অনৌবা এপ্পোইন্তীশিংগা লোয়ননা ৱারী-ৱাতাই শাখ্রে
“চাং নাইনা রোজগার মেলাশিং পাঙথোকপা অসিনা সরকার অসিগী ফীদম অমা ওইরক্লি”“কেন্দ্রগী থবকশিংদা রিক্রুৎমেন্তগী থৌওং অসি হেন্না স্ত্রীমলাইন ওইরক্লি অমসুং অকক্নবা মতমদা পাঙথোক্লি”“ত্রান্সপরেন্ত রিক্রুৎমেন্ত অমসুং প্রমোসনশিংনা নহারোলশিংগী মরক্তা থাজবা পোকহল্লি”“‘প্রজানা মতম চুপ্পদা চুম্মি’ হায়বা শেবা তৌবগী ৱাখল্লোনগা লোয়ননা শেবা তৌ”“তেক্নোলোজীগী খুত্থাংদা মশানা তমশিনজবা অসিনা ঙসিগী মীরোলগীদমক খুদোংচাবা অমা ওইরি”“ঙসিগী ভারতনা মশানা মশাদা থবক পীজবগী খুদোংচাবশিং হেনগৎহন্নবা লম্বীদা খোঙজেল য়াংনা চংশিনবা উবা ফংলি”“লৈবাক অসি মাংদা পুখৎপা ঙম্নবা নখোয়না তমশিনবা অমসুং নশাবু মতিক-ময়াই লৈহন্নবা হোৎনবা তাই”খুরুমজরি!
মরুপশিং,
মসি ২০২৩গী অহানবা রোজগার মেলানি। ২০২৩ অসি অফবা তুংলমচৎকীদমক অনৌবা আশাগা লোয়ননা হৌখি। মসিনা ইমুং লিশিং ৭১গী মীওইশিংদা সরকারগী সর্ভিস তৌনবগী খুদোংচাবা পীদুনা নুংঙাইবগী অনৌবা খুদোল অমা পুদুনা লাকখি। ঐহাক্না নহারোল অমদি ইমুং মনুং পুম্নমক্তা নুংঙাইবা ফোঙদোকচরি।
ঙসিগী থৌরম অসিনা মাইপাক্লবা কেন্দিদেৎশিংগী মরক্তা অনৌবা আশাগী মঙাল পীবতা নত্তনা ইমুং করোর কয়াদসু পীরগনি। লাক্কদৌরিবা নুমিৎশিংদা ইমুং লাখ কয়ানা সরকারগী থবকশিংগী এপোইন্তমেন্ত ফংলগনি।
কেন্দ্র সরকারগা লোয়ননা লেপ্পা লৈতনা রোজগার মেলাশিং মথং-মথং পাঙথোক্কনি অমসুং মসি এন.দি.এ. অমদি বি.জে.পি.না পানবা রাজ্যশিংদসু পাঙথোক্লি। শুপ্নগী ঙরাং খক্তা অসাম সরকারনা রোজগার মেলা পাঙথোকখি। মধ্য প্রদেশ, উত্তর প্রদেশ, মহারাস্ত্র অমসুং উত্তরাখন্দগুম্বা রাজ্যশিংদা অথুবদা রোজগার মেলা অথুবদা পাঙথোক্লগনি হায়না ঐঙোন্দা পাউদমলকখি। চাং নাইনা রোজাগর মেলাশিং পাঙথোকপা অসিনা সরকারগী ফীদম অমা ওইরি।
মসিনা সরকারনা লৌখিবা ফিরেপ খুদিংমক মঙফাওনবা ঙমহল্লি তাক্লি। নখোয়না নীংশিংলমগনি মমাং চহিগী ধনতেরসকী য়াইফরবা নুমিৎতা অহানবা রোজগার মেলা পাঙথোকখি।
ঙসি ঐহাক্না রোজগার মেলাদা সরকারগী থবক ফংখিবা নহা ওইরিবা মরুপ খরগা ৱারী শাবগী খুদোংচাবা ফংখি। মখোয়গী মাইথোংদা হরাওবা অমদি অপেনবা ময়েক শেংনা উবা ফংই অমসুং কেন্দিদেৎ অয়াম্বা ইচম চম্বা ইমুংশিংদগী হৌরকপনি অমসুং মখোয় কয়ানা মখোয়গী ইমুং মনুংগী মীরোল মঙাদা সরকারগী থবক ফংবা অহানবা ওইরি। মহাক্না সরকারগী থবক ফংবগী হরাওবা খক্তা নত্তনা মখোয়না সরকারগী থবক তৌগদোরে হায়না হেন্না হরাওরি। মখোয়না থবক লৌবগী থৌওংদা ত্রান্সপরেন্ত ওইবা অসিনা মরম ওইদুনা মখোয়গী মেরিত্তা খল্লকপদা অপেনবা পোকখি।
নখোয়না থবক লৌবগী থৌওংদা চাউনা অহোংবা উবা ফংলমগনি। কেন্দ্রগী থবকশিংদা থবক লৌবগী থৌওং অসি হেন্না স্ত্রীমলাইন তৌখি অমসুং অকক্নবা মতমগী মনুংদা পাঙথোক্লি।
মরুপশিং,
ঙসি থবক লৌবগী থৌওংদা ত্রান্সপরেন্সী লৈবা অমসুং খোঙজেল য়াংবা অসি সরকারগী থবক খুদিংমক্তা ময়েক শেংনা উবা ফংই। তোঙান-তোঙানবা মরমশিংনা রিগ্যুলর প্রমোসনশিং লাকপদা অপনবা থোক্লম্বা মতম অমা লৈরমখি।
ঐখোয়গী সরকারনা তোঙান-তোঙানবা চয়েৎনবা কোকহনখি, কোর্ত কেস কয়া চত্থখি, মতম শাংনা পন্দুনা লৈরমখিবা প্রমোসনশিং পীথোক্নবা ফিরেপ অদু উৎখি। ত্রান্সপরেন্ত ওইবা মওংদা থবক লৌবা অমসুং প্রমোসন পীবা অসিনা নহারোলশিংদা থাজবা পোকহল্লি। মসিগী ত্রান্সপরেন্স অসিনা হেন্না নীংথিনা শেম-শাবগা লোয়ননা কম্পিতিসনদা য়াওনবা ইথিল পীখি। ঐখোয়গী সরকারনা মাইকৈ অসিদা লেপ্পা লৈতনা থবক পাইখৎলি।
মরুপশিং,
ঙসি এপোইন্তমেন্ত লেত্তর ফংখিবশিংগীদমক মসি পুন্সিগী অনৌবা খোঙচৎ অমনি। সরকারগী মরু ওইবা শরুক অমা ওইনা, চাউখৎপা ভারতকী খোঙচৎতা নখোয়না চাউনা শরুক য়াদুনা অখন্নবা থৌদাং অমা লৌরগনি। নখোয় অয়াম্বনা সরকারগী মীহুৎ ওইনা মীয়ামগা হকথেংননা দীল তৌগনি। নখোয় অমমমনা মীয়ামগী পুন্সিদা নখোয়গী ওইবা মওংদা ইথিল পীগনি।
নখোয়না তারম্লগনি, বিজিনেসকী লমদা হায়নবা লৈ মদুদি কঞ্জুমরনা মতম চুপ্পদা চুম্মি। মতৌ অসুম্না ঐখোয়না লৈঙাকপগী মন্ত্র অসি – প্রজানা মতম চুপ্পদা চুম্মি হায়বা অসিনা ওইগদবনি। ঐখোয়না শেবা তৌনীংবগী ফাওরিবা চপ মান্নবা ইথিল অদুদা হেন্না শক্তি পীগনি। নখোয়না সরকারগী থবক ফংবা মতমদা কৈদৌঙৈদা কাওরোইদবা অসি, মসি সরকারগী সর্ভিসনি থবক নত্তে হায়বা অসিনি। করিগুম্বা নখোয়না প্রাইবেৎতা তৌবা তারবদি মদু থবক হায়গনি। মখোয়না সরকারদা চংলকপা মতমদা মদু শেবা তৌবা কৌগনি। সর্ভিসকী ৱাখল্লোন্দা নখোয়না ঐগী ইরৈবাকচা করোর ১৪০ অসি শেবা তৌরবদি নখোয় লাইবক য়াম্না ফরবনি। ঐখোয়না পুন্সিদা খুদোংচাবা অমা ফংই অমসুং করিগুম্বা ৱাখল্লোন অসিগা লোয়ননা থবক তৌরবদি মদুনা মীয়ামদা অফবা শাফু পীগনি অমসুং নখোয়না থবক তৌবদা নুংঙাইগনি।
নখোয়না উরমগনি ঐখোয়গী কর্মচারি মরুপশিং, সরকারগী সর্ভিস তৌরিবা কর্ময়োগী ইচিল-ইনাওশিংনা ওনলাইন ত্রেনিং তৌরি। দিজিতেল ত্রেনিং প্লেৎফোর্ম আই.জি.ও.তি. কর্ময়োগী অসিনা তুংলমচৎকীদমক শেম শাবদা মখোয়বু মতেং পাংলি। ওফিসিএল ত্রেনিংগী মথক্তা প্লেৎফোর্ম অসিনা পর্সনেল দিবেলপমেন্তগীদমক কোর্স কয়াসু ফংহল্লি।
তেক্নোলোজীগী খুত্থাংদা মশানা তমশিনজবা অসি ঙসিগী মীরোলগী খুদোংচাবা অমনি হায়না ঐহাক্না থাজৈ মসিগী খুদোংচাবা অসি মাংহনগনু। পুন্সিদা মখা তানা তমনীংবগী অপাম্বা লৈবনা ঐখোয়বু মাংদা চংশিনহল্লি। অমসুং ঐনা মতম চুপ্পদা হায় ঐঙোন্দা তমনীংবগী য়াওরিবা ইথিল অদু কৈদৌনুংদা ঐহাক্না মাংহন্দে। ইশানা তমনিংবগী ৱাখল্লোন অসিনা লর্নরগী মতিক ময়াই, মহাক্কী ইন্সতিত্যুসনশিং অমসুং ভারতকী মতিক-ময়াই হেনগৎহনগনি।
খোঙজেল য়াংনা হোংলক্লিবা ভারতগরা থবক্কী খুদোংচাবশিং অমসুং মশানা মশাদা থবক পীজবগী খুদোংচাবা লেপ্পা লৈতনা হেনগৎলক্লি। খোঙজেল য়াংনা খুমাং চাউশিনবা অসিনা ইশানা ইশাদা থবক পীজবগী খুদোংচাবশিং চাউনা হেনগৎহল্লি। ঙসিগী ভারতনা মসি উবা ফংলি। ঙসি ইশানা ইশাদা থবক পীজবগী লম অসি চাউনা খুমাং চাউশিল্লি। লৈবাক অসিদা ইনফ্রাস্ত্রকচরেল দিবেলপমেন্তগী হোলিস্তিক এপ্রোচকা লোয়ননা হৌখিবা চহি নিপাল অসিদা থবক্কী খুদোংচাবা লাখ কয়া পীখি। ইনফ্রাস্ত্রকচরদা তৌখিবা লুপা করোর লাখ কয়াগী ইনভেস্তমেন্ত অসিনা থবক্কী খুদোংচাবশিং পীনবা অনৌবা লম্বেলশিং য়াৎলি।
নখোয় খঙলব্রা, অনৌবা লম্বী অমা শেম্বা মতমদা থবক্কী অনৌবা এভেন্যুশিং করম্না শেম্বা হৌরকই। চপ মান্নবা লম্বী অদুগী নাকলদা অনৌবা মার্কেৎ স্তেন্দ হাংদোকই, দুকান মখল পুম্নমক হাংদোকই। লম্বীনা মরম ওইদুনা লৌমীশিংগী প্রদক্তশিংনা কৈথেলদা লায়না য়ৌবা ঙমখি।
মতৌ অদুম্না মফম অমদা অনৌবা রেলৱে লাইন লাকপদা মফম অদুগী কৈথেল চাউখৎলি। চত্থোক-চৎশিন তৌবদা খুদোংচাবনা তুরিজমসু চাউখৎপা হৌরকই। অমসুং অসিগুম্বা চাউখৎপা অসিনা হৌজিক লৈরিবা থবক্কী অনৌবা ওইথোকপা য়াবশিং হেনগৎহল্লি।
ঙসি, ভারত-নেৎ প্রোজেক্তনা খুঙ্গং খুদিংমক্তা ব্রোদবেন্দ কন্নেক্তিবিতী পীরি। ঐখোয়না ইন্তর্নেৎকী খুত্থাংদা মালেমগী লেমহৌরিবা শরুককা খুঙ্গংগা কন্নেক্ত তৌবা মতমদা থবক্কী অনৌবা খুদোংচাবশিং পীবা ঙম্মি। তেক সেভী নত্তবা কয়ানা মসিগী কান্নবা খঙখি অমসুং হৌঝিক মোবাইল নত্ত্রগা কম্প্যুতরদা ক্লিক অমা তৌবদা থবক তৌবা ঙমলে।
ঐখোয়না মতম অয়াম্বদা মহাক্না ফেসিলিতী অসিগী খুদোংচাবা লৌনবা তেক্নোলোজী এক্সপর্ত অমগী মতেং লৌখি। অমসুং মসিনা মরম ওইদুনা মীচম প্রজাগী মথৌ তাবা, থবক্কী অনৌবা খুদোংচাবশিং পীরি। ঙসি খুঙ্গংশিং, তাউনশিং অমসুং সহরশিংদা অসিগুম্বা ওন্তপ্রিনোরশিপ অসিনা মীয়ামদা ওনলাইন সর্ভিস পীনবা মখোয়গী মশাগী অনৌবা লম অমা হাংদোকচদুনা মাদা চংশিনবা উবা ফংলগনি। ঙসি মীয়ামা ভারতকী অপীকপা সহরশিংদা স্তার্তঅপশিং হাংদোক্লিবা অসিনা অনৌবা মীরোলগীদমক সেন্তর ওফ এত্রেক্সন ওইরক্লি, মশানা মশাদা থাজবগী সেন্তর ওইরক্লি। স্তার্তঅপশিংগী মাইপাকপ[আ অসিনা নহারোলগী শক্তিগী মতিক-ময়াইবু মালেম শিনবা থুংবদা শকখঙবা হৌরকই।
মরুপশিং,
নহা ওইরিবা ইচানুপা অমদি ইচানুপীশিং নখোয় অয়াম্বা য়াম্না অচম্বা ইমুংদগী হৌরকপা ঙাক্তনি। মফম অসি য়ৌনবা নখোয়না কন্না হোৎনরকখি। নখোয়গী ইমা-ইপানা অৱাবা কয়া মায়োক্নখি। ঙসি নখোয়না ইরৈবাকচা করোর ১৪০ শেবা তৌনবা খুদোংচাবা ফংলি অদুবু মতম চুপ্পদা নখোয়না মফম অসিদা লাকপদা ফাওরিবা ইথিল অদু মাংহন্দনা থম্মু। মতম চুপ্পদা মখা তানা তমনীংবা পোকউ, নখোয়গী স্কিলশিং অপগ্রেদ তৌ অমসুং চাউখৎহন্নবা হোৎনৌ।
ঐহাক্না নখোয়দা য়াইফ-মঙ্গোল পীঝরি। নখোয় মাইপাকপা ওইয়ু অদুবু লৈবাকসু মাইপাকহনসি। নখোয়না মাংদা চংশিল্লু লোয়ননা লৈবাক অসিসু মাংদা চংশিনহনসি। নখোয়না মাংদা চংশীনবদা লৈবাক অসিবুসু মাংদা পুখৎলু। লৈবাক অসিবু মাংদা পুখৎনবা নখোয়দা মতিক-ময়াই লৈবা তাই, নখোয়না তৌবা ঙম্বা ওইবা তাই। নখোয় নশাবু লেপ্পা লৈতনা দিবেলপ তৌ অমসুং নখোয়দা পীরিবা থৌদাং নীংথিনা পাঙথোকউ। য়াইফ-মঙ্গোল অসি নখোয়গী নফমদা ঐহাক্না পীজরি।
হন্না-হন্না থাগৎচরি।
