ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
সর্দার সাহেবকী মতিক লৈরবা ৱাহৈ…স্তেচু ওফ য়ুনিতীগী মনাক্তা পাঙথোক্লিবা অচৌবা থৌরম… এক্তা নগরগী চীং লেম্লবা শক্তম, অমসুং মফমসিদা পাঙথোক্লিবা ফজরনা পর্ফোর্মেন্সশিং…অপীকপা ভারতকী শক্তম অসি… পুম্নমক অসি য়াম্না ফজৈ, য়াম্না পুক্নিং থৌগৎনিংঙাইনি। ওগস্ত ১৫ অমসুং জনুৱারী ২৬ কুম্না… ওক্তোবর ৩১দা পাঙথোক্লিবা থৌরম অসিনা লৈবাক পুম্বদা অনৌবা ইনর্জীনা থলহল্লি। ঐনা নুংশিজরবা লৈবাক মীয়ামগী মফমদা নেস্নেল য়ুনিতী দেগী য়াইফ-পাউজেল পীজরি।
মরূপশিং,
হন্দক্কী নেস্নেল য়ুনিতী দে অসিনা অঙকপনা থল্লবা তাঞ্জা চানরুবা অমসু পুরক্লি। নাকল অমরোমদা ঙসি ঐখোয়না অপুন্বগী শক্তমগী কুমহৈ পাঙথোক্লি, অদুগা নাকল অমরোমদনা শেংলবা দীপাবলিগী কুমহৈসু পাঙথোক্লি। দিপাবলিনা, থাউমৈশিংগী খুত্থাঙদা, লৈবাক পুম্ববু শম্নহল্লি, লৈবাক পুম্বা ঙানহল্লি। অদুগা দীপাবলিগী কুমহৈ অসিনা ভারতপু মালেমগা মরী শাগৎলি। কুমহৈ অসি লৈবাক কয়াদা নেস্নেল ফেস্তিবেল ওইনা পাঙথোক্নরি। ঐনা লৈবাকসিদা অমসুং মালেমসিদা লৈরিবা ভারত মচা পুম্নমক্কী মফমদা, লোয়ননা ভারতকীদমক খন্বিবা মীওইশিংগী মফমদা দীপাবলিগী য়াইফ-পাউজেল পীজরি।
মরূপশিং,
চহি অসিগী এক্তা দিবস অসি অতোপ্পা মরম অমগীসু মরুওই। সর্দার পতেলগী ১৫০শুবা মপোক কুমওনগী থৌরমসু ঙসিদূগী হৌগদৌরি। চহি ২ চুপ্না, লৈবাক অসিনা সর্দার পতেলগী ১৫০শুবা মপোক কুমওন থৌরম পাঙথোক্কদৌরি। মসিনা মহাক্না ভারতকীদমক লৌরম্বা তোপ তোপ্পা থৌদাংবু লৈবাক মীয়াম্না শকখঙদুনা শ্রদ্ধাঞ্জলি কৎচবা ওইগদৌরিবনি। চহি অনি চুপ্পা পাঙথোক্কদৌরিবা অসিনা ৱন ইন্দিয়া, গ্রেত ইন্দিয়াগী ফিরেপ চেৎশিলহনগনি। থৌরম অসিনা ঐখোয়গী ইফমদা ওথোক্লোইদবা মান্বা ৱাফমশিংসু ওইথোকহন্বা ঙমগনি হায়না তম্বিগদৌরিবনি। ভারতনা নীংতম্বা ফংলকপা মতমদা, ভারত খাইবুং তারক্কনি হায়না খন্নরম্বা মীওই খরা লৈরম্মি, অমদি হৌজিক মসিগী মরমদা সর্দার সাহেবকী খোঞ্জেলদা নীংথিনা তাবা ফংলে। অদুগুম্বা মীওইশিংদুনা নিংথৌ পান্বা লৈবাক চা কয়া পুনশিন্দুনা ভারত অমা শেম্লক্কনি হায়না থাজবা ঙম্লমদে। অদুবু সর্দার সাহেবনা মদুমক তৌখি। মসি ওইরকপা ঙমখিবগী মরমদি সর্দার সাহেব মহাক্কী লমচত্তা চুম্লম্মি….ফিরেপ চেৎনা লেপখি… তৌথোরকপদা মীনুংশিগী মচৎ উৎলি… অমসুং পান্দমনা লৈবাক নিংবগী পান্দম থমখি।
মরূপশিং,
ঙসি ঐখোয়দা ছত্রপতি সিবাজী মহারাজকী পুক্নিং থৌগৎনফমসু লৈরি। মহাক্না লান্দারকপশিংবু তকথোকখিনবা মীপুম খুদিংমকপু পুনশিনখি। মহারাস্ত্রগী রাইগর লান্বন্না ৱারী অদু লীরি। ছত্রপতি সিবাজী মহারাজনা লৈবাক্কী তোঙান তোঙানবা ৱাখল্লোনশিংবু রাইগর ফোর্ত্তগী মরম অমখক্তগীদমক পুনশিনখি। ঙসি এক্তা নগর অসিদা, অদুগুম্লবা পুৱারীগা শাগোন্নরিবা রাইগর ফোর্তকী শক্তম ঐখোয় পুম্নমক্কী মীৎমাঙদা পুক্নিং থৌগৎনফমগী খুদম অমা ওইনা লেপ্লি। রাইগর ফোর্তনা খুন্নাইগী ৱায়েল, মরৈবাক নীংবা অমসুং লৈবাক্না মাঙদা থম্বগী শেংলবা মফম অমা ওইদুনা লাক্লি। ঙসি, বেকগ্রাউন্দ অসিদা, ঐখোয়না চাওখৎপা ভারত অমগী খোঙফম ফংনবগগীদমক ঐখোয় মফমসিদা পুল্লরি।
মরূপশিং,
হৌখিবা চহি ১০ অসি ভারতকী য়ুনিতী অমসুং ইন্তেগ্রিতীগী লমদা হান্না পানরুদবা চাংদা মায় পাকপা কয়ানা থনখি। ঙসি, লৈঙাক্কী থবক অমসুং মিসন খুদিংদা লৈবাক্কী য়ুনিতীগী খোঙফম উবা ফংলি। মসিগী অচৌবা খুদম অমদি ঐখোয়গী এক্তা নগর অসিনি…মফমসিদা স্তেচু ওফ য়ুনিতী খিল্লি… অমদি মসি মমিং খক্তগী য়ুনিতী নত্তে, মসি শাগৎপদসু য়ুনিতী লৈখি। মসি শানবগীদমক শীজিন্নখিবা য়োৎ অমসুং খুৎশু খুৎলায়শিং লৈবাক্কী মফম পুম্নমক্তগী পুরকখি, লৈবাক্কী লৌমীশিংদগী পুরকখি, মরমদি সর্দার সাহেব আইরন মেন ওইরম্মি, লৌমী অমগী মচা ওইরম্মি। মরম অসিননি মফমসিদা লৌবুক্তা শীজিন্নবা য়োৎশিং পুরকখিবা। লৈবাক্কী কাচিন কোয়া খুদিংদগী লৈবাক মফমসিদা পুরকখি। মসি শাবদা অমত্তা ওইবগী ইথিল অমা পীখি। মফমসিদা এক্তা নর্সরী শাগৎখি। মফমসিদা মালেমগী কন্তিনেন্ত খুদিংদগী পুরকপা উ পাম্বীশিং থাদুনা শেম্বা বিস্ব বন লৈ। মফমসিদা লৈবাক্কী মফম পুম্বদগী মশা ফগদবা ফুদ হেবিৎ মফম অমত্তদা উবা ফংগদবা চীলদ্রেন্স ন্যুত্রিসন পার্ক লৈ। মফম অসিদা লৈবাক্কী তোঙান তোঙানবা মফমদগী অয়ুর্বেদকী চৎনবী অমসুং পাম্বীশিং লৈবা অরোগ্য বন লৈ। মসিদসু নত্তনা, মফম অসিদা লৈবাক্কী মফম পুম্নমক্তগী পুরকপা খুৎশা হৈবগী পোৎলমশিং মফম অমত্তদা ফংহল্লিবা তুরিস্তশিংগী এক্তা মোলসু লৈ।
অদুগা মরূপশিং,
এক্তা মোল অসি মফম অসিখক্তদা নত্তে, ঐখোয়না লৈবাক্কী স্তেতকী কোনুং খুদিংদা এক্তা মোল শাগৎনবা পুক্নিং থৌগৎলি। হায়রিবা অপুন্বগী পাউজেল অসি চহি খুদিংগী পাঙথোক্লিবা এক্তা রন্না মপাঙ্গল কনখৎহল্লি।
মরূপশিং,
অশেংবা ভারত মচা অমা ওইনা, লৈবাক্কী য়ুনিতীগীদমক হোৎনরিবা খুদিংমক সেলেব্রেত তৌবা, মসিবু মপুং ফাহন্বা হায়বসি ঐখোয় পুম্নমক্কী থৌদাংনি। ইনর্জী, থাজবা, মীৎকুপ খুদিং অনৌবা ফিরেপ, অনৌবা মঙলান, অনৌবা ইথিল, পুম্নমকশিং অসিনি ঐখোয়না হরাও তয়াম্না পাঙথোক্লিবা। ঐখোয়না ভারতকী লোলশিংদা মরুওইবা মীৎয়েঙ থম্লকপা মতমদা, মসিনা ঐখোয়বু য়ুনিতীগী হেন্না চেৎপা মরী অমনা পুনশিল্লি। অনৌবা নেস্নেল এজুকেসন পোলিসীদা ঐখোয়না ভারতকী লোলশিং তম্বদা অখন্নবা মীৎয়েঙ থম্লি, অমসুং অদোম্না খঙবদা লৈবাক্কীদমক চাউথোকচগদবা ৱাফম অমনা লৈঙাক্কী ফিরেপ অমখক মালেম পুম্বদা হরাওনা ওক্নখি। হন্দক্তা, লৈঙাক্না মরাথী, বেঙ্গলী, অসামিজ, পালি, অমসুং প্রাকৃৎ লোল দা ক্লাসিকেল লেঙ্গুএজ স্তেতস পীখি। মীপুম খুদিংমক্না লৈঙাক্কী ফিরেপ অদুবু তরাম্না ওক্নখি। ঐখোয়না ঐখোয়গী লোলবু ইমালোল কৌরি অমসুং ঐখোয়না ইমালোলবু ইকায়খুম্নবা উৎপা মতমদা ঐখোয়গী ইমাবুসু ইকায়খুম্নরিবনি, মালেম ইমাবুসু ইকায়খুম্নরিবনি, ভারত ইমাবুসু ইকায়খুম্নরিবনি। লোলগুম্না… লৈবাক পুম্বদা পায়খৎলিবা কন্নেক্তিবিতীগী থবক অসিনসু ঙসি লৈবাক্কী য়ুনিতী হেনগৎহল্লি। রেল, লম্বী, হায়ৱে অমসুং ইন্তরনেতনচিংবা মতমগী ইনফ্রাস্ত্রকচরনা খুঙ্গংশিংগা সহরশিংগা শম্নহল্লে। কাস্মির অমসুং অৱাং নোংপোক্কী কোনুংশিং রেলনা শম্নহনবা মতমদা… লক্সদ্বীপ অমসুং অন্দমান নিকোবর ঈথৎশিং সমুদ্র খোঙনুংগী কেবলনা খোঙজেল য়াঙবা ইন্তরনেতকা শম্নহনবদা… চীংদা লৈবা মীওইশিং মোবাইল নেতৱর্ক্না শম্নহন্বদা… চাওখৎ লমজেলদা মনিংদা শোত্থহৌবগী ইহুল অদু মাঙখিগদৌরিবনি, মাঙদা চঙশিন্নবা অনৌবা পাঙ্গল অমা মশা মথন্তা পোক্লক্কদৌরিবনি। অসুম্না লৈবাক্কী য়ুনিতীগী মপাঙ্গলসু হেনগৎলক্কদৌরিনি।
মরুপশিং,
মমাঙগী লৈঙাকশিংগী খুজিল থৌরাং অমসুং তৌথোরকপশিংদা অচান মীরান নাইবগী মওং অসিনা লৈবাক্কী য়ুনিতীবু মপাঙ্গল শোন্থহল্লম্মি। হৌখিবা চহি ১০সিদা, লৈবাকসিদা পুরকখিবা অফবা লৈঙাক্লোনগী অনৌবা মওং মতৌনা অচান মীরান নাইবগী মফম লৈহনখিদ্রে… ঐখোয়না সবকা সাথ, সবকা বিকাসকী লম্বী খনখি। ঙসি, হর ঘর জল স্কীমগী খুত্থাঙদা, খেন্নবা লৈতনা ঈশিং ফংহন্নবা থৌরাং পায়খৎলি। ঙসি, মীপুম খুদিংনা PM কিসান সম্মান নিধীগী কান্নবা খেন্নবা লৈতনা ফংলি। ঙসিদি, PM অৱাস য়োজনাগী মখাদা খেন্নবা লৈতনা য়ুম শাবা ফংলি। ঙসিদি অয়ুস্মান য়োজনাগী কান্নবা খেন্নবা লৈতনা ফংবা য়াবা মীপুম খুদিংমক্না ফংলি… অসিগুম্বা লৈঙাক্কী থৌওং অসিনা দেকেদ কয়া মীয়াম মরক্তা লৈরম্বা পেন্নদবা কয়া লোইশিনখি। মসিনা মরম ওইরগা, মীয়াম্না লৈঙাক্তা থাজবা থম্বা হেনগৎলক্লি, লৈবাক্কী সিস্তেমদা থম্লিবা থাজবা হেনগৎলক্লি। চাওখৎপা অমসুং থাজবগী য়ুনিতী অসিনা এক ভারত শ্রেস্থ ভারত শেম্বদা ইনোৎ হাপ্লি। অদুগা ঐখোয়গী স্কীম খুদিংদা, পোলিসী খুদিংদা অমসুং ঐখোয়গী তৌথোরকপা খুদিংদা লৈরিবা য়ুনিতী অসিনা ঐখোয়গী থৱায় হাপ্লিবনি… মসি উরগা অমদি তারগা, সর্দার সাহেবকী থৱায়না লৈরুবা মফমদা অপেনবা পোকচরগা ঐখোয়গী থৌজাল ওইগদৌরিবনি।
মরুপশিং,
ইকায়খুম্নরবা বাপু মহাত্মা গান্থীনা হায়বিরম্মি … “ঐখোয়না খেন্নবা কয়াগী মরক্তা অমত্তা ওইনা লৈমিন্নবগী মতিং অসি লেপ্পা লৈতনা চাংয়েং তৌরক্কনি....” হায়না গান্ধীজীনা হায়বিরম্মি অমসুং মহাক্না মখা তাখি… “ঐখোয়না চাংয়েংশিং অসি ফীভম খুদিংদা মায় পাকপা তাই”। হৌখিবা চহি ১০সিদা, ভারতনা খেন্নবা কয়ালক্তা অমত্তা ওইনা হিংনবা মায় পাক্না হোৎনদুনা লাক্লি। লৈঙাক্না লেপ্পা লৈতনা মাগী পোলিসী অমসুং ফিরেপশিংদা অমত্তা ওইবা ভারতকী ৱাখল্লোন মপাঙ্গল লাক্লি। ঙসি ঐখোয়না ৱন নেসন, ৱন আইদেন্তিতী… হায়বদি আধারগী মায় পাকপা উরি অমসুং মালেম অসিনা মসিগী মরমদা খন্নরি। মমাঙদা ভারত্তা তেক্স রেজিম তরুক লৈরম্মি। ঐখোয়না ৱন নেসন, ৱন তেক্স সিস্তেম ওইনা GST পুরকখি। ঐখোয়না লৈববাক্কী পৱার সেক্তরবু ৱন নেসন, ৱন পৱার গ্রিদ পুরক্তুনা মপাঙ্গল কনখৎহনখি, মদু নৎলমদ্রবদি মৈ সপ্লাই তৌনবা গ্রিদ শরুক কয়া থোক্না য়েন্থোক্তুনা মফম খরদা মৈ ঙাল্লগা মফম খরদনা মৈ মম্বা মতম অমা লৈরম্মি, অদুবু ঐখোয়না ফিরেপ অসি ৱন নেসন, ৱন পৱার গ্রিদ পুরক্তুনা থবক ওইনা পাঙথোক্লে। ঐখোয়না ৱন নেসন, ৱন রেসন কার্দকী খুত্থাঙদা লায়রবশিংদা খুদোংচাবা ফংহল্লে। অয়ুস্মান ভারতকী মওংদা, ঐখোয়না ৱন নেসন, ৱন হেল্থ ইন্স্যুরেন্স লৈবাক্কী মীপম খুদিংদা ফংহল্লি।
মরুপশিং,
য়ুনিতী পুরক্নবা হোৎনরিবসিগী শরুক অমা ওইনা, ঐখোয়না ৱন নেসন, ৱন ইলেক্সন পুরক্নবা থবক পায়খৎলি, মসিনা ভারতকী দিমোক্রেসী মপাঙ্গল কনখৎহন্দুনা ভারতকী রিসোর্সশিংগী খ্বায়দগী ফবা মহৈ পুরক্কনি, অমসুং লৈবাক অসিনা চাওখৎপা ভারত অমগী মঙলান মঙফাওনহন্নবা অনৌবা খোঙজেল হাপকনি অমসুং নুংঙাই য়াইফবা পুরক্কনি। ঙসি, ভারতনা ৱন নেসন, ৱন সিভিল কোদ… হায়বদি সেকুলার সিভিল কোদকী মায়কৈদা মাঙদা খোঙ থাংজিল্লি। ঐনা রেদ ফোর্ততগী হায়খি, সর্দার সাহেবকী সোসিএল য়ুনিতীগী ৱাহৈশিংনা ঐখোয়গী পুক্নিং থৌগৎলি। মসিনা তোঙান তোঙানবা খুন্নাইগী কাঙলুপশিংগী মরক্তা খেন্নবা লৈবগী ৱাকৎ লাকহন্দবদা মতেঙ ওইগনি, লৈবাক্কী য়ুনিতী হেনগৎহনগনি, লৈবাক অসিনা মাঙদা চঙশিন্দুনা অমত্তা ওইবা খোঙফমদা পান্দম ফংনবা চঙশিনবা ঙমহনগনি।
মরূপশিং,
ঙসি লৈবাক পুম্বনা ৱন কন্ত্রী, ৱন কন্সতিত্যুসনগী ফিরেপ নীংতম্লবা মতুংগী দেকেদ ৭কী মতুংদা ফংবা ঙমবসিদা হরাওনরি, মসিমক সর্দার সাহেবকী থৱায়দা কৎচবা ঐগী খ্বায়দগী চাউবা শ্রদ্ধাঞ্জলিনি। লৈবাক মীয়াম্না খঙদে মদুদি ববাবা সাহেব অম্বেদকরগী সংবিধান অসি চহি ৭০ চুপ্না লৈবাক শিন্বা থুংনা চৎনরমদে। সংবিধানগী মিংখৈ শোল্লিবা মীওইশিংনা সংবিধানবু শাথিনা ইকায়বা পীরম্মি… মদুগী মরমদি করিনো খঙবিবরা… জম্মু অমসুং কাসস্মিরদা লৈরম্বা আর্তিকল ৩৭০গী ফক্লাঙ অসিনি। আর্তিকল ৩৭০না ফক্লাঙগুম্না লেপ্তুনা সংবিধান মপুং ফানা চৎনবদা থিংলম্মি, মফমদুগী মীয়াম্না মখোয়গী হক মপুং ফানা ফংজবদা থিংলম্মি, অদুগুম্বা আর্তিকল ৩৭০ অদু লৈনুংদা ফুমজিনখ্রে। অহান্বা ওইনা হন্দক্কী এসেমব্লী মীখলদা, খেন্নবা লৈতনা ভোত থাদনখি। অহান্বা ওইনা জম্মু অমসুং কাস্মিরদা, ভারতনা নীংতম্লবা চহি ৭৫গী মতুংদা মুখ্য মন্ত্রীনা ভারতকী সংবিধান পায়দুনা ৱাশক লৌখি। শক্তম অদুনা ভারতকী সংবিধানগু শেম্লম্বা মীওইশিংদা অপেন্বা পোকহনগনি, মখোয়গী থৱায়না ইং চিকপা ফংগনি, অমসুং মসিনা সংবিধান শেম্বিরম্বশিংগী মফমদা ঐখোয়না পুকচেল শেংনা কৎচবা শ্রদ্ধাঞ্জলি ওইরি। ঐহাক্না মসিবু ভারতকী য়ুনিতীগীদমক থাংজিনবা অচৌবা খোঙথাং অমনি হায়না লৌই। জম্মু অমসুং কাস্মিরগী মরৈবাক নীংবা মীয়াম্না চহি কয়াগী তোখাই তাবা অমসুং তেররগী এজেন্দাবু নাথৈরম্লে। মখোয়না ভারতকী সংবিধান, ভারতকী মীয়ামগী লৈঙাকপু মায় পাকহল্লে। মখোয়গী ভোতকা লোয়না, মখোয়না চহি ৭০ চত্থরকপা প্রোপেগেন্দা থুগাইখ্রে। ঙসিগী নেস্নেল য়ুনিতী দে অসিদা ঐহাক্না ভারতকী সংবিধানবু ইকায়খুম্নরিবা জম্মু অমসুং কাস্মিরগী মরৈবাক নীংবা মীয়ামগী মফমদা ইকায়খুম্নবগা লোয়ননা সলাম কৎচরি।
মরুপশিং,
হৌখিবা তহি ১০সিদা ভারতনা লৈবাক্কী য়ুনিতীদা শিংনরম্বা ৱাফম কয়াগী ৱারোয়শিন পুরকখ্রে। ঙসি তেরোরিস্তকী মপুশিংনা করিগুম্বা মখোয়না ভারত্তা অমাঙ অতা থোকহল্লবদি, ভারতনা মখোয়বু লেম্না থারোই হায়বা খঙলে। অৱাং নোংপোক্তা লৈরম্বা ফীভম অদু কয়া য়াম্না ফৎলমদে হায়বা অদোম উবিরমগনি। ঐখোয়না তোখাই তাবগী মৈরীবু ৱারী শানদুনা, চাওখৎপা পুরক্তুনা অমসুং থাজবা পীদুনা মুত্থৎলে। বোরো এগ্রীমেন্তনা অসামগী চহি ৫০ শুরবা য়েৎনবা অসি লোইশিনখ্রে… ব্রি-রীয়য়ং এগ্রীমেন্তনা দেকেদ কয়াগী তুংদা ময়ুম মকৈ থাদোক্তুনা চেন্নরুরবা মীওই কয়া মখোয়গী মরমদমদা হঞ্জিলহনখ্রে। নেস্নেল লিবরেসন ফ্রন্ত ওফ ত্রিপুরাগা য়ানচে ইনখিবসিনা মতম শাংনা লৈরম্বা তংদু লৈতাদবা লোইশিনখ্রে। অসাম অমসুং মেঘালয়গী মরক্তা লৈরম্বা ঙমখৈগী য়েৎনবসু ফনা য়াম্না লোইশিল্লক্লে।
মরুপশিং,
২১শুবা চহিচাগী পুৱারী ইরকপা মতমদা, ভারতনা মতৌ করম্না তমথিরবা নক্সলিজমবু অনিসুবা অমসুং অহুমশুবা দেকেদতা মুত্থৎখি হায়বগী সনা ফুদোংবা পন্দুপ অমা য়াওরগনি। নেপালগী পসুপতীদগী ভারতকী তিরুপতী ফাওবা রেদ কোরিদোর শাখিবা মতমদুং নীংশিংবিয়ু। ভগবান বির্সা মুন্দাগুম্বা মরৈবাক নীংবা মীওইশিং পীরম্বা ত্রাইবেল খুন্নাইশিংনা রিসোর্স মরাঙ কায়জদ্রবসু লৈবাক্কী কাচিন কোয়া খুদিংদূগী ত্রাইবেল ইচিল ইনাওশিংনা নীংতম্বগীদমক ব্রিতিশকী মায়োক্তা লান্থেংনখি… অদুগুম্বা ত্রাইবেল খুনাই অমদা নক্সলিজমগী মরু নীংথিনা থৌরাং য়াত্তুনা হুনখ, নক্সলিজমগী মৈ চুখি। নক্সলিজম অসিনা ভারতকী য়নিতী অমসুং ইন্তেগ্রিতীদা অচৌবা শিংনবা অমা ওইরকখি। হৌখিবা চহি ১০সিদা চোকথবা নাইদনা হোৎনবনা মরম ওইরগা, ভারত্তা নক্সলিজমগী অরোইবা নীংশা হোল্লি খঙবদা ঐ অপেন্বা পোকই। ঙসিদি, ত্রাইবেল খুন্নাইনা দেকেদ কয়া ঙাইদুনা লাকখিবা চাওখৎপা হায়বদু মখোয়গী ময়ুমদা য়ৌরি, অমসুং হেন্না ফবা তুংলমচৎকী থাজবসু পোক্লক্লি।
মরুপশিং,
ঙসি, ঐখোয়গী মাঙদা মঙলান অমসুং চঙশিনগদবা মায়কৈ লৈরবা ভারত অমা লৈরে। মসিদসু নত্তনা, মঙলান অমসুং মায়কৈগা লোয়ননা মরু ওইরিবসি হোৎনবা কন্বনি। ঙসি লৈবাক অসিদা মঙলান, মায়কৈ, অমসুং হোৎনবা কন্বা লৈরে। মপাঙ্গল কন্বা, পুম্নমক কোনশিন্বা, সেন্সিতিব ওইইবা, চেকশিন্না লৈবা, মরু লুকপা, চাওখৎপগী লম্বীদা চঙশিল্লিবা, শক্তি অমসুং ইং তপ্পা অনিমক্কী মরুওইবা খঙবা ভারত অমা ঙসিদি লৈরে। মালেমদা থেংনরিবা লাংফমশিং অসিগী মরক্তা খোঙজেল য়াঙনা চেনখৎপা হায়বসি অচম্বা নত্তে। তোঙান তোঙানবা মফমদা লান চত্থরিঙৈ মরকসিদা বুদ্ধগী পাউজেল শন্দোকপা অচম্বা থবক নত্তে। মালেমগী লৈবাকশিংগী মরী ফৎচিল্লক্ত্রবা মতমদা ভারতনা মালেমগী মরুপ অমা ওইনা থোরকপা অচম্বা নত্তে। লৈবাক অনিগী মরক্তা লৈনরিবা মরী লাপথোক্নরক্লবা মতমসিদা লমালেমগী লৈবাকশিংনা ভারতকা নক্নবা মরী শাগৎলক্লি। মসি অচম্বা নত্তে, অনৌবা পুৱারী অমা শেম্লিবনি। ভারতনা তৌখিবা পুম্নমক্তুনা পুরকপনি।
মরুপশিং,
ঙসি মালেম অসিনা ভারতনা কমদৌনা মহাক্কী প্রোব্লেমশিং অচেৎপা ফিরেপকা লোয়ননা লোইশিল্লি হায়বা য়েংলি। ঙসি মালেম অসিনা মতৌ করম্না ভারতনা দেকেদ কয়া শুরবা শিংনবশিং লোইশিন্দুনা অমত্তা ওইবা মরী শাগৎলিবগে হায়বা য়েংলি… মরম অদুনা… ঐখোয়না মরুওইখ্রবা মতম অসিদা ঐখোয়গী য়ুনিতী ঙাক্তুনা থম্বা তাই, চেকশিন্না শেন্নবা তাই… ঐখোয়না শকখিবা অমত্তা ওইবগী ৱাশক নীংশিংবা তাই… ঐখোয়না শকখিবা ৱাশক অদু মথৌ তারবদি হঞ্জিন হঞ্জিন শকপা তাই, ৱাশক অদুগীদমক ঐখোয়না থেংনবা তাই। ঐখোয়না মীৎকুপ খুদিং ৱাশক অসি পুক্নিংদা ফাওহন্বা তাই।
মরুপশিং,
শাফু খরদি, শেরান্নবা ৱাখল চেনবা মীওই খরদি ভারতকী হেনগৎলক্লিবা মপাঙ্গল, অমত্তা ওইবগী ৱাখল্লোন্দা হৈনদবা ফাওরি। অসিগুম্বা ৱাখল চেন্বা ভারত মনুং অমসুং মপান্দা লৈবা মীওইশিংনা ভারত্তা তংদু লৈতাদবা অমসুং এনার্কী শন্দোক্নবা হোৎনরি। মখোয় ভারতকী শেন্মিৎলোন মাঙহন্নবা থবক তৌরি। অসিগুম্বা শাফুশিং অসিনা মালেমগী ইনভেস্তরশিংগী মফমদা, অরান্বা পাউজেল শন্দোকপা পাম্মি, ভারতকী ফজদবা শক্তম অমা শেমগৎপা পাম্মি… অসিগুম্বা মীওইশিং অসিনা ভারতকী লান্মীবুসু তার্গেৎ তৌরি, মিসইনফোর্মেসন কেম্পেন তৌরি। মখোয়না লান্মীগী মরক্তা খাইবুং তাহনবা পাম্মি… অসিগুম্বা মীওইশিংনা ভারতপু কাঙলুপ ফুরুপ নাইনা খায়দোকপা পাম্মি। মখোয়না হোৎনরিবা পুম্নমক্কী পান্দম অমখক লৈ – ভারতপু মপাঙ্গল শোন্থহন্বা… ভারতকী অমত্তা ওইবগী মতিক হন্থহন্বা। অসিগুম্বা মীওইশিংনা ভারতপু চাওখৎহনবা পামদে… মরমদি অশোন্বা ভারতকী রাজনিতীনা মখোয়গী চুনৈ। অসিগুম্বা অমোৎপা, হঙ্গোইনিংঙাই ওইবা রাজনিতী অসি দেকেদ ৫ রোম চত্থদুনা লৈবাকপু মপাঙ্গল শোন্থহল্লম্মি। মরম অদুনা, হায়রিবা মীওইশিং অসিনা ভারতপু সংবিধান অমসুং দিমোক্রেসীগী মিংদা থুগাইনবা থবক তৌরি। ঐখোয়না অর্বান নক্সলাইতশিংগী খুৎপু, মখোয়গী খুৎপুবু মশক খঙবা তাই, ঐগী লৈবাক মীয়াম, উমংদা মশা ফন্দোরকখিবা নক্সলিজম্না ত্রাইবেল নহাশিংবু বোম্ব অমসুং নোংমৈনা লান্না লমজিংলম্বদু ঙসিদি লোইশিল্লক্লে…অর্বান নক্সলিজমগী অনৌবা মওং অমা থোরক্লি। লৈবাক অসিবু থুগাইনবা মঙ মঙলিবা, লৈবাক থুগাইনবগী ৱাখল্লোন্দা থবক তৌরিবা, মখোয়গী মায়থোঙদা অরানবা মায়খুম উপ্লিবা মীওইশিং অসি ঐখোয় খঙদোকপা তাই, ঐখোয় মখোয়গা থেংনবা তাই।
মরুপশিং,
ঙসি অমত্তা ওইবগী ৱা ঙাংবা ফাওবা ক্রাইম অমা ওইহল্লকপা ফীভম অদু য়ৌরে। ঐখোয়না স্কুল, কলেজ, য়ুম অমসুং মপান্দা চাউথোকচবগা লোয়ননা অমত্তা ওইবগী ঈশৈ শক্লম্বা মতম অমা লৈরম্মি। অহল ওইরবশিংদি ঐখোয়না করি ঈশৈ শক্লম্বগে হায়বা খঙগনি… ভারতকী মী পুম্নমক অমত্তনি। কুচু, শক্তম, ফিজেৎ, লোল খেন্নরম্বদি য়াই। ঈশৈশিং অদু শক্লম্মি। করিগুম্বা কনাগুম্বা মীওই অমনা অদুগুম্বা ঈশৈ অদু ঙসি শক্লুরবদি অর্বান নক্সল কাঙলুপকী মীওইশিংনা মদুগী খুদোংচাবা লৌরগা মীওই অদুবু তাথি তাওইনা তৌবিগনি। ঙসি কনাগুম্বা মীওই অমনা ঐখোয় অমত্তা ওইনা পুল্লবদি সেফ ওইগনি হায়রুরবদি অদুগুম্বা মীওইশিংদুনা ৱাফমদুগী ৱাহন্থোক লান্না হল্লক্কনি। অসিগুম্বা ৱাহৈশিং অসি লৈবাকপু থুগাইবা পাম্বা, খুন্নাইদা খাইবুং তাহন্বা পাম্বা মীওইশিংগী মফমদি লৈবাক্কী অমত্তা ওইবগী ৱাখল্লোন অসিনা খোয়শাওনহনগনি। মরম অসিননি লৈবাক মীয়াম, ঐখোয়না হান্নদগী হেন্না অসিগুম্বা মীওইশিং, অসিগুম্বা ৱাখল্লোন, মওং মতৌশিংদগী চেকশিন্না লৈবা তারক্লিবা। ঐখোয় চেকশিন্বা তাই।
মরুপশিং,
ঐখোয় পুম্বনা সর্দার সাহেবকী ৱাখল্লোন্দা হিংলিবা মীওইশৎংনি। ভারতকী খ্বায়দগী চাউবা পান্দমদি অমত্তা ওইনা অমসুং মপাঙ্গল কন্না লৈবদুনি হায়না সর্দার সাহেবনা হায়বিরম্মি। ভারত অসি খেন্নবা কয়াগী লৈবাক অমনি হায়বা ঐখোয়না নীংশিংবা তাই। ঐখোয়না খেন্নবা অসিবু তরাম্না ওক্লবা মতমদা ঐখোয় অমত্তা ওইনা পাঙ্গল কন্না লৈগদৌরবিনি। লাক্কদৌরিবা চহি ২৫ অসি য়ুনিতীগী লমদা য়াম্না মরুওইবা মতম ওইগদৌরিবনি। মরম অদুনা ঐখোয়না অমত্তা ওইবগী লাইৱা অসি মপাঙ্গল শোন্থহন্বা য়াদে, ঐখোয়না মীনম্বা পুম্বা থেংনবা তাই, ঐখোয়না অমত্তা ওইবগী লাইৱা পুদুনা হিংবা তাই… হায়রিবা লাইৱা অসি থুনা চাওখৎপা পুরক্নবা, চাওখৎপা ভারত অমা শেম্নবা, নুংঙাই য়াইফবা ভভারত অমা ওইহল্লক্নবা য়াম্না মরুওই। অমত্তা ওইবা হায়বসিনা খুন্নাইদা পুকচেল খোয়জেল তিন্নবগী হিদাক্নি, মসি য়াম্না মরুওই। করিগুম্বা ঐখোয়না অশেঙবা খুন্নাইগী ৱায়েলদা কত্থোক্লবদি, ঐখোয়গী অমত্তা ওইবা শক্তম অসিনা মকোক্তা থমগদবনি… য়ুনিতী কায়হন্দনা থম্বা তাই। য়ুনিতী লৈতনা হেন্না ফবা ফেসিলিতীশিং শেম্নবা গারী থৌবা য়ারোই। য়ুনিতী হায়বসি থবক পীনবা… শেল থাদনবা মরুওই। লাক্লো, ঐখোয় পুনশিল্লসি… পুন্না মাঙদা চঙশিল্লসি। অমুক্কা হন্না, ময়াম পুম্নমক্কী মফমদা নেস্নেল য়ুনিতী দেগী য়াইফ পাউজেল পীজরি।
ঐনা সর্দার সাহেব হায়না লাউরকপদা, ময়াক্না – অমর ওইয়ু… অমর ওইয়ু হায়না খুম্বিরকউ।
সর্দার সাহেব – অমর ওইয়ু… অমর ওইয়ু।
সর্দার সাহেব – অমর ওইয়ু… অমর ওইয়ু।
সর্দার সাহেব – অমর ওইয়ু… অমর ওইয়ু।
সর্দার সাহেব – অমর ওইয়ু… অমর ওইয়ু।
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
