মাহতরী বন্দনা য়োজনাগী মখাদা অহানবা ইন্স্তোলমেন্ত থাদোকখ্রে
ছত্তিসগরগী স্কীম অসিনা স্তেত অসিগী ময়ুম পাল্লবা ইলিজিবল ওইবী নুপীশিংদা থাগী ওইনা দি.বি.তি.দা লুপা ১০০০গী শেলগী তেংবাং পীগনিনমস্কার জী!
ছতিসগরগী মুখ্য মন্ত্রী, শ্রী বিষ্ণু দেও সাইজী, রাজ্য সরকারগী মন্ত্রী পুম্নমক, এম.এল.এ., মফমসিদা পুল্লিবা অতোপ্পা মীথুংলেন, জয় জোহার, য়াইফ পাউজেল পীজরি!
ঐহাক্না ইমা দান্তেশ্বরী, ইমা বম্লেশ্বরী অমসুং ইমা মহামায়াগী মফমদা ইকায় খুম্নবগা লোয়ননা ইকোক নোঞ্জরি। ঐহাক্না ছতিসগরগী ইমা ইবেল অমদি ইচে-ইচলশিংগী মফমদা থম্মোই শেংনা ইকায় খুম্নজরি। ঐহাক্না ছতিসগরদা লুপা করোর 35,000গী প্রোজেক্ত কয়া চয়োল অনিগী মমাংদা শঙ্গাখি অমসুং উরেপ উয়ুং তমখি। ঙসিদি, ঐহাক্না নুপীশিংবু মপাঙ্গল হাপকদবা মাহতরী বন্দনা য়োজনা হৌদোকপগী খুদোংচাবা অমুক ফংজরে। মাহতরী বন্দনা য়োজনাগী মখাদা ছতিসগরগী ইমা অমসুং ইচে-ইচল লাক্ষ 70 হেনবগী মফমদা থা খুদিংগী লুপা 1,000 পীনবা ৱারেপ লৌখিবনি। বি.জে.পি. সরকারনা ঙসিদি ৱারেপ অদু থবক্তা ওন্থোক্লে। ঙসিদি, মাহতরী বন্দনা য়োজনাগী মখাদা লুপা করোর 655কী অহানবা ইন্সতোলমেন্ত য়েন্থোক্লে। ঐহাক্না মশিং য়াম্লবা ইচে ইচল কয়াদা স্ক্রীন্দা উরি। মশিং য়াম্লবা অদোম ইচে ইচলশিংনা তোঙান-তোঙানবা মফমদা পুন্দুনা ঐহাক্কী ইফমদা থৌজানবীবগী মতৌ উবসিদা ঐহাক্না য়াম্না নুংঙাইবা ফাওই। ঙসিগী থৌরম অসিদি য়াম্না মরু ওইবা থৌরম অমনি, তসেংবদি, ঐহাকশু অদোমগী নাক্তা তিল্লমগদবনি। অদুবু হান্না লেপ্নখিবা ৱাফম খরনা মরম ওইরগা ঐহাক্তি উত্তর প্রদেশতা লৈরে। ইমা-ইবেন অমসুং ইচে-ইচলশিং, ঐহাক্না ৱা ঙাংজরক্লিবা অসি কাশীদগীনি। ঐহাক্না ঙরাং অহিংদা ইশাবু বাবা বিশ্বানাথকী খুয়াখাদা শিন্নজখি, ঐহাক্কী লৈবাক মীয়ামগী নুংঙাই য়াইফনবা থৌনীজখি, মহাকপু লাৎচখি। কাশী শেংলবা শহর অসিদা লৈরিবা বাবা বিশ্বানাথকী লমদম অসিদগী পুম্নমকী মফমদা থাগৎপগা লোয়ননা য়াইফ পাউজেলশু পীজরি। নুমিৎ নিনিগী মমাংদা শিবরাত্রী পাংথোকখ্রে, অদুগা শিবরাত্রীনা মরম ওইরগা ঙসিগী থৌরম অসি নুপীশিংগী নুমিৎ, মার্চ 8তা শীনবদা খুদোংচাদবা থেংনখি। নুপীগী নুমিৎ মার্চ 8গা শিবরাত্রীগা চপ মান্ননা তাখ্রে, অদুগা ঙসিনা, অদোম খুদিংনা লুপা 1000 ফংলে, মসিদগী হেন্দোক্লগা অদোম পুম্নমক্না মসিদগী হেন্না শক্তী লৈবা খুদোল অমসু ফংজরিবনি, মদুদি করিনো হায়বদা, অদোম্না বাবা ভোলেগী শহরদগী বা ভোলেগী থৌজাল ফংলবনি। মসিগী শেনফম অসি অদোমগী একাউন্ততা থা খুদিংগী হাপ্লক্কনি হায়না ঐহাক্না ইমাশিংগী (মাহতরী) মফমদা থাজবা পীজরি। ঐহাক্না ছতিসগরগী বি.জে.পি.গী সরকারদা থাজৈ, অদুনা মসিগী গেরেন্তী অসি পীজরিবনি।
ইমা অমসুং ইচে-ইচলশিং,
ইমা অমসুং ইচে-ইচলশিংদা পাঙ্গল হাপ্লবা মতমদা ইমুং অপুনবনা মপাঙ্গল লৈরকই। মরম অদুনা, দবল ইঞ্জিন সরকার অসিগী খ্বাইদগী মকোক থোংবা প্রাইওরিতী অসিদি ঐখোয়গী ইমা অমসুং ইচে-ইচলশিংগী য়াইফ য়ুম্বালনি। ঙসিদি, ইমুং কয়ানা পক্কা য়ুম ফংনরি, মসিসু নুপীশিংগী মমিংদা রেজিস্তর তৌবা ঙাক্তনি। মমল অহোঙবা উজ্বালা গ্যাস সিলিন্দরশিংশু নুপীশিংগী মমিংদা পীরি। জন ধন একাউন্তকী চাদা য়াংখৈ হেনবশু নুপীগী মিংদা হাংবনি।
মুদ্র লোন কয়া থাদোকখ্রিবা অসিগী মনুংদগী চাদা 65 অসিদি ঐখোয়গী নুপীশিংনা – ঐখোয়গী ইচে ইচল, ইমা, অখন্নবা ওইনা, ঐখোয়গী নহা ওইরিবী ইচানুপীশিংনা ফংলিবনি। মখোয়না তুংলমচত্তা খোঙদাদুনা লোনশিং অসিগী মতেংদগী মশাগী কারবার কয়া হৌদোক্নখ্রে। মমাংগী দিকেদশিং অসিদা ঐখোয়গী সরকারনা সেল্ফ হেল্প গ্রুপকী নুপী করোর 10 হেনবগী পুন্সিদা অহোংবা পুরকখ্রে। ঐখোয়গী সরকারগী খোঙথাংশিংগী মরমদগী, লৈবাক শিনবা থুংবদা লাক্ষপতি দিদি করোর 1 হেন্না থোক্লকখ্রে, মখোয়না খুঙ্গংগী খুদিংদা শেন্মিৎলোনগী মশক থোকপা শাফু অমা ওইরে। মায় পাকপা অসিনা পুক্নিং থৌগৎলদুনা, ঐখোয়না লৈবাক্কী নুপী করোর 3বু মপাঙ্গল হাপ্তুনা “লাক্ষপতি দিদি” ওইহন্নবা মিৎয়েং শানবা পান্দম অমা থম্লি। নমো দ্রোন দিদি স্কিম অসিনা নুপীশিংবু মপাঙ্গল হাপ্পগী অনৌবা লম্বী অমা য়াৎলে। ঐহাক্না নমো দ্রোন দিদিগী অচৌবা থৌরম অমা হয়েং শীন লাঙলি। নমো দ্রোন দিদিনা পায়খৎলিবা মশক নাইরবা থবকশিং য়েংনবা ইশানা অয়ুক্কী পুং 10-11দা ইশাগী তি.বি. থাবীয়ু হায়জরি। অদোম্না মসিবু উরুবদা তুংগী মতমদা থৱাই য়াওনা শরুক য়ানীংবগী ইথিল অমা ফাওগনি। স্কিম অসিগী মখাদা, বি.জে.পি. সরকারনা নুপীশিংদা দ্রোন পীথগনি অমসুং দ্রোন পাইলোত ওইনবা ত্রেনিং পীগনি। “ঐহাক্তি সাইকল ফাওবা থৌবা হৈরমদে, অদুগা ঙসিদি ঐহাক দ্রোন পাইলোত অমা ওইরে” হায়না পাউদম্লকখিবী নুপী অমা ঐহাক্না ঙসিশু নীংশিংলি। খোঙথাং অসিনা লৌউবগী থৌওংবু মতমগা চুনহনগনি অমসুং নুপীশিংগী অহেনবা শেন্থোক লৈহনগনি। ঐহাক্না স্কিম অসি দিল্লীদগী হয়েং হৌদোক্লগনি, মসিদা পুম্নমক্না শরুক য়াবীনবা ঐহাক্না অমুক্কা হন্না নীংশিংজরি।
ইমা অমসুং ইচে ইচলশিং,
ইমুং অমগী মীওইশিংনা মশা মউ ফবা মতমদা ইমুং অদুনা নুংঙাই য়াইফরকই অমসুং ইমুং মনুংগী নুংঙাই য়াইফবা হায়বসি নুপীশিংগী হকশেলগী য়াম্না মখা পোল্লি। মীরোল্লিঙৈ মতমদা মমা ওইবী অমসুং পীক্লিবা অঙাংগী মোর্তেলিতী রেত অসি মমাংদা য়াম্না কীনিংঙাই ওইরম্মি। ৱাফম অসিদা মিৎয়েং চঙবা ওইনা, ঐখোয়না লেম্না তীকা থাবগী প্রোগ্রাম হৌদোকখি অমসুং মীরোনবী নুপীশিংদা লুপা 5000গী তেংবাং পীখি। অহেনবা ওইনা, আশা অমসুং আঙ্গনৱারী থৌমীশিংনা লুপা লাক্ষ 5 ফাওবগী লেম্না লাইয়েংবগী খুদোংচাবা ফংনরে। ইমুংদা অমাংশঙ লৈতবনা মমাংগী মতমদা ঐখোয়গী ইচে ইচল অমসুং ইচানুপীশিংনা ইকায়বা য়াম্না নংনরম্মি। ঙসিদি, য়ুমথোং খুদিংদা নুপীশিংগী ‘ইজৎঘর’ নত্ত্রগা অমাংশঙ লৈনরে, মসিনা মখোয়গী অৱাবা কয়া কোকহনবগা লোয়ননা হকশেলগী শিংনবা কয়া হন্থহল্লে।
ইমা অমসুং ইচে ইচলশিং,
পার্তী কয়া অমনা মীখল মমাংদা অচৌবা ৱাশক কয়া শক্নৈ, অতিয়াদগী থৱানমিচাক পুদুনা লাক্কনি, অদোমগী খুয়াখাদা থমগনি হায়না ক্লেম তৌনবা ঙাক্তনি। অদুবু, বি.জে.পি.গুম্বা মশাগী অনিংবা মমুৎ তানা খঙবা পার্তীখক্তনা মশাগী ৱাশক ঙাকই। অদুনা, বি.জে.পি. সরকার শেমখ্রবা তেল্লবা মতমগী মনুংদা ঐখোয়না মাহতরী বন্দনা য়োজনাগী ৱাশক ঙাক্লিবনি। মায় পাকপা অসিগীদমক্তা ঐহাক্না মুখ্য মন্ত্রী, শ্রী বিষ্ণু দেওজী অমসুং মহাক্কী অপুনবা তীম অমসুং ছতিসগর সরকারবু থাগৎচরি। মসিনা মরম ওইরগা মীয়াম্না অসুম্না হায়নরবনি, “মোদীগী গেরেন্তী হায়বদি ৱাশক ঙাক্কনি হায়বগী গেরেন্তীনি”। ছতিসগরগীদমক্তা পাংথোক্কনি হায়না মীখলদা হায়খিবা ৱাফম কয়া থবক্তা ওন্থোক্নবা বি.জে.পি. সরকারনা থৱাই য়াওনা হোৎনরি। ছতিসগরদা পক্কা য়ুম লাক্ষ 18 শাগনি হায়না ঐহাক্না অদোমদা ৱাশকখি। সরকার হেক শেমখিবা নোংমগী মতুংদা মুখ্য মন্ত্রী শ্রী দিওজী, মহাক্কী কেবিনেত অমসুং ছতিসগর সরকারনা থবক হৌদুনা প্তোজেক্ত অসি পায়খৎপা হৌখি। চহি অনিগী পীথোক্তনা লৈরিবা ছতিসগরগী ফৌ থাবা লৌমীশিংগী বোনস অসিসু পীথোক্লগনি হায়না ঐহাক্না গেরেন্তী পীজরি। ছতিসগর সরকারনা অতলজীগী মপোক নুমিত্তা লৌমীশিংগী একাউন্ততা লুপা করোর 3700 হাপখ্রবনি। ঐখোয়গী সরকারনা মফমসিদা ক্বিন্তল অমদা লুপা 3100 পীদুনা অপুনবা ফৌ লৈগনি হায়না ৱাশকখি। ঐখোয়গী সরকারনা ৱাশক অসি ঙাকপা ঙম্বসিদা অমসুং ফৌ লাক্ষ তন 145 লৈদুনা অনৌবা রেকোর্দ থমখিবদা ঐহাক্না নুংঙাইবা ফাওই। অহেনবা মতৌ অমনা, কৃশক উন্নতি য়োজনা হৌদোকখ্রে, হন্দক লৈশিনখিবা ফৌগী মমলদা থোকপা খেন্নবা শেনফমশিং লৌমী ইচিল ইনাওশিংদা য়েন্থোক্লগনি। মসিগুম্বা য়াইফ য়ুম্বালগী খোঙথাংশিং অসি মথংগী চহি মঙাদসু চৎনখিগনি। মসিদা ইমা অমসুং ইচে ইচলশিংনা থৱাই য়াওনা শরুক য়াবীরি। ছতিসগরগী দবল ইঞ্জিন সরকারনা মসিগুম্বা মতৌ অসিদা অদোমগী সেবা তৌগনি অমসুং শকখিবা ৱাশক খুদিংমক ঙাক্কনি হায়বগী ঐহাক্না থাজবা থম্লি। ঐহাক্না ঙসি ইচে ইচল লাক্ষ কয়া ইমাঙদা উজরি। মসিগুম্বা শক্তম অসিদি মমাংদা অমুক্তা থোকখিদ্রি। ঐহাকসু অদোমগী মরক্তা তিঞ্জরমগদবনি হায়না খঞ্জৈ। অদুবু, ঐহাকপু ঙাকপীগনি। ঐহাক্না কাশীগী বাবা বিশ্বানাথকী মফমদগী ৱাফম থমজরক্লিবা অসিগা লোয়ননা ঐহাক্না মীপুম খুদিংগী মফমদা বাবাগী থৌজাল পীজরি। পুম্নমকপু থাগৎচরি, পুম্নমক্না নুংঙাই য়াইফবা ওইবীয়ু।
