প্রধান মন্ত্রীনা মপান লৈবাকশিংদা লৈবা ভারতমচাশিংগী অখন্নবা তুরিস্ত ত্রেন অমা, প্রভাসি ভারতিয় এক্সপ্রেস লমথাখ্রে
প্রাভাসি ভারতিয় দিবস অসি ভারত অমসুং মসিগী মপান লৈবাকশিংদা লৈরিবা ভারতমচাশিংগী মরক্ত লৈনবা মরী চেৎশীনহন্নবা ইন্সতিতুসন অমনি: প্রধান মন্ত্রীতুংদা লাক্কদৌরিবা মতম অসি লাল নত্তে, মসি বুদ্ধদা লৈরে: প্রধান মন্ত্রীঐখোয় গনতন্ত্রগী মমা ওইবা খক নত্তনা; গনতন্ত্র অসি ঐখোয়গী পুন্সিগী তৎন-থানবা য়াদ্রবা শরুক অমনি: প্রধান মন্ত্রী২১শুবা চহিচাগী ভারত অসি শিংথানিঙাই ওইবা খোঙচৎ অমদা অমসুং পাক-চাউনা চাউখৎলি: প্রধান মন্ত্রীঙসি ভারতনা লৈবাক অসিগী মশাগী থবক ফগৎহনবা খক নত্তনা গ্লোবেল সাউথকী খোল্লাউশিং য়াম্না কন্না লাউরে: প্রধান মন্ত্রীমালেমগী দরকার ওইবা হৈথোই-শিংথোইবা মীওইশিং ফংহন্নবা ভারতকী থৌনা লৈরে: প্রধান মন্ত্রীমখোয়না লৈরিবা মফমশিংগী মতাংদা খন্নদনা, অৱাবা তারবা মতমদা মপান লৈবাকশিংদা লৈরিবা ঐখোয়গী মীয়ামগী মতেং পাংবা অসি ঐখোয়গী থৌদাংনি হায়না ঐখোয়না খল্লি: প্রধান মন্ত্রীওরিসাগী গভর্নর দোক্তর হরি বাবু, ঐখোয়গী মীয়াম্না পাম্নবা মুখ্য মন্ত্রী মোহন চরন মানঝী, ঐগী কেন্দ্রগী মন্ত্রী মন্দলগী মরূপ এস জয়শঙ্কর, জুঅল ওরাও, ধরমেন্দ্র প্রধান, অস্বিনি বৈষ্ণব, সোভা করন্দলাজে, কির্তি বর্ধন সিংহ, পবিত্র মার্ঘেরিতা, ওরিসা লৈঙাক্কী উপ-মুখ্য মন্ত্রী কনক বর্ধন সিংহদিও, প্রবাতি পরিদা, অতৈ মন্ত্রীশিং, MPs অমদি MLAs, মালেমগী মফম পুম্নমক্তগী লেঙবিরক্লিবা ভারত ইমাগী মপারী মমোম পুম্নমক!
ইবেম্মর অমদি ইবুংঙোশিং! প্রভু জগন্নাধ অমদি প্রভু লিঙ্গরাজকী শেংলবা লমদম অসিদা, ঐনা মালেম পুম্বদগী লেঙবিরক্লিবা ভারত মচাশিংবু তরাম্না ওকচরি। তরাম্না ওকপগী ঈশৈ শকখিবতা ঙায়রি, হায়রিবা তরাম্না ওকপগী ঈশৈ অসি ভারত মচা লৈবা মালেমগী মফম খুদিংদা তুংদসু শক্নরক্কনি হায়না ঐনা থাজৈ। ময়ামগী মফমদা নুংঙাইবা ফোঙদোকচরি। অদোমগী কাঙবুনা NRI অমা ওইবগী ৱাখল্লোন অদু য়াম্না ফজবা মওংদা ফোঙদোকপিরি, মসিগীদমক ময়ামগী মফমদা নুংঙাইবা ফোঙদোকচরি।
মরূপশিং,
ঐখোয়না প্রবাসি ভারতিয় দিবস অসিগী অথোয়বা মীথুংগী ৱারোল তামিন্নখ্রে। ত্রিনিদাদ এন্দ তোবেগোগী রাস্ত্রপতী, হর এক্সেলেন্সী খৃস্তিন কঙ্গালুগী ভিদিও পাউজেলনা ঐখোয় পুম্নমক্কী মফমদা ইথিল অমা পীখি। মহাক্নসু ভারতকী খোঙজেলগী মরমদা ৱা ঙাংখি। ঐনা মহাকপু মাগী তরাম তরাম্বা অমদি মীনুংশিনা থল্লবা ৱাহৈশিংগীদমক থাগৎচরি।
মরূপশিং,
হৌজিক অসি ভারতকী ওইনা মচু মমেন্না থল্লবা কুমহৈ হরাও অমসুং মী তিনবা মতম্নি। নুমিৎ খরনিগী মনুংদা প্রয়াগরাজতা মহাকুম্ভ হৌরগনি। মকর সঙ্ক্রান্তি, লোহরি, পোঙ্গল, অমদি মাঘ বিহুগী কুমহৈশিংসু মথং মথং লাক্লগনি। মফম খুদিংগী হরাও নুংঙাইবগী ইহুলনা থল্লি। মখা তানা, ১৯১৫ গী নুমিৎ অসিমক্তদনি মহাত্মা গান্ধীজিনা মপান লমদা মতম কুইনা লৈরুরবা মতুংদা ভারত্তা হল্লকখিবা। অসিগুম্লবা মতম অমদা অদোম্না ভারত্তা লেঙবিরকপা অসিনা কুমহৈ হরাওগী ইহুল অসিদা অনৌবা ইনোৎ অমা হাপ্লরি। প্রবাসি ভারতিয় দিবসগী হন্দক্কী ইদিসন অসি অতোপ্পা মরম অমগীদমকসু অখন্নবা থৌরম অমা ওইরি। ঐখোয়না মফমসিদা অতল বিহারি বাজপায়ীজীগী চহি চাম্ম শুবা মপোক কুমওন থৌরমগী নুমিৎ খরনিগী তুংদা পুল্লরি। মহাক্না মঙলম্বা মঙলান্না থৌরম অসি ওইরকপদা মরুওইবা থৌদাং লৌখি। মসি ভারত অমসুং মসিগী মপান্দা লৈখ্রবা মীওইশিংগী মরক্তা লৈরিবা মরী হেন্না চেৎশিলহন্নবা ইন্সতিত্যুসন অমা ওইরে। ঐখোয় পুন্না ভারত, ভারত মচা ওইবগী মতৌ, ঐখোয়গী নাৎ, ঐখোয়গী খোঙজেল, অমদি ঐখোয়গী লু-তোংদা চেল্লিবা হৌরকফমগী ইথিলবু হরাও তয়াম্না পাঙথোকমিন্নরি।
মরূপশিং,
অদোম্না ঙসি লেঙশিনবিরিবা ওরিসাগী অথোয়বা লমদম অসি ভারতকী ইনাক খুল্লবা পারী পুরীগী লনগী শক্তম অমসু ওইরিবনি। ওরিসানা ঐখোয়গী পারী পুরীগী লনশিংবু খোঙথাঙ খুদিংদা উৎলি। উদয়গিরি-খন্দগিরিগী পুৱারীগা শাগোন্নরিবা শুরুংশিং ওইরবসু, কোনার্ক্কী সন তেম্পল, তাম্রলিপ্তি, মনিকপত্না অমদি পলুরগী থায়নগী মতমগী হিথাংফমশিং ওইরবসু, পুম্নমক চাউথোকচনিংঙাই ঙাক্তনি। চহি চা কয়াগী মমাঙদগীসু, ওরিসাদগী ঐখোয়গী লল্লোন ইতিক তৌবা মীওইশিংনা সমুদ্রদা অশাংবা খোঙচৎশিং চত্তুনা বালি, সুমত্রা অমদি জাভানচিংবা মফমশিংদা চৎনরম্মি। হায়রিবা খোঙচৎশিং অদুবু নীংশিংদুনা ঙসিসু ওরিসাদা বালি জাত্রা পাঙথোক্লি। ওরিসাগী ধৌলি হায়রিবা মফম অসিসু ইংয়-তপ্পগী অথোয়বা খুদম অমনি। মালেম অসিনা মখোয় মখোয়গী ঙমখৈশিং থাঙগী পাঙ্গলনা পাকথোক চাউথোক্নবা হোৎনরকখিবা মতমদা, ঐখোয়গী নিংথৌরেল অশোক্না মফমসিদা ইং তপ্পগী লম্বীদা চৎনবা লেপখি। অসিগুম্বা ঐখোয়গী পারী পুরীগী লনশিং অসিগী মতিক্ননি ঙসি ভারতনা মালেম পুম্বদা লান্না তুংলমচৎ নত্তে, তুংলমচত্তি বুদ্ধদা লৈবনি হায়বা ঙমহল্লিবা।মরম অসিনা ময়ামবু ওরিসাগী লমদমসিদা তরাম্না ওকচবা ফংজবা অসি ঐগীদমক্তা য়াম্না অখন্নবা মীৎকুপ অমনি।
মরূপশিং,
ঐনা মতম পুম্বদা ভারতকী দাইস্পোরাশিংবু ভারতকী এম্বেসেদর ওইনা লৌদুনা লাক্লি। মালেম পুম্বদা অদোমগুম্বা কয়াগা উনবা, অদোমগা ৱারী ৱাতায় শান্নবা ফংবদা ঐ য়াম্না নুংঙাই। ঐনা ফংখিবা মীনুংশিশিং ঐ কাউবা ঙম্লোই। অদোম্না উৎপিখিবা মীনুংশি, অদোমগী থৌজাল মতম পুম্বদা ঐগা লোয়নদুনা লৈরি।
মরূপশিং,
ঙসি ঐনা ময়াম পুম্নমক্কী মফমদা লনাই ওইনা তৌবিমল খঙবা উৎচরি, ঐনা ময়ামবুসু থাগৎচরি। অদোম্না মরম ওইরগা ঐনা মালেমগী মাঙদা ঙক ৱাংনা থাঙ্গত্তুনা লেপ্পা ঙমহনবিবগীদমক অদোমবু থাগৎচরি। হৌখিবা চহি ১০ অসিদা, ঐনা মালেমগী লুচিংবা কয়া উনখ্রে। মালেমগী লুচিংবা খুদিংমক্না মখোয়গী লৈবাক্তা লৈরিবা ভারতকী দাইস্পোরা পুম্নমকপু কল্লকচৈ। মসিগী অচৌবা মরম অমদি অদোম্না মখোয়গী খুন্নাইদা হাপ্লিবা মমল অদুনি। ঐখোয় দিমোক্রেসীগী মমা ওইবখক্তা নত্তনা, দিমোক্রেসী হায়বসিনা ঐখোয়গী পুন্সি, ঐখোয়গী হিংবগী মওং মতৌগী শরুক অমা ওইদুনা লাক্লবনি। ঐখোয়দা খেন্নবা কয়াগী মরমদা অমুক তাকপি তম্বিবগী মথৌ তাদ্রে মরমদি ঐখোয়গী পুন্সি অসি খেন্নবশিং অদুনা থৌদুনা পুরক্লবা পুন্সিনি। মরম অসিনা ভারত মচাশিংনা মখোয়না চৎলুবা মফম অমা হেক্তগী খুন্নাইদুদা তিল্লুবা মতমদা ঐখোয়না মফমদুগী চৎনবী অমদি নাৎপু ইকায়খুম্নৈ। ঐখোয়না পুকচেল শেংনা লৈবাক অদুগী, খুন্নাই অদুগী থৌগল তৌরি, মফমদুগী চাওখৎপা অমদি নুংঙাই য়াইফবদা থৌদাং য়ারি। পুম্নমক অসিগা লোয়ননা ঐখোয়গী থম্মোয়গী মীহুলদা ভারত হায়বসিনা মরোল ওইদুনা হুল্লি। ঐখোয়না ভারতকী নুংঙাইবা খুদিংদা হরাওরি অমদি ভারতকী মায় পাকপা খুদিংদা হরাও তয়াম্বা ফোঙদোক্লি।
মরূপশিং,
২১শুবা চহিচাগী ভারতনা মাঙদা চঙশিল্লিবা খোঙজেল, ভারত্তা ঙসি পায়খৎলিবা চাওখৎ থৌরাংগী পাক চাউবা হান্না খন্নরুদবা মওংদনি। শুপ্নতগী চহি ১০ অসিদা ভারতনা মীওই মিলিয়ন ২৫০ বু লায়রবগী লৈয়াৎনুংদগী পুথোরক্লি। শুপ্নতগী চহি ১০ অসিদা ভারতনা মালেমগী ১০শুবা খ্বায়দগী চাউবা শেন্মিৎলোন ওইরম্বদগী ৫শুবা খ্বায়দগী চাউবা শেন্মিৎলোন ওইরক্লি। ভারতনা মালেমগী অহুমশুবা খ্বায়দগী চাউবা শেন্মিৎলোন ওইরক্কদবা নুমিৎ অদু কুইদ্রে। ঙসি ভারতনা মায় পাক্লকপা অসি মালেমসিনা য়েংলি। ঙসি, ভারতকী চন্দ্রয়ান্না সিব-শক্তি পোইন্ত য়ৌবা মতমদা ঐখোয় পুম্নমক্না চাউথোকচবা ফাওরি। ঙসি মালেম অসিনা দিজিতেল ইন্দিয়াগী মতিক্তা অঙকপা পোক্নরকপা মতমদা ঐখোয় পুম্নমক্তা চাউথোকচবা ফাওরি। ঙসি ভারতনা সেক্তর খুদিংদা মাঙদা পন্দোল ৱাংনা লাম্বা ফংদুনা চঙশিল্লি। রিনিউএবল ইনর্জী, এভিএসন ইকোসিস্তেম, ইলেক্ত্রিক মোবিলিতী, পাক চাউরবা মেত্রো নেতৱর্ক, নৎত্রগা বুলেত ত্রেন প্রোজেক্ত ওইরবসু, ভারতকী খুমাঙ চাওশিনবগী খোঙচেলশিংনা রেকোর্দ পুম্নমক থুগাইরি। ঙসি, ভারতনা মেদ ইন ইন্দিয়া ফাইতর জেত, ত্রান্সপোর্ত এয়রক্রাফ্ত পুথোক্লি, অমদি অদোম্না মেদ ইন ইন্দিয়া প্লেন অমদা তোংদুনা NRI নুমিৎ শরুক য়াবা লাক্কদবা নুমিৎ অদু লাপত্রে।
মরূপশিং,
ভারতকী তানফংলিবশিং, ভারত্তা ঙসি উরিবা মতিংশিং অসিনা ভারতনা লৌরিবা মালেমগী ওইবা থৌদাং হেনগৎহল্লি। ঙসি মালেম অসিনা ভারতনা হায়রকপা ৱা চেকশিন্না তারি। ঙসিগী ভারত মাগী ৱাফমশিং মপাঙ্গল কন্না থম্বতা নত্তনা মালেমগী খাথংবা শরুক্কী খোঞ্জেলসু মতিং লৈনা ফুদোকহল্লি। ভারতনা অফ্রিকান য়ুনিয়নবু G-20 গী পর্মেনেন্ত মেম্বর অমা ওইহন্নবা ৱাফম হৌদোকপা মতমদা, মেম্বর পুম্নমক্না মদুদা শৌগৎলকখি। মীওইবা খুন্নাইনা মাঙদা হায়বা ৱাখল্লোনগা লোয়ননা ভারতনা মাগী মালেমগী ওইবা থৌদাংশিং হেন্না পাকথোক চাউথোকহল্লি।
মরূপশিং,
ভারতকী হৈশিংবা ঙসিদি মালেম পুম্বদা শিংথানরি, ঙসি ঐখোয়গী প্রোফেস্নেলশিংনা মালেমগী খ্বায়দগী চাউবা কম্পেনীশিংগী খুত্থাঙদা মালেমগী ওইনা খুমাঙ চাওশিনবদা থৌদাং য়ারি। ভারতকী রাস্ত্রপতী, ইকায়খুম্নরবী দ্রৌপদী মুরমুনা হয়েং মীওই কয়াদা NRI মনাসু লান্থোক্কনি। ঐনা মনা ফংগদৌরিবা মীওই কয়াগী মফমদা য়াইফ পাউজেল পীজরি।
মরূপশিং,
লাক্কদৌরিবা দেকেদ কয়া, ভারতনা মালেমগী খ্বায়দগী নহা ওইবা অমদি হৈথোই শিংথোইবা মীশিং লৈবা লৈবাক ওইগদৌরি। মালেমগী খ্বায়দগী চাউবা স্কিল দিমান্দ ফংহনগদৌরিবসি ভারতনি। হৌজিক মালেমগী লৈবাক কয়ানা ভারতকী হৈথোই শিংথোইরবা নহাশিংবু খুৎ অনি তিংথোক্তুনা তরাম্না ওক্নবা অদোম্না উবিরম্লগনি। ভারত লৈঙাক্নসু মপান লৈবাক্তা চৎখিবা ভারত মচা খুদিংমক খ্বায়দগী ফবা স্কিলশিংগা লোয়ননা চৎহন্নবা হোৎনরি। মরম অসিনা ঐখোয়না লেপ্পা লৈতনা, ঐখোয়গী নহাশিংবু স্কিল, রি-স্কিল, অমদি অপ-স্কিল তৌরি।
মরূপশিং,
ঐখোয়না অদোমগী নুংঙাইবা অমদি খুদোংচাবদা মরুওইবা মীৎয়েঙ থম্লি। অদোম্না শাফনা অমদি নুংঙাইনা লৈবনা ঐখোয়গী মরুওইবা মীৎয়েঙ ওইরি। লানফমদা মতমদা, মফম অমা হেক্তদা লৈরবসু ঐখোয়গী দাইস্পোরাশিংগী মতেঙ পাংবনা ঐখোয়গী থৌদাংনি খল্লি। মসিনা ঙসি ভারতকী ফোরেন পোলিসীগী লমজিং ওইরিবা পথাপ্নি। হৌখিদা দেকেদ অসিদা, মালেম পুম্বদা লৈরিবা ঐখোয়গী এম্বেসী অমদি ওফিসশিং মীৎশিং নাশিংনা অমদি ইচঙ-থৌনা লৈরি।
মরূপশিং,
মমাঙদা লৈবাক কয়াদা কন্সুলর ফেসিলিতী ফংনবগীদমক লম শাংনা চৎনরম্মি। মখোয়না মতেঙ অমা লৌনবা হোৎনবদা নুমিৎ কয়া ঙাইনরম্মি। হৌজিক্তি, হায়রিবা ৱাফমশিং অসিগী পাম্বৈ পুরক্লে। হৌখিবা চহি অনিখকসিদা, এম্বেসী অমদি কোন্সুলেত তরামির হাংদোকখ্রে। OCI কার্দশিংগী স্কোপসু পাকথোক চাউথোকহল্লে। মসি মৌরিসিয়সকী ৭শুবা মীরোল অমদি সুরিনেম মার্তিনিক অমদি গ্বাদেলুপকী ৬শুবা মীরোলগী PIO শিংদা ফংহল্লে।
মরূপশিং,
ভারতকী দাইস্পোরাশিংগী পুৱারী মালেম শিনবা থুংনা শন্দোক্লি, লৈবাকশিং অদুদা মখোয়না য়ৌশিল্লুবগী অমদি মখোয়গী ফিরাল হাইরুবগী ৱারীশিং ভারতকী পারী পুরীগী লনগী মরুওইবা শরুক্নি। অদোমগী মফমদা ময়ামদা লীথোক্কদবা, উত্থোক্কদবা অমদি চেকশিন্না থমগদবা নুংঙাইরবা অমদি পুক্নিং থৌগৎনিংঙাই ওইরবা ৱারী কয়া লৈরমগনি। মসিনা ঐখোয়গী অপুনবা লিগেসী অমদি হেরিতেজশিংনি। নুমিৎ খরনিগী মমাঙদা, ঐনা মাইন্দফুলনেস হায়রিবা মরী লৈনবা হীরম অসিদা নৈনখি। চহিচা খরগী মমাঙদা, গুজরাত্তগী ইমুং কয়া ওমান্দা হোংখি। মখোয়গী চহি ২৫০গী খোঙচৎকী ৱারীশিং য়াম্না পুক্নিং থৌগৎনিংঙাইগী মশক্নি। মফমসিদা একজিবিসন অমসু উৎলি। মসিনা হায়রিবা ফুরুপ অদুগা মরী লৈনবা চে-চাং লিশিং কয়া দিজিতাইজ তৌদুনা উৎলি। মখোয়গা লোয়ননা ‘ওরেল হিস্তরী প্রোজেক্ত’ অমসু তৌখি। অতোপ্পা লোন্দা অমদা হায়রবদা, ফুরুপ অদুগী অহল ওইরবা মীওইশিংনা মখোয়না থেংনরকপশিং পাউদম্লকপনি। হায়রিবা ইমুং কয়াসিনা ঙসিসু ঐখোয়গী ইরক্তা তিল্লরিবসিদা ঐ নুংঙাইবা ফাওই।
মরূপশিং,
অসুম্না তোঙান তোঙানবা লৈবাকশিংদা লৈখ্রবা দাইস্পোরাশিংগা লোয়ননা থৌরাং কয়া পায়খৎকদবনি। খুদম অমা ওইনা, ঐখোয়গী “গিরমিতিয়া” ইচিল ইনাওশিং পন্বা য়াই। ঐখোয়গী গিরমিতিয়া মীওইশিংগী দেতাবেজ অমা শেম্বা য়াইনা। মখোয় ভারতকী করম্বা খুঙ্গং অমদি সহরদগীনো হায়না খঙদোকপা য়াই। মখোয়না লৈরম্বা মফমশিং খঙদোকপসু য়াই। মখোয়গী পুন্সি কমদৌরম্মি, কমদৌনা মখোয়না শিংনবশিংবু খুদোংচাবা ওন্থোকখি হায়বসিদা ফিল্ম অমা পুথোকপা, নৎত্রগা দোকুমেন্তরী অমা শেম্বা য়াই। গিরমিতিয়া লিগেসীগী মরমদা থিজিনবা, য়ুনিভর্সিতী অমদা চেয়র অমা লিংখৎপা, মরক মরক্তা চাং নাইনা ৱর্ল্দ গিরমিতিয়া কন্ফরেন্স অমা পাঙথোকপা য়াই। ঐনা ঐগী কাঙবুদা মসিগী মরমদা করি তৌবা য়াই অমদি তৌবা য়াবশিং পায়খৎনবা ৱাফম থমজগে।
মরূপশিং,
ঙসি ভারতকী চাওখৎপা অমদি হেরিতেজ অসি হায়রিবা লাইৱাসিদা য়ুম্ফম ওইবনি। G-20 মনুংদা, ঐখোয়না ভারতকী খেন্নবা মতৌশিং হকথেংননা থেংননবা ভারতকী কাচিন কোয়া শিন-থুংনা মীফমশিং পাঙথোকখি। কাসি-তামিল সঙ্গম, কাসি-তেলুগু সঙ্গম, সৌরাস্ত্র-তামিল সঙ্গম্নচিংবা থৌরমশিং পাঙথোকপদা ঐখোয় চাউথোকচবা ফাওই। ঙসিদগী নুমিৎ খরনিগী মমাঙদা সন্ত থিরুবল্লুবর নুমিৎ তারি। ঐখোয়গী লৈঙাক্না সন্ত থুরুবল্লুবরগী ৱাখল্লোনশিং শন্দোক্নবা থিরুবল্লুবর কলচর সেন্তর অমা লিংখৎনবা ফিরেপ লৌরে। অসিগুম্বা সেন্তর অমা সিঙ্গাপুরদা থবক হৌখ্রে। US কী য়ুনিভর্সিতী ওফ হ্যুস্তন্দা থিরুবল্লুবর চেয়র অমসু লিংখৎখ্রে। পুম্নমক অসি তামিল লোল, তামিল হেরিতেজ, অমদি ভারতকী হেরিতেজপু মালেম শিন-থুংনা শন্দোক্নবা পায়খৎপনি।
মরূপশিং,
ঐখোয়গী মফমশিং ভারতকী হেরিতেজকা মরী শম্নহন্নবা থবক কয়াসু ঐখোয়না পায়খৎলে। খুদম ওইনা, প্রভু রাম অমসুং সিতাগা মরী লৈনবা মফমশিং চৎননবা অখন্নবা রামায়ন এক্সপ্রেস অমা লৈরে। ভারত গৌরব ত্রেন্নসু লৈবাকসিগী মরুওইবা হেরিতেজকী মফমশিং শম্নহল্লি। ঐখোয়না লৈবাকসিগী অচৌবা হেরিতেজ সেন্তরশিংবু ঐখোয়গী সেমি-হায় স্পীদ, বন্দে ভারত ত্রেন্না শম্নহল্লে। মতম খরগী মমাঙদা, ঐনা অখন্নবা NRI এক্সপ্রেস ত্রেন অমা লমথানবা খুদোংচাবা ফংখি। মসিদা মীওই ১৫০ রোম্না লমকোয়ফম অমদি লাইনিংগা মরী লৈনবা লমথুংফম তরাতরেৎ চৎকনি। অদোম্না চৎপা য়াবা মফম কয়া অমসু ওরিসাদা লৈ। প্রয়াগরাজতা মহাকুম্ভ হৌগদৌরে। খুদোংচাবা অসি পুন্সিদা হঞ্জিন হঞ্জিন লাকপা নত্তে। মফম অদুদসু শোয়দনা চৎপিয়ু।
মরূপশিং,
ভারতনা ১৯৪৭ দা নীংতম্বা ফংখি অমদি ঐখোয়গী দাইস্পোরাশিংনা মসিদা অচৌবা থৌদাং লৌখি। মখোয়না মপান লৈবাক্তা লৈরগা ভারতকী নীংতম্বা পুরকপদা মরুওইবা থৌদাং লৌখি। হৌজিক ঐখোয়দা ২০৪৭গী পান্দম অমা লৈরে। ঐখোয়না ভারতপু চাওখৎপা লৈবাক অমা ওইহন্বা তাই। অদোম্না হৌজিকসু ভারতনা খুমাঙ চাওশিনবদা শিংথানিংঙাই ওইবা থৌদাং য়ারি। অদোম্না কন্না হোৎনবা অদুননি ঙসি ভারতনা মপান লৈবাক্তগী শেল থাজিল্লকপগী লমদা মালেমগী মকোক থোংবা লৈবাক ওইবা ঙম্লিবা। হৌজিক ঐখোয় মখা তানা ৱাখল খন্থবা তাই। অদোম্না অতোপ্পা লৈবাকশিংদা তৌবগুম্না ভারত্তসু শেল থাদবিয়ু। ঐখোয়গী GIFT CITY ইকোসিস্তেম্না অদোমগী শেলথুমগী সর্ভিস অমদি ইনভেস্তমেন্তকা মরী লৈনবা মথৌ তাবশিং ফংহনবা ঙমগনি। অদোম্না মসিগী খুদোংচাবা লৌবা অমদি চাওখৎপা ভারত অমা ওইহন্নবগী খোঙচত্তা মপাঙ্গল হেন্না হাপ্পা য়াই। অদোম্না হোৎনরকপা খুদিংনা ভারতবু মপাঙ্গল কলহনগদৌরিবনি অমদি চাওখৎ খোঙচৎ অসিদা মতেঙ পাংগদৌরিবনি। অসুম্না তৌবা য়াবা সেক্তর অমা হায়রগদি হেরিতেজ তুরিজম অসিনি। ভারত অসি হৌজিক মাগী অচৌবা মেত্রো সিতীশিংগীদমক খঙনৈ। অদুবু ভারত অসি অসিগুম্বা অচৌবা সহরশিংসিনা লোইবা নত্তে। ভারতকী মরমদা ৱাফম কয়াদি তিয়র-২ অমদি তিয়র-৩ সহর, খুঙ্গংশিংদা লৈরিবনি। মফমশিংসিদা ভারতকী হেরিতেজকী শক্তমশিং লৈ। মালেম অসিনা অসিগুম্বা হেরিতেজশিং অসিগী খুত্থাঙদা ঐখোয়গা মরী শম্নহন্বা তাই। অদোম্না অদোমগী অঙাংশিং ভারতকী অপীকপা সহর অমসুং খুঙ্গংশিংদা পুবিবা য়াই। অদুগা হল্লগা থেংনরকপশিং অদোমূগী মরুপ মপাংশিংদা পাউদম্বিয়ু। অদুগা ঐনা ময়ামদা হায়জনিংবদি অদোম্না মথঙ ভারত্তা লাকপা মতমদা ভারত্তগী হৌখিবা নত্তবা য়ামদ্রবদা মরুপ মঙাদি পুবিরকউ। অদোম্না লৈরিবা মফমশিংদুদা লৈবা অদোমগী মরুপ মপাংশিংদা ভারত্তা লাক্ননিংনবা অমদি ভারতপু য়েংনিংনবা পুক্নিং থৌগৎপিয়ু।
মরূপশিং,
ঐনা নহা ওইরিবা মরুপশিংগী মফমদা হায়জনিংবা অমসু লৈ। অদোম্না হেক য়ারিবমখৈ নো ইন্দিয়া কুইজতা শরুক য়াবিয়ু। মসিনা ভারতকী মরমদা খঙবদা চাউনা মতেঙ ওইগনি। অদোম্না স্তদী ইন ইন্দিয়া প্রোগ্রামগী কান্নবসু লৌগদবনি। দাইস্পোরা নহাশিংনা ICCR স্কোলারসিপ স্কীমগী কান্নবা হেক ঙম্লিবমখৈ লৌবিগদবনি।
মরূপশিং,
অদোম্না লৈরিবা লৈবাক অদুগা লৈবা মীওইশিংগী মফমদা ভারতকী অশেংবা পুৱারী পাউদম্নবা অদোম্না থৌদাং লৌবিগদবনি। অদোম্না লৈরিবা লৈবাক্তুগী ঙসিগী মীরোলশিংনা ঐখোয়গী নুংঙাই য়াইফবা, মীনাই নাইথাংগী শাংলবা মতম অমদি অৱা অনাগী মতমগী মরমদা খঙবা নত্তে। অদোম্না মালেমদা ভারতকী অশেঙবা পুৱারী পাউদম্বা য়াই।
মরূপশিং,
ঙসি ভারতপু বিস্ব-বন্ধু হায়না খঙনরি। হায়রিবা মালেমগী মরী অসিবু হেন্না চেৎশিলহন্নবা অদোম্না মখা তানা হোৎনগদবনি। হৌজিক অদোম্না লৈরিবা লৈবাক্তুদা মনা লান্থোকপগী থৌরম খরা হেক্তা হৌবা য়াই। মনাশিং অদু অদোম্না লৈরুরিবা লৈবাক্তুগী মীওইশিংগীদমক ওইগদবনি। মফমদুদা লৈবা মশক নাইবা, লোয়নসিল্লোনগী লমদা থবক তৌবা, কলা অমদি খুৎশা হৈবগী লমদা, ফিল্ম অমদি থিএতরগী লমদা লৈবা, সেক্তর খুদিংদা মায় পাক্লবা মীওইশিং কৌদুনা ভারতকী দাইস্পোরাশিংগী মায়কৈদগী মনা লান্থোকপা য়াই। মদুগী পাউ ঐঙোন্দা পীবিরকউ। ভারতকী এম্বেসী, কোন্সুলেতনা অদোমদা মতেঙ পাংগনি। মসিনা লৈবাক অদুগী মীওইশিংগা অদোমগা লৈনরিবা মরী হেন্না চেৎশিলহনগনি, অমদি পুক্নিংগী ওইবা মরীসু হেনগৎহনগনি।
মরূপশিং,
অদোম্না ভারত্তা পুথোকপা পোৎলমশিং মালেমদা শন্দোকপদা অচৌবা থৌদাং অমসু লৌরি। অদোম্না ভারত্তা পুথোকচবা চীঞ্জাক্কী পেকেত নৎত্রগা ফিরোলনচিংবা লৈবিয়ু। করিগুম্বা পোৎলম খরা অদোমগী লৈবাক্তা ফংদ্রবদি ওনলাইন্দা ওর্দর তৌবিয়ু। অদোমগী চাকখুম, অদোমগু দ্রোইং রুম, অদোমগী খুদোলদা মেদ ইন ইন্দিয়া পোত্থোকশিং য়াওহন্বিয়ু। মসিনা চাওখৎপা ভারত অমা শেমগৎপদা অদোমগী অচৌবা থৌদাং ওইগদৌরিবনি।
মরূপশিং,
ঐনা হায়জগদবা ৱাফম অমদি ইমা অমদি মালেম ইমাগা মরী লৈনৈ। নুমিৎ খরনিগী মমাঙদা, ঐ গুয়ানাদা চৎখি। মফমদুগী রাস্ত্রপতীগা লোয়ননা ঐনা মালেম ইমাদা কত্থোকচবা উ চারাশিং থাবগী থৌরম অমদা শরুক য়ামিন্নখি। ভারতকী মীওই কয়ানা থবক অসি পায়খৎলি। অদোমসু, অদোম্না লৈরুরিবা লৈবাক অদুদা অদোমগী ইমাগী মিংদা উ পাম্বী অমমম থাবিয়ু। অদোম্না মফমসিদগী হনখিবা মতমদা চাওখৎপা ভারত অমগী ফিরেপকা লোয়ননা হনখিগনি হায়না ঐনা থাজৈ। ঐখোয় পুন্না চাওখৎপা ভারত অমা শেমগৎমিন্নসি। কুম ২০২৫ অসিনা ময়াম পুম্নমক্কী মফমদা তৌরুবা খুদিংদা মায় পাকপা, তিঞ্জং কায়জঙদবা, লন-থুম মরাং কায়বা, নুংঙাই য়াইফবা পুন্সি অমমম ওইবিয়ু হায়না য়াইফরোল পীজবগা লোয়ননা অমুক্কা হন্না ভারত্তা তরাম্না ওকচরি। নুংঙাইবা ফোঙদোকচরি।
য়াইফ-পাউজেল পীজরি, হন্না হন্না থাগৎচরি।
