ঐহাক্কী নুংশিজরবা ইরৈবাকচাশিং,
নীংতম্বা নুমিৎকী শেংলবা থৌরম অসিদা, লৈবাক মীয়াম পুম্নমকপু হন্না-হন্না নুংঙাইবা ফোংদোকচরি।
ঙসি অসি রক্ষা বন্ধনগী কুমহৈসু ওইরি। চহী চা কয়াদগী চত্থদুনা লাক্লবা চৎন-লোনচৎ অসিনা মচে-মচন অমসুং মবুং-মৌপ্বাগী নুংশিংবা অদু ফোংদোক্লি। ঐহাক্না লৈবাক মীয়াম পুম্নমকপু, মচে-মচন অমসুং মবুং-মৌপ্বা পুম্নমকপু অসিগুম্লবা রক্ষা বন্ধনগী শেংলবা থৌরম অসিগীদমক হন্না-হন্না য়াইফ-পাওজেল পীজরি। নুংশিবনা থল্লবা কুমহৈ অসিনা ঐখোয়গী ইচে-ইচল অমসুং ইচিল-ইনাওশিংগী আশাশিং অমসুং মংলানশিং মপুং ফাবা ওইরসনু, অমসুং মখোয়গী পুন্সিদা নুংশিবা পুরকপা ওইরসনু।
ঙসি, লৈবাক অসিনা নীংতম্বগী কুমহৈ পাংথোক্লিবা মতম অসিদা লৈবাক অসিগী তোঙান তোঙানবা শরুকশিংদা লৈরিবা মীওইশিংনা ঈশিং ইচাউ অমসুং নোং কা হেন্না চুবগী অৱাবা মায়োক্নরি। কয়া অমনা মখোয়গী নুংশিজবা কয়া অমা কায়নখ্রে। ঐহাক্না মখোয়গী মফমদা ঐহাক্কী ওইবা অৱাবা ফোংদোকচরি। রাজ্য সরকারশিং, কেন্দ্র সরকার অমসুং এন.দি.আর.এফ.গুম্বা অতোপ্পা সংস্থানশিংনা প্রজাশিংগী অৱাবা হন্থহন্নবা অমসুং ফিভম অদু লাকশিন্নবা অহিং নুংথিল নায়দনা হোৎনরি।
ঙসি, ঐখোয়না নীংতম্বগী নুংঙাইরবা নুমিৎ থৌরম পাংথোক্লিবা অসিদা লৈবাক অসিগী নীংতম্বগীদমক থৱায় কৎথিবা, জেলদা মপুন্সি লেনখিবা, ফাসীগী থৌরী কোঙ্গোয়বু তরাম্না ওকখিবা, সত্যগ্রহগী থোংদা অহিংশাগী ইনোৎ পীনবীখিবা মখোয়শিং অদুগী মফমদা ঐহাক্না ইকায় খুম্নবা উৎচরি। লৈবাক অসিনা বাপুগী লুচিং মখাদা নীংতম্বা ফংখি।
মতৌ অদুম্না, লৈবাক অসিনা নীংতম্বা ফংলবা মতুং চহী কয়া অসিদা লৈবাক্কী শান্তি, সুরক্ষা অমসুং চাউখৎ থৌরাংগীদমক মীওই কয়া অমনা মখোয় মখোয়গী থৌদাং লৌখি। ঙসি ঐহাক্না নীংতম্লবা ভারতকী চাউখৎ থৌরাংগীদমক, শান্তিগীদমক মীয়ামগী আশা অমসুং মংলান অদু মপুং ফাহন্নবা থৌদাং লৌখিবা মখোয় পুম্নমক অদুবুসু ইকায় খুম্নজরি।
অনৌবা সরকার শেম্লবা মতুংদা লাল কিলাদগী ময়াম পুম্নমক্কী মফমদা ৱা ঙাংজনবা তাঞ্জা অদু ঙসি ঐহাক্না অমুক হন্না ফংজরে। হৌজিক অনৌবা সরকার অসি শেমখিবা হপ্তা ১০ ফাওবা ফাদ্রি, অদুবু তেল্লবা হপ্তা ১০গী ওফিস পায়বা মতম অসিদসু হিরম খুদিংমক্তা, মায়কৈ খুদিংমক্তা, মখল খুদিংমক্কী হোৎনরিবশিংদা ইনোৎ পীরি, অনৌবা মওং মতৌশিং হাপচিল্লে অমদি মীচম প্রজাশিংনা আশা কয়া, মংলান কয়াগা লোয়ননা ঐখোয়বু সেবা তৌনবা পীনবীরিবা তাঞ্জা অসি ঐখোয়না মীকুপ অমা ফাওবা মাংহনবা তৌদনা পাংথোক্লি।
চয়োল ১০গী মনুংদা আর্তিকল ৩৭০ অমসুং ৩৫এ লৌথোকপা অসি সারদার পতেলগী মঙলান মঙফাওনহন্নবগী শিংথানীংঙাই ওইরবা খোঙথাং অমনি।
শুপ্নগী চয়োল ১০ অসিদা, ঐখোয়গী মুস্লিম নুপীশিংগী হকশিং ত্রিপল তালাগতগী ঙাক্নবা আইন অমা, তেরোরিজম থেংননবা আইনশিং হেন্না মপাঙ্গল কলহন্নবা চাউনা শেমদোকপশিং অমসুং পি.এম. কিষান সাম্মান নিধী য়োজনাগী কান্নবা ফংলবশিংগী বেঙ্ক একাউন্তশিংদা লুপা ক্রোর ৯০,০০০গী শেনফম ত্রান্সফর তৌবা য়াওনা ঐখোয়না অচৌবা থবক কয়া পায়খৎলে।
মখোয়গী হকচাং শোন্থরক্লবা অমসুং কনাগুম্বগী মতেং দরকার ওইরক্লবা চহি ৬০ হেল্লক্লবা মতমদা ঐখোয়গী লৌমী ইনাওশিং অমসুং ইচলশিং, ঐখোয়গী অপীকপা ইন্ত্রপ্রিনরশিংনা পেন্সন ফংগনি হায়বগী থাজবা লৈখিদে। মসিগীদমক ঐখোয়না পেন্সন স্কিম অমা হৌদোক্লে।
হৌজিক ঈশিং ফংদবা অসি অচৌবা পাও ওইরে। ঐখোয়না ঈশিং ফংদবগী অচৌবা অৱাবা মায়োক্নবগী ফিবমদা লৈরে। অসিগুম্বা ফিবম অসিদা, রাজ্যশিং অমসুং কেন্দ্রনা পুন্না ঈশিংগী অৱাবা কোক্নবা স্কিমশিং অমসুং থৌশিলশিং পায়খৎনবা জাল শক্তি মন্ত্রালয় অমা নৌনা শেমলে।
মশিং য়াম্লবা হকশেলগী খুদোংচাবশিংগা লোয়ননা ঐখোয়গী লৈবাক্না দোক্তর মশিং য়াম্না দরকার ওইরি। মসিগী দরকার ওইরিবশিং অসি ফংনবা, ঐখোয়না অনৌবা আইনশিং দরকার ওই, ইনফ্রাস্ত্রকচর শেমগৎপা, অনৌবা ৱাখল্লোন অমসুং অনৌবা খুদোংচাবশিং শেমগৎতুনা নহারোলশিং মেদিকেলগী শীনফমদা চংহনবা মথৌ তাই। মসিগী মিৎয়েং অসিদা মেদিকেল এজুকেসন্দা অরোন-অথুপ লৈহন্দনবা ঐখোয়না আইনশিং শেম্লে অমসুং মরুওইবা থবক কয়া পায়খৎলে।
ঙসি ঐখোয়না মালেম শীনবা থুংনা অঙাংশিংগী হকশিং খোঙ্গাওনবা থৌদোক কয়া থেংনরে অমসুং ভারতকী অঙাংশিংসু খুদোংথিবা মায়োক্নরি। অঙাংগী হকশিং ঙাক্নবা অকনবা আইনশিং দরকার ওইরে অমসুং মসি চৎনরে।
ইনাওশি অমসুং ইচলশিং, ২০১৪-২০১৯ ফাওবা চহি ৫ নখোয় ময়ামগী থবক তৌনবা খুদোংচাবা অমা নখোয়না ঐঙোন্দা পীরে। মীচম মীয়াম্না ফংফম থোকপা তঙাইফদবা খুদোংচাবশিং ফংনবা হোৎনবদা থেংনরিবা অৱাবশিং ঐখোয়না খঙলে। হৌখিবা চহি মঙা অসিদা ঐখোয়গী সরকারনা মীচম মীয়াম্না নোংমগী দরকার ওইরবশিং ফংহন্দুনা লাকলি।
খুঙ্গংশিংদা লৈরিবা লায়রবশিং, তোল্লবশিং, নৈহৎপীরবশিং আমসুং ত্রাইবেলশিংদা অখন্নবা খুদোংচাবশিং পীরি। লৈবাক অসি চাউখৎপগী লম্বীদা অমুক লাক্নবা ঐখোয়না মসিগী মাইকৈ অসিদা চোকথবা লৈতনা থবক পায়খৎলি। অদুবু মতমগী অহোংবা লাকই। ২০১৪-১৯ অসি নখোয় ময়ামগী তঙাইফদবশিং ফংহন্নবগী মতম অমা ওইখি, ২০১৯ অমসুং মসিগী ৱাংমা অসিদা নখোয় ময়ামগী মঙলানশিং অমসুং অনীংবশিং থুংহনগনি।
২১শুবা চহিচাগী ভারত অসি করি মানগনি? লৈবাক অসি কয়া য়াম্না য়াংনা চৎকনি? লৈবাক অসিনা কয়া য়াম্না থবক তৌগনি, করম্বা থাক ফাওবা লৈবাক অসিনা কাবা ঙমগনি, হায়রিবা পুম্নমক অসি ৱাখলদা থম্লগা মথং চহি ৫গীদমক লম্বী অমা ঐখোয়না থৌরাং তৌরি। ২০১৪দা ঐ লৈবাক অসিদা অনৌবা ওইখি। ২০১৩-২০১৪গী মীখল মমাংদা ঐনা লৈবাক অসি কোইনা চৎখি অমসুং মীয়ামগী ৱাখল্লোন খঙনবা হোৎনখি। অদুবু মী খুদিংমক মখোয়গী মাইথোংদা নীংবা কাইবা উখি, খুদিংমক চিংনবা লৈখি। লৈবাক অসিদা অহোংবা পুরকপা ঙমগদরা হায়না মীয়াম অঙকপা পোকখি। সরকার হোংলগা লৈবাক অসিদা অহোংবা পুরক্কদরা? মীচম মীয়ামগী ৱাখলদা থাজবা মাংবগী মমি অমা তাখি। মসি মখোয়না মতম শাংনা থেংনরকশিং অদুনা ওইহনবনি, থাজবশিং মতম শাংনা লৈখিদে, মখোয় য়াম্না থুংনা নীংবা কাইবগী ইরোন্নুংদা লুপখি। অদুবু ২০১৯ লাকপদা, থম্মোয়দা মীচম মীয়াম অমসুং ঐগী লৈবাক্কী কৎথোকপগা লোয়ননা চহি ৫ থবক কন্না পায়খৎলবা মতুংদা, ঐগী লৈবাক্কী মীওই মিল্লিয়ন কয়ানা ঐখোয়ন হিংহনদুনা লাক্লি। ২০১৯ লাকপদা ঐ অঙকপা পোকখি। ইরৈচাশিংগী ৱাখলদা অহোংবা লাকখি। নীংবা কাইবশিং থাজবনা মহুৎ শিনখি, মঙলানশিং থবক ওইনা পাংথোকখি, মীচম মীয়াম্না খোঞ্জেল অমত্তা ওইনা হায়খি – ঐগী লৈবাক অহোংবা পুরকলে। মীচম মীয়াম্না অমত্তা ওইনা হায়খি – হোই, ঐখোয়নসু লৈবাক অসি হোংহল্লে। ঐখোয় তুংদা লৈহৌররোই।
নাগরিক ক্রোর ১৩০গী থাজবশিং অমসুং মখোয়গী খোঞ্জেল অসিনা ঐখোয়দা অনৌবা থৌনা, অনৌবা থাজবা পীরে।
সাবকা সাথ-সাবকা বিকাস হায়বা লাইৱা অসিদা ঐখোয় থবক হৌখি অদুবু চহি ৫গী মনুংদা লৈবাক্কী মীয়াম্না লৈবাক অসিগী অপুনবা ৱাখল্লোনশিং সাবকা বিশ্বাসকী মচু শংলে। চহি ৫দা খুদিংমক্না শাগৎলিবা থাজবা অসিনা মীয়ামগী সেবা তৌনবা ঐখোয়দা থৌনা হাপ্লি অমসুং থৌনা হেন্না পীরি।
হন্দক পাংথোকখিবা মীখল অদুদা ঐনা উরে অমসুং ঐনা হায়খি মদুদি রাজনিতীৱালা অমত্তা শরুক য়াদবা মীখল, রাজনিতী দল অমত্তা শরুক য়াদবা মীখল, মোদী নৎত্রগা মোদীগী মরূপশিং শরুক য়াদবা মীখল অমা উখি। মীখলদা লাম্বা তৌনখিবা অদু ভারতকী মীওই ক্রোর ১৩০ অসিনি। মখোয় মশাগী মঙলানশিংগীদমক মখোয়না মীখল থেংনখি। হন্দক্কী মীখল অসিদা গনতন্ত্রগী অশেংবা মশক অদু উবা ফংখি।
নুংশিরবা ঐগী ইরৈচাশিং, খুদোংচাদবশিং কোক্নবা উপায়শিংগা লোয়না মঙলানশিং, অচেৎপা ফিরেপ আমসুং থাজবগা লোয়ননা হৌজিক ঐখোয় পুন্না চৎমিন্নগনি। খুদোংচাদবশিং কোকহনবা মতমদা ইশা ইরোমদোম থাজবা হেনগৎলকপা অসিনা খুদম অমনি। খুদোংচাদবশিং কোকহনবা অসিনা ইশা ইরোমদোম থাজবগী চাং হেনগৎহনগনি।
ইশা ইরোমদোম হিংজবা অসিনা ইশা ইথন্ত থাজবা হেনগৎলকই অমসুং মসিনা অকনবা থৌনা ওইহল্লি। ইশানা ইশা ইকায়খুম্নবা অসিনা পুম্নমক্তগী খ্বাইদগী ফবা হেললি অমসুং ঙসিদি লৈবাক অসি মশানা মশাবু ইকায়খুম্নবগী ৱাখল্লোন ফাওরে।
অদুগা ঙসিদি, ইশানা ইশাবু ইকায় খুম্নজবা অদুগা লোয়ননা ঐখোয় মায় পাকপগী অনৌবা অৱাংবা থাক অদু য়ৌনবা মাংলোমদা চংশিল্লি। ঐখোয়না সমস্যাশিং লোইশিন্নবা হোৎনবা মতমদা ঐখোয়না তোখায়না খল্লোয়দবনি। মদুদা খুদোংচাদবশিং মায়োক্নগনি। খুবাক খুদুনা থাগৎপা ফংনবা পান্দমদা পাংথোকখিবা মপুং ফাদবা থবকশিংনা লৈবাক অসিগী মংলানশিং অদু মংফাওনহনবদা মতেং ফংলোয়। ঐখোয়না মখোয়গী মরাশিংদগী মায়োক্নরিবা খুদোংচাদবশিং অদু লৌথোক্নবা হোৎনগদবনি।
মতৌ করম্না ঐখোয়গী মুস্লিম ইচানুপীশিং অমসুং ইচল-ইচেশিংনা মখোয়গী কোকথক্তা য়ান্থরিবা ত্রিপল তলাক্কী থাংশাং অদুগা লোয়ননা কিনা লৈরিবা অদু ময়াম্না উবিরম্লগনি। মখোয় ত্রিপল তলাক্কী ভিক্তিম ওইদ্রবা ফাওবা, মতম অমা হেক্তদা মসিগী ভিক্তিম ওইরকপা য়াই হায়বগী অকিবা অদু মখোয়দা লৈরম্মি। ইস্লাম চৎপা লৈবাক কয়ানা মতম কয়াগী মমাংদগী অসিগুম্লবা তমথিরবা চৎনবি অসি মুত্থৎখ্রে। অদুবু করিগুম্বা মরম খরদগী ঐখোয়না মুস্লিম ইমাশিং অমসুং ইচল-ইচেশিংবু মখোয়গী ফংফম থোকপা হকশিং ফংহনবদা নিংজিং-মাংজিন্নহনখি। করিগুম্বা ঐখোয়না লৈবাক অসিদা সতি প্রথা মুথৎপা ঙম্লবা, অঙাং নুপীমচাশিংবু পুক্নুংদা হাৎপা থিংনবা আইন শেম্বা ঙম্লবা, করিগুম্বা ঐখোয়না অঙাং ওইনা লুহোংবগী মায়োক্তা খোংজেল হৌনা লাওবা ঙম্লবা, অউনপোৎ পীথোক পীশিনগী চৎনবিগী মায়োক্তা অচেৎপা খোংথাং লৌখৎপা লম্লগদি, করিগীদমক ঐখোয়না ত্রিপল তলাক্কী মায়োক্তসু খোংজেল হৌনা লাওরোইদরিবনো? মরম অদুনা ভারতকী লোকতন্ত্র অমসুং সংবিধানগী স্পিরিৎ অদুদা ঐখোয়না মসিগী মরুওইবা খোংথাং অসি লৌদুনা ঐখোয়গী মুস্লিম ইচল-ইচেশিংনা চপ মান্নবা হকশিং অদু ফংগদবনি হায়বা বাবা সাহেব অম্বেদকরগী ৱাখল্লোন অদু ইকায় খুম্নরে। মদুনা মরম ওইরগা মখোয়গী মনুংদসু অনৌবা থাজবা অমা পোকহল্লে, অমদি ভারতকী চাউখৎপগী খোংচৎতসু ইচং থৌনা শরুক য়াবা ঙমহল্লে। অসিগুম্লবা ৱারেপ অসি রাজনীতিগী কান্ননবা লৌবা ৱারেপ নত্তে, চহী চা কয়া অমা ইমাশিং অমসুং ইচল-ইচেশিংগী পুন্সীবু ঙাক্তুনা থম্নবা গরেন্তি পীরি।
মতৌ অদুম্না, ঐহাক্না অতোপ্পা খুদম অমা পীজগে। আর্তিকল ৩৭০, ৩৫এ, করি মরম লৈবগীনো? মসি সরকার অসিগী শক্তমনি। ঐখোয়না সমস্যাশিং উদবা তৌদে অমদি য়োক্তুনা থমদে। হৌখিবা চহী ৭০দা তৌরমদবা থবক অদু অনৌবা সরকার শেম্লবা মতুং নুমীৎ ৭০গী মনুংদা আর্তিকল ৩৭০, ৩৫এ লৌথোক্নবা থবক ভারতকী হাউস অনিমক্না, রাজ্য সভা অমসুং লোক সভানা, শরুক অহুম থোকপগী অনি ফংদুনা অয়াবা পীখ্রে। মসিনা তাক্লি মদুদি মীপুম খুদিংমক্কী থম্মোয়দা ৱাফম অসি হান্ননা লৈরে, অদুবু কনানা হৌদোক্কনি, কনানা মাং থাদুনা চৎকনি, মদু ঙায়দুনা লৈবা ওইরম্বসু য়াই, লৈবাক মীয়াম্না ইফমদা থবক অসি শিন্নবিরে অমদি অদোম্না শিন্নবিরিবা থবক অদু পাংথোক্নবগীদমক লাকচরিবনি। ঐহাক্কী ইশাগী ওইবা করিসু লৈতে।
ঐখোয় জম্মু অমসুং কাশ্মিরগী রি-ওর্গনাইজেসনগী মায়কৈদসু মাংলোমদা চংশিল্লি। চহী ৭০ অসিদা কনাগুম্বা অমা নত্রগা অমনা করিগুম্বা অমা নত্রগা অমা হোৎনখি, সরকার খুদিংমক্না করিগুম্বা অমা নত্রগা অমা হোৎনখি।
অদুবু পেন্নঙাই ওইবা মহৈ অদু ফংখিদে, পেন্নঙাই ওইবা মহৈ অদু ফংদবা তারগদি অনৌবা মওংদা খনবা, অনৌবা মওংদা খোং থাংজিনবা মথৌ তারকই। অমদি জম্মু-কাশ্মির অমসুং লদাখকী মীয়ামগী অনিংবা অপাম্বা মপুং ফাহনবা অদু ঐখোয় পুম্নমক্কী ইথৌদাংনি। মখোয়গী মংলানশিংদা অনৌবা মঙাল অমা পীবা অসি ঐখোয় পুম্নমক্কী ইথৌদাংনি। অদুনা মদুগীদমক লৈবাক অসিগী মীওই কোতি ১৩০না থৌদাং অসি লৌবা তাই অমদি থৌদাং অসি মপুং ফাহন্নবগীদমক্তা মাংদা লাকপা অয়েৎপা অপনবা পুম্নমক লৌথোক্নবা ঐখোয়না হোৎনরি।
হৌখিবা চহী ৭০দা অসিগুম্লবা সিস্তেম অসিনা তোঙান্না তাবদা পুক্নিং থৌগৎলি, তেরোরিজম পোকহল্লি। ইমুং মনুংগী ওইবা সাসনবু পুক্নিং থৌগৎলি অমদি শেঞ্জা-থুমজা অমসুং খেৎনবা থম্বগী য়ুমফম অদু হেন্না চেৎশিলহনখি। মরম অদুনা মফম অদুগী নুপীশিংগী অধিকার ফংনবা, মফম অদুদা লৈরিবা দলিত ইচিল-ইনাও অমসুং ইচল-ইচেশিংবু, লৈবাক অসিগী দলিতশিংনা ফংলিবা অধিকার অদু মখোয়না ফংলমদে। ঐখোয়গী লৈবাক অসিদা লৈরিবা সেদুল ত্রাইবশিংনা ফংলিবা কান্নবশিং অদু জম্মু-কাশ্মির অমসুং লদাক লমদমগী ত্রাইবেল ইচিল-ইনাও অমসুং ইচল-ইচেশিংনসু ফংফম থোকই। মফম অদুদা গুর্জর ওইগেরা, বকরৱাল ওইগেরা, সিপ্পি ওইগেরা নত্রগা বালতি ওইগেরা অসিগুম্লবা তোঙান তোঙানবা সেদুল ত্রাইব কাংলুপ কয়া অমা লৈরি, মখোয়সু রাজনীতিগী অধিকারশিং ফংফম থোকই। মসি অঙকপা অমনি মদুদি জম্মু অমসুং কাশ্মিরদা লৈরিবা অমোৎ অকায় শেংদোক চামথোক্লিবা ইচিল-ইনাও অমসুং ইচল-ইচেশিংদসু আইনগী ওইনা অথিংবা থমলম্মি। মখোয়গী মংলানশিংবু নৈহৎপীখি। হৌজিক্তি ঐখোয়না মখোয়বু অথিংবা কয়া অসিদগী নান্থোকহল্লে।
ভারতপু মচেৎ তাহনখিবা মতম অদুদা মীওই কোতি কয়ানা মখোয়গী মপা মপুশিংগী ময়ুমশিং অদু থাদোক্তুনা লাকখিবা অদু মখোয়গী মরাল নত্তে, অদুবু জম্মু-কাশ্মিরদা লাক্তুনা খুন্দাখিবা মখোয়শিং অদুনা মীওইবগী অধিকার ফংখিদে নত্রগা সিতিজনশিপকী অধিকার ফংখিদে। জম্মু-কাশ্মিরগী চিংশিংদা লৈরিবা ইচিল-ইনাও অমসুং ইচল-ইচেশিংগী য়াইফনবা খোংথাংশিং ঐখোয়না লৌখৎপা পাম্লি।
ঐহাক্কী নুংশিরবা ইরৈবাকচাশিং, জম্মু-কাশ্মির অমসুং লদাখকী শান্তি অমসুং চাউখৎ-থৌরাং অসি ভারতকী পুক্নিং থৌগৎনিঙাই ওইবা য়াই। ভারতকী চাউখৎ খোংচৎতা য়াম্না চাউবা থৌদাং লৌবা য়াই। মখোয়গী হৌখ্রবা অদু অমুক হন্না পুরক্নবা ঐখোয়না হোৎনবা তাই। হোৎনরিবশিং অদুগা লোয়ননা শেম্লিবা অনৌবা সিস্তেম অসিনা রাজ্য মীয়ামদা অপনবা লৈতনা কান্নবা ফংহন্নবা থবক তৌবদা কান্নবা ফংহল্লগনি। হৌজিক্তি, জম্মু-কাশ্মিরদা লৈরিবা মীপুম খুদিংমক, ভারতকী অতৈ মফমশিংদা লৈরিবা মীওইশিংগুম্না দিল্লীদা লৈরিবা সরকারদা হংবা য়ারগনি। মদুগী মরক্তা অথিবা অপনবা অমত্তা লৈররোই। ঐখোয়না অসিগুম্বা সিস্তেম অমা থমগদবনি। অদুবু শক্তিগী মনুংদা লৈবা খরনা রাজনীতিগী কান্নবা ফংনবা আর্তিকল ৩৭০গী মায়কৈদা লেপলি। আর্তিকল ৩৭০গী মায়কৈদা লেপতুনা ঙাংলিবশিং অদুগী মফমদগী লৈবাক অসিনা পাউখুম অমা পাম্লি মদুদি আর্তিকল ৩৭০ অমসুং ৩৫-এ অসি অসুক য়াম্না মরু ওইরিবা করিগীনো।
করিগুম্বা আর্তিকল ৩৭০ অসি য়াম্না মরুওইরবদি, হৌখিবা চহি ৭০দা মেজোরিতী ওইরবসু করিগী সরকার পায়বা দলনা মসি লেংদবা অমা ওইহন্দ্রিবা করিগীনো? করিগী মসি মতম খরগী ওইনা থম্লিবনো? করিগুম্বা থাজবা য়াম্না লৈরবদি নহাক্না মসি লেংদনা থমগদবনি। নখোয়না মসিগী ৱারেপ অসি অচুম্বা নত্তে হায়বা খঙই। অদুবু নহাক্কী থৌনা লৈতে অমসুং থৌনা লৈরবদি এমেন্দ তৌগদবনি। রাজনিতীগী তুংগী ওইবা ৱাফম অমা লাক্লি। অদুবু ঐগী ওইনা লৈবাক্কী তুংগী ফিবম অসি পুম্নমক্নি, রাজনিতীগী তুংগী ফিবম দরকার ওইদে।
ঐখোয়গী সংবিধান শেম্লম্বশিং অমসুং সরদার পতেলনচিংবা অচৌবা মীওইশিংনা লৈবাক্কী অপুনবগী শক্তম অমসুং রাজনিতীগী পুনশিনবা ৱাখলদা থম্লগা খুদোংথিরবা মতমদা অরুবা মরুওইবা ৱারেপ কয়া লৌরমখি। লৈবাক্কী অপুনবগী শক্তম শাগৎপগী থবকশিং মাইপাকপা অমা ওইখি অদুবু আর্তিকল ৩৭০ অমসুং ৩৫এনা মরম ওইদুনা খুদোংচাদবা খরা মায়োক্নখি।
ঙসি ঐনা লাল কিলাদগী লৈবাক্কী মীয়ামদা ৱা ঙাংদুনা, ঐনা চাউথোক্না হায়রি মদুদি ভারত মচা খুদিংমক্না লৈবাক অমা, সংবিধান অমগী মরমদা হায়বা ঙমগনি অমসুং সরদার সাহেবকী এক ভারত শ্রেস্থ ভারতকী মঙলান অদু ফংহন্নবা ঐখোয়না হোৎনগনি। মরম অদুনা ঐখোয়না লৈবাক্কী অপুনবগী শক্তম কনখৎহনগদবনি অমসুং মসিগী থবক অসি লেপ্পা লৈতনা পাংথোক্কদবনি। মসি মরক্কী ঙাইহাক্কী ওইবা থবক ওইরোইদবনি অমসুং লেপ্তনা চৎথগদবা ওইগদবনি।
জি.এস.তি.না ঐখোয়না লৈবাক অমা তেক্স অমা হায়রিবা মঙলান অসি মঙফাওনবা ঙম্লে। মসিগী মান্ননা ঐখোয়না ইনর্জীগী লমদা লৈবাক অমা গ্রিদ অমা মঙফাওনরে।
মসিগা ইরোইননা ঐখোয়না লৈবাক অমা, মোবিলিতি কার্দ অমা শেমগৎলে অমসুং হৌজিক লৈবাক অসিদা মতম অমত্তদা মীখল পাংথোক্নবা লৈবাক শীনবা থুংনা ৱা খন্নবা হৌরে। খন্নবা অসি গনতন্ত্রিক ওইবা মওংদা পাংথোক্কনি। এক ভারত শ্রেস্থ ভারতকী ঐখোয়গী মঙলান অসি ফংনবা ঐখোয়না অনৌবা ৱাখল্লোন কয়া হাপচিনগনি।
ঐগী নুংশিরবা ইরৈচাশিং, লৈবাক অসি অনৌবা থাক অমদা পুখৎতুনা লৈবাক অসি মালেমদা মমিং লৈবা অমা ওইহনগদবনি। মসিগীদমক লৈবাক অসিদা লায়রবা কোকহন্নবা ঐখোয়না অহোংবা পুরক্কদবনি। করিগুম্বা উপায় অমা হেক্ত শীজিন্নদুনা ঐখোয়না লায়রবগী খুবামদগী নান্থোক্নবা হোৎনগদবনি অমসুং মসিনা লৈবাক অসিগী অফবা তুংলমচৎ অমা শেমগৎপা ঙমগনি।
হৌখিবা চহি মঙা অসিদা লায়রবা কোকহন্নবা মাইপাকনা থবক কয়া পায়খৎলে। মমাংদগী হেন্না ঐখোয়না মাইপাক্লে অমসুং খোঙজেল য়াংলে। ইকায়খুম্নবা উৎপা অমসুং লায়রবা মীওই অমা শৌগৎপা অসিনা মীওই অদুগী থৌনা হেনগৎহনগনি অমসুং সরকারগী মতেং য়াওদনা লায়রবা কোকহন্নবা থবকশিংদা মতেং পাংনবা পুক্নিং থৌগৎকনি।
মহাক মশাগী পাঙ্গলতনা লাইরববু মাইথিবা পীনবগীদমক লাক্কনি। ঐখোয়গী ইরক্তগী কনাগুম্বনা হেন্না লুবা ফিভমগা মায়োক্ননবগী থৌনা লৈ হায়বা তারবদি, মদু ঐগী লাইরবা ইচিল-ইনাওশিং অসিনি। অদুক্কী মতিক ইংবা ওইজসনু, মখোয় খুতুম তাশিন্দুনা লেনবা ঙম্মি। মখোয়গী নুংদা থৌনা অসি য়াওরি। লাক্লো অসিগুম্বা থৌনা অসিবু ঐখোয় লাৎচরসি অমসুং মরম অসিনা মখোয়গী নুংতিগী হিংবগী লানফমগী অৱাবশিং অসি ঐখোয় কোকহল্লসি।
ঐগী লাইরবশিংগী মফমদা করিগী অমাংশঙ লৈরোইদবা, মৈ ফংলোইদবা, লৈননবা য়ুম লৈতবা, ঈশিংগী খুদোংচাবা ফংদবা, বেঙ্কতা একাউন্ত হাংদবা, শেল পুননবা শেন্দোই চাবশিংগী ময়ুমদা চৎতুনা পুম্নমক করিগী বন্ধোপ থমদোক্কদৌরিবনো? লাকও, লাইরবশিংগী মশানা-মশাবু ইকাই খুম্নবা, মশানা মশাবু থাজজবা অসিমকপু মাংদা পুখৎনবগীদমক, মপাঙ্গল হাপ্ননবা ঐখোয় হোৎনরসি।
ইচিল-ইনাওশা, নীং খা তম্বা চহি ৭০ হেনখ্রে। থবক ময়াম অমা সরকার পুম্নমক্না মাগী মাগী মওংদা পাংথোকনখ্রে। দল অমা হেক্তগী সরকার ওইরবসু, কেন্দ্রগীবু ওইরো, রাজ্যগীবু ওইরো, পুম্নমক্না মাগী মাগী মওংদা হোৎনৈ। অদুবু মসিসু অচুম্বনি মদুদি ঙসি হিন্দুস্তানদা চাউরাক্না য়ুম তঙ্খাই অমরোমদি থক্ননবা ঈশিং ফংদ্রি। মমা ওইবীশিং অমসুং মচে-মচল ওইবীশিংনা মকোক্তা অরুম্বা চফু পুরদুনা কি.মি. ২,৩,৫ চৎপা তাই।
পুন্সিগী য়াম্লবা শরুক অমদি ঈশিংগীদমক মাংহল্লি। মরম অদুনা সরকার অসিনা অখন্নবা থবক অমগী মাইকৈদা শাফু পীনবা ৱারেপ লৌরে অমসুং মদুদি – ঐখোয়গী য়ুমথোং খুদিংমক্তা ঈশিং করম্না য়ৌহনগনি? থক্ননবা অশেংবা ঈসশিং করম্না ফংহনগনি? মরম অসিনা ঙসি ঐনা লাল কিলাদগী লাওথোকচরি মদুদি ঐখোয় লাক্কদৌরিবা মতম খরা অসিদা ‘জল-জীবন’ মিশন অসি মাংদুনা পুদুনা চখৎকনি। ‘জল-জীবন’ মিশন অসিগীদমক্তা কেন্দ্র অমসুং রাজ্য সরকারনা পুন্না থবক তৌমিন্নগনি অমসুং লাক্কদৌরিবা চহি খরা অসিদা লুপা ক্রোর লাখ অহুম মখাইদগী হেনবা শেনফম ‘জল-জীবন’ মিশন অসিগীদমক চাদিং তৌনবা ৱাশক শক্লে। থবকশিং অদু ঈশিং য়োকশিনবা, ইছৈ-লৌখোং পীবা, নোং ঈশিং য়োকশিনবা, সমুদ্রগী ঈশিং অমসুং অমোৎপা ঈশিং অদু চুমথোকপা, লৌমীশিংগীদমক্তা ‘পর দ্রোপ, মোর ক্রেপ’, মাইক্রো ইর্রিগেসন, ঈশিং অরেম্বদা মাংহন্দনবগী খোংজং, ঈশিংগী মতাংদা মীয়াম মীয়ামদা খঙহনবা অসিনচিংবা লমশিংদা পাংথোক্কনি। ঈশিং য়োকশিন্নবগীদমক, ঈশিংগী হৌরকফম অমুক হন্না শেমজিন শাজিন্নবগীদমক ঐখোয়না লেপ্তনা হোৎনগনি অমসুং ঐখোয়না থাজবা অসিগা লোইননা মাংদা চখৎকনি মদুদি ঈশিংগী লমদা হৌখিবা চহি ৭০ রোম অসিদা তৌখিবা থবকশিং অদুগী শরুক মরি ঐখোয়না চহি ৫ অসিদা তৌগনি। হৌজিক ঐখোয় কুইনা অমুক ঙাইদুনা লৈবা ঙম্লরোই অমসুং লৈবাক অসিগী অফাওবা লম্বোইবশিংনা চহি কয়াগী মমাংদা, লম্বোইবা তিরুবল্লুবরজীনা মতম অদুদা মরু ওইরবা ৱাফম অমা হায়বীরম্মি, মতম অদুদদি কনানসু ঈশিংগী অৱাবগী মরমদা খনবা ফাওবা খল্লম্মোই। অমসুং মতম অদুদা লম্বোইবা তিরুবল্লুবরজীনা হায়বীরম্মি, “নীর ইন্দ্রী অমিয়াদু, উল্গঃ, নীর ইন্দ্রী অমিয়াদু উল্গঃ” হায়বদি ঈশিং লোইখ্রবদি, মহৌশিগী থবক অসি লেপখি। মতৌ অসুম্না মাং তাকপা হৌরকই।
ঐ গুজরাত্তা পোকপনি, গুজরাত্তা লাই খুরুম্ফম অমা লৈ মহুদী, মদু অৱাং থংবা গুজরাত্তা লৈ। জৈন কাংলুপকী মীওইশিংনা মফম অদুদা চৎনৈ। ঙসিদগী চাউরাক্না চহি ১০০গী মমাংদা মফমদুদা জৈন মুনি অমা লৈরম্মি, লৌমীনি, লৌবুক্তা থবক শুবনি অদুবু জৈনগী চৎন-লোনচৎকা লোইনদুনা মহাক মঙান ফংখি অমসুং মুনি ওইখি।
চাউরাক্না চহি ১০০ রোমগী মমাংদা ইবীরম্মি। বুদ্ধি সাগরজী মহারাজনা ইবীরম্মি মদুদি নোংমদি ঈশিং অসি দুকান্দা য়োনবা মতম অমা লাকখিনি। চহি ১০০গী মমাংদা লম্বোইবা অমনা ঈশিং দুকান্দা য়োল্লক্কনি হায়না ইদুনা থম্লমবা অসি অদোম্না খল্লুবা ঙম্বরা অমসুং ঙসি ঐখোয় থক্ননবা ঈশিং দুকান্দগী লৈরি। ঐখোয় কদাইদগী কদাইদা য়ৌরবনো।
ঐগী নুংশিরবা ইরৈবাকচাশিং, ঐখোয় চোকথবা ফাওরোইদবনি, ঐখোয় খক লেপথোক্লোইদবনি অমসুং ঐখোয়না মাংদা চখৎপদা নীংজিং মাংজিংনরোইদবনি। খোংজং অসি সরকারগী ওইহল্লোইদবনি। ঈশিং য়োকশিন্নবগী খোংজং অসি, লুবা নানবগী খোংজং চংশিল্লিবা অসিগুম্না, মীচম মীয়ামগী খোংজং ওইহনগদবনি। মীচম মীয়ামগী ফিদম অদুবু পুদুনা, মীচম মীয়ামগী অপাম্বা অদুবু পুদুনা, মীচম মীয়ামগী থৌনা অদু পুদুনা ঐখোয় মাংদা চখৎকদবনি।
ঐগী নুংশিরবা ইরৈবাকচাশিং, হৌজিক ঐখোয়গী লৈবাক অসি ৱাফম কয়া মরুমদা ঐখোয় ইশাবু লোৎসিন্দুনা থম্বগী মতম অদু ওইদ্রে। শিংনবশিং মায়োক্নবগী মতম অদু লাক্লে। করিগুম্বদা ঐখোয় রাজনীতিগী অমাং-অতোংদা য়ুম্ফম ওইরগা ৱারেপ লৌরম্মি অদুবু মসিনা লৈবাক অসিগী হৌরক্লিবা মীরোলদা অদুক্কী মতিক অমাং অতা থোকহল্লি। মসিগুম্বা হিরম অমদা ঐ ঙসি লাল কিলা অসিদগী শেংদোকচবা পাম্মি। হিরম অদুদি, ঐখোয়গী অসিদা মশিং লাকঙমদনা মী মশিং হেনগৎলকপা অসিনি। মশিং থিঙমদনা হেনগৎলকপা অসি, ঐখোয়গী লাক্কদৌরিবা মীরোলগী অনৌবা অৱাবা কয়া মায়োক্নহল্লি অদুবু মসি ৱাফম অসি য়াগদবনি মদুদি ঐখোয়গী লৈবাক অসি খঙ-হৈরবা কাংলুপ অমনি, হায়রিবা ৱাফম অসি নীংথিজনা খঙই। মখোয়না ময়ুমদা অঙাং অমা পোক্ত্রিঙৈগী মমাংদা মখোয়দা চুমদবা চুমদবা ৱায়েল ফংহল্লুগদ্রা হায়বসি নীংথিজনা খল্লি। মখোয়গী মথৌ তাবশিং অদু মপুং ফাহনবা ঙমগদ্রা ঙমলোইদ্রা, মখোয়গী মঙলানসিং অদু মপুং ফাহন্নবগীদমক্তা মখোয়গী থৌদাং য়াবা ঙমগদ্রা ঙমলোইদ্রা। পেরামীতর পুম্নমকশিং অসি হোৎতুনা ঐখোয়গী লৈবাক অসিদা ঙসিসু মশানা হোৎনজদুনা অপীকপা ইমুং অমদা তাসিন খোমজিঞ্জরগা, মখোয়গী ইমুংগীদমক্তসু অফবা তৌই অমসুং লৈবাক অসিগী অফবা তৌবদা চাউরবা থৌদাং য়ারি। পুম্নমক অসি ইকাই খুমনবদা মতিক চারবা ঙাক্তনি। অপীকপা ইমুং অমা শেমদুনা মখোয়না লৈবাক নুংশিবা অদু উৎথোকই। খুন্নাই অসিদা লৈরিবা ঐখোয় পুম্নমক্না মখোয়গী পুন্সি অদুবু কুপথনা য়েংবীদুনা মখোয়গী ইমুংগী মশিং হেনগৎপদগী মশাবু কঞ্জদুনা ইমুংদুগীদমক্তা কয়াদা থবক তৌরিবনো হায়বদু ঐনা খঙহঞ্জবা পাম্মি। য়েংনা য়েংনা মীরোল অমা অনিনা, ইমুং করম্না অসুম্না অসুম পুখিবা, অঙাংশিংনা করম্না মহৈ-মশিং তমখিবা, ইমুং অদু অনা-অয়েক্তগী করম্না ঙাকথোকখিবা, ইমুং অদুনা মখোয়গী মরু ওইবা তঙাইফদবশিং অদু করম্না অফবা মওংদা মপুং ফাহনবা। ঐখোয়সু মখোয়দগী তমজগদবনি অমসুং ঐখোয়গী য়ুমদা অঙাং অমনা লাক্ত্রিঙৈগী মমাংদা ঐখোয়না খনগদবনি মদুদি ঐগী ইমুংদা লাক্কদৌরিবা অঙাং অদুগী তঙাইবদশিং ফংহন্নবগীদমক ঐনা ইশাবু শেম শাজরবরা? ঐনা মখোয়বু খুন্নাই অসিদা অসুম্মক শিন্নথোক্লদ্রা? ঐনা মহাকপু মহাক্কী মরাইবক অদুদা অসুম্মক থাদোক্লদ্রা? মমা মপা অমত্তনা অসুম্না খক ওইরোই, মহাক্কী মচা অদুবু পোকথোক্লগা অসিগুম্বা মখলগী পুন্সিদা হিংহনবা অমসুং মরম অসিনা খুন্নাই অসিদা খঙহনবা অমগী মথৌ তাই।
অসিগুম্বা অসিদা চাউনা থৌদাং য়ারিবা মীওইশিং অদু ইকাই খুম্নবা মথৌ তাই, অমসুং মখোয়না হোৎনখিবশিং অদুদগী খুদম লৌদুনা খুন্নাই অসিগী অতৈ কাংলুপশিংনা, হৌজিকসু মসিদগী তোঙান্না তারিবশিংনা মীসিং হেনগৎলকপগী মতাং অসিদা খন্থবীগদবনি।
সরকারশিংনসু তোঙান তোঙানবা স্কিমশিংগী মখাদা মাংদা চখৎপীরক্কদবনি। রাজ্য সরকারবু ওইরো, কেন্দ্র সরকারবু ওইরো পুম্নমক্না থৌদাং অসিবু য়াবীনবগীদমক লেং মান্ননা চৎমিন্নগদবনি।
ইচিল-ইনাওশা, লৈবাক অসি নীং খা তম্লবা অসুক কুইরবগী মতুংদা মখল অমরোমদা মপুং ফাবা অমা ওইরক্লি। ঐখোয় নীং খা তম্বগী ৭৫ শুবা কুমওন পাংথোক্কদৌরি। মতম অদুদা নীং তম্বা অসি অশেংবা নীং তম্বা ওইবা মথৌ তাই। ঐনা ঐগী ওফিসরশিংগা ফম্মিন্নবা মতমদা ৱাফম অমা হায়, মীয়ামগী ওইবা মওংদা হায়বা নত্তে অদুবু ঙসি হায়নীংবা ফাওরকই। ঐনা ঐগী ওফিসরশিংদা হন্না হন্না হায় মদুদি নীং খা তম্লবা চহি অসুক য়াম্লবগী মতুংদা নুংতিগী ওইবা পুন্সিদা, মীচম মীয়ামগী পুন্সিদা সরকারনা খুৎ থিংজিল্লিবা অসি ঐখোয় হন্থহনবা য়ারোইদ্রা? লোইশিনবা য়ারোইদ্রা? নীং তম্বা ভারতকী ৱাহন্থোক অসি ঐঙোন্দদি সরকরশিংনা মীয়ামগী পুন্সিদগী তপ্না তপ্না তোরকপা অদুনি, মীয়াম্না মখোয়গী পুন্সিগী ৱারেপ লৌজনবা মাংদা চখৎনবা, লম্বী পুম্নমক মখোয়গীদমক হাংদোক্কদবনি, মসানা পামজবা মওংদা, লৈবাক্কী কান্ননবগীদমক্তা অমসুং ইমুং মনুংগা কান্ননবগীদমক্তা মশাগী মঙলানশিংগীদমক্তা মাংদা চখৎচনবা, অসিগুম্বা ইকো-সিস্তেম অমা ঐখোয় শেম্বা তাই। অমসুং মরম অসিনা সরকারনা শাফু খক পীরোইদবনি অদুবু মসিগা লোইননা অৱাবগী মতমদদি, সরকার লৈতে হায়বগী ৱাখল পোকহল্লোইদবনি। সরকারগী শাফু লৈতবা, সরকার লৈতে হায়বগী অৱাবা লৈতবা, ঐখোয়না মঙলান অদু পুদুনা মাংদা চখৎসি। সরকারনা ঐখোয়গী খোংলোই অমা ওইনা মিকুপ খুদিং লোইনগদবনি। মথৌ তারকপা মতমদা কনানো অমা লৈরিনা হায়বসি ফাওহনগদবনি, অৱাবা ওইহল্লোইদবনি। অসিগুম্বা মখলগী থৌরাং অসি ঐখোয় শেমগৎপা ঙমগদ্রা?
ঐখোয়গী সুমদ্রগী লন-থুম, ব্লু ইকোনোমীগী লমদা শাফু পীসি। ঐখোয়গী ঙামী ইচিল-ইনাওশিংদা ঐখোয় থৌনা হাপসি। ঐখোয়গী লৌমী অন্নদাতানি, ফাঙ্গল পীনবীবনি। ঐখোয়গী লৌমী, মখোয়সু এক্সপোর্তর করিগী ওইরোইদৌরিবনো। মালেম অসিদা ঐখোয়গী লৌমীশিংনা পুথোকপা পোৎথোক্কীদমক রিগী ৱারুনি। মঙলানশিং অসিবু পুরদুনা ঐখোয় চৎপা তাই। ঐখোয়গী লৈবাক অসি এক্সপোর্ত হেনগৎহনবা তাই, মালেম অসিনা ঐখোয়, শুপ্নগী হিন্দুস্তান অসিবু কৈথেল অমগুম্না উহনসি, ঐখোয়সু মালেমগী কৈথেলদা য়ৌশিন্নবা অঙম্বা থাক্তা হোৎনসি।
ঐখোয়গী জিলা খুদিংমক্তা মালেমগী অপীক অপীকপা লৈবাক অমমমগী পাঙ্গল অদু, ঐখোয়গী জিলা খুদিংমক্তা য়ৈওরি। ঐখোয়না মসিগী পাঙ্গল অসি খঙগদবনি, পাহ্গল অসিবু ঐখোয়না চেন্নেলাইজ তৌগদবনি অমসুং ঐখোয়গী জিলা খুদিংমক এক্সপোর্ত হব ওইহন্নবগীদমক্তা করিগী খল্লোইদৌরিবনো, জিলা খুদিংমক্কী মশাগী হেন্দিক্রাফ লৈজৈ, জিলা খুদিংক্তা মসা মশাগী থোইদোকপা মগুন লৈজৈ। করিগুম্বা জিলা অমা মনম নুংশিবা পোৎশক্কীদমক মমিং চৎপদা, অতোপ্পা জিলা অমনা সিরীগীদমক মমিং চৎলি, জিলা অমগী কোল্লিক মমিং চৎলি, জিলা অমগী মিথাই মমিং চৎলি। পুম্নমক্কী মফমদা তোঙান তোঙানবা মগুন লৈজৈ। ঐখোয়না গ্লোবেল মার্কেৎকীদমক্তা জিরো দিফেক্ত, জিরো ইফেক্ততগী মদুগী মেন্যুফেকচরিং করম্না তৌবা অমসুং মসিগী মখল মখাশিং অসিনা মালেমদা শক তাক্লদুনা করিগুম্বা ঐখোয়না মসিগী এক্সপোর্ত্তা শাফু পীরবদি, মালেমগী কৈথেল অসি কেপচর তৌনবগী মাইকৈদা ঐখোয়না থবক তৌরবদি, লৈবাক অসিগী নহাশিং অসি থবক ফংগনি। ঐখোয়গী স্মোল স্কেল ইন্দস্ত্রী অসিদা, মাইক্রো লেভেল ইন্দস্ত্রী অসিদা মসিনা মরম ওইদুনা য়াম্না চাউবা পাঙ্গল অমা ফংলগনি অমসুং ঐখোয়না পাঙ্গল অসি হেনগৎহনগদবনি।
ঐখোয়গী লৈবাক অসি তুরিস্ত দেস্তিনেসনগীদমক্তা মালেম অসিগী অঙকপা মফম অমা ওইহনবা ঙমগনি, অদুবু মরম অমা নত্ত্রগা অমদগী ঐখোয়না খোংজেল য়াংনা থৌফম থোকপা থবক অদু তৌবা ঙমদ্রি। লাক্লো, ঐখোয় ইরৈবাকচা পুম্নমক্না লৈবাক অসিগী তুরিজমদা শাফু পীরসি হায়না ৱারেপ লৌরসি। তুরিজম চাউখৎলবদি, পৈসা খজিক্তং থাদরগা থবক অদুক্কী মতিক য়াম্না ফংবগী ওইথোকপা লৈ। লৈবাক অসিগী শেনমিৎলোন্দা পাঙ্গল হাপকনি অমসুং মালেম অপুনবগী মীয়াম্না ঙসি ভারত অসিবু অনৌবা মওং অমদা য়েংনবগীদমক্তা শেম শারি। ঐখোয় খনসি, মালেম অপুনবা অসি ঐখোয়গী লৈবাক অসিদা করম্না লাকহনগনি, ঐখোয়গী তুরিজমগী লম অসি করম্না থৌনা ফংগনি অমসুং মসিগীদমক্তা তুরিস্ত দেস্তিনেসনগী থৌরাংবু ওইরো, মীচম মীয়ামগী চাগা হেনগৎহন্নবগী ৱাফম্বু ওইরো, হেন্না ফবা মহৈ-মশিং, অনৌবা থবক ফংবগী তাঞ্জাবু ওইরো, ময়াই ওইবা থাক্কী মীওইশিংগী হেন্না ফবা মঙলানশিং মঙফাওনহন্নবা, ৱাংনা পাইনবগীদমক্তা লোঞ্চিং পেদ পুম্নমক মখোয়গীদমক ফংহনগদবনি। ঐখোয়গী সাইন্তিস্তশিংগী মফমদা হেন্না ফবা খুৎলাইশিং ফংহল্লবা, ঐখোয়গী লান্মীসিংগী মফমদা হেন্না ফবা থৌরাং লৈরবা, মদুসু লৈবাক অসিদা শাজবা, অদু ওইরবদি ভারতপু শিনমিৎলোন দোলর ত্রিলিয়ন ৫গী অনৌবা পাঙ্গল হাপ্পা ঙমগদবা লম কয়া মরুম লৈ হায়না ঐনা লৌই।
ঐগী নুংশিরবা ইচিল-ইনাওশা, ঙসি লৈবাক অসিনা শেনমিৎলোনগী কান্নবা ফংননবগীদমক মতিক চাবা ফিভম অদু লৈরে। গোভর্মেন্তনা স্তেবল ওইরবদি, পোলিসী প্রেদিক্তেবল ওই, থৌরাংশিং স্তেবল ওইরবদি মালেমনসু থাজবা অমদি থম্মি। লৈবাক অসিগী মীয়াম্না থবক অসি তৌদুনা উৎলে। মালেম অসিনসু ভারতকী পোলিতিকেল স্তেবিলিতী অসি য়াম্না চাওথোকচনা অমদি ইকাই খুম্ননা য়েংনরক্লি। ঐখোয় তাঞ্জা অসি নান্থোকহল্লোইদবনি। ঙসি মালেম অসিনা ঐখোয়গা লোইননা ললোন ইতিক তৌমিন্ননবা লাংতক্নরি। ঐখোয়গা লোইনবা পাম্লি। ঙসি ঐখোয়গী চাউথোকচনীংঙাইগী মরমনি মদুদি মমল তাংবা লাকশিন্দুনা ঐখোয় চাউখৎপা হেনগৎহনগদবা মরু ওইবা থৌরাং কয়া পুদুনা চৎলি। করিগুম্বদা চাউখৎপগী চাংদি অসুম হেনগৎলি, অদুবু পোৎকী মমল তাংবা অসি লাকশিনবা ঙমদবা য়াওই। করিগুম্বদা মমল তাংবা হেনগৎলি, চাউখৎপগী মফম অমত্তা খঙবা ঙমদবা য়াওই। অদুবু পোৎকী মমল তাংবা অসিবুসু লাকশিনবা অমদি চাউখৎপগী চাংসু হেনগৎহনবা সরকার অমনি মসি।
ঐখোয়গী লৈবাক অসিদা লান্না থাজবা খরনা খুন্দাদুনা লৈরি। অদুম্বা থাজবা অদুদগী থোরকপা তাই। লৈবাক অসিগী ৱেল্থ অসিবু ক্রিয়েৎ তৌরিবা, লৈবাক অসিগী ৱেল্থ ক্রিয়েসন্দা কনত্রিব্যুৎ তৌরিবা পুম্নমক লৈবাক্কীদমক থবক তৌরিবা ঙাক্তনি। ঐখোয়না ৱেল্থ ক্রিয়েতরবু চিংনবা মিৎয়েংনা য়েংলোইদবনি, মখোয়গী মফমদা তুকৎচবা মিৎয়েংনা য়েংলোইদবনি। লৈবাক অসিদা ৱেল্থ ক্রিয়েৎ তৌরিবশিং অসিগীদু অদুক্কী মতিক ইকাই খুম্নবীবা মথৌ তাই। মখোয়গী মিংচৎ হেনগৎহনগদবনি অমসুং ৱেল্থ ক্রিয়েৎ তৌদ্রবদি ৱেল্থ দিস্ত্রিব্যুৎসু তৌরোই। করিগুম্বা ৱেল্থ দিস্ত্রিব্যুৎ তৌদ্রবদি লৈবাক অসিগী লাইরবা মীওইশিংগী কান্নবা ফংলোই। মরম অসিনা ৱেল্থ ক্রিয়েসন, অসিসু ঐখোয়গী অসিগুম্বা লৈবাক অসিগীদমক্তদি মরু ওইবা ৱাফম অমনি অমসুং মখোয়বুসু ঐখোয় মাংদা পুখৎকদবনি। ৱেল্থ ক্রিয়েৎ তৌরিবা মীওইশিং অসিসু ঐগীদমক্তদি ঐখোয়গী লৈবাক্কী ৱেল্থনি। মখোয়বু ইকাই খুম্নবা অমসুং মখোয়বু চাউথোকচনা অনৌ থৌনা হাপকদবনি।
মীওই খরনা শুপ্নগী ভারত খক্তা নত্তনা য়ুমলোন্নবা লৈবাকশিংবুসু তেরোরিজম্না মাংহন তাকহন্দুনা থম্লি। বঙ্গলাদেশসু তেরোরিজম মায়োক্নরি, অফগানিস্তানসু তেরোরিজম মায়োক্নরি। শ্রী লঙ্কাগী মনুংদা চর্চতা ফম্লিবা লাঞ্জদ্রবা মীয়াম্বু অশিবগী খয়াত্তা তাহনখি। কয়াদা থমথিবগী মশক ওইরবা ৱাফমনো অমসুং মরম অসিনা ঐখোয়না তেরোরিজমগী মায়োক্নরকপা মতমদা কংফালগী মফম অপুনবসিগী ইংথবা অমদি শোইদ-ঙামদনবগীদমক্তসু ঐখোয়গী থৌদাং য়াননবসু শেম শাদুনা লৈরি।
ঐগী নুংশিরবা ইরৈবাকচাশিং, ঐখোয় লাইবক ফরবনি মদুদি ঐখোয়দা করিগুম্বা খরা তৌনবগী পাহ্গল লৈবা মতম অসিদা পোক্লবনি, মতম অসিদা হিংলিবনি। করিগুম্বা মতমদা পুক্নিংদা মতম চুপ্পা খন্দুনা লৈ মদুদি লাল তৌরি, ভগত সিংহ, সুখদেব, রাজগুরুগুম্বা অফাওবা মীওইশিংনা মশা কৎথোক্নবগীদমক চোংথোরক্লি। মহাত্মা গান্ধীগী লুচিং মখাদা নীং কা তম্বদা ঙাওজবশিংনা যুমথোং য়ুমথোং, লৈরক খুল্লক চৎতুনা নীং তম্বগী মঙলান অদু মঙফাওনহন্নবা লৈবাক অসিবু হৌদোক্লি। ঐখোয় মতম অদুদা য়াওখিদে, ঐখোয় পোকপা ফাওবা পোকখিদে, লৈবাক্কীদমক্তা ঐখোয় থৱাই থাজনবগী খুদোংচাবা ফংজখিদে, অদুবু লৈবাক অসিগীদমক হিংজনবগী খুদোং চাবদি শোইদনা ফংলি। অদুনা অসিগুম্বা মতম অসিগীদমক্তা ঐখোয় লাইবক পরবনি, মসি ঐখোয়গীদমক্তদি য়াম্না মরু ওইবনি। ইকাই কুম্নজরবা বাপু মহাত্মা গান্ধীগী ১৫০ শুবা মপোক কুমওনগী থৌরম্নি। অসিগুম্বা তাঞ্জা অসি ঐখোয়গী মতম অসিদা ফংজরি, মসি মসানা অসুম্মক লাইবক ফবা অমা ওইজরবনি। অমসুং অতোপ্পা অমনা ঐখোয়গী নীং খা তম্বগী ৭৫ শুবা চহি, লৈবাক অসিগী নীং তম্বগীদমক্তা থৱাইনা পোন্থা ওইখ্রবা মীওইশিংবু নীংশিংজবনা ঐখোয়দা করিগুম্বা খরা তৌনবগী থৌনা হাপ্পীরি। তাঞ্জা অসি ঐখোয় মাংহল্লোইসি। ইরৈবাকচা ক্রোর ১৩০গী থমোইদা মহাত্মা গান্ধীগী মঙলানগী মতৌগুম্না, লৈবাক অসিগী নীং খা তম্বদা ঙাওজখিবশিং অদুগী মঙলানগী মতৌগুম্না নীং খা তম্বগী চহি ৭৫ শুবা অমসুং গান্ধীগী ১৫০ শুবা চহি, থৌরম অসিবু ঐখোয়গী ইথিল পোক্নফমগী অচৌবা তাঞ্জা অমা ওইহন্দুনা ঐখোয় মাংদা চখৎকনি।
ঐহাক্না ২০১৪দা লাল কিলা অসিমক্তগী স্বচ্ছতাগী ৱাফম থমখি। ২০১৯দা থা খরগী মতুং, ঐহাক্না থাজবা থম্লি, ভারত মশানা মশাবু মপালদা খোংহাম খুৎহাম চোইদবা ওইনা লাওথোকপা ঙম্লগনি। রাজ্যশিংনা, খুঙ্গংশিংনা, নগর পালিকাশিংনা – পুম্নমক্না, মীদিয়ানা মীয়ামগী ইহৌ ওইহনখি। সরকারদি উবু উখিদে, মীয়াম্না খোংজং চংশিনখি অমদি মহৈ অদু মাংদা লৈরে।
ঐহাক্কী নুংশিরবা ইরৈবাকচাশিং, ঙসি অদোমগী মফমদা অপাম্বা অমতং ঐহাক থমজগে। হন্দক্কী ওক্তোবর ২দা ঐখোয়না ভারতপু সিঙ্গল য়ুজ প্লাসতিক, লৈবাক অসিনা মসিদগী নান্থোকহনবা ঙম্লগদ্রা। ঐখোয় পুম্নমক থোক্লসি, কাংলুপ শেম্দুনা থোক্লসি, স্কুল, কোলেজদা ঐখোয় পুম্নমক্না বাপুবু নীংশিংলদুনা অমদি য়ুমদা লৈরিবা প্লাসতিক ওইগেরা- সিঙ্গল য়ুজ প্লাসতিক ওইগেরা নত্রগা মপান্দা লম্বী সরক্তা তারিবা ওইগেরা, অমোৎপা নালাদা তারিবা ওইগেরা, পুম্নমক অদু খোমজিনবিয়ু, নগরপালিকাশিং, মহা-নগরপালিকাশিং, গ্রাম পঞ্চায়ৎশিং পুম্নমক্না মসি খোমজিন্নবা থৌরাং তৌবিয়ু। ঐখোয় প্লাসতিকপু বিদাই পীনবা মায়কৈদা ওক্তোবর ২দা অহানবা অচেৎপা খোংথাং লৌখৎপা ঙমলোয়দ্রা?
লাকপীরো ঐহাক্কী লৈবাকমচাশিং, ঐখোয় মসিবু মাংলোমদা পুখৎলসি। অদুগা অমুক হন্না ঐহাক্না স্তার্ত-অপ তৌরিবশিং, তেক্নিসিয়ানশিং, ইন্দস্ত্রী তৌরিবশিংদা হংজরি মদুদি ঐখোয়না অসিগুম্লবা প্লাসতিকশিং অসিবু রিসাইকল তৌনবা করি তৌগনি? খুদম ওইনা হাইৱেশিং শাবদা প্লাসতিক শিজিন্নরি। ঐহাক্না দুকান ফম্লিবা পুম্নমক্কী মফমদা হায়জরি মদুদি অদোম্না অদোমগী দুকান্দা মতম পুম্নমক্তা বোর্দ থেৎপীরি, প্লাস্তিক্কী খাউ শিজিন্নদনবা, য়ুমদগী ফিগী খাউ পুরক্নবা বোর্দ অমসু থেৎপীয়ু।
ঐহাক্কী নুংশিরবা ইরৈবাকচাশিং দোলর ত্রিলিয়ন মঙাগী ইকোনোমী ওইগেরা, মরোমদোম লেপচবা ঙম্বা ভারতকী মংলান ওইগেরা, মহাত্মা গান্ধীগী ৱাখল্লোন্দা ঙসিসু হিংলি। মরম অদুনা ঐখোয়না পায়খৎলিবা মেক ইন ইন্দিয়াগী মিসন অসি মাংলোমদা পুখৎকদবনি। ইচিল-ইনাওশিং ঐখোয়না মোবাইল ফোন পাম্মি, ঐখোয়না whatsapp থাবা পাম্মি, ঐখোয়না ফেসবুক-ত্বিতরদা মতম লেনবা পাম্মি, অদুবু লৈবাক্কী ইকোনোমীদসু মসিনা মরম ওইরগা ঐখোয়না মতেং পাংবা য়াই। ইনফোর্মেশনগীদমক্তা তেক্নোলোজী অদুক্কী মতিক শিজিন্নবগুম অনৌবা ভারতকী শেমগৎপদসু তেক্নোলোজীগী শিজিন্নরি। ঐখোয়না মীচম প্রজাবু দিজিতেল পেমেন্তগীদমক করিগী পুক্নিং থৌগৎলোয়দৌরিবনো। ঙসি ঐখোয়না চাওথোকচরি মদুদি রুপে কার্দ সিঙ্গাপুরদা শিজিন্নবা য়ারি। ঐখোয়গী রুপে কার্দ অসি লাক্কদৌরিবা মতম খরা অসিদা অতোপ্পা লৈবাকশিংদসু চৎনরগনি।
ঐখোয়গী লৈবাক্তা মিদল ক্লাস, হায়র মিদল ক্লাসকী মশিং হেঙ্গৎলক্লি, অফবা ৱাফম্নি। চহী অমদা্ অমুরক অনিরক্তি ইমুং মনুং অঙাংশিংগা লোয়ননা মালেমগী তোঙান তোঙানবা লৈবাকশিংদা কোয়বা চৎলি এক্সপোজ তৌরি। অদুবু ঙসি ঐহাক্না অসিগুম্লবা ইমুং মনুংশিংদা হায়জনীংবদি লৈবাক অসিনা নীংতম্বগী ৭৫শুবা চহী পালন পাংথোকপা মতম অদুদা লৈবাক্কীদমক কত্থোকখিবা অথোইবা মীওইশিং অদুগী মরমদা অদোমগী অঙাংশিং অদুনা মমুৎ তানা খংবা অদু অদোম পামদব্রা, করম্বা মমা মপানা পামলোয়দগে। মরম অদুনা মালেমগী অতৈ মফমদা কোয়বা চৎপীরবসু লৈবাক অসিগী নহাশিংগী থবক ফংজনবা, মালেমগী ভারতকী শক্তম ঙাক্তুনা থম্নবগীদমক ঐহাক্কী নুংশিজরবা লৈবাক মীয়ামদগী ঙসি ঐহাক্না করিগুম্বা অমত্তা নিজগে। অদোম্না ৱারেপ লৌবা ঙম্লগদ্রা মদুদি নীংতম্বগী ৭৫শুবা চহী কুমওন ২০২২ ফাওবগী মাংওইননা ঐখোয়না ঐখোয়গী ইমুং মনুংগা লোয়ননা য়ামদ্রবদা ভারতকী লমকোয়ফম ১৫দা চৎকনি।
ঙসি ঐহাক্না ঐহাক্কী লৌমী ইচিল-ইনাওশিংদা হায়জরি, করিগুম্বা খরা নিজরি। ঐহাক্কী লৌমীশিংগীদমক, ঐহাক্কী লৈবাক মীয়ামগীদমক, লমদম অসি ঐখোয়গী ইমানি। ভারত ইমানা য়াইফরে লাওবা খক্তদা ঐখোয়গী হকচাং মনুংদা ইনর্জী হেঙ্গৎলকই, বন্দে মাতরম হায়রকপা মতমদা ইমা লৈবাক্কীদমক কত্থোক্নবা ইথিল ফংই। শাংলবা পুৱারী অমা ঐখোয়গী মাংদা লাকই অদুবু করিগুম্বা মতমদা ঐখোয়না ইমা লৈবাক্কী হকশেলগী খনখিবা লৈখিব্রা। ঐখোয়না কেমিকেল শিজিন্নরিবা অদুগী মওং মতৌনা, কেমিকেল ফর্তিলাইজর শিজিন্নবগী মওং মতৌনা, তিলহাৎ হিদাক শিজিন্নরিবা অদুনা, ঐখোয়না ইমা লৈবাক অসিবু মাংহল তাকহল্লি। ঐখোয়গী ইমা লৈবাকপু অৱাবা পীবগী হক অদু ঐখোয়দা লৈতে।
লাকপীরো, নীংতম্বগী ৭৫শুবা চহী পালন পাংথোক্কদৌরে। বাপুনা তাকপীরম্বা লম্বী অদুদা চৎতুনা ইশাগী লৌবুক্তা কেমিকেল ফর্তিলাইজর শিজিন্নবা চাদা ১০, চাদা ২০, চাদা ২৫ হন্থরসি, য়ারগদি শিজিন্নদবগী খোংজং চংশিল্লসি। ঐখোয়গী ইমা লৈবাক অসি কনবদা অদোমগী কয়া য়াম্না চাওবা থৌদাং ওইগনি হায়বদু খন্দুনা য়েংবিয়ু। মহাক্কী থৌজালসু ঐখোয়না ফংগনি। ঐহাক্কী লৌমীশিং ঐহাক্না নিজরিবা অসি পাংথোক্কনি হায়বা ঐহাক্না মপুং ফানা থাজজৈ।
ঐহাক্কী ইরৈবাকচাশিং, ঐখোয়না ঐখোয়গী লৈবাক অসি মাংলোমদা পুখৎকদবনি। ঐখোয়না ঐখোয়গী লৈবাক্তা অওনবা পুরক্কদবনি। ঐখোয়না লৈবাক অসি অনৌবা থাক্তা পুখৎকদবনি অমদি অমত্তা ওইনা পুন্দুনা পাংথোক্কদবনি। সরকার অমসুং মীয়াম্না পুল্লগা পাংথোক্কদবনি। লৈবাক অসিদা লৈরিবা মীওই কোতি ১৩০না পাংথোক্কদবনি। লৈবাক অসিগী প্রধান মন্ত্রীসু অদোম অদোমগুম্না লৈবাক অসিগী মচা অমনি, লৈবাক অসিগী নাগরিক অমনি। ঐখোয় পুম্নমক্না পুল্লগা পাংথোক্কদবনি।
লাক্কদৌরিবা নুমীৎশিংদা খুঙ্গংদা ৱেলনেস সেন্তর লাখ অমা মখায় শাবা ওইগেরা, হেল্থ সেন্তর শেম্বা ওইগেরা, লোক সভাগী কন্সতিত্বেন্সী অহুম খুদিংগী মেদিকেল কোলেজ অমমম শাবদুনা ঐখোয়গী নহাশিংবু দোক্তর ওইহন্নবা মংলান অদু মংফাওনহনবা ওইগেরা। লাইরবা মীওই কোতি অনি হেনবগী য়ুম শাবা ওইগেরা। খুঙ্গংগী ইমুং কোতি ১৫দা থক্নবা ঈশিং ফংহনবা ওইগেরা। কিলোমীতর লাখ অমগা লিশিং কুনমঙাগী খুঙ্গংগী লম্বী থোং শেম্বা ওইগেরা। খুঙ্গং খুদিংমকপু ব্রোদবেন্দ কনোক্তিবিতী, ওপ্তিকেল ফাইবর নেৎৱার্কনা শম্নহনবা ওইগেরা। লিশিং ৫০দগী হেনবা স্তার্ত অপকী লাং থাকপা ওইগেরা। মংলান কয়ামরুম পুরদুনা মাংলোমদা চংশিনগদবনি। নীংতম্বগী ৭৫শুবা চহী পালন অসি মসিগীদমক য়াম্না চাওবা ইনোৎ অমনি।
নীংতম্বগী ৭৫শুবা চহী পালন, গান্ধীগী ১৫০শুবা মপোক কুমওন অমসুং সংবিধানগী চহী ৭০ শুরক্লে। বাবা সাহেব অম্বেদকরগী মংলান অমদি চহী অসি গুরু নানক দেব জীগী ৫৫০শুবা কুমওনসু ওইরি। লাকপীরো বাবা সাহেব অম্বেদকর, গুরু নানক দেবজীগী শিক্ষা অদুগা লোয়ননা ঐখোয় মাংলোমদা চংশিল্লসি অমদি খ্বাইদগী ফবা সমাজ শেমগৎলসি।
ঐহাক্কী নুংশিরবা ইচিল-ইনাওশিং, ঐখোয়গী পান্দম অসি হিমালয়গুম্না ৱাংই, ঐখোয়গী মংলান অসি মশিং থিঙমদ্রবা থৱানমিচাকশিংদগীসু হেল্লি হায়বা ঐখোয় খংই অদুবু ঐখোয়না মসিমসু খংই মদুদি ঐখোয়না পায়দুনা চৎনীংলিবা অসিগী মাংদা সোরারেন অসিসু করিমত্তা নত্তে।
লাকপীরো, ৱাখল্লোনশিং অসিগা লোয়ননা ঐখোয় পান্দম অসি ফংনবা ঐখোয় চংশিল্লসি অমদি অনৌবা ভারত শেমগৎনবা, ঐখোয়গী থৌদাং অদু লৌরদুনা, অনৌবা আত্মাবিশ্বাস, অনৌবা ৱারেপ অসি অনৌবা ভারত শেম্ননবা হিদাক লাংথক্নি। লাকপীরো, ঐখোয় অমত্তা ওইনা পুল্লগা লৈবাক অসিবু মাংলোমদা পুখৎলসি। অনীংবা অপাম্বা অসিগা লোয়ননা, ঐহাক্না অমুক হন্না লৈবাক্কীদমক হিংলিবা, লৈবাক্কীদমক লান্থেংনরিবা, লৈবাক্কীদমক থৱাই থারিবা, লৈবাক্কীদমক করিগুম্বা খরা তৌরিবা পুম্নমকপু খুরুমজদুনা ঐহাক্কা লোয়ননা লাওমিন্নসি –
‘জয় হিন্দ’।
‘জয় হিন্দ’।
ভারত ইমানা য়াইফরে,
ভারত ইমানা য়াইফরে,
বন্দে মাতরম।
বন্দে মাদরম।
হন্না-হন্না থাগৎচরি।
