Our Indian diaspora has succeeded globally and this makes us all very proud:PM
For us, the whole world is one family: PMIndia and Nigeria are connected by commitment to democratic principles, celebration of diversity and demography:PMIndia’s strides are being admired globally, The people of India have powered the nation to new heights:PMIndians have gone out of their comfort zone and done wonders, The StartUp sector is one example:PMWhen it comes to furthering growth, prosperity and democracy, India is a ray of hope for the world, We have always worked to further humanitarian spirit:PMIndia has always supported giving Africa a greater voice on all global platforms:PMভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
সুন্নু নাইজেরিয়া! খুরুমজরি!
ঙসি, অদোম্না অবুজাদা নীংথিরবা ফীভম অমা শেম্লি। ঙরাং নুমিদাংৱাইরমদগী হৌনা উরিবা ময়ামসিনা ঐ অবুজাদা লৈবা মান্দে, ভারতকী সহর অমদা লৈবগুম ফাওহল্লি। ময়াম মরক্তগী মীওই কয়াদি লাগোস, কানো, কাদুনা, অমসুং পোর্ত হারকোর্ত্তগী, তোঙান তোঙানবা মফমশিংদগী অবুজাদা লাক্লিবনি, অমসুং অদোমগী মায়থোঙদা তারিবা মমি, ফাওরিবা ইথিল অমসুং উৎলিবা হৈনিংবা মতৌনা মফমসিদা লাকপদা অদোমদা ফাওরিবা ইহুল অদুগী মমি তারি। ঐহাকসু ময়ামগা উনবগী তাঞ্জা অসি খৌরাংনা ঙাইরকপনি। অদোম্না ঐবু নুংশিবিবা অসি ঐগীদমক্তি অচৌবা লন অমনি। ময়াম মরক্তা তিঞ্জবা, ময়ামগা মতম লেনমিন্নবগী মীৎকুপশিং অসি ঐগী পুন্সিসিনা লৈরিমখৈ নীংশিংদুনা লৈহৌরগনি।
মরূপশিং,
হন্দক্কী অসি ঐনা প্রধান মন্ত্রীনা ওইনা নাইজেরিয়াদা লাকপা অহান্বনি। অদুবু ঐ ইথন্তা লাকপা নত্তে; ঐনা ভারতকী লৈহাওগী মনম পুদুনা লাক্লি। ঐনা ভারত মচা করোর কয়াগী য়াইফ-পাউজেলসু পুদুনা লাক্লি। ভারতনা চাওখৎলকপদা অদোমদা ফাওরিবা নুংঙাইবা অদু থম্মোয়নুংদা ফাওবা ইথিলনি, অমদি মফমসিদা, ভারত মচা খুদিংমক্না, অদোমগী মায় পাকপা উবদা চাউথোকচবা পোক্লি। কয়া য়াম্না চাউথোকপা পোক্লিবনো হায়না অদোম্না হংবা য়াই? ফনা য়াম্না পাওই – ঐগীদি ইঞ্চি ৫৬গী থবাক অসি পাথোক্না ফাওরি!
মরূপশিং,
ঐবু মফমসিদা তরাম তরাম্না ওকপিবগীদমক প্রেসিদেন্ত তিনুবু অমসুং নাইজেরিয়াগী মীয়ামগী মফমদা ঐনা তৌবিমল খঙবা উৎচরি। ঙাইহাক্কী মমাঙদা, প্রেসিদেন্ত তিনুবুনা ঐহাকপু নাইজেরিয়াগী নেস্নেল এৱার্দ পীবিদুনা ইকায়খুম্নবিখি। ইকায়খুম্নবা অসি মোদীগী নত্তে; মসি ভারত মচা করোর কয়াগীনি অমসুং মফমসিদা লৈরিবা ভারত মচা ময়ামগীনি।
মরূপশিং,
ইকায়খুম্নবা অসি ঐনা ময়ামগী মফমদা কত্থোকচরি।
মরূপশিং,
ঐনা প্রেসিদেন্ত তিনিবুগা ৱারী শানবাম তমদা, মহাক্না নাইজেরিয়াগী চাওখৎ খোঙজেলদা অদোম্না লৌরিবা থৌদাংবু হন্না হন্না থাগৎলকখি। ঐনা মহাক্কী ৱাফমশিং তাখি অমসুং মহাক্কী মীত্তা তারিবা নুংঙাইবগী শকফম উবদা, ঐঙোন্দা চাউথোকচবা ফাওখি। ইহুল অদু ইমুংগী মীওই অমনা চাউনা মায় পাকপা ঙম্লকপদা ফাওবা নুংঙাইবা অমসুং চাউথোকচবগা পাঙ্খক্নি। মমা মপা ওইবশিং অমসুং খুঙ্গংগী মীওইশিংনা মখোয়গী মীওই অমনা মায় পাক্লকপা মতমদা হরাও তয়াম্বা ফোঙদোকপগুম ঐঙোন্দসু চপ মান্ননা ফাওরি। অদোম্না অদোম্না কন্না হোৎনবশিং অদুনা নাইজেরিয়াগী মফমদা কত্থোকপখক নত্তনা অদোম্না অদোমগী থম্মোয়বুসু লৈবাকসিগী মফমদা কত্থোক্লি। ভারতকী মীওইশিংনা মতম পুম্বদা নাইজেরিয়াগীদমক অৱা নুংঙাই পুম্বদা শরুক য়াদুনা লেপ্লি। মশাগী চহি নিফুদগী হুম্ফু ফাওবগী মনুংদা লৈবা নাইজেরিয়া মচা কয়ানা ভারতকী ওজাশিংনা মখোয়বু তাকপি তম্বিখিবা নীংশিংলমগনি। ভারতকী দোক্তরশিংনা মফমসিগী মীয়ামগী থৌগল তৌদুনা লাক্লি। ভারতকী ওন্ত্রপ্রিন্যুরশিংনা নাইজেরিয়াদা বিজিনেস লিংখত্তুনা লৈবাকসিদা চাওখৎপা পুরকপদা মশক থোক্না থৌদাং য়ারি। খুদম ওইনা, কিসিনচান্দ চেলারাম জীনা মফমসিদা ভারতনা নীংতমদ্রিঙৈ মমাঙদা য়ৌরকখি, অমদি মতমদুদা মহাক্কী কম্পেনীনা নাইজেরিয়াগী মকোক থোংবা বিজিনেসশিংগী মরক্তা অমা ওইরক্কনি হায়না কনানবু খঙলুবগে। ঙসি, ভারতকী কম্পেনী কয়ানা নাইজেরিয়াগী শেন্মিৎলোন মপাঙ্গল কনখৎহল্লি। তোলারাম জীগী নুদল লৈবাকসিগী য়ুমথোঙ খুদিংদা পাম্না চানরি। তুলসিচন্দ রাই জীনা লিংখৎখিবা ফাউন্দেসন্না নাইজেরিয়াগী মীওই কয়াগী পুন্সিদা মঙাল পীরি। ভারতকী মীওইশিংনা নাইজেরিয়াগী য়াইফনবগীদমক লমদমসিগী মীয়ামগা খুৎশম্ননা চৎমিন্নরি। অপুন্বগী শক্তম অমসুং মান্নবা পান্দমশিংনা ভারতকী মীওইশিংগী, মখোয়গী ভেল্যুগী খ্বায়দগী চাউবা মপাঙ্গলগী মমি তারি। ঐখোয়না চৎলুবা মফম খুদিংদা, ঐখোয়না ঐখোয়গী ভেল্যু পুখত্তুনা, পুম্নমক্কী য়াইফনবা হোৎনদুনা লাক্লি। ভেল্যুশিং অসিনা ঐখোয়গী লু তোংদা চহিচা কয়া পক্তুনা লাক্লগা ঐখোয়দা মালেম পুম্বা অসি ইমুং অমগুম খলহন্নবা তম্বিরি। ঐখোয়গী ইফমদদি মালেম পুম্বসি তশেংনা ইমুং অমগুম্বনি।
মরূপশিং,
অদোম্না নাইজেরিয়াদা ভারতকী নাৎকীদমক চাউথোকচবা মফম অমা কল্লিবা অসি মফম খুদিংদা মমি তারি। মরু ওইনা, য়োগ মফমসিগী মীয়াম্না পাম্নবা হেনগৎলক্লি। অদোমখক্তা নত্তনা নাইজেরিয়াগী মীয়াম্না য়োগ শান্নৈ হায়না ঐনা থাজৈ, অমদি ঐনা মসিমক অদোম্না হৌনা খুরিবা খুবাক অদুদগী লৌশিন্বা ঙম্মি। মরূপশিং, শেল তানবিয়ু, মিংচৎ তানবিয়ু, অদোম্না পাম্বা খুদিংমক ফংনবা হোৎনবিয়ু, অদুবু মতম খরদি য়োগ তৌনবাক কাইথোকপিয়ু। ঐনা তাবদা মফমসিগী নেস্নেল তেলিভিজন্দা চয়োলগী ওইবা য়োগগী থৌরম অমা শন্দোক্লি হায়। অদোম্না লোকেল তিভি য়েংলমদবা য়াই, অমদি ভারতকী চেনেলশিংদা হেন্না পুক্নিং চঙলম্বা য়াই- ভারত্তা লৈরিবা ঈশিং নুংশিৎকী ফীভম, নৎত্রগা খ্বায়দগী নৌবা পাউশিংদা পুক্নিং চঙলম্বা য়াই। অদুগা মফমসিদা, নাইজেরিয়াদা, হিন্দী লোলগী পোপুলারিতীসু হেনগৎলক্লি। নাইজারিয়ন নহা কয়ানা, মরুওইনা কানোদগী মহৈরোয়শিংনা হিন্দী তম্নরি। তশেংবদি, কানোদা, হিন্দা পামজবশিংনা দোস্তানা কৌবা কাঙলুপ অমা শেমদুনা ঙসি মফমসিদসু তিনবিরি। অসুম্না মরূপ মপাং ওইবগী মরী কয়াসি লৈবনা, ভারতকী ফিল্মশিং পামজবা হায়বসি মশানা পুরকপা তাবনি। লঞ্চ মতমদা, ঐনা ভারতকী এক্তর অমসুং ফিল্মশিংগী মমিং নীংথিনা খঙবা লমদমসিগী মীওই খরগা ৱারী শানখি। অৱাংথংবা শরুক্তা, মীয়ামগী ভারতকী কল্চরেল পর্ফোর্মেন্সশিং য়েংনবা পুল্লি, অমসুং গুজরাতিগা মরা চাখ্রবা ৱাহৈশিং – ‘নমস্তে ৱহালা’ ‘মহারাৱালা’ নচিংবশিং মফমসিদা মীয়াম্না খঙনৈ। ‘নমস্তে ৱহালা’গুম্বা ভারতকী ফিল্ম অমসুং ‘পোস্তকার্দ’ কুম্বা ৱেব সেরিজশিং নাইজেরিয়াদা য়াম্না পাম্নৈ।
মরূপশিং,
গান্ধিজীনা অফ্রিকাদা মতম শাংনা লমদমসিগী মীয়ামগী অৱা নুংঙাই শরুক য়াদুনা লৈরমখি। লোইলম লৈঙাক্কী মতমদা, ভারত অমসুং নাইজেরিয়া অনিমক্না নীংতম ঈহৌদা মরুওইবা থৌদাং লৌখি। তুংদা ভারতকী নীংতম্বনা নাইজেরিয়াগী নীংতম ঈহৌদা ইনোৎ হাপখি। ভারত অমসুং নাইজেরিয়ানা লালহৌগী মতমদুদগী হৌনা খোঙবু ওইনা চঙশিনমিন্নদুনা লাক্লি। ভারতনা, দিমোক্রেসীগী মমা ওইনা, অমসুং নাইজেরিয়ানা অফ্রিকাগী খ্বায়দগী চাউবা দিমোক্রেসী ওইনা, দিমোক্রেসী, দাইভর্সিতী, অমসুং দিমোগ্রাফিক ইনর্জীগী ৱাখল্লোন মান্ননা ফাওমিন্নরি। লৈবাক অনিমক য়াম্লবা লোল অমসুং খেন্নবা চৎনবীশিং ইনাক খুন্না লৈ। নাইজেরিয়াদা লাগোসকী প্রভু জগন্নাথ, প্রভু ভেঙ্কতেস্বর, গনপতী দাদা, অমসুং কার্তিকেয়গী লাইশঙশিংনা ভারতকী দাইভর্সিতীবু ইকায়খুম্নবগী খুদম ওইনা লেপ্লি। ঙসি, ঐনা ময়ামগী মরক্তা লেপ্লরবদা, ঐনা ভারতকী মীয়ামগী মহুৎ শিল্লগা নাইজেরিয়া লৈঙাক্কী মফমদা শেংলবা লাইফমশিং শেমগৎপদা মতেঙ পাংবিবগীদমক তৌবিমল খঙবা উৎচরি।
মরূপশিং,
ভারতনা নীংতম্বা ফংখিবা মতমদা শিংনবা কয়া থেংনখি। ঐখোয়গী ইপা ইপুশিংনা হায়রিবা খুরৌশিংদু লান্থোক্নবা চোকথবা নাইদনা হোৎনখি, অমসুং ঙসি, মালেম অসিনা ভারতনা থুনা চাওখৎলকপগী মতাঙদা ঙাংনরি। মসিবু চুমদবরানে? মসিগী পাউ অদোমদা য়ৌরকপরা? মসি য়ৌরকপা মতমদা, অদোমগী চিনবাল থোক্না নুংঙাইবা ফোঙদোক্তবরা? অদুগা অদোমগী চিনবালদগী থম্মোয়দা অপেন্বা ফাওদবরা? ঐখোয় পুম্নমক্না ভারতনা মায় পাকপশিংদা চাউথোকচবা পোক্লি। অদোমসু চাউথোকচবা পোক্তবরা হায়বিয়ু? চন্দ্রয়ান্না থাগী লৈমায়দা তারুবদা অদোম চাউথোকচবনা থুমহৎখিদবরা? অদোম মীৎ লাউনা পাঙথোক্তুনা নুমিৎ অদু স্ক্রীন্দা মীৎ কুপ্তনা য়েংখিদবরা? মঙ্গলয়ান্না মার্স য়ৌখিবদা, অদোমদা নুংঙাইবা ফাওদবরা? মেদ-ইন-ইন্দিয়া ফাইতর জেত তেজাস নৎত্রগা লমদমসিদা শাজবা এয়রক্রাফ্ত কেরিয়র INS Vikrant উবদা অদোমদা চাউথোকচবা পোক্তবরা? ঙসি স্পেস, মেনুফেকচরিং, দিজিতেল তেক্নোলোজী, অমসুং হেল্থকেয়রনচিংবা সেক্তরশিংদা ভারতনা মালেমগী মাঙজিল থাবা লৈবাকশিংগা থোং মান্ননা লেপমিন্নরি। মতম শাংনা লৈখিবা লোইলম লৈঙাক্না ঐখোয়গী শেন্মিৎলোন শোন্থহনখি হায়বা ঐখোয় পুম্নমক্না খঙই। য়াম্লবা শিংনবা কয়া থেংনরবসু, ভারতকী শেন্মিৎলোন্না নীংতম্লবা মতুং দেকেদ ৬তা ত্রিলিয়ন দোলর ১গী পল লানখি। মদুদা মতম কয়া চঙখি অদোম খঙবিবরা? দেকেদ তরুক! মানি দেকেদ তরুক্নি। ঐ অদোমগী মফমদা পরা তাকপিবা লাকপা নত্তে, চুম্না নীংশিংজবনি। ভারত মচা ঐখোয়না লেপ্তনা হোৎনখি, অমসুং হৌজিক ঐখোয় ময়াম খুবাক খুমিন্নসি। অদোম্না হান্নদুম খুবাক খুবিরক্লে, অদুবু ঐখোয়না করিগীদমক খুবাক হেন্না হৌনা খুগদৌরিবনি ঐ হায়জগে। হৌখিবা দেকেদ অসিখক্তদা, ভারতনা মাগী GDPদা ত্রিলিয়ন দোলার ২রোম হাপচিনখ্রে। শুপ্নতগী চহি তরাদা, ঐখোয়গী শেন্মিৎলোন শরুক অনি হেনগৎলকখি। ঙসিদি, ভারতনা মালেমগী মঙাশুবা খ্বায়দগী চাউবা শেন্মিৎলোন ওইনা লেপ্লি। অদোম মসি নীংশিংবিগদ্রা? অদুগা ভারতনা ত্রিলিয়ন দোলার ৫গী শেন্মিৎলোন ওইরক্তুনা মালেমগী অহুমশুবা খ্বায়দগী চাউবা শেন্মিৎলোন ওইরক্কদবা নুমিৎ অদুসু লাপত্রে।
মরূপশিং,
কমফোর্ত জোনদগী থোক্লকপা মীওইশিংনা চাউনা মায় পাকপা ঙম্মি হায়না ঐখোয়না হেক হেক তাই। ৱাফমসি অদোমগীম ফমদা শন্দোক্না তাক্নিংঙাই লৈতে, মরমদি অদোম্না খোঙচৎ অসিদা লাকখ্রবনি। ঙসিদি, ভারত অমসুং মাগী নহাশিংনা অসিগুম্বা ৱাখল্লোন অসিদা মাঙদা চঙশিল্লি, মরম অসিননি ভারতনা অনৌবা সেক্তরশিংদা খোঙকাপ লাওনা থালংবনি। অদোম্না ‘স্তার্ত-অপ’ হায়বা ৱাহৈসি চহি ১০-১৫গী মমাঙদা তারম্লোই। মতম অমদা ঐনা স্তার্ত-অপ প্রমোত তৌনবা কন্ফরেন্স অমা পাঙথোকখি। স্তার্তঅপ মীওই ৮-১০ খক্তমক শরুক য়াখি, অতৈদি স্তার্তঅপ হায়বসি করিনো হায়বা খঙনবখক্কীদমক শরুক য়াখিবনি। বেঙ্গলদগী নহা ওইরিবী নুপী অমনা হৌগৎলগা মহাক্না থেংনরকপশিং পাউদম্লকখি মরমদি ঐনা অসিগুম্বা অনৌবা মালেমগী ৱাফমশিং অসি ইলস্ত্রেত তৌবা মথৌ তাখি। মহাক লাইরিক লাইশু নীংথিনা হৈরবা, অফবা থবক অমা তৌবা য়াবা মীশক্নি, অমসুং নুংঙাইনা ফম্লম্মি। অদুম ওইনমক মহাক্না পুম্নমক থাদোক্লম্মি, অমদি মহাক্না মাগী খোঙচৎকী মরমদা শন্দোক্না তাকখি। মহাক্না মাগী খুঙ্গংদা চৎখি অমদি মাগী মমাদা মহাক পুম্নমক থাদোক্লম্লে, মহাক্কী থবকশু অনৌবা ভেঞ্চর অমা হৌনবা থাদোক্লম্লে হায়খি। মহাক্কী মমানা অঙকপগা লোয়ননা হায়খি, মহাবিনাস (মাঙ তাক্লেদনা)। অদুবু ঙসিদি, মীরোল অসিনা মখোয়গী কমফোর্ত জোন্দগী থোরক্তুনা অনৌবা ভারত অমগীদমক ইনোভেত তৌনবা ফিরেপ লৌখি, অমদি মসিগী মহৈ অঙকপা ফংই। হৌজিক্তি ভারত্তা রেজিস্তর তৌরবা স্তার্তঅপ লাখ ১.৫ হেন্না লৈরে। মতম অমদা মমাশিংবু ‘মহাবিনাস’ হায়না কপহল্লম্বা “স্তার্তঅপ” হায়বা ৱাহৈ অসি ‘মহাবিকাস’ (অচৌবা চাওখৎপা) হায়বসিদা ওল্লে। হৌখিবা দেকেদতা, ভারতনা য়ুনিকোর্ন ১০০ হেন্না পুথোকখ্রে। ময়াম্না ৱাখল তানবগীদমক, য়ুনিকোর্ন অমা হায়বসি লুপা করোর ৮,০০০ দগী লুপা করোর ১০,০০০ ফাওবগী ভেল্যু লৈবা কম্পেনী অমবুনি। ভারতকী নহাশিংনা শেমগৎপা অসিগুম্বা কম্পেনী ১০০না ভারতকী স্তার্তঅপ কলচরগী ফিরাল পায়রি। অদুগা মসি করিগী ওইরক্লিবনো? মসি কমদৌনা ওইরক্লিবনো? মসি ভারতনা মাগী কমফোর্ত জোন্দগী থোরকপননি।
মরূপশিং,
ঐ অতোপ্পা খুদম অমগা পীজগে। ভারত মাগী সর্ভিস সেক্তরগীদমক মীয়াম্না খঙনৈ, মসিনা ঐখোয়গী শেন্মিৎলোনগী অচৌবা য়ুম্বী অমা ওইরি। অদুবু ঐখোয় মসিনসু পেন্দে। ঐখোয়না ঐখোয়গী কমফোর্ত জোনগী ৱাংমা লান্না থোক্তুনা ভারতপু মালেমগী থাক্কী মেনুফেকচরিং হব অমা ওন্থোক্নবা ফিরেপ চেৎনা লেপ্লি। ঐখোয়না ঐখোয়গী মেনুফেকচরিং ইন্দস্ত্রী পাকথোক চাউথোকহল্লি। ঙসি, ভারতনা মালেমগী খ্বায়দগী চাউনা মোবাইল ফোন পুথোকপা লৈবাকশিংগী মরক্তা অমা ওইরক্তুনা, চহিদা মোবাইল ফোন করোর ৩০ হেন্না পুথোক্তুনা মাইজেরিয়াগী মথৌ তাবদগী হেন্না পুথোক্লি। হৌখিবা দেকেদ অসিদা, ঐখোয়গী মোবাইল ফোন এক্সপোর্ত শরুক ৭৫ হেন্না হেনগৎলে। মতৌ অসুম্না, ঐখোয়গী দিফেন্স এক্সপোর্তসু হায়রিবা মতমসিদা শরুক ৩০ হেন্না হেনগৎলে। ঙসি, ঐখোয়না লৈবাক ১০০ হেন্বদা দিফেন্সকী খুৎশু খুৎলায়শিং থাদোক্লি।
মরূপশিং,
মালেম অসিনা স্পেস ইন্দস্ত্রীদা ভারতকী মায় পাকপবু শিংথারি। ভারতনা গগনয়ান মিসনগী খুত্থাঙদা স্পেসতা ভারত মচা থাগৎনবা অপাম্বা লাউথোকখ্রে। মসিগী মথক্তা, ভারতনা স্পেস স্তেসন অমা শাননবা শেম শারি।
মরূপশিং,
ঐখোয়গী কমফোর্ত জোন থাদোক্তুনা, ইনোভেত তৌদুনা, অমসুং অনৌবা লম্বীশিং য়াৎপনা ভারতকী শক্তাক খুদম ওইরক্লে। হৌখিবা দেকেদ অসিদা, ঐখোয়না মীওই করোর ২৫ লায়রবগী পনখৈ মথক্তা পুখৎলকখ্রে। লায়রবা মশিং চাউনা হন্থরকপা অসিনা মালেমগী ওইনা পুক্নিং থৌগৎনফম ওইদুনা, ভারতনা তৌবা ঙম্লগদি অতৈসু তৌবা ঙমগনি হায়না থাজবা পীরি। নৌনা ফাওরকপা মশাবু থাজবগা লোয়ননা, ভারতনা চাওখৎপগী খোঙচৎ অমদা লাক্লি। ঐখোয়গী মঙলান্দি ঐখোয়না নীংতম্বগী চহি ১০০ ফারকপদা ভারতপু ২০৪৭ ফাওবদা চাওখৎপা লৈবাক অমা ওইহন্বনি। নুংঙাইনা থবক্তগী পোত্থাদুনা লৈবা পাম্লিবা তুংগী পুন্সিদা নুংঙাইনা হিংবা পাম্লিবা মীওইশিংগী ওইনা, ঐনা অদোমগী তুংগী য়ুম্ফম থোল্লিবনি। ঐখোয়না ২০৪৭গী গ্রান্দ ভিজনগী মায়কৈদা চঙশিনবগা লোয়ননা, ভারত মচা খুদিংমক্না চাওখৎপা অমসুং অথোইবা ভারত অমা শেম্নবা পুন্না হোৎনমিন্নরি। মফমসিদা নাইজেরিয়াদা লৈবিরিবা অদোমসু, মিসন অসিদা মশক নাইবা থৌদাং অমা লৌরি।
মরূপশিং,
চাওখৎপা, ইং-তপ্পা, নুংঙাই য়াইফবা, অমসুং দিমোক্রেসীগী লমদা, ভারতনা মালেমগী থাজবগী মৈরা অমা ওইরক্লি। অদোম্না চৎলুবা মফম খুদিংদা, মীয়াম্না অদোমদা ইকায়খুম্নবগা লোয়ননা য়েংলি। মসি চুমদবরা? পুকচেল শেংবিয়ু, অদোম্না করি থেংনবিবগে? অদোম্না অদোমসি ভারত্তগীনি হায়বা মতমদা – অদোম্না ইন্দিয়া, হিন্দুস্তান নৎত্রগা ভারতপু হায়রবসু – মীয়াম্না অদোমগা খুৎ শোক্নবা মতমদা অঙকপা ইনর্জী অমসুং কন্নেক্সন অমা ফাওরমগনি।
মরূপশিং,
মালেমসিদা লাংফম অমা হেক থোক্লকপা মতমদা, ভারতনা অহান্বা রেস্পোন্দর অমা ওইনা মালেমগী মরুপ (বিস্ব বন্ধু) অমা ওইনা শেম শাদুনা লেপ্লি। কোরোনাভাইরস লাইচৎকী মনুংদা লৈখিবা ফীভম অদোম নীংশিংবিরমগনি। মালেম অসি পুমলাং লাংখি, অমদি লৈবাক খুদিংমক ভেক্সিন ৱাৎপগী ফীভম মায়োক্নখি। লুরবা তানফম অদুদা, ভারতনা হেক ঙম্লিবমখৈ লৈবাক কয়াদা ভেক্সিন ফংহন্নবা ফিরেপ লৌখি। মসি চহি লিশিং কয়াগী চৎনবীদা মরা তাখ্রবা ঐখোয়গী নাৎকী ভেল্যুশিংগী শরুক্নি। মসিগী মহৈনা, ভারতনা ভেক্সিন পুথোকপগী চাং হেনগৎহনখি অমসুং নাইজেরিয়া য়াওনা লৈবাক ১৫০ হেন্বদা হিদাক লাংথক অমসুং ভেক্সিনশিং সপ্লাই তৌখি। মসি অপীকপা মায় পাকপা অমা নত্তে। মসিনা মরম ওইরগা, মশিং থিঙমদ্রবা পুন্সি কয়া নাইজেরিয়া য়াওনা অফ্রিকাগী লৈবাক কয়াদা কনবা ঙমখি।
মরূপশিং,
ঙসিগী ভারতনা ‘সবকা সাথ, সবকা বিকাস’কীদমক লেপ্লি। ঐনা নাইজেরিয়া য়াওনা অফ্রিকাবু তুংগী চাওখৎপা পুরকপগী মরুওইবা মফম অমা উই। হৌখিবা চহি মঙাসিখক্তদা, ভারতনা অফ্রিকা শিন-থুংনা অনৌবা এম্বেসী ১৮ হাংদোকখ্রে। হৌখিবা চহিশিংদা, ভারতনা মালেমগী থাক্তা অফ্রিকাগী খোঞ্জেল হৌহন্নবা চোকথবা নাইদনা হোৎনদুনা লাকখি। মসিগী অচৌবা খুদম অমা হায়ববু মমাঙ চহিদা ভারতনা অহান্বা ওইনা G20 প্রেসিদেন্সী পায়খিবা মতমদুনি। ঐখোয়না অফ্রিকান য়ুনিয়নবু পর্মেনেন্ত মেম্বর অমা ওইহন্নবা কন্না হোৎনখি, অমদি মায়সু পাকখি। G20 মেম্বর লৈবাক খুদিংমক্না ভারতকী থৌশিলবু মপুং ফানা শৌগৎখিবদা ঐ তশেংনা নুংঙাইখি। ভারতনা পাউজেল পীদুনা, নাইজেরিয়ানা গেস্ত নেসন অমা ওইবগী পুৱারী ওইরবা মীৎকুপ অমা উবা ফংখি। প্রেসিদেন্ত তিনুবুনা ওফিস পায়রক্লবা মতুংদা চৎখিবা অঙন্বগী খোঙচৎশিংগী মনুংদা ভারত্তা লাকপসু য়াওখি, অমসুং মহাক্না G20 সম্মিত শরুক য়াখিবা অহান্বা লুচিংবশিংগী মরক্তা অমা ওইখি।
মরূপশিং,
ময়াম মরক্তগী মীওই কয়াদি, অদোমগী ইমুং মনুংগা লোয়ননা কুমহৈ হরাওদা পাঙথোকমিন্ননবা, অমসুং অৱা নুংঙাইদা শরুক য়ামিন্ননবা ভারত্তা তোয়না লাক্লমগনি। অদোমগী মরী মতাশিংনা ভারত্তগী তোয়না কোল তৌরক্লমগনি নৎত্রগা মেসেজ থারক্লমগনি। হৌজিক্তি, অদোমগী এক্সতেন্দেদ ফেমিলীগী শরুক অমা ওইনা, ঐ ইশামক মফমসিদা লাক্লি অমসুং অদোমগীদমক অখন্নবা পাউজেল অমা পুদুনা লাক্লি। মথঙ চহিগী জনুৱারীদা, ভারতনা অচৌবা কুমহৈ কয়া পাঙথোক্কদৌরি। চহি খুদিংগী জনুৱারী ২৬তা, ঐখোয়না রিপব্লিক দে দিল্লীদা পাঙথোক্লি। জনুৱারীগী অনিশুবা চয়োলদা, প্রভাসী ভার্তিয় দিবস পাঙথোক্কনি, অমসুং হন্দক্তি মসি ওরিসাগী প্রভু জগন্নাথকী শেংলবা খুয়াখাদা পাঙথোক্কনি। মালেমগী মফম শিন্বা থুংবদগী মরূপশিংনা থৌরম অসিদা তিল্লরগনি। মসিগী মথক্তা, জনুৱারী ১৩দগী ফেব্রুৱরী ২৬ ফাওবদা, প্রয়াগরাজতা নুমিৎ ৪৫নি চুপ্না মহা কুম্ভ মেলা পাঙথোক্কনি। মতমসিদা থৌরম কয়া পরেং লেংদুনা লৈরে, অমসুং ভারত্তা লাকপগী চপ চারবা মতম্নি। ঐনা ময়ামবু, অদোমগী অঙাংশিংগা লোয়ননা লাকপিনবা, অমদি অদোমগী নাইজেরিয়ন মরূপশিংসু ভারতকী স্পিরিত এক্সপিরিএন্স লাক্নবা হায়নবা পুক্নিং থৌগৎচরি। প্রয়াগরাজ অসি অয়োধ্যাগা নক্না লৈ অমসুং কাসীসু পংলাপ লাপত্রে। করিগুম্বা অদোম্না কুম্ভ মেলাদা লাক্লবদি, হায়রিবা শেংলবা খুভমশিং অসি য়েংবা কাউবিগনু। নৌনা শাগৎখিবা কাসিগী বিস্বানাথ ধাম পুক্নিং হুনা ফজৈ। অদুগা অয়োধ্যাদা, চহি ৫০০গী মতুংদা, প্রভু শ্রী রামদা কত্থোকচবা নীংথিরবা লাইশঙ অমসু শারে। অদোম্না মসি য়েংবিয়ু, অমদি অদোমগী অঙাংশিংসু পুবিরকউ। প্রভাসী ভার্তিয় দিবসতগী হৌরগা, মহা কুম্ভ অমসুং রিপব্লিক দে ফাওবগী খোঙচৎ অসি অদোমগীদমক্তা তোপ তোপ্পা ‘ত্রিবেনী’ অমা ওইগনি। মসি ভারতকী খোঙজেল অমসুং ইনাক খুল্লবা পারী পুরীগী লনগা মরী শাগৎনবগী তোপ তোপ্পা তাঞ্জা অমা অমনি। ময়াম মরক্তগী মীওই কয়াদি ভারত্তা হান্না লাকখ্রে হায়বা ঐ খঙই, কয়ারক হন্না লাক্লম্লগনি। অদুবু ঐগী ৱাফমসি লৌশিনবিয়ু; খোঙচৎ অসিনা কাউঙম্লরোইদবা নীংশিং মমি অমসুং য়াম্না নুংঙাইবা মহাও অমা পীগনি। ঙরাং ঐনা মফমসিদা য়ৌরকপদগী হৌরগা, অদোম্না তরাম তরাম্না ওকপিবা, মথুম মরাং হৌবগা লোয়ননা উৎপিরিবা মীনুংশি য়াম্না মমল লৈ। অদোমগা উনবা ফংজবা ঐগী লাইবক ফবনি, অমদি মসিগীদমক ঐনা ময়ামগী লমন তোনশিঞ্জরে।
ময়াম ঐগা লোয়ননা লাউবিয়ু –
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
ময়ামবু ঙমখৈ লৈতনা থাগৎচরি!
