ঐহাক্কা হকথেংননা হায়বীবসিদা ঐহাক্না অরীবা মরুপশিংগা ৱারী শাবা ফংগনি খনবদা য়াম্না নুংঙাইবা ফাওই অমসুং মসি ঐহাক্কী লাইবক ফবনি খল্লি। কনাগা খ্বাইদগী অহানবা ওইনা ৱারী শাবগী খুদোংচাবা ফংই য়েংলসি।
প্রধান মন্ত্রীজী: অদোমগী করি মিং কৌবগে?
বেনিফিশরী: : সোলঙ্কী বাগতসঙ্গ বচুজী
প্রধান মন্ত্রীজী: ঐখোয়না স্বাগত হৌদোকখিবা মতমদা অদোম্না খ্বাইদগী হান্না লাকপীখিবরা?
বেনিফিশরী বচুজী: হোই সর, ঐহাক্না খ্বাইদগী ইহান হান্না লাকচখি।
প্রধান মন্ত্রীজী: অদোম্না সরকারগী থৌমীশিংদা করিগুম্বা খরা হায়গে হায়রবদি স্বাগত্তা চৎকনি হায়বসি অদোম্না করম্না খঙখিবনো?
বেনিফিশরী বচুজী : হায়জগে সর। ঐহাক্না 20-11-2000দা দাহেগম তেহসিলদগী সরকারগী অৱস য়োজনাগী ইন্সতোলমেন্ত অমগী শেনফম ফংজখি। ঐহাক্না য়ুম শাবগী তাঙ্কক অসি প্লিন্ত ফাওবতং লোইশিল্লবা মতুংদা, ঐহাক্না 9গী ফক্লাং শাসিরা নত্ত্রগা 14গী ফক্লাং শাসিরা হায়বা খঙদনা লৈখি, মদুগী মতুংদা য়ুহা হাবগী থৌদোক থোকখি, অদুনা 9গী ফক্লাং শারবদি কনগদবা মান্দে হায়না ঐনা অকীবা ফাওখি। অদুনা ঐহাক ইশানা হোৎনজদুনা 9গী মহুত্তা 14গী ফক্লাং শাখি, ঐহাক্না অনিশুবা ইন্সতোলমেন্ত পীবিয়ু হায়না ব্লোক বিকাস অধিকারীদা হায়বা মতমদা ঐনা 9গী মহুত্তা 14গী ফক্লাং শাবনিনা অনিশুবা ইন্সতোলমেন্ত ফংলরোই, অদুগা মমাংগী চয়োলদা পীখ্রবা লুপা 8253 অদু ব্লোক্কী ওফিস্তা শেন্দোইগা লোয়ননা পীশিল্লকউ হায়রকখি। ঐহাক্না জিলা অমসুং ব্লোক্কী মফমদা কয়ারক হংজখি, অদুবু পাউখুম অমত্তা ফংখিদে। মদুদগী ঐনা গান্ধীনগর জিলাদা হংলুবা মতমদা ইনাও অমনা ঐনা মফমসিদা নুংতিগী করিগী লাক্লিবনো হংলকপদা, ঐনা 9গী মহুত্তা 14গী ফক্লাং শারুরে, অদুনা মরম ওইরগা ঐনা সরকারগী অৱসকী হফতা ফংদ্রে, ঐদি ইমুংগা লৈবনি, ঐগী য়ুমসু লৈত্রে, মদুনা খুদোংচাদবা য়াম্না নংলে, অদুনা লাক্লিবনি হায়না খুমখি। মদুদগী ইনাও অদুনা খুরা করিমত্তা ৱাবীগনু, ইকায় খুম্ননিংঙাই ওইরবা শ্রী নরেন্দ্রভাই মোদী সাহেবকী সেক্রেতরিএত্তা থাগী শগোলশেল নুমিৎ খুদিংগী পাংথোকপা ‘স্বাগত’ অদুদা চৎপীয়ু হায়বীরকখিবনি। ঐহাক্না সেক্রেতরিএত্তা য়ৌরে, ঐহাক্না অদোমগী মফমদা ঐহাক্কী ৱাকৎ হকথেংননা থমজখি। অদোম্না ঐহাক্কী ৱা নিংথীনা তাবিখি অদুগা পাউখুমসু নিংথীনা পীবিখবনি। অদোম্না অধিকারীদা পীবিখিবা য়াথং অদুদগী ঐহাক্না 14গী ফক্লাং শাখিবা অদুগী ফংফম থোকপা শেনফম ফংবা হৌখি। হৌজিক্তি ইশাগী পক্কা য়ুমদা লৈদুনা ঐহাক্কী ইমুংগী অঙাং 6কা লোয়ননা নুংঙাইনা লৈজরি। অদুনা ঐহাক্না অদোম্বু থাগৎচরি।
প্রধান মন্ত্রীজী: ভরতভাই, অদোমগী ৱারী তাবদা ঐহাক্না থাইনগী মতম নিংশিংলি, চই 20গী মতুংদা অদোমগা উন্নবগী খুদোংচাবা ফংজরি, অঙাংশিংদি মহৈ তম্লিকো নত্ত্রগা করি তৌরিবগে?
ভারতভাই: সাহেব, ইচানুপী 4 লুহোংখ্রে, অদুগা ইচানুপী অনি লুহোংদ্রি, মখোয়দি চহি 18 শুদ্রি।
প্রধান মন্ত্রীজী: অদোমগী য়ুমদি কমদৌরি, ফনা লৈরিবা নত্ত্রো, চহি 20 অসিদা মঞ্জল্লবরো?
ভারতভাই: সর, হান্নদি নোং য়ুরম্বনি, ঈশিংগী অৱাবসু লৈরম্মি, য়ুম্থক্তগী হৌজিকসু লৈবাক কেল্লি, পক্কা ওইনা কুপ্পা ঙমজদ্রি।
প্রধান মন্ত্রীজী: ইমাক নুপাশিংদি লোইনা ফবা নত্ত্রো?
ভারতভাই: হোই সর, লোইনা ফৈ।
প্রধান মন্ত্রীজী: ফরে, নুংঙাইনা লৈয়ু। অদোম্না স্বাগত খোঙথাংগী মতাংদা অতোপ্পদা হায়বরা হায়দবরা?
ভারতভাই: সাহেব, হাইজৈ, মুখ্য মন্ত্রী নরেন্দ্রভাইনা ঐহাক্কী অপেনবা পাউখুম পীবি হায়জৈ। অদুনা অদোমসু করিগুম্বা হায়নিংবা লৈরবদি, স্বাগত থৌরমদা চৎপা য়াগনি হায়জৈ। মখোয় মথন্তা চৎপা ঙমদ্রবসু, ঐগা চৎমিন্নসি, ওফিস মশক তাক্কে হাইজৈ।
প্রধান মন্ত্রীজী: য়াম্না নুংঙাইরে ভারতভাই। মথংদা কনা লৈরিবগে?
বিনয়কুমারঃ নমস্কার সর, ঐহাক চৌধরী বিনয়কুমার বালুভাইনি, ঐহাক তাপি জিলাগী বাঘমেরা খুঙ্গংদগীনি।
প্রধান মন্ত্রীজী: বিনয়ভাই, নমস্কার।
বিনয়ভাই: নমস্কার সাহেব।
প্রধান মন্ত্রীজী: অদোম কমদৌরি?
বিনয়ভাই: অদোমগী থৌজালদগী নুংঙাইজরি সাহেব।
প্রধান মন্ত্রীজী: ঐখোয়না অদোম খুদিংবু দিব্যাং হায়না কৌই হায়বা খঙবীকো। অদোমগী খুঙ্গংদসু অদোম্বু অসুম্না ইকায় খুম্ননা কৌবীরমগনি।
বিনয়ভাই: কৌবী, সর।
প্রধান মন্ত্রীজী: অদোম্না ইশাগী হক্কীদমক্তা য়াম্না কন্না হোৎনখিবা ঐনা নিংশিংলি। অদোম্না মতমদুদা করি লান্থেংনখিবগে অমুক্তা হায়বীয়ু, অদোম্না মুখ্য মন্ত্রীগী মনাক্তা চৎলগা ইশাগী হক লৌরিবনি। মীয়ামদা অমুক্তা তম্বীয়ু।
বিনয়ভাই: সাহেব, ঐহাক্না মতমদুদা ইশানা মরোমদোম লেপচবা ঙম্বা পাম্লম্মি। ঐহাক্না মতমদুদা অল্পসংখ্যক বিত্ত আয়োগতা লোনগী এপ্লিকেসন থাজখি, লোনবুদি য়াবীরে অদুবু ঐহাক্কী মফমদা মতম চানা চেক্তি পীবিখিদে। ঐহাক থৱাই য়াম্না ৱারম্মি, মদুদা ঐগী মরুপ অমনা গান্ধীনগরদা চত্তুনা স্বাগত থৌরমদা ৱাকৎ থাংগৎলু হায়বীখি। অদুদগী ঐনা তাপি জিলাগী বাঘমেরা খুঙ্গংদগী বস তোংদুনা গান্ধীনগরদা লাকখি, অদোমগী থৌরম য়াওখি। অদোম্না ঐহাক্কী ৱারী তাবীখি অদুগা লুপা 39245কী চেক ফংহনখি। শেল অদুদগী ঐনা য়ুমদা জেনেরেল স্তোর অমা হাংদোকখি, হৌজিক্সু মদু চলায়রি। সর ঐনা দুকান ফম্লবা মতুংগী চহি 2দা লুহোংলে, হৌজিক্তি ইচানুপী অনি লৈরে, ঐনা মখোয়বু দুকান অদুদগী মহৈ তমহল্লি। অহলদি ক্লাস 8 অমসুং অতোনবীনা ক্লাস 6তা তম্লি। ঙসিদি ঐগী ইমুংনা মরোমদোম লেপচবা ঙম্লে। অদুগা ঐনা দুকান ফম্বগা লোয়ননা ঐগী লোয়নবীগা লৌসু উরি। পোতশিৎসু য়াম্না ফজরি।
প্রধান মন্ত্রীজী: দুকান্দা করি করি য়োনবগে, বিনয়ভাই?
বিনয়ভাই: চেংদগী হৌরগা গ্রোসরী য়োল্লি।
প্রধান মন্ত্রীজী: ঐখোয়না ভোকেল ফোর লোকেল হায়রিবা অসিদা অদোমগী দুকান্দসু লোকেলগী পোত্থোক লৈবা লাকপরা?
বিনয়ভাই: লাকই সাহেব, চেং, হৱাই, চিনি পুম্নমক লৈবা লাকই।
প্রধান মন্ত্রীজী: ঐখোয়না হৌজিক শ্রী অন্নাগী ইহৌ হৌরি, বাজরা, জ্বার মীয়াম্না চারি। অদোমগী দুকান্দসু শ্রী অন্না য়োনবরা?
বিনয়ভাই: য়োল্লি সাহেব।
প্রধান মন্ত্রীজী: অদোম্না অতোপ্পদা থবক পীবরা নত্ত্রগা ইশাগী লোয়নবী খক্কা থবক শুমিন্নবরা?
বিনয়ভাই: শিন্মী নেকপা তাই সর।
প্রধান মন্ত্রীজী: শিন্মী নেকই, হায়রবদি অদোম্না অতোপ্পদা থবক পী হায়বনি।
বিনয়ভাই: হোই সর, ঐনা মীওই 4-5তা থবক পীরি।
প্রধান মন্ত্রীজী: ঐখোয়না হৌজিক মীপুম খুদিংদা দিজিতেল পেমেন্ত তৌনবা হায়রি, অদোমসু দিজিতেল পেমেন্ত তৌবরা? মোবাইলদগী শেল থাবা, QR কোদকুম্বা শিজিন্নবরা?
বিনয়ভাই: হোই সাহেব, মীওই কয়া অমা লাকই, QR কোদ পীয়ু হাই। ঐগী একাউন্ততা শেল হাপ্লকই।
প্রধান মন্ত্রীজী: য়াম্না ফরে, মসিনা হায়বদি, খুদোংচাবা অসি অদোমগী খুঙ্গংদা য়ৌরে হায়বনি।
বিনয়ভাই: হোই য়ৌরে, সর।
প্রধান মন্ত্রীজী: বিনয়ভাই অদোমগী অখন্নবা অসিদি অদোম্না ‘স্বাগত’ থৌরম্বু মপু ফাহল্লে অদুগা থৌরম অসিদগী কান্নবা ফংলিবা অসিগী মতাংদা অতোপ্পনসু হংলমগনি। অদোমগী থৌনা কয়া য়াম্না লৈবগে হায়ববু, অদোম্না মুখ্য মন্ত্রীগী মনাক্তা য়ৌখি, অদোম্না ৱাকৎ পুদুনা লাক্লে হায়বা ওফিসরশিংনা খঙখ্রবনিনা, মখোয়না অদোমদা তুংদা অৱাবদি পীদেকো?
বিনয়ভাই: পী সর।
প্রধান মন্ত্রীজী: অদুবু মমৈদদি লম্বী হাঙখি।
বিনয়ভাই: হাঙখি সর
প্রধান মন্ত্রীজী: ঐদি মুখ্য মন্ত্রীগা খঙনৈ কায়না বিনয়ভাইদি খুঙ্গংদা গুন্ডা তৌবরো? মদুম্না তৌবদি য়াদেকো।
বিনয়ভাই: তৌজদে সর।
প্রধান মন্ত্রীজী: বিনয়ভাই, অদোমগী মফমদা য়াইফ পাউজেল পীজরি। অদোম্না য়াম্না অফবা থবক তৌরে, ইচানুপীশিংবু নিংথীনা মহৈ তমহনবীয়ুকো।
প্রধান মন্ত্রীজী: অদোমগী করি মিং কৌবগে?
রাকেশভাই পারেখ : রাকেশভাই পারেখ
প্রধান মন্ত্রীজী: রাকেশভাই পারেখ, অদোমদি সুরত জিলাগী কদাইদগীনো?
রাকেশভাই পারেখ: ঐহাক সুরত্তগীনি সর।
প্রধান মন্ত্রীজী: সুরতমক্তা লৈবরা নত্ত্রগা সুরতকী অনকপদা লৈবরা?
রাকেশভাই পারেখ : ঐ সুরত এপার্তমেন্ততা লৈজৈ।
প্রধান মন্ত্রীজী: অদোমগী ৱাহং হংবীরো।
রাকেশভাই পারেখ : ঐহাক্কী ৱাহংদি, 2006তা রেল লাকপা মতমদা বিলদিং থুগায়খি, মদুফা ফ্লেত 32 অমসুং দুকান 8 লৈবা মথোল 8গী বিলদিং অমসু থুগায়খি। বিলদিং অসু কায়থবা হৌরক্লবনি, অদুনা মদু থুগায়বনি অদুবু মদুগী অয়াবদি ফংদ্রিবনি। ঐখোয়না কোর্পোরেসন্দা কয়ারক চৎলে, অদুবু অয়াবদি ফংখিদে। মতমদুদা মুখ্য মন্ত্রী মোদীজীনা স্বাগত থৌরম অমা পাংথোকই তাবদগী ঐখোয় পুনশিনখি, ঐখোয় চত্তুনা কমপ্লেন্ত থাংগৎখি। মতমদুদা ঐখোয়না গামিত সাহেবকা উন্নখি, ঐখোয়গী ৱাকৎ ফংলে অদুনা ঐখোয়বু অথুবা মতমদা কৌরক্কনি হায়না মহাক্না হায়রকখি। অদোমগী নাক্তা য়ুম লৈত্রে, মদুগীদমক্তা য়াম্না নুংঙাইতে হায়রকখি অদুগা ঐহাকপু থংনবা নুমিত্তা কৌরকখি। অদুগা ঐহাক্না স্বাগত থৌরমদা অদোমগা উন্নবগী খুদোংচাবা ফংজখি। অদোম্না মতমদুদা ঐহাক্কী ইফমদা অয়াবা পীবিখি। মতমদুদা ঐ ভরাগী য়ুম অমদা লৈরম্মি। ঐনা চহি 10 ভরাদা লৈখি। অয়াবা ফংবদগী ঐখোয়না অরীবা বিলদিং অদু নৌনা শাগৎপা হৌখি। অদোম্না অখন্নবা কেস অমা ওইনা ঐখোয়দা অয়াবা পীবিখি। ঐখোয়না মীফম পাংথোকখি, মরী লৈনবা মীয়াম খুদিংমক শরুক য়াহন্দুনা ঐখোয়না বিলদিং শাবা হৌখি। ঐখোয়না মদুদা লৈবা অমুক হৌখি। ইমুং 32 অমসুং দুকান 8কী ইমুংনা অদোম্বু থাগৎলি।
প্রধান মন্ত্রীজী: পারেখজী অদোম্না ইমুং 32গী অফবা থবক অমা তৌবীরে। ইমুং 32গী মীওইশিংবু শান্তি লৈনা হিংবগী খুদোংচাবা পীবিখি। ইমুং 32 অসিবু করম্না লৈরিবগে, পুম্নমক নুংঙাইনা লৈরিকো?
রাকেশভাই পারেখ : পুম্নমক নুংঙাইরি অদুবু ঐহাক্তি অৱাবা খরদি মাইয়োক্নরি সরজী।
প্রধান মন্ত্রীজী: পুম্নমক পুন্না লৈমিন্নবা নত্ত্রো?
রাকেশভাই পারেখ : হোই।
প্রধান মন্ত্রীজী: অদুগা অদোম্না খুদোংচাদবা অমুক থেংনবা হৌরে?
রাকেশভাই পারেখ : ঐখোয়না খুদোংচাদবা মাইয়োক্নরবদি অদোমগী বঙ্গলোদা লাক্লগা লৈয়ু হায়না অদোম্না হায়বীখি। বিলদিং শাবা লোইদ্রিবা ফাওবা অদোমগী বঙ্গলোদা লৈয়ু হায়বীখিবনি, ঐনা বিলদিং শাবা লোইদ্রিবা ফাওবা ভারাদা লৈজখি, হৌজিক্তি বিলদিং শাবা লোইরবনিনা ঐহাক্না ইমুং পুন্না মদুদা শান্তি ওইনা লৈজরে, ঐহাক্কী ইচানুপা অনি লৈ। ঐহাক্কী লোয়নবী অমসুং মখোয়গা পুন্না নুংঙাইনা লৈমিন্নরি।
প্রধান মন্ত্রীজী: ইচানুপাশিংদি করি তম্মি?
রাকেশভাই পারেখ : ইচানুপা অমনা থবক তৌরি, অদুগা অতোপ্পা ইচানুপা অমনা থোং থাকপগী থবক তৌরি। হোতেল মেনেজমেন্ত হায়বা থবক্তুনি, মহাক্না ইমুং চলায়রি। ঐহাক্কী শিংলি নাউরি ফমজিনখিবদগী ঐহাক্না খুদোংচাদবা কয়া থেংনরি, ঐ হৌজিক চৎপা ঙমদ্রে। ঐনা চহি অমগা মখায়দগী ফিভম অসিদা লৈরক্লি।
প্রধান মন্ত্রীজী: য়োগগুম্বদি তৌবা নত্ত্রো?
রাকেশভাই পারেখ : হোই সর, ঐ হৌজিক এক্সর্সাইজ তৌজরি।
প্রধান মন্ত্রীজী: মসিদদি, হাথু হাথুনা ওপরেসন তৌদনা দাক্তরগা হান্না নিংথীনা তানফম থোকই, হৌজিক্তি ঐখোয়গী আয়ুশমান কার্দকী পথাপসু লৈরে। অদোমগী আয়ুশমান কার্দ শারবরো? মসিদগী লুপা লাক্ষ মঙা ফাওবদি মতেং ফংগনি। অদুগা গুজরাতকী ওইনদি অফবা স্কিম কয়া লৈরি, মা কার্দ স্কিম লৈরি, মসিগী কান্নবা লৌদুনা অদোমগী অৱাবা কোকহল্লু।
রাকেশভাই পারেখ : হোই সাহেব, তৌজগে।
প্রধান মন্ত্রীজী: অদোম য়াম্না অহল ওইবদি নত্ত্রি, হোৎনবা লেপকনু।
প্রধান মন্ত্রীজী: ফরে, রাকেশভাই, অদোম্না স্বাগতকী খুত্থাংদগী মীওই কয়াদা মতেং পাংখি। লৌশিং লৈবা মীওই অমনা অতোপ্পদা করম্না তেংবাংগনি হায়বগী খুদম অদোম্না ওইরি। অদোম অমসুং অদোমগী ৱাফমশিংবু সরকারনা য়াম্না লৌখিবা অদুদা ঐহাক্না নুংঙাইবা ফাওই। চহি কয়াগী মমাংদা অদোম্না হংখিবা ৱাহং অদুনা অদোমগী ইচাশিংনা নুংঙাইনা লৈরি। ঐহাক্কী মাইকৈদগী মখোয়দা য়াইফ পাউজেল খরা পীবিয়ু।
মরুপশিং,
ঙসিগী ৱারী শাবা অসিদা ঐখোয়না হৌদোকখিবা স্বাগত অসিনা মায় পাকপা কয়া ফংলে খঙহনবা অসিনা ঐহাকপু য়াম্না নুংঙাইবা ফাওহল্লে। মীয়াম্না মসিগী মতেংদগী মশাগী ৱারোইশিন কয়া পুরকপদা নত্তনা রাকেশকুম্বা মীওইশিংনা মহাক্কী ইমুংগা লোয়ননা অতোপ্পা ইমুং কয়াগী ৱাফম থাংগৎলি। মীচম মীয়ামগী ৱাফম নিংথীনা তাবীবা, মখোয়বু মরুপ ওইনা খনবা হায়বসি সরকারগী লিচৎ ওইগদবনি হায়না ঐনা খল্লি অমসুং ৱাখল্লোন অসিগা লোয়ননা ঐখোয়না তুংলমচৎকী মাইকৈদা গুজরাতনা খোঙদারি। ঙসিগী থৌরমসিদা ভুপেন্দ্র ভাইসু শরুক য়াবসিদা ঐহাক্না নুংঙাইবা ফাওই। জিলাগী মন্ত্রী, ওফিসিএল কয়া ঐহাক্না উবা ফংলি, অনৌবা মীওই কয়া উবসু ফংলি, ঐহাক্না পুম্নমকপুদি খঙদ্রে।
গুজরাতকী মীয়াম করোর কয়াগীদমক্তা কত্থোক্লবা ‘স্বাগত’না ঙসি চহি 20 মপুং ফারে। অদুগা অরীবা বেনিফিশরী খরগা হৌজিক্তা ৱারী শাখিবা অদুনা থাইনগী মতমশিং নিংশিংহল্লি। স্বাগতনা মায় পাকপসিদা থৌদাং য়াখিবা মীপুম খুদিংবু ঐহাক্না থাগৎচরি অমসুং ইকায় খুম্নবসু উৎচরি।
মরুপশিং,
খুদোংচাবা অমা হৌদোকপা মতমদা মদুগী মরুমদা পান্দম অমসুং ৱারেপ অমা লৈগনি। তুংগী মতমদা মসিনা কদাই ফাওবা য়ৌগনি, অকোনবা মহৈনা করি ওইগনি হায়বা খুদিংমক হান্ননা লেপ্তুনা চৎকদবনি। স্বাগত স্কিম অসি হৌদোকখিবা মতমদা ঐহাক্না মুখ্য মন্ত্রী ওইবা য়াম্না কুইদ্রিবা মতম্নি।
মদুগী মমাংগী ঐহাক্কী পুন্সিদি মীয়ামগী সেবাদা হৌখিবনি, মীচম মীয়ামগী মরক্তা লৈদুনা হৌখিবনি। মুখ্য মন্ত্রী ওইরবা তুংদা শক্তি পায়রকপনা মীওই অমবু হোংহল্লি হায়বা মীয়ামগী মিৎয়েং মাইয়োক্নখি। ঐহাক্তি চৌক্রিনা ইশাদা অহোংবা অমত্তা পুহল্লকপা ঙম্লোই হায়বগী থাজবা লৈখি। ঐহাক্তি চৌক্রিগী অকক্নবনা পুন্দুনা লৈরোই হায়বা ঐহাক খঙই। ঐহাক্তি মীয়াম মরক্তা মখোয়গীদমক্তা লৈগনি হায়না ঐদি লেপ্তুনা লৈখ্রবনি। মসিগী ৱাখল চেৎপা অসিনা স্তেতৱাইদ এতেন্সন ওন গ্রাইবেন্স বাই এপ্লিকেসন ওফ তেক্নোলোজী – শ্বাগত শেমখিবনি।
স্বাগত হৌদোকখিবগী মরুমদা লৈবা ৱাখল্লোন্দি – মীচম মীয়াম্বু লোকতন্ত্রগী ইন্সতিত্যুসনশিংদা তরাম্না ওকপনি। স্বাগতনা য়েংলম্বা মিৎয়েংদি লেজিস্লেসন নত্ত্রগা ৱারোইশিন পুরকপগী থৌওংবু তরাম্না ওকপনি। অদুগা নহি 20গী মতুংদা স্বাগতকী ৱাহন্থোক অসি ইজ ওফ লিভিং, রিচ ওফ গবর্নেন্স ওইরে। থম্মোই শেংনা হোৎনখিবা থবক অসিগী মহৈদি গুজরাতকী গবর্নেন্সকী মোদেল অসিনা মালেমগী মফমদা গুজরাতকী শক্তাক অমা শেম্লিবা অসিনি। শ্বাগত অসিদি ই-ত্রান্সপরেন্সী অমসুং ই-একাউন্তেবিলিতীগী মগুন চেনবা নিংথীনা লৈঙাকপগী খ্বাইদগী মতিক চারবা খুদম অমনি হায়না ইন্তর্নেস্নেল তেলিকোম ওর্গনাইজেসন্না লাউথোকখ্রবনি। য়ুনাইতেদ নেসন্সনা শ্বাগতপু য়াম্না থাগৎলি অমসুং পব্লিক সর্ভিসকী ইকায় খুম্ননিংঙাই ওইরবা মনাসু পীরকখ্রে। কংগ্রেসনা পাল্লিঙৈগী ভারত সরকারগী মফমদগী গুজরাতনা ইং 2011দা শ্বাগতনা মরম ওইদুনা ই-গবর্নেন্সকী গোল্দ মেদলসু ফংখি। মসিগুম্বা থৌদোকশিং অসি হৌজিকসু লেপ্তনা চত্থরি।
ইচিল ইনাওশিং,
ঐহাক্কী ওইবা খ্বাইদগী চাউবা মনাদি ঐখোয়না শ্বাগতকী খুত্থাংদা গুজরাতকী মীয়ামগী সেবা তৌবা ঙম্বা অসিনি। ঐখোয়না শ্বাগতকী মনুংদা প্রেক্তিকেল ওইবা পথাপ অমা শেমখি। শ্বাগতকী মখাদা লৈবা পব্লিক হিয়ারিংগী অহানবা পথাপ অসি ব্লোক অমসুং তেহসিলগী থাক্তা শেমখি। মদুগী মতুংদা, দিস্ত্রিক্ত মেজিস্ত্রেতপু জিলাগী থাক্কী থৌদাং লৌহনখি। অদুগা রাজ্যগী থাক্কী ওইনা, মহাক মশামক্না থৌদাং লৌখি। মসিনা ঐহাক্কী ইফমদসু কান্নবা য়াম্না পীখি। ঐহাক্না মীয়ামগা ৱারী শানবা ফম্বা মতমদা, সরকারগী খোঙথাং অমসুং স্কিম কয়াগী মপাঙ্গল অমসুং মসিনা মীয়ামদা কয়া য়াম্না য়ৌবা ঙম্বগে হায়বগা লোয়ননা ইমপ্লিমেন্ত তৌরিবা এজেন্সী অমসুং এন্দ বেনিফিশরীশিংগী মরক্তা লৈনবা মরীবুসু নিংথীনা খঙবা ঙমহনখি। থবক থৌরম খুদিংগী ফীদবেক য়াম্না কুপ্না ফংবা ঙমখি। কনানা কান্নবা ফংলি, কনানা ফংদে, কনানা মখোয়গী হক মৎপীরি হায়বা ৱাফম খুদিংমক ঐনা খঙবা ঙমখি। গুজরাতকী মীয়ামগী মপাঙ্গল য়াম্না হেনগৎলে। মখোয়গী ৱা কনা অমত্তনা তাবীদবা ওইরবদি, ফরে ঐ স্বাগতকী মনাক্তা চৎলগনি হায়বা হৌরবনি। মসি হেক হায়বগা ওফিসরশিংনা লেপখত্তুনা ঙাইবীখো, অদোমগী করি ৱাকৎ লৈবনো হায়দুনা মখোয়গী ৱাকৎ লৌরিবনি। শ্বাগতনা মীয়ামদা পাঙ্গল হাপখি অমসুং মীয়ামগী থাজবসু ফংবা ঙমখি।
স্বাগতনা অচৌবা রেপ্যুতেসন অমা ফংবা ঙমখিবনি। মীচম মীয়ামগী ৱাকৎ, খুদোংচাদবা, শিংনবশিংগী ই-পাউ ঐহাক্না হকথেংননা ফংবা ঙম্মি। মখোয়গী ৱারোইশিন পুরকপা মতমদসু ঐহাক্না য়াম্না নুংঙাইবা অমা ফাওই। মসিদা থবক লোইবা নত্তেকো। শ্বাগত থৌরম অসি চয়োল অমদা অমুকখক পাংথোকপা ওইরবসু, ৱাকৎ মশিং য়াম্না লাকপনা মরম ওইরগা মসিগা মরী লৈনবা থবকশিংদি থা অদুমা লেপ্তনা চত্থদুনা লৈ। ঐহাক্না মখোয়গী ৱাকৎ খুদিংবু মুন্না য়েংশিল্লি। মসিসু মতম চঙবা থাবক্নি। অতোপ্পশিংগা চাংদম্নবদা ৱাকৎ মশিং হেন্না য়াম্বা অখন্নবা বিভাগ, ওফিসর নত্ত্রগা মফম য়াওবরা হায়না ঐহাক্না কুপ্না য়েংশিনবগী থৌওং চত্থৈ। য়াম্না কুপ্না খন্ন-নৈনখি, তঙাই ফদবা লৈরবদি মীচম মীয়ামদা অকায়বা লৈহন্দনবা পোলিসীশিংদা শেমদোক শেঞ্জিন্সু তৌখি। মীওই অমগী নুংঙাইতবা লৈবা মতমদা, ঐখোয়না মীওইদুগী ৱারোইশিন পুরক্নবা শীনবগী মহৈনা মীয়াম্না স্বাগতকী মফমদা থাজবা থম্লিবনি। খুন্নাই অমবু নিংথীনা লৈঙাকপগী চাং অসিদি পব্লিক গ্রাইবেন্স রিদ্রেসেল সীস্তেমগী মগুন্দা ওল্লি অমসুং মসিনা গনতন্ত্রগী তসেংবা চাংয়েংসু ওইরিবনি। স্বাগত হায়বা থৌওং অসিগী মরুনা অসিনা চাউরবা উপাল অমা ওইরকপা অসিদা ঐহাক্না নুংঙাইজৈ, চাউথোকচৈ। মতমদুদা স্বাগত থৌরম্বু শেন্নরম্বা ঐহাক্কী অরীবা মরুপ, ঐহাক্কী সি.এম. ওফিস্তা লৈরম্বা শ্রী এ.কে. শর্মনা স্বাগত থৌরমগী মতাংদা ইকোনোমিক তাইমসতা ফজবা আর্তিকল অমা ইবসিদা ঐহানা য়াম্না নুংঙাইবা ফাওই। মহাক্না মতমদুদা মহাক্না থেংনখিবা থৌদোকশিংগী মতাংদা নিংথীনা ইবিরি। হৌজিক্কান্দি মহাকসু রাজনিতীগী মালেমদা খোঙদাখ্রে, উত্তর প্রদেশতা মন্ত্রী ওইখ্রে, মহাক্না মতম অমদা সরাকরগী ওফিসর অমা ওইনা ঐহাক্কী স্বাগত থৌরম্বু শেন্নবীরম্মি।
মরুপশিং,
সরকারগী ওইনা হান্নদগী চৎনদুনা লৈরবা অরিবা কাঙলোন ইনবগী চৎনবী অমা ঐখোয়গী লৈবাক্তা দিকেদ কয়াদগী চৎনদুনা লাক্লি। মখোয়না সরকারদা লাক্লগনি, মফম খরদা চৎলগা রিব্বোন কক্কনি, ফোতো কাপকনি, মৈরী চুগনি, মসিদা অদুমক লোইরে। মসিদা মখোয়গী মতম অদুম লোইশিল্লম্মি। অদুবু, স্বাগতনা মসিগুম্বা থৌওং অসিদা গুজরাত্তা অওনবা অমা পুরকখি। লৈঙাকপা হায়বসি অরিবা আইন অমসুং কাঙলোন্দা অকক্নবা লৈতে, লৈঙাকপা হায়বসি ইন্নোভেসন অমসুং অনৌবা ৱাখল্লোন্না ঙমহল্লি হায়না ঐখোয়না তাক্লে। ইং 2003দা মতমদুগী সরকারনা ই-গবর্নেন্সতা অহেনবা মিৎয়েং চঙলমদে। থবক খুদিংগী চে-চাং লৈরম্মি। থবক মখা তানা অসুম চত্থরকপদা ফাইল কদাইদা য়ৌখ্রে, কদাইদা মাঙখ্রে হায়বা কনামত্তা খঙনদে। ৱাকৎ অমগী এপ্লিকেসন অমা পীরম্লবা মতুংদা মদুগী চে-চাং থীবদা ৱাকৎ অদুগী মপুন্সি অদুমক মদুদা লোইনা চঙখি। চে-চাং শেন্নবা হায়বসিনা থবক থেংথহনবা অমসুং মওং মরিল তাদবগী থৌওং য়াম্না থোকহল্লি অদুগা ভিদিও কনফরেন্সিংগী চৎনবী অসিদি মতমদুদা কনামত্তা খঙনদ্রি। মসিগুম্বা মতম অসিদা গুজরাতনা তুংগী মতমগী ৱাখল্লোন্দা থবক তৌখি। অদুনা ঙসিদি, শ্বাগতকুম্বা পথাপ অসিনা লৈঙাকপগা মরী লৈনবা ৱারোইশিন কয়া পুরকপদা ইথিল কয়া অমা পীরি। রাজ্য কয়া অমনা মসিগুম্বা মখলগী পথাপ্তা থবক তৌনরি। ঐখোয়না কেন্দ্র সরকারদা প্রগতী কৌবা পথাপ অমসু সরকারগী থবক তৌবগী মতৌ য়েংশিন্নবা শেম্লে। প্রগতীনা মমাংগী চহি 9দা লৈবাক্না খোঙজেল য়াঙনা চাউখৎখিবা অসিদা অচৌবা থৌদাং য়াখি। মসিগী ৱাখল্লোন অসিসু শ্বাগতকী ৱাখল্লোন্দা য়ুম্ফম ওইবনি। ঐহাক্না প্রধান মন্ত্রী অমা ওইনা ফমখিবা প্রগতীগী মীফম কয়াদা ঐহাক্না লুপা করোর লাক্ষ 16গী শেনফমগী প্রোজেক্ত কয়া প্রগতীগী খুত্থাংদা য়েংশিনখি অমসুং মসিনা মরম ওইরগা প্রোজেক্ত কয়াগী খোঙজেলসু য়াঙখৎহনখি। হৌজিক্তি মসিগী শাফু কয়া য়াম্না লৈরগে হায়ববু, হঙ্গৎনা য়েংশিনগদবা প্রোজেক্ত কয়াগী লিস্ত ঐহাক্কী নাক্তা লাকই, মদুদগী ঐহাক্না প্রোজেক্ত অমা খনগত্তুনা মদুগী করি ফিভম ওইরিবগে হংবদা, মদুদি নুমিৎ নিনিগী মমাংদা লোইখ্রে হায়বা পাউখুম্না অয়াম্বা তাবা ফংলে।
মরুপশিং,
চারা মরু অমদগী উপাল অমা হৌরক্তুনা, মদুগী মশা কয়া ফন্দোরকপা অদুগুম্না ঐখোয়না হৌখিবা থবক অসিনা অনৌবা থৌওং কয়া শেমখ্রে, মসিগী স্বাগতকী হীরম অসিনা গবর্নেন্সকী থৌওংদা অনৌবা ইন্নোভেসন কয়া অমগসু লৈহনগনি হায়না ঐহাক্না থাজবা থম্মি। মসিনা পব্লিক ওরিএন্তেদ গবর্নেন্সকী মোদেল অমা ওইনা মীয়ামগী সেবা লেপ্তনা তৌগনি। ঐহাক্তি স্বাগত অসি চহি 20 হৌখ্রে হায়বা খঙলুদ্রে, থবক মথং মথং পাংথোক্তুনা চৎখিবদা মতম হৌখিবা খঙহৌদে। অদুবু চহি 20গী মতুংদা থৌরম অসিগী পাউজেল লাকপা মতমদা ঐহাক্না নিংশিংবা ঙমখি। চহি 20গী মতুংদা অদোমগী মরক্তা পুনবগী খুদোংচাবা অসিগীদমক্তা ঐহাক্না য়াম্না নুংঙাইবা ফাওই। সরকারগী খোঙথাং অমগী মসিগুম্বা থৌরম শীনবা অসিদা ঐহাক্না নুংঙাইজৈ, মসিনা অতোপ্পদা ইথিল পীগনি। স্বাগত খোঙথাংনা হান্নদগী হেন্না থৱাই য়াওনা মখা চত্থবা হায়বসি ঐগী অপাম্বনি। মসিমক পাংথোক্কনি হায়বসু ঐহাক্না থাজবা থম্মি। ঐহাক্না গুজরাতকী ইচিল ইনাও খুদিংবু থাগৎচরি। ঙসিদগী চয়োল অমগী মতুংদা মে 1দা গুজরাত হৌদোকখিবগী থৌরম পাংথোক্কনি অদুগা গুজরাত্তি মশাগী হৌদোকপা নুমিৎ অসিসু চাউখৎ থৌরাং পুরকপগী থৌরম হেক্তা ওন্থোকই। চাউখৎ থৌরাংগী নুমিৎ অসিগীদমক্তা নিংথীনা শেম শাবগী থবক চত্থরমগনি। মসিগীদমক্তা ঐহাক্না পুম্নমক্কী মফমদা য়াইফ পাউজেল পীজরি। থাগৎচরি।
