লুপা করোর লাখ 1.25রোমগী সেমিকন্দক্তর ফেসিলিতী 3 উরেপ-উয়ুং তমখ্রে
“ভারতনা মশক থোকপা সেমিকন্দক্তর মেন্যুফেকচরিং হব অমা ওইনবা পান্দম থম্মি”“মশাদা থাজবা লৈবা নহারোলনা লৈবাক্কী লাইবক হোংহনগনি”“ভারতকী খোঙজেল য়াংনা খুমাং চাউশিল্লিবা খোঙচৎনা ঐখোয়গী য়ুবা শক্তিদা থাজবগী ইনোৎ হাপ্পী”“ভারতনা ফিরেপ লৌরি, ভারতনা দেলিবর তৌরি অমসুং দেমোক্রেসী দেলিবর তৌরি”“চিপ মেন্যুফেকচর তৌবনা ভারতপু আত্মনির্ভর ওইনবা মাইকৈদা পুরি, মোদর্নিতীগী মাইকৈদা পুরি”“চিপ মেন্যুফেকচর তৌবনা লোইনাইদ্রবা ওইথোকপা য়াবশিংগী লম্বী হাংলি”“ভারতকী নহারোলদা মতিক ময়াই চেল্লি অমসুং মখোয়দা খুদোংচাবা অমা মথৌ তাই। সেমিকন্দক্তর ইনিসিএতিবনা ঙসি ভারত্তা মদুগী খুদোংচাবা অদু পুদুনা লাক্লি”নমস্কার!
ঐহাক্কী কেবিনেতকী মরুপ, শ্রী অশ্বিনি বৈশ্নবজী, রজীব চন্দ্রশেখরজীগা লোয়ননা অসম অমসুং গুজরাতকী মুখ্য মন্ত্রী, তাতা গ্রুপকী চেয়রমেন, শ্রী এন. চন্দ্রশেকরন, সি.জি. পাৱরগী চেয়রমেন, বেল্লায়ন সুবিয়াজী অমসুং কেন্দ্র, রাজ্য অমসুং ইন্দস্ত্রীগী অতোপ্পা মীথুংলেন, ইবেম্মা অমসুং ইবুংঙোশিং!
ঐখোয়না পুৱারী শেম্নবা খোঙ থাংজিল্লিবা অমসুং য়াইফরবা তুংগী মতম অমগীদমক্তা মশক থোকপা খোঙথাং থাংজিল্লিবা অসিনা ঙসিগী থৌরম্বু পুৱারী ওইহল্লে। সেমিকন্দক্তর মেন্যুফেকচরিংগীদমক্তা কত্থোক্লবা পুন্না চাউরাক্না লুপা করোর লাক্ষ ১.২৫ ওইগদবা মরু ওইবা প্রোজেক্ত অহুমগী উরেপ উয়ুং তম্লে। হায়রিবা ফেসিলিতীশিং অসি গুজরাতকী ধোলেরা অমসুং সনন্দদা অমসুং অসমগী মোরিগাওদা লৈবনি। মখোয়না ভারতপু সেমিকন্দক্তর মেন্যুফেকচরিংগী মরু ওইবা হব অমা ওইহনবদা অচৌবা থৌদাং য়াগনি। মসিগুম্বা মশক থোকপা খোঙথাং অসিগীদমক্তা ঐহাক্না লৈবাক মীয়ামদা থাগৎচরি, মসিনা তুংলমচৎকী মায়কৈদা খোঙদাবগী অচৌবা ৱারেপ অমা ওইগনি। ঐখোয়গী তাইৱানগী মরুপশিংনা থৌরম অসিদা ভর্চুএলগী খুত্থাংদা শরুক য়ারিবা অসিশু য়াম্না নুংঙাইবা থৌওংনি। ভারতকী মসিগুম্বা থবক অসিনা ঐহাকপু তসেংনা নুংঙাইহল্লি।
মরুপশিং,
ঙসিগী মরু ওইবা থৌরম অসিদা ঐখোয়গা লোয়ননা লৈবাক শিনবা থুংবগী কোলেজ, য়ুনিভর্সিতী অমসুং মহৈগী ইন্সতিত্যুসন লিশিং ৬০ হেনবনা শরুক য়ারিবা অসিমকশু রেকোর্দ অমা ওইরিবনি। ঙসিগী থৌরম অসিদা য়ারিবমখৈ নহা মশিং য়াম্না শরুক য়াহন্নবা ঐহাক্না মন্ত্রাকয়দা হায়খিবনি। থৌরম অসিদি নহা কয়াগী মঙলান মঙফাওনহনগদবা থৌরম্নি। ঙসিগী থৌরম্না সেমিকন্দক্তর প্রোজেক্ত হৌদোকপা ওইরবসু, ঐহাক্কী মাঙদা ফম্লিবা মহৈরোইশিংনা তসেংবা স্তেকহোলদরনি। মখোয়গা ভারতকী তসেংবা মতিক শাগোন্নরি। অদুনা, ঙসিগী পুৱারী ওইরবা থৌরম অসিবু মখোয়না মমিৎ মক্না উবা ফংহনবা হায়বসি ঐহাক্কী থম্মোই শেংবা অপাম্বনি। মশাদা থাজবা নহানা লৈবাক্কী লাইবক লেপকনি হায়বসিদি তসেংবা ৱাফম অমনি। অদুনা, ঐহাক্না ঙসিগী থৌরমদা শরুক য়ারিবা মহৈরোই খুদিংবু তরাম্না ওকচরি।
মরুপশিং,
২১শুবা চহি চা অসিদি তেক্নোলোজীনা চলায়গনি, মসিদা ইলেক্ত্রোনিক চিপ্না মরু ওইবা থৌদাং য়াগনি। ভারত্তা দিজাইন তৌবা “মেদ ইন ইন্দিয়া চিপ” শাবগী থবক অসিদা লৈবাক অসিবু মরোমদোম লেপচবা ঙম্বা অমসুং মতমগা চুনবা ওইহনবা ঙম্বগী মতিক লৈ। অহানা, অনিশুবা অমসুং অহুমশুবা ইন্দস্ত্রীগী ইহৌদা মরম কয়া অমদগী য়াওবা ফংহৌদ্রবশু, মরিশুবা ইহৌ, ইন্দস্ত্রী ৪.০ অসিদা ভারতনা মশাদা থাজবগা লোয়ননা লুচিংনা মাঙ থারক্লি। ঐখোয়না মিৎকুপ অমা ফাওবা মাঙহল্লোই খল্লে, মসিমক ঙসিগী থৌরমদা উৎলিবা খোঙজেল য়াঙলবা চাউখৎ থৌরাং অসিনা খুদম ওইরি। মসিদি ঐখোয়গী খোঙফম চেৎপা অমসুং ইশাগী পান্দমগীদমক্তা হোৎনবা কনবগী খুদম্নি। ঐখোয়না চহি অনিগী মমাংদা সেমিকন্দক্তর মিসন হৌদোকখি, শুপ্নগী থা খরগী মনুংদা ঐখোয়না অহানবা এম.ও.য়ু.গী খুৎয়েক পীনখি, ঙসিদি, শুপ্নগী থা খরগী মনুংদা, ঐখোয়না প্রোজেক্ত অহুমগী উরেপ উয়ুং তম্লি। ভারতনা খোঙফম চেৎলি, ভারতনা থবক ওইনা পাংথোক্লি অমসুং গনতন্ত্রনা থবক ওইনা পাংথোকপনি।
মরুপশিং,
মালেমগী মনুংদা শুপ্নগী লৈবাক খরনা হৌজিক সেমিকন্দক্তর মেন্যুফেকচরিং তৌরি। কোবিদ-১৯ লাইচৎনা থাজবা য়াবা অমসুং নীংহন্নবা লৈতবা সপ্লাই চেন অমগী মরু ওইবা খঙহনখ্রে, মসিনা ভারতপু হীরম অসিদা মরু ওইবা থৌদাং য়ানবা ইথিল পীরি। স্পেস, ন্যুক্লিয়র অমসুং দিজিতেল পাৱর অমনি হায়না হান্ননা উৎলবা ভারতনা হৌজিক তুংগী মতমদা সেমিকন্দক্তরগা মরী লৈনবা পোত্থোকশিং কম্মর্সিএল ওইনা পুথোক্নবা শেম শাবা লোইরে। ভারতনা হীরম অসিদা মালেমগী লুচিংবা ওইগদৌবা মতম অদু কুইদ্রবনি। মসিদা নত্তনা, ভারতনা ঙসি লৌরিবা ৱারেপ অমসুং থবক ওইনা পাংথোক্লিবা পোলিসী কয়ানা ভারত্তা তুংগী মতমদা কান্নবা য়াম্না পীগনি। ইজ ওফ দুইং বিজনেস খুমাং চাউশিলহন্নবা অমসুং রেগ্যুলেসন লাইথোকহন্নবা হোৎনবদগী ঐখোয়গী সরকারনা হৌখিবা চহি খরসিদা কপ্লাইএন্স ৪০,০০০ হেন্না লৌথোকখ্রে। ভারত্তা ইনভেস্তমেন্ত তৌহল্লক্নবা ফোরেন দাইরেক্ত ইনভেস্তমেন্ত (এফ.দি.আই.)কী কাঙলোনশিং মওং মরিল নাইহনখ্রে, মসিগীদমক্তা দিফেন্স, ইন্স্যুরেন্স অমসুং তেলিকোমগুম্বা সেক্তরশিংবু লিবরেলাইজ তৌখি। ঐখোয়না চহি খরগী মনুংসিদা ইলেক্ত্রোনিক্স অমসুং হার্দৱেয়র মেন্যুফেকচরিংগী পাঙ্গল হেনগৎহনখি। চপ মান্নবা মতমসিদা, ঐখোয়না ইলেক্ত্রোনিক্স অমসুং আই.তি. হার্দৱেয়রগী লার্জ স্কেল মেন্যুফেকচরিংগী প্রদক্সন লিঙ্ক ইন্সেন্তিব (পি.এল.আই.) স্কিমগা লোয়ননা ইলেক্ত্রোনিক্স কম্পোনেন্ত অমসুং ইলেক্ত্রোনিক্স মেন্যুফেকচরিং ক্লস্তরগী ইন্সেন্তিব পীবনা ইলেক্ত্রোনিক্স সেক্তরগী অনৌবা খুদোংচাবা কয়া হাংদোক্লে। ভারত অসি হৌজিক মালেমগী খ্বাইদগী অনিশুবা চাউবা মোবাইল ফোন পুথোকপা লৈবাক ওইরি। অহেনবা অমনা, ইন্নোভেসন খুমাং চাউশিলহন্নবা নেস্নেল ক্বান্তম মিসনগী খোঙথাং হৌদোকপা অমসুং নেস্নেল রিসর্চ ফাউন্দেসন লিংখৎপগী থবক হৌজিক পায়খৎলি। ইন্দিয়া এ.আই. মিসন অসি খোঙজেল য়াঙনা পাকথোক চাউথোক্নবা শেম শারে, মসিনা লৈবাক অসিনা তেক্নোলোজী শিজিন্নবখক্তা নত্তনা তেক্নোলোজী চাউখৎহনবদা খোঙজেল য়াঙনা চঙশিল্লি তাক্লি।
মরুপশিং,
ভারতকী নহাশিংনা সেমিকন্দক্তর ইন্দস্ত্রীদগী খ্বাইদগী হেনবা কান্নবা ফংগনি। ইন্দস্ত্রী অসিদা কম্ম্যুনিকেসন্দগী হৌরগা ত্রান্সপোর্তেসন ফাওবগী সেক্তর কয়া কোল্লি অমসুং বিলিয়ন দোল্লর কয়াগী রেভেন্যুবু মালেমগী থাক্তা তানবদা অহেনবা থৌদাং য়ারি। চিপ শাবা হায়বসি শুপ্নগী ইন্দস্ত্রী অমখক নত্তে, মসিদি খুদোংচাবা কয়ানা থল্লবা চাউখৎ থৌরাংগী মায়কৈদা চৎপগী লম্বী অমনি। মসিনা অনৌবা থবক লৈহনবতা নত্তনা, তেক্নোলোজী চাউখৎহনবদশু চাউনা তেংবাংগনি। হৌজিক্কী মালেমগী সেমিকন্দক্তর চিপকী দিজাইন অসি ভারতকী তেলেন্ত লৈরবা নহাশিংগীনা অয়াম্বা ওইরি। মরম অদুনা, ভারতনা সেমিকন্দক্তর মেন্যুফেকচরিংদা খুমাং চাউশিল্লিবা অসিনা তেলেন্ত ইকোসীস্তেমগী সাইকল অমবুশু মপুং ফাহল্লি। ঙসিগী থৌরমদা শরুক য়াবা নহাশিংনা লৈবাক অসিদা লৈরক্কদৌরিবা খুদোংচাবশিং খঙলি। ভারতনা মশাগী নহাশিংগীদমক্তা স্পেস অমসুং মেপ্পিংগী খুদোংচাবা লৈহল্লে। স্তার্তঅপ ইকোসীস্তেম চাউখৎহন্নবা ঐখোয়না সরকারনা মমাংদা অমুক্তা তৌখিদ্রিবা মওংদা হোৎনরি। ভারতনা তেল্লবা মতমগী মনুংদা ঙসিদি মালেমগী খ্বাইদগী অহুমশুবা চাউবা স্তার্তঅপ ইকোসীস্তেম ওইরবনি। ঙসিগী থৌরমগী মখা তারকপা ওইনা, ঐখোয়গী স্তার্তঅপশিংনা সেমিকন্দক্তর সেক্তরদা অনৌবা খুদোংচাবা থীবা হৌরগনি। মসিগী অনৌবা খোঙথাং অসিনা ঐখোয়গী নহা ওইরিবা চারোন শুরোন্দা এদভান্স তেক্নোলোজীদা কেরিয়র শেম্বা ঙম্নবা খুদোংচাবা পীগনি হায়না ঐহাক্না থাজৈ।
মরুপশিং,
“পুঙফম অসি হৌজিক্নি, খুদোংচাবা মতম অসি হৌজিক্নি” হায়না ঐহাক্না লাল কিলাদগী হায়খিবা অদোম নীংশিংলম্বা য়াই। ৱাখল্লোন অসিগা লোয়ননা ঐখোয়না পোলিসী অমসুং ৱারেপ লৌবা মতমদা ঐখোয়না মহৈ উবা ফংই। ভারতনা হৌজিক অরিবা ৱাখল্লোন্দগী থোক্লক্লে, খোঙজেল য়াঙনা ৱারেপ লৌদুনা অমসুং পোলিসীবু থবক্তা ওন্থোক্তুনা তুংলমচত্তা চঙশিল্লি। সেমিকন্দক্তর মেন্যুফেকচরিংদা শিজিন্নরম্বা য়াবা তাঙলবা দিকেদ কয়া ঐখোয়না মঙাজখ্রবশু, ঐখোয়না মতম অমা ফাওবা মাঙহল্লরোই।
ভারতনা সিক্সতীগী মতমদা সেমিকন্দক্তর মেন্যুফেকচরিংদা চঙবা পামখি। অপাম্বা অসি লৈরবশু, মতমদুগী সরকারনা খুদোংচাবা অসি লৌবা ঙমখিদে। মসিদা অয়েৎপা পীখিবশিংদি ৱাখল চেৎপা ৱাৎপা, ৱারেপশিংবু থবক্তা ওন্থোকপা ঙমদবা অমসুং লৈবাক্কী কান্নবা পুরক্কদবা ৱারেপ লৌবা ঙমদবগী মতৌশিংনি। অদুনা, ভারতকী সেমিকন্দক্তরগী মঙলান চহি কয়া মঙফাওনবা ঙমখিদে। মতমগী মতুং ইন্না চাউখৎপা লাক্কনি হায়বগী ৱাখল্লোন্দা থাজবা থমখিবা মতমদুগী সরকারনি। মখোয়না সেমিকন্দক্তর মেন্যুফেকচরিং অসি তুংগী মতমদা লাক্কদবা তঙাই ফদবনি হায়না খন্দুনা মতমদুদা মসিনা পীগদবা কান্নবা খঙবা ঙমখিদে। তুংগী মতমগী থবকপু হৌজিক করিগীদমক্তা মিৎয়েং চঙগদৌরিবনো হায়না মতমদুগী সরকারনা খনখি। মসিইনা পুরক্কদবা কান্নবা মখোয়না মাংজৌননা উবা ঙমখিদে অমসুং লৈবাক্কী তঙাই ফদবা করিনো হায়বা খঙবা ঙমখিদে। সেমিকন্দক্তর মেন্যুফেকচরিংগুম্বা অৱাংবা তেক্কী থবক শেন্নবা ঙম্লোইদবা লাইরবা লৈবাক অমা ওইনা মখোয়না ভারতপু উখি। ভারতকী লাইরববু মখোয়না মরম ওইনা শিজিন্নদুনা মতমগা চুনবা তঙাই ফদবশিংদা ইনভেস্তমেন্ত তৌদনবা হোৎনখি। লুপা করোর কয়াগী ৱাথোক্তদি চেন্নৈ, অদুবু চপ মান্নবা শেনফমগী চাউখৎ থৌরাংদি থওই উশিন্নদে। মসিগুম্বা ৱাখল্লোন্না লৈবাক্কী চাউখৎ থৌরাংবু থীন্থহনখিবনি। মরম অদুনা, ঐখোয়গী সরকারনা তুংলমচৎ য়েংলগা ৱাখল খনবা অমসুং থবক তৌবগী থৌওং ইনখি।
চাউখৎলবা লৈবাকশিংগা চাংয়েংনবা ঙম্বা মতৌদা ঐখোয়না ঙসি সেমিকন্দক্তর মেন্যুফেকচরিংবু খুমাং চাউশিনহল্লি। লৈবাক্কী প্রাইওরিতী খুদিংদা মিৎয়েং চঙলে। ঐখোয়না নাকল অমদা লাইরবশিংগী পক্কা য়ুম শাবীরি, অতোপ্পা নাকল অমদনা ভারতনা রিসর্চ খুমাং চাউশিলহন্নবা লুপা করোর লাক্ষ কয়া থাদরি। লোয়ন-লোয়ননা, ঐখোয়না মালেমগী খ্বাইদগী চাউবা সেনিতেসন কেম্পেন চত্থবগা সেমিকন্দক্তর মেন্যুফেকচরিংবুশু খুমাং চাউশিনহল্লি। ঐখোয়না ভারত্তগী লাইরবা খোঙজেল য়াঙনা মুত্থত্তুনা ভারতকী ইনফ্রাস্ত্রকচর চাউখৎহল্লি অমসুং মরোম লেপচবা ঙমহন্নবা হোৎনরি। ঐহাক্না ২০২৪ খক্তদা লুপা করোর লাক্ষ ১২ হেনবগী স্কিম কয়া হৌদোকখি, মসিনা ভারতকী প্রোগ্রেস উৎলি। মরোমদোম লেপচবা ঙম্বা দিফেন্স সেক্তরগী শক্তম অমা ঐখোয়না ঙরাং পোখ্রন্দা উদুনা ২১শুবা চহি চাগী ভারতনা দিফেন্স তেক্নোলীজীদা খোঙজেল য়াঙনা চাউখৎলিবা অসিগী মতৌ উখি। ভারতনা অগ্নি-Vকা লোয়ননা তোঙানবা লৈবাক খরগী মনুংদা নুমিৎ নিনিগী মমাঙদা চনবা ঙমখ্রে। লৈবাক্কী লৌউ-শিংউ সেক্তরদা নুমিৎ নিনিগী মমাংদা দ্রোনগী ইহৌ হৌদোকখ্রে অমসুং নমো দ্রোন দিদি স্কিমগী খুত্থাংদা নুপীশিংদা দ্রোন লিশিং কয়া য়েন্থোকখ্রে। ভারতনা গগনয়ানগীদমক্তা হোৎনরিবা অসিদশু খোঙজেল তানবা ঙম্লে, অমসুং লৈবাক অসিনা মরমদমদা অহানবা ওইনা পুথোকচবা ফাস্ত ব্রীদর ন্যুক্লিয়র রিএক্তরগী মায়খুম হাংদোকখ্রে। মসিগুম্বা অপুনবা থৌওং অমসুং প্রোজেক্তশিং অসিনা ভারতপু অয়াঙবা খোঙজেলগা লোয়ননা চাউখৎপগী পান্দমগী মায়কৈদা ইনশিল্লি। অদুনা, মসিগী প্রোজেক্ত অহুম অসিনা চাউখৎপগী ত্রাজেক্তরী অসিদা তেংবাংগনি।
অদুগা মরুপশিং,
আর্তিফিসিএল ইন্তেল্লিজেন্স (এ.আই.)কী মতাংদা ৱারী শানরিবা অসি অদোমশু শোইদনা খঙলমগনি। ভারতকী তেলেন্ত পুল অসিনা মালেমগী এ.আই. দোমেন্দা শাফু পীবা ঙম্লি। ঐহাক্না মমাংগী চয়োল খরদা পীখিবা ৱারোল অদোম্না তারম্বা য়ারে। নহা খরনা ঐহাক্কী ইফমদা পাউ ফাওরক্তুনা ঐহাক্কী ৱারোলগী ৱাহৈ খুদিংবু খুঙ্গং খুদিংদা লোল খুদিংদা য়ৌহনবা পাম্মি হায়রকপশু লৈরে। মখোয়না এ.আই. তুল শিজিন্নদুনা ঐহাক্কী ৱারোলবু অদোমগী লোলদা য়াম্না থুনা তাহনবা ঙম্লগনি। তমিল, পঞ্জাবী, বেঙ্গালী, অসামীজ, ওরিয়া নত্ত্রগা অতোপ্পা লোল অমা হেক্তা ওইরো, ঐখোয়গী লৈবাক্কী নহাশিংনা পুথোক্লিবা মসিগী তেক্নোলোজীগী অঙকপা থৌওং অসিদি তসেংনা থাগৎনীংঙাইনি। মসিদি এ.আই.গী অঙকপা মথৌনি। মসিগুম্বা এ.আই.না চলায়বা খোঙথাং, ঐহাক্কী ৱারোলবু ভারতকী লোল খুদিংদা ৱাহন্থোক হনগদৌরিবা অসিগীদমক্তা ঐহাক্না নহাশিং অসিবু থাগৎচরি। মসিনা ঐহাকপু য়াম্না নুংঙাইহল্লে। ঐখোয়গী পাউজেলশিং অসি এ.আই.গী মতেংদগী লোলগী পনখৈ ৱাংমা লাল্লগনি। ঐহাক্না মতাং অসিদা হায়নীংলিবা অসিদি, মতিক য়াম্না লৈরিবা ভারতকী নহাশিংদা খুদোংচাবা ফংহনবগী মথৌ তাই। ঐখোয়গী সেমিকন্দক্তর খোঙথাং অসিনা নহাশিংদা মশক থোকপা খুদোংচাবা কয়া পীবা ঙম্লগনি।
মরুপশিং,
ঐহাক্না পুম্নমক্কী মফমদা য়াইফ পাউজেল অমুক্কা হন্না পীজরি। মসিগুম্বা খোঙথাং অমা অৱাং নোংপোক্তা পায়খৎলক্কনি হায়বসি লমদমসিগী মীওই অমত্তনা খল্লুদে, অদুবু ঐখোয়না মসিমক পাংথোক্নবা হোৎনরে হায়না হিমন্তজীনা হায়খিবা অসি ঐহাকশু য়ানীংই। ঐখোয়গী সাউথ ইস্ত এসিয়াগা লৈনরিবা মরী ফগৎলকপগা লোয়ননা, অৱাং নোংপোক লমদম্না সাউথ ইস্ত এসিয়াগা মরী হেন্না ফগৎহনবদা তেংবাংবা ঙমগদবা খ্বাইদগী চাউবা ইথিল অমা ওইরক্কনি হায়না ঐহাক্না অচেৎপা থাজবা থম্লি। মরম অদুনা, ঐহাক্না ঙসি অসম অমসুং অৱাং নোংপোক লমদমগী মীয়ামদা য়াইফ পাউজেল পীজরি।
মরুপশিং,
ভারতকী চাউখৎ থৌরাংদা অদোম পুম্নমক্না লেপ্তনা তেংবাংবীয়ু হায়জরি। ঐহাক্না থাজবা পীরি, মদুদি, মোদীগী গেরেন্তীনা অদোমগী তুংদা লেপ্লি, শৌগৎলি অমসুং অদোমগী তুংগী থবকশিংদশু শৌগৎকনি।
থাগৎচরি।
