ইকায়খুম্নরবা সভাপতি,
রাস্ত্রপতিগী ৱারোল থাগৎপগী মোসন অসিদা ঐশু শরুক য়ারে। রাস্ত্রপতি জিগী ৱারোলদা, লৈবাক অসিগী মীয়াম ইথিল পীখি অমসুং অচুম্বগী লম্বী অমা তাকখি।
ইকায়খুম্নরবা সভাপতি,
হৌখিবা নুমিৎ নিনি খর হেনবা অসিদা, ইকায়খুম্নরবা এম.পি ৭০ হেন্না খন্ন-নৈনবা অসিদা মখোয়গী ওইবা ৱাখল্লোনশিং ফোঙদোকখি। রাস্ত্রপতি জিগী ৱারোল খন্ন-নৈনবা অসিদা মপুংফানা শরুক য়াখিবা ইকায়খুম্নরবা সংসদকী মেম্বরশিং ঐনা থাগৎপা ফোঙদোকচরি।
ইকায়খুম্নরবা সভাপতি,
ভারতকী নিংতম্বগী পুৱারিদা ঐখোয়গী গনতন্ত্রগী খোঙচৎতা চহি কয়াগী মতুংদা, লৈবাক অসিগী মীয়াম্না সরকার অমা লৈবাক অসি অহুমলকশুবা ওইনা মীয়ামগী থবক তৌনবা খুদোংচাবা পীরে। চহি ৬০গী মতুংদা, চহি ১০গী মতুংদা সরকার অসি অমুক হল্লক্লে। মসি ভারতকী গনতন্ত্রদা চহি ৬০গী মতুংদা তাংনা থোকপা থৌদোক অমনি। মীওই খরনা অতম্ননা মসিদগী মখোয়গী মমাই লৈথোক্লে, মীওই খরনা মসি খঙদ্রে অমসুং লৈবাক অসিগী মীয়ামগী মরুওইবা ৱারেপ অসি লৈবাক অসিগী মীয়ামগী ৱাখলদা য়ুম্ফম ওইবনি। হৌখিবা নুমিৎ খরনি অরোইবদা মাইথিবা য়াজবা অমসুং অনেম্বা ৱাখল অমদা মাইপাকপা অসি য়াজবা ঐনা উরে।
ইকায়খুম্নরবা সভাপতি,
ঐনা কংগ্রেসকী ঐখোয়গী মরুপ খর থাগৎপা পাম্মী, মরমদি মহাক্কী দলনা মহাক শৌগৎত্রবসু মহাক মরোমদোম ফিরালগা লোয়ননা চেনবা ঐখোয়গী মরুপ অমদগী ঐনা উখি। করিগীদমক ঐনা মসি হায়রিবনো? ঐখোয়গী চহি ১০গী লৈঙাক লৈখ্রে অমসুং চহি ২০ অমগা লৈখিগনি। অহুম থোকপগী থবক ওইনা পাংথোকখ্রে, শরুক অহুম থোকপগী অনি ৱাৎলি।
ইকায়খুম্নরবা সভাপতি,
হৌখিবা চহি ১০দা কৎথোকপগা লোয়ননা পাংথোকখিবা থবকশিং লৈবাক অসিগী মীয়াম্না থম্মোয় শেংনা শৌগৎলে। লৈবাক অসিগী মীয়াম্না থৌজাল পীরে। হন্দক্কী মীখল অসিদা লৈবাক অসিগী মীয়াম্না অরানবা পাউ মাইথিবা পীবদা লৈবাক অসিগী মীয়াম্না চাউথোকচবা ফাওই। লৈবাক অসিগী মীয়াম্না থবক ওইনা পাংথোকপদা মরুওইবা মীৎয়েং থম্লে। নমথাক তৌবগী রাজনিতি অসি লৈবাক অসিগী মীয়াম্না য়াদ্রে অমসুং থাজবগী রাজনিতিনা মাইপাকপা পুরক্লে।
ইকায়খুম্নরবা সভাপতি,
ঐখোয়গী সংবিধান চহি ৭৫ মপুংফারক্লে। মসি হাওস অসিগী অখন্নবা অমনি। হাওস অসিসু চহি ৭৫ মপুংফারক্লে অমসুং মসি হরাওবা মান্নবা অমনি।
ইকায়খুম্নরবা সভাপতি,
লৈবাক অসিদা ঐগুম্বা লৈবাক্কী থবক তৌবা মীওই কয়া, মখোয়গী ইমুংদা সরপঞ্চ অমা ফাওবা ওইদবা, খুঙ্গং অমগী খুল্লাকপা ফাওবা ওইদবা মীওই কয়া লৈরি। মরি রাজনিতিগা মরী লৈনদে। অদুবু ঙসিদি মরুওইবা ফম কয়া পায়দুনা মখোয়না লৈবাক অসিগী থবক তৌরি। বাবা সাহেব অম্বেদকারনা পীরবা সংবিধান্না মরম ওইদুনা ঐখোয়গুম্বা মীওইদা খুদোংচাবশিং পীবনি। জনতা জনার্ধন্না মসি ওইহনবনি অমসুং অহুমলকশুবা ওইনা সরকার পায়নবা খুদোংচাবা অমা ফংলে।
ইকায়খুম্নরবা সভাপতি,
ঐখোয়গী সংবিধান অসি শুপ্নবগী আর্তিকলশিংগী খোমজিনবা অমা নত্তে। মসিগী থৌনা অমসুং মসিগী ৱাহৈশিং অসি ঐখোয়দা মমল য়াম্না য়াম্মী। সরকার অমগী ওইনা, সংবিধান অসি লাইত হাওস অমনি, মৈরা অমনি অমসুং সরকার অমগী থৌশিল লেপ্লিবনি হায়বা ঐখোয়না থাজৈ।
ইকায়খুম্নরবা সভাপতি,
ঐখোয়না নবেম্বর ২৯ অসি সংবিধান নুমিৎ হায়না থৌরম পাংথোক্কনি হায়না ঐখোয়গী সরকারনা লোক সভাদা হায়খিবা অদু ঐ নিংশিংলি। ঐ অঙকপা ফাওখি, সংবিধানগী কপিশিং পায়রগা চোংখিবা মীওইশিং, জনুৱারি ২৬ তা খোঙজং চিংশিনখিবশিং, করিগী মখোয়না সংবিধানগী নুমিৎ পাংথোক্লিবনো। মখোয়না সংবিধানগী নুমিৎ পাংথোক্নবা ৱারেল লৌখিবা অসিনা স্কুলশিং অমসুং কলেজশিংদা তম্লিবা নহারোলশিংদা সংবিধানগী অচুম্বা ৱাখল্লোনশিং খঙহনবদা মতেং পাংগনি। মহৈরোয়শিংগী মরক্তা এসে ইবা চাংদম্নবা পাংথোকপা, খন্ন-নৈনবা মীফমশিং পাংথোকপা অমসুং এক্সতেম্পর পাংথোকপনা সংবিধানগী তোঙান-তোঙানবা শক্তমশিং মহৈরোয়শিংদা খঙহনবদা মতেং ওইগনি। লৈবাক অসিগী মীয়ামদা সংবিধানগী মরমদা খঙবা পাক-শন্না হেনগৎলে। হৌজিক ঐখোয়গী সংবিধান অসি চহি ৭৫ শুরে, মসি মীয়ামগী থৌরম অমা ওইনা লৈবাক শীনবা থুংনা পাংথোক্নবা ঐখোয়না ৱারেপ লৌরে। মসি লৈবাক অসিগী কাচিন-কোয়া শীনবা থুংনা সংবিধানগী মরমদা খঙহন্নবা হোৎনবা অমনি।
ইকায়খুম্নরবা সভাপতি,
লৈবাক অসিগী মীয়ামদা ঐখোয়দা অহুমশুবা তার্মগী খুদোংচাবা পীরে। চাউখৎলবা ভারত অমা, মশাগী ওক্নবা পুথোকচবা ভারত অমগী খোঙচৎ অসি মপাঙ্গল কনখৎহন্নবা অমসুং মঙলান অসি মঙফাওনবা ঙম্নবা লৈবাক অসিগী মীওই মিল্লিয়ন কয়ানা ঐখোয়দা বর পীরে।
ইকায়খুম্নরবা সভাপতি,
চহি ১০দা পাংথোকখিবা থবকশিং খক্তা য়েংলগা মীখল অসি মাইপাকপা নত্তে। তুংদা লাক্কদবা অনিংবশিং থবক ওইনা পাংথোক্নবা লৈবাক অসিগী মীয়াম্না ঐখোয় খল্লকপনি। লৈবাক অসিগী মীয়ামদা ঐখোয়দা থাজবা থম্বা খক নত্তনা, ঐখোয়গী মঙলানশিং অমসুং ৱাশকশিং থবক ওইনা পাংথোক্নবা খুদোংচাবা ঐখোয়দা পীরে।
ইকায়খুম্নরবা সভাপতি,
হৌখিবা চহি ১০দা ঐখোয়গী ইকোনোমি অসি ১০শুবা মফমদগী ৫শুবা মফমদা পুখৎলকখিবা অদু লৈবাক অসিগী মীয়াম্না খঙলে। মাইপাকপশিং মশিং য়ামখৎলকপগা লোয়ননা, খুদোংচাদবা কয়াগী মশিংশু হেনগৎলকখি। কোরোনা মতমগী শিংনবা মায়োক্নরশু, মালেমগী মুক্নবা কয়া থেংনরবশু, উংখৎনবা কয়া লৈরবশু, ঙসি মালেমদা ঐখোয়না ঐখোয়গী ইকোনোমি অসি ১০শুবদা লৈরম্বদগী ৫শুবা মফমদা পুখৎলকপদা ঐখোয় মাইপাক্লে। ইকোনোমি অসি ৫শুবা মফমদগী ৩শুবা মফমদা পুখৎলক্নবা লৈবাক অসিগী মীয়াম্না হৌজিক ঐখোয়দা শীন্নরে অমসুং মালেমদা ভারতকী ইকোনোমি ৩শুবা মফমদা পুখৎলক্নবা লৈবাক অসিগী মীয়াম্না পীরিবা রাই অসি ঐখোয়না মখা তানা থবক ওইনা পাংথোক্কনি হায়না ঐনা থাজৈ। মসি করম্বা মতমদা পাংথোকপা ঙমগনি, মসি লৈবাক অসিনা মশা মরোমদোম পাংথোকচবা ঙমগদরা হায়না খনবা অখঙ-অহৈ খর লৈরি। হায়রিবা মীওইশিং অসি ওতো-পাইলোত মোদ নত্ত্রগা রিমোত ওইনা সরকার পায়খিবা মীওইশিংনি, মরম অদুনা মখোয়না করিগুম্বা অমতা থাজবা লৈখিদে, মখোয়না কমদৌনা ঙাইগনি হায়বা খক খঙখি। লাক্লিবা চহিশিংদা, ঐখোয়না হৌখিবা চহি ১০দা পাংথোকখিবা থবকশিং, ঐখোয়না য়াংখৎহনগনি, পাকথোক-চাউথোকহনগনি, ফগৎহনগনি অমসুং মসিগী ৱাশক অসি ঐখোয়না ঙাক্কনি।
ইকায়খুম্নরবা সভাপতি,
মীখল মনুংদা, ঐনা মীয়ামদা হায়খি মদুদি হৌখিবা চহি ১০দা ঐখোয়না পাংথোকখিবা থবকশিং অদু ঐখোয়গী অনিংবশিং অমসুং মঙলানশিং মঙফাওনবা ঙম্নবা থবক হৌবনি হায়না, মপুং ওইবা থবক হৌজিক হৌরে। মথং চহি ৫ অসি তঙাইফদবা খুদোংচাবশিং মপুংফানা ফংহন্নবা থবক পায়খৎকনি। হায়রিবা তঙাইফদবা খুদোংচাবশিং, মপুংফাবা অফবা লৈঙাক, অমসুং খুদোংচাবশিং মপুংফানা ফংহনগদবা যুগ অমদা ঐখোয় লৈরে অমসুং ইকায়খুম্নবা পুন্সি অমদা হিংনবা মীয়ামগী তঙাইফদবশিং ফংহনবা সরকার অমা লৈহনবা মতম অদু লাক্লে।
ইকায়খুম্নরবা সভাপতি,
মথং চহি ৫ অসিদা অকনবা মওংদা লায়রবা মুৎথৎনবা থবক পায়খৎকনি। লায়রবা মুৎথৎনবগীদমক মথং চহি ৫ অসি য়াম্না মরুওইবা মতম অমনি। লৈবাক অসিগী অপুনবা থবকশিংনা লায়রবশিংনা লায়রবা থেংনবা ঙমগনি। ঐখোয়না হৌখিবা চহি ১০দা থেংনখিবা কয়া অদুদা য়ুম্ফম ওইরগা লায়রবা থেংনবা ঙমগনি হায়না ঐনা থাজৈ।
ইকায়খুম্নরবা সভাপতি,
লৈবাক অসিনা মালেমদা খ্বাইদগী চাউবা ৩শুবা ইকোনোমি ওইরকপা মতমদা, মসিনা কান্নবা, মসিগী ইথিল মীওই কাংলুপ খুদিংমক্তা য়ৌগনি। পাকথোক-চাউথোক্নবগী খুদোংচাবা কয়া ঐখোয়না ফংগনি অমসুং ঐখোয়না মালেমগী ৩শুবা ইকোনোমি ওইরকপা মতমদা, ভারতকী থাক খুদিংমক্তা অফবা কান্নবা অমা ফংগনি, মালেমগী ওইনশু মমাঙদা অমুক্তা ওইখিদ্রিবা কান্নবা অমা ফংগনি।
ইকায়খুম্নরবা সভাপতি,
ঐখোয়না মালেমগী থাক্ত ভারতকী অনৌবা স্তার্দ-অপশিং অমসুং অনৌবা কম্পেনিশিং থোক্লকপা উরে। তুংদা লৈবাক অসি চাউখৎহন্নবগী ইঞ্জিন ওইনা ঐখোয়গী তয়ার-২, তয়ার-৩গী সহরশিংনা অচৌবা থৌদাং অমা লৌগনি হায়বা ঐ খঙলে। চৎলিবা চহিচা অসি তেক্নোলোজিনা লমজিংবা চহিচানি অমসুং মরম অদুনা অনৌবা হিরম কয়াদা ঐখোয়না অনৌবা থবক কয়া শোইদনা উরগনি।
ইকায়খুম্নরবা সভাপতি,
মথং চহি ৫দা মীয়ামগী চৎথোক-চৎশিন্দা চাউনা অহোংবা লাক্লগনি অমসুং মসিগী কান্নবশিংগী ভারতকী মীওই করোর কয়া ফংলগনি অমসুং মসিগী মাইকৈ অসিদা হকচিন্না চঙশিনবা ঐখোয় পাম্মী।
ইকায়খুম্নরবা সভাপতি,
ভারতকী চাউখৎপগী খোঙচত্তা, ঐখোয়গী অপীকপা সহরশিংনা শান্নবা, লাইরিক-লাইশু, ইন্নোবেসন নত্ত্রগা অতৈ হিরম কয়াদা মরুওইবা থৌদাং অমা লৌগনি। অসিগুম্বা ঐখোয়গী অপীকপা সহর লিশিং কয়া চাউখৎলবা ভারত অমগীদমক লৈরি হায়বা ঐ খঙলে। হৌজিক অনৌবা পুৱারি অমা শেম্লে।
ইকায়খুম্নরবা সভাপতি,
ঐনা মমাঙদা ভারতকী চাউখৎপগী খোঙচৎকী য়ুম্বী ৪গী মতাংদা ফোঙদোকখ্রে, মসি ফগৎহনবনা অচৌবা থৌনা অমা পীগনি। ঐখোয়গী লৈবাক্কী লৌমীশিং, ঐখোয়গী লৈবাক্কী লায়রবশিং, ঐখোয়গী লৈবাক্কী নহারোলশিং অমসুং ঐখোয়গী লৈবাক্কী নুপীশিং, ঐখোয়গী চাউখৎপগী খোঙচত্তা ঐখোয়না মখোয়দা মীৎয়েং থম্লি।
ইকায়খুম্নরবা সভাপতি,
লৌউ-শিংউ অমসুং লৌমীশিংগী মতাংদা মেম্বরশিংনা মখোয়গী পাউতাকশিং পীরকপগীদমক ঐনা মেম্বরশিং অমসুং মখোয়গী ৱাখল্লোনশিং ইকায়খুম্নবা উৎচরি। লৌউ-শিংউগী থবকশিং অসিনা লৌমীশিংদা কান্নবা পীনবা হৌখিবা চহি ১০দা ঐখোয়না থবক কয়া পায়খৎলে। ঐখোয়না স্কিমশিংগী খুৎথাংদা লৌউ-শিংউগী থবক অসি কান্নবা অমা ওইহল্লে। লৌমীশিংদা শেন্থং, অনৌবা মরুশিং ফংহল্লে। ঙসি চুনবা মমলদা পোৎথোকশিং য়োনবা ঙম্লে অমসুং হান্না লৈরম্বা খুদোংচাদবশিং কোকহন্দুনা লৌমীশি য়াম্না লাইনা ক্রোপ ইন্সুরেন্স ফংলে। এম.এস.পিদা মহৈ-মরোং লৈশিনবগী মতাংদা, ঐখোয়না অরিবা রেকোর্দশিং থুগায়রে অমসুং লৌমীশিংদা কান্নবা ফংহল্লে। মাইক্রো প্লান্নিংগী খুৎথাংদা মরুদগী হৌরগা কৈথেল ফাওবগী থবক খুদিংমক্তা লৌমীশিংগীদমক ঐখোয়না থবকশিং ফগৎহল্লে।
ইকায়খুম্নরবা সভাপতি,
মমাঙদা ঐখোয়গী লৈবাক্তা লায়রবা লৌমীশিং লোন অমসুং ক্রেদিৎ কার্দ ফংবদা য়াম্না খুদোংচাদবা থেংনখি। ঙসিদি ঐখোয়গী থৌশিলনা মরম ওইদুনা কিষান ক্রেদিৎ কার্দ ফংবা মশিং হেনগৎলে। ঐখোয়না লৌমীশিং অমসুং ঙামীশিংদা কিষান ক্রেদিৎ কার্দ পীরে। মসিনা মরম ওইদুনা, লৌমীশিংগী থবক পাকথোক-চাউথোক্লে অমসুং মসিগী মাইকৈ অসিদা ঐখোয়সু থবক তৌরে।
ইকায়খুম্নরবা সভাপতি,
কংগ্রেসকী লৈঙাক মনুংদা, চহি ১০গী মনুংদা অমুক্তং লৌমীশিংগী লোন কোকপীবদা লাউ-খোঙখি। ৱাফম কয়া হায়দুনা লৌমীশিং লান্না লমজিংনবা অচৌবা থৌরাং অমা পায়খৎখি অমসুং লুপা করোর লিশিং ৬০ খক্তগী লোন কোকপদা অশুক য়াম্না লাউ-খোঙখি। মদুদা কান্নবা ফংখিবা অদু চাউরাক্না লৈবাক অসিগী লৌমী করোর ৩ খক্তনি। মদুদা লায়রবা লম য়াম্না লৈজদবা লৌমীশিংগী মমিং য়াওখিদে। লোন কোকপা দরকার ওইবা লৌমীশিং মখোয়গী থৌরাংদা য়াওখিদে অমসুং কান্নবশিং মখোয় ফংখিদে।
ইকায়খুম্নরবা সভাপতি,
কমদৌনা থৌশিলশিং শেম্বগে, কমদৌনা য়াইফ-থৌরাংশিং পায়খৎপগে, কমদৌনা লৌমীশিংদা কান্নবশিং য়ৌহনবগে হায়বসি ঐখোয়গী সরকারগী মরুওইবনি হায়বগী খুদম অমা হাওস অসিদা পীবা ঐ পাম্মী। ঐখোয়না প্রধান মন্ত্রী কিষান সম্মান নিধি পায়খৎতুনা লৌমী করোর ১০ হেন্না কান্নবশিং ফংহনখ্রে। হৌখিবা চহি ১০দা ঐখোয়না লৌমীশিংদা লুপা করোর লাখ ৩ ফংহনখ্রে।
ইকায়খুম্নরবা সভাপতি,
অরানবা শন্দোকপা অচুম্বা ঙাংবদা তানিংদবা মীওইশিং লৈবাক অসিনা উরে। ফজনা খন্ন-নৈনরবা মতুংদা মখোয়না পুখৎলকপা ৱাহংশিংগী পাউখুম তানবা ফমদুনা লৈনবগী থৌনা লৈতবা মীওইশিংনি। মখোয়না রাজ্য সভা অসি ইকায়বা পীরে। রাজ্য সভাগী ফজরবা চৎনবী অসি খোঙ্গোইনরে।
ইকায়খুম্নরবা সভাপতি,
লৈবাক অসিগী মীয়াম্না মখোয় মাইথিবা পীরে, হৌজিক মখোয় লম্বীদা থোক্লক্লগা লাউ-খোংবা নত্তনা থবক অমতা লৈত্রে। স্লোগানশিং লাউবা অমসুং লানফমদগী চেনখিবা হায়বসি মখোয়গী লাইবক্তা ইদুনা লৈরবনি।
ইকায়খুম্নরবা সভাপতি,
ঐ অদোমগী নুংঙাইতবা অদু খঙই। মীওই করোর ১৪০ না পীরকপা রাই অদু মখোয়না লৌশিনবা ঙমদ্রে অমসুং ঙরাং মখোয়গী থবকশিং মাইথিরে। ঙসি ফাওবা মখোয়না লানফম অসি থেংননবা থৌনা লৈত্রে অমসুং মরম অদুনা মখোয় মফম অসিদগী চেনখ্রে।
ইকায়খুম্নরবা সভাপতি,
ঐ মফম অসিদা পাংথোক্কদবা থবক কয়া লৈরি। ঐ মফম অসিদা খন্ন-নৈনবদা ৱাফম কয়া পুথোক্কনি। ঐ লৈবাক অসিগী মীনাইনি। লৈবাক মীয়াম্না ঐঙোন্দা থবক কয়া শীন্নরি। ঐগী মতমগী মিকুপ খুদিং মীয়াম থবক তৌবা অসি ঐগী থৌদাংনি হায়না ঐনা খল্লি।
ইকায়খুম্নরবা সভাপতি,
মালেমগী ওইনা হার মমল হেনগৎলকপগী অচৌবা অৱাবা অমা থেংনখি। ঐখোয়না লৈবাক অসিগী লৌমীশিং অৱাবা থেংনহনখিদে অমসুং ভারতকী নিংতম্বা মতুংগী পুৱারিদা খ্বাইদগী য়াম্বা ওইনা ঐখোয়না লুপা করোর লাখ ১২গী হারগী সবসিদি পীখি। ঐখোয়না লৌমীশিং মথন্তা থাদোকখিদে অমসুং সরকারনা মখোয়গীদমক লেপখি।
ইকায়খুম্নরবা সভাপতি,
ঐখোয়না রেকোর্দ ওইনা এম.এস.পি হেনগৎখি। মসি খক নত্তনা, পোৎথোকশিং লৈশিনবদা অনৌবা রেকোর্দশিং থমখি। মমাঙদা এম.এস.পি লাউথোকখি অমসুং লৌমীশিংদগী করিগুম্বা অমতা লৈখিদে। হান্নদগী হেন্না পোৎথোকশিং লৈশিন্দুনা ঐখোয়না লৌমীশিংগী ফিবম ফগৎনবা হোৎনরে।
ইকায়খুম্নরবা সভাপতি,
চহি ১০ অসিদা, ঐখোয়না কংগ্রেস সরকারদগী হেন্না ফৌ অমসুং গেহুগী মমল শরুক ২.৫ হেন্না লৌমীশিংদা ফংহল্লে অমসুং মথং চহি ৫ দা মসিগী মমল হেনগৎপা অসি লেপহনবা ঐখোয়না পামদে, ঐখোয়না অনৌবা হিরমশিং থিজিনবা অমসুং খুদোংচাদবশিং কোকহনবা পাম্মী। মরম অদুনা সভাপতি জি, ঐখোয়না মালেমদা খ্বাইদগী চাউবা মহৈ-মরোং লীদুনা থম্নবা খোঙজং পায়খৎলে অমসুং লাখ কয়ানা খুজিং ওইদুনা চীঞ্জাক লীদুনা থম্নবা থবকশিং পায়খৎপা হৌরে। উহৈশিং অমসুং মনা-মশিং অসি অসিগুম্বা হিরম অমা ওইরি, মাইকৈ অসিদা লৌমীশিংনা থবক পায়খৎপা ঐখোয়না পাম্মী অমসুং মখোয় লীদুনা থম্নবা অপুনবা ইনফ্রাস্ত্রকচর অমা শেমগৎনবা ঐখোয় থবক পায়খৎলি।
ইকায়খুম্নরবা সভাপতি,
সবকা সাথ, সবকা বিকাসকী লাইৱাগা লোয়ননা ঐখোয়না ভারত চাউখৎপা থবক পাকথোক-চাউথোকহল্লি। লৈবাক অসিগী মীচম মীয়াম মগুন লৈবা পুন্সি মহিং অমা ফংহনবা হায়বসি ঐখোয়গী মরুওইবনি। নিংতম্লবা মতুং চহি কয়া মখোয়গী অৱাৎ-অপা হংবীদবা মীওইশিং, ঙসি ঐখোয়গী সরকারনা মখোয়গী অৱাৎপশিং হংলে অমসুং মখোয় লাৎলে। দিবয়াংজন ইনাওশিং অমসুং ইচলশিং ইকায়খুম্নবা পুন্সি অমদা হিংনবা অমসুং অতোপ্পা মীওইশিংগী মখা পোনবা হন্থহন্নবা মিসনগী ম ওংদা মখোয়গী খুদোংচাদবশিং খঙদোক্তুনা মাইক্রো লেবেলদা মখোয়গী অৱাবশিং কোকহন্নবা থবকশিং ঐখোয়না পায়খৎলে। মাইকৈ অসিদা ঐখোয় থবক পায়খৎলে।
ইকায়খুম্নরবা সভাপতি,
ত্রান্সজেন্দরশিং অসি মরম অমা নত্ত্রগা মরম অমদগী ঐখোয়গী খুন্নাইনা মীরাইবীরবা কাংলুপনি। ঐখোয়গী সরকারনা ত্রান্সজেন্দর মীওইশিংগী আইনশিং শেম্লে অমসুং নোংচুপলোমগী লৈবাকশিংনা মসি তাবা মতমদা, ভারত অশুক্কী মতিক চাউখৎলে হায়না মখোয়না চাউথোকচবা ফাওখি। মসিদা ভারতনা চাউথোকচরি। মখোয়গী জাতিগী ঈচেলদা পুরক্নবা ঐখোয়না হোৎনরি। ঐখোয়গী সরকারনা ত্রান্সজেন্দর মীওইশিংদা পদ্ম মনা ফাওবা পীদুনা মখোয়দা খুদোংচাবা কয়া পীরি।
ইকায়খুম্নরবা সভাপতি,
ঐখোয়গী নোমেদিক ত্রাইবেলশিং, সেমি-নোমেদিক ত্রাইবেলশিং অমসুং ঐখোয়গী বঞ্জারা ফুরুপকী তোখায়বা ৱেলফিয়ার বোর্দ শেম্লে অমসুংমসিনা মখোয়গী দরকার ওইবশিং ফংহনবা ঙমগনি অমসুং মখোয় তুংকোইনা চৎনবা য়াবা, অশোই-অঙাম থোক্তবা অমসুং অফবা পুন্সি মহিং অমগী মাইকৈদা পুরক্নবা ঐখোয়না থবক পায়খৎলি।
ইকায়খুম্নরবা সভাপতি,
ঐখোয়না পার্তিকুলারলি ভুলনেরেবল ত্রাইবেল গ্রুপ(পি ভি তি জি) হায়বা ৱাহৈ অমা লেপ্তনা তাদুনা লাক্লি। মখোয় ঐখোয়গী ত্রাইবেলশিংগী মনুংদা খ্বাইদগী শোৎথরবা কাংলুপনি অমসুং নিংতম্লবা মতুংদা চহি কয়া ফাওবদা, মখোয় কমদৌনা হিংলি হায়বা কনা অমতনা য়েংশিন্দ্রি। মচোই মচোই তারবা ফুরুপ অসিগীদমক ঐখোয়না পি.এম জন্মন য়োজনাগী মখাদা লুপা করোর লিশিং ৩৪ কাইথোক্লে। মখোয় মশিং য়ামদে, মখোয়দা ভোৎকী শক্তি লৈতে, অদুবু খুন্নাইগী অসিগুম্বা তোল্লবা কাংলুপ অসিগী মতাংদা কনা অমতা ৱাখিদে। ঐখোয়না মখোয়গীদমক ৱাবীখি। ঐখোয়না ভোৎকী রাজনিতি তৌদে। ঐখোয়না চাউখৎপগী রাজনিতি তৌরি।
ইকায়খুম্নরবা সভাপতি,
ঐখোয়গী লৈবাক্তা, মহৌশাদগী হৌনা খুৎশা হৈজরক্লবা ইমুংশিংনা ভারতকী চাউখৎপগী চাউখৎপগী খোঙচত্তা মরুওইবা থৌদাং অমা লৌদুনা লাক্লি। খুন্নাইগী দরকার ওইবশিং ফংহল্লিবা ঐখোয়গী বিশ্বকর্মা কাংবু অসিগী অৱাৎপশিং য়েংশিন্দনা লাক্লি। লুপা করোর লিশিং ১৩গী শেনফম অমা কাইথোক্তুনা শীনফম ওইনা থবক তৌনবা অমসুং স্কিল হেনগৎহন্নবা বিশ্বকর্মা ফুরুপকী মীওইশিং মতমগা চুনবা মওংদা শেমগৎনবা থবক পায়খৎলে।
ইকায়খুম্নরবা সভাপতি,
লায়রবশিংগী মিংদা বেঙ্কশিং নেসনেলাইজ তৌখি, অদুবু ঐগী লায়রবা লম্বী নাকলদা পোৎ-চৈ য়োল্লিবশিং বেঙ্কগী থোংজিল লেপ্না থৌনা লৈখিদে। লৈবাক অসিদা অহানবা ওইনা, লম্বী নাকলদা পোৎ-চৈ য়োল্লিবশিং য়াইফনবা প্রধান মন্ত্রী শ্বানিধি য়োজনা পায়খৎলে। ঙসি মখোয় শেন্দোয়গী অৱাবা কোক্লে অমসুং মখোয়না কন্না হোৎনবা অমসুং পুকচেল শেংবদগী লম্বী নাকলদা পোৎ-চৈ য়োল্লিবশিং বেঙ্কশিংদগী লোনশিং ফংলে। বেঙ্কশিংশু হরাওরে, শেন পুরিবশিংশু হরাওরে অমসুং ঙরাং লম্বী মতাইদা পোৎ য়োল্লম্বশিং ঙসি অপীকপা দুকান অমা শাবা ঙম্বগী থাক য়ৌরক্লে। মখোয় মশামক হিংনবা থবক শুরম্বা মীওইশিং হৌজিক মীওই অমা নত্ত্রগা মীওই অনি থবক পীবা ঙম্লে অমসুং মসিনা মরম ওইদুনা লায়রবা, দিলিত, তোল্লবশিং, ত্রাইবেল, নুপীশিং ওইগেরা মখোয়না ঐখোয়গী মতেং পাংলি।
ইকায়খুম্নরবা সভাপতি,
ঐখোয়না নুপীশিংনা লমজিংদুনা চাউখৎপগী মতাংদা ৱারি শান্নরি। মালেমগী চাউখৎলবা লৈবাকশিং ফাওবনা, নুপীশিংনা লমজিংদুনা চাউখৎপা অসি য়ানরি। অদুবু ঐখোয়না নুপীশিংনা লমজিংদুনা চাউখৎপগী মতাংদা খন্নরকপা মতমদা, মখোয় হরাওবা ঙমখিদে। অসিগুম্বা মতম অসিদা, ভারতনা থম্মোয় শেংনা নুপীশিংনা লমজিংবা চাউখৎপগী মতাংদা থবক কয়া পায়খৎলে। মসি শুপ্নগী শ্লোগানশিং খক নত্তে অমসুং নুপীশিংদা শক্তি পীবগী কান্নবশিং ঙসি উবা ফংলে। মসি হিরম খুদিংমক্তা উবা ফংলে অমসুং ভারতকী চাউখৎপগী খোঙচত্তা মতেং পাংলি।
ঙরাং খন্নবদা নুপীশিংগী হকশেলগী মতাংদা মহাক্না ৱাফম কয়া পুখৎলকপগীদমক ঐনা এম.পি সুধা মুর্তি জিগী মফমদা ঐগী তৌবীমল খঙবা উৎচরি। মহাক্না নুপীশিংগী হকশেলগী মতাংদা মরীক চুম্না হায়খ্রে অমসুং মসি অচৌবা অমসুং মরুওইবা অমনি। ইমুং অমদা মমা অসি য়াম্না মরুওই। ঐখোয়না নুপীশিংগী হকশেল, সেনিতসন, নুংঙাইনা হিংনবা হিরম অসিদা চহি ১০ থবক কয়া পায়খৎতুনা লাক্লি।
ইকায়খুম্নরবা সভাপতি,
ঐখোয়গী লৈবাক অসিগী ইমাশিং অমসুং ইচলশিংদা তোইলেতশিং, সেনিতরি পেদশিং, গ্যস কন্নেক্সন, মীরোল্লিঙৈদা তিকা থাবগী কান্নবা কয়া পীরি।
ইকায়খুম্নরবা সভাপতি,
হকশেলগা লোয়ননা, নুপীশিং মনিংতম্লে, মাইকৈ অসিদা ঐখোয় মখা তানা থবকশিং পায়খৎলি। হৌখিবা চহি ১০ অসিদা শাখিবা য়ুমশিংগী মপু অয়াম্বা নুপীশিংনা ওইরে। বেঙ্ক একাউন্তশিং হাংদোক্তুনা, মুদ্রা য়োজনা অমসুং সুকন্যা সমরিধি য়োজনাগী মখাদা নুপীশিংদা শেন-থুমগী ৱারেপশিং লৌনবা থৌদাং শীন্নরে অমসুং মখোয়গী ইমুং-মনুংগী ৱারেপশিং লৌবদা শরুক য়াবা হৌরক্লে।
ইকায়খুম্নরবা সভাপতি,
নুপী করোর ১ রোম সেল্ফ হেল্প গ্রুপশিংদা থবক তৌরি, মসিনা মখোয়গী থাজবা হেনগৎহল্লে, মখোয়গী শেন্থোকশু হেনগৎলে। মখোয়না অপীকপা খুঙ্গংশিংদা পুন্না ললোন-ইতিক পাংথোকখি। খুঞ্জাশিংনা মখোয়দা য়েংবা ফাওবা য়েংখিদে। ঙসিদি, ঐনা চাউথোকনা হায়রি মদুদি মখোয়গী মরক্তগী ইচল করোর ১ লাখপতি ওইরে। ঐখোয়গী সরকারগী মতম অসিদা লাখপতি দিদি করোর ৩ পুথোক্নবা মাইকৈদা থবক পায়খৎলে।
ইকায়খুম্নরবা সভাপতি,
ঐখোয়গী নুপীশিংনা হিরম খুদিং লুচিংনবা সরকারনা থবক পায়খৎলে। অনৌবা তেক্নোলোজি লাকপা মতমদা মদু নুপীশিংদা ইকোন কোন্না ফংলি। অনৌবা তেক্নোলোজিগী অহানবা খুদোংচাবশিং ঐখোয়গী নুপীশিংগী মখুত্তা য়ৌহনবা হায়বসি ঐখোয়গী থবক্নি। ঙসি নুপীশিংনা মাংজিল থাদুনা ঐখোয়গী খুঙ্গংশিংদা নমো দ্রোন দিদি অভিয়ান মাইপাক্না পায়খৎলে। ঙসি তেক্নোলোজি অসিগী মখাদা খুঙ্গংদা লৌমীশিংগী মতেং পাংলে। দ্রোন পাইরিবা নুপীশিংগা ঐগা ৱারি শান্নরে। মসিগী থবক অসি মখোয়গী পুন্সিগী থাক ৱাংখৎহন্নবা অচৌবা শাফু অমা ওইরে।
ইকায়খুম্নরবা সভাপতি,
লৈবাক অসিগী মরুওইবা ৱাফমশিং, মরুওইনা নুপীশিংনা খুদোংচাদবা থেংনরিবা ৱাফমশিংদা রাজনিতি তৌবা হায়বসি লৈবাক অসিগী ওইনা লাইবক থিবা অমনি। মসি নুপীশিংগী মায়োক্তা চৎথবা মীওৎ-মীনৈগী মথক্তা ওপোজিসন্না য়েংবা অখন্নবা মীৎয়েংনি। মসিগী তোপ-তোপ্পা মীৎয়েং অসি য়াম্না নুঙনাংনিঙাইনি।
ইকায়খুম্নরবা সভাপতি,
ঐনা অদোমগী খুৎথাংদা লৈবাক অসিদা হায়নিংলি, ঐ রাজ্য অমতগী মায়োক্তা ঙাংবা নত্তে, ঐ রাজনিতি দল অমতগী মথক্তা ঙাংবা নত্তে। ঐনা নুমিৎ খরগী মমাংদা, সোসিএল মেদিয়াদা বেঙ্গলগী ফোতো খর উখি। লম্বীদা নুপী অমা লম্বীদা মীয়াম মমাংদা ফুখি, ইচল অদু লাউখি অদুবু ময়া নকপদা লৈবা মীওই অমতা মহাক্কী মতেং পাংখিদে। মীয়াম ভিদিও নম্ননবা হোৎনবদা থবক চিনখি। সন্দেসখালিদা থোকখিবা থৌদোকশিংগী শক্তমশিংনা অকিবা ফাওহনখি। অদুবু ঐনা ঙরাংদগী মতিক চারবা লুচিংবশিংদগী থৌদোক অসিগী মতাংদা মখোয়গী ওইবা ৱাহশিং তাখিদে। কয়াদা ইকায়নিঙাই ওইরবা শক্তমনো? মখোয় মশামক নুপীশিংগী অচৌবা লুচিংবনি হায়না খঞ্জবশিং ৱা অমতা ঙাংখিদে। মরমদি মখোয়গী রাজনিতিগী পুন্সি অদু দল খর নত্ত্রগা রাজ্য অদুগা মরী লৈনরি অমসুং মরম অদুনা নুপীশিংনা অৱানা তারবা মতমদা অদোম তুমিন্না লৈথোক্লি।
ইকায়খুম্নরবা সভাপতি,
লৈবাক অসিনা অৱাবা তারবা মতমদা, ঐখোয়গী ইমাশিং অমসুং ইচলশিংনা হেন্না অৱাবা নংলবা মতমদা, অসিগুম্বা থবকশিং অহল ওইরবা লুচিংবশিংনা মীরাইবগী মওং অসি ঐ খঙই। কাংলুপ খর খক্তগী ওইনা রাজনিতি তৌবা অসি য়াম্না নুঙনাংনিঙাই ওইবা ৱাফম অমনি অমসুং মসিদা মখোয়গী রাজনিতিগী চন্নফম লৈতে।
ইকায়খুম্নরবা সভাপতি,
অহুমলকশুবা ওইনা এবসোলুত মেজোরিতিগী তংদু-লৈতাবা সরকার অমা খন্দুনা ভারতকী মীয়াম্না লৈবাক অসিদা মরা চেৎপা অমসুং মখা চৎথবা সরকার অমা লৈহল্লে। হন্দক্কী মীখল অসিগী ফল অসিনা মালেম অসি অঙকপা পোকহনখ্রে। মীখলগী ফলশিং অসিনা মরম ওইদুনা, ভারত অসি মালেম শীনবা থুংনগী ইনভেস্তরশিংনা শেন থাদবা পাম্বা মফম অমা ওইরে। করিগুম্বা অমসুং অদুবু হায়বা মতম অদু হৌখ্রে। ভারত্তা মপান লৈবাকশিংদগী শেন থাদরকপা অসিনা ভারতকী নহারোলশিংদা অনৌবা থবক ফংহল্লগনি। মসিনা ভারতকী নহারোলশিংগী হৈথোই-শিংথোইবা মালেমগী থাক্তা মশক তাক্নবা খুদোংচাবা অমা পীরে।
ইকায়খুম্নরবা সভাপতি,
ভারতকী মাইপাকপা অসিনা মালেমগী ইকোনোমিশিংদা মান্নবা থিরিবা লৈবাকশিংদা অনৌবা থাজবা অমা পীরে। ঙসিগী মালেম অসি পুকচেল তিংনা থবক তৌবগী মখা পোল্লে। হিরম অসিদা ভারত মাংজিল থাবা লৈবাক অমা ওইরে।
ইকায়খুম্নরবা সভাপতি,
মীখল অসিগী ফলদগী, কেপিতেল মার্কেত ফিবম ফগৎলকপা উরে। মালেমগী ওইনা হরাওবা অমসুং নুংঙাইবগী শক্তম অমা লৈরে। মসি ঐ ইশানা থেংনবা অদুনি। অদুবু ঐখোয়গী কংগ্রেসকী মীয়াম অসুক্কী মতিক হরাওরে। হরাওবা অসিগী মরম ঐ খঙদে। মসিদা ৱাহং কয়া হংলি। অহুমলকশুবা ওইনা মাইথিবগী হরাওবা ফোঙদোক্লিবরা? অতোপ্পা মাইথিবা অমা নংবগী হরাওবা ফোঙদোক্লিবরা?
ইকায়খুম্নরবা সভাপতি,
খারগে জি মপুংফানা হরাওবা ঐ উরে। অদুবু খারগে জি মহাক্কী দলগীদমক অচৌবা থবক অমা পাংথোক্লে। অসিগুম্বা ফিবম অমা লাকপা মতমদা কংগ্রেসনা দিলিতশিং অমসুং তোল্লবশিংদা অৱাবা পুহল্লে অমসুং ইমুং-মনুং অসিনা নান্থোক্লে। মসিশু উবা ফংলে। হৌজিক লোক সভাদা স্পিকরগী মীখলগী মতাংদা মরৈ য়েৎনবা অমা অদোম্না উরে। মাইথিবা হায়বসি শোইদ্রবনি, অদুবু মহাক্না দিলিত অমগী অচৌবা নমথাক অমা তৌখি। মহাক মাইথিরগনি হায়বা খঙলবশু মহাক মশামক চোঙথোরকখি। ২০২২দা উপ-রাস্ত্রপতিগী মীখল পাংথোকখি,মহাক্না উপ-রাস্ত্রপতিগী ফমগীদমক সুসিল কুমার সিন্দে জি থাদোরকখি। মহাক মাইথিখি, দলিতশিং মাইথিখি, মখোয়দা করি অমতা মাঙজখিদে। ২০১৭দা মাইথিরগনি খঙলবা মতমদা, মখোয়না মীরা কুমার মাইথিবা নঙহনখি। কংগ্রেসতা এস.সি.এস.তি অমসুং ও.বি.সিগী মায়োক্তা লৈবগী ৱাখল অমা চেল্লি। মসিনা মরম ওইদুআ মহাক্না হান্নগী রাস্ত্রপতি শ্রী রাম নাথ কোবিন্দ ইকায়বা পীখীবনি। মসিগী ৱাখল অসি লৈবদগী, মহাক্না ইকায়বা পীবা, মরৈ য়েৎপা অমসুং অসিগুম্বা ৱাহৈশিং শীজিন্নবদা চিংনবা লৈখিদে।
ইকায়খুম্নরবা সভাপতি,
সংসদ অসি, রাজ্য সভা অসি লৈবাক অসিগী মীয়ামগী কান্নগদবা ৱাফমশিং খন্নগদবা অমসুং মরৈ য়েৎনগদবা মফম অমনি অমসুং মসিগী খন্ন-নৈনবদগী ফংলকপা অদুগী কান্নবা লৌগদবনি। মসি লৈবাক অসিগী খ্বাইদগী চাউবা খন্নফম অমনি হায়না খন্নরি। অদুবু, ঐনা হৌখিবা নুমিৎ নিনি অসিদা অহল ওইরবা লুচিংবা খরগী ৱাহৈশিং তারে, মসিনা ঐ খক নত্তনা লৈবাক শীনবা থুংনা নিংবা কাইহল্লে। লৈবাক অসিগী মীখলগী পুৱারিদা সংবিধান ঙাক-শেন্নবা খন্নখিবা অহানবা মীখলনি হায়না ফোঙদোকখি। ঐখোয়না মখোয়না হায়নিংলি মদুদি, মসিগী অরানবা ৱাফম অসি অদোম মখা তানা হায়গদরা? অদোম ১৯৭৭গী মীখলশিং কাউরবরা, পাউ-চেশিং থিংজিনখি, রেদিওশিং থিংজিনখি, ৱা ঙাংবা লেপহনখি অমসুং চপ মান্নবা ৱাফম অমদা লৈবাক মীয়াম ভোৎ থাদখি। গনতন্ত্র অমুক হিঙ্গৎহন্নবা ভোৎ থাদখি। সংবিধান ঙাক-শেন্নবা মসিদগী হেনবা মালেমদা খ্বাইদগী চাউবা মীখল অমুক্তা থেংনখিদ্রি অমসুং ভারতকী মীয়ামগী শিংলিশিংদা কমদৌনা গনতন্ত্রশিং হিংলিবগে হায়বা ১৯৭৭গী মীখলশিংদা উৎখি। অদোম্না লৈবাক অসি লান্না লমজিংলে। মসি সংবিধান ঙাক-শেন্নবা খ্বাইদগী চাউবা মীখলনি হায়বা ঐ থাজৈ অমসুং মতম অদুনা মীয়াম্না সংবিধান ঙাক-শেন্নবা শক্তি পায়রিবা মীওইশিং মাইথিবা পীখি। করিগুম্বা হন্দক্কী মীখল অসি সংবিধান ঙাক-শেন্নবা পাংথোকপা মীখল অমা ওইরবদি, সংবিধান ঙাক-শেন্নবা লৈবাক মীয়াম্না ঐখোয় খল্লকপা অসি মতিক চাবনি। সংবিধান ঙাক-শেন্নবা মীয়াম্না ঐখোয়দা থাজবা থম্লিবা অসি অচুম্বনি, কনাগুম্বা অমনা সংবিধান ঙাকপা ঙম্লবদি, হায়রিবা মীওইশিং অদুনা মদু পাংথোকপা ঙমগনি অমসুং মদুগী থবক অদু লৈবাক মীয়াম্না ঐখোয়দা শীন্নরে।
ইকায়খুম্নরবা সভাপতি,
খারগে জিনা অসিগুম্বা ৱাফম ফোঙদোরকপা মতমদা, মসি নুংঙাইতবা খরা ফাওই, মরমদি ইমর্জেন্সি মনুংদা, সংধিধান খোঙ্গোইনখি, গনতন্ত্র মাঙহনখি। হায়রিবা দল অদুগী মরুওইবা লুচিংবা অমা ওইনা, মহাক থেংনখি, অদুগা হৌজিক ফাওবা হাওস লান্না লমজিংলি।
ইকায়খুম্নরবা সভাপতি,
মীওই করোর কয়া মীওৎ-মীনৈ মায়োক্নখি। সংসদ মনুংদা থোকখিবা থৌদোকশিংগী রেকোর্দ লৈরি। ভারত সংবিধানগী মরমদা ৱা ঙাংলিবশিংদা ঐনা হংলি, অদোম্না চহি ৭ লোক সভা চলাইবা মতমদা, লোক সভাগী মতম চহি ৫ ওইখি, অদুবু অদোম্না চহি ৭ গী শক্তি পায়খি অমসুং মীয়াম নমথখি। অদুগা ঐখোয়দা গনতন্ত্রগী মরমদা তাক্লি।
ইকায়খুম্নরবা সভাপতি,
হায়রিবা মীওইশিং অসিনা মতম অদুদা সংবিধানগী আর্তিকল কয়াগী ৱাখল্লোন মাঙহন্দুনা ফত্তব থবকশিং পাংথোকখি। সংবিধানগী ৩৮শুবা এমেন্দমেন্ত, ৩৯ এমেন্দমেন্ত অমসুং ৪২ এমেন্দমেন্তশিং পাংথোকখি। মসিগী করিগীদমক্নো? ইমর্জেন্সি মমাংগী সরকারদা চহি ১০ খারগে কেবিনেত মিনিস্তর ওইখি, মদুদা করি থোকখি। প্রধান মন্ত্রী অসি সংবিধানগী ফম অমনি, নেসনেল এদভাইজরি কাউন্সিল(এন এ সি)না প্রধান মন্ত্রীগী ফমগী মথক্তা লৈখি। অদোম্না লৈবাক অসিগী প্রধান মন্ত্রী ফমগী ইকায়খুম্নবা মাঙহনখি। রিমোত-পাইলোত অমা ওইনা মহাক্কী মথক্তা অদোম লৈখি। করম্বা সংবিধান্না অদোমদা অয়াবা পীবগে?
ইকায়খুম্নরবা সভাপতি,
এম.পি অমনা মীয়াম মমাঙদা মন্ত্রীমন্দলগী ৱারেপ অমা শেগাইনবগী হক করম্বা সংবিধান্না পীবগে হায়বা ঐখোয়দা তাকপীয়ু, করম্বা থৌনাদা মসি শেগাইরিবনো।
ইকায়খুম্নরবা সভাপতি,
সংবিধানগী চৎন-কাংলোনশিং কান্থোক্লগা কমদৌনা ইমুং অমদা অহেনবা খুদোংচাবা পীখিবগে হায়বা কনাগুম্বা অমনা ঐঙোন্দা শন্দোক্না তাকপীবা য়াগনি। মীওই অমনা সংবিধানগী ফম অমা পায়রবা মতুংদা, ইমুং অমগী মীওই অমগী মমাঙদা করম্বা সংবিধান্না অদোমগী অথিংবশিং থম্বগে? ঙসি ঐখোয়না সংবিধানগী মরমদা ৱা ঙাংনরি, ঐখোয়না সংবিধান পাইদুনা হাইরি, ঐখোয়না সংবিধান থাগৎলি। মীয়াম্না ইন্দিয়া অসি ইন্দিরানি হায়না লাউখি। সংবিধানগীদমক অদোম্না ইকায়খুম্নবা অমতা উৎখিদে।
ইকায়খুম্নরবা সভাপতি,
ঐনা হকচিন্না হায়রি মদুদি লৈবাক অসিদা অমসুং মসিগী মীয়ামগী ৱাখলদা কংগ্রেস অসি সংবিধানগী খ্বাইদগী চাউবা য়েক্নবনি।
ইকায়খুম্নরবা সভাপতি,
মসিগী খন্ন-নৈনবা মরক অসিদা, মখোয়না চহি ২০০, চহি ৫০০গী মরমদা হায়রি, অদুবু ইমর্জেন্সিগী মতাংদা খন্নরকপা মতমদা, মসি য়াম্না কুইরে, অদোম্না পাংথোকখিবা ফত্তবা থবকশিং অদু কয়া য়াম্না কুইরবগে?
ইকায়খুম্নরবা সভাপতি,
হাওস অসিনা সংবিধানগী মরমদা খন্ননবা হোৎনরি, অদুবু কৈদৌঙৈদা ইমর্জেন্সি লাকহল্লোই, মসি খন্ন-নৈনবদগী ফংলকপা মহৈনি। অদুবু লৈবাক অসিগী মীয়াম, মখোয়গা লোয়নরিবা মীয়াম ইমর্জেন্সিগী অৱাবা মায়োক্নখি। করিগুম্বা মখোয়গী সংবিধানগী কৎথোকপগী ৱাখল্লোন অমা চেল্লম্লবদি,মখোয়না মসি পাংথোক্লোইদবনি।
ইকায়খুম্নরবা সভাপতি,
ইমর্জেন্সি অসি শুপ্নগী রাজনিতিগী ইরাং অমা নত্তে। মসি গনতন্ত্র, সংবিধান অমসুং মীওইবগী অৱাবা অমনি। মীওই কয়া ওৎখি, মীওই কয়া জেলদা শিখি। জয় প্রকাস নরায়ন জিগী ফিবম য়াম্না শোকখি, মহাক জেলদগী থোক্লক্লবা মতুংদা কৈদৌঙৈদা মহাক্কী হকচাংগী ফিবম ফগৎলকখিদে। ৱাফম অসি রাজনিতিৱালাশিং খক্তগী নত্তে, মীচম মীয়াম ফাওবা লেম্না থাখিদে। মখোয়না অশুক য়াম্না নমথখিবা অসিদা, মখোয়গী মীওইশিংশু য়াওরি, মখোয়শু নমথখি।
ইকায়খুম্নরবা সভাপতি,
ময়ুমদগী থোকখিবা মীওইশিং কৈদৌঙৈদা হল্লকখিদবা মতম অমা লৈরমখি অমসুং মখোয়গী হকচাং ফাওবা থিবা ফংখিদে, থৌদোক অদু কদাইদা থোকখিবগে হায়বা খঙখিদে। মহাক্কা লোয়ননরিবা দলশিংনা মাইনোরিতিগী খোঞ্জেলনি হায়না লাউরি অমসুং ইমর্জেন্সি মনুংদা মুজাফরনগর অমসুং তুর্কমেন গেত্তা মাইনোরিতিশিংদা করি থৌদোক থোকখিবগে?
ইকায়খুম্নরবা সভাপতি,
মখোয়না কংগ্রেসতা মরাল অমতা পীখিদে, কমদৌনা লৈবাক অসিনা মখোয় ঙাকপীগনি। অসিগুম্বা দিক্তেতরশিপগী থবক তৌখিবা মীওইশিংনা ঙসি মখোয়গী খুৎতা সংবিধানগী কপি অমা পায়রবা মখোয়গী ফত্তবা থবকশিং লোৎশিন্নবা হোৎনবা অসি ইকায়নিঙাইনি।
ইকায়খুম্নরবা সভাপতি,
মতম অদুদা অপীকপা রাজনিতি দল কয়া লৈখি, মখোয়না ইমর্জেন্সিগী মায়োক্তা লান্থেংনখি অমসুং তপ্না তপ্না মখোয়গী মফম অমা শেমখি। ঙসি মখোয় কংগ্রেসকা চৎমিন্নরি অমসুং কংগ্রেসকী উতাংবীগী মতম অদু লাক্লে হায়না ঙরাং ঐনা লোক সভাদা হায়খ্রে। মহাক মরোমদোম লান্থেংনবা মতমদা, মহাক্কী মাইপাকপগী চাং অসি ইকায়নিঙাইনি অমসুং মহাক্না কনাগুম্বা অমগী লেংজুমদা ফম্নবগী খুদোংচাবা ফংবা মতমদা, মহাক মনিংদগী হৌগৎলক্কনি। ঙসি ফাওবা লৈবাক অসিগী মীয়াম্না মখোয় য়াদ্রি, মখোয় কনাগুম্বা অমগী মখাদা মশক লোৎলগা লৈরি। দল অসিগা চৎমিন্নরিবা দলশিংগী ভোৎ ফংলগা কারকপনা মরম ওইদুনা কংগ্রেস অসি পেরাসাইত অমা ওইরি। মখোয়না লৈবাক অসিগী মীয়ামগী থাজবা ফংবা ঙমদ্রি। মখোয়না জনতা-জনারধনগী মাইপাকপা ঙমদ্রি। মরম অদুনা, শেমজিন-শাজিনবা ৱারিশিং অমসুং ভিদিওশিংনা লৈবাক অসি লান্না লমজিংনবা হোৎনবা অসি হৈনবী অমা ওইরে।
ইকায়খুম্নরবা সভাপতি,
হাওস অসি রাজ্য সভানি। মফম অসিদা চাউখৎ-থৌরাংগী পান্দমশিংগী মরমদা খন্ন-নৈনবা হায়বসি মহৌশানি। অদুবু শেঞ্জা-থুমজাগী মরালশিংনা থল্লবা মীওইশিং, হায়রিবা কংগ্রেসকী মীওইশিংনা শেঞ্জা-থুমজা কনখৎনবা ইহৌ অমা চৎথবা হৌরে, মসি ইকায়খঙদবনি। শেঞ্জা-থুমজাগী চৈরাক ফংলবা মীওইশিং মখোয়গা লোয়ননা ফোতো নম্মীন্নরি। মমাঙদা, হায়রিবা মীওইশিং অসিনা ঐখোয়দা হংখি, ৱা চাউনা ঙাংখি, করিগীদমক শেঞ্জা-থুমজা তৌবা মীওইশিং থবক লৌগৎত্রিবনো হায়না হংখি, অমসুং মীওইশিং অদু জেলদা থাজিলবা হৌরকপা মতমদা, করিগীদমক নহাক্না মীওই কয়া জেলদা থম্লিবনো হায়না মখোয়না লাউবা খোঙবা হৌরকখি।
ইকায়খুম্নরবা সভাপতি,
মফম অসিদা খন্ন-নৈনবা মনুংদা, সেন্ত্রেল ইনভেস্তিগেতিং এজেন্সিশিংদা মরাল শিখি। সরকারনা ইনভেস্তিগেতিং এজেন্সিশিং লান্না শীজিন্নরে হায়না ফোঙদোকখি।
ইকায়খুম্নরবা সভাপতি,
হৌজিক অদোম্না ঐঙোন্দা হায়রি এ.এ.পিগী শেঞ্জা-থুমজা, এ.এ.পিগী লিক্কর স্কাম, এ.এ.পিনা অঙাংশিংগী ক্লাসশিং শাবগী স্কামশিং, এ.এ.পিনা ঈশিংদা তৌরিবা স্কাম, কংগ্রেসনা এ.এ.পিগী মথক্তা ৱাকৎলিবা, এ.এ.পি কোর্ত কাহনবা অমসুং হৌজিক থবক পায়খৎলে। মোদী চৈরে। হৌজিক হায়রিবা মীওইশিং অসি মরুপ ওইরে। প্রেস কনফরেন্স অমা পাংথোক্তুনা লৈবাক মীয়াম মমাঙদা এ.এ.পিগী স্কামশিংগী খুদম কয়া নহাক্না থম্লে হায়না কংগ্রেসনা হায়রি।
ইকায়খুম্নরবা সভাপতি,
অসিগুম্বা ৱাহংশিংগী পাউখুম পীনবা থৌনা মখোয়দা লৈতে হায়বা ঐ খঙই।
ইকায়খুম্নরবা সভাপতি,
হায়রিবা মীওইশিং অসি মমাই অনি লোংবা মীওইশিংনি। লৈবাক অসিগী মীয়ামদা অমুক হন্না নিংশিংবা ঐনা পাম্মী অমসুং কমদৌনা মসিগী অরানবা অসি অমুক হন্না পাংথোকহনগনি। মীওইশিং অসি দিল্লিদা মফম অমদা ফম্লি অমসুং ইনভেস্তিগেতিং এজেন্সিশিংদা মরাল শীরি, শেঞ্জা-থুমজা কন্নবা রেলিশিং চৎলি। কেরলাগী মহাক্কী যুবরাজ, কেরলাগী চীফ মিনিস্তর অমা, মহাক্কী খোঙলোই অসিনা মহাক জেলদা থম্নবা অপীল তৌরি অমসুং চীফ মিনিস্তর অসি জেলদা থম্নবা ভারত সরকারদা হায়রি। হায়রিবা মীওইশিং অসিনা কেরলাগী চীফ মিনিস্তর জেলদা থম্নবা ৱারি শান্নরি। মসিদা মীয়ামগী ৱাখলদা চমম্নবা অমা পোকহল্লে।
ইকায়খুম্নরবা সভাপতি,
ছতিসগরদা, লিক্কর স্কাম অসি কংগ্রেস সরকারগী চীফ মিনিস্তর চেন্নরে, এ.এ.পি পার্তি মেম্বরশিংনা ই.দি, সি.বি.আই জেলদা থম্নবা লাউরি অমসুং মসিগী চীফ মিনিস্তর অসি জেলদা থম্নবা হায়রি, মসি পাংথোক্নবা মখোয়না ফোঙনা ই.দিদা হায়রি।
ইকায়খুম্নরবা সভাপতি,
ঙসি হায়রিবা মীওইশিং অসিনা ইনভেস্তিগেতিং এজেন্সিশিং মিংচৎ থিহল্লি, মখোয়না লাউ-খোংলি। কমদৌনা মমাঙদা ইনভেস্তিগেতিং এজেন্সিশিং লান্না শীজিন্নখিবগে হায়না ঐনা অদোমগী মফমদা হায়বা পাম্মী। ঐ অদোমগী মমাঙদা ৱাফম খর থমজগে। মসিগী ৱারোল অসি অহানবদা ২০১৩দা পীখি, ৱারোল অসি কংগ্রেস থেংনবদা অরাইবা ওইখিদে, মসিনা অদোম জেলদা চঙগনি অমসুং সি.বি.আইনা মসি অমুক পায়খিগনি। সি.বি.আই অমসুং ইনকম তেক্স কিবদগী কংগ্রেস শৌগৎখি। মসিগী ৱাফম অসি কনানা হায়খিবনো? মসিগী ৱাফম অসি লৈখিদ্রবা মুলায়ম সিংহনা ৱারোলনি, কমদৌনা কংগ্রেসনা এজেন্সিশিং লান্না শীজিন্নখিবগে। ঐনা হাওস অসিগী ইকায়খুম্নরবা মেম্বরশিংদা হংনিংই, রামগোপাল য়াওবরা। লুচিংবা অসি অচুম্বা ঙাংবনি।
ইকায়খুম্নরবা সভাপতি,
ঐনা রামগোপাল জিদা হায়নিংই, মহাক্কী ইমুং-মনুংদা হায়বীয়ু, মহাক্না রাজনিতিদা খোঙ থাংজিল্লকপা মতমদা মহাক্কী নেফিয়ু ফানবা কনানা সি.বি.আই শীজিন্নখিবগে হায়বা মহাক খঙই। ইচম চম্না মঙোন্দা নিংশিংবনি, মহাক্না খঙগনি।
ইকায়খুম্নরবা সভাপতি,
২০১৩গী মমাঙদা ঐনা ৱারোল অমা পাখি। রাজনিতি দল কয়াদা রাজনতিগী মনতিকন্নবা কংগ্রেসনা সি.বি.আই শীজিন্নখি। হায়রিবা এজেন্সিশিং অসি কাননা লান্না শীজিন্নখিবগে। অতোপ্পা মরুওইবা ৱারোল অমা ঐনা পাখি অমসুং ৱারোল অদু অদোমগী মফমদা নিংশিংবা ঐ পাম্মী। সি.বি.আই অসি পোন্দা লৈবা মপুগী খোঙজেলদা ৱা ঙাংবা তেনৱা অমনি হায়না ফোঙদোকখি। মসি রাজনিতিৱালা অমগী ৱারোল নত্তে, মসি য়ু.পি.এ সরকার মনুংদা ঐখোয়গী লৈবাক্কী সুপ্রিম কোর্তনা ফোঙদোকখিবা ৱাফমনি। এজেন্সিশিং লান্না শীজিন্নখিবগী অহিংবা খুদমশিং হৌজিক ফাওবা লৈরি।
ইকায়খুম্নরবা সভাপতি,
ঐগী ওইনা শেঞ্জা-থুমজাগী থেংনবা অসি মীখলদা মাইপাকপা নত্ত্রগা মাইথিবদা ওন্দে। মীখলশিং মাইপাক্নবা নত্ত্রগা মাইথিনবা ঐনা শেঞ্জা-থুমজগী মথক্তা থবক পায়খৎপা নত্তে। মসি ঐগী পান্দমনি, মসি ঐগী ৱাশক্নি অমসুং শেঞ্জা-থুমজা অসি লৈবাক অসি চাথোকপা লৈশৌ অমনি হায়না ঐনা থাজৈ। লৈবাক অসি শেঞ্জা-থুমজা লৈতনবা, মীচম মীয়ামগী ৱাখলদা শেঞ্জা-থুমজা পামদবগী ৱাখল্লোন অমা লৈহন্নবা, ঐনা থবক কন্না পায়খৎলি অমসুং মসি অচুম্বা থবক অমনি হায়না ঐনা খল্লি। ২০১৪দা ঐখোয়গী সরকার শেম্বা মতমদা, ঐখোয়না মরুওইবা ৱাফম অনি হায়খি, ঐগী সরকারনা হায়খিবা ৱাফম অমদি লায়রবশিংগী কৎথোকপনি অমসুং অতোপ্পা ৱাফম্না ঐগী সরকারনা শেঞ্জা-থুমজা অমসুং অরোনবা শেল চপখায়গনি হায়বনি। মসি ঐনা ২০১৪দা মীয়াম মমাঙদা হায়খিবনি।
ইকায়খুম্নরবা সভাপতি,
লায়রবশিংগী য়াইফনবা ঐখোয়না মালেমদা খ্বাইদগী চাউবা য়াইফ-থৌরাংগী স্কিম পায়খৎলি। অতোপ্পা অমরোমদা, ঐখোয়না শেঞ্জা-থুমজাগী ময়োক্তা অনৌবা আইনশিং শেম্লে, অনৌবা থবকশিং অমসুং অনৌবা সিস্তেমশিং পায়খৎলে। ঐখোয়না করপসন এক্ত ১৯৮৮ এমেন্দ তৌরে। ঐখোয়না ব্লেক মনিগী মায়োক্তা অনৌবা আইন অমা শেম্লে, ঐখোয়না বেনামি লন-থুমগী মায়োক্তা অনৌবা আইন অমা শেম্লে। হায়রিবা আইনশিং অসিগী মখাদা শেঞ্জা-থুমজা তৌবা ওফিসিএলশিং চৈরাক পীরে। নারোন্দা শেন লৌথোকপা থিংনবা, ঐখোয়না লৈঙাক্কী থবকশিংদা অফবা অহোংবা পুরক্লে। ঐখোয়না দাইরেক্ত বেনিফিত ত্রান্সফর পায়খৎলে। ঐখোয়না দিজিতেল তেক্নোলোজি য়াম্না শীজিন্নরে। ঙসি বেনফিসরি খুদিংমক অচুম্বা থবক অসিগী কান্নবশিং ফংলে। নৌনা শেল লৌথোকপগী থৌদোক লৈত্রে। মসি ঐখোয়না শেঞ্জা-থুমজাগী মায়োক্তা থবক তৌবগী শরুক অমনি। মীচম মীয়াম্না মসিগী থবকশিং অসিগী কান্নবশিং ফংলকপা মতমদা মহাক্না গনতন্ত্রগী থবকশিংদা থাজবা হেনগৎলকই। মহাক সরকার অসি ঐখোয়গীনি হায়না খল্লে অমসুং মীয়াম্না ৱাখল অসি খলবদগী ঐখোয় অহুমশুবা তার্মগী খুদোংচাবা অমা ফংবনি।
ইকায়খুম্নরবা সভাপতি,
ঐনা চিংনবা লৈতনা হায়বা পাম্মী। শেঞ্জা-থুমজা অমসুং শেঞ্জা-থুমজা তৌবা মীওইশিংগী মথক্তা অকনবা থবক পায়খৎনবা ঐনা এজেন্সিশিংদা মনিংতম্বা পীরে হায়না ঐনা লৈবাক অসিগী মীয়ামদা হায়নিংই, সরকারনা কনখৎপগী থবক অমতা তৌরোই। মহাক পুকচেল শেংনা থবক তৌরি হায়বসি ঐগী পাউজেলনি।
ইকায়খুম্নরবা সভাপতি,
ঐনা অমুক হন্না লৈবাক অসিগী মীয়ামদা হায়নিংলি। শেঞ্জা-থুমজা তৌবা মীওই অমতা আইন্দগী নান্থোকপা ঙম্লোই, মসি মোদীগী গরেন্তিনি।
ইকায়খুম্নরবা সভাপতি,
রাস্ত্রপতিনা মহাক্কী ৱারোলদা পেপর লিক ওইবা অসি অচৌবা খুদোংচাদবা অমনি হায়না ফোঙদোকখ্রে। দল খুদিংমক্না মসি দলগী রাজনিতিগী মথক্তা থমগনি হায়না ঐনা থাজৈ। অদুবু লাইবক থিবদি, অসিগুম্বা অরুবা অমসুং মরুওইবা ৱাফম অমদা, ঐগী লৈবাক্কী নহারোলশিংগী তুংলমচৎকা মরী লৈনবা থৌদোক অমদা, মখোয়না রাজনিতি তৌরে, মসিদগী হেন্না লাইবক থিবা করি লৈরিবগে? নহাকপু নমথাক তৌরিবা মীওইশিং অদু সরকারনা লেম্না থারোই হায়না লৈবাক অসিগী নহারোলশিংদা ঐনা থাজবা পীরি। ঐগী লৈবাক্কী নহারোলশিংগী তুংগী লাইবক শান্নরবশিং মীওইশিং অকনবা চৈরাক পীনবা অমগী মথংদা অমা থবকশিং পায়খৎলে। অপনবা থোকহল্লিবশিংগী মথক্তা থবক লৌখৎনবা ঐখোয়না সংসদতা অকনবা আইন অমা শেম্লে। ঐগী লৈবাক্কী নহারোলশিংগী তুংলমচৎ চিংনবা ফিবম অমদা লৈহন্দনবা ঐখোয়না থবক খুদিংমক মপাঙ্গল কনখৎহল্লে, মপুংফানা থাজবগা লোয়ননা মখোয়না মখোয়গী থৌনা উৎপা য়াগনি অমসুং মখোয়গী হকশিং ফংগনি। মসিগীদমক ঐখোয়না থবক পায়খৎলি।
ইকায়খুম্নরবা সভাপতি,
মরাল শিবগী চৎনবী অমা লৈরি অমসুং মরাল শিরকপা খরদি থৌদোকশিং মশামক্না পাউখুম পীজরে। হকথেংনবা প্রমানগী দরকার ওইদ্রে। হন্দক জম্মু অমসুং কাস্মিরদা লোক সভা মীখলদা ভোৎ থাদখিবগী মশিং অদুনা হৌখিবা চহি ৪০গী রেকোর্দশিং থুগায়রে। মসি কনাগুম্বা অমনা অয়াবা পীবা খক নত্তে, ভারতকী সংবিধান অয়াবা পীবনি, ভারতকী গনতন্ত্র অয়াবা পীবনি, ভারতকী ইলেক্সন কম্মিসন অয়াবা পীবনি। ইকায়খুম্নরবা সভাপতি, মসি অচৌবা মাইপাকপা অমনি। ইকায়খুম্নরবা সভাপতি, লৈবাক্কী মীয়াম্না ঙাইরকপা তাঞ্জা অদু হৌজিক অচম্বা মওং অমদা মাঙদা উরে। হৌখিবা চহি কয়া বন্দশিং, স্ত্রাইকশিং, কিহনবশিং অমসুং বোম্ব পোকখায়বগী থৌদোকশিংনা গনতন্ত্র মকশিনহনখি। ঙসিদি মীয়াম্না সংবিধান্দা থাজবা থম্লে। মসিগীদমক ঐনা জম্মু অমসুং কাস্মিরগী মীয়াম অখন্নবা ওইনা থাগৎচরি।
ইকায়খুম্নরবা সভাপতি,
ঐখোয়না জম্মু অমসুং কাস্মিরদা তেরোরিজমগী মায়োক্তা থেংনরিবা অসি অরোইবা তাঙ্কক য়ৌরক্লকে। লেমহৌরিবা তেরর নেতৱার্ক মরু ফংনা মুৎথৎনবা মপুংফাবা লাল্লোং অমগা লোয়ননা ঐখোয় মাঙলোমদা চঙশিল্লি। মমাঙগা চাংদম্নবদা হৌখিবা চহি ১০দা তেরোরিস্তশিংগী থৌদোকশিং অঙকপা ফংনা হন্থরে। হৌজিক নুঙনা থাবগী থৌদোকশিং মফম অয়াম্বদা পাক্না তাবা ফংদ্রে। হৌজিক জম্মু অমসুং কাস্মিরদা তেরর অমসুং তোখায় তাবগী থবক লোইশিল্লে। জম্মু অমসুং কাস্মিরগী মীয়াম্না ঐখোয়গী মতেং পাংলে, লানফম অসিদা ঐখোয়গী লম্বী তাক্লে, মসি খ্বাইদগী থাজবা অমা শেমগৎপনি। ঙসিদি রাজ্য অসিদা তুরিজমগী অনৌবা রেকোর্দশিং থম্লে অমসুং শেন থাদবা হেনগৎলক্লে।
ইকায়খুম্নরবা সভাপতি,
ঙসি অৱাং-নোংপোক্কী মতাংদা ৱাহং হংলিবশিংনা অৱাং-নোংপোক মথন্থ থাদোক্লমখি। মখোয়না মীখলগী মশিং পাবদা অৱাং-নোংপোক অসি চপ মান্নবা লোক সভাগী সিত মশিং লৈখি। মসিনা রাজনিতিদা খেন্নবা অমা পুরকপা ঙম্বরা? কৈদৌঙৈদা থওইখিদে। মহাক মথন্থগী মরাইক ওইহঞ্জখি। ঙসিদি অৱাং-নোংপোক লৈবাক অসিগী চাউখৎপগী ইঞ্জিন অমা ওইহন্নবা ঐখোয়না অকনবা থবক পায়খৎলে। অৱাং-নোংপোক অসি নোংপোক এসিয়াগী ত্রেন, তুরিজম অমসুং নাতকী মরীশিংগী থোঙ্গাল অমা ওইরক্লি। হায়রিবা থবকশিং অদুনা অচৌবা থৌদাং অমা লৌরে। ঐখোয়না মসি য়াগদবনি।
ইকায়খুম্নরবা সভাপতি,
করিগুম্বা ঐখোয়না হৌখিবা চহি ৫ দা অৱাং-নোংপোক্তা পাংথোকখিবা থবকশিং অদু অরিবা কংগ্রেসকী মতমগা চাংদম্নরবদি, ঐখোয়না চহি ৫দা পাংথোকখিবা থবক অসি করিগুম্বা মখোয়না পাংথোক্লবদি চহি ২০ চঙগনি। মীরোল কয়া হৌখ্রে। ঐখোয়না য়াংনা থবক পায়খৎলি। ঙসিদি অৱাং-নোংপোক্কী লম্বী-থোং অসি লমদম অসি চাউখৎনবা য়ুম্ফমনি। ঐখোয়না মসি মরুওইনা লৌরি অমসুং ঙসিদি ঐখোয়না ইনফ্রাস্ত্রকচরশিং মাংজৌননা শেমগৎলে অমসুং মসি ঐখোয়না উৎলে।
ইকায়খুম্নরবা সভাপতি,
অৱাং-নোংপোক্তা তুংকোইনা শান্তি পুরক্নবা হৌখিবা চহি ১০দা থবক কয়া পায়খৎলে অমসুং মীওই খুদিংমক থাজবা পুরক্নবা লেপ্পা লৈতনা থবক কয়া পায়খৎলি। রাজ্যশিংগী মরক্তা ঙমখৈগী য়ানদবশিংনা মুক্নবা কয়া লাকখি। মসি নিংতম্বা মতমদগী হৌজিক ফাওবা চৎথরকখি। রাজ্যশিংগী মরক্তা ৱারি শান্নদুনা হৌজিক ঐখোয়না ঙমখৈগী য়ানদবশিং অমগী মথংদা অমগী য়ানবা পুরক্লে।
ইকায়খুম্নরবা সভাপতি,
অৱাং-নোংপোক্কীদমক অচৌবা থবক অমা পাংথোক্লে। হৌজিক লালহৌলুপশিংগা য়ানবা পুরক্লে, মখোয়গী খুৎলায়শিং পীশিল্লক্লে। শাথিবা ক্রাইম তৌবা মীওইশিং জেলদা চঙনবা নত্ত্রগা কোর্ত কেস থেংননবা থৌরাং তৌরে। জুদিসিয়ারিদা থাজবা হেনগৎলকপা, সংবিধান্দা থাজবা হেনগৎলকপা, ভারতকী গনতন্ত্রদা থাজবা হেনগৎলকপা, ভারত সরকারগী থবকশিংদা থাজবা হেনগৎলকপা ঙসিদি উরে।
ইকায়খুম্নরবা সভাপতি,
মনিপুরগী মতাংদা, ঐনা হৌখিবা মীফমদা শাংনা ঙাংখ্রে, অদুবু ঙসি ঐ অমুক হন্না ঙাংবা পাম্মী। মনিপুরদা মহৌশাগী ফিবমদা হল্লক্নবা সরকারনা লেপ্তনা হোৎনরি। এফ.আর.আই লিশিং ১১ হেন্না পাল্লে। মনিপুর অপীকপা রাজ্য অমনি। মীওই ৫০০ হেন্না ফারে।
ইকায়খুম্নরবা সভাপতি,
মনিপুরদা হিংশাগী থৌদোকশিং হন্থরক্লে হায়বদা ঐখোয় য়াগদবনি। ঙসিদি মনিপুরগী মফম অয়াম্বদা হান্নগুম কলেজশিং, স্কুলশিং, ওফিসশিং অমসুং অতোপ্পা লোয়শঙশিং হাংদোক্লে। লৈবাক অসিগী অতোপ্পা মফমশিংদা পাংথোকপগুম মনিপুরদশু পরিখাশিং পাংথোক্লে। অঙাংশিং মখোয়গী চাউখৎ-থৌরাংগী থবকশিং মখা চৎথরে।
ইকায়খুম্নরবা সভাপতি,
মীওই খুদিংমক ৱারি শান্নদুনা শান্তি অমসুং নুংশিন্না হিংমিন্নবগী লম্বী অমা শেম্নবা কেন্দ্র অমসুং রাজ্য সরকারশিংনা মখা তানা থবকশিং পায়খৎলি। অপীকপা য়ুনিতশিং অমসুং শরুকশিং শম্নদুনা অপুনবা অমা শেমগৎপা অসি অচৌবা থবক অমনি অমসুং মসি শান্তি ওইনা পাংথোক্লি। মসি মমাঙগী সরকারশিংদা থোকখিদে, হোম মিনিস্তর মশামক মফম অসিদা নুমিৎ কয়ানি লৈখি। হোমগী রাজ্য মন্ত্রী রাজ্য অসিদা চয়োল কয়া লৈখি অমসুং কয়ারক হন্না চৎখি অমসুং মরী লৈনবশিং ৱারি শান্নবা হোৎনখি।
ইকায়খুম্নরবা সভাপতি,
হায়রিবা থবকশিং অসি পাংথোক্লিবা সরকারগী সেনিয়র ওফিসিএলশিং মফম অসিদা হকথেংননা চৎখি অমসুং ৱাথোক অসি লোইশিন্নবা পায়খৎপা য়াবা থবক খুদিংমক পায়খৎখি।
ইকায়খুম্নরবা সভাপতি,
হৌজিক মনিপুরদা ঈশিং ইচাউগী অৱাবা মায়োক্নরি অমসুং কেন্দ্র সরকারনা রাজ্য সরকারগী মতেং পাংলি। ঙসি রাজ্য অসিদা এন.দি.আর.এফকী তিম ২ থাখ্রে। মহৌশাগী ওইবা খুদোংথিবশিং থোক্লিবা মতমদা ফাওবা কেন্দ্র অমসুং রাজ্য সরকারনা মনিপুরগীদমক থবক পায়খৎলি। রাজ্য অসিদা মহৌশাগী ফিবমদা পুরক্নবা রাজনিতিগী ৱাফম য়েংদবা থবক তৌবা হায়বসি ঐখোয় পুম্নমক্কী থৌদাংনি।
ইকায়খুম্নরবা সভাপতি,
মনিপুরগী চাক্লিবা মৈ অসিদা থাউ হৈজিন্নবা হোৎনরিবশিং, হায়রিবা থবকশিং অদু লেপ্নবা ঐনা মখোয়গী মফমদা চেকশিনৱা পীরি, মনিপুরগী মীয়াম্না মখোয় য়াদবা মতম অমা শোইদনা লাক্কনি।
ইকায়খুম্নরবা সভাপতি,
মীয়াম্না মনিপুরগী পুৱারি খঙই, মনিপুরগী চাউখৎপা খঙই, মীয়াম্না রাজ্য অসিগী খুন্নাইগী ইহৌগী শাংলবা পুৱারি অমা লৈরিবা অসি খঙই। মরা চেৎনা তারবা ইহৌ অসিগী নুঙগী ৱাখল্লোলশিংগী হৌরকফম কনাগুম্বা অমতনা মীরাইবা য়ারোই। হায়রিবা মরমশিং অসিদগী মনিপুরদা ১০রক রাস্ত্রপতিস সাসন থমখিবা অদু কংগ্রেসগী মীওইশিংনা কাউরোইদবনি। অসিগুম্বা অপীকপা রাজ্য অমদা রাস্ত্রপতি সাসন ১০ রক থমখি। মসি ঐখোয়গী মতমদা থোক্লোই। অদুবু হৌজিক ফাওবা রাজনিতিগী খুদোংচাবশিং লৌনবা রাজ্য অসিদা থবক মখল কয়া পাংথোক্লি।
ইকায়খুম্নরবা সভাপতি,
হাওস অসিদা লৈবাক অসিদা মীয়ামদা ঐনা করিগুম্বা খর হায়নিংই, ১৯৯৩দা মনিপুরদা অসিগুম্বা কাংলুপকী ইরাং অমা থোকখি অমসুং মদু পাকথোক-চাউথোরক্তুনা চহি ৫ চৎথখি। মদুগী পুৱারি অদু খঙদুনা ফিবম অসি হৈশিংনা লাকশিন্নবা ঐখোয়না হোৎনরি। মসিদা মতেং পাংনিংবা মীওইশিং, ঐখোয়না মীওই খুদিংমক্কী মতেং লৌবা পাম্মী। অদুবু মহৌশাগী ফিবম অমসুং শান্তি পুরক্নবা ঐখোয়না কন্না হোৎনরি।
ইকায়খুম্নরবা সভাপতি,
ঐ মফম অসিদা প্রধান মন্ত্রী ওইনা লাক্ত্রিঙৈদা ঐ চীফ মিনিস্তর ওইনা মতম শাংনা থবক তৌরকপা অসি ঐগী লাইবক ফবনি। মসিনা মরম ওইদুনা ঐনা ফেদেরেলিজমগী অফবশিং খঙবা ঙমখি। কোওপরেতিপ ফেদেরেলিজম অমসুং কম্পিতিতিপ কোওপরেতিপ ফেদেরেলিজমগী ৱাখল্লোনশিংগী মরুওইবা অদু ঐনা থম্লি। মরম অসিদগী ঐখোয়না জি-২০ মীফম পাংথোক্লিবনি, ঐখোয়ন মসি দিল্লিদা পাংথোকপা য়াই, য়াম্না চাউনা দিল্লি খক্তদা পাংথোকপা ঙম্মী। অদুবু ঐখোয়না মদু পাংথোকখিদে। ঐখোয়না জি-২০গী মরুওইবা থৌরমশিং লৈবাক অসিগী তোঙান-তোঙানবা রাজ্যশিংদা পাংথোকখি অমসুং রাজ্যশিংদা মালেমগী মীৎয়েং চঙনবা থবকশিং পায়খৎখি। রাজ্য অমা মশক তাক্তুনা, মালেম্না রাজ্য অদুগী তৌবা ঙম্বশিং মশক খঙনবা অমসুং রাজ্য অদুগী চাউখৎপগী খোঙচৎ মশক খঙনবা মাইকৈদা ঐখোয়না থবক তৌখি। মরমদি ফেদেরেলিজমগী অতোপ্পা মওংশিং ঐখোয় খঙই।
ইকায়খুম্নরবা সভাপতি,
ঐখোয়না কোবিদ লান্থেংনবা মতমদা, চীফ মিনিস্তরশিংগা কয়ারক হন্না ৱারি শান্নখিবা অদু নিংতম্লবা ভারতকী পুৱারিদা থোক্লম্লোই।
ইকায়খুম্নরবা সভাপতি,
মসিগী হাওস অসি রাজ্যশিংগা মরী লৈনবা মখলগী হাওস অমনি অমসুং হাওস অসিদা রাজ্যশিংগী চাউখৎ-থৌরাংগী মরুওইবা হিরম খর খন্নবা চুনৈ হায়না ঐনা খল্লি। ঐনা পাউতাক খরা পীবা পাম্মী। রাজ্য খুদিংমক মখোয়গী থৌশিলশিং শেম্বগী অওনবা অমা ঐখোয়না হৌজিক থেংনরে, থৌরাংশিং অদু সেমিকন্দক্তরশিং অমসুং ইলেক্ত্রোনিক্স মেনুফেকচরিংগুম্বা সেক্তরশিংদা মরুওইবা মীৎয়েং চঙগদবনি। রাজ্যশিংগী মরক্তা চাউখৎ-থৌরাংগী চাংদম্নবা ঐ পাম্মী। চাংদম্নবশিংগী মনুংদা শেন থাদরক্নবা থৌশিলশিং য়াওহনগদবনি অমসুং মদু অফবা লৈঙাক অমসুং নাখৈ শেংবা থৌশিলশিংগী খুৎথাংদা পাংথোক্কদবনি।
ঙসি মালেম অসিনা ভারতকী থোংজিলদা থিল্লরবা মতম অসিদা রাজ্য খুদিংমক্কী খুদোংচাবা লৈ হায়বসি ঐগী অচেৎপা থাজবনি। রাজ্যশিংগা মরী লৈনবা হাওস অমা ওইনা, অদোম মাঙলোমদা থোক্লক্নবা অমসুং চাউখৎপগী খোঙচৎ অসিগী খুদোংচাবা লৌনবা ঐনা অদোমগী মফমদা হায়জরি।
রাজ্যশিংগী মরক্ত থবক ফংহনবগী মতাংদা করিগীদমক চাংদম্নরোইদৌরিবনো? ঐখোয়গী রাজ্যশিংগী থৌশিলদগী রাজ্য অদুগী নহারোলশিং থবক ফংগনি, মতম অদুদা অতোপ্পা রাজ্যশিংনা হায়গনি, ঐনা অদোমগী থৌশিল অদুদা অতোপ্পা অমা হাপচিল্লে, মরম অদুনা ঐ কান্নবা ফংলে। মসিনা লৈবাক অসিগী নহারোলশিংগী মরাইবক্তা অচৌবা অহোংবা অমা পুরক্কনি হায়না ঐনা খল্লি।
হৌজিক, নোর্থ অসামদা সেমিকন্দক্তরশিংগী থবক য়াংনা পায়খৎলে। মসিনা অসাম, অৱাং-নোংপোক অমসুং লৈবাক্কী নহারোলশিংদা কান্নবা পীগনি।
ইকায়খুম্নরবা সভাপতি,
য়ু.এন্না ২০২৩ অসি মিল্লেতশিংগী চহি ওইনা লাউথোকখি। মিল্লেতশিং অসি ভারতকী থৌনানি অমসুং ঐখোয়গী লায়রবা লৌমীশিংগী থৌনানি। ঈশিং য়াম্না লৈতবা মফম, ইথৈ-লৌখোঙগী খুদোংচাবা লৈতবা মফমদা, মিল্লেতশিং অসি য়াম্না ফবা চীঞ্জাক্নি। অদোমগী রাজ্যগী মিল্লেতশিং মালেমগী কৈথেলশিংদা য়ৌহন্নবা থৌরাং তৌগদবনি। থবক অসিদগী ভারতকী মিল্লেতশিং মালেমগী তেবল খুদিংমক্ত য়ৌগনি। মালেমগী লৈবাকশিংগী দাইনিং তেবলদগী শেন তান্নবগী খুদোংচাবা অমা ফংগনি অমসুং ভারতকী লৌমীশিং কান্নবা ফংগনি। ভারতকী লৌমীশিং নুংঙাই-য়াইফনবা অনৌবা থোংশিং হাংদোকপা য়াই। রাজ্যশিংদা মসিদা শরুক য়ানবা ঐনা তকশিল্লি।
ইকায়খুম্নরবা সভাপতি,
মালেমগী মচি ওইবা চীঞ্জাক্কী কৈথেলদা ঐখোয়গী লৈবাক্কী মিল্লেতশিং অসি পাম্বৈ অমনি। মসি য়াম্না কান্নবা চীঞ্জাক্নি। মচি ওইবা চীঞ্জাক্কী খন্নরকপা মতমদা, ঐখোয়গী মিল্লেতনা অচৌবা থবক অমা পাংথোকপা ঙমগনি। ঐখোয়গী রাজ্যশিং থবক পায়খৎলসি, মসি মশক খঙদোকসি, হকশেলগী ওইনা মালেমগী থাক্তা ঐখোয় চঙশিনসি।
ইকায়খুম্নরবা সভাপতি,
২১শুবা চহিচাদা, লাইনা হিংবা হায়বসি ফংফম থোকপা হক অমনি। মীচম মীয়াম লাইনা হিংবগী হকশিং ফংনবা রাজ্য সরকারশিংনা মখোয়গী ওইবা থৌশিলশিং, নিয়মশিং অমসুং চৎন-কাংলোনশিং শেম্বা ঐনা পাম্মী। করিগুম্বা পাউজেল অসি হাওস অসিদগী রাজ্যশিংদা য়ৌরবদি, মসি লৈবাক্কী ওইনা কান্নগনি।
ইকায়খুম্নরবা সভাপতি,
ঐখোয়না শেঞ্জা-থুমজাগী মায়োক্তা পায়খৎলিবা থবকশিং অসি থাক কয়াদা চৎথরি। মরম অদুনা, মসি পঞ্চায়ত ওইগেরা, ম্যুনিসিপাল কোর্পোরেসন, মেত্রোপোলিতান ম্যুনিসিপালিতি, তেহসিল পঞ্চায়ত, জিলা পরিষদ ওইগেরা, হায়রিবা বোদিশিং অসিগী পান্দম চপ মান্নৈ। করিগুম্বা ঐখোয়না লৈবাক অসিদগী শেঞ্জা-থুমজা মুৎথৎপা মতমদা, মসিনা লৈবাক অসিগী মীচম মীয়াম য়াম্না কান্নগনি। অদোম্না শেঞ্জা-থুমজা থেংনগদবনি, অদোম্না মসি মুৎথৎপা ঙমগনি।
ইকায়খুম্নরবা সভাপতি,
হৌজিক্কী মতম অসিনা পাম্লিবা অসি থবক ফজনা পাংথোকপা অদুনি, থবক লোইখ্রগা লোইরে হায়বা মতম অদু হৌখ্রে। করিগুম্বা ২১শুবা চহিচা অসি ভারতকী চহিচানি হায়না খুদম পীবা তারবদি, ঐখোয়গী লৈবাক ঙাকপগী থবক মতিক চাহনবা, মীয়ামদা খুদোংচাবশিং ফংহনবগী নমুনা মতিক চাহনবা, ঐখোয়গী ৱারেপ লৌবগী নমুনা মতিক চাহনবা তঙাইফদে। থবক্কী খোঙজেল হেনগৎহনবা, ৱারেপ লৌবগী খোঙজেল হেনগৎহনবদা ঐনা থাজবা থমলি। করিগুম্বা হায়রিবা ফিবম অসিদা থবক পাংথোক্লবদি, অরোন-অথুপ লৈরক্লোই, করিগুম্বা অমসুং অদুবু হায়বা ৱাফমশিং লৈরোই অমসুং মীচম মীয়ামগী হকশিং ঙাক্কনি। মীওই খুদিংমক হিংবদা লাইবা করিনো হায়বদু মশক খঙগনি।
ইকায়খুম্নরবা সভাপতি,
ঐখোয়গী লৈবাক্কী মীয়ামগী পুন্সিদা সরকারনা অয়েৎপা পীবা য়ারিবমখৈ হন্থহনগদবনি হায়বসিদা ঐনা চেৎনা থাজৈ, ঐখোয় মাইকৈ অসিদা থবক তৌগদবনি। নোংমগী পুন্সি অসিদা সরকার, সরকার, সরকার হায়বা মাইকৈ অসিদা চৎলি। হোই, মখোয়গী পুন্সিদা সরকার দরকার ওইবা মীওইশিং, মখোয়গী পুন্সিদা সরকার য়াওদ্রবদি য়াদবা মীওইশিং লৈরি। মখোয়দা শোইদনা সরকারগী মতেং য়ৌহনগদবনি। মখোয়না হোৎনজরগা হেন্না চাউখৎপা পাম্বা লনাই মীওইশিংদা দরকার লৈতবা সরকারগী অপনবা অয়েৎপশিং পীরোইদবনি। মরম অদুনা, য়ারিবমখৈ সরকারনা অপনবা পীবা হন্থহন্নবা খুন্নাই অমসুং সরকারগী ঙাক্লৌ অমা লৈহন্নবা ঐনা রাজ্যশিংদা হায়জরি।
ইকায়খুম্নরবা সভাপতি,
অইং-অশাগী খল হোংলকপদগী, মহৌশাগী ওইবা অমাং-অতা থোকপগী চাং হেনগৎলক্লে। মসি থেংননবা অপুনবা থবক অমা দরকার ওইরে। মহৌশাগী ওইবা অমাং-অতাশিংদগী ঙাকথোক্নবা রাজ্যশিংনা মখোয়গী অমাং-অতা থেংনবা ঙম্বগী শক্তি হেনগৎহনগদবনি। মসিগা চপ মান্ননা মরুওইবনা মীচম মীয়ামদা অফবা থক্নবা ঈশিং অমসুং অনা-লায়য়েংগী খুদোংচাবা ফংহনগদবনি। রাজনিতিগী অচেৎপা ফিরেপশিং উৎথোক্তুনা হায়রিবা তঙাইফদবা থবকশিং অসি ফংহন্নবা রাজ্যশিংনা থৱায় য়াওনা থবক তৌগনি হায়না ঐনা থাজৈ।
ইকায়খুম্নরবা সভাপতি,
চৎলিবা দিকেদ অমসুং চৎলিবা চহিচা অসি ভারতকীনি। অদুবু, খুদোংচাবশিং লাকখিবা, অদুবু ঐখোয় ইশাগী অশোইবশিংদগী ঐখোয়না খুদোংচাবশিং মাংহনবখিবা অদু পুৱারিনা ঐখোয়দা নিংশিংহল্লে। হৌজিক, ঐখোয়না খুদোংচাবশিং নান্থোকহনখিবগী অরানবা অদু অমুক হল্লকহল্লোইদবনি। ঐখোয়না খুদোংচাবশিং থিগদবনি, মখোয় ফাজিনগদবনি অমসুং ঐখোয়গী অপাম্বশিং ফংনবা মখোয় শীজিন্নগদবনি। লৈবাক অসিগী মীওই বিল্লিয়ন ১.৪, লৈবাক অসিদা মালেমদা খ্বাইদগী নহা ওইরিবা অপুনবা মীশিং অসিগা লোয়ননা, হৌজিক্কী মতম অসিদগী হেন্না ফবা ভারতকী মতম লৈত্রে, লম্বী অসিদা চৎকদবনি। চপ মান্নবা মতমদা নিংতম্বা ফংখিবা লৈবাক খর ঐখোয়দগী হেন্না মাংজিল থাখিবা, ঐখোয়না তুংদা লৈহৌবা খুদম ওইনা উরে। ঐখোয়না মসিগী খোঙজেল অসি হোংদোক্কদবনি অমসুং অকনবা ৱাশক অমগা লোয়ননা মাঙলোমদা চঙশিনগদবনি। ১৯৮০গী মতমদা অওনবা পুরকখিবা লৈবাকশিং মতম অদুদগী হৌনা য়াংনা চাউখৎলি। অওনবা পুরকপদা ঐখোয় চিংনরোইদবনি নত্ত্রগা কিরোইদবনি, মখোয় লৌশিনবনা ঐখোয়গী পাঙ্গল হন্থরোই। মদুগী মহুত্তা, শরুক য়াবা অমসুং ৱারেপ লৌবদা শরুক য়াবা হেনগৎহন্দুনা মীচম মীয়াম শক্তি পীরবা মতমদা ঐখোয় মপাঙ্গল কনখৎলক্কনি। হৌবদা ঐখোয় থেংবা য়াই, অদুবু ঐখোয়না ঐখোয়গী চাউখৎপগী খোঙজেল য়াংখৎহনবা য়াই অমসুং ঐখোয়না পাম্লিবশিং ফংগনি।
ইকায়খুম্নরবা সভাপতি,
বিকসিত ভারত অমা ওইনবগী পান্দম অসি লনাই মীওই অমা খক্কী পান্দম নত্তে; মসি মীওই বিল্লিয়ন ১.৪গী পান্দমনি। মসি সরকার অমতগী থবক নত্তে, মসি ঐখোয়গী লৈবাক্কী থাক খুদিংমক্তা লৈরিবা সরকারশিংগী অপুনবা পান্দমনি। অপুনবা পান্দমগা লোয়ননা, হায়রিবা মঙলানশিং অসি ঐখোয়না মঙফাওনবা ঙমগনি হায়না ঐনা চেৎনা থাজৈ।
ইকায়খুম্নরবা সভাপতি,
ঐনা মালেমগী ফম্বাক্তা খন্ন-নৈনবদা, শেন থাদনবা মালেমগী লৈবাকশিংনা খৌরাংবা অদু ঐ খঙলে অমসুং ভারত অসি মখোয়না খ্বাইদগী য়াম্না শেন থাদনিংবা লৈবাক অমা ওইরে। থাদরক্কদবা শেনফমশিং ঐখোয়গী রাজ্যশিংদা য়ৌখিগনি অমসুং মসিগী খুদোংচাবা অসিগী মরুওইবা থোংজিল রাজ্য মশামক্না ওইগনি। করিগুম্বা রাজ্যশিংনা মপুংফানা কান্নবশিং লৌবা ঙম্লবদি, মখোয়শু নুংঙাই-য়াইফগনি হায়বসি ঐগী থাজবনি।
ইকায়খুম্নরবা সভাপতি,
ঐখোয়গী ইকায়খুম্নরবা মেম্বরশিংনা পুখৎলকপা ৱাফমশিং খন্নদুনা ঐনা অপুনবা ওইনা ৱারোল অমা পীরে। মহাক্কী ৱারোল, মহাক্না ঐখোয় লমজিংবা অমসুং ঐখোয়গী লৈবাক্কী মীয়ামদা মহাক্না থমজিবা থাজবা অদুগীদমক ঐনা রাস্ত্রপতি থম্মোয় শেংনা তৌবীমল খঙবা উৎচরি। ঐ ইশাগী মহুৎশীন্দুনা অমসুং হাওস অসিগী মহুৎশীন্দুনা, ঐনা ঐগী ৱারোল লোইশিঞ্জরে। অদোম থাগৎচরি।
