সি.আই.আই.গী প্রসিদেন্ত শ্রী সঞ্জীব পুরীজী, মফম অসিদা লৈরিবা ইন্দস্ত্রীগী শক্নাইরবা মরুপশিং, মকোক থোংবা দিপ্লোমেৎশিং, লৈবাক অসিগী তোঙান তোঙানবা মফমশিংদগী ভি.সি.গী থোংদা ঐখোয়গী কন্নেক্ত তৌরিবা ইন্দস্ত্রী অমসুং বিজিনেস ৱর্ল্দদগী মরুপ পুম্নমক, অতৈ দিগনিতরীশিং, নুপী অমদি নুপাশিং!
করিগুম্বা নহারোলশিংগী মীফম অমা পাংথোক্লবদি ঐহাক্না অসুম্না হৌদোক্লমগনি- জোশ অসি করম তৌরিবগে? অদুবু মসিসু অচুম্বা মফম অমনি হায়না খল্লি। অমসুং করিগুম্বা ঐগী লৈবাক অসিনা পুন্সিগী লম খুদিংমক্তা স্তেবিলিতী অমা ফংলবদি, ঐগী লৈবাক অসি শোত্থদুনা লৈবা ঙম্লোই। থৌরম অসিদা অদোম্না ঐহাকপু কৌবিরকখিবগীদমক ঐহাক্না সি.আই.আই.বু থাগৎচরি। ঐহাক্না নীংশিংলি, লাইচৎ অসিগী মতমদা অদোম অমসুং ঐহাক্না খন্ন-নৈনখিবা অদু, অদোমগী মরক্তগী মীওই কয়া অমসু নীংশিংলমগনি। অমসুং খন্ন-নৈনবগী ময়াইদা লৈরিবা হীরমদি- অমুক হন্না গ্রোথ লৈহনবা, মসিগী মতাংদা ঐখোয়গী খন্ন-নৈনবগী য়ুম্ফম ওইরম্মি। অমসুং মদুগী মতুংদা ঐহাক্না অদোমদা হায়জখি মদুদি ভারত অসি য়াম্না থুনা চাউখৎপগী লম্বীদা চংশিল্লগনি। ঙসি ভারত অসি করম্বা থাক্তা লৈরিবগে? ঙসি ভারত অসি চাদা ৮গী খোঙজেল য়াংনা চাউখৎলি। ঙসি ঐখোয়না ভিকসিৎ ভারতকী মাইকৈদা চৎলিবা খোঙচৎকী মতাংদা খন্নরি। মসি সেন্তিমেন্তদা লাকপা অহোংবা খক্তা নত্তনা কনফিদেন্সতা লাকপা অহোংবগী মমি অমনি। ঙসি ভারতনা মালেমগী খ্বাইদগী চাউবা ৫শুবা ইকনোমী ওইবা ঙমলে অমসুং ৩শুবা মফমদা খোঙজেল য়াংনা খুমাং চাউশিল্লি। ঐনা হৌরকখিবা ফুরুপ অসি মীখল মমাংদা হায়খিবা ৱাফমশিং মীখল মতুংদা কাওখিবা মফম অদুদগীনি। অদুবু ফুরুপ অদুদা ঐনা একসেপ্সন অমা ওইরি অমসুং মরম অসিনা ঐহাক্না নখোয়দা অমুক হন্না নীংশিংলি মদুদি ঐগী অহুমশুবা তর্মদা লৈবাক অসিনা অহুমশুবা খ্বাইদগী চাউবা ইকনোমী ওইরগনি। ভারতনা অফবা খোঙথাংশিংগা লোয়ননা লেপ্পা লৈতনা মাংদা চংশিল্লি।
মরুপশিং,
২০১৪দা লৈবাক অসি শেবা তৌনবা ঐখোয়দা খুদোংচাবা পীখিবা মতম অদুদা, ঐখোয়গী সরকারনা ২০১৪দা শেমখিবা মতম অদুদা খ্বাইদগী চাউবা ৱাহং অসি করম্না ইকনোমী ত্রেক্তা পুরক্কনি হায়বা অসিনা ওইখি। মতম অদুদা লৈবাক অসি ফ্রেজাইল মাইব ইকনোমীগৌ মনুং চল্লমখি অমসুং লুপা করোর লাখ কয়াগী শেঞ্জা-থুমজবা অমসুং স্কেমগী থবকশিংনা থলমখি। সরকারনা হ্বাইৎ পেপর অমদা লৈবাক্কী মমাংদা ঐখোয়গী ইকনোমীগী ফীভম অদু পুথোকখি। ঐনা কুপথনা হায়ররোই। অদু নখোয়না শোইদনা খঙলমগনি। ঐখোয়না ভারত অমসুং ভারতকী ইন্দস্ত্রী অসি খুদোংচাদবা অসিদগী পুথোরক্তুনা ৱাংনা থাংগৎখি। নুমিৎ খরনিগী মমাংদা বজেৎ পুথোকখ্রে অমসুং নখোয়না শেম্বা অফবা দোক্যুমেন্ত অসি ঐহাক্না য়েংলমখি। অমসুং বজেৎ অসি পুথোরকপনা নখোয়না মসি নৈনবদা থবক চিল্লি অদুনা ঙসি ঐহাক্না নখোয়গী মাংদা বজেৎকা মরী লৈনবা ৱাফম খরা থমজনীংই।
মরুপশিং,
২০১৩-১৪দা, মমাংগী সরকারগী অরোইবা বজেৎ পুথোকখিবা মতম অদুদা, দা মনমোহন সিংহগী সরকার অসি লুপা করোর লাখ ১৬ ওইখি। ঙসি ঐখোয়গী সরকারদা মাগী বজেৎ অসি শরুক অহুম হেনগৎতুনা লুপা করোর লাখ ৪৮ ওইরে। রিসোর্স ইনভেস্তমেন্তকী খ্বাইদগী পোত্থোক পুথোকপা য়াবা মেদিয়ম অমা ওইনা শকখঙনরিবা কেপিতেল এক্সপেন্দিমেন্ত, অমসুং মাগী ফিগর অসি য়াম্না নুংঙাইবা অমনি। ২০০৪দা, অতলজীগী সরকার চৎখ্রবা মতুংদা, ২০০৪দা য়ু.পি.এ. সরকার হৌখি অমসুং য়ু.পি.এ. সরকারগী অহানবা বজেৎতা কেপিতেল এক্সপেন্দিচর অসি লুপা করোর ৯০,০০০ রোম ওইখি। চহি ১০ লৈঙাক পায়রম্লবা মতুংদা, হায়বদি, ২০১৪দা, য়ু.পি.এ. সরকারগী ১০শুবা চহিদা, কেপিতেল এক্সপেন্দিচরগী বজেৎ অসি লুপা করোর লাখ ২দা হেনগৎহনবা ঙমখি, হায়বদি লুপা করোর ৯০,০০০দগী লুপা করোর লাখ ২দা হেনগৎহনখি। অমসুং ঙসিদি কেপেক্স অসি লুপা করোর লাখ ১১ হেনখ্রে। হায়বদি, ২০০৪-২০১৪গী ১০শুবা চহিদা কেপেক্স অসি মওং অমদা শরুক অনি হেনগৎখি। অদুগা ঐখোয়গী সরকারদদি কেপেক্স অসি শরুক মঙা হেনগৎলে। অমসুং করিগুম্বা অদোম্না তোঙান তোঙানবা সেক্তরশিংদা য়েংবীরবদি, ভারতনা ঙসি সেক্তর খুদিংমক্কী ইকনোমীদা মতৌ করম্না মীৎয়েং থম্লিবা অদুগী অচুম্বা ৱাখল্লোন অমা অদোম্না ফংগনি। মমাংগী সরকারগী চহি ১০গা চাংদম্নবদা ঐখোয়গী সরকারনা রেলৱেজকী বজেৎ অসি শরুক ৮ হেনগৎহনখ্রে, হায়ৱেজকী বজেৎ অসি শরুক ৮ হেনগৎহনখ্রে, এগ্রিকলচরগী বজেৎ অসি শরুক ৪ হেনগৎহনখ্রে, অমসুং দিফেন্সকী বজেৎ অসি শরুক ২ হেনগৎহনখ্রে।
অমসুং মরুপশিং,
সেক্তর খুদিংমক্তা বজেৎকী রেকোর্দ হেনগৎলকপা অসি তেক্সতা রেকোর্দ ওইনা হন্থরবা মতুংদা ওইখ্রে। ২০১৪দা, এম.এস.এম.ই.শিংনা লুপা করোর ১ ফংলবদি লুপা করোর ১গী প্রিজুম্পতিব তেক্স পীবা মথৌ তাখি। হৌজিক্না লুপা করোর ৩ ফাওবগী ইনকম লৈবা এম.এস.এম.ই.শিংসু মসিগী কান্নবা লৌবা ঙম্লগনি। ২০১৪দা, এম.এস.এম.ই.শিংনা লুপা করোর ৫০ ফাওবগী শেন্দোই লৌবা মতমদা চাদা ৩০গী তেক্স পীবা মথৌ তাখি। ঙসিদি মসি চাদা ২২ ওইরে। ২০১৪দা, কম্পনীশিংনা ৩০%গী কোর্পোরেত তেক্স পীরম্মি, ঙসিদি হায়রিবা রেৎ অসি লুপা করোর ৪০০ ফাওবগী ইনকম লৈবা কম্পনীশিংগী ওইনা ২৫% ওইরে।
অমসুং মরুপশিং,
মসিদি বজেৎ এলোকেসন হেনগৎহনবা নত্ত্রগা তেক্স হন্থহনবা খক্তগী ওইদে। মসিসু অফবা লৈঙাক লৈঙাক্কী মতাংদনি। ঐহাক্না অদোমদা খুদম অমা পীজগে। হৌজিক, খুদম ওইনা, অরুম্বা ৱাৎপা মীওই অমা লৈ, অদুবু মহাক্কী হকচাং অসি অনাবা খরনা মরম ওইদুনা নোইবা হেনগৎলক্লি অমসুং মহাক্কী ফি-রোলশিংদি হান্নদগী হেন্না পীকশিল্লক্লি, অদুবু ঐখোয়না মহাকপু হকচাং ফনা লৈ হায়না কৌগদ্রা? ঐখোয়না মহাকপু মতিক চাবা মীওইনি হায়না লৌগদ্রা? মহাক্না য়াম্না হকচাং ফনা উবা য়াই অদুবু তশেংনমক্কীদি মহাক অদুক্কী মতিক শোল্লবনি। ২০১৪গী মমাংদা লৈরিবা বজেৎকী ফিভম অসিসু চপ মান্নৈ। মতম অদুদা, শেন্মিৎলোনগী ফিভম ফনা লৈ হায়বা উৎনবগীদমক বজেৎতা অচৌবা পাউজেলশিং পীখি। অদুবু অচুম্বা ৱাফমদি, বজেত্তা লাউথোকখিবা অদুসু গ্রাউন্দ মপুং ফানা থবক ওইনা পাংথোকখিদে। হায়রিবা মীওইশিং অসিনা ইনফ্রাস্ত্রকচরগীমদমক থম্লিবা শেনফম অসিসু মপুং ফানা শিজিন্নবা ঙমখিদে। মখোয়না মসি লাউথোকপা মতমদা, মখোয়না হেদলাইনশিং শেম্মী। শেয়র মার্কেত্তা খরা উবা ফংলমগনি। মমাংগী সরকারশিংনসু স্কিমশিং অসি মতম চানা লোইশিন্নবগীদমক অকনবা ৱাফম অমত্তা থমখিদে। ঐখোয়না চহি ১০দা ফিভম অসি হোংদোক্লে। অদোম পুম্নমক্না ঐখোয়গী সরকারনা ইনফ্রাস্ত্রকচর শেমগৎপগী খোঙজেল অমসুং পাক-চাউবগী মতাংদা উবা ফংলি। মসি মমাংদা অমুক্তা ওইখিদ্রি।
মরুপশিং,
ঙসি ঐখোয়না হিংলিবা মালেম অসি থাজদবা কয়াগা লোয়নরি। অদুগা অসিগুম্বা মালেম অমদা, ভারতগুম্বা চাউখৎপা অমসুং অচেৎপা ফিরেপ লৈবা অসিদি অখন্নবা অমনি। অসিগুম্বা মখলগী থাজবা লৈতবা মতম অসিদা ফাওবা, ভারতকী ফোরেন এক্সচেঞ্জ রিজর্বশিং অসি য়াম্না হেনগৎলক্লি। ঙসিদি, লৈবাক পুম্নমক্না অনেম্বা গ্রোথ নৎত্রগা অৱাংবা ইনফ্লেসনগা লান্থেংনরিঙৈদা, ভারত অসি অৱাংবা গ্রোথ অমসুং অনেম্বা ইনফ্লেসন লৈবা লৈবাক অমনি। অচৌবা লাইচৎ অমা থেংনখ্রবসু, ভারতকী ফিক্সেল প্রুদেন্স অসি মালেম পুম্বগীদমক্তা রোল মোদেল অমনি। মালেমগী গুদস অমসুং সর্বিসশিং পুথোক পুশিন তৌবদা ভারতকী শরুক অসি লেপ্তনা হেনগৎলক্লি। ঙসিদি মালেমগী চাউখৎ-থৌরাংদা ভারতকী শরুক অসি চাদা ১৬ ওইরে। অমসুং করিগুম্বা অদোম্না খঙলবদি, ভারতনা চাউখৎপা অসি হৌখিবা চহি ১০ অসিদা শেন্মিৎলোন শোকহনখিবা অৱাবা কয়া লৈরিঙৈদা মরক্তা ফংবা ঙমখি। মসি ঐখোয়গী মতমদসু খুদোংচাদবা অমনি। চহি ১০০গী মনুংদা খ্বাইদগী চাউবা লাইনা-লাইচৎ, মালেমগী তোঙান-তোঙানবা লৈবাকশিংদা লানগী ফিভম, ভারত্তা অচৌবা মহৌশাগী ওইবা অৱা-অনাশিং - করিগুম্বা মতমদা সাইক্লোন, করিগুম্বা মতমদা ঈচাউ, করিগুম্বা মতমদা য়ুহার হাবা । ঐখোয়না অৱাবা খুদিংমক মায়োক্নখি, অৱাবা খুদিংমক কোকহনখি। করিগুম্বা হায়রিবা অৱাবা অসি থোক্লমদ্রবদি, ভারত অসি ঙসি ওইরিবা ফিভম অসিদগী হেন্না ৱাংখৎলমগনি অমসুং ঐহাক্না মসি ঐহাক্কী থাজবা, ঐহাক্কী এক্সপরিয়েন্সকী মতুং ইন্না হায়জরি।
মরুপশিং,
জাতি অসিনা ভিকসিৎ ভারতকী ৱারেপশিংগা লোয়ননা মাংলোমদা চংশিল্লি। হৌখিবা চহি ১০দা মীওই করোর ২৫না লাইরবা কোকহনখ্রে। মহাক্না ইজ ওফ লিভিং হেনগৎনবা অমসুং পুন্সি মহিং হেনগৎহন্নবা সরকারনা হোৎনরি।
মরুপশিং,
ইন্দস্ত্রী ৪.০ স্তেন্দর্দশিংবু ৱাখলদা থমদুনা সরকারনা স্কিল দিবেলপমেন্ত অমসুং এমপ্লোইমেন্ততা য়াম্না মীৎয়েং চংলি। মুদ্রা য়োজনা, স্তার্ত-অপ ইন্দিয়া অমসুং স্তেন্দ অপ ইন্দিয়া কেম্পেন চত্থখি অমসুং মীওই করোর ৮ হেনবনা অনৌবা বিজিনেসশিং হৌখ্রে। ভারত অসি নহারোল লাখ কয়া থবক পীরিবা স্তার্তঅপ লাখ ১.৪০গী লমদমনি। চহি অসিগী বজেৎতা লুপা করোর লাখ ২গী পি.এম. পেকেজ লৈরে মসিনা নহারোল করোর ৪ হেনবদা কান্নবা ফংহল্লগনি। পি.এম. পেকেজ অসি হোলিস্তিস অমসুং কম্প্রিহেন্সিবা ওইবা অমনি। মসি এন্দ-তু-এন্দ সোলুসনশিংগা মরী লৈনৈ। পি.এম. পেকেজ অসিগী মখাদা লৈরিবা ভিজন অসি ময়েক শেংই। মসিনা ভারতকী মেন পৱার অমসুং পোত্থোকশিং অসি ক্বালিতী অমসুং ভেল্যুদা মালেমগী থাক্তা চাংদম্নবা ঙমহনবদা পান্দম থম্লি। নহারোলশিংগী হৈশিংবা অমসুং এক্সপোজর হেনগৎহন্নবা ইন্তর্নশিপ স্কিম হৌদোকখি। মসিনা মখোয়গী থবক ফংবগী খুদোংচাবসু হেনগৎহল্লগনি। মরম অসিনা সরকারনা ই.পি.এফ.ও.গী কন্ত্রিব্যুসনদা ইন্সেন্তিবশিং পীনবা লাউথোকখ্রে।
মরুপশিং,
ঐখোয়গী সরকারগী পান্দম অমসুং অচেৎপা ফিরেপ অদু ময়েক শেংলে অমসুং মসিগী মাইকৈদগী দাইভর্জন তৌবা অমত্তা লৈতে। নেসন ফোরমদা ঐখোয়গী অচেৎপা ফিরেপ ওইগেরা, নৎত্রগা দোল্লর ত্রিলিয়ন ৫গী ইকনোমীগী ৱারেপ ওইগেরা, নৎত্রগা সেচুরেসন এপ্রোচ ফংনবা ঐখোয়গী পান্দম ওইগেরা, নৎত্রগা জিরো ইফেক্ত জিরো দিফেক্তকী ৱাফম ওইগেরা, নৎত্রগা আত্মনির্ভর ভারতকী ঐখোয়গী অচেৎপা ৱারেপ ওইগেরা, নৎত্রগা দিভেলপ ইন্দিয়াগী অচৌবা ৱারেপকীদমক ঐখোয়গী শাংলবা রেস ওইগেরা। ঐখোয়না মসিগীদমক মপুং ফানা মীৎয়েং থমদুনা থবক তৌরি। ঐখোয়না স্কিমশিং অসি লেপ্পা লৈতনা পাকথোক চাউথোকহল্লি, মখোয়গী প্রোগ্রেস অদু য়েংশিল্লি। সরকার অসিগী এপ্রোচ, চাউখৎ-থৌরাংগী মায়কৈদা ঐখোয়গী কম্মিতমেন্ত অসি অদোম্না ফজনা খঙনরবনি। ঐখোয়না মতম খুদিংগী অনৌবা মাইলস্তোনশিং শেমগৎলি। মরম অদুনা, ইন্দস্ত্রীদগী ঐহাক্না পাম্লিবা অসি, চাউখৎলবা ভারতকী মঙলান অসি মঙফাওনহন্নবা, ইন্দস্ত্রীনা সরকারগা খুৎশম্নদুনা কম্পিতিসন তৌগদবনি, অমসুং ঐহাক্না সরকারবু মাংহন্দুনা অদোম্না মাইপাক্কনি হায়না পাম্মি। পি.এম. পেকেজকী লাউথোকপশিং অসি, ঐখোয় অনিমক্না, সরকার ওইগেরা নৎত্রগা ইন্দস্ত্রী ওইগেরা, মসি শরুক য়ামিন্নরিবা থৌদাং অমা ওইনা খোংজেল য়াংনা মাংলোমদা চংশিনগদবনি। ঐহাক্না অদোমদা মপুং ফানা থাজবা থম্লি।
মরুপশিং,
চহি অসিগী বজেৎ অসিদা চাউখৎলবা ভারত অমগী মায়কৈদা ঐখোয়না চংশিল্লিবা খোঙচৎ অসিদা মপাঙ্গল হাপকদবা অতোপ্পা ৱাফম অমসু লৈরি। হায়রিবা হীরম অসি মেন্যুফেকচরিংনি। চহি ১০ অসিদা ভারতকী মেন্যুফেকচরিং ইকোসিস্তেম অসি করম্না ত্রান্সফোর্ম তৌরকপা হায়বদু অদোম পুম্নমক্না উখ্রে। ঐখোয়না মেক ইন ইন্দিয়াগুম্বা এম্বিসিয়স ওইবা কেম্পেন অমা হৌদোকখি। ঐখোয়না সেক্তর কয়াদা এফ.দি.আই. ঐখোয়না মল্তি-মোদেল লোজিস্তিক্স পার্কশিং শেমগৎলে, সেক্তর ১৪গীদমক পি.এল.আই. স্কিম হৌদোক্লে। অসিগুম্বা ৱারেপশিং অসিনা মেন্যুফেকচরিং সেক্তরগী থাজবা অসি অনৌবা অৱাংবা থাক্তা পুখৎলে। হৌজিক, মসিগী বজেৎ অসিদা, লৈবাক অসিগী অচৌবা শহর ১০০গী মনাক্তা ইনভেস্তমেন্ত-রেদী "প্লাগ এন্দ প্লে" ইন্দস্ত্রীএল পার্কশিং শেমগৎনবা লাউথোকখ্রে। হায়রিবা শহর ১০০ অসি চাউখৎলবা ভারতকী অনৌবা গ্রোথ হবশিং ওইগনি। সরকারনা হৌজিক লৈরিবা ইন্দস্ত্রীএল কোরিদোরশিং অসিসু মোদর্নাইজ তৌগনি। এম.এস.এম.ই.শিংদা ঐখোয়না চাউনা মীৎয়েং থম্লি। মসিনা মীওই করোর কয়াদা থবক পীরি। সরকারনা এম.এস.এম.ই.শিংগী শিংনবশিং অসি থেংনবা অমসুং মখোয়দা খুদোংচাবশিং ফংহন্নবা হোৎনরি। ঐখোয়না এম.এস.এম.ই.শিংদা মথৌ তাবা ৱার্কিং কেপিতেল অমসুং ক্রেদিৎ ফংহন্নবা, মখোয়গী কমপ্লাইএন্স বোর্দ অমসুং তেক্স হন্থহন্নবা, মখোয়গী মার্কেত এক্সেস অমসুং প্রস্পেক্তিবশিং ফগৎহন্নবা অমসুং এম.এস.এম.ই.শিং ফোর্মেলাইজ তৌনবা ২০১৪দগী লেপ্পা লৈতনা থবক তৌদুনা লাক্লি। হায়রিবা বজেৎ অসিদা এম.এস.এম.ই.শিংগীদমক অনৌবা ক্রেদিৎ গেরেন্তী স্কিম অমসু হৌদোক্লে।
মরুপশিং,
বজেৎ অদু পুথোকপা মতমদা, মদুগী মতুংদা খন্ন-নৈনখিবা অদু মরুওইবা ৱাফম খরখক্তদা য়ুম্ফম ওই। হৌজিক হৌজিক চত্থরিবা খন্ন-নৈনবগী অয়াম্বদি মীদিয়াগী থৌনাগী মখা পোল্লি, অমসুং মসিসু এজেন্দা অমগী মখা পোল্লি। শান্তি লৈবা অকোয়বগী ফিভম অমা লৈরকপা মতমদা, ফিভম অদু কুপ্না য়েংশিল্লি। করিগুম্বা মতমদা মরী লৈনবা ইন্দস্ত্রী নৎত্রগা এক্সপর্তশিংনা মসিদা পুক্নিং চংলি, অমসুং মদুগী মরমদা ঙাংলি। অদুবু ঐহাক্না খল্লি মদুদি সেক্তর খুদিংমক্তা বজেৎকী অসিগুম্বা পোৎলমশিং অসি হঞ্জিন-হঞ্জিন পাংথোকপা মথৌ তাই, মাইক্রো লেভেলদসু মসিগী এনালাইসিস অসি মথৌ তাই। খুদম ওইনা, হৌজিক, বজেত্তা ন্যুক্লিয়র পাৱর পুথোক্নবা এলোকেসন হেনগৎখ্রে। ঐখোয়না লৌউ-শিংউদা দিজিতেল পব্লিক ইনফ্রাস্ত্রকচরসু শেমগৎকনি। ঐখোয়না লৌমীশিংদা লমগী নম্বর পীনবগীদমক্তা ভু-আধার কার্দসু পীরগনি। স্পেস ইকোনোমীগীদমক লুপা করোর ১০০০গী ভেঞ্চর কেপিতেলগী প্রোভিজনসু শেমখ্রে। বজেৎ অসিদা ক্রিতিকেল মিনরেল মিসনসু লাউথোকখ্রে। ঐখোয়না অথুবা মতমদা ওফ-শোর মাইনিং ব্লোকশিংগী অহানবা ফেজগী লিলাম লাউবা হৌগদৌরি। হায়রিবা লাউথোকপশিং অসিনা চাউখৎপগী অনৌবা লম্বীশিং হাংদোক্লগনি, অনৌবা খুদোংচাবা কয়া শেম্লগনি।
মরুপশিং,
ঙসি, ভারতনা মালেমগী খ্বাইদগী চাউবা ইকোনোমীগী অহুমশুবা মফমদা ওইরকপা মতমদা, অনৌবা সেক্তরশিংদা ওইথোকপা য়াবশিং শেমগৎলি। অখন্ননা ঐখোয়গী সনরাইজ সেক্তরশিংদা। তেক্নোলোজী অসি হৌজিক্কী মতমনি, তেক্নোলোজী অসি তুংলমচৎনি। ঙসি সেমিকন্দক্তর ভেল্যু চেনদা লৈবাক অমা হেক্তা মফম অমা লৈরবদি, মসিনা তুংলমচৎতা অচৌবা থৌদাং অমা লৌগনি। অমসুং মরম অসিনা ঐখোয়না ভারত্তা ইন্দস্ত্রী অসিবু মাংলোমদা পুখৎলি। মসিগা মান্ননা, ঐখোয়না ইলেক্ত্রোনিক মেন্যুফেকচরিংবুসু পুক্নিং থৌগৎলি। ঙসি অসি মোবাইল মেন্যুফেকচরিং রিভোলুসনগী মতমনি। মতম অমদা মোবাইল ফোনশিং ইম্পোর্ত তৌবা লৈবাক অমা ওইরম্বা ভারতনা ঙসিদি মালেমগী খ্বাইদগী মকোক থোংবা মোবাইল মেন্যুফেকচররশিং অমসুং এক্সপোর্তরশিংগী মরক্তা লৈরে। ভারত্তা, ঐখোয়না গ্রীন জবস সেক্তরগীদমক য়াম্না চাউবা রোদমেপ শেম্লে। ঐখোয়না গ্রীন হাইদ্রোজেন, ইলেক্ত্রিক ভেহিকলগুম্বা সেক্তর কয়া অমা মাংলোমদা পুখৎলি। পি.এম. সুর্যগর য়োজনা অসি য়াম্না চাউবা স্কিম অমনি, ভেন্দর কয়া অমা মথৌ তাই, অমসুং সরকারনা য়ুম অমমমদা লুপা ৭৫,০০০ পীগনি। মসি মশামক্না য়াম্না চাউবা রিভোলুসন অমা ওইরগনি। হায়রিবা বজেৎ অসিদা ক্লিন ইনর্জীগীদমক লৌখৎলিবা খোংথাংশিং অসি য়াম্না খন্ন-নৈনরি। ঙসিগী মতমদা, ইনর্জী সেক্যুরিতী অমসুং ইনর্জী ত্রাঞ্জিসন অনিমক ইকনোমী অমসুং ইকোলোজীগীদমক্তা চপ মান্ননা মরু ওই। মসিগা লোয়ননা, ঐখোয়না অপীকপা ন্যুক্লিয়র রিএক্তরশিংদসু থবক তৌরি। মসিনা ইন্দস্ত্রীদা ইনর্জী ফংহনবদা কান্নবা ফংহনবতা নত্তনা সেক্তর অসিগা মরী লৈনবা সপ্লাই চেন পুম্নমকসু অনৌবা ললোন-ইতিক্কী খুদোংচাবা ফংগনি। ঐখোয়গী ইন্দস্ত্রীশিং অমসুং ইন্ত্রপ্রিনরশিংনা মতম পুম্নমক্তা লৈবাক অসিগী চাউখৎ-থৌরাংগীদমক মখোয়গী অচেৎপা ফিরেপ অদু উৎলি। ঐহাক্না থাজবা থম্লি মদুদি অদোম্না ঐহাক্না পনখিবা সনরাইজ সেক্তর পুম্নমক্তা ভারতপু মালেমগী শান্নরোই অমা ওইহল্লগনি। অমসুং ঐহাক্কীদমক্তদি, মসি গ্লোবেল প্লেয়র হায়বা ৱাহৈ অসিখক্তমক নত্তে... ঐহাক্না ময়েক শেংনা থাজৈ মদুদি ঐহাক্কী লৈবাক অসি মালেমগী প্লেয়র অমা ওইগনি।
মরুপশিং,
ঐখোয়গী সরকার অসিদা পোলিতিকেল ৱিলগী অৱাৎপা লৈতে, অমসুং অদোমসু মদু খঙলি। ঐখোয়গীদমক্তদি, লৈবাক অসিগী অমসুং লৈবাক মীয়ামগী অপাম্বশিং অসি খ্বাইদগী মরু ওই। ভারতকী ইন্দস্ত্রী অমসুং প্রাইবেৎ সেক্তর অসিসু চাউখৎলবা ভারত অমা শেমগৎনবা শক্তি লৈরবা মীদিয়ম অমনি হায়না ঐহাক্না লৌই। ঐহাক্না অদোমগুম্বা শেন্মিৎলোন শেম্বা মীওইশিংবু ভারতকী চাউখৎপগী ৱারী অসিগী মরুওইবা দ্রাইভিং ফোর্সনি হায়না লৌই। অমসুং লাল কিলাদগী ফাওবা ঐহাক্না মসিগী মতাংদা চাউথোকচবা পোকপগা লোয়ননা ফোংদোকখি।
মরুপশিং,
ঙসিদি মালেম পুম্নমক্না ভারত অমসুং ময়াম পুম্নমকদা মীৎয়েং থম্নরক্লি। যঙসি ভারতকী পোলিসী, ভারতকী থৌনা, ভারতকী ৱারেপ, ভারতকী ফিরেপশিং অমসুং ভারত্তা পাংথোক্লিবা ইনভেস্তমেন্তশিং অসি মালেম পুম্বগী চাউখৎপগী য়ুম্ফম ওইরক্লি। মালেম পুম্বদগী ইনবেস্তরশিংনা মফম অসিদা লাক্নবা কন্না হোৎনরি। মালেমগী লুচিংবশিংনা ভারতকী মতাংদা পোজিতিব ওইবা মওংদা থাজবা থম্লি। মসি ভারতকী ইন্দস্ত্রীগীদমক অচৌবা খুদোংচাবা অমনি, মসি সনাগী খুদোংচাবা অমনি। ঐখোয়না মসিগী খুদোংচাবা অসি মাংহন্দনবা হোৎনগদবনি। নীতি আয়োগকী মীফমদসু, ঐহাক্না চীফ মিনিস্তরশিংগা উনখিবা মতমদা, ঐহাক্না মখোয়দা হায়খি মদুদি রাজ্য খুদিংমক্না ইনভেস্তর ফ্রেন্দলী চার্তর অমা শেমগদবনি। শেল থাদনবগীদমক্তা রাজ্যশিংগী মরক্তা অফবা কম্পিতিসন অমা লৈগদবনি। অমসুং ঐহাক্না ঐহাক্কী লৈবাক অসিগী রাজ্য অমত্তা শোত্থনা লৈহনবা পামদে। ইনবেস্তমেন্তকীদমক পোলিসীশিংদা অহেনবা ক্লিয়রিতী পুরকপা, হেন্না ফবা এনভাইর্নমেন্ত অমা শেমগৎপা, ইনবেস্তরশিংনা লৈবাক অসিগী রাজ্য খুদিংমক্তা চৎপা ঙম্নবা খোঙথাং খুদিংদা অফবা গবর্নান্সকী ৱাখল্লোন লৈহনগদবনি।
মরুপশিং,
হৌখিবা চহি ১০গী এক্সপরিয়েন্সকী মতুং ইন্না অমসুং মালেমগী ফিভমশিং অদু য়াম্না নক্না খঙবদগী, ঐহাক্না মপুং ফানা থাজবা থম্লি মদুদি লৈবাক অসিনা নীংখা তম্বগী চহী ১০০ মপুং ফারকপা মতমদা, ভারতনা নীংখা তম্বগী চহী ১০০ মপুং ফারকপা মতমদা, ঐখোয়না চাউখৎলবা ভারত অমা ওইনা চহী ১০০ মপুং ফারগনি। ঐখোয়না লায়রবা লৈবাক অমা ওইনা নীংতম্বা ফংখি, ঐখোয়না লান্থোকখি। মালেম অসিদা কনাগুম্বা অমনা লান্থোকপা পাম্লবদি, লান্থোক্লম্মী, ঐখোয়সু অরোইবা মতম ফাওবা লান্থোকখি, অদুদগী ঐখোয়না ঐখোয়গী খোঙচৎ হৌখি। চহি ১০০গী মনুংদা, অৱাবা খুদিংমক কোক্লগা, ৱারেপশিং অদু মপুং ফাহনদুনা, ঐখোয়না চাউখৎলবা ভারতকী চহি ১০০শুবা কুমওন পাংথোক্কনি। ঐখোয়না হিংলুবা নৎত্রগা লৈখিদ্রবসু, ঐখোয়গী তুংগী চারোন-শুরোনশিংনা চাউখৎলবা ভারত অমা চাউথোকচবা মওংদা হিংগদবনি হায়বা ঐখোয়না মঙলান পুদুনা চৎলি। ঐখোয় পুম্নমক্না পুন্না মাংলোমদা চংশিনসি, ঐখোয়গী ভারত অসি চাউখৎহল্লসি অমসুং মসিগী ৱারেপ অসি মপুং ফাহনবগীদমক, ঈশ্বরনা নহাকপু পুন্সিদা পীখিবা পুম্নমক্তগী খ্বাইদগী ফবা অদু খুন্নাই অসিদা, লৈবাক অসিদা অমুক্কা হন্না পীগদবনি। অসিগুম্বা ৱাখল্লোন অমগা লোয়ননা, ময়াম পুম্নমকপু য়াইফ-পাউজেল পীজরি।
হন্না-হন্না থাগৎচরি!
