এক্সেলেন্সীশিং, ইবেম্মা অমসুং ইবুংঙোশিং, নমস্কার! ঐহাক্না খ্বাই পুম্নমকপু ভারত্তা তরাম্না ওকচরি। তুংগী মতম, সস্তেনেবল ওইবগী মতৌ, শাহৌ লৌবা অমসুং চাউখৎ থৌরাংগী ৱারী শানবা কয়া অসি ইনর্জীগী মতাংদা খন্নদনা কৈদৌনুংদা মপুং ফারোই। ইনর্জীনা চাউখৎ থৌরাংগী থাক খুদিংদা, মীওই অমদগী হৌরগা লৈবাক্কী থাক ফাওবদা শাফু পী।
মরুপশিং,
ঐখোয়গী লৈবাকশিংগী ফিভমশিংনা তোঙান-তোঙাল্লিবা অসিগী মখা পোন্না ইনর্জী ত্রাঞ্জিসনগী পাম্বৈ খুদিংমক খেন্নৈ। অদুবু, ঐখোয় খুদিংগী পান্দমদি লোয়না মান্নৈ হায়না ঐহাক্না অচেৎপা থাজবা থম্মি। ভারতনা গ্রীন গ্রোথ অমসুং ইনর্জী ত্রাঞ্জিসনগী মতাংদা য়াম্না কন্না হোৎনরি। ভারত অসি মীশিং খ্বাইদগী য়াম্বা অমসুং মালেমগী ওইনা শেন্মিৎলোন্দা খ্বাইদগী খোঙজেল য়াঙনা শাহৌ লৌরিবা লৈবাক অমনি অদুগা ঐখোয়গী ক্লাইমেত কম্মিৎমেন্তশিংগী মাইকৈদা খোঙফম চেৎনা চঙশিল্লি। ভারতনা ক্লাইমেত এক্সনশিংদা লুচিংবগী থৌদাং লৌরি। ঐখোয়না নন-ফোসিল ইন্সতোল্দ ইলেক্ত্রিক কেপাসিতীগী পান্দম চহি মাপনগী মমাংদা ফংখ্রে অমসুং ইশাগী ওইবা অৱাংবা পান্দম অমা অমুক থমখ্রে। ঐখোয়না ইং 2030 ফাওবদা নন-ফোসিল ইন্সতোল্দ কেপাসিতীগী চাদা 50 ফংবগী থৌরাং য়াৎলি। ভারত অসি মালেমগী সোলর অমসুং নুংশিৎকী পাৱরগী লুচিংবশিংগী মনুংদা অমসু ওইরি। ৱর্কিং গ্রুপ দেলিগেতশিংনা পভাগরা সোলর পার্ক অমসুং মোধেরা সোলর ভিলেজতা চৎলিবা অসিদা ঐহাক্না নুংঙাইবা ফাওই। মখোয়না ভারতনা ক্লীন ইনর্জীগী হীরমদা খোঙফম চেৎলিবা অসিগী থাক অমসুং স্কেল উবগী খুদোংচাবা ফংগনি।
মরুপশিং,
ঐখোয়না মমাংগী চহি 9দা ইমুং মিলিয়ন 190 হেনবদা LPG ফংহনখি। ঐখোয়না খুঙ্গং খুদিংদা মৈ য়ৌহনবগী পুৱারী ওইরবা মশক নাইবা মায় পাকপা অমসু ফংবা ঙমখি। লৈবাক্কী অপুনবা মীশিংগী চাদা 90বু চহি খরসিদা কোনবা ঙম্বগী মতিক লৈরিবা পাইপ কুকিং গ্যাস মীয়ামদা ফংহন্নবা ঐখোয়না হোৎনরি। ঐখোয়না হোৎনরিবা অসিদি মীপুম খুদিংগী ইনক্লুসিব, রেজিলিএন্ত, ইকুইতেবল অমসুং সস্তেনেবল ইনর্জী ফংহন্নবনি।
মরুপশিং,
অপীকপা খোংথাংনা অচৌবা মহৈ ফংহল্লি। ঐখোয়না ইং 2015দা LED লাইত শিজিন্নবগী অপীকপা স্কিম অমা হৌদোকখি। মসিনা চহি খুদিংগী ইনর্জীগী বিলিয়ন য়ুনিৎ 45 হেন্না কনবা ঙমদুনা মালেমগী ওইনা LED য়েন্থোকপগী খ্বাইদগী চাউবা প্রোগ্রাম অমা তুংদা ওইরকখি। ঐখোয়না লৌউ-শিংউদা শিজিন্নবা পম্পশিংবু সোলরদা ওন্থোকপগী মালেমগী খ্বাইদগী চাউবা খোঙথাং হৌদোকখি। ভারতকী দোমেস্তিক ইলেক্ত্রিক গারী য়োনবগী চাংনা ইং 2030 ফাওবদা চহিদা মিলিয়ন 10 য়োনবগী প্রোজেক্সন থম্লি। ঐখোয়না হন্দক্কী চহিদগী হৌনা চাদা 20গী ইথানোল ব্লেন্দেদ পেত্রোল য়োনবা হৌরে। ইং 2025 ফাওবগী মনুংদা মসিবু লৈবাক শিনবা থুংবদা ফংহনবা হায়বসিনা ঐখোয়গী পান্দম্নি। দিকার্বোনাইজিং ইন্দিয়াগী ওইনদি, লৈবাক অসিনা অলতর্নেতিব অমা ওইনা গ্রীন হাইদ্রোজেনগী মতাংদা মিসন মোদতা হোৎনরি। মসিগী পান্দমদি ভারতপু গ্রীন হাইদ্রোজেন অমসুং মসিদগী পুথোকপা য়াবা পোত্থোক কয়া পুথোকপা, শিজিন্নবা অমসুং মীরমদা থাদোকপগী হীরমদা ভারতপু গ্লোবেল হব অমা ওইহনবনি। ঐখোয়না খঙবা লৌশিং খুদিংমক অতোপ্পদা শেয়র তৌবসি ঐখোয়গী অপাম্বনি।
মরুপশিং,
সস্তেনেবল ওইবা, অহোঙবা, ইনক্লুসিব ওইবা অমসুং ক্লীনা ইনর্জী ত্রাঞ্জিসন খুমাং চাউশিলহন্নবা মালেম্না গ্রুপ অসিদা থাজবা থম্লি। মসি পাংথোকপা মতমদা, গ্লোবেল সাউথকী ঐখোয়গী ইচে-ইচলশিংবু খোঙথাং অসিদা শরুক য়াহনবা হায়বসি য়াম্না মরু ওইবনি। ঐখোয়না চাউখৎলক্লিবা লৈবাকশিংগীদমক্তা লো-কোস্ত ফাইনান্সকী খুদোংচাবা শোইদনা ফংহনগদবনি। তেক্নোলোজী গেপ লৈহন্দবা, ইনর্জী সেক্যুরিতী খুমাং চাউশিলহনবা অমসুং সপ্লাই চেন দাইবর্সিফাই তৌবগী পাম্বৈ কয়া ঐখোয়না থীফম থোকই। অদুগা ‘ফুএল ফোর দি ফ্যুচর’গী মতাংদা তেংবাংনরিবা অসিবু ঐখোয়না মপাঙ্গল হেন্না কনখৎহনগদবনি। ‘হাই লেভেল প্রিন্সিপল ওন হাইদ্রোজেন’ অসিদি অচুম্বা মাইকৈদা থাংজিনবা খোঙথাং অমনি। ত্রান্সনেস্নেল গ্রিদ ইন্তর্কন্নেক্সন্না ইনর্জী সেক্যুরিতী হেন্না লৈহনবা ঙমগনি। ঐখোয়না মসিগুম্বা পুম্নমক্কী কান্নবা ফংমিন্নগদবা থৌওং অসি মশাগী য়ুম্লোন্নবশিংগী মরক্তা খুমাং চাউশিলহন্নবা হোৎনরি। মসিদা ঐখোয়না অপাম্বা মহৈ ফংলে হায়না হায়বা ঙম্লে। ইন্তর-কন্নেক্তেদ গ্রীন গ্রিদকী পান্দম ফংবনা অচৌবা অহোংবা অমা পুরকপা ঙমগনি। মসিনা ঐখোয় খুদিংদা ঐখোয়গী ক্লাইমেত গোল ফংহনবা, গ্রীন ইনভেস্তমেন্ত লৈহনবা অমসুং গ্রীন জোব মিলিয়ন কয়া লৈহনবদা তেংবাংগনি। মীফম অসিদা শরুক য়ারিবা লৈবাক খুদিংনা গ্রীন গ্রিদ ইনিসিএতিব অমা ওইরিবা ইন্তর্নেস্নেল সোলর এল্লাইএন্সকী ‘ৱান সন, ৱান ৱর্ল্দ, ৱান গ্রিদ’ অসিদা য়াওবীয়ু।
মরুপশিং,
অকোয়বগী ফিভম্বু ঙাক শেনবা হায়বসি মহৌশানা তাবনি অমসুং চৎনবীগী মখা পোনবনি। ভারত্তা মসিনা ঐখোয়গী নাৎকী লৌশিংগী শরুক অমা ওইরি। ঐখোয় খুদিংবু ক্লাইমেত চেম্পিয়ন অমা ওইহনগদৌরিবা ইহৌ অমা ওইরিবা মিসন LIFE – লাইফস্তাইল ফোর ইনভাইরনমেন্ত অসিবু মপাঙ্গল হাপ্লিবা অসিসু মসিমক্ননি।
মরুপশিং,
ঐখোয়না মতৌ করম্না ত্রাঞ্জিসন তৌবগে হায়বগী মখা পোন্দনা, ঐখোয়গী ৱাখল্লোন অমসুং থবকশিংনা ঐখোয়গী ‘ৱান আর্থ’ ঙাক-শেন্দুনা থম্বদা মতম পুম্বদা তেংবাংগদবনি, ঐখোয়গী ‘ৱান ফেমিলী’গী অপাম্বা ঙাক-শেনগদবনি, অমসুং গ্রীন ওইবা ‘ৱান ফ্যুচর’গী মাইকৈদা খোঙদাগদবনি। অদোমগী খন্ন-নৈনবা অসিনা মায় পাকপা ওইরসনু, থাগৎচরি!
নমস্কার!
