অসাম পুলিসনা দিজাইন তৌবা ‘অসাম কোপ’ মোবাইল এপ্লিকেসন হৌদোকখ্রে
“গুৱাহাতি হায় কোর্তকী মশাগী নাৎকী পুক্কৈ-লনগৈ অমসুং শক্তম লৈজৈ”“২১শুবা চহিচাদা ভারতমচাশিংগী মপান নাইদ্রবা অনিংবশিং থুংহন্নবা জুদিসিয়ারিনা গনতন্ত্রগী য়ুম্বী অমা ওইনা মপাঙ্গল কনবা অমসুং মীয়ামগী ইহুল খঙনা থৌদাং লৌগদবনি”“ঐখোয়না অরিবা লো লিশিং কয়া লৌথোক্লে, চৎন-কাংলোনশিং মশিং হন্থহল্লে”“সরকার নত্ত্রগা জুদিসিয়ারি ওইগেরা, ইন্সতিতুৎ খুদিংমক্কী থৌদাং অমসুং সংবিধানগী থৌদাং খুদিংমক মীয়াম হিংবদা লাইহনবগা মরী লৈনগদবনি”“লৈবাক অসিদা অচুম্বা ৱায়েল ফংহন্নবা থবক মতমগা চুনবা মওংদা পায়খৎনবা তেক্নোলোজিগী মপান নাইদ্রবা খুদোংচাবা লৈরি”“এ.আইগী খুৎথাংদা মীয়াম্না য়াম্না লাইনা অচুম্বা ৱায়েল ফংবা হেনগৎহন্নবা ঐখোয়না হোৎনগদবনি”অসামগী রাজ্যপাল শ্রী গুলাব চান্দ জি কাতারিয়া, অসামগী চীফ মিনিস্তর শ্রী হিমান্ত বিশ্বা শর্মা, অরুনাচল প্রদেসকী চীফ মিনিস্তর শ্রী পেমা খান্দু, ঐগী মরুপ লো অমসুং জজতিসকী য়ুনিয়ন মিনিস্তর শ্রী কিরেন রিজিজু, সুপ্রিম কোর্তকী জজতিস রিসিকেস রোই অমসুং গুৱাহাতি হায় কোর্তকী চীফ জজতিস সন্দিপ মেহতা জি, অতোপ্পা ইকায়খুম্নরবা জজশিং, অতোপ্পা শক্নাইরবশিং, ইবুংঙো অমসুং ইবেম্মাশিং!
ঐ গুৱাহাতি হায় কোর্তকী প্লাতিনম জুব্লি থৌরম শরুক য়াবা ফংবদা হরাওই।লৈবাক অসিনা নিংতম্বা চহি ৭৫ মপুংফারকপা লোয়ন্না গুৱাহাতি হায় কোর্ত চহি ৭৫ মপুংফারে। মতম অসি এক্সপেরিয়েন্সশিং চেকশিন্না থমগদবা মতম অমনি অমসুং অনৌবা পান্দমশিং ফংনবা দাইত্ব লৈনা অহোঙবশিং পুরক্নবা মথংগী খোঙথাং থাংগদবনি। তশেংনা গুৱাহাতি হায় কোর্তকী মশাগী নাৎকী পুক্কৈ-লনগৈ অমসুং শক্তম লৈজৈ। গুৱাহাতি হায় কোর্তনা কোনশিল্লিবা থবক অসি পাক-চাউই অমসুং য়ুম্নোন্নরিবা রাজ্যশিং অরুনাচল প্রদেস অমসুং নাগালেন্দ য়াওরি। ২০১৩ ফাওবা, গুৱাহাতি হায় কোর্তকী মখাদা রাজ্য ৭ লৈরমখি লোয়ন্না কোর্ত অসিগা অৱাং-নোংপোক শীনবা থুংনা ইনাকখুল্লবা পুৱারি অমসুং গনতন্ত্রগী হেরিতেচগী মরী লৈনরি। থৌরম অসিদা অসাম অমসুং অৱাং-নোংপোক্কী মীয়াম মরুওইনা আইনগী লমদা থবক তৌরিবা মীওইশিংদা ঐনা য়াইফ-পাউজেল পীজরি।
মরুপশিং,
ঙসিগী নুমিৎ অসি দোক্তর বাবাসাহেব অম্বেদকারগী মপোক নুমিৎ থোকপা মরম্না ঙসি অসি হরাওবা নুমিৎ অমসু ওইরে। ঐখোয়গী সংবিধান শেম্বদা বাবা সাহেবনা মরুওইবা থৌদাং অমা লৌখি। মান্নবা অমসুং পুন্না হিংমিন্নবগী সংবিধানগী গুনশিং অসি অনৌবা যুগকী ভারতকী য়ুমফম্নি। শেংলবা থৌরম অসিদা বাবাসাহেবকী খুয়াদা ঐনা কোক নোঞ্জরি।
মরুপশিং,
হন্দক্কী নিংতম্বা নুমিত্তা ঐনা লাল কিলাদগী চাউখৎনবা হোৎনরিবা ভারতকী খুন্নাই অমসুং সবকা প্রায়াসকী মতাংদা ৱা ঙাংখ্রে। ঙসি ২১শুবা চহিচা অসিদা ভারতমচাশিংগী অনিংবশিং অমসুং মঙলানশিং মপান নাইদ্রে। ভারতমচাশিংগী মপান নাইদ্রবা অনিংবশিং থুংহন্নবা জুদিসিয়ারিনা গনতন্ত্রগী য়ুম্বী অমা ওইনা মপাঙ্গল কন্না অমসুং মীয়ামগী ইহুল খঙনা থৌদাং লৌগদবনি। মপাঙ্গল কনবা অমসুং মতমগা চুনবা ৱায়েল কাংলোনগী থবক অমা লৈহন্নবা সংবিধান্না ঐখোয়দা শীন্নরি। লেজিসলেচর, জুদিসিয়ারি অমসুং ইজুকিউতিপগী অপুনবা থৌদাং মথৌ তাই। ঐখোয়গী লিগেল প্রোবিজন অয়াম্বা বৃতিস মতমগীনি হায়বা অদোম খঙলে। হৌজিক্কী মতমগা চুনদ্রবা অসিগুম্বা আইন কয়া লৈরি। হায়রিবা লোশিং অদু সরকারগী থাক্তা লেপ্তনা হন্না য়েংশিল্লি। ঐখোয়না অরিবা লো লিশিং কয়া লৌথোক্লে অমসুং চৎন-কাংলোনশিং মশিং হন্থহল্লে।অসিগুম্বা অরিবা লো ২০০০ রোম অমসু চৎন-কাংলোন লিশিং ৪০ রোম মখা তানা চৎনদ্রে। মসিগা লোয়ন্না ললোন-ইতিক্কী প্রোবিজন কয়া দিক্রিমিনেলাইজ তৌবদগী কোর্তশিংদা কেস মশিং হন্থরে।
মরুপশিং,
সরকার নত্ত্রগা জুদিসিয়ারি ওইগেরা, ইন্সতিতুৎ খুদিংমক্কী থৌদাং অমসুং সংবিধানগী থৌদাং খুদিংমক মীচম মীয়াম হিংবদা লাইহনবগা মরী লৈনগদবনি। হিংবদা লাইহনবদা তেক্নোলোজিনা শক্তি লৈরবা খুৎলায় অমা ওইরে। হিরম খুদিংমক্তা সরকারনা তেক্নোলোজি মপুংফানা শীজিন্নরি। দি.বি.তি,আধার অমসুং দিজিতেল ইন্দিয়া মিসন্ন অসি সরকারনা তেক্নোলোজি শীজিন্নবগী খুদম্নি। স্কিম খুদিংমক লায়রবশিংগী হক ফংনবা পাম্বৈ অমা ওইরে। লৈবাক অসিগী ৱায়েল থৌদাগী থবক্তা অচৌবা পোৎলুম অমা ওইরিবা লন-থুমগী হকশিংগা মরী লৈনবা কেসশিংগী মতাংদা অচৌবা থবক অমা পায়খৎলে। চাউখৎলবা লৈবাকশিং ফাওবা নাখৈ শেংদবা লন-থুমগী হকশিংগী ৱাথোকশিং মায়োক্নরি। অদুবু পি.এম শ্বামিতভা য়োজনাগী খুৎথাংদা লৈবাক অসিনা হিরম অসিদা থবক কয়া মাইপাক্না পায়খৎলে। লৈবাক অসিদা খুঙ্গং লাখ ১ হেন্না দ্রোন শীজিন্নদুনা মেপ লৌরে অমসুং নাগরিক লাখ কয়াদা লন-থুমগী কার্দশিং য়েন্থোকখ্রে। মসিনা লন-থুমগা মরী লৈনবা কেস মশিং হন্থরে অমসুং মীয়াম হিংবদা লাইহল্লে।
মরুপশিং,
লৈবাক অসিদা অচুম্বা ৱায়েল ফংহন্নবা থবক মতমগা চুনবা মওংদা পায়খৎনবা তেক্নোলোজিগী মপান নাইদ্রবা খুদোংচাবা লৈরি। সুপ্রিম কোর্তকী ই-কম্মিতিকী থবক থাগৎনিঙাইনি। চহি অসিগী বজেত্তা ই-কোর্ত মিসনগী অহুমশুবা ফেজ লাউথোক্লে। ৱায়েল থৌদাগী থবকশিং মপুংফানা পাংথোক্নবা মালেমগী ওইনা আর্তফিসিএল ইন্তিলিজেন্স শীজিন্নবা হৌরে। এ.আইগী খুৎথাংদা মীয়াম্না য়াম্না লাইনা অচুম্বা ৱায়েল ফংবা হেনগৎহন্নবা ঐখোয়না হোৎনগদবনি।
মরুপশিং,
জুদিসিএল সিস্তেমদা অলতর্নেতিপ দিসপুৎ রিজোলুসন সিস্তেম্না মরুওইবা থৌদাং অমা লৌরি। অৱাং-নোংপোক্তা লমদম অমগী থায়নদগী চৎনরক্লবা অলতর্নেতিপ দিসপুৎ রিজোলুসনগী থবক মরাংকাইনা লৈরি। প্লাতিনম জুব্লি থৌরমদা গৌহাতি হায় কোর্তকী লো রিছার্স ইন্সতিতুৎনা কস্তমরি লোগী মতাংদা লাইরিক ৬ ফোঙলে হায়বা ঐ তারে। হায়রিবা লাইরিকশিং অসি কস্তমরি লোশিংগী মতাংদা ইবনি। মসি থাগৎফম থোকই। হায়রিবা চৎনবীশিং অসি লো স্কুলশিংদা তাকপী-তম্বীগদবনি।
মরুপশিং,
অচুম্বা ৱায়েল ফংবা লাইহন্নবা মরুওইবা শরুক অমদি লৈবাক অসিগী মীয়াম লোশিং খঙহনবা অমসুং অচুম্বা লৌশিং অসিনি অমসুং মসিনা মীয়াম্না লৈবাক অসিদা অমসুং লৈবাক অসিগী থবকশিংদা থাজবা হেনগৎহনগনি। আইনশিং অরাইবা মওংদা খঙবা য়ানবা থবকশিং পায়খৎকদবনি। অরাইবা লোনশিং আইনশিং ইথোক্নবা থবক পায়খৎকদবনি অমসুং মসিনা ঐখোয়গী লৈবাক্কী কোর্তশিংদা য়াম্না চাউনা মতেং ওইগনি। মীওই খুদিংমক্না মখোয় মশাগী লোন্দা ইন্তরনেৎ শীজিন্নবা য়ানবা ভাসিনি পোর্তেলনা পান্দম থম্লি। মসিগী কান্নবা কোর্তশিংসু ফংগনি।
মরুপশিং,
রিসিকেস জিনা পনখিবা ঐখোয়গী জেলশিংদা দরকার লৈতনা মশিং য়াম্লবা মীওই কয়া লৈরি হায়না পনখিবা অদু মরুওইবা ৱাফম অমনি। ঐখোয়গী মেহতা জিনসু মসি পনখ্রে। মীওই খরনা বেলগী শেন লৈতে, মীওই খরনা ফাইন থিনবা শেন লৈতে অমসুং মীওই খরনা খুদিংমক লৈরবশু মখোয়গী ইমুং-মনুংনা মখোয় লৌশিন্নবা থৌরাং তৌদে। হায়রিবা মীওইশিং অসি লায়রবা অমসুং তোল্লবা কাংলুপকী মীওইশিংনি। মখোয় অয়াম্বা করিসু লৈতবা মরাল অমগীদমক চহি কয়া জেলদা লৈরক্লি। অপীকপা মরালগীদমক মতম শাংনা কৈশুমশঙদা লৈরিবশিং অমসুং মরুপ-মপাং নত্ত্রগা শেন লৈজদবশিংগীদমক সরকার অমসুং জুদিসিয়ারিনা থবক পায়খৎপা মথৌ তাই। আইনগী ওইবা থবকশিং পাংথোকপা লোইরবা মতুংদা মখোয়গী ইমুং-মনুংশিংনা লৌশিল্লু হায়বা য়াদ্রবা মীওইশিংগী অৱাবা উগদবনি। অসিগুম্বা মীওইশিং থাদোরকপা মতমদা শেন্থং পীনবা প্রোবিজন অমা চহি অসিগী বজেত্তা হাপ্লে। হায়রিবা কেন্দ্রগী শেন্থং অদু রাজ্যনা ফাদোক তারবশিংদা শিন্নগনি।
মরুপশিং,
হায়নবা অমা লৈ-ধর্মা-রক্ষাতি-রক্ষিতাহ। মসিনা হায়রি মদুদি ধর্মা ঙাক-শেল্লিবশিং ধর্মনা ঙাকথোকই। মরম অসিনা, ইন্সতিতুৎ অমা ওইনা, লৈবাক্কীদমক থবক তৌবা হায়বসি ঐখোয়গী ধর্মানি অমসুং ঐখোয়গী থৌদাংনি। মসিগী থাজবা অসিনা লৈবাক অসি ‘চাউখৎলবা ভারত’কী পান্দম ফংবা ঙমগনি। প্লাতিনম জুব্লি থৌরম অসিগীদমক ঐনা অমুক হন্না ময়াম পুম্নমক থাগৎচরি অমসুং ঐগী য়াইফ-পাউজেল পীজরি।
অদোম য়াম্না থাগৎচরি!
