তোঙান তোঙানবা স্তেতশিংদগী লেঙবিরক্লিবা ইকায়খুম্নরবা গভর্নরশিং, মুখ্য মন্ত্রী পুম্নমক, কেন্দ্র অমদি স্তেত লৈঙাক্কী মন্ত্রীশিং, পার্লিয়ামেন্তকী মেম্বরশিং, অমদি লেজিসলেতরশিং, লোয়ননা ঐগী নুংশিজরবা ইচিল ইনাও, ইচে ইচল, ইমা ময়াম, খুঙ্গংদগী ঐগী লৌমী ইচিল ইনাওশিং, অমদি খ্বায়দগী মরুওইনা থৌরমসিদা শরুক য়াররিবা ঐগী নুংশিজরবা নহা ওইরিবা মরুপশিং।
ঙসি, খুঙ্গং খুদিংদগী মীওই লাখ কয়া কয়া তিল্লরি। ঐগীদমক্তদি লৈবাক পুম্বা ঐগী ইমুংনি, মরম অসিনা ময়াম পুম্নমক ঐগীদি ইমুং মনুংনি। ঙসি, ঐনা ঐগী ইমুং মনুংগী মীওইশিং উননবা তাঞ্জা অমা ফংজরে। অরাপ্পদগী ওইরবসু, অদোম্না থৌরমসিদা শরুক য়াবিরনসিনা ঐঙোন্দা পাঙ্গল হাপ্লি। ঐনা ময়াম পুম্নমকপু চিল্লবা মতম কাইথোকপিদুনা থৌরমসু শরুক য়াবিবগীদমক তরাম্না ওকচরি।
ঙসি, ভিক্সিত ভারত সংকল্প য়াত্রা (চাওখৎপা ভারতকী ফিরেপ লৌবা খোঙচৎ) নুমিৎ ১৫নি মপুং ফারে। তশেংবদি খোঙচৎ অসি হৌরকপদা মতৌ করম্না হৌগনি, করম করম্বা থৌরাংশিং য়াৎকনি হায়বগী খুদোংচাদবা খরা মায়োক্নখি, অদুবু হৌখিবা নুমিৎ নিনি হুম্নিসিদা, ঐনা পাউ কয়া তাবা ফংলি অমদি স্ক্রীন্দা মীওই লিশিং কয়ানা খোঙচৎসিদা শরুক য়ারবা উরি। মতৌ অসুম্না মীয়াম্না ‘বিকাস রথ’ (চাওখৎপগী কাং)গী খোঙচৎ অসি হৌখিবা নুমিৎ ১৫নিসি চঙশিল্লকখিবনি হায়না ঐঙোন্দা পাউদম্লক্লি। লৈঙাক্না থৌরাং অসি হৌদোকখিবদা, ‘বিকাস রথ’ হায়না মিংথোল্লবসু, মীয়াম্না মসিদি রথ নত্তে, মোদীগী ৱশক্কী কাংনি হায়নরি। ৱাফমসি তাবদা ঐ তশেংনা নুংঙাই; অদোম্না মোদীগী ৱাশক্কী কাংদা কয়া য়াম্না থাজবা থম্বিরিবা। মরম অসিনা, অদোম্না মোদীগী ৱাশক্কী কাং হায়না মিংথোনবিবসদা ঐনা থমজনিংবদি মোদীনা মতম পুম্নমক্তা শকখিবা ৱাশক ঙাক্তুনা লাক্লি হায়বসিনি।
অদুগা ঙাইহাক্কী মমাঙদা, ঐনা বেনিফিসরী কয়াগা ৱারী শাননবগী তাঞ্জা ফংখি। ঈরৈবাক্কী ইমা অমদি ইচে ইচলশিং ইচঙ থৌনা শরুক য়ারিবা, থাজবা থমদুনা অচেৎপা ফিরেপকা লোয়ননা মখোয়না লেপ্লিবা খোঙফম উবদা ঐ তশেংনা নুংঙাইবা ফাওই। অদুগা হৌজিক ফাওবদা, মোদীগী ৱাশক্কী কাং অসিনা পঞ্চায়ত ১২,০০০ হেন্না য়ৌখ্রে। মীওই লাখ ৩০ রোমনা মসিগী কান্নবা ফংলি, মসিদা শরুক য়ারি, খন্ন-নৈনরি, ৱাহং কয়া হংলি, মখোয়গী মমিং হাপচিল্লি, মখোয়না মথৌ তাবা ৱাফমশিংগী মরমদা ফোর্ম কয়া মেনশিল্লি। অদুগা মরুওইবা ৱাফমদি, ইমা অমদি ইচে ইচলশিংনা মশিং য়াম্না মোদীগী ৱাশক্কী কাং অসিদা য়ৌরক্লি। বলবীর জীনা পনবিরকপগুম, লৌউ-শিংউগী লমদা লৈরিবা মফম কয়াদগী মীয়াম্না মখোয়গী থবক তুংওইনরম্লগা থৌরমসিদা শরুক য়াররি। মসিনা মীয়াম্না চাওখৎপা পুরকপদা কয়া য়াম্না থাজবা থম্লিবগে হায়বা উৎলি। ঙসি, খুঙ্গং কয়াদগী মীওইশিংনা চাওখৎপগী মরুওইবা ৱাফমশিং মশক খঙলক্লি।
মখোয়না ‘ভিক্সিত ভারত সংকল্প য়াত্রা’ অসিদা শরুক য়ারবতা নত্তনা, মীয়াম্না মথুম মরাং হৌনা মসিবু তরাম্না ওক্তুনা, নীংথিনা শেম শারি অমদি খুঙ্গং খুদিংদা মরী লৈনবা ঈ-পাউশিং শন্দোক্লি। মীয়াম্না কেম্পেন অসিবু মপুং ফাবা মীয়ামগী ইহৌ অমা ওইহল্লে। মীয়াম্না ‘ভিক্সিত ভারত রথ’ অসিবু তরাম্না ওকপিবা, মখোয়না কাং অসিবু চিংলিবা মওং মতৌ তশেংনা হায়রবদা খল্লুবা ৱাখলদগী হেন্দোক পাথোকপা ওইররি। লৈঙাক্কীদমক্তা থবক তৌরিবা ঐগী মরুপশিং, ঐগী শিন্মী ইচিল ইনাওশিংবুসু লাইগী মতৌগুম তরাম তরাম ওক্লি। খুন্নাইগী কাঙলুপ খুদিংদা লৈবা নহা অমদি মীয়াম্না ‘ভিক্সিত ভারত য়াত্রা’ অসিদা শরুক য়াররিবা মওং, অমদি ঐনা ভিদিওদা উরিবা তোঙান তোঙানবা মফমগী মওং মতৌশিং য়াম্না পুক্নিং থৌগৎনিংঙাইগী মশক্নি। অদুগা ঐনা ময়াম পুম্নমকপু মখোয়গী খুঙ্গংগী ৱারীশিং সোসিএল মীদিয়াদা থাগৎলকপসু উরি। অদুগা ঐনা থমজনিংবা ৱাফমদি, হায়রিবা ৱারীশিং অদু নামো এপ্তসু থাগৎপিরকউ, মরমদি ঐনা নামো এপ্তা থাগৎলক্লিবশিংবুদি নুমিৎ খুদিংগী য়েংই। ঐনা লৈবাক্কী মফম অমদা চৎপা খুদিং, করম করম্বা খুঙ্গংশিং অমদি স্তেতশিংনা করি করি তৌরি অমদি নহাশিংনা মওং অমদা ‘ভিক্সিত ভারত’কী এম্বেসেদর ওইরকপশিং ঐনা লেপ্পা লৈতনা য়েংলি। মখোয়গী ইচঙ থৌবা মতৌ তশেংনা অঙকপগী মশক্নি।
নহাশিংনা মখোয়গী থবক্কী মতাঙদা ভিদিও চাং নাইনা থাগত্তুনা মীয়ামদা ৱাফম কয়া শন্দোক্লি। মোদীগী ৱাশক্কী কাং য়ৌরক্কদবা নুমিৎ নিনি ৱাৎলিঙৈদা খুঙ্গং খরদা মীয়াম্না অচৌবা শিৎ শেংবগী থবক থৌরমশিং পায়খৎপা ঐখোয়না উরি। মসি মখোয়না করিগীদমক তৌরিবনো? মরমদি মোদীগী ৱাশক্কী কাং লাকপগীনি। হায়রিবা ইচঙ থৌবা অমদি ফিরেপ অসি তশেংনা পুক্নিং থৌগৎনিংঙাইগী মশক্নি।
অদুগা মীয়াম্না ঈশৈ নোংমাইগী খুৎলায়শিং খোঙবা, দিৱালীগী মতৌগুম ফিজোল অনানবা শেত্তুনা খুঙ্গংশিংদা লৈবসু উরি। মীয়াম্না হায়রিবা ৱাখল্লোন অসিদা থবক পায়খৎলি। ‘ভিক্সিত ভারত সংকল্প য়াত্রা’বু উরুবা মীপুম খুদিংমক্না ভারত হৌজিক্তি লেপ্লরোই; ভারত মাঙদা চঙশিল্লি হায়না হায়নরি। ভারতনা মাগী পান্দমশিং লান্থোক্তুনা চৎপা মথৌ তাই। ভারতনা লেপ্পসু তৌরোই অমদি চোকথবসু লৈরোই। হৌজিক্তি, ‘চাওখৎপা ভারত’ অমা পুরকপা হায়বসি মীওই করোর ১৪০গী ফিরেপ্নি। অদুগা মীয়াম্না ৱাশক অসি শক্লবা মতমদা, লৈবাকসি শোয়দনা চাওখৎপা ঙমগদৌরিবনি। হন্দক দিৱালী মনুংদা মীয়াম্না, লমদমসিগী পোত্থোকশিং লৈদুনা, লুপা করোর কয়াগী পোত্থোকশিং লৈদুনা, ভোকেল ফোর লোকেলগী কেম্পেন পাঙথোকখিবা ঐনা উখি। মসি মশক থোকপা মায় পাকপা অমনি।
ঐগী ইমুং মনুংশিং,
‘ভিক্সত ভারত সংকল্প য়াত্রা’গী মথুম মরাং হৌবা অসি লৈবাক্কী কাচিন কোয়া শিনবা থুংনা উবা ফংলি। মসিগী মরমদি, মীয়াম্না মোদীবু হৌখিবা দেকেদ অসিদা থবক কয়া পায়খৎখিবা উখ্রে, অমদি মসিগী মহৈনা, মখোয়না ভারত লৈঙাক্তা চাওনা থাজবা থম্লি। মতম অমদা মমাঙগী লৈঙাকশিংনা মখোয় মশাবু মীয়ামগী মপু ওইনা লৌরম্মি। মসিনা মরম ওইরগা, লৈবাক্কী মীয়ামগী য়াম্লবা শরুক অমদি তঙায় ফদনা চঙদ্রবা য়াদ্রবা ফেসিলিতীশিং নীংতম্লবা মতুং দেকেদ কয়া অমা ফংদনা লেল্লম্মি। মখোয়না নাক চাবা মীওইশিং য়াওদনা লৈঙাক্কী দিপার্তমেন্তশিংদা চঙবা ঙম্লমদে। অসিগুম্বা নাক চাবা মীওইশিংগী মফমদা শেল পীজদ্রিবা ফাওবা, মখোয়না চে-চাং অমত্তা লৌবা ঙম্লমদে। য়ুম লৈতবা, তোইলেৎ লৈতবা, ইলেক্ত্রিসিতী কন্নেক্সন লৈতবা, গ্যাস কন্নেক্সন লৈতবা, পেন্সন ফংদবা, বেঙ্ক একাউন্ত লৈতবা – অসিগুম্বা ফীভমসিদনি লৈবাকসিনা লৈরম্লিবা। লৈবাকসিগী অপুনবা মীশিংগী তঙ্খায় হেনবদি অমম্বা ফিজং অমগী মরুমদা লৈরম্মি, অমদি মখোয়না বেঙ্ক একাউন্ত অমা ফাওবা হাংবা ঙমজরমদে হায়বসি তাবদা ঙসিদি অদোম ঙক্কনি। মখোয়গী মঙলানশিং কায়দুনতা লাকখি। মীওই খরখক্না, কনাগুম্বা অমগী মতেঙ ফংদুনা লৈঙাক্কী ওফিসতা চঙনবগী থৌনা লৈরম্মি অমদি মখোয়গী থবকশিং শেল পীজরবা মতুংদা তৌহন্নরম্মি। মখোয়না করিসু লৈতবা থবক মচা অমগীসু শেল চাউনা পীজবা তারম্মি।
লৈঙাক্কী মতাঙদসু থবক খুদিংদা রাজনিতিগী মমি তারম্মি। মখোয়না থম্লম্বা মীৎয়েঙদি মীখল মতমদা ভোত বেঙ্কতা ওইরম্মি। মখোয়না ভোত বেঙ্ককী মশান্না অমা শান্নরম্মি। করিগুম্বা মখোয়না খুঙ্গং অমদা চৎপা মতমদা, মখোয়না মখোয়দা ভোত পীরক্কদবা মফমদুখক্তদা চৎলম্মি অদুগা অতৈনা হন্না য়েংলমদে। করিগুম্বা মখোয়না লৈকায় অমদা চৎপা মতমদা, মখোয়দা ভোত পীরক্কদবা লৈকায়খক্তদা চৎলি অদুগা অতৈনা নাথৈবিরম্মি। অসিগুম্বা মীচঙ মীখায় নাইবা, অরানবা ৱায়েল অসিনা চৎনবী ওইরম্মি। মখোয়না ভোত খরখক ফংবা য়াই হায়না খনবা মফমশিংদনা মীৎয়েঙ খজিক্তমক চঙবিরম্মি। মরম অদুনা, মীয়াম্না অদুগুম্বা লৈঙাক অদুদা থাজবা থোইনা থম্লমদে।
ঐখোয়গী লৈঙাক্না অসিগুম্বা পেন্দবগী ফীভমসিদা অহোংবা পুরকখি। হৌজিক পাল্লিবা লৈঙাক্না মীয়ামদা খ্বায়দগী মরুওইবা মীৎয়েঙ থম্লি, মখোয়গী লাইগী মতৌগুম লৌরি। ঐখোয় মতিক ময়াই তান্নদে, অদুবু মীয়ামগী থৌগলগী ৱাখল্লোন্দা থবক তৌই। ঙসিমকসু, ঐনা হায়রিবা থৌগলগী ৱাখল্লোন অদুগা লোয়ননা ময়ামগা খুৎশম্ননা খুঙ্গং খুদিংদা চৎননবা ৱাশক্লি। ঙসি, লৈবাকসিনা অরানবা লৈঙাক্কী হৌখ্রবা মতম অদু তুংওইনরম্লে অমদি অফবা লৈঙাক পুরক্নবা মাঙদা চঙশিল্লি। অফবা লৈঙাক হায়বদি মীপুম খুদিংমক কান্নবা ১০০% ফংবদুনি, সেচুরেসন মপুং ফানা লৈবদুবুনি। কনাগুম্বা অমত্তা চিত্থ নান্থহৌহল্লোইদবনি; মীপুম খুদিংমক মখোয়গী ফংফম থোকপশিং ফংহনগদবনি।
লৈঙাক্না মীয়ামগী মথৌ তাবশিং খঙদোক্তুনা মখোয়দা মখোয়গী মঙমশিং ফংহনগদবনি। মসিনা মহৌশাগী ওইবা ৱায়েলনি অমদি তশেংবা খুন্নাইগী ৱায়েলনি। ঐখোয়গী লৈঙাক্কী মচৎ অসিনা মরম ওইরগা, “ঐখোয়গীদমক্তা কনানা করি খনবিরুগনি, ঐখোয়গী ৱাফম কনানা তাবিগনি, ঐখোয়গা কনানা উনবিগনি?” হায়না খল্লম্বা নাথৈবিদুনা থম্বিরম্লবা মীওই মিলিয়ন কয়াগী ৱাখল্লোন অদু লোইখ্রে। মদুতা নত্তনা, হৌজিক্তি মখোয়না লৈবাকসিদা মখোয়গী মঙমশিং ফংজরে, মখোয় ফংফম থোকপশিং ফংলে। “অদুগা ঐগী মঙম অমত্তা মৎখিবা য়ারোই, ঐগী মঙমশিং ফংহন্দবা য়ারোই অমদি ঐনা ঐগী ফংফম থোকপা মঙমশিং লৌগনি” হায়বা ৱাখল্লোন্দা মীয়াম্না মাঙদা চঙশিল্লি। ঐনা হৌজিক পুর্নগা ৱারী শান্নবা মতমদা, “ঐগী ইচানুপা অসি ইঞ্জিনিয়র ওইহনবা পাম্মি” হায়না মহাক্না হায়রকখি। অসিগুম্বা পান্দম অসিনা লৈবাক অসিবু চাওখৎপা লৈবাক ওইহনগদৌরিবনি। অদুবু মঙলিবা মঙলানশিং অসি ঐখোয়না চহি তরাগী মায় পাকপগী ৱারীশিং তাবা মতমদা মঙফাওনরে হায়বদু খঙগদৌরিবনি।
অদুগা অদোমগী মফমদা লাক্লিবা মোদীগী ৱাখক্কী কাং অসিনা, অদোম্না করি তৌখ্রবগে হায়বশিংসু তাক্লি। লৈবাক অসি চাওখ্রবা লৈবাক্নি, অমদি খুঙ্গং খরদা চিত্থ নান্থহৌবা মীওই খরদি অদুমক লৈরমগনি। অদুগা মখোয়গী থবক থৌরমশিং লাক্কদৌরিবা চহি মঙাসিদা মপুং ফানা পায়খৎনবগীদমক মোদীনা কনা কনা চিত্থ নান্থহৌবা লৈরিবগে হায়বা থিদোকপা লাক্লি। মরম অসিননি অদোম্না লৈবাক্কী মফম অমা হেক্তদা চৎলুবা মতমদা তারিবা খোঞ্জেল অমদি মীয়ামগী খোঞ্জেলনি। মখোয়না, থেংনরকপা ৱাফমশিংদা য়ুম্ফম ওইরগা মথম্মোয়দগী ৱা ঙাংলকই, মতাঙদুদনি থাজবগা অতৈ ৱাফমশিংদা ইতিন্নরিবা, মোদীগী ৱাশক হৌরক্লিবা! মরম অদুননি মোদীগী ৱাশকপু মীয়াম্না শোন্নরিবা!
মরূপশিং,
‘ভিক্সিত ভারত’কী ৱাশক অসি মোদীগী নৎত্রগা লৈঙাক অমগীখক্তা নত্তনা। মসি ‘সবকা সাথ’ কা লোয়ননা মীপুম খুদিংগী মঙলানশিং মঙফাওনহন্নবগী ৱাশক্নি। মসিনা অদোমগী মঙলানবুসু মঙফাওনহনবা পাম্মি। মসিনা অদোম্না নীংজবশিং থুংগদবা ফীভম অমা শেমগৎপা পাম্মি। ‘ভিক্সিত ভারত সংকল্প য়াত্রা’ অসিনা লৈঙাক্কী থৌরাং অমদি খুদোংচাবশিং পুদুনা নাথৈবিদুনা লাক্লবা, মসিগী মরমদা পাউ অমত্তফাওবা তাদ্রিবা মীয়ামগী মফমদা লাক্লি। করিগুম্বা মখোয়না পাউ ফংলবসু মদু করম্না তৌগনি হায়বা খঙদে। ঙসিদি, মীয়াম্না তোঙান তোঙানবা মফমদগী মমিশিং নামো এপ্তা থাগৎলক্লি। ঐনা মখোয়শিংদু চাং নাইনা উই। তোঙান তোঙানবা মফমশিংদা দ্রোন দিমোন্সত্রেসন, হেল্থ চেক-অপনচিংবশিং পাঙথোক্লি। ত্রাইবেলগী মফমশিংসা সিকল সেল এনেমিয়া লৈব্রা হায়না থিজিল্লি। খোঙচৎ অসিনা য়ৌখ্রবা পঞ্চায়তশিংদা দিৱালীগী মতৌগুম পাঙথোক্লি। সেচুরেসন ফংলবা পঞ্চায়ত কয়া লৈরি; মফমশিংসিদা মীপুম খুদিংমক্না মীচঙ মীখায় নাইবা তৌদনা মখোয়না ফংফম থোকপা খুদিং ফংলি। বেনিফিসরী চিত্থ নান্থহৌবা লৈবা মফমশিংদা, মখোয়দা হৌজিক পাউ পীরি, অমদি মতুংদা মখোয়দা স্কীমগী কান্নবশিং ফংহনগনি।
মখোয়বু খুদক্তা উজ্জ্বল অমদি আয়ুস্মান কার্দনচিংবা স্কীমশিংদা মিং হাপ্লি। অহানবা তাঙ্কক্তা, উজ্জ্বলগী মখাদা ইচে ইচল অমদি ইচানুপী ৪০,০০০ হেনবদা গ্যাস কন্নেক্সন ফংহনখ্রে। খোঙচৎ অসিগী মনুংদা, মাই ভারত ভলুন্তিয়র কয়াসু রেজিস্তর তৌরক্লি। নুমিৎ খরনিগী মমাঙদা, ঐখোয়না লৈবাক শিনবা থুংবগী ওইবা নহাশিংগী লূপ অমা শেমখি। মসিবু মাই ভারত হায়না মিংথোনখি। ঐনা হায়জনিংবা ৱাফমদি পঞ্চায়ত খুদিংদা নহা মশিং হেক য়ারিবমখৈ য়াম্না মাই ভারত কেম্পেন্দা শরুক য়াশিনবিয়ু হায়বসিনি। মসিদা ঈ-পাউ পীবিয়ু, অমদি ঐনা মরক মরক্তা ময়ামগা ৱারী ৱাতায় শান্নজগনি। অদোমগী মতিংনা ‘ভিক্সিত ভারত’ শেমগৎনবগী শাফু ওইহনসি; ঐখোয় পুন্না থবক পায়খৎমিন্নসি।
ঐগী ইমুং মনুংশিং,
খোঙচৎ অসি নবেম্বর ১৫দা হৌদোকখিবা মতমদা, মসি ভগবান বির্সা মুন্দাগী মপোক কুমওন থৌরমদা হৌখিবনি হায়বা অদোম নীশিংবিরমগনি। নুমিত্তু ‘জঞ্জাতিয় গৌরব দিবস’ (ত্রাইবেল প্রাইদ দে) নুমিৎনি। অদুগা ঐনা খোঙচৎ অসি ঝার্খন্দগী মনুং হঞ্জিনবা উমংগী অপীকপা মফম অমদগী হৌদোকখিবনি। ঐনা মসি অচৌবা মওংদা ভারত মন্দপম নৎত্রগা য়সোভুমিদগী হৌদোক্লম্বা য়াই। অদুবু ঐনা মদু তৌখিদে। মীখলগী ৱাফমবু তুংওইনরম্লগা, ঐনা ঝার্খন্দগী খুন্তিগী ত্রাইবেল মীয়াম মরক্তা চৎখি, অমদি মফমদুদা খোঙচৎ অসি হৌদোকখি।
অদুগা খোঙচৎ অসি হৌদোকখিবা নুমিত্তুদা, ঐনা ৱাফম অমগসু হায়খি। ‘ভিক্সিত ভারত’কী পান্দম অসি ঐখোয়গী অমৃৎ য়ুম্বীশিংদা লৈ হায়না ঐনা হায়খি। ঐখোয়না অমৃৎ য়ুম্বীশিংদা মীৎয়েঙ থম্বা মথৌ তাই। অহানবা অমৃৎ য়ুম্বীদি ঐখোয়গী নুপীগী মতিক্নি, অনিসুবা অমৃৎ য়ুম্বীনা ঐখোয়গী নহাশিংগী মতিক্নি, অহুমসুবা অমৃৎ য়ুম্বীনা ঐখোয়গী লৌমী ইচিল ইনাওশিংনি, অদুগা মরিশুবা অমৃৎ য়ুম্বীনা ঐখোয়গী লায়রবা ইমুংশিং অসিনি। ঐগী ইফমদদি, মখোয় অসি লৈবাকসিগী অচৌবা ফুরুপ মরিনি। ঐগী ইফমদদি খ্বায়দগী চাউবা ফুরপ অসি লায়রবশিংনি। ঐগী ইফমদদি খ্বায়দগী চাউবা ফুরুপ অসি নহাশিংনি। ঐগী ইফমদদি খ্বায়দগী চাউবা ফুরুপ অসি নুপীশিংনি। ঐগী ইফমদদি খ্বায়দগী চাউবা ফুরুপ অসি লৌমীশিংনি। হায়রিবা ফুরুপ মরি অসি মপাঙ্গল হাপ্লবা মতমদা ভারতনা চাওখৎকদৌরিবনি। অদুগা হায়রিবা মীওই কাঙলুপ মরিসিনা নুংঙাই য়াইফরবা মতমদা মীপুম খুদিংসু নুংঙাই য়াইফগদৌরিবনি।
হৌরকফমগী খেন্নবা লৈতনা, লৈবাকসিগী লায়রবা মীওইশিংগীদমক্তা, ঐনা মখোয়গী পুন্সি মহিং ফগৎহন্নবা অমদি লায়রবা কোকহন্নবা পান্দম থম্লি। লৈবাকসিগী নহাশিংগীদমক্তসু, মখোয়গী কাঙলুপ ফুরুপ ফনা ওইনিংবা ওইজসনু, ঐনা মখোয়গী থবক ফংননবগী অমদি মশানা মশাবু থবক পীজনবগী খুদোংচাবশিং শেমগৎপা পাম্মি। ফুরুপ কাঙলুপকী খেন্নবা থমদনা, লৈবাকসিগী নুপী খুদিংমক্কীদমক্তা, ঐনা মখোয়বু মপাঙ্গল হাপ্পা পাম্মি, মখোয়গী পুন্সিদা থেংনরিবা অৱাবশিং হন্থহনবা, অমদি মখোয়গী নমশিন্দুনা থম্বিরিবা মঙলানশিংদা মশা পানবিবা পাম্মি। ঐনা মখোয়গী মঙলানশিংদা অচেৎপা ফিরেপ হাপ্পিদুনা মখোয়না মঙফাওনদ্রিবা ফাওবা মখোয়গা লোয়ননা চৎমিন্নবা পাম্মি। কাঙলুপ ফুরুপকী খেন্নবা থমদনা, লৈবাকসিগী লৌমীশিংগীদমক, ঐনা মখোয়গী শেন্থোক হেনগৎহনবা পাম্মি, মখোয়গী মতিং হেনগৎহনবা পাম্মি, অমদি মখোয়গী লৌশিং শিংউগী থৌওংশিং মতমগা চুনবা ওইহনবা পাম্মি। ঐনা মখোয়গী লৌফমদগী পুথোরকপা পোত্থোকশিংদা মমল হাপ্পা পাম্মি। লায়রবা, নহা, নুপী অমদি লৌমী – হায়রিবা ফুরুপ মরি অসিবু মখোয়গী অৱা অনাশিংদগী কনদ্রিবা ফাওবা, ঐ ইংনা চিক্না ফমদুনা লৈবা ঙম্লোই। হায়রিবা থবকশিং অসি থৌনা লৈনা পায়খৎপা ঙম্নবা অমদি হায়রিবা ফুরুপ মরি অসিবু মখোয়গী পরৈ চেনবা ৱাফমশিংদগী মিং তমহনবা ঙম্ননবা ঐঙোন্দা থৌজাল পীনবিয়ু। হায়রিবা ফুরুপ মরি অসি মপাঙ্গল হাপ্লবা মতমদা লৈবাকসিগী ফুরুপ খুদিংমক মশানা মপাঙ্গল হাপচরক্কদবনি। মখোয়বু মপাঙ্গল হাপ্লবা মতমদা লৈবাক পুম্বসু মপাঙ্গল কনগদৌরিবনি।
মরুপশিং,
হায়রিবা ৱাখল্লোনসিগী পরিংদা, ‘ভিক্সিত ভারত সংকল্প য়াত্রা’ মনুংদা হায়বদি মোদীগী ৱাশক্কী কাং য়ৌরকপা মতমদা মশক থোকপা থবক অনি পায়খৎলি। থৌরাং অমনা নুপীশিং মপাঙ্গল হাপ্পা অমদি লৌউ-শিংউ অমসুং মনা মশিং থাববু তেক্নোলোজীগী খুত্থাঙদা মতমগা চুনহনবনি। অতোপ্পা থৌরাং অসিনা থৌগল অমদি অফবা ৱাখল্লোন অনি পুনশিনবদগী হেন্না চাউবা কেম্পেন্নি, মসিনা লায়রবা, লৱর-মিদ্দল-ক্লাস, নৎত্রগা ইনাক খুনবা মীওইশিং ওইরবসু, লৈবাক্কী মীপুম খুদিংদা অতাবা মমলদা হিদাক লাংথক ফংহন্দুনা কনাগুম্বা অমত্তবু মপুন্সি অদু অনাবা লোয়নহন্দনা হিংহন্নবগী পান্দম থম্লি।
ঐনা রেদ ফোর্ততগী খুঙ্গংগী ইচে ইচলশিংবু ‘দ্রোন দিদী’ ওইহন্নবা (দ্রোন তেক্নোলোজীগী মরমদা খঙহন্নবা) ৱাফম লাউথোকখি। অদুগা তেনখ্রবা মতমসিদা, গ্রেদ ১০, ১১ নৎত্রগা ১২ লোইরবা ঐখোয়গী খুঙ্গংগী ইচলশিং দ্রোন পাইবা হৈরে। মখোয়না লৌউ-শিংউবদা দ্রোন মতৌ করম্না শীজিন্নগনি, তিলহাৎ হিদাক করম্না কাপকনি অমদি হার করম্না চাইগনি হায়বা তম্লে। অসুম্না হায়রিবা ‘দ্রোন দিদী’শিং অসি ইকায় খুম্নবিফম থোকই; মখোয় য়াম্না থুনা হৈগল্লি। ঐগীদমক্তদি, থৌরম অসি ‘দ্রোন দিদী’শিংগী মফমদা ইকায় খুম্নবা উৎপা অমনি। মরম অদুনা, ঐনা থৌরম অসিবু ‘নমো দ্রোন দিদী’ হায়না মিংথোল্লবনি। খুঙ্গং খুদিংদা ‘দ্রোন দিদী’শিংবু ইকায় খুম্নবগা লোয়ননা কৌননবা, খুঙ্গং খুদিংদা ‘দ্রোন দিদী’শিংবু ইকায় খুম্নবা ফীভম লৈহন্নবগীদমক, ঙসি ঐখোয়গী ‘নমো দ্রোন দিদী’ থৌরম হৌদোক্লে। মরম অসিননি মীওই খরনা ঐঙোন্দা মমিং অসি কৌননবা হৌদোরকখিবা। কনাগুম্বা অমনা ‘নমো দ্রোন দিদী’ হায়না কৌরবদি, ইচল খুদিংগী ইকায় খুম্নবা হেনগৎলক্কনি।
অথুবা মতমদা, সেল্ফ-হেল্প গ্রুপ ১৫,০০০ ‘নমো দ্রোন দিদী’ প্রোগ্রামগা মরী শম্নহল্লগনি। হায়রিবা কাঙলুপশিং অসিদা দ্রোন পীগনি, অমদি খুঙ্গংগী ঐখোয়গী ইচে ইচলশিং ‘নমো দ্রোন দিদী’গী খুত্থাঙদা মীপুম খুদিংমক্কী ইকায়খুম্নবা ফংদুনা, লৈবাক অসিবু মাঙদা পুখৎপদা শরুক য়ারগনি। ঐখোয়গী ইচে ইচলশিং দ্রোন পাইলোৎকী ত্রেনিং ফংলগনি। ঐখোয়গী ইচে-ইচলশিং মরোমদোম লেপ্পা ঙমহন্নবগী সেল্ফ-হেল্প গ্রুপশিংগী কেম্পেনগী খুত্থাঙদা, দ্রোন প্রোগ্রাম অসিনা মখোয়গী মপাঙ্গল হাপ্লগনি। মসিনা ঐখোয়গী ইচে-ইচল অমদি ইচানুপীশিংগী মফমদা অহেনবা শেন্থোক লাকহল্লগনি। ঐনা মঙলিবা মঙলান্দি ইচে ইচল করোর অনিবু লাখপতি ওইহনবনি। ঐনা খুঙ্গংদা লৈবা, নুপীশিংগী সেল্ফ-হেল্প গ্রুপশিংদা থবক তৌরিবা ইচে ইচল করোর অনিবু লাখপতি ওইহনবা পাম্মি। য়েংবিয়ুও মোদীনা অপীকপা ৱাখল খনদে, মহাক্না ৱাখল খল্লকপা মতমদা, মদু ফংননবগী ফিরেপকা লোয়ননা খোঙ থাংদোরকই। মসিনা লৈবাকসিগী লৌমীশিংগী মফমদা দ্রোনগুম্বা মতমগা চুনবা তেক্নোলোজীবু অতাবা মমলদা ফংহনবা ঙমগনি হায়না ঐনা থাজৈ। মসিনা মখোয়গী হকশেলদা কান্নবা পীগনি, মতম মাঙহল্লোই, অমদি লেম্না মাঙখিগদবা তিলহাৎ হিদাক অমদি হারসু মাঙবগী চাং হন্থহল্লগনি।
মরূপশিং,
ঙসি, লৈবাকসিগী ১০,০০০ শুবা জন ঔসধী কেন্দ্র শঙ্গাবগী থৌরমসু পাঙথোক্লি অমদি ঐনা ১০,০০০ শুবা মফমদুগী মীয়ামগা লোয়ননা বাবাগী লমদগী ৱারী শাননবগী তাঞ্জা ফংজবা নুংঙাইবা পোকই। হৌজিক্তি, থবক অসি ঙসিদগী মাঙদা চঙশিল্লগনি। লৈবাক শিনবা থুংনা শন্দোক্তুনা লৈরিবা জন ঔসধী কেন্দ্রশিং অসি লায়রবা, মিদ্দল-ক্লাস, নৎত্রগা ইনাক খুনবা মীপুম খুদিংদা অতাবা মমলদা হিদাক লাংথক ফংহল্লিবা মরুওইবা মফমশিং ওইরক্লে। খুঙ্গংগী মীয়াম্না হায়রিবা সেন্তরশিং অসিগী মমিংদি খঙদ্রবসু, মীপুম খুদিংনা মখোয়গী মোদীগী ফার্মাসী হায়না কৌনবা ঐহাক্না উরে। মখোয়না মোদীগী ফার্মাসীদা হিদাক লৈবা চৎপগী ৱারী শান্নৈ। অদোম্না মসিগী মমিং অপাম্বা অমা হেক্তা থোন্বিবা য়াই, অদুবু ঐনা পাম্বদি অদোম শেল হেন্না তিংহনবিগনু, মসিনা অদোমবু নাবদগী ঙাকথোকপা ঙমগনি অমদি ফুরিৎখাউদগী শেল চৎপসু হন্থহনগনি।
হায়রিবা জন ঔসধী কেন্দ্রশিং অসিদা হিদাক মখল ২০০০ রোমদা চাউরাক্না চাদা ৮০ দগী ৯০ ফাওবগী দিস্কাউন্ত পীরি। অদোমসু খনবিয়ু, লুপা পীরম্বা পোৎ অমা পৈসা ১০, ১৫ নৎত্রগা ২০ দা ফংলবদি, মদুনা কয়া য়াম্না কান্নবা পুরক্কনি। মসিদা লেমহৌগদৌরিবা শেনফমদু অদোমগী অঙাংদা শীজিন্নবা য়ারগনি। ওগস্ত ১৫দা, মীয়াম্না মোদীগী ফার্মাসী হায়না খঙনংরিবা, জন ঔসধী কেন্দ্র ২৫,০০০ লৈবাক শিনবা থুংনা হাংদোক্নবা ৱাফম থমখি। থম্লিবা পান্দমদি মফম ২৫,০০০ শুহনবনি। মায়কৈ অসিদা থবক খোঙজেল য়াঙনা চঙশিল্লি। হায়রিবা স্কীম অনিসিগীদমক্তা ঐনা লৈবাক পুম্বগী মফমদা, মরুওইনা ঐগী ইমা, ইচে-ইচল, লৌমী অমদি ইমুং মনুংশিংগী মফমদা নুংঙাইবা ফোঙদোকচরি।
ঐনা ৱাফম অমগসু ময়ামগী মফমদা পাউদমজবদা অপেনবা ফাওই। ময়াম্নসু খঙবিরিবা, কোবিদ লাইচৎ মনুংদা হৌদোকখিবা গরীব কল্য়ান অন্ন য়োজনানা লায়রবশিংদা চেঙ-চাক ফংহন্দুনা মখোয়গী অৱাবা হন্থহন্নবা পান্দম থম্লি। লায়রবা ইমুংশিংগী চাকখুম মৈ মুৎহল্লোইদবনি, লায়রবা ইমুংগী অঙাং অমত্তা পুক হাংনা তুমহল্লোইদবনি। চাউখ্রবা কোবিদ লাইচৎ লাকপদা ঐখোয়না থৌরাং অসি হৌদোকখিবনি। মদুনা মরম ওইরগা, ইমুং কয়ানা য়াম্লবা শেনফমশিং কঞ্জবা ঙমজরে হায়বা ঐনা উরে। হায়রিবা শেনফমশিং অসি অফবা থবক্তা শীজিন্নরি। মসিদা য়ুম্ফম ওইরগা, ঙরাং ফমখিবা ঐখোয়গী মন্ত্রী মন্দলগী মীফম্না, লেম্না চেঙ য়েনবগী স্কীম অসি চহি মঙা অমগা শাংদোক্নবা অয়াবা পীরে। মরম অসিনা লাক্কদৌরিবা চহি মঙাসিদা, অদোম্না চাক থোংনবগীদমক শেল অমত্তা তিংলরোই। অদোম্না মদুদা চৎকদবা শেনফমদু অদোমগী জন ধন একাউন্ততা হাপচিনবিয়ু। হায়রিবা শেনফম অদু অদোমগী অঙাংশিংগী তুংগী লম্বী শেম্বদা শীজিন্নবিয়ু। থৌরাং য়াৎপিয়ু, অদুগা শেল মাঙহনবিগনি। মোদীনা মসি লেম্না থারকপনি, অদুবু মদু থারক্লিবগী মরমদি অদোমদা পাঙ্গল হাপ্নবনি। হৌজিক্তি মীওই করোর ৮০ হেনবনা লাক্কদৌরিবা চহি ৫ সিদা লেম্না চেঙ ফংলগনি। মসিনা লায়রবশিংদা শেল তুংশিনবা ঙমহল্লগনি। মখোয়না হায়রিবা শেনফম অসি মখোয়গী অঙাংশিংগী তুংগী য়াইফনবগীদমক ইনভেস্ত তৌবা ঙম্লগনি। মসিসু মোদীগী ৱাশক্নি, ঐখোয়না মীয়ামদা ফংহল্লবা ৱাশক্নি। মরম অদুননি, ঐনা মোদীগী ৱাশক্তি লেম্না মাঙহল্লোই হেক হেক হায়রিবা।
মরূপশিং,
লৈঙাক্কী মেচিনরী পুম্বা অমদি লৈঙাক্কী শিন্মীশিংগী থৌদাং হায়রিবা কেম্পেন অসিদা য়াম্না মরুওই। চহি খরগী মমাঙদা গ্রাম স্বরাজ কেম্পেনগী মনুং চন্না য়াম্না নীংথিনা মায় পাকখিবা থৌরাং অমা ঐ নীংশিংলি। কেম্পেন অদুনা তাঙ্কক অনি থোক্না খুঙ্গং ৬০,০০০ য়ৌখি। লৈঙাক্না, মাগী স্কীম তরেৎকা লোয়না বেনিফিসরীশিংদা য়ৌশিনখি। মদুদা এস্পিরেস্নেল দিস্ত্রিক্তশিংদা লৈবা খুঙ্গং লিশিং কয়াসু য়াওখি। হৌজিক্তি থৌরাং অদুগা মায় পাকপনা ‘ভিক্সিত ভারত সংকল্প য়াত্রা’গী য়ুম্ফম থোল্লরে। কেম্পেন অসিদা শরুক য়ারিবা লৈঙাক্কী মীহুৎ পুম্নমক্না লৈবাক অমদি খুন্নাইগী থৌগলদা নীংথিজনা থবক তৌরি। মপুং ফানা কত্থোকপগা লোয়ননা, মখোয়না খুঙ্গং খুদিংদা য়ৌরি। ‘ভিক্সিত ভারত সংকল্প য়াত্ররা’ অসি মীপুম খুদিংগী হোৎনজমন্না মায় পাকহনগদৌরিবনি। ঐখোয়না ‘ভিক্সিত ভারত’ অমগী মতাঙদা ৱারী শানবা মতমদা, লাক্কদৌরিবা চহিশিংদা খুঙ্গংশিংদা মশক থোক্না অহোংবা লাক্কনি, অমদি মদুগী মতাঙদা ফিরেপ লৌগদৌরিবসি অদোম্ননি। ঐখোয়না ঐখোয় ইশা ইশাগী খুঙ্গংদসু চাওখৎপা পুরক্কদবনি হায়না লেপচগদবনি। ঐখোয় পুন্না, চাওখৎপা ভারত শেম্মিনসি, অমদি লৈবাক অসিনা মালেমগী মাঙদা লেপমিন্নসি। অমুক্কা হন্না, ঐনা ময়াম পুম্নমক্কা উননবা তাঞ্জা ফংজরে। করিগুম্বা মরক্তা অসিগুম্বা তাঞ্জা অমা অমুক ফংলগদি, ঐখোয়না ময়ামগা পুন্না থেংননবা হোৎনজরক্কে।
ময়ামগী মফমদা য়াইফ-পাউজেল পীজরি। ময়ামবু কয়ারক হন্না থাগৎচরি!
