এঙ্কর – ইকায়খুম্নরবা প্রধান মন্ত্রী জী, ইকায়খুম্নরবা মন্ত্রীশিং, দোক্তর পি.তি. উশা। ঙসি পেরিস ওলিম্পিক্সতা শরুক য়াগদবা ঐখোয়গী শান্নরোয় পুম্নমক্না অদোমগা ৱারী শাননবা মফমসিদা লাক্লি। সারগা উনবা পামদুনা লৈরম্বনি। চাউরাক্না মীওই ৯৮ ওন্লাইন্দা শরুক য়ারক্লি মরমদি মখোয় মীরমদা ত্রেনিং চত্থরি, খরনা লৈবাক্কী অতোপ্পা মফমদা ত্রেনিং তৌরি। অদুগা মথঙগী নুমিৎ খরনিসিদা অদোম পুম্নমক পেরিসকীদমক খোঙশাল্লগনি। ঐনা সারগী মফমদা চান্বিদুনা ময়ামগা শকঙ মায়খঙননবা হায়জরি, মখোয়বু পুক্নিং থৌগৎপিনবা হায়জরি। থাগৎচরি সার!
প্রধান মন্ত্রী – ময়াম পুম্নমকপু তরাম্না ওকচরি! অদুগা ওন্লাইন্দা শরুক য়াবিরিবা পুম্নমকপুসু তরাম্না ওকচরি। মরূপশিং, ঐ ঙসিদি ময়ামগী মতম য়াম্না লৌজররোই, মরমদি অদোম চৎনিংবনা লাংতক্নরমগনি অমসুং থোইনিংবগী ৱাখলদা লৈরমগনি। অদোম্না মায় পাক্তুনা হল্লকপদা, তরাম্না ওক্নবগী ৱাখলদা লৈরি। মরম অসিনা শান্ন-খোৎনবগা মরী লৈনবা ঐখোয়গী স্তারশিংগা উননবা, অনৌবা ৱাফম কয়া খঙননবা, মখোয়না হোৎনরিবশিং খঙননবা ঐনা হোৎনদুনতা লৈ। অদুগা লৈঙাক পয়রুবনা শিন-লাংবদা অহোংবা পুরকপা মথৌ তাবা লৈরবা, হোৎনরিবশিং হেনগৎনবা হোৎনগদবা লৈরবদি মায়কৈ অসিদা থবক খরা পায়খৎপনি। ময়াম পুম্নমক্কা হকথেংননা ৱারী ৱাতায় শান্ননবা ঐনা হোৎনদুনতা লৈ মরমদি অহান্বা পাউ তাবা ফংননবনি।
শান্ন-খোৎনবদা লৈবা মচৎ অমদি শান্নরোয়শিং অসি মহৈরোয়গুম্না লৈ। মখোয়না চাংয়েংগী চে থাজিন্বা চৎপগুম্না ইমুং পুম্নমক্তা করিসু পাখৎকনু ঐ রেঙ্ক পুদুনা লাক্কনি হায়। মখোয়নদি চাংয়েংদা করি তৌগনি, করি তৌবা ঙমগনি, পুম্নমক অফবা ওইরক্কদ্রা ওইরক্লোইদ্রা হায়বা খঙই। অসুম্না হেক থোক্লকপগা হৌরকই। ফেনগী মখোল য়াম্না হৌরম্মি। থোঙনাউ হাংদুনা লৈবদা নুংঙাইতবা ফাওরম্মি, ওজানা হঞ্জিন হঞ্জিন ঐগী মায়কৈদা য়েংলক্কনি। অসিগুম্বা মহৈরোয় কয়া অদোমসু উবিরম্লগনি, মখোয়দা মতম পুম্বদা ওইরিবা ফীভমদুদা তাইশিন্নবগী পাম্বৈ অমা হেক্তা লৈ। অসিগুম্বা মীওইশিং অসি মপুন্সিদা কৈদৌঙৈদসু মায় পাকপা ঙমদে, মখোয়না হায়জিন্বদা হৈথোই শিংথোইবদি ওইখিগনি অদুবু মপুন্সিদা খুমাঙ চাওশিন্বদি ঙমদে।
অদুবু ঐনা উবদা, ঐ শান্নরোয় ময়াম অমা খঙই, মখোয়দা ফীভমদা তাইনবগী মচৎ অমত্তা লৈতে। মখোয়না মতম পুম্বদা তেক্নিক অদু ঐঙোন্দা চুনদে। মখোয়না তৌরক্লিবদু ঐদি তৌবা য়াবা মওংনি হায়বা ফাওবা খল্লুদে অসুম্না হায়বা থেংনগনি।
ঐনা হায়জরিবসিগী ৱাহন্থোক্তি মরুপশিং, ঐখোয়না শান্ননবগীদমক চৎপদা, ঐখোয়না ঐখোয়গী খ্বায়দগী ফজবা পর্ফোর্মেন্স পীননবা চৎলি। অদুবু ওলিম্পিক হায়বসি তমশিন্নবগী অচৌবা লম্পাক অমসুনি। খরা অমনা মখোয়গী মশান্নশিং শান্নগনি অমসুং তেলিফোন্দা মীপুম খুদিংদা ঙসি অসুম তৌখ্রে হায়না তমগনি; অমরোমদনা খরনা মশান্না খুদিংমক য়েংবা চৎকনি। ঐখোয়গী লৈবাক্না কমদৌনা শান্নরি, অতোপ্পা লৈবাক্না কমদৌনা শান্নরি হায়বা মপুং ফানা য়েংগনি, মদুবু লৌশিন্নবা হোৎনগনি। অদুগা লাক্লবা মখোয়গী কোচতা তমগনি, ঙাইখো, ঐনা য়েংবদা, মখোয়না অরোয়বা মীৎকুপ্তা মখোয়না অঙকপা অমা তৌখ্রে। ঐঙোন্দসু হায়বিয়ু করি তেক্নিকনো। করিগুম্বদা ভিদিও অদু তরারক হন্না য়েংদুনা মখোয়না কমদৌনা মথক মখা ওন্থোকখিবা য়েংগনি।
হায়বদি তমশিন্নবগী অনিংবগা লোয়ননা থবক তৌবা মীওইশিংদি তম্নবগী তাঞ্জা য়াম্না ফংগনি। ৱাকত্তুনা হিংবা পাম্বা মীওইশিংগীসু তাঞ্জা ৱাত্তে। মালেমগী অফাও-অফাওবা লৈবাকশিংদসু, ফবদগী ফরবা খুদোংচাবশিংগা লোয়য়ননা লাকপা মীওইশিংসি ৱাকৎপা থেংনগনি। অদুগা ঐখোয়গুম্বা লৈবাক্কী মীওইশিংনা চৎপা মতমদদি অৱাবা কয়া মায়োক্নৈ, খুদোংচাদবা কয়া থেংনৈ, অদুবু ৱাখলদদি, মখোয়গী ৱাখলদদি ঐগী লৈবাক ঐগী মচু অহুমগী ফিরালনা লেঙদনা লৈ। মরম অসিনা অৱাবা, খুদোংচাদবশিং নাকন্দা থম্মি। মখোয়না মখোয়গী মিসন্দা পুক্নিং লুপ্তুনা লৈ।
মরম অসিনা মরূপশিং হন্দকসু শান্ন-খোৎনবগী লম্পাক্তা ভারত্না মাগী মমিং ঙান্থোইহন্দুনা লাক্কনি হায়না ঐনা চপ চানা থাজৈ। অহান্বা ওইনা চৎপা, ওলিম্পিক্তা অহান্বা ওইনা শরুক য়ানবা তাঞ্জা ফংবা কনা কনা য়াওই। ফৈ, ইচানুপীশিংগী মশিং য়াম্মি, নুপাশিংসু মশিং য়াম্মি, য়ামবরা?
অহান্বা ওইনা চৎলিবশিংগী পুক্নিংদা করি করি লৈ। অদোম্না করি খল্লি হায়বা ঐ তানিংই। ময়াম মরক্তগী অমা হেক্তা হায়রকউ, হায়রকউনে। অদোম করিগুম্বা খরা হায়নিংবরা? মনিংদগীদো। হায়য়ু হায়য়ু।
শান্নরোয় – ঐ অহান্বা ওইনা ওলিম্পিক্তা শরুক য়াবা চৎপসি য়াম্না নুংঙাই।
প্রধান মন্ত্রী – অদোমগী শক তাকপিয়ু!
শান্নরোয় – ঐ রমিতা জিন্দলনি অদুগগা এয়র রাইফল্স সুতিংদা অহান্বা ওইনা ওলিম্পিক্সতা শরুক য়াবা চৎকদৌরিবনি। মরমসিনা ঐ য়াম্না মথুম মরাং হৌই মরমদি ওলিম্পিক্সতা শরুক য়াননবগী মঙ ঐনা শান্নবা হৌরকপদগী মঙজরকপনি। অদুনা ঐ পুক্নিং মথুম মরাং য়াম্না হৌই অদুগা লৈবাক্কীদমক করিগুম্বা খরা তৌরগা হল্লক্নবগী পুক্নিংসু য়াম্না ৱাংনা লৈ।
প্রধান মন্ত্রী – অদোমগী ত্রেনিং কদায় কদায়দা তৌই?
শান্নরোয় – ঐ হরিয়ানাদগীনি অদুবু ঐগী ত্রেনিংদি চেন্নাইদা তৌই।
প্রধান মন্ত্রী – ইমুংদসু শান্নবা মী লৈবরা নৎত্রগা অদোম্না অহান্বরা?
শান্নরোয় – লৈতে, ঐনা অহান্বনি।
প্রধান মন্ত্রী – ফৈ, হরিয়ানাদদি ইমুং খুদিংদা শান্নরোয় অমমম লৈবনি। ফম্বিরো। অহান্বা ওইনা চৎকদৌরিবা কনা কনা হায়নিংবা লৈ। নুপীমচাশিংদি য়াম্না হায়বা ঙম্মি। পীবিয়ু, পীবিয়ু, মহাক করিগুম্বা খরা হায়নিংই।
শান্নরোয় – সার ঐগী মিং রিতিকা, ঐ হরিয়ানাগী রোহতক্তগীনি। ঐ অহান্বা ওইনা চৎপসিদা য়াম্না নুংঙাই। অদুগা ঐগী পর্ফোর্মেন্স উৎনবা য়াম্না মথুম মরাং হৌই, লৈবাক পুম্বগী মীৎয়েঙ ঐঙোন্দা লৈগনি অদুগী মীপুম খুদিংমক্না ঐগী চাদা ১০০ ফুদোক্তুনা শান্ননবা থৌনিরি।
প্রধান মন্ত্রী – য়াম্নৈ ফৈ! অদুগা হায়বিয়ু, হোয় পীবিয়ু, অদোম চরক চহিংনবা মাল্লি, অদোমগী বোদী লেঙ্কুএজতুনা করিগুম্বা খরা হায়নিংবা মাল্লি।
শান্নরোয় – ঐগী মিং অন্তিম তঙ্গরা কৌই। অদুগা ৫৩ কেজিদা রেস্লিং শান্নবনি। ঐ হৌজিক চহি ১৯ শুরে অমসুং ঐ ওলিক্পিক য়াওবা চৎকনি। হৌজিক ফাওবদা রেস্লিংদা নুপীগী ওলিম্পিক মেদল অমখক ফংখ্রে মদুসু ব্রোঞ্জনি হায়বা খঙবদা ঐ হরাওই। ঐনা মদুদগীসু হেন্বা মেদল পুরকপা পাম্মি।
প্রধান মন্ত্রী – য়াম্নৈ ফৈ! ময়াম মরক্তগী চহি ১৮গী মখা কনা কনা য়াই? চহি ১৮গী মখা। অমা, হা! হায়য়ু।
শান্নরোয় – হাই, ঐ ধিনিথী দেসিঙ্ঘু। ঐ চহি ১৪ শুরে। ঐ কেরলাদগীনি অদুবু মপুং ওইনা কর্নাতকাগী মহুৎ শিন্বনি। ঐ চহিসিদা ভারতকী তীমগী শরুক অমা ওইনা ওলিম্পিক্তা শরুক য়াবা চৎপদা তশেংনা নুংঙাই। অসিগম্বা তীম অসিগী শরুক অমা ওইনা চহিসিদা শরুক য়াবা ফংবা ঐগীদমক্তদি য়াম্না চাউথোকচনিংঙাই অমদি খুদোংচাবা তাঞ্জানি। মসি ঐগী খোঙচৎকী অহৌবনি হায়বা ঐ খঙই অমদি ঐ অমদি ঐখোয় পুম্নমক্কী চৎকদবা খোঙচৎ য়াম্না ৱাৎলি হায়বা ঐ খঙই। ঐখোয় পুম্নমক্না লৈবাকসিবু চাউথোকচবা ফাওহন্বা ঙমগনি হায়না ঐহাক্না থাজৈ অমদি ঐখোয়না চাউনা মায় পাক্তুনা পুন্সি চুপ্পগী ওইবা পান্দমশিংগা লোয়ননা হল্লক্কনি হায়বসু থাজৈ।
প্রধান মন্ত্রী – ময়াম পুম্নমক য়াইফবতা ওইরসনু।
শান্নরোয় – থাগৎচরি সার!
প্রধান মন্ত্রী – ফরে, ওলিম্পিক্তা অহুম্লক্তগী হেন্না শরুক য়ারুবা কনা কনা য়াওই। মখোয়দগীসু তাসি। হায়বিয়ু। ঝার্খন্দ কাঙবুদি হায়নিংবা হায়বা য়াবনি।
শান্নরোয় – খুরুমজরি সার, ঐগী মিং দীপিকা কুমারী কৌই। ঐ আর্চরী রিপ্রেজেন্ত তৌবনি অমসুং হন্দক্কী অসিনা ঐগী অহুম্লকশুবা শরুক য়াবনি মসিদা ঐ য়াম্না নুংঙাই। ঐঙোন্দা এক্সিপিরিএন্স য়াম্না লৈরে অমদি হায়রিবা এক্সপিরিএন্স অসি শীজিন্নবা পাম্মি। ইচঙ থৌনা অমদি ইশানা ইশাদা থাজবা থমদুনা শরুক য়াদুনা ঐগী চাদা ২০০ ফুদোকপা পাম্মি। থাগৎচরি সার।
প্রধান মন্ত্রী – ফৈ অহান্বা ওইনা চৎকদৌরিবা অনৌবা শান্নরোয়শিংগী মফমদা, তীমসিদা অহান্বা ওইনা চৎলিবশিংগী মফমদা অদোম্না করি পাউজেল পীনিংই।
শান্নরোয় – সার, ঐনা হায়নিংবদি তশেংবগীসু পুক্নিং মথুম মরাং য়াম্না হৌবনি অদুবু ঐনা মখোয়দা হায়নিংবদি, অরং অরাক ময়ামদুদু পুক্নিং লুপশিনগনু। হেক য়ারিবমখৈ নশাদা মীৎয়েঙ থম্মু অমসুং নুংঙাইথোক্লবসু পুক্নিং চঙনা হোৎনৌ, নশাদা চপ চানা থাজবগা লোয়ননা হোৎনৌ। ঐনা হায়গদবদি মেদলখক্তমক তান্নগনু, নীংথিনা শান্নৌ, মেদলনা ননাক্তা লাক্নবগীদমক ফজনা শান্নৌ।
প্রধান মন্ত্রী – অদোম অহুম্লক হন্না য়াওরুরে। অহান্বা চৎপদা করিগুম্বা খরা তম্লকলমগনি, অদোম্না মদুবু কমদৌনা প্রেক্তিস তৌবদা শীজিন্নখি। অনিসুবা চৎপা মতমদা, অহেন্বা খরসু তম্লক্লমগনি। অদোম্না লৌশিনখিবা অনৌবা মওং মতৌশিং, মদুনা মরম ওইরগা অদোমগী থাজবগী চাং হেনগৎলকখিবা অদোমদা লৈবাক্কীদমক করিগুম্বা খরা তৌবা ঙমগনি হায়না ফাওহনখিবা করি করি লৈ। নৎত্রগা রোতিন প্রেক্তিস তৌবদুখক অদুম তৌবরা। মরমদি ঐনা শুম য়েংবদা, ঐ হায়রো, ঐদি য়োগগুম্বা তৌবা পাম্মি। অদুনা ঐগীদমক্তদি ঐ খঙই। অদুবু ঐনা উবদা রিদম অমা শেম্লকই, চৎপা হৌবগা মদু হৌরকই অমদি খুদক্তা হেক্তা হৌরকই। অদুদগী ঐনা ৱাখল খরা খন্থরগা হায়গনি, ঙসিদি অনিসিমা তোক্লগে, অতোপ্পা অনৌবা অনি তৌগে। অসুম্না মীপুক খুদিংগী হৈনবী লৈ, মখোয়গী অরিবা হৈনবীদুগী মতুং ইন্না থবক তৌই। অদোমগীদি কমদৌই।
শান্নরোয় – সার, অরিবা অফবা হৈনবীশিংদু মখা চত্থৈ অদুগা মমাঙদা ঐখোয়না মেচ অমা মায়থিরবদি মদুদগী ঐখোয়না তমহৌই অমদি প্রেক্তিস তৌবদা অশোয়বদু য়াওদনবা, হঞ্জিন হঞ্জিন তৌদুনা হৈনবী শেমগৎলি। অফবা হৈনবীশিং অদুখক্তমক মখা চত্থনবা ঐখোয়না হোৎনৈ।
প্রধান মন্ত্রী – করিগুম্বদসু ফত্তবা হৈনবীসু হৈনখিবা, হকচাঙগী শরুক ওইখিবসু য়াই।
শান্নরোয় – সার, অদুম্না তৌবসু য়াই। ফত্তবা হৈনবী হৈনখিবা কয়ারক য়াওই। অদুবু ঐখোয়না ইথন্তা ৱারী শাজৈ অমদি অসিগুম্বশিং অসি অফবা হৈনবীদা শেমদোক্কদবনি হায়না ইশাবু নীংশিংহল্লি।
প্রধান মন্ত্রী – ফরে! অহুম্লক হন্না চৎলুরবা কনা কনা য়াওরি।
শান্নরোয় – খুরুমজরি সার, ঐ পুবাম্মা এম. আর. এথ্লেতিক্সতগীনি। ২০০৮দা ঐনা ওলিম্পিক্স শরুক য়াবা চৎপা মতমদা ঐ চহি ১৮ শুরে। মতমদুদা ঐ রিজর্বতা লৈরম্মি সার, অদুনা ২০১৬দা ঐখোয় তীম ওইনা মপান্দা চৎখি। ২০০২গী মতুংদা ঐখোয় ফাইনেলদা চঙবা ঙমখিদে অদুনা হন্দক্তি নেস্নেল রেকোর্দ থমদুনা ফাইনেল চঙবা পাম্মি।
প্রধান মন্ত্রী – মদু নশাদা থাজবা থম্বগী মতৌনি। থাগৎচরি। য়াইফবতা ওইরসনু। ঐখোয়গা ওন্লাইন্দা পুল্লিবা মপান্দা লৈরিবশিংসু মখোয়গী ৱাখল্লোন খরা পাম্লবদি শান্নরোয়শিংনা নুংঙাইগনি। কনা হায়বা পাম্মি, খুৎ থাঙ্গৎলগা হায়বা হৌবিরো।
শান্নরোয় – খুরুমজরি সার,
প্রধান মন্ত্রী – খুরুমজরি!
শান্নরোয় – ঐ পি.ভি. সিন্ধু, সার, ঐগীসু মসি অহুমশুবা ওলিম্পিক্সনি শরুক য়াগদৌরিবনি। অহান্বা ওলিম্পিক্তাতা ২০১৬দা সিল্ভর মেদল লৌরকখি। অদুগা ২০২০ তোকিয়োদা ব্রোঞ্জ লৌরকখিবনি অদুনা হন্দক্তি ঐনা মচু হোংদোকপা ঙমগনি হায়না খল্লি অমদি মেদল অমা পুদুনা লাক্কনি হায়না থাজৈ। তশেংবসু হন্দক এক্সপিরিএন্স কয়া পুদুনা চৎলিবনি অদুবু মসি অরায়বদি ওইরোই অদুবু ঐনা ঙমজবী থাদুনা হোৎনগনি অমদি অতোপ্পা মেদল অমগা পুরক্নবা হোৎনগনি সার।
প্রধান মন্ত্রী – অনৌবা শান্নরোয়শিং য়াওরিবশিংসিগী মফমদা করি হায়নিংই।
শান্নরোয় – অহান্বদা ঐনা হায়গদবদি মখোয়দা য়াইফবতা ওইরসনু হায়জনিংই। মী কয়া অমনা ওলিম্পিক্সনি, কমদৌনা শান্নগনি অমদি প্রেসরসু য়াম্না লৈ খল্লি অদুগা মীওই খরনা অহান্বা ওলিম্পিক্স চৎপা ওইবনা মথুম মরাং হৌরমগনি। অদুবু ঐনা হায়নিংবদি মসি তুর্নামেন্ত অতৈগুম্বনি। তৌগদবা হায়ববু ঐখোয় পুক্নিং চঙবা অমদি ঐখোয়না তৌবা ঙমগনি হায়বগী ইশাদা থাজবা থম্বদুনি অমদি কন্না হোৎনবসু হায়ননিংঙাই লৈতনা অদুমক চঙই। ময়ামগী মফমদা মখোয়গী চাদা ১০০ উত্থোকপা ঙম্বা ওইবিয়ু হায়জরি। মসি তোঙান্বা তুর্নামেন্ত অমনি হায়না খন্বিগনু অমদি মসি অরায়বদি ওইরোই। অদুবু ঐনা মখোয়দা হায়নিংবদি মসি তুর্নামেন্ত অতৈগুম্বনি। অদোমগী চাদা ১০০ ফুদোক্তুনা শান্নবা ঙম্বা ওইবিয়ু হায়জরি। থাগৎচরি সার।
প্রধান মন্ত্রী – অতৈ কনা কনা মপান্দগী হায়নিংবা লৈ।
শান্নরোয় – খুরুমজরি সার, ঐ প্রিয়াঙ্কা গোস্বামী
প্রধান মন্ত্রী – খুরুমজরি, অদোমগী বালকৃষ্ণদি কদায়দা লৈখ্রে।
শান্নরোয় – সার, ঐগী নাক্তা সিদা স্বিতজরলেন্দদা লৈ। হন্দকসু বালকৃষ্ণ পুরগা চৎকদৌরিবনি।
শান্নরোয় – হোয় সার ওলিম্পিক্স অসি মহাক্কীসু অনিশুবা ওলিম্পিক্সনিই। ইহান হান্বদা সারগী মফমদা অহুম্লকশুবা ওইনা প্রধান মন্ত্রী ওইরকপগী নুংঙাইবা ফোঙদোকচরি অমদি শান্নরোয় ঐখোয় পুম্নমক অদোমগা ৱারী শান্ননবগী অমদি উননবগী তাঞ্জা ফংলি। অদুগা সার, অনিশুবা ওলিম্পিক্স ওইবনি অমদি ঐ থা হৌখিবা থা অহুমসি লৈঙাক্কী মতেঙগা লোয়ননা ওস্ত্রেলিয়াদা ত্রেনিং তৌদুনা লৈরকপনি অদুগা হৌজিক্না স্বিতজরলেন্দা ত্রেনিং তৌরি। তোপ্সকী খুত্থাঙদা লৈঙাক্কী মায়কৈদগী মতেঙ য়াম্না ফংই। অতোপ্পা লৈবাক্তা চত্তুনা প্রেক্তিস তৌবসিদা শান্নরোয় পুম্নমক্না ওলিম্পিক্সতা মখোয়গী খ্বায়দগী ফজবা পর্ফোর্মেন্স পীগনি অমদি অফবা মহৈ পুরক্তুনা মেদল মশিং হেক ঙম্লিবমখৈ য়াম্না পুরকপা ঙমগনি হায়না থাজৈ।
প্রধান মন্ত্রী – ফরে, অদোম্না অদোমগী মশান্নদু য়েংবিনবা কনাসু লৈতে হায়না ৱাকৎখিবনি। মফমদুদা প্রেক্তিস তৌবদা কনাগুম্বা খরদি য়েংলমগনি।
শান্নরোয় – হোয় সার, মীরমদদি মশান্না অসিদসু অতোপ্পা মশান্নগুম চপ মান্ননা মরুওইবা মীৎয়েঙ থম্মি। অদুগা ঐখোয়গী লৈবাক্তদি খরা ৱাৎলি। অদুবা অদোম্না ময়ামদা মসিবু য়েংননবা পুক্নিং থৌগৎপিরকপদগী, শান্নরোয় খুদিংগী অদোম্না ৱাফম কয়া ফোঙদোকপিবনা হৌজিক্তি ঐখোয়গী লৈবাক্তসু মশান্না অসি মীওই কয়ানা য়েংনরে অমদি শান্নরোয়শিংদসু পুক্নিং ফজনা থৌগৎপিরে অমসুং কনাগুম্বনা ঐখোয়গী মশান্নদু ফমদুনা য়েংবা উরবদি ঐখোয়দসু পুক্নিং থৌগৎলি অমদি হেন্না ফজনা শান্ননিংই।
প্রধান মন্ত্রী – ফরে অদোমগী মফমদা নুংঙাইবা ফোঙদোকচরি। মপান্দগী কনা কনা হায়নিংবা লৈরি?
শান্নরোয় – সার খুরুমজরি, ঐ নিখদনি ৱা ঙাংজরিবসসি। ঐ বোক্সিংগী কেজি ৫০গী কাঙলুপ্তা ওলিম্পিক্সতা ভারতকী মহুৎ শিনগদৌরিবনি। অদুগা মসি ঐগী অহান্বা ওলিম্পিক্সনি অমদি ঐ য়াম্না নুংঙাই লোয়ননা ঐ পুক্নিং চঙনা লৈরি। মরমদি লৈবাক মীয়াম পুম্বনা ঐগী ইফমদা থাজবা থম্বিরিবনি অদুনা মখোয়না থম্লিবা থাজবা অদুমক ওইহল্লকপা পাম্মি অমদি ইরৈবাক্কী মিংচৎ উরোং খিল্লমদুনা হল্লকপা পাম্মি।
প্রধান মন্ত্রী – য়াইফবতা ওইরসনু, নীরজনা করিগুম্বা খরা হায়রি।
শান্নরোয় – খুরুমজরি সার!
প্রধান মন্ত্রী – খুরুমজরি ভৈয়া
শান্নরোয় – সার কমদৌবিরি?
প্রধান মন্ত্রী – ঐ অদুম লৈরি, নহাক্কী চুর্মাদি হৌজিক ফাওবা য়ৌরকত্রি।
শান্নরোয় – হন্দক্তি চুর্মা পুদুনা লাকচগে। মমাঙগীদুদি দিল্লীগী চীনি থাকপা চুর্মানি। হন্দক্তি হরিয়ানাগী দেসি ঘীগী পুরক্কে।
প্রধান মন্ত্রী – অদনিনে, ঐ নহাক্কী ইমানা শেম্বা চুর্মা চানিংই।
শান্নরোয় – শোয়দনা পুজরক্কে সার।
প্রধান মন্ত্রী – হমম হায়বিয়ু।
শান্নরোয় – হোয় সার, হৌজিক ঐখোয় মপান্দা লৈ জর্মনীদা ত্রেনিং নীংথিনা তৌরি। হন্দক্তি কম্পিতিসন মশিং য়ামদ্রে মরমদি মরক মরক্তা শোকপা পন্বা য়াওই। অদুবু হৌজিক্তি য়াম্না ফরে। নুমিৎ খরনিগী মমাঙদা ফিন্লেন্দা কম্পিতিসন অমা শান্নরুই অমদি মদু য়াম্না নুংঙাইখি, অদুগা থা অমা ফাজিল্লক্লে ঐখোয়না ওলিম্পিক্সকীদমক ত্রেনিং কন্না চত্থরক্লিবসি। ইশা মপুং ফানা ফিত ওইনা পেরিসতা চত্তুনা লৈবাক্কীদমক ১০০% ফুদোক্নবা হোৎনরি মরমদি মসি চহি মরিগী মনুংদা অমুকখক্তমক লাকপনি। ঐনা শান্নরোয় খুদিংমক্তা হায়জনিংবদি চহি মরিগী মনুংদা লাকপা তাঞ্জানি অমদি অদোমগী নুংদা চঙদুনা ঐখোয় ইশাগী খ্বায়দগী ফবা মতৌ উত্থোকপদা চঙবা পোৎশক্তু করিনো হায়বদু খঙদোকপিয়ু। মরমদি তোকিয়ো ঐগী অহান্বা ওলিম্পিক্সনি অমদি অহান্বা ওলিম্পিক্সতা ফবা মহৈ ফংখি, লৈবাক্কীদমক গোল্দ ফংলকখি অমদি মদুগী মরমদি ঐনা খন্বদা পুক্নিংদা অকিবা লৈখিদে, অকিবা লৈতনা শান্নখি অমদি ত্রেনিং ফজনা তৌখিবনা ইশাদা মপুং ফানা থাজবা থমখি। অদুগা ঐনা শান্নরোয় পুম্নমক্কী মফমদা হায়জনিংবদি চুম্না অদুমক শান্নবিয়ু কনাগুম্বা অমত্তবু মথৌ তাদে। ঐখোয়দা হেক য়ুরোপিয়নশিংনা হেন্না কল্লি নৎত্রগা য়ু.এস.কী শান্নরোয়শিংনা অদোপ্পা লৈবাকশিংদগী কন্বা হেল্লি হায়না খল্লি। অদুবু খঙগদবা ৱাফমদি ঐখোয় য়ুম থাদয়োক্লম্লগা ত্রেনিং কন্না তৌরিবনি অদুনা হীরম খুদিংমক ওইথোকপা ঙমগনি হায়না খনগদবনি।
প্রধান মন্ত্রী – ফরে য়াম্না কান্নরবা পাউতাক ময়ামদা পীরে। ঐনা অদোমবু থাগৎচরি অমদি অদোমগী মফমদা য়াইফ-পাউজেল পীজরি। অদোম হকচাঙ ফনা লৈবিয়ু। থা অমসিদা অনৌবা অশোকপা য়াওহন্বা য়াদে।
শান্নরোয় – হোয় মদুমক্নি হোৎনজরিবসি।
প্রধান মন্ত্রী – য়েংবিয়ু মরূপশিং, অদোমসু উবিরম্লগনি অফবা ৱাফম অনি অহুম থোরক্লে। অদোম্না লুনা লৌজবা মীওইশিংদগী তমশিন্বা য়াবা কয়া ফংলে। মখোয়দা মচৎ অমা লৈ। অদোমদা হায়খিবগুম্না মফমদুদী অরং অরাক্তা লুপ্তুনা লৈখিনু, ককঙাওনহনগনু হায়রিবসু য়াম্না চুম্বা ৱাফম্নি। মদু নৎত্রবদি মদুনা ঐখোয়দা পীবা ইথিলসি কয়া য়াম্না কন্বগে হায়ববু ঐখোয় ইশাদা পুক্নিং চঙশিন্বা ঙম্লক্তবসু য়াই। অনিসুবদা তাইবঙ মপুনা ঐখোয়দা তাঞ্জা অমা পীবিরি মখা তাবদি শান্নরোয় নখোয়না হোৎনগদবনি। অদুবু ঐখোয়না খঙগদবদি তাঞ্জাগী মশান্না নত্তে। মশি হৈ-শিংবাগী মশান্ননি। মাঙদা লেপ্লিবদুনা ফীৎ অনি হেন্না ৱাংবা য়াই, মশা চাউবা য়াই, মদুগী করিসু খল্লুনু। অদোম্না অদোমগী তেলেন্ততা থাজবা থমগদবনি অদু ওইরবদি মায়োক্নরিবদু মশা ফনা চাউ-শাংলবসু, ফনা তিক-তিক লাউরবসু, য়েংবদা ৱাং-চাউরবসু মখোয়না মায় পাকখিগনি হায়না লৌবগী মরম ওইদে। অদুনা ঐখোয়না তৌগদবদি অদোমদা লৈরিবা হৈ-শিংবা, অদোমগী তেলেন্ত অদুদা মীৎয়েঙ থমগদবনি অমদি মদুনা ঐখোয়গী অপাম্বা মহৈদু ফংগদৌরিবনি। হৈ-শিংবা মী কয়া অমা লৈবিরমগনি, অদুবু চাংয়েংগী মতমদা শোয়বা মী অদোম্না উবিরম্লগনি। মখোয়না নীংশিংবা থোক্তবদগী মরী হাইরপ লৈনবা খরা তৌগনি, মদুনা মরম ওইরগা চাংয়েংদা পুক্নিং চঙলুদে। মদুগী মরুওইবা মরমদি করিগুম্বা ঐনা ফজনা তৌরমদ্রবদি য়ুমগী মীনা করি হায়গনি খনবগীনি। করিগুম্বা ঐনা মার্ক য়ামদনা পুরক্লবদি হায়বগী প্রেসর লৈগনি। অদোম পুক্নিং লাঙতক্নবিগনু, অদোম ফজনতা শান্নবিয়ু। মেদল ফংলবসু, ফংদ্রবসু করিসু কায়দে। মসিগী প্রেসর কৈদৌঙৈদসু লৈহনগনু। অদোমগী ১০০% ফুদোক্তুনা শান্নগে হায়বসি অদোমগী ৱাখলদা লৈগদবনি অমদি মদুদা অৱাৎপা লৈহল্লোইদবনি।
অতোপ্পা ৱাফম অমনা অদোমসু খঙবিরম্লগনি, অদোমগী কোচ, অদোমগী ফিজিওলোজি লায়েংলিবা মীওইশিংদুনসু খঙলমগনি। শান্-খোৎনবদা প্রেক্তিস য়াম্না মরু ওইবগুম কন্সিসতেন্সীসসু চপ চানা মরু ওই, তুম্বসু চপ চানা মরু ওই। করিগুম্বদসু হয়েং অয়ুক মেচ লৈবা তারবদি ঙসি অহি তুম্বা য়াদবসু য়াওরমগনি। অতোপ্পা থৌওংনা ঐখোয়দগী শোকহন্বদগী তুমদবনা শোকহন্বনা হেল্লি। ঐখোয়দা তুম্নবা হায়রিবা প্রধান মন্ত্রীসিবু করিনোনে হায়না খন্বিরমগনি। অদুবু ঐনা হায়গদবদি শান্ন-খোৎনবদা, পুন্সিগী হীরম খুদিংদা তুম্বা য়াম্না মরু ওই। হৌজিক মতমদি মেদিকল সাইন্সনসু তুম্বদা মরুওইবা মীৎয়েঙ থম্লিবনি, অদোম পুং কয়া তুম্মি, কয়া য়াম্না নুংঙাইনা তুম্মি হায়বসি মরু ওইরিবনি। অনৌবা মেদিকেল সাইন্সতা হায়রিবা ৱাফমশিংসি ফজনা শীজিন্নৈ। মরম অসিনা পুক্নিং ফনা মথুম মরাং হৌরবসু অদোম নীংথিনা তুমগদবনি, অদোম্না প্রেক্তিস তৌবগুম্না তুম্বসু মতম নাইহনগদবনি। অদোম্না নশা চোকথহন্দুনা তুম্নবা হোৎনরোইদবনি মরমদি হকচাঙ চোকথরগা তুম্বদুনা অমনি অদুগা ৱাখল চরাংনবা অমত্তা লৈতনা নুংঙাইনা তুম্বা হায়বসিনা অমনি মরম অসিনা অদম্না তুম্বগী মতাঙদা হীরম অমত্তদা কম্প্রোমাইজ তৌরোইদবনি। নুমিৎ খরনি ৱাৎলিঙৈদা নখোয় থারিবসু মফমদুদা জেৎলেগনচিংবা খুদোংচাদবশিংদগী নীংথিনা পোত্থানবা, মফমদুদা নুংঙাইনা লৈনবা অমদি মদুগী তুংদা শান্নবুংদা থোকপা ঙম্নবা লৈঙাক্না শিল্লিবনি। শান্নরোয়শিংগীদমক খুদোংচানবগীদমক হন্দক অনৌবা থৌরাং খরা পায়খৎনবা হোৎনরি। অদবু মীপুম খুদিংমক মফমদুদা খুদোংচাবা মরাং কায়না ফংগদ্রা নৎত্রগা ফংলোইদরা হায়বদুদি ঐ হায়বা ঙমদে, অদুবু হোৎনবদি হোৎনগনি। হন্দক মফমদুদা লৈরিবা ভারতকী মীওই খরসু ঐখোয়না এক্তিভেত তৌরি, মখোয়বু মোবিলাইজ তৌরি, মখোয়দা ঐখোয়গী শান্নরোয়শিংগা তোৎন-তিন্ননবা, মখোয়না মপুং ফানা হোৎনবা ঙমদ্রবসু খরমখৈদি য়েংশিন্নবা থৌরাং য়াৎলি। শান্নবা লোইরবা কাঙবুশিংগীদমক্তদি য়াম্না লাংতক্নৈ। অদুবু অদোমগী নুংঙাইনবা, খুদোংচাদবা থোক্তনবা, অদোম্না অফবা মহৈ পুরক্নবা হোৎনরি। ঐগী মায়কৈদগী ময়ামগী মফমদা য়াইফ-পাউজেল পীজরি অমদি ঐনা ময়ামবু অমুক হন্না উননবা খৌরাংনা ঙাইখিগনি। ওগস্ত ১১দদি মশান্না পুম্নমক লোইরগনি। ময়াম মরক্তগী ঙন্না হল্লক্কদবশিং, ঙন্না হল্লক্কনি হায়বগী ৱাফমদি নত্তে, অদুবু অদোমবু ওগস্ত ১৫দা লাল কিলাদা পাঙথোক্কদবা থৌরমদা শরুক য়াহন্নবা ঐনা শিনগনি। মরমদি ওলিম্পিক শান্নবা চৎপা হায়বসি অচৌবা ৱাফম অমনি, অমদি লৈবাক পুম্বনা মফমসিদগী ওলিম্পি শান্ননবগীদমক চৎখিবনি হায়বা উজনবা। শান্নবদা করি তৌরকপগে হায়বদুগী মতাঙদদি ময়াম্না ইরাঙ লাঙই অদুবু লৈবাক্কী মনুংদা লৈরিবা শান্ন-খোৎনবগী তাইবঙসিদদি কনানসু করিসু খন্নরুদে। ময়াম মরক্তগী খেলো ইন্দিয়াদগী হৌরক্লগা শান্নরোয় ওইরকপা মীশিং কয়া য়াওই। ফৈ মশিং ফনা য়াম্লি। অদোমগীদি কমদৌবা, করম্বা মশান্না শান্নরিবগে হায়বা হায়বিয়ু।
শান্নরোয় – হেলো সার, ঐ সিফ্তনি অমদি সুতিং শান্নবনি। খেলো ইন্দিয়ানা ঐবু ফনা য়াম্না মতেঙ পাংখি। মরমদি দিল্লীদা ত্রেনিং তৌরগা স্কীম অদুদা লাক্তুনা পুরকপা মহৈশিংদু খেলো ইন্দিয়াগী মরম্ননি।
প্রধান মন্ত্রী – ফরে খোঙহৌ ফৈ।
শান্নরোয় – হোল।
প্রধান মন্ত্রী – অদোমগীদি।
শান্নরোয় – খুরুমজরি সার, ঐগী মিং মনুভাকর কৌই। ঐ সুতিং শান্নবনি অমদি ওলিম্পিক্তা অনিশুবা ওইনা ভারতকী মহুৎ শিন্দুনা শরুক য়াগদৌরিবনি। ২০১৮গী খেলো ইন্দিয়া স্কুল গেম্সকী অহান্বা ইদিসন্দা ঐনা নেস্নেল রেকোর্দকা লোয়ননা সনাগী মেদল ফংলকখিবনি। অমদি মদুদগী ঐ তোপ্সকী কোর গ্রুপু্তা চঙলকখি অমদি মতমদুদগী হৌনা ইন্দিয়াগী জর্সী পামদুনা লাকখি অমদি ভারতকীদমক শান্নবা পামখি অদুগা খেলো ইন্দিয়া মীওই কয়াদা লম্বী তাকপা ফম্পাক অমনি, অমদি মফমদুদগী শান্নরোয় কয়া অমা ঐনা ঐগী তীমদা উবা ফংইই, ঐগা লোয়ননসু শান্নমিন্নরি অমদি ঐগী জুনিয়রসু য়াওরি। খেলো ইন্দিয়াদগী লাকপশিংগী ওইনা তোপ্স অসি য়াম্না চাউবা খোঙথাং অমনি, ঐ ২০১৮দা মদুগী মতেঙ ফংখি, অমদি মদুগী মতেঙনা মরম ওইরগা শান্নরোয়শিংগী খুদোংচাদবা ৱাফম মচা মচাশিংগী পাম্বৈ ফংবগীদমক ঐনা থাগৎচরি। ঐনা খন্বদা ঐগীদমক্তদি খেলো ইন্দিয়া অমদি তোপ্সনা অচৌবা থৌদাং অমা লৌই। হোয় সার ঙসি ঐনা লেপ্লিবা মফমসি য়ৌরকপদা মসিদগী মতেঙ য়াম্না ফংখি। থাগৎচরি সার।
প্রধান মন্ত্রী – ফরেনে, ময়ামগী মফমদা য়াইফবতা ওইরসনু হায়না য়াইফরোল পীজরি। ৱা হায়নিংবা কনা কনা লৈরি। অদোম অদোমগী ৱাখল্লোন্দা ৱাফম খরা খরা হায়নিংবরা।
শান্নরোয় – খুরুমজরি সার! ঐ হরমনপ্রীত সিংহনি, হোকী তীমদগীনি। ঐখোয়না মমাঙদা চহি ৪১গী মতুংদা ওলিম্পিক্সতা ব্রোঞ্জ মেদল পুরকখি। মীৎকুপ্তু ঐখোয়গীদমক য়াম্না চাউথোকচখিবা মীৎকুপ্নি। অদুগা করিগীনো হায়বদা হোকীগী পুৱারী য়াম্না ফজৈ অমদি হন্দক য়াম্না কন্না হোৎনরি। ফেসিলিতীগী মতাঙদসু হায়জগে।
প্রধান মন্ত্রী – ময়াম পুম্নমক অদোমগী তোলী য়েংলি।
শান্নরোয় – অদুদি ফেসিলিতীদি বেঙ্গলোর সাইদা লৈ, খ্বায়দগী ফবা ফেসিলিতীশিং ফংই। অদোম্না রিকভরীগী মরমদা হায়খিবগুম, তুম্বগী মতাঙদা হায়খিবগুম মফমদুদসু ঐখোয়গী রিকভরীগী চীঞ্জাক্তগী হৌরগা পুম্নমক ফজনা ফংই। হন্দক ঐখোয় কন্না হোৎনরি অমদি ঐখোয়গী তীমসু মপাঙ্গল কল্লি। হন্দক হেন্না কন্না হোৎনদুনা লৈবাক্কীদমক মেদল পুরক্নবা পান্দম থম্লি।
প্রধান মন্ত্রী – মশান্নশিংগী মরক্তা খ্বায়দগী হেন্না প্রেসর লৈবদি হোকী ওইরম্বা য়াই। মরমদি লৈবাক্কী মীয়াম্না মসি লৈবাকসিগী মশান্ননি করিগী ঐখোয়না তুংদা লৈংহৌগদৌরিবনো হায়না খল্লি। হোকীগী শান্নরোয়শিংদা প্রেসর খ্বায়দগী হেন্না লৈরমগনি, মরমদি লৈবাকসিগী অঙাং মচা মচাশিংসু মসসি ঐখোয়গী মশান্ননি, ঐখোয় কমদৌনা মায়থিগদৌরিবনো হায়না খল্লি। অতৈ মশান্নশিংদদি ঐখোয়গী শান্নরোয়শিংনা হোৎনজবনি হায়নৈ। হোকীগী লমদদি কমপ্রোমাইজ তৌদে অমদি মসিনা মরম ওইরগা মখোয়না হেন্না কন্না হোৎনদবা য়াদে। অদুবু ঐগী মায়কৈদগী য়াইফ-পাউজেল পীজরি, অদোম শোয়দনা হোৎনদুনা মেদল পুরক্কনি হায়না ঐনা চপ চানা থাজৈ।
শান্নরোয় – থাগৎচরি সার।
প্রধান মন্ত্রী – ফরে সাহব! ঐনা ময়ামদা হায়গদবদি মতম অসি লৈবাক্কীদমক করিগুম্বা খরা তৌরম্নবা তাঞ্জানি। অদোম্না কন্না হোৎনবনা মরম ওইরগা মফমসিদা য়ৌরকপা ঙম্লিবনি। হৌজিক লৈবাক্কীদমক করিগুম্বা খরা তৌরম্নবা তাঞ্জানি। লৈবাক্না পীবা হায়ববু লমদমসসিগী খ্বায়দগী ফবা শান্নবুং পীবা হায়বদু মঙায়রে। শান্নবুংদা মশাগী খ্বায়দগী ফবা পর্ফোর্মেন্স পীবা মীওইশিংদুনা লৈবাক্কী মিংচৎ পুরক্কদৌরিবনি। অদুগা ঐখোয়গী মরুপ পুম্নমক্না অরিবা রেকোর্দশিং থুগাইদুনা লাক্কনি হায়না ঐনা চপ চানা থাজৈ। হৌজিক ভারতনা হোৎনরিবসি ঐখোয়না ২০৩৬তা ওলিম্পিক লৈবাকসিদা পাঙথোক্নবনি। মদুদগীসু অচৌবা ফীভম অমা পুরক্নবা লৈবাকসিনা কন্না হোৎনরি অমদি মথৌ তাবা ইনফ্রাস্ত্রকচরশিংগী থবক নীংথিনা পায়খৎলি। অখঙ অহৈ পুম্নমক্না মসসিদা থবক তৌরি। অদোমসু শান্নবা লোইরবা মতুংদ, শান্নদ্রিঙৈ মমাঙদদি করি ফীভম লৈরি হায়বা ঐ হায়নিংদ্রে। হন্দক ফ্রান্সকী তোঙান তোঙানবা ময়োল্লমশিংদা ওলিম্পিক পাঙথোক্লি অদুগা অমদি য়াম্না লাপ্পা ঈথৎ অমদা পাঙথোক্লি। অদুগা মফমদুদা তোপ তোপ্পা ফীভম অমা লৈরমগনি। অদুম ওইনমক মফমদুদা শিন-লাংলিবদুদা অদোম্না খোয়দাবা লৈরবদি, মদু য়েংবিরকউ, মদু খঙজিনবিরকউ, মরমদি শান্নরোয়শিংগী ইনপুৎ অসিনা ২০৩৬কীদমক শেম শারিবা অসিদা চাউনা কান্নগনি। মফমদুদা মসি লৈহৌই, মফমদুদা পোৎশক অসি ৱাৎহৌই হায়বনচিংবা অদোম্না খঙদোক্তুনা লাক্লবদি ২০৩৬কীদমক ঐখোয়না শেম শাগদৌরিবা অসিদা ঐখোয়দা চাউনা কান্নগনি। ঐগী মায়কৈদগী অদোমগী মফমদা য়াইফ-পাউজেল পীজরি। থাগৎচরি।
