঙাকশেলগী লমদা লৈবাকসিবু মরোমদোম লেপচবা ঙমহন্নবা, ভারত মচাশিংবু, ভারতকী কম্পেনীশিংবু য়োকখৎনবগীদমক ঐখোয়গী হোৎনবা কনবা ইন্দস্ত্রীশিংবু অনৌবা খুদোংচাবা পীনবগদীমক ঐখোয়না লেপ্পা লৈতনা হোৎনরি। লৈবাক্কী ঙাকশেলগীদমক লৈরিবা ঐখোয়গী লান্মীশিংগী মপাঙ্গল কনখৎহন্নবগীদমক ঐখোয়না অমত্তা চিত্থদনা থবক পায়খৎকনি হায়না ঐনা ময়ামদা থাজবা পীজরি।
ঐগী নুংশিরবা ইরৈচাশিং,
ঙসি অসি লৈবাকসিগী অথোইবা থিঙ্কর শ্রী অরবিন্দোগী মপোক কুমওনসু তাই। ইং ২০২২দা মহাক্কী ১৫০শুবা মপোক কুমওন তারি। শ্রী অরবিন্দ্রো ভারতকী মশক থোকপা তুংগী মঙলান মঙলম্বা মীওইনি। হান্না ওইরমদবা মওংদা ঐখোয়গী ইতিং ফুদোকপা মথৌ তাই হায়না মহাক্না হায়রম্মি। ঐখোয়গী হৈনবী হোংদোকপা তাই। অনৌবা পুক্নিং ৱাখলগা লোয়ননা ইশাবু মীকপ থোকহনবা তাই। শ্রী অরবিন্দ্রোগী ৱাহৈশিং অসিনা ঐখোয়বু ঐখোয়গী থৌদাংশিং নীংশিংহল্লি। লৈবাকসিগী মীওই অমা ওইনা, খুন্নাই অমা ওইনা ঐখোয়না লৈবাকসিদা করি পীরিবগে হায়বসিসু ঐখোয়না খন্থবা চঙই। ঐখোয়না হকপু লুম্না লৌদুনতা লাক্লি, মতমদুদা মসিগী মরুওইবসু য়াম্না লৈখৎ, অদুবু হৌজিক্তি থৌদাংদা হেন্না পুক্নিং চঙবা মতম ওইরে, লৈবাকসিনা থম্লিবা পান্দমশিংসিগীদমক থৌদাং য়াবা তাই, মীপুম খুদিংমক পুনশিনবা তাই। লৈবাক মচা পুম্নমক্না মসিবু মশাগী থৌদাং ওইহনবা তাই।
লৈবাকসিনা ঈশিং য়োকশিন্নবগী থৌশিল হৌদোকখি, অমদি ঈশিং মাঙহন্দবা হায়বসি ঐখোয়গী হৈনবী ওইহনবা হায়বসি ঐখোয়গী থৌদাংনি। লৈবাকসিনা দিজিতেল মওংদা শেল পুথোক পুশিন্দা মীৎয়েং থম্লিবসিদা হেক য়ারিবমখৈ শেল ওইনা ত্রাঞ্জেক্সন তৌদনবা হোৎনবা হায়বসি ঐখোয়গী থৌদাংনি। লৈবাকসিনা ভোকেল ফোর লোকেলগী থৌশিল পায়খৎলিবসিদা লমদমসিদা পুথোকপা পোৎলমশিং হেক য়ারিবমখৈ লৈদুনা শীজিন্নবা হায়বসি ঐখোয়গী থৌদাংনি। লৈবাকসিদা প্লাস্তিক লৈতবা ভারত ওইহন্নবা মঙলিবা মঙলানসিদা সিঙ্গল য়ুজ প্লাস্তিক শীজিন্নবা মপুং ফানা লেপ্পা হায়বসি ঐখোয়গী থৌদাংনি। ঐখোয়গী তুরেলশিংদা অমোৎ-অকায় লংথদবা, ঐখোয়গী সমুদ্র মপানশিং লুনা নান্না থম্বা হায়বসি ঐখোয়গী থৌদাংনি। ঐখোয়না স্বচ্ছ ভারত অভিয়ানবু অনৌবা পন্দোল অমা লোমহনগদবনি।
ঙসি লৈবাকসিনা নীংতম্বগী ৭৫শুবা চহিগী থৌরমসিদা নীংতম্বগী অমৃত মহোতসব পাঙথোক্লিবসিদা, ঐখোয়না থৌরাংসিদা শরুক য়াশিন্দুনা, মসিদা চোংশিন্দুনা য়াওশিনন্দুনা পান্দমশিংবু হন্না হন্না নীংশিংবা হায়বসি ঐখোয় পুম্নমক্কী থৌদাংনি। ঐখোয়গী নীংতম ইহৌবু পুক্নিংদা চেৎনা থাগোন্নদুনা অদোম্না তৌবা খুদিংমক শিদয়াই নাদয়াইগী ঈরিক্কুম শেংগনি অমদি ভারত মচা করোর কয়াগী হোৎনজমলনা ওইহল্লকপা অমৃতগী থৌরম অসি লাক্কদৌরিবা চহিশিংদা ইথিল পীদুনা থৌনা হাপকদৌরিবনি।
ঐগী নুংশিরবা ইরৈচাশিং,
ঐ তুংগী লম্বী উবা ঙম্বা মীদি নত্তে, ঐনা হোৎনজমলগী মহৈদা থাজবা থম্মি। ঐনা ঐগী লৈবাক্কী নহাশিংদা, ইচল-ইচেশিংদা, ইচানুপীশিংদা, লৌমীশিংদা, প্রোফেসনেলশিংদা থাজবা থম্মি। হৌজিক্কী মীরোলগী ‘কেন দু’গী মীরোলনি, মসিনা পান্দম খুদিংমক ফংবা ঙমগনি।
ইং ২০৪৭দা নীংতম্বগী সনা ফুদোংবা থৌরম, নীংতম্বগী ১০০শুবা চহিগী থৌরম পাঙথোকপদা প্রধান মন্ত্রী ওইগদৌরিবদু, ঙসিদগী চহি ২৫গী মতুংদা প্রধান মন্ত্রী ওইগদৌরিবদুনা ফিরল চিংখৎপা মতমদা… ঐনা মপুং ফানা থাজবগা লোয়ননা হায়রিবসিনি… মহাক্কী ৱারোলদা ফংবা ঙম্লবা পান্দমশিংগী মতাঙদা পল্লকপা মতমদা ঙসি লৈবাকসিনা থম্লিবা পান্দমশিংসি শোয়দনা ওইগনি… মসি ঐগী মায় পাকপগী থাজবনি।
ঙসি ঐনা পান্দমগী মওংদা হায়রিবশিংসি, ঙসিদগী চহি ২৫গী মতুংদা ফিরাল চিংখৎকদৌরিবা মীওইদুনা ফংবা ঙম্লবা পান্দম অমা ওইনা হায়রক্কনি। লৈবাকসিনা ফংবা ঙম্লবা পান্দম ওইনা হায়রিবশিং অসিবু শিংথানরকখিনি। ঙসি লৈবাকসিগী নহাশিংনা মতমদুদা লৈবাকসিকা কমদৌনা হায়রিবশিং অসি ফংবা ঙমখ্রিবনো হায়না ঙক্না য়েংনগনি।
২১শুবা চহিজাদা ভারতকী মঙলান অমসুং পান্দমশিং ফংনবগীদমক করিগুম্বা পল অমত্তনা অপনবা পীবা ঙম্লোই। ঐখোয়গী মরুওইবশিংনা ঐখোয়গী থৌনানি, ঐখোয়গী অপুনবনা ঐখোয়গী পাঙ্গলনি, ঐখোয়গী ৱাখলগী থৌনাদি লৈবাক্না মাঙদা – মতম পুম্নমক্তা মাঙদা হায়বা ৱাখল্লোনসিনি। হৌজিক অপুনবগী মঙলান মঙবা মতমনি, হৌজিক অপুনবগী পান্দম থম্বা মতম্নি, হৌজিক পুন্না হোৎনমিন্নবগী মতম্নি… অমদি হৌজিক মায় পাকপগী মায়কৈদা চঙশিন্নবগী মতম্নি।
অদুগা মরম অসিনা ঐনা অমুক্কা হন্না হায়জরিবসিনি-
হৌজিক মতম্নি,
হৌজিক মতম্নি… চপ চারবা মতম্নি, ভারতকী অথোইবা মতম্নি!
হৌজিক মতম্নি, চপ চারবা মতম্নি! ভারতকী অথোইবা মতম্নি!
মশিং য়াম্লবা খুৎশিংগী পাঙ্গলনি,
মশিং য়াম্লবা খুৎশিংগী পাঙ্গলনি, মায়কৈ খুদিংদা লৈবাক নুংশিবা উরি!
মশিং য়াম্লবা খুৎশিংগী পাঙ্গলনি, মায়কৈ খুদিংদা লৈবাক নুংশিবা উরি…
নহাক হৌগৎলু মচু অহুমগী ফিরাল হাইহল্লু,
নহাক হৌগৎলু মচু অহুমগী ফিরাল হাইহল্লু,
ভারতকী মরাইবক থাঙ্গৎলু, ভারতকী মরাইবক থাঙ্গৎলু,
হৌজিক মতম্নি, চপ চারবা মতম্নি! ভারতকী অথোইবা মতম্নি!
করিমত্তা লৈতে…
করিমত্তা লৈতে, তৌবা ঙম্লোইদবা,
করিমত্তা লৈতে, ফংবা ঙম্লোইদবা,
নখোয় হৌগৎলু…
নখোয় হৌগৎলু, নখোয় পুনশিল্লু,
নখোয়গী তৌবা ঙম্ববু খঙউ…
নখোয়গী তৌবা ঙম্ববু খঙউ,
নখোয়গী নথৌদাং পুম্নমক খঙউ…
নখোয়গী নথৌদাং পুম্নমক খঙউ!
হৌজিক মতম্নি, চপ চারবা মতম্নি! ভারতকী অথোইবা মতম্নি!
লৈবাকসিনা নীংতম্বগী চহি ১০০ মপুং ফারকপদা, লৈবাক মীয়ামগী পান্দমবু অশেংবা ওন্থোকসি হায়না ঐনা হায়জরি। হায়রিবা য়াইফ-পাউজেলশিংসিগা লোয়ননা, ইরৈচা পুম্নমক্কী মফমদা ৭৫শুবা নীংতম নুমিৎসিদা ঐনা অমুক্কা হন্না নুংঙাইবা ফোঙদোকচরি অমদি ঐগা লোয়ননা খুৎ ৱাংনা থাঙ্গত্তুনা লাউমিন্নসি –
জয় হিন্দ,
জয় হন্দ,
জয় হিন্দ!
বন্দে মাতরম,
বন্দে মাতরম,
বন্দে মাতরম!
ভারত ইমানা য়াইফরে,
ভারত ইমানা য়াইফরে,
ভারত ইমানা য়াইফরে!
হন্না-হন্না থাগৎচরি!
