“ঙসি অসি ভারতকী সংসদকী চহি ৭৫ শুরবা খোঙচৎ নিংশিংনবা থৌরম অমনি”
“ঐখোয় অনৌবা শঙলেন্দা হোঙজিল্লগনি অদুবু মসিগী শঙলেন অসি তুংগী মীরোলশিং ইথিল পীগনি অমসুং ভারতকী গনতন্ত্রগী খোঙচৎতা মসি সনাগী তাঙ্কক অমা ওইরগনি”“অমৃত কালগী অহানবা মঙালদা নৌনা থাজবা, মাইপাকপা অমসুং তৌবা ঙম্বশিং য়াওরে”“লৈবাক অসিনা প্রসিদেন্ত ওইরিঙৈদা জি-২০দা অফ্রিকান য়ুনিয়ন য়াওহনবগীদমক ভারতনা মতম পুম্নমক্তা চাউথোকচবা ফাওগনি”“জি-২০ মনুংদা, ভারত ‘বিশ্ব মিত্রা’ অমা ওইরে”“হাওসকী অপুনবা মীফম অসিনা অকনবা থৌনাগা লোয়ননা মীয়ামগী অনিংবশিং ফোঙদোক্লে”“চহি ৭৫ অসিদা, খ্বাইদগী চাউনা মাইপাকপদি মীচম মীয়াম্না মখোয়গী সংসদতা থাজবা হেনগৎলকপা অসিনি”“সংসদতা তেরোরিস্তশিংনা লান্দারকপা অসি ভারতকী থৱায়দা লান্দারকপনি”“হাওস অসি ঐখোয়গীনি, ভারতকী গনতন্ত্রদা অকা-অকুম কয়া লৈরবসু, মীয়ামগী থাজবশিংগী মফম ওইরি”
ইকায়খুম্নরবা স্পীকর, লৈবাকসিগী ৭৫শুবা চহিগী পার্লিয়ামেন্ত খোঙচৎপু অমু্ক হন্না নীংশিংবগা লোয়ননা, অনৌবা খোঙথাঙ অমদা পার্লিয়ামেন্ততা খোঙ থাংজিন্দ্রিঙৈগী মাঙওইননা পুক্নিং থৌগৎনিংঙাই ওইরবা পুৱারীগী মরুওইবা মীৎকুপশিংবু নীংশিংদুনা মাঙদা চঙশিনবগী তাঞ্জা অসিদা ঐখোয় পুম্নমক্না পুৱারী ওইরবা শঙলেন অসিদগী কায়ন খুৎহায় হাইরি। নীংতমদ্রিঙৈ মমাঙদা পার্লিয়ামেন্ত অসি ইম্পিরিএল লেজিসলেতিব কাউন্সিলগী মফম ওইরম্মি। নীংতম্লবা মতুংদা মসিবু পার্লিয়ামেন্ত শঙলেন হায়না শকখঙনখি। হায়রিবা শঙলেন অসি শানবগী ফিরেপ মীরমগী লৈঙাকপশিংগী ওইরবসু, ঐখোয়না কৈদৌঙৈদা কাউবা ঙম্লোইদবা অমদি ঐখোয়না চাউথোকচবগা লোয়ননা হায়জবা ঙম্বা ৱাফমদি শঙলেন অসি শাবদা শিন্থখিবা হুমাংশিংদুদি ঈরৈবাক মীয়ামগীনি, হোৎনখিবশিং অদুদি ঈরৈবাক মীয়ামগীনি, অমদি শেলসু ঈরৈবাক মীয়ামগীনি চঙখিবা।
চহি ৭৫গী ঐখোয়গী খোঙচৎ অসিনা মশিং য়াম্লবা মীয়ামগী লৈঙাক্কী চৎন-পথাপ অমদি কাঙলোন অচৌ-অচৌবা কয়া শেমখ্রে। অদুগা মফমসিদা লৈরিবা পুম্নমক্না পুকচেল শেঙনা মখোয়গী থৌদাং য়াখি অমদি ৱাশক অমগী মখাদা থবক তৌখি। ঐখোয় অনৌবা শঙলেন্দা চঙলবসু, অরিবা শঙলেন অসিসু তুংগী মীরোলশিংদা মতম পুম্বগী ওইনা পুক্নিং থৌগত্তুনা লৈহৌখিগনি। ভারতকী শিংলি নাউরিদা মীয়ামগী লৈঙাক্কী মচৎ করম্না চেল্লিবগে, মসিবু মহৈ য়ালহন্নবগীদমক পায়খৎলিবা থবক থৌরাংশিং শঙলেন অসিদগী তৌদুনা মালেম পুম্বদা উৎপা হায়বসিনা ভারতকী মীয়ামগী লৈঙাক্কী সনা ফুদোংবা খোঙচৎকী মরুওইবা পন্দুপ অমনি।
ইকায়খুম্নরবা স্পীকর জী,
অমৃতকালগী অহানবা মশেক্কী মঙালনা, অনৌবা থাজবা অমা, অনৌবা ইশাদা থাজজবা, অনৌবা ইহুল, অনৌবা মঙলানশিং, অনৌবা খোঙফমশিং, অমদি অনৌবা থৌনাশিংনা লৈবাক অসিবু থনহল্লি। মায়কৈ মরিমক্তা ঙসিদি ভারতকী মায় পাকপশিং শিংথানরি অমদি চাউথোকচবগা লোয়ননা হরাও মথোই কানরি। হায়রিবশিং অসি ঐখোয়গী পার্লিয়ামেন্তকী চহি ৭৫গী পুৱারীগী অপুনবা হোৎনজমলগী মহৈনি। মরম অসিননি ঙসি মালেম অসিনা মদুগী খোন্থাঙ য়ৈনা তারিবা।
ইকায়খুম্নরবা স্পীকর জী,
চন্দ্রয়ান-৩গী মায় পাকপনা ভারত পুম্বদা, লৈবাক পুম্বদা মথুম মরাং হৌহনবতা নত্তনা মসিদা উবা ফংলিবা মতমগা চুনবা, সাইন্সকা মরী লৈনবা, তেক্নোলোজীগা মরী লৈনবা, ঐখোয়গী সাইন্তিস্তশিংগী মতিংগা মরী লৈনবা, ভারত মচা করোর ১৪০গী খোঙফমগা মরী লৈনবা ভারতকী ফিরেপকী অনৌবা শক্লোন অমনা লৈবাকসিদতা নত্তনা মালেমসিদা অনৌবা ইথিল অমা পীরগনি। হাউস অসিগী খুত্থাঙদা ঐনা অমুক্কা হন্না লৈবাকসিগী সাইন্তিস্তশিংবু অমদি মখোয়গী খোঙবুশিংগী মফমদা কয়ারক হন্নবা নুংঙাইবা ফোঙদোকচরি অমদি তরাম্না ওকচরি।
ইকায়খুম্নরবা স্পীকর জী,
হাউ অসিনা মমাঙদা নাম সম্মিত্তা অমত্তা ওইনা ৱারেপ অমা লৌখি অমদি লৈবাকসিনা হোৎনরিবশিংবু শিংথাখি। তিনবিরিবা ময়াম্নসু ঙসি জি২০গী মায় পাকপবুসু অমত্তা ওইনা শিংথাবিরি। অদোম্না লৈবাক মীয়ামগী চাউথোকচবগী চাং হেনগৎহল্লে হায়না ঐনা থাজৈ, মসিগীদমক ঐনা ময়ামবু থাগৎচরি। জি২০ মায় পাক্লিবসি মীওই করোর ১৪০গীনি। মসি ভারতকী মায় পাকপনি, লনাই মীওই অমখক্তগী মায় পাকপা নত্তে, পার্তী অমগী মায় পাকপা নত্তে। ভারতকী ফেদরেল স্ত্রকচরনা, ভারতকী খেন্নবা মতৌগা লোয়ননা ভারতকী খেন্নবা মচুশিং উত্তুনা মফম ৬০দা মীফম ২০০ হেন্না লৈবাকসিগী তোঙান তোঙানবা লৈঙাকশিংনা মশক মচু থোক্না পাঙথোক্তুনা মদুগী মমি মালেমগী ফম্পাকথক্তা তাহনখ্রে। মসিমক ঐখোয় পুম্নমক্না সেলেব্রেত তৌগদবা ৱাফম অমনি। মসিনা লৈবাকসিগী চাউথোকচববু হেনগৎহল্লগনি। অদুগা ময়াম্না হায়বিবগুম, ভারতনা প্রেসিদেন্ত ওইবা মতমসিদা অফ্রিকান য়ুনিয়ন্না মসিগী মেম্বর ওইরকখিবা ৱাফম অসিনসু ভারতকী চাউথোকচফম ওইরগনি। অফ্রিকান য়ুনিয়নগী মতাঙদা লাউথোরকপদা, অফ্রিকান য়ুনিয়নগী প্রেসিদেন্তনা মীকুপ অদু মহাক্না ৱা ঙাঙবদা কপ্না কপ্না ঙাঙলকপা য়াবা মীকুপ্নি হায়খিবা পুক্নিং নুংশিনিংঙাই ওইরবা তাঞ্জাদু ঐ কাউবা ঙম্লোই। ভারতনা অসিগুম্বা নীংজরকপা অমা মঙফাওনহন্নবগী তাঞ্জা ফংলিবা হায়বদু অদোম্না খনবদা লাম্বা ফংবিরমগনি।
অদুগা স্পীকর জী,
অদোমগী মীৎয়েঙ মখাদা ভারতকী প্রেসিদেন্সী নবেম্বর লোইবা ফাওবা লৈবনা, ঐখোয়গী ইনাক্তা লৈরিবা মতম অসিবু ঐখোয়না মপুং ফানা শীজিন্নগনি, অমদি অদোমগী মীৎয়েঙ মখাদা মালেমগী জি২০ লৈবাকশিংগী পি২০ পার্লিয়ামেন্তকী স্পীকরশিংগী ওইবা মীফম অমা অদোম্না লাউথোক্লিবা অসিদা লৈঙাক অসিনা মপুং ফানা শৌগৎকনি অমদি অদোমগী থৌশিলদা তেংবাংগনি।
ইকায়খুম্নরবা স্পীকর জী,
ঙসি ভারতনা বিস্বমিত্র ওইনা মহাক্কী মফম অমা কনবা ঙম্লিবা অসি ঐখোয় পুম্নমক্কীদমক্তা চাউথোকচনিংঙাইগী ৱাফমনি। মালেম পুম্বনা ভারত্তা মরুপ অমা থিরি, মালেম পুম্বনা ভারতকী মরূপ মপাং ওইবগী মতৌবু উবা ফংলি। অমদি মসিগী মরুওইবা মরমদি ঐখোয়গী নাৎনি, বেদদগী হৌরগা বিবেকানন্দ ফাওবদা ঐখোয়না থেংনরিবা ‘সবকা সাথ, সবকা বিকাস’ অসিনা ঐখোয় পুম্নমকপু পুনশিন্নহন্দুনা ঙসিগী মালেম অসিবু শম্নহল্লিবনি।
ইকায়খুম্নরবা স্পীকর জী,
হাউস অসিদগী কায়নবা, য়াম্না পুক্নিং নুংশিবা তাঙ্কক্নি, ইমুং মনুংদসু অরিবা য়ুম থাদোক্লম্লগা অনৌবা য়ুমদা হোংলকপা মতমদা হৌখ্রবা থৌদোক কয়া নীংশিংবনা মীৎকুপ খরদং ওইরবসু পন্থহল্লি অমদি ঐখোয়না হাউস অসি থাদোক্তুনা চৎপা মতমসিদা ঐখোয়গী পুক্নিং ৱাখলদসু অদুগুম্বা ইহুলশিংদুনা থল্লি, য়াম্লবা থৌদোকশিং নীংশিংহল্লি। অৱা-নুংঙাইগী ইথিলশিংসু লৈখি, লাউ-খোংনখিবসু লৈখি, চরাংনবা ফীভমসু লৈখি অদুগা হাউসতা হরাও কুমহৈগুমবা অমদি হরাও মথোই কাবা মতমসু লৈখি। হৌখ্রবা থৌদোকশিং অসি ঐখোয় পুম্বগী অমত্তা ওইবা লন্নি অমদি ঐখোয় পুম্নমক্না মসিদা চাউথোকচবা ফাওমিন্নগদবনি। নীংতম্বা ভারত শেমগৎলকপগা মরী লৈনবা থৌদোক কয়া থোকখিবা অমদি ওইরকখিবা ঐখোয়না হাউস অসিদগী হৌখিবা চহি ৭৫সিদা উখ্রে। ঙসি ঐখোয়না হাউস অসিবু থাদোক্লম্লগা অনৌবা হাউস অসিদা লেঙশিল্লিবা অসিসু ভারতকী মীচম মীয়ামগী পুক্নিং ইহুলবু ইকায়খুম্ননবা তাঞ্জাম অমসু ওইরিবনি।
অদুগা মসিনা মরম ওইরগা ইকায়খুম্নরবা স্পীকর জী,
ঐনা অহানবা ওইনা পার্লিয়ামেন্তকী মেম্বর ওইরকখিবা অমদি অহানবা ওইনা এম.পি. অমগী শক্লোন্দা হাউস অসিদা খোঙ থাংজিল্লকপা মতমদুদা ঐনা পার্লিয়ামেন্ত শঙলেন অসিগী থোঙজিন্দা ইকোক নোন্দুনা মীয়ামগী লৈঙাক্কী লাইশঙ অসিদা থৌগলগী ৱাখল্লোনবু পুক্নিংদা থাগোন্নদুনা খোঙ থাংজিনখিবনি। মীৎকুপ অদু ঐগীদমক্তা পুক্নিং মথুম মরাং হৌখিবা মীৎকুপ্নি, ঐনা খনবসু ঙম্লুদে অদুবু ভারতকী মীয়ামগী লৈঙাক্কী মতিংনা, ভারতকী মীচম মীয়ামগী লৈঙাক্তা থম্লিবা থাজবনা মরম ওইরগা রেলৱে প্লেৎফোর্মদা য়ারেক্লম্বা লায়রবা ইমুং অমগী অঙাং অমনা পার্লিয়ামেন্ত য়ৌরকখিবনি। লৈবাকসিনা ইফমদা অসুক য়াম্না ইকায় খুম্নবিগনি, অসুক য়াম্না থৌজানবিগনি, অসুক য়াম্না মীনুংসি উৎপিগনি হায়বা ঐগী ৱাখলদা লাম্বা ফংলুদে অমদি ঐনা খল্লুবসু তৌখিদে স্পীকর জী।
ইকায়খুম্নরবা স্পীকর জী,
পার্লিয়ামেন্ত হাউস মনুংসিদা ইরিবা কয়া অসি পাবা অমদি করিগুম্বদা মদুদা য়ুম্ফম ওইদুনা ৱাফম কয়া ফোঙদোকপা ঐখোয়গী মরক্তা কয়া অমা য়াওরি। পার্লিয়ামেন্ত হাউসকী চঙফমদা চাংদেবনা তাকপিরম্বা লোকদ্বারমগী মপুং ফাবা ৱাহৈ পরেং অমসু য়াওরি। মসিনা তাক্লিবদি মীয়ামগীদমক থোঙ হাংউ অমদি মখোয়না কমদৌনা মখোয়গী মঙমশিং ফংলি য়েংউ হায়বনি, ঐখোয়গী লাইনিংবশিংনা ইবিরম্বা ৱাহৈশিং অসি ঐখোয়গী চঙফম থোঙদা ইদুনা লৈরি। ঐখোয় পুম্নমক অমদি ঐখোয়গী মাঙদা লৈবিরম্বা পুম্নমক্না মসি উদুনা লাক্লবনি।
ইকায়খুম্নরবা স্পীকর জী,
মতমগী খোঙলৈ মতুং ইন্না ঐখোয়গী হাউসকী মওং মতৌসু অসুম অসুম লেপ্পা লৈতনা হোংলক্লি অমদি হেন্না পুম্নমকপু কোনশিনবগী মশক ওইরক্লি। খেন্নবা মশক কয়ানা থল্লবা হাউস অসিদা খুন্নাইগী তোঙান তোঙানবা কাঙলুপ কয়াগী মীহুৎশিং উবা ফংলি, লোল কয়া, লোলথৈ কয়া, চীঞ্জাক কয়ানা তিল্লরি, হাউস অসিগী মনুংদা পুম্নমক তিল্লরি অমদি পুন্সিগী শিন্ফম কয়াদগী মীওইশিং, খুন্নাইগী মশক্কী খেন্নবা লৈতনা, শেন্মিৎলোনগী থাক, নৎত্রগা খুঙ্গং নৎত্রগা ময়োল্লমদগী ওইরবসু, হাউস অসিদা মওং অমগী মপুং ফানা পুম্নমকপু কোনশিল্লবা ফীভম অমনা মীয়ামগী অনিংবা অমদি অপাম্বশিং ফোঙদোক্লি। দলিৎ, অৱাবা নংলবা, ত্রাইবেল, শোত্থহৌরবা, নৎত্রগা নুপীশিং ওইরবসু পুম্নমক্না তপ্না তপ্না মখোয় মখোয়গী থৌদাংশিং য়াদুনা মাঙদা চঙশিল্লক্লি।
ইকায়খুম্নরবা স্পীকর জী,
হৌরকপদা, নুপীশিংগী মশিং য়াম্লমদে অদুবু তপ্না তপ্না ইমা অমদি ইচে ইচলশিংসু মশিং হেনগৎলক্তুনা হাউস অসিগী ইকায়খুম্নববু মশক হাপ্লি, হাউস অসিগী ইকায়খুম্নবা মশক হাপ্পদা মখোয়গী চাউরবা থৌদাং য়াওরি।
ইকায়খুম্নরবা স্পীকর জী,
হৌরকপদগী হৌজিক ফাওবদা, চাউরাক্না পারবদা মীয়ামগী মীহুৎ চাউরাক্না লিশিং তরেৎ মখায়রোম্না হাউস অনিমক্তা থৌদাং য়াদুনা লাকখ্রে। হায়রিবা মতমসিদা চাউরাক্না নুপী এম.পি. ৬০০ লোম্না হাউস অনিসিগী ইকায়খুম্নবগী মশক হেন্না থোকহল্লি।
অদুগা ইকায়খুম্নরবা স্পীকর জী,
ময়ামসু খঙবিরি ইকায়খুম্নরবা ইন্দ্রজীৎ গুপ্তা জীনা চহি ৪৩, করিগুম্বা ঐনা শোয়বা নৎত্রগদি, হাউস অসিদা চহি ৪৩গী শাংলবা মতমসি লেঙশিনবিদুনা হাউস অসিগী শাক্ষি ওইবগী লাইবক ফরবা তাঞ্জা ফংদুনা লাক্লি। অদুগা ইকায়খুম্নরবা স্পীকর জী, হাউস অসিদনি শতিগুর রহমন্না চহি ৯৩ শুরবা ফাওবদা থৌদাং য়াবিরম্লিবসু। অদুগা ইকায়খুম্নরবা স্পীকর জী, ভারতকী মীয়ামগী লৈঙাক্কী মপাঙ্গলননি চহি ২৫ শুরকপদা চন্দ্রমনি মুরমুনা হাউস অসিগী মেম্বর ওইরকখিবা, শুপ্নতগী চহি ২৫ শুরকপদা, খ্বায়দগী নহা ওইবা মেম্বর ওইরকখিবনি।
ইকায়খুম্নরবা স্পীকর জী,
খন্ন-নৈনবা, য়েৎনবা, ফাগি জুগাই তৌনবা ঐখোয় পুম্নমক্না থেংনদুনা, তৌদুনা লাক্লবনি, অৱাৎপা অমত্তা লৈত্রে। অদুবু মদু ওইদুনসু ইমুং মনুং অমা ওইবগী ৱাখল্লোন ঐখোয়গী মরক্তা লৈরিবা অসি ঐখোয়গী মমাঙগী মীরোলদসু লৈরম্মি, মেদিয়াগী খুত্থাঙদা য়েংবিরিবা ময়াম অমদি মপান্দা থোরকপগা ঐখোয় ইশাগী ওইবগী ৱাখল্লোন অমা ফাওরিবা, ইমুং মনুং ওইবগী ৱাখল্লোন অসিনা তোপ তোপ্পা অৱাংবা থাক্তা ফাওরিবা ইহুল অসিসু হাউস অসিগী মতিক্নি। ইমুং মনুং ওইবগা ৱাখল্লোন অমদি মসিগা লোয়ননা ঙাইহাক শাউনবনা মাঙহন্দে, হায়রিবা নুংশিনবগী মরী অসি হাউস অসি থাদোক্লবা মতুং চহি কয়াগী মতুংদা উনরবসু লৈগনি, অদুগুম্বা নুংশিনবা অদু কৈদৌঙৈদা কাউনদে, নীংশিংবদা নুংশিরবা মতমদু কাউথোক্নদে হায়বা ঐ খঙবা ঙমই।
ইকায়খুম্নরবা স্পীকর জী,
ঐখোয়না ঐখোয়গী মাংলমচত্তা অমদি হৌজিক কয়ারক উখ্রে মদুদি লাংফম কয়া লাক্লবসু, খুদোংচাদবা কয়া মায়োক্নজরবসু এম.পি.শিংনা হাউস অসিদা লাক্তুনা এম.পি. অমা ওইনা, মীয়ামগী মীহুৎ অমা ওইনা হকচাঙগী ওইবা অৱাবা, অরুবা অনাবা কয়া মায়োক্নখ্রে, কনাগুম্বনা হ্বীলচেয়রদা লাক্কনি, কনাগুম্বনা দোক্তরগা লাকমিন্নদুনা মপান্দা ঙাইহন্দুনা লৈগনি, অদুবু এম.পি.শিংনা মখোয়গী থৌদাংশিং য়াদুনা লাকখি।
কোরোনাগী মতম ঐখোয়গী মীৎমাঙদা তাদুনা লৈরবা খুদমনি, ইমুংদা লৈরম্বদগী মপান্দা থোরকপা হায়বসি অশিবনা কৌরকপগুম্না থোকখিবা মতমদা, মদু ফনা ওইদুনসু ঐখোয়গী ইকায়খুম্নরবা এম.পি.শিংনা হাউস অনিমক্তা কোরোনা মতমগী লাংফম মরক্তা হাউসতা লাক্তুনা মখোয়গী থৌদাং য়াখি। ঐখোয়না লৈবাক্কী থবক থৌরম লেপহনখিদে। ঐখোয় লাপথোক্ননা লৈনবা তাখি অদুগা হঞ্জিন হঞ্জিন তেস্ত তৌবসু তাখি। হাউসতা লাক্লবসু মাস্ক উপ্পা তাখি। ফমফমগী শিন-লাংবসু তোঙান তোঙান তৌখি, মতমসু হোংলকখি। হীরম খুদিংদা লৈবাক্কী থবক থৌরম লেপহন্দনবা ৱাখল্লোন্দা মেম্বর খুদিংমক্না হাউস অসিবু মখোয়গী থৌদাংগী মরুওইবা শরুক অমা ওইনা লৌখি। পার্লিয়ামেন্ত মথৌ তৌহনখি অদুগা ঐনা উজখিবদা মীয়ামসু হাউস অসিদা য়াম্না পুক্নিং লুপ্পিখি, চহি কুন্থ্রাগী মমাঙদা, চহি কুন্থ্রামঙাগী মমাঙদা উখিবগুম্না এম.পি.শিংনা হাউসতা লাকপা মতমদা সেন্ত্রেল হোলদা শোয়দনা চঙলকখি। লাইশঙদা চৎপগী হৈনবী লৈবগুম্না ময়ামসু হাউসতা লাকপগী হৈনবী লৈখি, মফমসিদা পুক্নিং লুপ্নখি। নুংগী ওইবা ইথিল অমনা মরীনা করিগুম্বা মফম অমদা চৎপদা ঙাইহাক চঙলম্বা অদুগুম্না মীয়ামগী মীহুৎ পুম্নমক্না মফমসিদা মখোয়গী ইহুল অদুনা হাউস অসিদা লাক্নবগী ইথিল পীদুনা লাক্লি।
ইকায়খুম্নরবা স্পীকর জী,
নীংতম্লবা মতুংদা অখঙ অহৈ মীওই কয়ানা চীংনবা কয়া ফোঙদোক্নখি। লৈবাকসিগী ফীভম করি ওইরগনি, হিংবা ঙমগদৌরিবরা নৎত্রগা ঙম্লোইদৌরিবরা, অমত্তা ওইনা লৈগদ্রা নৎত্রগা তোখাই তোখাই তাখিগদ্রা, মীয়ামগী লৈঙাক অদুমক লৈহৌগদ্রা হায়না খন্নখি, অদুবু লৈবাকসিগী পার্লিয়ামেন্তকী মতিংনা মালেম পুম্নমকপু অরানবা তাহনখি। অদুগা লৈবাক অসিনা অরৈবা মতিং ফুদোক্তুনা মাঙদা চঙশিল্লি। ঐখোয়দা চীংনবা লৈজরবসু, অমম্বা নোংগী মপৈনা খঞ্জিল্লবসু, হায়রিবা থাজবসিগা লোয়ননা ঐখোয়না মখা তানা মায় পাকখিগনি অমদি ঐখোয় পুম্নমক্না, ঐখোয়গী মমাঙগী মীরোলশিংনা পুন্না হোৎনমিন্নদুনা উৎলিবা অসি ঐখোয়গী চাউথোকচনবগী তাঞ্জা অমনি।
ইকায়খুম্নরবা স্পীকর জী,
শঙলেন অসিদা চহি অনিগা থা তরামাথোই চুপ্না সংবিধান সভাগী মীফমশিং পাঙথোককি। মদুদা লৈবাকসিগী লমজিং ওইরিবা ঐখোয়না খুদুং ইন্দুনা চৎলিবা ঐখোয়গী সংবিধান পীবিরম্মি অমদি নবেম্বর ২৬, ১৯৪৯দা ঐখোয়না ফংজহৌবা সংবিধান অদু জনুৱারী ২৬, ১৯৫০দগী চৎনবা হৌখি। হৌখিবা চহি ৭৫ অসিদা ঐখোয়গী খ্বায়দগী চাউনা মায় পাকপদি লৈবাকসিগী মীচম মীয়াম্না পার্লিয়ামেন্ত অসিদা থম্লিবা থাজবা হেনগৎলকপা অসিনি। অদুগা মীয়ামগী লৈঙাক্কী খ্বায়দগী কনবা মপাঙ্গল হায়রগদি অথোইবা ইন্সতিত্যুসন অসিদা মীয়াম্না থম্লিবা থাজবা অদু লেঙদনা লৈরিবা অসিনি। হায়রিবা চহি ৭৫সিদা ঐখোয়গী পার্লিয়ামেন্ত অসিনা মীয়ামগী ইহুলবু ফোঙদোক্নবগী শঙলেন ওইহন্দুনা লাক্লি। অসুম্না মীয়ামগী কল্লবা ইহুলবু ঐখোয়গী রাজেন্দ্র বাবুদগী হৌরগা দোক্তর কলাম, রামনাথ জী কোবিন্দ অমদি দ্রৌবদি মুরমু জী হায়রিবা পুম্নমকসিনা তাকপিরম্বশিংগী কান্নবা ঐখোয়গী হাউস অনিমক্না ফংহৌরি, মদুনা লমজিং ওইরিবনি।
ইকায়খুম্নরবা স্পীকর জী,
পন্দিত নেহরু জী, সাস্ত্রী জীদগী হৌরগা অতল জী, মনমোহন জী ফাওবদা অথোইবা মীওই কয়ানা হাউস অসিবু লুচিংবিরমখি অমদি লৈবাক অসিগী হাউস অসিদগী লমজিংলমখি। মখোয়না লৈবাকসিবু অনৌবা মশক অমা থোকহন্নবগীদমক কন্না হোৎনখি। ঙসি অসি মখোয় পুম্নমকপু ইকায়খুম্নজনবগী তাঞ্জা অমনি।
ইকায়খুম্নরবা স্পীকর জী,
সর্দার বল্লভ ভাই পতেল, লোহিয়া জী, চন্দ্রশেখর জী, অদবানী জীনচিংবা মশিং থিঙমদ্রবা মীওই কয়ানা হাউস অসিবু মতিক মপাঙ্গল হাপ্নবা, খন্ন-নৈনখিবা কয়াবু মশক থোকহন্নবা লৈবাকসিগী মীচম মীয়ামগী খোঞ্জেলদা মপাঙ্গল হাপ্নবগী থবক হাউস অসিদগী তৌখিবনি। মালেমগী লৈবাক কয়াগী লুচিংবশিংনা ঐখোয়গী হাউসশিং অসিদা ৱা ঙাঙনবগী তাঞ্জা কয়াসু ফংখ্রে অমদি মখোয়গী ৱাহৈশিংদা ভারতকী লোকতন্ত্রবু ইকায়খুম্নবগী ৱাখল্লোন ফোঙদোক্নখি।
ইকায়খুম্নরবা স্পীকর জী,
হরাউ নুংঙাইবগী মীৎকুপ্তা হাউস অসিদা মীত্তগী পি তানখিবসু য়াওনখি। লৈবাকসিগী হান্নগী প্রধান মন্ত্রী অহুম মখোয় মখোয়গী লৈঙাক মতমদা লৈখিদবদা হাউস অসি অৱাবগী মশক ওইখি। নেহরু জী, সাস্ত্রী জী, ইন্দিরা জীনা লৈখিদবদা হাউস অসিনা মীত্তা পিগী ইরা শিন্থদুনা কায়না ৱাহৈ ফোঙদোকখি।
ইকায়খুম্নরবা স্পীকর জী,
শিংনবা কয়া লৈদুনসু স্পীকর খুদিংনা, ঐখোয়গী স্পীকর খুদিংমক্না অপনবা লৈতনা হাউস অনিমকপু অফবা মওংদা চলাইখি অমদি মখোয়গী লৌগদবা ৱারেপশিং লৌখি। হায়রিবা ফিরেপশিং অদু মাবলঙ্কর জীগী মতমদগী হৌরকখিবা নৎত্রগা সুমিত্রা জীগী মতমদা নৎত্রগা বির্লাগী মতমদা ওইবা য়াই। ঙসিমকসু হায়রিবা ৱারেপশিং অদুনা রিফরেন্স পোইন্ত ওইনা লৌনরি। হায়রিবা থবক অসি,নুপী অনি য়াওরগা ঐখোয়গী স্পীকর ১৭ লোম্না তৌবিরম্বনি অমদি মাবলঙ্কর জীদগী হৌরগা সুমিত্রা তাই নৎত্রগা বির্লাজী ফাওবদা ঙসিসু মসিগী কান্নবা ফংদুনা লৈরি। মখোয় খুদিংমক্কী মশা মশাগী মওং মতৌ লৈজৈ। অদুবু মখোয়না পুম্নমকপু কোনশিন্দুনা চৎন-পথাপ, কাংলোনগী থৌরিনা হাউস অসিবু মতম পুম্বদা পুন্দুনা থম্লম্মি। ঙসি ঐনা হায়রিবা স্পীকর পুম্নমকসিবু ইকোক নোঞ্জরি অমদি ইকায়খুম্নবা উৎচরি।
ইকায়খুম্নরবা স্পীকর জী,
ঐখোয় মীয়ামগী মীহুৎশিংগী ইশা ইশাগী থৌদাং লৈজরবসু ঐখোয়গী ইরক্তা তিনবিরিবা মীওই কাঙলুপশিং অসিনসু মীরোল কয়াদা অহোংবা পুদুনা লাকখ্রে। করিগুম্বদা চে পায়দুনা চেল্লক্লিবা মহাক্কী থৌদাংসু হন্থবা নত্তে। ঐখোয়দা চে-চাং য়ৌহন্নবগীদমক চেন্দুনা লাক্লিবা, হাউসতা অশোয় অঙাম থোক্নবা, মসিগী ৱারেপশিংদা অশোয় অরাক লৈহন্দনবা মখোয়না মীৎকুপ নাহুম শিংনা লৈরি। মখোয়না য়ারিবা থৌদাংশিং অসিনা হাউস অসিগী ক্বালিতী ওফ গভর্নেন্সতা খোঙজেল হাপ্পদা চাউনা মতেঙ ওইরিবনি। ঐনা হায়রিবা মরূপ পুম্নমকপু, অমদি মখোয়গী মমাঙদা মফমসিদা লৈরম্বা পুম্নমকপু থম্মোয়নুংদগী থাগৎচবা ফোঙদোকচরি। মসিদসু নত্তনা হাউসকী ৱাহন্থোক তাঙ্কক অসিখক্তা নত্তে। মফমসিদা লৈরিবা মীওই কয়া অমনা ঐখোয়দা চা পিথকপিরমগনি, কনাগুম্বনা ঈশিং পুরক্লমগনি, কনাগুম্বনা অহিং ফাওবা চত্থবা মীফমশিংদা কনামত্তবু চরাম্নবা ফাওহন্দনবা হোৎনরমগনি, মখল কয়াগী থৌগল তৌরমগনি। কনাগুম্বা লৈখোঙ শোম্বনা মফমসিগী মপান্দা লৈরিবা ফীভমশিং য়েংশিল্লমগনি, কনাগুম্বনা শিৎ শেংলমগনি, মশিং থিঙমদ্রবা মীওই কয়ানা ঐখোয় পুম্নমকপু নীংথিনা থবক তৌবা য়াননবা অমদি তৌরিবা থবকশিং অদু লৈবাক অসিবু মাঙদা পুখৎপদা খোঙজেল হেক য়ারিবমখৈ য়াঙহন্নবা ফীভম শেম্নবা থৌদাং কয়া লৌরিবশিংবু, ঐগী মায়কৈদগীসু অমদি হাউসকী মায়কৈদগীসু মখোয়বু অখন্ননা ইকায়খুম্নবা উৎচরি।
ইকায়খুম্নরবা স্পীকর জী,
মীয়ামগী লৈঙাক্কী হাউস অসিদা তেরোরিস্তশিংনা লান্দারকখ্রে। মালেম পুম্বদা, লান্দারকখিবা অদু শঙলেন অসিদা নত্তে, মাদর ওফ দিমোক্রেসীদনি, মওং অমদা ঐখোয়গী থৱায়দা লান্দারকপগুম্বনি। লৈবাক অসিনা থৌদোক অদু কৈদৌঙৈদসু কাউবা ঙম্লোই, অদুবু তেরোরিস্তশিংগা লান্থেংনবগা লোয়ননা হাউস অসিবু ঙাকথোক্নবগীদমক অমদি মেম্বর পুম্নমক্কী পুন্সি কন্নবগীদমক নোংমৈ মরু কয়া পানখিবা মখোয়বুসু ঙসি ঐনা ইকায়খুম্নবা উৎচরি। মখোয় ঐখোয়গী ইরক্তা লৈত্রে অদুবু মখোয়না অচৌবা থৌদাং লৌরম্মি।
ইকায়খুম্নরবা স্পীকর জী,
ঙসি ঐখোয়না হাউস অসিবু থাদোকপা মীৎকুপসিদা, মখোয়গী শিন্ফমগী মতম পুম্বা পার্লিয়ামেন্তকী থবক থৌরমগী মতাঙদা পাউদমখিবা পাউমী মরূপশিংবুসু ইকায়খুম্নজরি। মখোয়না মফমসিগী থৌদোক ৱাথোকাশিং লৈবাক শিনবা থুংনা য়ৌহল্লিবনি অদুগা মতমদুদদি হৌজিক ফংলিবা তেক্নোলোজী ময়ামসি লৈরম্বা নত্তে। মতমদুদা মখোয়না মফমসিগী ৱাফমশিং মীয়ামদা ফংহনখি অমদি মনুং হঞ্জিনবা ৱাফমশিংসু পাউদমলমই। ঐনা খনবদা মতৌ অসিগুম্না পার্লিয়ামেন্তকী পাউ কভর তৌরিবা পাউমীশিং অদুগী মমিং মথা খঙলমদবদি য়াই অদুবু মখোয়গী থবকশিংদি কাউনরোই। পাউগীখক নত্তনা ভারতকী চাওখৎ খোঙচৎ অসিবু পার্লিয়ামেন্ত হাউস অসিদগী খঙনবা মখোয়গী মতিং শীজিন্নখি। ঙসিসু মতম অমদা পার্লিয়ামেন্তকী পাউ লৌরম্বা অরিবা পাউমী থেংনবা মতমদা, মখোয় মমিৎমক্না উহৌবা, মনানা তাহৌবা, অঙক অঙকপা ঐখোয়না খঙদবা ৱারী কয়া লিরকপা য়াওই। মসিনা তাকপদি মফমসিগী ফক্লাংশিংনা মওং অমদা মফমসিগী মতিং হাপ্পগুম মখোয়গী কলমদা মফমসিগী মমি তাই অমদি হায়রিবা কলমদুনা, লৈবাক্কী, হাউস অসিগী ঐমদি পার্লিয়ামেন্তকী মেম্বরশিংগী মমিৎ পাংহনখি। অসিগুম্বা পাউমী মরুপ কয়াগী মফমদা, কয়া অমসু তাইবংপালসি থাদোক্তুনা চৎলম্বসু য়াওরম্লগনি, ঙসি ঐখোয়না শঙলেন অসি থাদোক্তুনা চৎপদা পুক্নিংদা নুংশিবা ফাওরিবা অসিগুম্না, হায়রিবা পাউমী মরূপশিং অদুগী থম্মোয়দসু শঙলেন অসি থাদোক্তুনা চৎপদা পুক্নিং নুংশিবা ফাওরমগনি মরমদি মখোয়দা লৈরিবা মফমসিগী নুংশিবা অদু ঐখোয়দগীসু হেল্লমগনি। পাউমী খরদি ঐখোয়না নহা ওইরিঙৈদগী হৌনা থবক তৌরকপা য়াওরমগনি। ঙসি অসি, দিমোক্রেসীগী মরুওইবা পাঙ্গল অমা ওইরিবা মখোয়গী থৌদাংশিংসু নীংশিংনবগী মতম অমসু ওইগদৌরিবনি।
ইকায়খুম্নরবা স্পীকর জী,
ঐখোয়না শঙলেন মনুংসিদা চঙলকপা মতমদা, ঐখোয়দা নাথ ব্রহ্মাগী ৱাখল্লোন ফাউরকই। ঐখোয়গী সাস্ত্রশিংদা তাকপিরম্মি মদুদি করিগুম্বা মফম অমবু হঞ্জিন হঞ্জিন চাং অমদা শোল্লবদি মফমদু লাইফমগী মশক ওইরকই। মদুদা পোজিবিত ভাইব অমা থোরকই। নাদদা মফম অমবু অশেঙবা মফম ওলহন্নবগী মতিক অমা লৈ। শঙলেন অসিসু মীয়ামগী মীহুৎ লিশিং তরেৎ মখায়দুগী খোঞ্জেলশিংগী ইৱাই ইনিলদুনা, শঙলেনসিদা ঐখোয়না মখা তানা ফমদুনা খন্নরুদ্রবসু, মখোয়গী নিন্দুনা লৈহৌবা ইনিলদুনা মফম অসিগী লাইফমগুম ওইহনগনি হায়না ঐনা থাজৈ। মীয়ামগী লৈঙাক্তা থাজবা থম্বা মীওই খুদিংমক্না ঙসিদগী চহি ৫০গী মতুংদসু মফমসি য়েংবা লাকপদা মঙোন্দা হায়রিবা ইৱাই ইনিল অসি ফাওগনি, ভারতকী থৱায়গী খোঞ্জেলশিং নিন্দুনা লৈবা তাবা ফংগনি।
মরম অসিনা স্পীকর,
শঙলেন অসি ভগৎ সিংহ, বতুকেস্বর দত্তনা মখোয়গী থৌনা ফবা অমদি মতিক্না বোম্বগী ইনিলগা লোয়ননা ব্রিতিশ সুল্তানেৎপু মৈ চাকহনখিবা মফমদুনি। হায়রিবা বোম্বগী খোঞ্জেলদুনসু লৈবাক্কী য়াইফনবা তৌবা পাম্বা মীওইশিংবু অহিং তুমহন্দে।
ইকায়খুম্নরবা স্পীকর জী,
শঙলেন অসি ৱাফম কয়াগীদমক পন্দিত জীবু নীংশিংনখিবা মফমদুনি, অদুবু ঐখোয়না শোয়দনা নীংশিংগনি। শঙলেন অসিদা পন্দিৎ নেহরুগী এত দি স্ত্রোক ওফ মিদনাইতকী ইনিলনা ঐখোয় পুম্নমকপু থৌনা হাপ্লি। অমদি শঙলেন অসিদা অতল জীনা হায়বিরম্বা ৱাহৈশিং ঙসিসু নিন্দুনা লৈরি। লৈঙাক কয়া লাক্কনি, চৎখিগনি, পার্তী কয়া শেমগনি, কায়গনি, অদুবু লৈবাক্তি অদুমক লেঙদনা থমগদবনি।
ইকায়খুম্নরবা স্পীকর জী,
পন্দিত নেহরুগী অহানবা মন্ত্রী মন্দলদা বাবা সাহেব অম্বেদকর মন্ত্রী অমা ওইরম্মি। মালেমগী খ্বায়দগী ফবা থৌওংশিং ভারত্তা পুরকপদা মরুওইবা মীৎয়েঙ থম্লম্মি। ফেক্তরী কাঙলোন্দা মালেমগী খুদোংচাবশিং হাপচিল্লকপদা বাবা সাহেব অম্বেদকরনা মরুওইবা থৌদাং লৌখি অমদি মদুগী মহৈনা ঙসি লৈবাকসিনা কান্নবা ফংলি। বাবা সাহেব অম্বেদকরনা লৈবাক্কীদমক নেহরু জীগী লৈঙাক্তা ঈশিংগী খুজিল থৌরাংসু হাপ্লমখি। হায়রিবা ঈশিংগী থৌরাং অদু শেম্বদা বাবা সাহেব অম্বেদকরগী চাউরবা থৌদাং য়াওখি।
ইকায়খুম্নরবা স্পীকর জী,
ভারত্তা বাবা সাহেব অম্বেদকারনা হেক হেক হায়রম্বা, ভারত্তা খুন্নাইগী ৱায়েল ফংহন্নবগীদমক ইন্দস্ত্রিএলাইজেসন পুরকপা য়াম্না মরুওই হায়বা ৱাফম ঐখোয়না খঙই। মরমদি, লৈবাকসিগী দলিৎ - শোত্থহরবা মীওই কাঙলুপশিংগী মফমদা মখোয়গী লম লৈজদে, মখোয় করি তৌগনি, মতাঙসিদা ইন্দস্ত্রিএলাইজেসন তৌবা তাই। অদুগা বাবা সাহেবকী ৱাফম অসিবু লৌদুনা, পন্দিৎ নেহরুগী মন্ত্রী ওইরম্বা, দোক্তর শ্যামা প্রসাদ মুখর্জীনা, লৈবাকসিগী অহানবা কম্মর্স মন্ত্রী অমদি ইন্দস্ত্রী মন্ত্রী অমা ওইনা ইন্দস্ত্রী পোলিসী পুরকখি। ঙসি ইন্দস্ত্রী পোলসী ফনা য়াম্না শেম্লবসু, মদুগী থৱায়দি অহানবা লৈঙাক্না হাপ্লম্বনি অমদি মসিদা মহাক্কী থৌদাং চাউনা লৈ।
ইকায়খুম্নরবা স্পীকর জী,
লাল বহাদুর সাস্ত্রী জীনা ৬৫কী লান্দা ঈরৈবাকসিগী লান্মীশিংগী থৌনা ময়েং তাহন্দনবা, মখোয়গী মতিকপু মপুং ফানা লৈবাক্কী মফমদা শিন্ননবা ৱাখল্লোন শঙলেন অসিদগী লাকখিবনি। গ্রীন ফাউন্দেসনগী চেৎলবা য়ুম্ফম অমা থোনখিবসু লাল বহাদুর সাস্ত্রীনি।
ইকায়খুম্নরবা স্পীকর জী,
বঙ্গলাদেশ নীংতম ঈহৌ অমদি মদুবু শৌগৎপগী ফিরেপসু শঙলেন অসিনা ইন্দিরা গান্ধীগী মীৎয়েঙ মখাদা লৌখিবনি। শঙলেন অসিনা ইমর্জেন্সীদা মীয়ামগী লৈঙাক্তা পীখিবা চৈথেংসু উখ্রে অমদি শঙলেন অসিনা ভারতকী মীয়ামদা থৌনা হাপ্তুনা মীয়ামগী লৈঙাক অমুক হঞ্জিল্লকপসু উখ্রে। মসিনা লৈবাক্কী লাংফম কয়াসু থেংনখ্রে অমদি লেঙদ্রবা ফিরেপ কয়াসু লৌখ্রে।
ইকায়খুম্নরবা স্পীকর জী,
শঙলেন অসিদা ঐখোয়গী হান্নগী প্রধান মন্ত্রী চরন সিংহ জীনা রুরেল দিভেলপমেন্ত মন্ত্রালয় হৌদোকখিবনি হায়বা ৱাফমসিসু শঙলেন অসিনা মতম পুম্বদা লমন তোন্দুনা লৈহৌরগনি। শঙলেন অসিদা মীখলদা ভোত থাদবগী চহি ২১দগী ১৮দা হন্থহনখিবনি অমদি লৈবাক্কী নহারোলশিংবু মখোয়গী থৌদাং য়ানবগীদমক পুক্নিং থৌগৎখিবনি, থৌনা হাপখিবনি। ভি পি সিংহ জী অমদি চন্দ্রশেখরজী অমদি তুংদা অতৈ কয়াসু লাকখি। মতম কয়াদগী মায়কৈ অমদা লৈবাকসিনা চঙশিন্দুনা লাক্লি। শেন্মিৎলোনগী খুজিল থৌরাংগী পোৎলুম্না লৈবাক্কী পোৎলুম ওইরম্মি। অদুবু, থৌনা লৈনা অরিবা শেন্মিৎলোনগী থৌশিলবু থাদোক্লমদুনা অনৌবা লম্বীদা চঙশিন্নবগী ফিরেপ লৌখিবা, অমদি মদুগী মহৈ ঙসি লৈবাকসিনা ফংলিবা অসি নরসিম্হ রাউগী লৈঙাক্নননি।
অতল বিহারী বাজপায়ী লৈঙাক্কী লৈঙাকসু ঐখোয়না শঙলেন অসিদা উখ্রে। ঙসি লৈবাকসিদা মরুওইবা থৌশিল অমা ওইরিবা সর্ব শিক্সা অভিয়ান, ত্রাইবেল এফ্যার্স মন্ত্রালয়, অৱাং নোংপোক্কী মন্ত্রালয়সু অতল জীনা শেম্বিরম্বনি। ন্যুক্লিয়র তেস্তনা ভারতকী মতিংগী শক্তম ওইখি। অদুগা শঙলেন অসিদা মনমোহন জীগী লৈঙাক্কী মতমদা কেস ফোর ভোতকী স্কান্দলসু শঙলেন অসিদা থোকখিবনি।
ইকায়খুম্নরবা স্পীকর জী,
‘সবকা সাথ সবকা বিকাস’কী লাইৱা, য়াম্লবা পুৱারী ওইরবা ফিরেপ, দেকেদ কয়া পন্দুনা লৈরকপা ৱাফমশিং, মখোয়গী মতম চুপ্পগী ওইবা ৱাখৈশিংসু শঙলেন অসিদা পুরকখি। আর্তিকল ৩৭০, শঙলেন অসিনা মতম চুপ্পদা চাউথোকচবগা লোয়ননা, শঙলেন অসিগী মতমদা থোকখিবনি হায়না হায়নদুনা লৈহৌরগনি। ৱন নেসন ৱন তেক্স – GSTগী ফিরেপসু মফমসিদা লৌখিবনি। ৱন রেঙ্ক ৱন পেন্সন OROP সু শঙলেনসিদা শেমখিবনি। লায়রবশিংগীদমক চাদা ১০ রিজর্বেসন তৌবসু লৈবাকসিগী অহানবা ওইনা থোইদোকপা য়েৎনবা তৌদনা মীয়ামদা খুদোল তৌখিবনি।
ইকায়খুম্নরবা স্পীকর জী,
ভারতকী মীয়ামগী লৈঙাক্কী অকা অকুম পুম্বা ঐখোয়না উখ্রে অমদি শঙলেন অসি মীয়ামগী লৈঙাক্কী মতিক্কী খুদম চাংদম ওইদুনা মীয়াম্না থম্লিবা থাজবগী ময়ায় ওইবা মফম ওইদুনা লাকখি। শঙলেন অসি য়েংবিয়ু অমদি শঙলেন অসিদা এম.পি. মরিখক লৈবা পার্তীনা লৈঙাক পায়খিবা অমদি এম.পি. ১০০ লৈবা পার্তীনা ওপোজিসন্দা লৈখিবা মালেমগী মীপুম খুদিংমক্না ঙক্না য়েংনখিবা মফম্নি। মসি শঙলেন অসিদা লৈখিবা মীয়ামগী লৈঙাক্কী মতিং অদুগী খুদম্নি। অদুগা হায়রিবা শঙলেনসিদা ভোত অমখক্না অতল জীগী লৈঙাক লাকহনখিদবা অমদি মীয়ামগী লৈঙাক্কী মতিং হাপখিবা পুম্নমকসিসু শঙলেন অসিদা থোকখিবনি। ঙসি য়াম্লবা রিজনেল পার্তী মচা মচাশিংনা ঐখোয়গী লৈবাকসিগী খেন্নবা মশকপু তাক্লি, ঈরৈবাকসিগী নীংজবশিংগী মরুওইবা মীৎয়েঙফম অমসু ওইহল্লি।
ইকায়খুম্নরবা স্পীকর জী,
লৈবাকসিদা প্রধান মন্ত্রী অনি লৈখ্রে মোরারজী দেসাই, ভি.পি. সিংহনা কংগ্রেসতা লৈজরগসু লান্থেংনদুনা এন্তি-কংগ্রেস লৈঙাক অমা লুচিংখিবা কয়াসু মফমসিদা উখ্রে। অদুগা ঐখোয়গী নরসিম্হ রাউসু য়েংবিয়ু, ময়ুমদা হনগদবগী থৌরাংলুরবনি, মহাক পোত্থারগনি লাউথোক্লুরবনি, অদুবু মীয়ামগী লৈঙাক্কী মতিংনা শঙলেন অসিদা মহাক্না চহি মঙা প্রধান মন্ত্রী ওইনা থৌ পুরম্মি।
ইকায়খুম্নরবা স্পীকর জী,
ময়াম পুন্না অয়াবা লৌদুনা লুবদগী লুরবা থবক কয়া পাঙথোকখ্রে। ইং ২০০০গী মতমদনি অতল জীগী লৈঙাক মখাদা ময়াম পুম্নমক্কী অয়াবগা লোয়ননা স্তেত ৩ মথুম মরাং হৌবা অমদি হরাও তয়াম্বগা লোয়ননা শেমখি। ছত্তিসগর শেম্বা মতমদা, ছত্তিসগরনসু হরাওখি, মধ্য প্রদেশনসু হরাওখি। উত্তরাখন্দ শেম্বা মতমদসু উত্তরাখন্দ অমদি উত্তর প্রদেশ অনিমক হরাওখি। ঝার্খন্দ শেমখিবা মতমদসু ঝার্খন্দ অমদি বিহার অনিমক হরাওখি। মসি শঙলেন অসিগী মপাঙ্গল মতিক অমদি পুম্নমক্না য়ামিন্নবগী ফীভমদুনা ওইহনখিবনি। অদুবু অৱাবগী মশক ওইবা থৌদোকশিংসু থোকখিদবা নত্তে, তেলঙ্গনাগী মঙমশিং নমথনবা য়াম্না কন্না হোৎনখি, ঈগী তুরেল চেলহনখি। অদুবু শেমখ্রবা মতুংদা তেলঙ্গনাসু অন্ধ্রসু হরাও তয়াম্বা ফোঙদোক্নখিদে। য়েংথিনবগী মরু হুনখি। তেলঙ্গনাসু অতৈগুম হরাও হরাও শেম্লম্লবদি হেন্না ফরমগদবনি। ঙসি তেলঙ্গনা য়াম্না চাওখৎলমগদবনি।
ইকায়খুম্নরবা স্পীকর জী,
মতম অমদা সংবিধান সভাগী নোংমগী এলোৱেন্স লুপা ৪৫দগী হন্থরগা লুপা ৪০দা লেপখিবা মতমদা, ময়াম্না মদুদগী হেন্না হন্থহনগদবনি হায়না ফোঙদোক্নখিবা অসিসু শঙলেন অসিগী মচৎনি।
ইকায়খুম্নরবা স্পীকর জী,
শঙলেন অসিগী কেন্তীন্দা ফংলম্বা সবসিদী অদুনা য়াম্না হন্থবা মমলদা লুক্লেন চাবা ফংলম্বা অদুসু মেম্বরশিংনা সবসিদী অদুবু মুত্থত্তুনা শেল মপুং ফানা পীরগা চানরি।
ইকায়খুম্নরবা স্পীকর জী,
কোরোনাগী মতমদা মথৌ তারক্লবদা এম.পি.শিংনা এম.পি.এল.এ.দি.এস. ফন্দ থাদোক্তুনা লৈবাক্কী লাংফমগী মতমদুদা মতেঙ পাংনবগীদমক চোংথোরকখি। মসিদসু নত্তনা কোরোনাগী মতমদা শঙলেন অসিগী এম.পি.শিংনা মখোয়গী তলবকী চাদা ৩০ কত্থোক্তুনা লৈবাক্কী মাঙদা তাদুনা লৈখিবা লাংফম অদুদা মরুওইবা থৌদাং য়াখি।
ইকায়খুম্নরবা স্পীকর জী,
ঐখোয়না চাউথোকচবগা লোয়ননা হায়বা ঙমই, শঙলেন অসিদা লেঙশিনবিরিবা মীওইশিংসু হায়বা ঙমই, ঐখোয়গী মাঙদা লৈরম্বা মখোয়শিংদুনসু হায়বা ঙমই মদুদি ঐখোয় ইশাগী মথক্তা দিসিপ্লিন অমা থম্নবগীদমক মতম মতমগী মতুং ইন্না রিপ্রজেন্তেসন এক্ততা শেমদোক শেমজিন তৌজরিবা, মসি তৌবা য়ানি মসিনা তৌবা য়ারোই হায়বনচিংবা কয়া থম্লিবসিসু ঐখোয় ইশামক্নি। মসিমক মশক মচু থোকপা মীয়ামগী লৈঙাক অমগী য়াম্না চাউবা খুদম অমনি অমদি মসি ঐখোয়গী ইকায়খুম্নরবা এম.পি.শিংনা, ঐখোয়গী মমাঙগী এম.পি.শিংনা পীবিরম্বা খুদোলনি হায়না ঐনা থাজৈ। অমদি অসিগুম্বা ৱাফমশিং অসি নীংশিংগদবনি হায়না ঐনা থাজৈ।
ইকায়খুম্নরবা স্পীকর জী,
হৌজিক এম.পি. ওইনা লৈরিবা ঐখোয়গীদমক্তদি ঐখোয় পুৱারী অমদি তুংলমচৎ অনিমক থেংনবগী তাঙলবা তাঞ্জা অদু হকথেংননা থেংনবগী খুদোংচাবা অদু ফংলিবনি। ঙরাং অমদি ঙসিগী লংদাইসিদা ঐখোয়না লেপ্পবগী তাঞ্জা ফংলিবনি অমদি তুংলমচৎ শেম্নবগী অনৌবা থাজবা, অনৌবা মঙলান অমদি থৌনাগা লোয়ননা ঐখোয় মফমসি থাদোক্লম্লগনি।
ইকায়খুম্নরবা স্পীকর জী,
ঙসিগী নুমিৎ অসিদি শঙলেন অসিদা লেঙশিনবিরম্বা মীয়ামগী মীহুৎ লিশিং তরেৎ মখায়গী মতিক মথৌনা শৈথাবগী তাঙ্কক্নি। মফমসিগী ফক্লাংশিংনা ঐখোয়দা হাপ্পিখিবা থৌনা, অনৌবা থাজবা কয়া ফংখিবা অদুবু পুদুনা মাঙদা চঙশিনবগী তাঙ্কক্নি। শঙলেনসিদা তিল্লিবা মীপুম খুদিংমক্কী খুবাক মখোল তাবদা মতিক চাখিবা ৱাফম কয়া লৈখ্রে, অদুবু রাজনিতিনা মদুদা চঙশিল্লকখি। নেহরুগী থৌদাংশিং মফমসিদা শিংথাবদা খুবাক খুনিংলোইদবা কনাবু লৈবগে। মদু ওইদুনসু লৈবাকসিগী মীয়ামগী লৈঙাক লিংনা লৈহন্নবগীদমক ঐখোয় পুম্নমক্না থাজবা কয়াগা লোয়ননা, ইকায়খুম্নরবা স্পীকরগী মখাদা, অদোমগী লুচিং মখাদা অমদি হৈথোই শিংথোইরবা এম.পি.শিংগী মতিক মথৌনাগা লোয়ননা ঐখোয় পুম্নমক পার্লিয়ামেন্ত অনৌবদা খোঙ থাংজিনমিন্নগনি হায়না ঐনা থাজৈ।
ঐনা অমুক্কা হন্না ঙসি নুমিৎ চুপ্পা হায়রিবা অরিবা থৌদোকশিং নৌহৌননা নীংশিংনবগী তাঞ্জা পীবিরিবা, অফবা ফীভম অমদা ময়াম পুম্নমকপু নীংশিংনবগী তাঞ্জা পীবিরিবা অসিগীদমক ময়াম পুম্নমকপু থম্মোয়নুংদগী থাগৎচবা ফোঙদোকচরি। অমদি শঙলেন অসি অমদি ঐখোয়গী মীয়ামগী মীহুৎশিংগী থবক থৌরমশিংনা মীয়ামগী, লৈবাকসিগী মফমদা কত্থোকপগী মশক্কা লোয়ননা থবক তৌখি হায়বা লৈবাক্কী মফমদা খঙহৌনবগীদমক মেম্বর ময়ামসু অদোমগী পুন্সিদা থেংনখিবা কাউঙমদ্রবা থৌদোকশিং থম্বিনবা ময়ামগী মফমদা হায়জনিংই। হায়রিবা ৱাখল্লোন অসি মীয়ামদা য়ৌহনবা ঙম্বা ওইরসনু হায়বগী থাজবগা লোয়ননা ঐনা অমুক্কা হন্না মফমসিদা লৈমায় অসিবু ইকোক নোঞ্জরি, শঙলেন অসিবু ইকোক নোঞ্জরি। ভারতকী শিন্মীশিংগী হুমাংমলনা শাখিবা ফক্লাংশিংগী চেক খুদিংমকপুসু ইকোক নোঞ্জরি। অমদি হৌখিবা চহি ৭৫সিদা ভারতকী মীয়ামগী লৈঙাক্তা অনৌবা পাঙ্গল, মতিক হাপ্পিখিবা গুরু পুম্নমকপু, নদব্রহ্মাবু ইকোক নোঞ্জবগা লোয়ননা ঐহাক্কী ৱাফম মতাঙসিদা তেনশিঞ্জগে। ময়ামবু হন্না হন্না থাগৎচরি।
