“গ্লোবেল ইকনোমীদা তংদু-লৈতাবা, থাজবা অমসুং গ্রোথ পুরকপা হায়বা অসি মালেমগী মাংজিল থারিবা ইকনোমীশিং অমসুং মোনিতরী সিস্তেমশিংগী মখুৎতা লৈ”
“নখোয়গী খন্ন-নৈনবা অদু মালেমগী খ্বাইদগী শোত্থরবা প্রজাশিংদা মীৎয়েং থম্মু”“গ্লোবেল ইকনোমিক লীদরশিপনা ইনক্লুসিব এজেন্দা অমা শেম্বা খক্তনা মালেমদা থাজবা অমুক হন্না পুরকপা ঙমগনি”“ঐখোয়গী জি২০ প্রসিদেন্সীগী থিম অসিনা ইনক্লুসিব বিজন – ৱান আর্থ, ৱান ফেমিলী, ৱান ফ্যুচর অসি প্রমোৎ তৌরি”“ভারতনা দিজিতেল পেমেন্ত ইকোস্তেম অসিদা য়াম্না শাফবা, য়াম্না থাজবা য়াবা অমসুং য়াম্না কান্নবা পব্লিক দিজিতেল ইনফ্রাস্ত্রকচর অমা শেমগৎখি”“ঐখোয়গী দিজিতেল পেমেন্ত ইকোসিস্তেম অসি ফ্রী পব্লিক গুদ অমা ওইনা দিবেলপ তৌখি”“য়ু.পি.আই.গুম্বা খুদমশিংনা লৈবাক কয়াগী তেম্প্লেৎ ওইবা য়াগনি”ইকায়খুম্নরবশিং,
জি-২০ ফাইনান্স মিনিস্তরশিং অমসুং সেন্ত্রেল বেঙ্ক গভর্নরশিং ঐনা ভারত্তা তরাম্না ওকচরি। অদোম্না শরুক য়ারিবা মীফম অসি ভারতনা জি-২০গী প্রসিদেন্দ ওইবগী অহানবা মিনিস্তর থাক্কী মীফম্নি। কান্নবা মীফম অমা ওইনবগীদমক ঐনা ময়ামগী মফমদা ঐগী য়াইফ-পাউজেল পীজরি। অদোম্না মায়োক্নরিবা খুদোংচাদবশিং ঐনা খঙই। মালেম্না শাথিরবা শেন-থুমগী অৱাবশিং মায়োক্নরিঙৈ মতম অমদা অদোম্না মালেমগী ফাইনান্স অমসুং ইকোনোমিগী লুচিংবা ওইখি। কোবিদ লাইচৎনা চহিচা অমগী মনুংদা অমুক্তং থেংনবা ওইনা মালেমগী শেন্মিৎলোন্দা অচৌবা শাফু অমা পীখি। লৈবাক কয়া, মরুওইনা চাউখৎলক্লিবা লৈবাকশিং, হৌজিক ফাওবা লাইচৎ অসিনা পীখিবা শাফুশিং মায়োক্নরি। মালেমগী তোঙান-তোঙানবা মফমশিংদা রাজনিতিগী ওইবা উংখৎনবা হেনগৎলকপা ঐখোয়না উরে। মালেমগী সপ্লাই চেনশিংদা অকায়বা থোকহল্লে। পোৎকী মমল হেনগৎলকপদগী খুন্নাই কয়া অৱাবা মায়োক্নরে। চীঞ্জাক অমসুং ইনর্জি ৱাৎহন্দনবা হোৎনবা হায়বসি মালেম শীনবা থুংনা অরুবা থবক অমা ওইরে। শেন-থুমগী ফিবম ফবা লৈবাক কয়া ফাওবা শেন তোনবগী চাং হেনগৎলক্লে। মালেমগী শেন-থুমগী ইন্সতিতুৎশিংদা থাজবগী চাং হন্থরক্লে। মসি মখোয় মশামক অহোংবা পুরকপদা তপ্পনা মরম ওইদুনা থোকহনবনি। মালেমগী শেন্মিৎলোন্দা থাজবা, তুংদু-লৈতাবা অমসুং চাউখৎপা অমুক হন্না পুরকপা হায়বসি মালেমগী শেন-থুমগী থবকশিংগী মপু ওইরিবা অমসুং মাংজিল থাবা ইকোনোমিশিং ওইরিবা অদোমগী খুৎতা লৈরে। মসি অরাইবা থবক অমদি নত্তে।
অদুম ওইনমক, ফিবম ফগৎলক্লিবা ভারতকী ইকোনোমিদা অদোম পুক্নিং চিংশিনগনি হায়না ঐনা থাজবা থম্লি। ভারতকী কঞ্জুমরশিং অমসুং প্রদুসরশিংগী অফবা মীৎয়েং লৈ অমসুং তুংগী ফিবমশিংদা থাজবা থম্লি। মসিগা চপ মান্নবা ৱাখল্লোন অসি মালেমগী ইকোনোমিদা অদোম্না য়ৌহনবা ঙমগনি হায়না ঐখোয়না থাজৈ। অদোম্না খন্নরিবশিং অসি মালেমগী খ্বাইদগী তোল্লবশিংদা মীৎয়েং চঙনবা ঐনা তকশিল্লি। অপুনবগী এজেন্দা অমা খক্তনা মালেমগী শেন-থুমগী লুচিংবা ওইবদা মালেমগী থাজবা অমুক হল্লকপা ঙমগনি। ঐখোয়না জি-২০গী প্রসিদেন্দ ওইবা অসিগী পান্দমশু ‘মালেম অমা, ইমুং অমা, তুংলমচৎ অমা’ হায়বসিনা ওইরি।
ইকায়খুম্নরবশিং,
মালেমগী অপুনবা মীশিং বিল্লিয়ন ৮ হেল্লবা ফাওবদা, স্তেনেবল দিবলপমেন্ত গোলশিং ফংবা তপথরকপা উরে। মালেমগী ওইনা মায়োক্নরিবা অৱাবশিং হায়বদি অইং-অশাগী খল হোংলকপা অমসুং শেন তোনবগী চাং ৱাংখৎলকপা অসি থেংন্নবা মালেমগী ওইনা লৈরিবা বেঙ্কশিং মপাঙ্গল কনখৎহন্নবা ঐখোয় অপুনবগী ওইনা হোৎনমিন্নবা মথৌ তাই।
ইকায়খুম্নরবশিং,
ফাইনান্সকী থবকশিংদা তেক্নোলোজিনা মাংজিল থাবা হেনগৎলক্লি। লাইচৎ মনুংদা, দিজিতেল পেমেন্তশিংনা শম্নদনা শেন পীথোক-পীশিন য়াহনখি। অদুবু, হন্দক দিজিতেল ফাইনান্সকী মতাংদা অনৌবা থবক খর ফিবম চাদবা অমসুং লান্না শীজিন্নবগী খুদোংথিবা খর থেংনরে। মসিগী খুদোংথিবশিং অসি চুমথোক্নবা চৎন-কাংলোন শেম্নবা অদোম্না তেক্নোলোজিগী পাম্বৈ পুথোক্কনি হায়বগী থাজবা ঐনা থম্লি। ভারতনা মশাগী ওইনা পায়খৎলিবা থবকশিং অসি নমুনা অমা ওইবা য়াগনি। হৌখিবা চহি খর অসিদা ঐখোয়না য়াম্না চেকশিনবা, য়াম্না থাজবা অমসুং য়াম্না মতিক চাবা মীয়ামগী দিজিতেল ইনফ্রাস্ত্রকচর অমা ঐখোয়না শেমগৎলে। মীয়াম্না লেম্নবা ফংহন্নবা ঐখোয়গী দিজিতেল পেমেন্ত সিস্তেমশিং অসি শেমগৎলে।
মসিনা ভারত্তা লৈবাক ঙাকপা, শেন-থুমগী থবকশিং মীওই খুদিংমক কোনশিনবা অমসুং হিংবদা লাইহনবদা অওনবা পুরকপা ঙম্লে। ভারতকী তেক্নোলোজিগী কোনুং বেঙ্গালুরুদা, অদোম্না মীফম পাংথোকপা মতমদা, কমদৌনা ভারতকী কঞ্জুমরশিংনা দিজিতেল পেমেন্তশিং শীজিন্নবগে হায়বা অদোম্না উবা ফংগনি। ঐখোয়না জি-২০গী প্রসিদেন্দ ওইরিঙৈ মনুংদা, ঐখোয়না অনৌবা সিস্তেম অমা শেম্লে। মসিনা ঐখোয়গী জি-২০গী গেস্তশিং ভারতকী দিজিতেল পেমেন্ত প্লেতফোর্ম য়ু.পি.আই শীজিন্নবা য়াহনগনি। অদোম্না মসি শীজিন্নবা মতমদা মসি লাইনা শীজিন্নবগী নুংঙাইবা অমা অদোম্না থেংনগনি অমসুং করিগীদমক মসি ভারতকী মীয়াম্না পাম্না শীজিন্নরিবনো হায়বা অদোম খঙগনি। য়ু.পি.আইগুম্বা থবকশিং অসি লৈবাক কয়ানা মতৌ তম্বা য়াগনি। ঐখোয়গী থবকশিং মালেমদা খঙহনবদা ঐখোয় হরাওগনি। মসিগীদমক জি-২০ অসি গারি অমা ওইবা য়াগনি।
ইকায়খুম্নরবশিং,
মসিগী মরুওইবা মীফম অসি অদোম্না শরুক য়াবগীদমক ঐনা অমুক হন্না ময়াম পুম্নমক থাগৎচরি অমসুং য়াম্না কান্নবা অমসুং মাইপাকপা মীফম ওইনবা য়াইফ-পাউজেল পীজরি।
