খুরুমজরি,
উত্তরখন্দগী রাজ্যপাল শ্রী গুরমিত সিংহ, উত্তখন্দগী চীফ মিনিস্তর শ্রী পুস্কার সিংহ ধামি, রেলৱে মিনিস্তর শ্রী অশ্বিনি বৈষ্ণব, উত্তরখন্দ সরকারগী মিনিস্তরশিং, এম.পিশিং, এম.এল.এশিং, মেয়োরশিং, জিলা পরিযদ মেম্বরশিং, অতোপ্পা শক্নাইরবশিং অমসুং উত্তরখন্দগী ঐগী নুংশিরবা ইচিন-ইনাওশিং অমসুং ইচন-ইচেশিং বন্দে ভারত এক্সপ্রেস ত্রেনগীদমক ঐনা নুংঙাইবা ফোঙদোকচরি।
ত্রেন অসি উত্তরখন্দগী দেবভুমিগা লৈবাক অসিগী কোনুংগা শম্নহনগনি। হৌজিক সহর অনিগী মরক্তা চৎথোক-চৎশিন তৌবদা চঙবা মতম হন্থরগনি অমসুং ত্রেন অসিগী অয়াংবা খোঙজেলনা চৎথোক-চৎশিনদা নুংঙাইবা অমা পীরগনি।
মরুপশিং,
ঐ পুং খরগী মমাঙদা লৈবাক অহুমগী খোঙচৎ অমদগী হল্লকপতা ঙাইরি। হৌজিক মালেম্না ভারত্তা অচৌবা থাজবা অমগা লোয়ন্না য়েংলে। লৈবাক অসিগী শেন-থুম ফগৎলকপা অমসুং লায়রবা কোকহনবদগী ভারত মালেমগী থাজবগী মঙাল অমা ওইরে। ভারতনা কোরোনা লাইচৎ লাকশিনখিবা অমসুং মালেমদা খ্বাইদগী চাউবা তিকা থাবগী থবক পাংথোকখিবা অদু মালেম্না শিংথানখি। ঙসি মালেম শীনবা থুংনা ভারতকী মরমদা ঙাংনরে, মালেমগী মীওইশিং ভারত য়েংনবা অমসুং মশক খঙনবা ভারত্তা লাকপা পাম্লে। ফিবম অসিদা, উত্তরখন্দগুম্বা ফজরবা রাজ্যশিংগী অচৌবা খুদোংচাবা অমনি। বন্দে ভারত ত্রেন অসিনা উত্তরখন্দগুম্বা ফজরবা রাজ্য অমদা মালেমগী মফম কয়াদগী মীওই কয়া লাকপদা খুদোংচাবা অমা পীরগনি।
মরুপশিং,
উত্তরখন্দ অসি লাইরৈবাক অমনি । ঐনা বাবা কেদর খুরুম্বা চৎপা মতমদা, খুরুম্বা লোইরবা মতুংদা ঐগী চিন্দগী মশা মরোমদোম ৱাহৈ খর হায়দোকচরকখিবা অদু ঐ নিংশিংলি। ৱাহৈশিং অদু বাবা কেদরগী থৌজালগী মওংদা হায়দোকখি অমসুং ঐনা হায়রি মদুদি চৎলিবা দিকেদ অসি উত্তরখন্দগী দিকেদ অমা ওইরগনি। লো অমসুং ওর্দরগী ফিবম ফনা লৈবগা লোয়ন্না রাজ্য অসি চাউখৎপা হেনগৎলক্লি। লাইরৈবাক অসিগী শক্তম ঙাকপা অসিসু য়াম্না মরুওই। দেবভুমি অসি মালেমদা স্পিরিচুএলগী মফম অমা ওইরগনি হায়না ঐনা থাজবা থম্লি। মসিগী খুদোংচাবা অসি থবক ওইনা পাংথোক্নবা ঐখোয়না হোৎনগনি।
চার ধামদা লাকপা লাইখুরম্বা মীওই মশিং অরিবা রেকোর্দশিং থুগাইবা অমসুং অনৌবা রেকোর্দশিং শেম্বা উরে। হরিদ্বার অমসুং কনৱার যাত্রাদা বাবা কেদরনাথ, কুম্ত/অর্ধ কুম্ত দর্সন তৌনবা ভক্ত করোর কয়া লাক্নরি। রাজ্য কয়া মসিগী ভক্ত মশিং অসি য়ৌনা লাক্তে অমসুং খুদোল অমনি অমসুং মখোয় শেন্নবা হায়বসি অচৌবা থবক অমনি। মসিগী ‘ভগিরাথ’ থবক অসি লাইহন্নবা দবল পৱার অমসুং দবল স্পিৎকা লোয়ন্না দবল ইঞ্জিন সরকার থবক তৌরি।
চাউখৎপগী ‘নবরত্ন’দা বি.জে.পী সরকারনা অকনবা মীৎয়েং চঙলি। অহানবা রত্ন ওইনা, কেদরনাথ-বদ্রিনাথ ধাম লুপা করোর ১৩০০ চঙনা অমুক হন্না শেমগৎকনি। অনিশুবদা, গৌরিকুন্দ-কেদরনাথ অমসুং গোবিন্দ ঘাত-হেমকুন্ত সাহিবতা লুপা করোর ২৫০০০ চঙনা রোপৱে শেমগৎকনি। অহুমশুবদা, মনাস খান্দ মন্দির মালা প্রোগ্রামগী মখাদা কুমাওনদা অরিবা লাইশঙশিং অমুক হন্না শেমগৎকনি। মরিশুবদা, রাজ্য অসিদা হোমস্তে ৪০০০ হেন্না রেজিস্তার তৌরে হায়বা ঐ খঙলে। লোয়ন্না রাজ্য শীনবা থুংনা হোমস্তে য়োকখৎকনি। মঙাশুবদা, ইকোতুরিজমগী মফম ১৬ শেমগৎকনি। তরুকশুবদা, উত্তরখন্দদা হকশেলগী থবকশিং পাকথোক-চাউথোকহনগনি। উধাম সিংহ নাগরদা এ.আই.আই.এম.এস সেতেল্লাইত সেন্তর শেমগৎলে। তরেৎশুবদা, লুপা করোর ২০০০ চঙনা তেহরি লেক দিবলপমেন্ত প্রোজেক পায়খৎলে। নিপালশুবদা, য়োগা, এদভেঞ্চর তুরিজমগী কোনুং ওইনা হরিদ্বার রিকিকেস শেমগৎকনি। অরোইবদা তানাকপুর বাগেশ্বার রেল লাইন শেমগৎপা অসিনি। নবরত্নশিং অসিনা রাজ্য অসিদা ইনফ্রাস্ত্রকচর চাউখৎহনবদা অনৌবা ইনোৎ অমা পীগনি। লুপা করোর ১২,০০০ চঙনা চার ধাম মহাপরিয়োজনা থবক পায়খৎলি। দিল্লি দেরাদুন এক্সপ্রেসৱেনা চৎথোক-চৎশিন হেন্না নুংঙাইহল্লগনি। উত্তরখন্দদা রোপৱে শেমগৎলি। লাক্লিবা নুমিৎশিংদা পর্ভাত মালা প্রোজেক্না রাজ্য অসিগী মরাইবক্তা অহোংবা পুরক্লগনি।
লুপা করোর ১৬,০০০ চঙনা পায়খৎলিবা রিসিকেস-কারানপ্রায়াগ রেল প্রোজেক চহি ২-৩গী মনুংদা লোইশিল্লগনি। প্রোজেক অসি লোইশিল্লবা মতুংদা উত্তরখন্দা চৎথোক-চৎশিন, ইনভেস্তমেন্ত, উদোগ অমসুং থবক ফংবা হেনগৎহল্লগনি। লাইরৈবাক অসিদা পায়খৎলিবা চাউখৎ-থৌরাংগী থবকশিং মরক্তা, হৌজিক বন্দে ভারত এক্সপ্রেস ত্রেন অসি উত্তখন্দ মীয়ামগী অচৌবা খুদোল অমা ওইরগনি।
মরুপশিং,
ঙসি কেন্দ্র সরকারগী মতেংগা লোয়ন্না রাজ্য সরকারনা থবক কয়া পায়খৎপদগী উত্তরখন্দ অসি তুরিজম, এদভেঞ্চর তুরিজম, ফিল্ম নম্ফম অমসুং লুহোংনবা মফম অমা ওইরক্লে। ঙসি রাজ্য অসিগী লমকোয়ফমশিং মালেম শীনবা থুংবগী মীওই কয়াগী পুক্নিং চিংশিল্লে। হায়রিবা থবকশিং অসিদা বন্দে ভারত এক্সপ্রেসনা মখোয়দা কান্নবা পীরগনি। মখোয়গী ইমুং-মনুংগা লোয়ন্না চৎলিবশিংনা অহানবদা ত্রেনশিং তোংনবা খল্লি অমসুং বন্দে ভারত অসি ইরাই লাইনা চৎথোক-চৎশিন য়াবা পাম্বৈ অমা ওইরক্লে।
ইচিন-ইনাওশিং অমসুং ইচন-ইচেশিং,
ইনফ্রাস্ত্রকচরগী খুদোংচাবশিং হেনগৎহন্দুনা ২১শুবা চহিচাগী ভারত মখা তানা চাউখৎহনবা ঙমগনি। মমাঙগী সরকারশিং শেঞ্জা-থুমজা অমসুং শাগৈগী রাজনিতি তৌদুনা লৈখিবদগী মখোয়না ইনফ্রাস্ত্রকচরগী মরুওইবা খঙখিদে। ভারত্তা অয়াবা ত্রেনশিং চেলহন্নবা মমাঙগী সরকারশিংনা কয়ারক ৱাশকখ্রবসু, মখোয়না রেল নেতৱার্কশিংদা মী শেন্নদবা গেতশিং লৌথোকপা ঙমখিদে অমসুং রেল লাইনশিং ইলেক্ত্রিক ফংহনবগী থবক হান্নদগী হেন্না ফৎখিদে। ২০১৪দা লৈবাক অসিগী রেল নেতৱার্ককী শরুক অহুম থোকপগী শরুক অমা খক ইলেক্ত্রিক ফংলমখি অমসুং মসিনা অয়াংবা ত্রেন চেন্নবা ৱাখল খনবা ঙমখিদে। ২০১৪গী মতুংদা রেলৱেদা অওনবা পুরক্নবা থবক হৌখিবনি। নেতৱার্ক শীনবা থুংনা সেমি-হায়-স্পিৎ ত্রেনশিং চেন্নবা থৌরাং তৌরিঙৈদা লৈবাক অসিগী অহানবা হায়-স্পিৎ ত্রেনগী মঙলান থবক ওইনা পাংথোক্নবা থবক হৌরে। ২০১৪গী মমাঙদা চহি অমদা রেল লাইন কিলোমিতর ৬০০ ইলেক্ত্রিক ফংহল্লমখি অমসুং হৌজিক চহি অমদা রেল লাইন কিলোমিতর লিশিং ৬ ইলেক্ত্রিক ফংহল্লে। ঙসিদি, লৈবাক অসিগী রেল নেতৱার্ককী চাদা ৯০ হেন্না ইলেক্ত্রিক ফংহল্লে। উত্তরখন্দদা চাদা ১০০ রেল নেতৱার্ক ইলেক্ত্রিক ফংলে।
ইচিন-ইনাওশিং অমসুং ইচন-ইচেশিং,
অচুম্বা মীৎয়েং, থৌশিল অমসুং কৎথোকপনা চাউখৎপা হেনগৎহল্লি। রেল বজেত হেনগৎহনবা অসিনা উত্তরখন্দদা হকথেংন্না কান্নবা পীরে। ২০১৪গী মমাঙদা রাজ্য অসিগী রেল বজেত চাউরাক্না লুপা করোর ২০০ ওইরমখি অদুবু ঙসিদি রেল বজেত শরুক ২৫ হেনগত্তুনা লুপা করোর লিশিং ৫ য়ৌরে। রেলৱে খক নত্তনা অনৌবা হায়ৱেশিং উত্তখন্দদা মমাঙদা অমুক্তা ওইখিদ্রিবা মওংদা শেমগৎলে। উত্তরখন্দগুম্বা চীংগী রাজ্য অমদা মসিগী লম্বী-থোং অসি কয়া য়াম্না মরুওইবগে হায়বা ঐখোয় খঙলে। খুঙ্গংশিংগী অৱাবশিং ঐখোয় খঙলে অমসুং হৌখিবা মতমদা লম্বী-থোং লৈতবদগী খুঙ্গংশিং ইতাক-তাকখি। তুংগী মীরোলশিং মসিগী অৱাবা অসিদগী কনবা ঐখোয়না পাম্মী। উত্তরখন্দ রাজ্য অসিমক্তা তুরিজম, লৌউ-শিংউ অমসুং উদোগকী খুদোংচাবশিং শেমগৎতুনা থবক পীরে।লম্বী-থোংগী খুদোংচাবা ৱাৎপদগী চীংগী রাজ্য অমদা মীয়াম্না খুঙ্গংদগী য়ুম হোংলকপনি অমসুং মসি থিংনবা থবক পায়খৎপা সরকারনা পাম্মী। অনৌবা লম্বী-থোং অসিনাঐখোয়গী ঙমখৈগী শরুকশিংদা চৎথোক-চৎশিন তৌবা লাইহনগনি অমসুং লান্মীশিংনা লৈবাক ঙাক-শেনবদা খুদোংচাদবা অমতা লৈহল্লোই।
ইচিন-ইনাওশিং অমসুং ইচন-ইচেশিং,
উত্তরখন্দ চাউখৎনবা ঐখোয়গী দবল ইঞ্জিন সরকারনা থবক পায়খৎলি। উত্তরখন্দ য়াংনা চাউখৎলকপা অসিনা ভারত য়াংনা চাউখৎপদা মতেং পাংগনি। লৈবাক অসি হৌজিক লেপকদবা নত্তে, হৌজিক লৈবাক অসি খুমাঙ চাউশিল্লি। বন্দে ভারতকী খোঙজেলদা হৌজিক লৈবাক শীনবা থুংনা মাঙলোমদা চঙশিল্লি অমসুং মখা তানা মাঙলোমদা চঙশিনগনি। উত্তরখন্দগী অহানবা বন্দে ভারত এক্সপ্রেস ত্রেন চেনবা হৌবগীদমক অমুক হন্না মীয়াম পুম্নমক নুংঙাইবা ফোঙদোকচরি অমসুং য়াইফ-পাউজেল পীজরি। লৈবাক শীনবা থুংনা লৈরিবা মীয়াম বাবা কেদর, বদ্রি বিসাল, য়ামুনোত্রি, গঙ্গোত্রিগী খুয়াদা লাক্লি। বন্দে ভারত এক্সপ্রেস য়ৌরকপা অসিনা মখোয়দা য়াম্না নুংঙাইবা অমা ওইরগনি। ঐনা অমুক হন্না বাবা কেদরগী খুয়াদা চঙজরি অমসুং লাইগী লৈবাক অসিদা কোক নোঞ্জরি অমসুং ময়াম পুম্নমক য়াইফ-পাউজেল পীজরি।
অদোম থাগৎচরি!
